|
|
 عبد ابن كلب انعل ابوك
|
في سنه 70 تعرفت بامريكي اسود وسيم طوله مترين و بجسم رياضي اثناء نقاش ماركسي في مقهي الطلبه في جامعة لوند في السويد و كان ياراس ادماسي و مجموعه من الاثيوبيين يحملون افكار ماوتسي تونغ . هيرمان الامريكي الذي يحمل اسمه احد ابنائي اليوم ، و هو الشخص الوحيد في هذا الكوكب الذي لا اخفي عليه اي سر . كان قد فرغ من دراسه القانون في جامعة بيركلي بكلفورنيا .و هو اول شخص اقابله يحتضن افكار تروتسكي الذي طرده استالين من الاتحاد السوفيتي و اغتاله في المكسيك .
عن طريق هيرمان تعرفت بروني براكستون و هو امريكي اسود اخر كان قد رجع من حرب فيتنام و كره امريكا و كان مثل هيرمان يبحث عن تجربه جديده . و يحلم بشراء عربه بورش .
و بعد بضع سنوات و بعد ان رافقني روني في العمل كحمال في الميناء ، و عده مهن اخري ابتاع سياره بي ام دبليو متوسطه العمر . و اقنعنا صديقنا دجو من ساحل العاج بان تلك السياره يمكن ان تباع بضعف ثمنها في ساحل العاج .
و كالعاده كان الواقع غير الحقيقه . و انا و روني لم يكن لنا المام باللغه الفرنسيه . و اخيرا اقترح دجو الاستعانه بصديقه مامدو . و وجدناه في كفتيريا يلعب كره القدم التي تدار باليد و كان الكثيرين يراهنون ضده و هو يفوز كل الوقت و تجلجل ضحكته . و هو يبدو مختلفا بجسمه الرياضي بالمقارنه باهل ساحل العاج الذين يميلون الي القصر .
مامدو شريف او محمد شريف كان يتحدث الانجليزيه بطلاقه فلقد ارسله والده رئيس البرلمان للدراسه في امريكا و لتعلم اللغه الانجليزيه . و يسكن مع والده و زوجه والده الالمانيه في منزل جميل بحوض للسباحه .
و عندما اقترح علي مامدو المساعده في بيع السياره لان دجو كان زميل دراسته ، بسط عضلاته و مقدراته بطريقه صبيانيه . فتدخلت لحسم الامر . و ما ان عرف بانني سوداني حتي تغير وجهه و اشاح بوجهه اشاره الي ان الامر منتهي .
و بعد اشهر من هذه الحادثه كنت اواجه قاضيا اوربيا و بعض المحلفين و مترجم و محامي يريد ان يخلص من القضيه بسرعه و ممثل اتهام يوجه لي تهمة الشروع في القتل بالرغم من ان المحامي يقول ان المتهم لم يستعمل اي سلاح ردا علي اساءة اوربي فظ . و بعد المحكمه التي كنت احسبها مثل محاكم امدرمان تنتهي بسهوله بعد كل مشاجره دمويه ، كنت في طريقي الي السجن .
و قال لي احد الحراس العجائز ،( عندنا معتقل افريقي و انت كمعتقل من حقك ان تسكن في زنزانه لوحدك حسب الفقره 18 من القانون الاوربي ، الي ان يصدر ضدك حكم نهائي . و لكن هذا الافريقي يبدو منهارا فاذا اردت ان تساعد اخاك الافريقي فيمكن ان اضع لك سريرا في زنزانته) .
و بعد قليل كنت اواجه مامدو شريف . و لم يكن يضحك و كانت عيناه اقرب الي الموت . حتي بعد ان تحدثت معه لم يتعرف علي و كان الزهول يخيم عليه . فابن الذوات لم يكن متعودا علي السجن و كان يواجه تهمة السرقه .
و بعد بضعة ايام صار مامدو يقهقه من جديد . بعد ان علمته بعض الحيل في لعب الورق و تحدثنا عن الدنيا . و ناقشنا الفتيات الاوربيات . و في يوم استيقظت في الصباح و كان مامدو يقف فوق راسي و عندما فتحت عيني ،. كان يرفع يده و يتظاهر بانه سيضربني و يقول ( ابد بي كلب بوك ) ثم ينفجر ضاحكا بصخب و يلقي بنفسه علي سريره و يرفع قدميه و يواصل القهقهه .
مامدو شريف كان احد لاعبي فريق ساحل العاج الذي هزم الفريق القومي السوداني في السودان و انتهي الامر بان هاجمتهم الجماهير و حاولوا قتلهم بزجاجات المياة الغازيه التي ملئت بالتراب . مما جعلهم يتجمعون وسط الميدان معرضين ظهورهم فقط للمقذوفات .
الذي تذكره مامدو شريف هو الجماهير التي هاجمتهم و جملة ( عبد ابن كلب انعل ابوك ) . و كيف ان البوليس قد فرق المهاجمين بعنف . مامدو كان يظن ان الجماهير استهدفته بطريق خاصه لضخامة جسمه و خشونته و لانه قد سجل اصابه رائعه . و صارحني ان الكره ارتطدمت بركبته بدون ان يراها و كانت الاصابه .
كما انتقد اللاعبين السودانيين و وصفهم بانهم يلعبون كالنساء و لا يستخدمون الخشونه القانونيه ، و يتخلون عن الكرات المشتركه بسهوله . و ان مدربهم الالماني في ساحل العاج قد دربهم في الاول علي الخشونه القانونيه و بعض الحيل الاستفزازيه . كالدوس علي يد الخصم عندما يستند علي يده لكي يقف بعد سقطته و التظاهر بان الامر عفوي .
مامدو شريف كان يقول لي محتارا لماذا يهاجمنا افارقه سود مثلنا و يصفونا بابناء الكلاب و العبيد . لقد مررنا بمشاحنات في بعض الدول الافريقيه و لكن ما شاهدناه في السودان كان حاله من الكراهيه و البغضاء و الحقد الذي لا نستطيع فهمه . و لقد شرح لنا رجال السفاره معني الاساءات . و كيف يواجهون كثير من هذه الاستفزازات و الاساءات في حياتهم اليوميه .
و كان يقول لي ( بدري ، انا رجل جبان احب ان امزح و ادبر المقالب للاخرين و لهذا فالفزع و الخوف الذي عشته في السودان لا يزال يلازمني . و هو اكبر من خوفي من هؤلاء البيض الذين كانوا ينظرون لي شذرا في هذا السجن . و قبل حضورك كنت افضل ان لا اخرج من الزنزانه ).
اول مره اقابل الدكتور فرانسيس دينق كان في سنة 71 عندما كان سفيرا في ستوكهولم و معه في السفاره كان الاخ الشاعر محمد المكي . و فرانسيس قد درس في مدرسة خور طقت الثانويه و هو الدفعه التي قبل دفعه الاستاذ ود الريح و صديقي الدكتور عبدالرحمن عبد الحميد . و بالرغم من ان الدينكا هم انبل و اعقل السودانيين الا ان فرانسيس حاله خاصه من الادب و الظرف ، و شخصيه يفتخر بها السودان و يجب ان نعتز بها كلنا .
عندما كان فرانسيس يعرض منزله بالرياض للبيع ، كان بعض الجلابه و التجار يحضرون لمعاينة البيت . و يخاطبون الدكتور فرانسيس الشخصيه العالميه باحتقار و ينادونه ( يا ولد ) و هم علي اقتناع كامل بان قيمته لا يمكن ان تزيد عن العبد الخدام . و هذه الحادثه ذكرني بها الابن دينق في محادثه تلفونيه قبل اسبوع .
عندما ذهبت الي تشيكوسلوفاكيه مع شقيقي الشنقيطي احتجنا لشراء الملابس الشتويه قبل الانتقال الي شمال بوهيميا لدراسة اللغه . و بعد الفراغ من الشراء اخذنا عمر عبدالمجيد علي طه في يوم الاثنين 28 سبتمبر 1964 الي مطعم صوفيا البلغاري لانه يقدم الباميا و الاطعمه التي تشبه الطبيخ السوداني . و قابلنا طالب الطب و قتها الدكتور عثمان عمر .
و سخر عمر من عثمان لانهم كانوا مجموعه من السودانيين و قام فيليب اليوغندي بضربهم ضربا مبرحا . و هذا في مسكن طلبة الطب باتيهو كفيتنا براغ 5 . و قابلت بعدها عبدالرحمن محجوب و الذي صار اخصائيا و الذي كان يقول ( و الله ما حارقني الدق و التورم ، لكن حارقني انو انا الجعلي من شندي يدقني عبد . و الله الدق الدقاني ليه العب ده ابوي ما دقاني ليه .)
تعرفت بعبدالرحمن محجوب فيما بعد و عملنا سويا بعد سنه من تلك الحادثه كاعضاء في سكرتاريه اتحاد الطلبه السودانيين و لمست فيه العنصريه و العنجهيه و الاحساس بانه جعلي ود عرب . و عندما يشرب تظهر هذه النعره بشده . و لهذا وصف فيليب بانه عب ابن كلب . و لم يحس باي حرج بالرغم من ان الاخ الفاضل و الدكتور الوزير توبي مادوت كان يشاركهم السكن .
