|
|
 ياجماعة منو القال انو غناء البنات هابط ..والهبطّو منو وشنو ؟؟
|
والله العظيم بعرف رجال واولاد كتااااار بيحبوا غناء البنات ويرددوه ويتكيفوا منو جدا ..حتى لو كان بالدس دس !!
مايسمونه بغناء البنات بدأ كظاهرة ولكنه تغلل فى مجتمعنا السودانى واصبح المفضل لبيوت الاعراس والمناسبات المختلفة
يعبرن فيه الفتيات عن رغبات مكبوتة يصعب عليهن قولها هكذا جهارا وعلى روؤس الأشهاد حتى لايتهمن بالوقاحة وقوة العين !!
اغانى البنات تناقش باسلوب بسيط الكثير من القضايا الحيوية كقضية الزواج خاصة وكذلك قضايا سياسية واجتماعية اخرى ومشكلات تؤرق المجتمع فيعبرن عنها الفتيات غناءا صاخبا وجريئا جدا ..
ولكن من هم مؤلفى اغانى البنات ؟
حدثتنى مغنية بان من يكتب لها الكلمات ويلحنها هم شباب ورجال وليس بنات..الا انها قالت انهم لايريدون ان يكشفوا عن انفسهم ..
وهل كل غناء البنات يعد هابطا؟..ولماذا؟؟
اغنيات البنات تلتقط سريعا مجمل التطورات الراهنة فى المجتمع وكل الظواهر المستجدة لتنسج منها قصة مغناة
فمثلا ظاهرة تأخر الفتيات فى الزواج غنت لهن المغنيات العديد من الاغنيات كان اشهرها
اب شرا :
جاياك ..جاياك ..يابشرا
جاياك جاية افتو معاك ..يابشرا
بالضرا ..بالضرا
انشاء الله راجل مرة
اخئئئئ
انشاء الله راجل اختى
بركات بجيبو بالبخرات
وهكذا ..!!
وفى احدى الاغنيات سمعتها تقول
الحارب يوسف كوة
وهذه سياسة !!
وهناك الرياضة عندما غنت الفتيات لكمال شداد وقاقارين وغيرهم من اللعيبة الخطرين
واغنيات واغنيات ..ارجو ان نبحث فيها وفى ماورائها ومن الفها ومن لحنها ومن غناها ومن وصفها بالهابطة ولماذا ؟!!!!!!!
|
|
 
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: نادية عثمان)
|
الشاعره الفنانة
لك تحياتى
غناء البنات ,تناولوه النقاد بشئ من عدم المعرفة النقدية وقيل ما قيل فيه
,,,, فهذا الضرب من الغناء فى السودان من ناحية الالحان فيه كثير من العفوية
التأليفية وكذلك الاشعار التى تعبر عن الحال المعاصر لذلك اصدق الغناء فى
عكس الواقع هو غناء البنات لانه يحمل فى دلالاتة المباشرة وغير المباشرة حال المجتمع
وهو دائما يكون من تأليف المجتمع كلة اشعارا والحانا ليس له مؤلف محدد
نحن ليس كغيرنا يمكن ان نطلق على نوع من تاليفنا بى ( الطقطوقة ) تمردا على
حزافيرية وموازيرية الغناء الطويل والمحكوم بى النظريات الموسيقية لذلك لا يوجد عندنا اغنية ( طقطوقة ) ولا يوجد عندنا اغنية هابطة ابدا ولا يوجد عندنا اغنية اريد بها التمرد على المعرفة الموسيقية البحته لذلك حتى فى اغنياتنا التى تعبر عن الوعى الموسيقى تجديها غير منفكة من الفطرة الشعبية التى اصاغتها المعرفة الموسيقية صياغة لم تبعد عن الذهنية المتلقية للعمل بأختلاف مسنويات سماعها
التحية لكل مغنيات بلادى الحبيبات
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: HAMZA SULIMAN)
|
الاستاذ الناقد والمحلل حمزة سليمان
قلت:
لا يوجد عندنا اغنية ( طقطوقة ) ولا يوجد عندنا اغنية هابطة ابدا ولا يوجد عندنا اغنية اريد بها التمرد على المعرفة الموسيقية البحته لذلك حتى فى اغنياتنا التى تعبر عن الوعى الموسيقى تجديها غير منفكة من الفطرة الشعبية التى اصاغتها المعرفة الموسيقية صياغة لم تبعد عن الذهنية المتلقية للعمل بأختلاف مسنويات سماعها
ووالله هذا الحديث اثلج صدرى
وفعلا كلامك سمح على رأى موسيقارنا الموصلى
سلمت على المرور المثمر وارجو ان تعيد الكرة فالبوست بالحضور المفيد يصبح فاكهة ناضجة ولذيذة وشهية التناول..
