|
|
 يا عصمت العالم فتح عينك
|
عمنا شيخ على عبد الرحمن الذى صار وزيراً للداخليه فى اول حكومه سودانيه رجع للجنوب لانه كان يعمل هنالك لفتره ويتذكره الجنوبيون بسبب القفطان الذى لم يكن عادياً فى الجنوب . وفجأه رأى الجنوبيون مدير المديريه الانجليزى وزمن بريطانيا العظمه قاطع تعظيم لشيخ على . واحد جنوبى قال ( بلاهى سوف موندوكورو اب جلابيه مسروت ده لقه لى سنو ) .
انا ما عارف ود العالٍم ده لقه لى سنو . انا طبعاً دفعه اخوهو الكبير محمود فى مدرسه بيت الامانه الاوليه والشافع ده كان ورانا فى ناس نحنا بنوقفهم عشان يجيبوا الكوره من وره . ووره ديل كنا بنوقف عصمت .
كل الزمن ده انا عاوز زول من اولاد الحله يدخل معاى المنبر ده طبعاً ود العباسيه والباقيين ديل هم اولاد حله لكن ديل كمان يعنى صغار فى العمر ( بس ) . اها انا كل يوم اشوف عصمت عبد الرحمن ما كنت عارفه ده عصمت العالٍم ود حلتى . عبد الرحمن دى اول مره اسمع بيها . الود ده كان لازم يستأذنى قبل ما يخش البورد .
لكن الشافع اب عصيبات بتاع الكتاب بقه شاب وسيم ودلوقت راجل مالى هدوموا وشاعر يرسم بالكلمات وصحفى واعلامى ومخرج سينمائى وتلفزيونى . لكن برضو ما مفروض كان ينسى يستأذن اخوانوا الكبار .
سيد صربندى الاطرش وان كان يتكلم بصعوبه كان احد فتوات امدرمان وعرف باطرش قديس او سينما برمبل ومهنته تقطيع اللساتك ومنزلهم يواجه جامع الادريسى فى المورده ولونهم ابيض . حكم عليه بالسجن فى بدايه الستينات . وعندما نقل بورتسودان . استخف به المساجين لانه كان وحيداً وكان يتمنى كل صباح ان يأتى احد اولاد المورده . وفجأه ظهر الصينى من اعتى فتوات المورده وسمى بالصينى لانه كان مربع . ثم انضم اليهم آخر لا اذكره وسيد كان يقول . بعد داك لو زول داير يسف الا ياخد اذن .
اها انا كنت مستنى زول من اولاد العباسيه عشان ما اكون وحدانى فى البورد ديه . الولد ده عنده بوست رائع فى آراء ومقالات عن العباسيه . فلفل الحله ما خله زول وفرحنى لانه ذكر تؤام الروح بله سيد الرجال . وما خله زول . والحقيقه الولد ده بعرف الحله وبريد امدرمان اكثر منى وامكن قدر قريبه عبد الله محمد زين شاعر امدرمان . لكن نسه شلتى انا ناس طليق , كرك , البعاتى , راس خروف , بارود , كدمبس والآخرين .
وذكر صديقه ونديمه الشنقيطى بدرى رحمه الله عليه . واظن الولد ده بعد مابقه صاحب اخوى الكبير وشاف نهزرتى والمراسيل والملطشه حقر بى . وبعد ما ذكر كل الناس من وزراء وشعراء وكتاب ومبدعين ونقاد حتى حواء كلاب وحواء جبيت وحواء بنزين قلته الولد ده يتكلم عن صحبو شوقى بدرى الكاتب الرائع الشاعر احسن من يكتب القصه القصيره واول من كتب الروايه السياسيه والمحلل السياسى شويه كده يديها توم وشمار راح رابطنى بالعنف واشياء يعنى الواحد مفروض يخجل منها بلاهى مش مفروض امشى لندن اتكلم مع مرتو تاخد لى حقى منه . والغريبه آخر مره كنت فى بيتو فى لندن فى الصالون معلق صورتوا مع الصادق المهدى صحبان صحبان وانحنا ناس العباسيه ديل ذى ما قال كرضم المجنون الكان بقعد قدام جامع الخليفه ويمسك حديده فى ايدو يعاين ليها بالساعات ولا يتكلم مره ماشى فى الشارع قالوا ليهوا يا كرضم تعال نديك حديد قال ليهم حديدكم ما بشتغل معانا وكلام ود سيدى ده فى العباسيه ما بشتغل معانا والصوره دى انا اصلوا ما فتيتها لناس العباسيه . ده بس عشان تعرفوا يا جماعه .
شوقى ...
|
|
 
|
|
|
|
shawgi badri
فيس بوك
تويتر
انستقرام
يوتيوب
بنتيريست