و نحن في المدرسه السودانيه سمعت ان طالب يوغندي كان يسكن عند صديقه في جامعة الخرطوم ، و خرج في الفجر حاملا حقيبته لكي يتوجه الي المطار . فاعترضه رجل شرطه و ساله ( ماشي وين يا عب ؟ في شنو في الشنطه دي ؟. ) و عندما رد الطالب بالانجليزيه كان الرد صفعه قويه ( و كمان بتقل ادبك يا عب ) و النتيجه ان اليوغندي لم يلحق بالطائره بعد ان جر للمركز . و سمعت فيما بعد بان فيليب كان ذلك الطالب اليوغندي .
كثير من الطلبة اليوغنديين و الكينيين قبل استقلال بلادهم و هم في طريقم للدراسه في شرق اوربا قد عبروا عن طريق السودان . و البعض قد تعرضوا لاستفزازات لا تصدق .
يكفي ان شخص في قامة بولين الير الوزير في اول حكومه سودانيه و امام القصر في المساء يتعرض له شرطي قائلا ( بتعمل شنو هنا يا عب ؟ ) . و عندما اقترح السيد بولين الير اخذ العربه الهمبر لمركز الشرطه ، كان الرد ( و كمان بتهزر و بتقل ادبك يا عب ) .
فيليب اليوغندي كان شخصا معقولا و مجتهدا في دراسته و من المؤكد انه قد بلغ شانا عظيما في بلده ، و لكن لا اظنه قد نسي اهانة السودان . و فيليب ليس بسوداني ، ان له وطن . و لكن ماذا عن اهل البلد الذين يتعرضون للاساءه داخل بلدهم و اذا لم نتخلص من هذه الرواسب لن نستطيع بناء امه . و بالاطلاع علي تقرير لجنة حوادث الجنوب في 1955 يبدو واضحا ان مثل هذه العقليه التي تواجدت عند الشماليين هي السبب في حوادث الجنوب التي لم تنتهي الي الان . و لم يقدم اي شمالي للمحكمه ، فقط الجنوبيين قدموا للمحكمه . و لقد حكم في بعض الاحيان كما في حالة المفتش الشفيع او الاستاذ النزير بالحكم بالاعدام علي عشرات الاشخاص لقتل شخص واحد و كانما قتلوه قرصا .
شوقي
|
|
 
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
استاذنا شوقي بدري...كدي ما تشوف لينا طريقة نخفف بيها كلمة يا عبد دي...ولماذا لما نقول والله العبد لله اليوم مبسوط مثلا بكون ما فيها حاجة...ويقولوا ليك في اي مكان جيب سيجاره آآآآ عب...وتمر عادي...فهل العبره في الكلمه ام مقامها ...فالكلمه لغويا تطلق علي جموع البشر...وكلنا في هواء الله عبيد...بس ديك ليش حاره...
| |
|
|
|
|
|
|
|
|
 Re: عبد ابن كلب انعل ابوك (Re: shawgi badri)
|
شكرا يا أستاذ شوقي على القصص المفيدة ذات الهدف النبيل.. وهو التعليم..
قولك:
| Quote: و فرانسيس قد درس في مدرسة خور طقت الثانويه و هو الدفعه التي قبل دفعه الاستاذ ود الريح و صديقي الدكتور عبدالرحمن عبد الحميد . |
الدكتور عبد الرحمن عبد الحميد من أبناء حينا في الأبيض، وصديق أخي الأكبر مهدي الشريف، ولا زلت أذكره حتى الآن مع أنه غادر السودان منذ سفره إلى أوروبا ولم يعد بعدها ، فيما أعلم.. ولا أدري أين هو الآن، ويُقال أنه مستقر في الدنمارك.. فلو كنت على اتصال به أرجو أن تنقل له سلامي..
عندما كنا أطفالا في المدرسة الأولية غالبا ما يختبرنا الكبار، وأصدقاء الأخوان، بمسائل حسابية، ضرب وقسمة وما شابه.. أذكر حتى الآن كيف أن عبد الرحمن عبد الحميد سألني : ثلاثة في ثلاثة في ثلاثة بكم.. ووقف حمار الشيخ في العقبة لأنني في ذلك الوقت لم أكن قد تجاوزت جدول الضرب البسيط.. ولكنه شرح لي بسرعة كيف أحل المسألة..
في بوست أحمد طه ذكرت إسم صلاح عبد الحميد كلاعب كورة من أبناء الحي، وهو أحد أخوان الدكتور عبد الرحمن..
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
العزيز/ شوقي بدري.
لقد تعرض الدكتور فرانسيس دينق لكثير من الشتائم العنصرية والغير موضوعية من كثير من الساسة والمثقفين الشماليين في السودان. ولقد حاولت جاهداً أن أجد سبب لهولا المرضى ولكني للأسف لم أجد لهم سبب سوى عنصريتهم البغيضة, والحسد والغيرة الأكاديمية.
الى الذين لا يعرفون الدكتور فرانسيس دينق. دكتور فرانسيس يعمل ألان مساعد للأمين العام للأمم المتحدة وهي أعلى درجة يصل أليها سوداني في الأمم المتحدة, كما عمل الدكتور فرانسيس من قبل كمحاضر كبير بمدرسة الدبلوماسيين التابعة للأمم المتحدة, كما عمل بعدة معاهد دراسات مهمة بالولايات المتحدة الأمريكية وهي معاهد لها تأثيرا كبير في صنع القرار داخل الحكومات الأمريكية المتعاقبة. ولقد شارك الدكتور فرانسيس ببلورة سياسة أمريكية مهمة تجاه السودان مع السيد/ ستيفن مورسن رئيس القسم الأفريقي بمعهد الدراسات الدولية والاستراجية وقدما المقترح الشهير(دولة واحدة بنظاميين) في مطلع عام 200م. الدكتور فرانسيس دينق من القلائل في العالم الذين يدعون للمشاركة في قمة الدول الثمانية الغنية في العالم لكي يدلوا برأيه في بعض المسائل العالمية الهامة. وبعد كل ذلك يعيش الرجل بمنزل عادي جداً بأحد ضواحي واشنطن, ومنزله مفتوح لجميع السودانيين شماليين أو جنوبيين . رغم مشغولية الرجل الشديدة ولكنه دائماً يساهم في قضايا السودان بوقته وجهده.
تعرف يا عم شوقى معظم القادة السياسيين السودانيين الذين يحضرون للولايات المتحدة الأمريكية
يلجئون لدكتور فرانسيس لمساعدتهم للقاء مسئول أمريكي كبير أو أجراء ندوة في أحد المعاهد الهامة. ولقد استفادوا من الرجل استفادة كبيرة. ولكني أجدهم عندما يكتبون عن نجاح زياراتهم لأمريكا لا يذكرون أو يشكرون دكتور فرانسيس على المساعدة ولا حتى يشيرون الى أسمه. وهناك قصة أحد الدكاترة العنصرين يكتب هذا الرجل بصحيفة يومية في السودان, وهو أحد الذين يتعنصرون على دكتور فرانسيس ويصفونه بعدم الوطنية. أتي هذا الدكتور لكي ينتسب الى أحد المعاهد الدولية الأمريكية بواشنطن. ولكنه لم يكن له تاريخ أو بحوث يرجع لها المعهد, فأتصل مسئولي المعهد بدكتور فرانسيس لكي يتأكدوا من هوية ذلك الدكتور, فقام دكتور فرانسيس بالواجب مثله مثل أي سوداني يريد مساعدة سوداني أخر. لم يتعظ ذلك الدكتور من موقف فرانسيس معه ومازال يمارس هوايته العنصرية ضد الرجل وبكل تبجح ووقاحة.
الاخوة والأخوات.
هناك الكثير والمثير في الممارسة العنصرية في السودان ويجب أن نتحدث عنها بكل صراحة لأن عدم الحديث عنها سوف يؤجل المشكلة فقط, وسوف تكون كقنبلة موقوتة فقط. وذلك لأن هناك ناس حقوقهم هضمت وقتلوا وتشردوا بسبب تلك الاعمال.
دينق.
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
Francis M. Deng
Nonresident Senior Fellow: Foreign Policy Studies
Co-Director, The Brookings-SAIS Project on Internal Displacement
Publications on this site
Expertise
Africa, conflict management and resolution, human rights, internal displacement, regional conflicts, Sudan, U.S.-Africa relations
Education
J.S.D., Yale Law School, 1968; LL.M. Yale Law School, 1965; LL.B., Khartoum University, 1962
Background
Current Positions: Representative of the U.N. Secretary-General on Internally Displaced Persons; Co-Director, Brookings-SAIS Project on Internal Displacement; Research Professor at the Johns Hopkins University's School of Advanced International Studies and Director of the SAIS Center for Displacement Studies. Previous Positions: Distinguished Professor and Senior Fellow at the Ralph Bunche Institute for International Affairs Graduate Center, City University of New York; Minister of State for Foreign Affairs of the Sudan (1976-1980); Sudanese Ambassador to the United States, to Scandinavia, and to Canada; Human Rights Officer, Division of Human Rights, U.N. Secretariat (1967-71); Guest Scholar and Senior Research Associate, Woodrow Wilson Center; Distinguished Fellow, Rockefeller Brothers Fund; Jennings Randolph Distinguished Fellow, U.S. Institute of Peace.