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: نادية عثمان)
|
الاخت ناديه تحياتى
ينقطع لسان كل من يقول ذللك غنا البنات عباره عن تعبير صادق عن حال المجتمع وهو يعطى الصوره من غير مساحيق او با ودروالبقول غنا البنات هابط ما متابع خلينا نضع مسيره غنا البنات منذ زمن الحرب العلميه وحتى يومنا هذا ستجدين الحقب التاريخيه الاقتصاديه والسياسيه مدونه فى اغانى البنات واقول ليك سر بعض اغانى البنات شعرائها من الرجال وسى يابدوى
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: عثمان فضل الله)
|
الأخت نادية
تحياتي ..
لا أخفي عليك إن قلت لك لا أسمع كثيراً من أغاني البنات أو كما يسمونها إلا عرضاً ..
ولكن في إعتقادي الشخصي أن أي أغنية لها مدلول وأرث متداول بين الجميع ..
هناك الكثير من الأغاني البسيطة التي تناقش الواقع لا يمكن أن نفرغها من مضمونها ..
في إجازتي الماضية كانت بنت عمي تداعب فيني وتغني لي ..
يأب شراء إن شاء الله راجل مرة ..
وهي كانت تقصد أخي الكبير فقد كانت بينهما قصة حب طويلة لكنها لم تتم ..
وهي لا زالت تحبه وتحفظ له ذلك الود وهو الآن يملك من الأطفال ثلاثة ..
وأنا بمداعبة مني كنت أقول ليها " كان ليك " يا المنططة عينيك ..
فيجب أن لا نقلق كثيراً بشانها فهناك الكثير من الفنانات إنطلقن بهذه اللونية من الغناء وأصبحن الآن مغنيات لهن وزنهن .
وكذلك أنا مع رأي الأخ الفنان حمزة سليمان فقد أبان وأفصح في هذا الشأن ..
خالص ودي ..
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: مريم بنت الحسين)
|
بت الحسين الغالية
شنو يامريومة انتى عايشة وين كان ماسمعتى اغنية الدنيا حلوة ليوم الليلة ياااااااااااختى ؟
طيب اسمعى دى ولو عندك تنزليها طوالى
سمح
دياشة
دياشة
كر على انا
دياشة
والجيش نقلوه فتاشة
اوب على انا
باللبنى
باللبنى
كر على انا
باللبنى
الديش نقلو ود مدنى
اوب على انا
السكن الجبال جوة
اوب على انا
السكن الجبال جوة
ده الحارب يوسف كوة
كر علينا
انا ماشة الرئاسة
اوب على انا
دى مكانة حساسة
اوب على انا
دى مكانة حساسة
اصالة مع الحداثة
كر على انا
اها كمان قولى ماسمعتيها يامريومة !!
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: مبيوع)
|
اخيرااااااااااااا ياسر مبيوع عندنا ؟
يامرحبا
يامرحبا
يازول انت كنت ويييييييييين؟
بالله عليك الله تانى ماتختفى كده
سمح
اما بالنسبة للشباب ناس قدورة وكبشور وهناى وهناى ديلك
والله هى ظاهرة اقايتو
والفرصة متروكة للنقاد
انحنا الليلة ناس حفلة بس !
النبى يامبيوع كان تغنى لينا اغنية جنا الباباى ياجنا الهباباى
يلا قبلى جاى
حافظها؟
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: Mohamed Elbashir)
|
الاخت ناديه
يبدو واضحا انك من انصار غناء البنات 
و منو مابحب غناء البنات !!