Languages
Arabic
Publications
Books:
A Strategic Vision for Africa: The Kampala Movement, with I. William Zartman (2002)
African Reckoning: A Quest for Good Governance, co-editor with Terrence Lyons (199
Masses in Flight: The Global Crisis of Internal Displacement, with Roberta Cohen (199
The Forsaken People: Case Studies of the Internally Displaced, co-editor with Roberta Cohen (199
Sovereignty as Responsibility: Conflict Management in Africa, with Sadikiel Kimaro, Terrence Lyons, Donald Rothchild, and I. William Zartman (1996)
War of Visions: Conflicting Identities in the Sudan (1995)
Protecting the Dispossessed: A Challenge for the International Community (1993)
The Challenges of Famine Relief: Emergency Operations in the Sudan, with Larry Minear (1992)
Conflict Resolution in Africa, ed. with I. William Zartman (1991)
Human Rights in Africa: Cross-Cultural Perspectives, ed. with Abdullahi Ahmed An-Na'im (1990)
Bonds of Silk: The Human Factor in British Administration in the Sudan, with Martin Daly (Michigan State University Press, 1989)
Cry of the Owl (Lilian Barber Press, Inc., 1989)
Contributions to Edited Volumes:
"Further Promotion and Encouragement of Human Rights and Fundamental Freedoms, Including the Programme and Methods of Working of the Commission: Human Rights, Mass Exoduses, and Displaced Persons," Human Rights and Forced Displacement, A.F. Bayetsky and J. Fitzpatrick, eds, Kluwer Law International (2000)
"Foreword," War Brought Us Here: Protecting Children Displaced within Their Own Countries (Save the Children Fund-UK, 2000)
Articles:
"The Consolidated Appeals and IDPs: The Degree to Which UN Consolidated Inter-Agency Appeals for the Year 2000 Support Internally Displaced Populations" (August 2000)
"Overview on the Crisis and Response," paper from the Brookings Institution-UNHCR-OAU Workshop on Internal Displacement in Africa, Addis Ababa (October 199
"Exodus within Borders," with Roberta Cohen, Foreign Affairs (July/August 199
| |
|
|
|
|
|
|
|
|
|
Re: عبد ابن كلب انعل ابوك (Re: Deng)
|
كتابتك يا عم شوقي تعجبني جداُ . وانا مبهور كمان أكتر بالتجربه نفسها التي مرت عليك .. أتمنى أدخل معمعه زي دي و أطلع سليم ..
يبدو لي دلوقت انك انسان جواه طاقه عظيمه , وبساطه ..
أحسدك ..
طلال
| |
|
|
|
|
|
|
|
|
|
Re: عبد ابن كلب انعل ابوك (Re: طلال عفيفي)
|
الابن نزار
الحار يا ود اخوي ( ليش ) بتاعتك دي . عبد لمن تكون اساءه غير مقبوله خاصه بعدما تردف بابن كلب و المقصود بها هو التحقير و الاساءه و تستعمل في الدول العربيه لوصف ناس بشر يحملون لون بشرتي و ملامحي .
شوقي
| |
|
|
|
|
|
|
|
|
|
Re: عبد ابن كلب انعل ابوك (Re: طلال عفيفي)
|
العزيز الغالي و الرجل العظيم ياسر
قبل قراءة مداخلتك بربع ساعه كان صديقي اللدود قد اوصلني للمنزل قبل التوجه لكوبنهاجن و اليوم كان يوما هادئا لم نستهلك فيه سوي معركتين .
صديقك صلاح عبدالحميد عثمان هو اصغر المجموعه و الطفهم و اعزبهم ابتسامه . و كان بارا بوالدته و هم اهل زميلنا في المنبر تاج السر . الاخ عبدالله السفاح المولود في نفس الاسبوع مثلي في الابيض عندما يسال عن صديقي عبدالرحمن يقول مازحا كعادته ( سلم علي صاحبك ود الباسترما ) . العم عبدالحميدعثمان كان مشهورا بصناعة الباسترما . ساقابل عبدالرحمن يوم الثلاثاء . عنده فكرة شراء منزل في السويد و عاملني دلال بدون اجر . سابلغه تحياتك . لكن لو حسه انته سالته 3*3*3 بي كم ما حيعرفها .
شوقي
| |
|
|
|
|
|
|
|
|
|
Re: عبد ابن كلب انعل ابوك (Re: طلال عفيفي)
|
ابن الاخ دينق
لك الحب و التحيه . فرانسيس دينكاوي و هذا يكفي . انا رباطابي اذا سالتني كم اعرف من اللئام وسط الرباطاب لاخذ مني الامر ساعات لاحسبهم . و الان لا استطيع ان اتذكر اي دينكاوي ندمت علي معرفته . لك التحيه
شوقي
| |
|
|
|
|
|
|
|
|
|
Re: عبد ابن كلب انعل ابوك (Re: طلال عفيفي)
|
طلال
شكرا يا طلال علي المداخله ، كما قلت لك في مداخله من قبل انك قد حيرتنا . فاذا كنت تكتب بهذا العمق و هذه الروعه و انت خديج ابن سبعه و عمرك 25 سنه فماذا كنت ستكتب اذا اكملت تسعه شهور و اكملت الخمسين !!
شوقي
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
Quote: كثير من الطلبة اليوغنديين و الكينيين قبل استقلال بلادهم و هم في طريقم للدراسه في شرق اوربا قد عبروا عن طريق السودان . و البعض قد تعرضوا لاستفزازات لا تصدق .
يكفي ان شخص في قامة بولين الير الوزير في اول حكومه سودانيه و امام القصر في المساء يتعرض له شرطي قائلا ( بتعمل شنو هنا يا عب ؟ ) . و عندما اقترح السيد بولين الير اخذ العربه الهمبر لمركز الشرطه ، كان الرد ( و كمان بتهزر و بتقل ادبك يا عب ) .
فيليب اليوغندي كان شخصا معقولا و مجتهدا في دراسته و من المؤكد انه قد بلغ شانا عظيما في بلده ، و لكن لا اظنه قد نسي اهانة السودان . و فيليب ليس بسوداني ، ان له وطن . و لكن ماذا عن اهل البلد الذين يتعرضون للاساءه داخل بلدهم و اذا لم نتخلص من هذه الرواسب لن نستطيع بناء امه . |
شي اكثر من محزن يا استاذ شوقي ،
لقد خطرت لي خاطرة وانا اقرا ها الكلام ،
اخوانا العرب ينظرونا الينا ذات النظرة العنصرية التي ننظر بها نحن لاشقائنا الافارقة ،لكنهم يعاملونا بلطف ،ولو ظاهريا نفتقر اليه في علاقتنا ونظرتنا للافارقة !
مثلا اخوانا المصريين رغم ما يقال عنهم الا انهم اقل عنصرية بكثير من السودانيين في تعاملهم مع اشقائهم الافارقة !!
هنالك مقولة تنسب للكيني (من اصل عماني )،علي مزروعي ،يقول فيها :
"كان يمكن للسودانيين ان يكونوا اسياد افريقيا لكنهم اختاروا ان يكونوا اذيال العرب "
ولك شكري علي هذا السهل الممتنع ،الممتع ،
وان كان لي تحفظات علي بعض ما ورد في :بوست بعض قضايا القتل في امدرمان ،
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
استاذنا شوقى بدرى
الله يديك العافية ننتظر مواضيعك بفارغ الصبر
انت كتبت عن الدكتور فرانسيس دينج الكثير ولكنك لم توفيه حقه
ولا يستطيع احدا ان يوفيه حقه ابدا .
لا من الناحية الانسانية ولا مساعداته للسودانيين من الناحية الاكاديمية .
ومع ذلك سريع النكتة ودمه خفيف وعنده سرعة بديهة ما عادية تقول الرباطابى هو ما انت .
انت كتبت انك رباطابى ولو حسبت كم من رباطابى لئيم لاخذ الامر منك ساعات ، ولم يقابلك دينكاوى لئبم الى الان ، دى حقيقة يا استاذنا .
وده تعبير بليغ جدا تشكر عليه .
للدكتور فرانسيس الاحترام والقيام ولك الود .
الاخ عجب الفيا
لك التحية
باين عليك لم تتعامل مع مصريين اطلاقا
ديل اسوأ ناس فى العنصرية اسألنا نحن المكتويبن بعنصريتهم
احسن نحن عنصريين بس ، هم عنصرية وغيرة شديدة .
خاطبت احدى المصريات زميلتها فى المكتب سالتها عن فايل وفالت لها تلاقيه عند السودانية السودة فقلت لها دى سودة ؟؟ فقالت لى مش من افريقيا تبقى سوده فقلت لها وانت من افريقيا كمان فردت مين قالك نحن مش من افريقيا ( طبعا فى الجغرافية ماحيييين صفر ودى نفسها اللى قالت بنوقف منكم النيل ما يصب عندكم ، وكفى ) .
بقى لكم ان تعرفوا ان السودانية الذكرتها بانها سوده ابيض منها عشرة مرات وبت ناس عمك الجزلى يا عم شوقى .
شفت ليك عنصرية اكتر من كدة يا اخى عجب الفيا .
ولكم الود
ام وضاح
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
الأستاذ الكبير شوقى
رغم عدم اختلاف اثنين فى انك قامة سامقة وانك بارع فى كتاباتك
ولكن اعترف لك بان ذكرياتك لم تسعدنى ابدا وهى من الاشياء التى نحاول نسيانها ...
ليتك أتيت لنا بذكريات افضل من هذه تصب فى خانة الوحدة والوطنية والسلام الذى يسعى له الجميع ويغنى له الجميع ..
لك احترامى
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
الأخ / شوقي بدري
السلام عليكم
ماهذا ؟ ارجو ان تعيش واقعا غير الذي تصنعه انت من خيالك ولنفسك تعرف ماذا وجدت من كتاباتك او من مقالك اعلاه انك عبد لافكار واوهام انت مشبع به تحرر يا سيد من اوهامك هذا واترك عنك هذه العنصرية .
رجل كبير وفي سنك المفروض يكون كلامه وتوجيهاته لما يفيد مش اثارة النعرة العنصرية وتجاه رجال نحترمهم ويحترموننا امثال فرانسيس دينق هذا العملاق ابن العملاق ابن رجل اختار ان يكون منطقته مع الوطن الشمال تجسيدا للاخاء وحب الوطن وتأتي انت وتشككه بان هناك اناس يستخفون به ما هكذا تورد الابل يا سعد .
اللهم اهدنا ووفقنا واجمع كلمتنا ووحدنا واجعلنا يدا واحدا في وطننا الحبيب السودان .
| |
|
|
|
|
|
|
|
|
|
Re: عبد ابن كلب انعل ابوك (Re: حمزاوي)
|
Alace in The Wonderlands
أكثر ما لفت انتباهي يا أستاذ شوقي هو:
| Quote: هيرمان الامريكي الذي يحمل اسمه احد ابنائي اليوم ، و هو الشخص الوحيد في هذا الكوكب الذي لا اخفي عليه اي سر |
لأن هذا الكلام ذكرني بأحد سودانيي الشمال الذين اختاروا المنافي وظنوا أنهم بالفعل أصبحوا ينتمون إلى ابناء أمم اخر. ذلك السوداني لديه أبناء يحملون الاسماء مثل: جورج .. مايكل .. ومش عارف إيه .. وهو اسمه "علي". تمنيت أن أرى في حياتي مسيحي اسمه عيسى .. دعك عن محمد!!!. عيسى عليه السلام لا يحمل اسمه غير المسلمين!!!. أها هيرمان ده شنو؟.
أعذرني يا أستاذ شوقي .. والله لم أجد اي شيء مفيد في مقالك هذا .. ولا أعلم ما الذي يجب أن نتعلمه نحن الأبناء من هذا الكلام؟. عبد ابن كلب انعل ابوك؟ هذا معلوم لدينا يا استاذنا شوقي .. والعبيد عبيد بأنفسهم والأحرار أحرار بإرادتهم .. وهذا ليس من المسكوت عنه.
أحياناً تكتب كلاماً غير مفهوم بالنسبة لي. أو لا أفهم الرسالة التي يحتويها كتابك.
يا سيدي أنا عاوز أسألك سؤال جانبي كده: ليه كونداليزا رايس آفروأميركان مع انو جدها مولود في امريكا .. بينما لم نسمع عن مادلين أولبرايت بأنها "جِن" أميركان مع أنها نزحت إلى أمريكا وهي طفلة وصارت وزيرة خارجية أمريكية دون أي لقب عرقي ممسك بتلابيب ملابسها الداخلية؟. ومولانا شيخ العفاريت الكبار هنري كيسنجر حتى الآن لسانه لا يستطيع نطق الانقليزية بسلالسة .. وبرضو أمريكي وبس .. بينما جيسي جاكسون ولويس فراخان افروأمريكيين. ها .. صاحبك بتاع الكنغو وللا بتاع وين ده .. لو مشى أمريكا حيعمل فيها آفروأميريكان .. وينتمي لفئة تعامل حتى الآن بإرثها التاريخي التي لا تحب الانتماء إليه أصلاً.
فعلا الآفروأميريكان ليسوا آفريكان في الواقع .. إذ هم مجبرون باللون والعرق. وزي ما إنت يا أستاذنا شوفي بتحب الحكي .. والله أحكي ليك قصة واقعية عن صديقي الضابط بالمدرعات السودانية عندما ذهب إلى أمريكا في كورس تدريبي. حكي لي أنه أول ما وصل بدأ البحث عن الأندية بتاعة السود عشان هو زول بتاع هلس وسكر. أول يوم مشى لواحد من الأندية دي .. بدأ واحد من السود الامريكان يدردش معاه .. وسألوا إنت من وين؟ قال ليه من السودان. رد الفعل من الاسود الامريكي كان: You Mada faka, you sold owa ancestas to de whites
استاذ شوقي .. هدي اللعب شوية .. عشان نستفيد منك بحكم خبرتك وتجربتك .. لكن بطريقتك دي .. أنا ما قادر أستوعب الشغلانة من حكاية هيرمان صاحبك داك.
وخسّمتك بالنبي وسيدي الحسن لو تزعل من كلامي ده. لكن لو زعلت عذرك معاك.
(عدل بواسطة Shinteer on 07-19-2004, 07:35 AM)
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
| Quote: عبد ابن كلب انعل ابوك؟ هذا معلوم لدينا يا استاذنا شوقي .. والعبيد عبيد بأنفسهم والأحرار أحرار بإرادتهم |
| Quote: بدأ البحث عن الأندية بتاعة السود عشان هو زول بتاع هلس وسكر |
شنتير تحياتي.
تهكمك او سخريتك من الافارقة الامريكا، او كلامك كيف العبيد عبيد، والسود بتاعين هلس، يوضح ليه انت عايز تفتت السودان يا"شيخ العرب".
فاستاذنا شوقي قاصد بالضبط ذي ذهنيتك دي، او لانك حاسي طرف السوط لحقك، كلام استاذنا شوقي ماريحك انت والكيزان قرشو او حمزاوي.
بعدين قبل ما تسرح اسأل ليه "الخادم" كوندليسا رايس بسموها افريكان امريكان و "الحرة" اولبرايت مابقولو ليها "جن" امريكان؟
انت ياشنتير متخيل روحك فعلا عربي، او عشان كده بتتريق او تسخر من الافريكان امريكان كناية عن ما يعتريك من استعلاء اجوف، وعنصرية.
بعدين كلامك عن الانتماء للامم الاخري، ينطبق عليك انت مش شوقي الملتزم بافريقيتو، بل جسد الالتزام في ممارستو اليومية.
عليه مارميت بيهو الاستاذ شوقي هو بهتان ليس الا.
مرة تانية اتمني انك ما تاخد كلامي بي صورة شخصية، وانما باعتبارو راي موضوعي حول ذهنية مجسدة في كلامك اعلاه، هي سبب الدم اللي ركب في بلدنا.
بعدين لولا تضحيات الافريكان امريكان لما قدم امثالنا بجواز سفر عبر الاطلنطي، بدلا عن سفن الhuman cargo. فبطل تعالي وازدراء علي خلق الله ياخي.
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
الاخوان الاعزاء
قرشو
حمزاوي
شنتير
لا اري فيما كتبه شوقي بدري ما يغضب ،
فهو اولا يحكي عن ذكريات حقيقية عاشها،يعود بعضها الي الخمسينات
والستينات ،
ولكن للاسف ما زالت هذه الوقائع تشكل ذهنيتنا كسودانيين ،
الطريق الامثل للتخلص من هذه الذهنية هو الاعتراف بها اولا ،
لان التنكر لها دليل علي انها ما زالت تتملكنا ،
| |
|
|
|
|
|
|
|
|
|
Re: عبد ابن كلب انعل ابوك (Re: Agab Alfaya)
|
الذي يقراء هذا المقال يعتقد بان الناس في السودان يمشون وتصحبهم زفة الاصوات من خلفهم 00ياعبد 00ياعبد وهذا مخالف للحقيقه تماما وافتراء في حق الوطن
لم نعد نسمع كلمة عبد في السودات تقال لاحد خصوصا بمعناها المزري000واقول بمعناها المزري لان كثير من الشبااب يخاطبون حتي انفسهم بهذه الكلمه في تحوير جميل لمعناها كان يقول عن نفسه (عب كبير في بلد ضيقه ) ممجدا لمقدراته
ان الامانه تفترض فينا الا نشوه بلدنا من اجل الكسب حتي لو كان كسبا لععد قراء وردود البوست فالوطن امانه 00واظهروا محاسن اوطانكم
| |
|
|
|
|
|
|
|
|
|
Re: عبد ابن كلب انعل ابوك (Re: عبدالله)
|
فى شهر سبتمبر من العام الماضى اى 2003 بعد وليس قبل الميلاد , لكم احد لاعبى كرة القدم بالسودان حكم المباراة , اذ احتسب هذا الحكم جزاء على احد اللاعبين فذهب الكابتن للتحدث مع الحكم , فاول رد جاء من الحكم بان قال له اسكت يا عب , استمر الكابتن فى حديثه للحكم فقال له الحكم ما تتكلم معاى يا عب ,وهنا لكمه ذلك الكابتن...أليست كلمة عب جزء اصيل من ثقافة المجتمع السودانى الا ما رحم ربى ؟
| |
|
|
|
|
|
|
|
|
|
Re: عبد ابن كلب انعل ابوك (Re: عبدالله)
|
سمعت بأن لاعبا قد يسيئ اخر او ان لاعبا قد يسئ حكما فى لحظة انفعال , ولكن اغفر لى جهلى فى انى لم اسمع حكما قد اساء كابتن الفريق لاعتراضه على قراره , ليس هذا جوهر الموضوع ولكنى اعتقد بانه يتوجب علينا مواجهة مجتمعنا بعلاته ومحاولة اصلاحه فى الحد الادنى ذلك الحد الذى مكن بلال رضى الله عنه من مجالسة أعيان قريش
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
| Quote: لم نعد نسمع كلمة عبد في السودات تقال لاحد خصوصا بمعناها المزري000واقول |
.