بس انا عندي شويه اسئله ممكن توصلك لي اجابه علي سؤالك
1/الفرق بين غنا البنات و البحصل اسه في السودان ده شنو ؟؟
2/حدود غناء البنات ويين .. هل هي وسيله للتعبير عن احلامهن
ام نمط غناء يجب ان نتيح له الفرصه في وسائط الاعلام ؟؟
3/هل للاغنيه دور تثويري .. اي هل مهمه الاغنيه الامتاع فقط
ام لها دور في بناء الامه و صياغه تواريخ الشعوب ؟؟
اتمني انو اكون ما صعبتها ؟؟
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: خدر)
|
الأستاذة الفاضلة / نادية
لا أذيع سراً و لا أشيع معصية إن قلت أنني من أشد المعجبين بأغاني البنات ـ أو ما يسمى زوراً وبهتاناً بالأغاني الهابطة ـ بشكل عام سواء كان من يؤديها من البنات أو الأولاد أو حتى من الجنس المش عارف إيه ..
أجد أن كل إن لم يكن جل مما أستمع إليه من هذه الأغاني يعبر تعبيراً صادقاً عن واقع لا يمكن الهروب منه و ما إنتشار هذه الأغاني و تداولها إلا تأكيد على نجاحها الجماهيري فإن كان البعض يراها هابطة أنا شخصياً أراها ( فوووق .. فووق ) و الماعاجبو يسدد إضنينو ...
قناعتي أن الإستماع بحد ذاته فن و أرى من غير المستساغ أن يأتيني فنان متحضر و( راقي ) ليشدو لي برائعة المرحوم العاقب ( هذه الصخرة ) في حفلة عرس مثلاً .. فمن منا يحضر حفل عرس ليتنسم عطر الكلمة و ينهل من عذوبة اللحن و يطرب لتموسق الأداء من ؟؟
و أنا في طريق عودتي من العمل يومياً أحرص على سماع الغناء الفووق و أتفاعل مع مغنين و مغنيات ـ ربنا يحفظهم ـ أسعدوا الكثيرين من متابعيهم أمثالي ،، وقد شمل هذا الإسعاد حتى صغيرتي يارا التي ما أن تركب السيارة حتى تطالبني بتشغيل ( جب .. جب .. جب ) و التي تتفاعل معها أكثر من تفاعلها مع بابا فين و غيرها مما خصص لمن هم في سنها .
قبل عودتي من السودان الإسبوع الماضي حرصت على إقتناء بعض من الأشرطة ـ الحرة ـ التي لا تخضع لرقابة المصنفات الفنية وتباع سراً في الأستيريوهات وكم أنا سعيد و منتشي بها و منها و إليك بعض مما سمعت للرائع لحمادة بحري الشهير بحمادة ( بت ) إذ يقول ..
شمار جابوهو لي ..
من بري .. عصرية
كان عشرة .. كان مية
أنا زولتو الأساسية ..
حنانة !!
الطردوهو و رجع جانا ..
النسى أهلو ما نسانا ..
يا أخواني كان روقتو
أنا بوصف الشفتو ..
الزول الكان حبيبي
فيهو ملامح من أختو ..
الصفقة مالها تعبااااانة ..
الخاينة .. جاسوسة
في بيتنا .. مدسوسة
تقعد في شدرتنا
تحلب في بقرتنا
جات الليلة .. غدرتنا ..
وعقدوا لي و رجع جااانا ..
فتأملي ..
و لي عودة ..
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: عصام دهب)
|
العزيز عصام دهب
قلت ضمن مداخلتك الثرة جدا
لا أذيع سراً و لا أشيع معصية إن قلت أنني من أشد المعجبين بأغاني البنات ))
ولاانا برضو حااذيع سر ولا الهنا كلهم ..منو المابحب غناء البنات على رأى خدر
وزى يارا عندك ......عندى ايمان طول النهار تغنى مع هاجر كباشى :
انا مالى اللليلة مالى
ياعزو
انا مالى
خطبونى
سدو مالى
من عزو
انا مالى ..الليلة مالى ياعزو
اوب عليا ..كر عليا
لاوليد ولابنية من عزو
انا مالى
الليلة مالى ياحبو ..!! وهكذا !
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: Mohamed Elbashir)
|
محمد البشير العزيز
النبى كان تبشر على البنوت البرقصن فى وسط الدايرة ديل وهن بيشبلنك !!