عبدالله.
راس السوط وصلك واخدت ساتر.
نسيت لمان حاولت تستعدي بكري علينا بحجة اننا بنتكلم عن العنصرية كتير؟
شئ طبيعي مواهيم العروبة من ذنوجة الشمال يتضايقو من تسليط الضو علي قضية الساعة في السودان، بل يسعون علي نحو فاضح لدفن الموضوع واسكات كل يصر علي نبشه بشتي الطرق.
لولا انو ده نادي شمالي لكان ده الموضوع الاساسسي بالمنبر.
جربنا وعلي مدي نصف قرن سياسة دفن الرؤس في الرمال، والحوامة حول مشكلتنا في السودان دون الوقوف عندو وتناولو بجدية، وكنتيجة ماتو ملايين وتشردوا ملايين ولايزالون في دارفور.
بل مصير السودان كلو الان في كف عفريب بسبب النهي عن مجرد الاقتراب من هذه الشجرة المحرمة.
لهذا السبب عبدالله وبكل تبلد احساس وانفصام عن واقع ضحاياه من غير اقلية الجلابة، بيطالبنا الا نشوه جمال وجلال عالموا الشمالي "الفقاعي" او البالوني!
ماتو ويموتون ملاييين وعبدالله لايحس بي تشوه بعد، بل بكل بجاحة بطالبنا ان نسكت عن البشاعة الفي بلدنا ونركز علي المحاسن!
قطع شك لو امثال عبدالله شنتير حمزاوي زول ابن زول، كانوا بيولدو عبيد في السودان لماكان ده كلامهم.
او لو البموتو ذي الضبان ديل كانو شكرية ولا جعل ولا دناقلة لماكان ده حالهم.
انتو واصلو ذي تفكيركم ده، وعما قريب الموت حيكون في المتمة او نوري او عبري.
هنيئا لكم!
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
الأخوان/ قرشوا , شناتير, حمزاوي وعبدالله.
إذا كنا نبحث عن حلول حقيقية لمشاكل السودان العنصرية, علينا مناقشتها , ولا يمكن لنا أن نتناسى الماضي المرير دون مناقشته بكل صراحة ووضوح.
أن ما يقوم به الأب/ شوقي بدري أنه عمل نبيل, ويجب تشجيع الجميع على سرد الأحداث كما حدثت, كما يجب تدوينها وتدريسها للأجيال القادمة وذلك لضمان عدم تكرارها في المستقبل.
دينق
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
| Quote: رجال نحترمهم ويحترموننا امثال فرانسيس دينق هذا العملاق ابن العملاق ابن رجل اختار ان يكون منطقته مع الوطن الشمال تجسيدا للاخاء وحب الوطن وتأتي انت وتشككه بان هناك اناس يستخفون به ما هكذا تورد الابل يا سعد . |
حمزاوي.
أنا الذي حكيت القصة للأب شوقي بدري وسمعتها من دكتور فرانسيس نفسه ولقد كان يحكيها ويضحك في نفس الوقت. لكن دعني أذكرك أن هناك عنصرين يكتبون في صحف الخرطوم ويشككون في وطنية دكتور فرانسيس ويصفونه بأفظع النعوت, سوف أقوم بنقل نماذج لها لكم, لكي تعلموا أن شوقي بدري ده لا يتحدث من خيال.
دينق.
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
| Quote: يا سيدي أنا عاوز أسألك سؤال جانبي كده: ليه كونداليزا رايس آفروأميركان مع انو جدها مولود في امريكا .. بينما لم نسمع عن مادلين أولبرايت بأنها "جِن" أميركان مع أنها نزحت إلى أمريكا وهي طفلة وصارت وزيرة خارجية أمريكية دون أي لقب عرقي ممسك بتلابيب ملابسها الداخلية؟. ومولانا شيخ العفاريت الكبار هنري كيسنجر حتى الآن لسانه لا يستطيع نطق الانقليزية بسلالسة .. وبرضو أمريكي وبس .. بينما جيسي جاكسون ولويس فراخان افروأمريكيين. ها .. صاحبك بتاع الكنغو وللا بتاع وين ده .. لو مشى أمريكا حيعمل فيها آفروأميريكان .. وينتمي لفئة تعامل حتى الآن بإرثها التاريخي التي لا تحب الانتماء إليه أصلاً. |
الأخ/ شانتير.
أريد فقط أن أصحح معلومة لديك, وهي أن لقب ال أفرو أمريكان ده لقب أستحدثه الامريكان السود نفسهم. ففي الولايات المتحدة يطلق على بعض البيض أيريش أمريكان وعلى العرب عرب أمريكان وهكذا, ولا يوجد أي عيب أو تقليل لتكل الفئات.
دينق.
| |
|
|
|
|
|
|
|
|
|
Re: عبد ابن كلب انعل ابوك (Re: Deng)
|
كلامك صح يا دينق .. وأنا قصدت من مداخلتي للاستاذ شوقي أن أقول أن العنصرية التي تمارس في بلاد الغرب أعنف بكثير مما هي ممارسة في كل جهات الأرض الاخرى. هذا ما قصدته بالضبط وفهمته أنت بالضبط.
فما في داعي يلتوا لينا ويعجنوا لينا في عنصرية السودانيين ومش عارف إيه. وللحقيقة .. بتمنى من أمثال الأستاذ شوقي أن يرشد الأجيال اللاحقة أنهم مفروض يعملوا شنو عشان يقدروا يبنوا ليهم وطن. نحن ما عندنا وطن أساساً .. فما الفائدة أن أعرف أن هذا يقول لهذا يا عب ابن كلب أو شيء من هذا القبيل؟.
يا عبد المنعم .. يازول أنا ما زعلان من كلام الاستاذ شوقي. والدليل آخر سطرين كتبتهم في تعليقي. أنا الكنت خايف شوقي يزعل مني. ولو حسيت انو حيزعل من كلامي .. حأمسحو.
بشاشة الله يازاك. إنت وين؟ إنت بتقول في شنو؟. راس السوط لحقني؟ يازول انت اوهامك دي ما داير تخليها؟ أو على الأقل ما تناقرني كتير (بنص اتفاقية 2004). ما في أي سوط هنا عشان يلحقني وللا ما يلحقني. أنا زول حر يا حبيبي .. لا شغال بسياسة ولا بـ political correctness عشان كده ما في سوط بيلحقني. تحياتي.
الأستاذ شوقي. الناس ديل قربوا يقنعوني بأني اتلومت معاك. هل فعلاً أتيت بشيء يزعجك؟. لو بقت على بشاشة ساهلة .. لكن لا اريد أن أسيء لك بأي حال. والعفو والمعذرة مسبقاً.
| |
|
|
|
|
|
|
|
|
|
Re: عبد ابن كلب انعل ابوك (Re: Shinteer)
|
الاخوان والاخوات والابناء شنتير , الفاتح يسن , عصام وامال , قرشو , حمزاوى , بشاشه , عبد الله , عصام الدين , كمال عباس , عجب الفيا , ود حماد والآخرين ... لكم التحيه .
تأكدوا ان القصد ليس هو التشهير بالسودان لانه من المؤكد اننى لا احب السودان بقدر اقل من الآخرين . ولكن كما اكرمنى السودان وحسيت فى طفولتى وصباى وشبابى اننى يمكن ان استمتع بأى شئ واكون فخور بنفسى وعائلتى وقبيلتى , كنت احس واعرف ان الآخرين لا يستمتعون بهذه الحقوق .
ونحن اطفال فى مدرسه بيت الامانه عاكسنا مدرس نايجيرى من اللذين كانوا يدرسون فى معهد بخت الرضاء ويتعلمون اللغه العربيه . ويتدربون فى المدارس قبل الرجوع الى وطنهم . استخفافنا كان بسبب صغر سننا وجهلنا ونطق الاستاذ النايجيرى الغريب . فقام الاستاذ المشهور فؤاد التوم بجلدى وجلد صديقى عكاشه سعد خضر . وطرد عكاشه من المدرسه . ووقفت محتاراً فى البرنده وكنت احسب اننى سأطرد لاننى ارتكبت نفس الجرم ولكن الاستاذ فؤاد التوم قال _( انت تمشى الفصل .. انت ذى ده ؟ ) .
ما نريده اليوم بدون اولاد ساده بدون اولاد قبائل وبشر سواسيه امام القانون والدستور .
انا لا اركب الموجه . انا كاتب اول روايه سياسيه فى السودان وهى الحنق . واهداء الروايه يقول ( الى دمائى الافريقيه الى عنصرى الزنجى الاقوى الى مليكى شاكا . ) والروايه تعالج مشكله الشوفينيه ووضع الرقيق فى السودان قبل وبعد الحريه .
الرواسب لم تختفى الى اليوم . شقيقتى لمياء بدرى تحاضر فى جامعه الاحفاد . قالت للطباخ فى كافتريا جامعه الاحفاد وهو جعلى ( قبل كده كسرتوا لى سنى بحصاصه فى الطعميه . حسه لقيت شعره فى الطعميه . ) فذهب الجعلى واحضر احد العمال فى الكافتريا وقال لها . ( انتى بتاعه مشاكل , ده العب البرمى الطعميه . حسه العب ده عندو شعر عشان يقع فى الطعميه . ) فقالت لمياء ( انت ما بتخجل من الكلام ده , السعودى المشغلك وسيد الكافتريا برضو بفتكرك انت عبد . ) والتفتت الى العامل وقالت له ناس تافهين ذى ديل انت مفروض ما تشتغل معاهم . ولم يخيب الجنوبى ظنها فترك العمل مباشرةً .
وبينما انا اقف مع تؤأم الروح بله والمولود فى امدرمان توقف الدكتور محمد عبد الكريم بدرى امام مكتبنا فى شارع الجمهوريه المواجه للجمعيه الطبيه . وتحدث معى قليلاً والتفت نحو بله وبكل صفاقه قال له يا ولد جيب مويه املى اللديتر ده .
ذهبت فى الثمانينات لذياره الكابتن اسامه اغا الذى كان يلعب للزمالك فى مصر ومكتبه شمال نادى القوات المسلحه . وكان معى تؤام الروح بله او ( جاك ) وجاك الآخر السائق . وطلبت من جاك ان يعبى السياره بالبنزين من محطه البنزين القريبه . ولان الزياره انتهت فى دقائق فلقد رجعت وسألت صاحب المحطه وين الراجل النزلنا هنا قبل شويه السائق العربيه المارسيدس الخضراء فلم يتذكر . فذكرته بأننا قد نزلنا من السياره قبل دقائق امامه فأكد لى انه لا يتذكر اى راجل . وفجأه يظهر جاك . فبادره صاحب المحطه لقيت بنزين سوبر يا جاك ؟ فقلت له ما ياهو ده الراجل البنسأل منه , فنظر الى ود العرب بأمتعاض وقال راجل ؟؟,,,, راجل شنو ,,, ما تقول لى العب السواق .
الاخ شنتير ... لماذا يهمك اذا غضبت انا ام لا أكثر من غضب بشاشا ؟. انا احترم بشاشا جداً وما يقوله هو الآن قلته انا وكتبته اكثر من اربعين سنه وخضت معارك ومشاحنات . والسبب فى اننى موجود فى السويد الآن هو اننى كنت فى القائمه السوداء منذ الستينات لمناصرتى لقضيه جنوب السودان . ارجو ان تتفهم كلام عجب الفيا . هذا الشخص انا لا اعرفه الا من كتاباته . ولكنى على اقتناع تام بأنه اكثر منى فهماً وعقلاً وهذا البورد قد علمنى الكثير . واحببت الكثيرين واحترمتهم بدون ان اقابلهم وهم اصغر منى سناً مثل دينق زمراوى الشريف وكثيرين آخرين .
اذا كان هنالك من يحسب اننى احد اللذين يعشقون الغرب ولقد بهرتنى الحضاره الغربيه فهذا خطاء . وانا الآن اكثر سودانيه من اغلب السودانيين فى السودان . وعندى امتحان للاخ شنتير . فكما تلاحظ فى البروفايل بتاعى فأنا احب ود الشلهمه والحردلو . ولكن لم اتداخل فى خيمتكم والدوبيت والمسادير لاننى كرهت ذلك عندما سمعتكم تنادون بعضكم ب يا عرب ويا عروب لانكم لستم بعرب . واذا كانت هذه قناعتكم فهذا خياركم ولكن اعطونا نحن الافارقه نفس المساحه والحقوق التى تأخذونها لنفسكم .
آل بدرى ارتبطوا برفاعه والاخوان عبد الله ابو سن وحموده بمثابه الاشقاء لنا . وعبد الله خريج كليه الزراعه صديق طفولتى وسكن بالقرب منا فى حى الملازمين . وكما اذكره فهو شخص اسود اللون ويمكنك ان تتأكد من هذا واقصد اسود بمعنى اسود . حموده والذى كان يسكن عندنا فى منزلنا ايام الدراسه الثانويه قد يكون افتح لوناً ولكنه لا يمكن ان يعتبر عربياً . وفى احد الامسيات قال لى ( واحد من صحبانك جاء سأل منك ) وعندما سألته من هو لم يعرف . وسألته شكله كيف . ووقتها كان يزورنى ثلاثه من الاصدقاء . احدهم كريل ويحمل ملامح النوبه . وعثمان ناصر بلال وهو ارقمه . وفقوق نقور ( مصطفى ) وهو شقيق الناظر الحالى لعموم قبائل شمال اعالى النيل وهم دينكا ابلانق فقال حموده ( انا عارف شكلهم كيف ما كلهم عبيد . الرقيق ديل انا ما بفرزهم ) وفى الحقيقه هنالك اختلاف بين شكل الدينكا والنوبه .
اذكر اننى قلت لاحد الاخوه ان ابنى فقوق نقور الوحيد الذى يحمل عيون الشلك . لان جفن النيليين يعلو على الحاجب . وكان الرد ( والله انا الجنوبيين ديل ما بشوف فيهم فرق ) .
عندما ذكرت الاخ هيرمان لم اكن اريد ان اصير امريكياً باطلاق اسمه على ابنى . وكما اوردت فى كتاب حكاوى امدرمان ان هيرمان غير اسمه الى جمال ويقدم نفسه من امدرمان . وتجاهل الرد مرةً على الاخ محمود اسماعيل . وحذره بأن لا يناديه بغير جمال .
الاخ عبد المنعم سليمان من ابو ظبى كان فى زياره لامريكا مع اسرته . وارسلوا جواز ابنه للسفاره السودانيه فى واشنطون . واختفى الجواز فى البريد واوشكت الاجازه ان تنتهى ولم يعطه البريد اى رد مقنع فطلبت منه ان يتصل بهيرمان وان لا يناديه بغير جمال وان يقول له اخوك قال ليك بدون ذكر اسمى . وتردد عبد المنعم طالباً منى ان اتصل اولاً فقلت له اذا جمال بحتاج توصيه يبقه ما اخوى .
عبد المنعم سليمان ابن سر تجار امدرمان قال لى صاحبك فرح وصرخ من الفرح لمن قلت ليه اخوك . وفى يومين استلمنا الجواز . الراجل ده بحبك شديد جداً . هذا هو جمال من امدرمان .
نجى للامتحان يا شنتير يا اخوى . بسبب وصفك لى بأننى احاول ان اكون غربياً..
فى رثاء عز الدين على عامر قلت
كان الرجال دبكر انت السنط وماكا لعوت . عز الدين بعوج الدرب حتى بعد الموت
عامر امير ورفيق الما بفكو الريق . فى الحرابه جله ووسط المروق توريق .
ما هو التوريق ؟؟ .
رداً على هجوم بعض رجال حزب الامه قلت .
يا بشر مافى حجر قوملو شدر . وعكولا متين لحقها دشر .
سيف العُشر ما بكتل بكتل قدر . والسنيف فى اللقد شيتاً بحير .
ما هى عكولا ؟ وما هو الدشر ؟ وما هو السنيف ؟ .
عندما مات قاسم مخير قلت .
يا قاسم اهلك فى الدنيا ابداً ما كلتو . ما غرتم وما همتم اخدوها زراعه دقندى
كان ادت ركزوا وكان عارت ما بقولولا حاو . السمسم الصافى اللا شربو عنتد ولا خالطو الجوجاو .
ما هو الدقندى ؟ وما هو العنتد ؟ وما هو الجوجاو ؟ .
عند وفاة مبارك بسطاوى المزارع من توتى والذى كنت اشاركه كريس فى اداره معديه توتى . قلت .
الريح قلب والموج فات الدير والقريه ميلت وانقطعوا العيايير .
العرفتو منك البجيبو الله خير فى خير واللدر العشارى يوماً بياكله الصير .
يا العوا والسماك الما بخالطو هجير ثابت ذى ام كُبُك والحال بدور له نفير .
وسرتقنا دائماً كاسح والطوف وهيط وكبير وبالنا دائماً رايق برمهات ولا امشير .
ما هو الدير ؟ ما هو القريه ؟ ما هم العيياير ؟ ما هو العوا والسماك ؟ وما هى ام كبك ؟ وبرمهات وامشير ؟ .
هل هذا كلام انسان انفصل عن اصله ؟ بقد ما احب السودان اتمنى ان يكون الجميع متساويين .
لاحظ يا شنتير يا اخوى المره دى كتبت اسمك صاح . بمناسبه الاسماء انت بتحتج على السودانيين البدو ابنائهم اسماء غير سودانيه . نحنا بنقلب فى الكتب دى من ايام كتب التعريفه بنزين ومريسه , السراب وحمامه قرينا كل حاجه يعمينى ما شفته لى ولا سمعته واحد من الصحابه اسمو شنتير .
لكم التحيه ...
شوقى ...
(عدل بواسطة shawgi badri on 07-22-2004, 03:19 PM)
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
الأستاذ شوقي .. أشكرك على الرد الهادئ .. لأني فعلاً كنت شايل هم تجاه ردك .. ويصعب على نفسي أن أدخل معك في أي ملاسنة لاعتبارات كثيرة أحتفظ بها لنفسي.
فعلاً كنا في الخيمة والمسادير ننادي بعضنا بكلمة عرّوب وعرب .. وربما غاب عنك (والله ما أظن تغيب عنك حاجة) .. ربما غاب عنك أن كلمة عرّوب وعرب + حلبة + عبيد، هي ثلاثية الاستهزاء في السودان!!!!. هذه أيضاً من الحقائق السودانية الناصعة. فلا أدري هل نفرت من كلمة عرّوب باعتبارها استهزاء أم باعتبارها كلمة استعلائية؟. من جانبي مازلت مقتنع بأن كلمة "يا عربي" في السودان تنطوي على الكثير من الاستهزاء .. حتى في أم درمان .. بوتقة الانصهار الأولى.
| Quote: الاخ شنتير ... لماذا يهمك اذا غضبت انا ام لا أكثر من غضب بشاشا ؟ |
هذا يهمني يا استاذ شوقي للأسباب التالية:
أولاًَ: الأخ بشاشة من جيلي (أو أعتبره كذلك).
ثانياً: الأخ بشاشة حدثت بيني وبينه ملاعنات وملاسنات .. أعقبتها مكالمة أزالت الكثير من اللبس الناشيء عن عدم معرفتنا لبعضنا البعض إلا من خلال الكتابة على هذا البورد. وكما يقال "الما بيعرفك يجهلك" .. وما يكتب في أو على البورد في أغلبه لا يعكس الصورة الحياتية الحقيقة لشخص الكاتب.
ثالثاً: كانت كتابات بشاشة "بتفوّر" دمي .. ولعلمي أنه من جيلي .. لم أجد مانعاً في أن أدخل معه في حرب إساءات (لأنها إلكترونية) .. حتى ألهمني رأسي بفكرة المكالمة مع بشاشة .. فوجدته على عكس ما توقعت.
رابعاً: ربما يأتي اليوم الذي أتصل بك فيه هاتفياً .. لكن لا أريده أن يكون لتسوية خلاف سايبري .. بل أريده أن يكون للسلام وحسب.
خامساً:أكدت قبل ذلك بأنه إذا قدّر لي الذهاب إلى أمريكا .. فسوف يكون منزل بشاشة المحطة الرئيسية لي .. لزوم الهترشة والنقيق وليس "للدواس" .. لأني عرفت الزول ده وعمايلو مع ناس بيتو.
سادساً: أها يا شوقي .. أنا بشاشة ده ممكن اتخانق معاه وأصالحو تاني .. لكن امكانية إني أتخانق معاك دي بعيدة؛ مرة تانية لأسباب لا أستطيع تجاوزها.
سابعاً: تاني شنو؟. حسب تقييمي الشخصي .. يعني بالنسبة لي أنت وبشاشة شخصان مختلفان .. وأتعامل مع كل واحد منكما حسب مكانته عندي .. ولا أقلل من مكانة بشاشة ولا مكانتك على اختلافهما بالنسبة لي. الاختلاف الأكبر يا أستاذ شوقي هو عدم شعوري بسوء الأدب عندما أتعارك مع إبن جيلي بشاشة.
ثامناً: كفاية .. الأسباب التي سردتها أعلاه كفيلة بأن تجعلني من التابعين على الأقل، إن لم تجعلني صحابي راسو عديل.
آتي لتعليقك على شنتير والصحابة: في واحدة من القرى المجهولة في واحد شايقي عندو دكيكين صغير .. وهذا الرجل اسمه "جُبارة". دكيكين جبارة ده هو الملاذ الوحيد لكل الناس في المنطقة الصغيرة المحيطة. الألقاب و (الأسامي القفُر) عندنا بالكوم وفي اسماء ما أنزل الله بها من سلطان. أها جبارة ده شغال سخرية من أسماء مثل "الضقيل .. وأبو مِدرة .. والتاي .. وأحمر شين .. والعاس بإيدو .. وهيلمانة من الاسماء المشاترة". في يوم من الايام اغتاظ منه أحد حَمَلة هذه الأسماء .. وقال له: إنت زااااااتك وريني جبارة دي شنو؟ نحن ولا مرة واحدة الفكي دفع الله قال لينا في نبي اسمو "نبي الله جبارة". اها حكاية الصحابي الاسمو شنتير دي ذكرتني "نبي الله جبارة". يازول نحن أكان حضرنا زمن الصحابة والغاغة ديك أكان جطناها على المسلمين. الحمد لله انو شنتير ما حضرها.
أعلم يا استاذ شوقي تجوالك ومعرفتك بالسودان .. وبشعراء منطقتنا .. وأعرف دياركم في رفاعة .. وأظنك على علم ببعض الأشعار الوصفية التي نسجها شعراء تلك البادية. ومن الذاكرة .. أديك امتحان برضو .. زي ما امتحنتني:
محمد زين ودعمر يتغزل في أم عيسى:
حُمّيضة أم بَنّا الخدرا
إتّي (انتي) عناق .. وأمك شا (شاة)
برا تناديني .. بقولّك ها
وبرا شغلة البيت بَغَشا
الحميضة معلوم أنها خضراء .. وأم بَنّا "الطاعمة" خضراء .. فما هي الخضرة التي تدلّه وتغزل فيها شعراؤنا في الحضر والبادية؟. وما هو السر في وصف الفوارس بـ "الزُّرْق"؟. يا استاذ شوقي .. المسألة ليست بتلك البساطة وأن هذا أسود وهذا بنفسجي .. وكما ترى إن التغزل في "الخضار" أكثر من غيره .. وما الخضار إلا السواد في تلك البلاد التي تعيش فيها الآن.
وعيييييييك لو جبت ليك الغزل في اللون اللخدر (أو الأخضر) .. من نوع: خدرة جلدِك الـ صَبْ فوق أبو شعيبيّة. ده كلام غميس وغلاد. جلدها زي لون شخيتير المطر الـ صبْ فوق صنقور جبل أبو شعيبية!!!. والشخيتير لا جدال في سواد لونه. والشخيتير هو الـ "ضُل" ضل المطر. وفوق كارتوت شخيتيراً تخيــّـــن خرّ. الله يرحمك يا الحاردلو ويوسدك الباردة ويديك قصر في الجنة أم صقط.
المشكلة في السودان، حسب فهمي، أكبر من الالوان .. ولا يمكن اختزالها في ألوان .. ولو أن وحدة اللون كافية للوحدة الوطنية لما ادّعت تايوان بأنها ليست صينية .. ولما انفصلت كوريا الشمالية عن الجنوبية و"وقفت عضم حوت في حلق كوريا الجنوبية" .. ولما غزت اليابان الصين واحتلتها ومارست كل مقزز في حق بعض مواطنيها (الناس ديل كلهم صفر صررررررر لا فيهم أزرق ولا أخدر) .. ولما حارب الايرلنديين الشماليين بريطانيا (بيض) .. ولما سمعنا بمجازر بين مسلمي ومسيحيي نيجيريا (سود صرررر) .. ولما "حتوها قرض" أبناء رواندا (سود أيضاً) .. ولما انفصلت بنغلاديش عن باكستان (رغم وحدة الدين واللون) .. ولما مات أبنا إقليم الباسك سعياً للانفصال (ديل لونهم شنو؟ نقول بيض) .. ولما طالبت كيبيك الانفصال عن كندا (بيض كابر عن كابر) .. ولما قام نَفَسي يا أستاذنا شوقي (شنتيري اللون كجيرتِه).
إذن لا أحتاج لمن يذكرني بأني أسود (أضحك يا بشاشة) .. ولا أحتاج لمن يعيد علي تاريخ تجارة الرقيق المعلومة للجميع .. والتي يحتمي معظم مناضلينا مع أربابها في الولايات المتحدة أو في أوروبا .. وما تزال آثار الرقيق حية حتى يومنا هذا في تلك الدول التي يحتمي بها حماة حقوق الإنسان من أبناء الدول "النايمة". وفي هذا المقام .. أذكر أني قرأت محضر لندوة اشترك فيها البروفيسور علي مزروعي (صاحب نظرية إعادة إحتلال إفريقيا) .. وذكر علي مزروعي في تلك المحاضرة (في ما معناه وليس نصاً حرفياً) أن تجارة الرقيق في حقبة تاريخية معينة كانت ممارسة تجارية اشترك فيها البيض والعرب والأفارقة .. ولم تكن بالنسبة لهم تعني انتهاكاً لحق إنسان. ثم بدأ الوعي ينتشر وبانت سوءة هذه التجارة البشعة .. وانكمش خجلاً من ارتبط اسمهم بها. ثم ماذا حدث؟. حدث الآتي: الرقيق الذي اقتاده الأوربيون والغربيون بالسلاسل منذ تلك العصور البعيدة .. مازال يُعامَل بذات المرتبة العبودية .. وتلصق صفة الأفريقي باي سليل من سلالة الرقيق الأول .. فيقال جيسي جاكسون آفريكان أميركان .. ولا يقال أن مادلين أولبرايت تشيك أميركان رغم أنها لم تولد في أمريكا بينما أجداد جيسي جاكسون وُلِدوا بأمريكا ولا يعرفون غيرها موئلاً. وفي الوقت نفسه (والكلام شرح لما قاله علي مزروعي) نجد أن الرقيق الذي اشتراه العرب أو استرقّه العرب .. قد أصبح عربياً .. فلم نسمع بـ "آفريكان عماني أو آفريكان كويتي". واختتم علي مزروعي (برضو الكلام من عندي كشرح لنص لا أذكره بالحرف) .. اختتم علي مزروعي كلامه بان الثقافة الإسلامية العربية أكثر استيعاباً للعناصر الأخرى .. بل تجد أن الطريق سالك أمام كل بشرٍ كان بأن ينتمي إلى العرب دون إلصاق صبغة "من أين أتى". انتهي شرحي المسهب لكلام علي مزروعي.
أعتقد أنك مطّلع (أو طُلَعة) على كتب التراث العربي .. فهل سمعت أن عنترة هو آفروعربي بدوي؟ (عنترة في كل المصنفات العربية هو من فحول شعراء العرب وليس من فحول شعراء الآفروعرب؛ بينما أميري باراكا مازال آفروأمريكان رغم الجوائز التي نالها عن جدارة) أو هل أتاك حديث عن سليك بن سلكة وأمامه لقب آفروعربي؟. انظر إلى الخريطة البشرية الآن .. وقل لي اين الاستيعاب التاريخي: أهو في بلاد الغرب أم في بلاد العرب؟. أنا سرحت .. لكن بقراء واقعية لا تنتمي إلى أدبيات الأمم المتحدة وثعالب آخر الزمان. ما الذي حدا بي إلى هذا القال؟. تذكرت غرضي الذي يتمثل في عدم قناعتي بوحدة اللون كعامل موحّد للدولة الوطنية .. وعدم قناعتي بوحدة الدين كعامل موحد لدولةٍ ما .. وعدم قناعتي برطانة الأمم المتحدة ومنظمات حقوق الإنسان (وهي غربية المنشأ) .. وعدم قناعتي بأي شيء ياتي من أمريكا وعفاريت الغرب (في مجال السياسة) .. وعدم قناعتي بالسودان كدولة. الارتباط الوجداني في البدء هو الرباط الأوثق. وبالسودان أربطتنا الوجدانية مشتتة منذ عهد الأنقليز. جنوب وشمال لا يمكن "تلتيق" الإخاء بينهما بناء على علاقة فردية هنا أو علاقة فردية هنا .. وكل العلاقات الفردية بين الشماليين والجنوبيين ناقصة .. ورسمية لأبعد الحدود إلا استثناء .. والاستثناء لا يجب أن تبنى على أساسه قاعدة.
يا خوي أنا كلامي طال وسرحت .. وانت السبب. لأنو ردّك علي أداني مساحة إني أطيل ووفر لي براح لم أتوقعه. فلك الشكر .. والتقدير. بس بشاشة شغلي معاه مختلف.
وتاني العفو
شنتير .. تابع الصحابة.
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
الأخ/ شانتير.
لقد قمت بتصحيح ما كتبته أنت عن الافرو أمريكان وعن أصل التسمية , ولقد قمت بالرد على مقالي وأدركت تصحيحي , فلماذا يا تري أنت تريد أن تواصل بنشر تلك المعلومة المغلوطة؟
بعدين دكتور على مزروعي رجل سقط من نظري منذ عام 1984م . عندما حضر مؤتمر النيميري بتاع قوانين سبتمبر الشهيرة. في ذلك المؤتمر مدح المزروعي نميري وتجربته " الإسلامية " ولم يهتم المزروعي بمحاكم التفتيش التي كانت تمارس البطش في الشعب السوداني. ولقد جمعتني به بعض الظروف في الولايات المتحدة أيضا فتأكد لي أن مثل علي المزروعي ينطبق عليه لقب الشخص المضطرب Confused person. . فهو لا يدري عن ماذا يتحدث. أما حديثه عن الثقافة العربية الإسلامية بأنها أكثر استيعابا للعناصر الأخرى, فأنا أوجه لك السؤال أنت يا شانتير, هل أنت مقتنع بأن الثقافة العربية الإسلامية أكثر استيعابا؟
دينق.
| |
|
|
|
|
|
|
|
|
|
Re: عبد ابن كلب انعل ابوك (Re: Deng)
|
طبعاً الثقافة العربية الإسلامية أكثر استيعاباً .. وعن واقع يا دينق.
كلامك السابق صحيح .. بس ليه حصل؟ يعني ليه الأمريكان والغربيين مصرين على تسمية الزول الأسود افريقي حتى لو جد ابوه مولود في أمريكا؟.
أرجو أن تكون مقتنعاً بأن الثقافة الغربية التي "تنجعص" أنت الآن في نعيمها ثقافة استيعابية أيضاً. وأتمنى أن اراك بعد عامين أو ثلاثة أمريكياً دون لقبٍ آخر .. كاسود أو كآفريكان.
دينق .. بالله بطل المغالطات دي. الغرب بتاع الخواجات ده معلوماتي عنه ما ناقصة .. وما ممكن تقنعني بأن السود الأمريكان اسياد قرارهم في أمريكا .. رغم تاريخهم المديد في تلك البلاد. يا أخي في سجلاتهم مكتوبين "بلاااااااك" و"آفروأميريكان" .. والأبيض ما مكتوب أبيض ولا "آيريش أميريكان".
ياخي انت عاوز تقنعني بشنو .. بالتحديد كده؟ عشان ما نجوط ساي.
برضو بشكرك على المساككة دي .. والتي مازالت مهذبة جداً. أرحب بالمساككة المهذبة.
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
| Quote: طبعاً الثقافة العربية الإسلامية أكثر استيعاباً .. وعن واقع يا دينق. |
ممكن تعطيني أمثلة حية يا شانتير؟ ياخي شوف حال الدول العربية ومعاملاتهم لبعضهم البعض ولغير العرب. الدول العربية الاسلامية دول متخلفة مليئة بالعنصرية والصور النمطية على الغير. فهم لا يعطون للمهاجرين لها أي حقوق مهما طالت بهم الاقامة بها. فبربك يا شانتير هل يوجد هناك أسواء من كلمة بدون في عالم اليوم. أنظر لحال السودان وطنك وما حل به من نهج إقصائي عروبوي إسلامووي بحق سكان البلاد الأصليين. أين هي الثقافة الاستيعابية التي تتحدث عنها يا شانتير؟
حديثك عن الافرو أمريكان حديث يعكس لي عن عدم معرفتكم بأوضاع الأمريكان السود في الولايات المتحدة الأمريكية. دعني أقول لك أن الولايات المتحدة مازالت تعاني من العنصرية وكل الأمريكان يعترفون بذلك بما فيهم البيض نفسهم. ولكن حال الأمريكان السود لا يقارن أبداً بحال أي مجموعة عرقية مضطهدة في عالم اليوم. فهم وضعهم أفضل بكثير. وذلك بضمانات القوانين الصارمة والدستور العادل ونظام الكوته, Affirmative Action.. ومثل هذا النظام لا يوجد أبداً في عالم اليوم.
دينق.
| |
|
|
|
|
|
|
|
|
|
Re: عبد ابن كلب انعل ابوك (Re: shawgi badri)
|
التحية للأستاذ شوقى والتحية للاخ شانتير والتحية للاخ دينق
البوست اصبح اكثر ثراء
دعني أقول لك أن الولايات المتحدة مازالت تعاني من العنصرية وكل الأمريكان يعترفون بذلك بما فيهم البيض نفسهم.
الحمد لله على المعلومة دى فكنا نظنها ارض الاحلام حقاً ..
| |
|
|
|
|
|
|
|
|
|
Re: عبد ابن كلب انعل ابوك (Re: قرشـــو)
|
العزيز قرشـــو
تعرف يا ود اخوي انت من اول الناس التداخلو معاي عند دخولي هذا البوست. عندك حق امريكا مليئة بالعنصرية والاشياء الكريهة. وحتي اوربا كذلك. وكما اوردت عدة مرات فس سمة 1979 وانا في طريقي برفقة شقيقي هيرمان(جمال) وهو امريكي عاش اهله في امريكا لما لايقل عن اربعمائة سنة وربما من الفوج الاول من العبيد الذين اتو من افريقيا, ونحن في طريقنا من هيوستن لتكساس الي جامعة اوستن حيث درس جمال القانون. وتوقفنا في الطريق للاكل. فطردتنا الجرسونة. وتحرك مجموعة من اهل تكساس واحاطو بنا. فقام جمال بجري نحو السيارة. وبعد فترة صمت طويلة. قال لي انت ولدت كسيد في افريقيا. نحن واجهنا هذه التفاهات طيلة حياتنا يجب ان تعرف متي تحارب ومتي تنسحب. تلك كانت معركة خاسرة حتي ولو كسبناها. فالشريف ومساعديه والقاضي والمحلفين سيكونون من نوع الثيران الذين تحرشو بنا وطردونا.
ويمكن ان احكي لك عن الاف المواقف اسوء من هذا. ولهذا نحس بألم الجنوبين والمهمشين والذين ليسو من وسط السودان.
لك التحية...
| |
|
|
|
|
|
|
|
|
|
Re: عبد ابن كلب انعل ابوك (Re: Deng)
|
الابن دينق
شكرا ياسيدي علي مداخلاتك ومساندتك لعمك. ود اخوي شنتير مشي اجازة شهر كما ذكر في بوست مختلف كدي ندفن العكاكيز لحدي ما يجي صادي.
لك التحية..
| |
|
|
|
|
|
|
| |
shawgi badri
nazar hussien
Yasir Elsharif
Deng
طلال عفيفي
الفاتح يسن
Agab Alfaya
essam&amal
قرشـــو
Shinteer
Bashasha
kamalabas
ود حماد
Ahmed Al Bashir
فيس بوك
تويتر
انستقرام
يوتيوب
بنتيريست