ياسلام عليك يازول ياراقى والله عاجزة عن الشكر
جعلتنى ارقص وابتهج بهجة ماعادية
والله مااكضب عليك قعدت ارقص لمن فترت زاتووووو
ياخى النكد انعل ابوه ...موش كده بالله؟!!
هديتك راااااائعة ..ومرورك باهى ياغالى وارجوك تحضر الحفلة للنهاية
قالوا كبشور جاى فى الفاصل التانى ..وحمادة بت فى الفصل التالت..
| |
|
|
|
|
|
|
|
|
 Re: ياجماعة منو القال انو غناء البنات هابط ..والهبطّو منو وشنو ؟؟ (Re: نادية عثمان)
|
نادية
بصراحة الموضوع شيق ومن خلال مداخلات اهل الفن نحنا جاهزين بس انته كتروا المداخلات
وطبعا ده مداخلة خارج الشبكة بفتكر انو غتاء البنات لعب دورا مقدرا فى الجانب الوطنى ابان فترة الاستقلال ومثال لذالك اغنية عشا الفلاتية
طيارة جات بتحوم
كتلت حمار كلتوم
اما لان فاصبحت اغانى البنات يؤديها كبار المطربين فى سمهرهم الخاص وكثيرا ما اجد شرايط كاسيت .وذى ما قلته غناء البنات معبر وصادق وبيعالج مشاكل كثيرة وبذكر الاغنية البتقول
شل شل كبه لى جالون
ما كبه ليك الطربه ياديك
امشى بكريك
شل شل شل .......
طبعا ده فيها رقصة عروس تخلى بتاع الكمره يبقى دبيب
شكرا على الموضوع الشيق
تحياتى
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: معتصم دفع الله)
|
العزيز معتصم دفع الله
قلت:
لماذ هذه التمسية من أصلو ؟ ..
ولماذا التصنيف ؟ ..
الفن هو الفن ليس قاصراً على فئة دون الأخرى ..
يجب أن لا ننظر لغناء البنات من منظور آخر ..
بمعنى أننا يجب علينا أن نشجعه على الأقل فنياً ..
والله على رايك انا زااتى محيرانى التسمية دى خاصة وانو الغناء ده والله بغنوهو فنانين كبار ومشهورين ولو مافى العلن فى السهرات والقعدات الخاصة
الفن هو الفن ده الصاح جدا
وكما قالت الفنانة
القطر الشالك انت يتكسر حتة
حتة
وتسلم ليا
انت ..!
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: معتصم دفع الله)
|
يا نادية
انا من محبي اغاني البنات والبنات زاتم...... اقدم غنية بتاعت بنات حافظ جزء منها هي من عشرينات القرن الماضي.... عليكي الله شفتيني انا قديم كيفن؟.... الاغنية اساسا غنية رقصة عروس الاغنية بتقول
العتبة
وختتي اللدبة
.......
وا همو
قالو باع امو
.......
من احساسو
قالو باع ناسو
.......
من جهلو
قالو باع اهلو
تعرفي الغنية دي كانت بتغنيها حبوبة لي....وحتى بي رقيصا كمان....شفتي الهيلما دي؟
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: نادية عثمان)
|
دخلت البوست املة فى قرأة عن هذا الفن الجميل. واتمنى ان اجد دراسة قدمتها الاستاذة سعدبة عبد الرحيم فى القاهرة من ضمن نشاطات المركز السودانى للثقافة والاعلام ضمن نشاطات المهرجان وهى عن ثقافة الوسط وتضمنت الزواج بتفاصيلة والاغانى.
وايضا الاستازة زينب الحويرص والاديبة الناقدة سلمى الشيخ سلامة.
اتمنى ان نجد مساعدة من المهتمين فى نشر هذة الدراسات المهمة فى الثقافات السودانية من الاخوة الموجودين فى القاهرة وانت منهم يا نادية واعرف انك نشيطة .
وشكرا
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: Hadia Mohamed)
|
العزيزة هادية محمد
تسلمى على المرور الباهى جدا
وانا معك ان هناك الكثير من الدراسات التى خصصت لهذا الموضوع الحيوى
وقد بحثت فيه العديد ...من زكرتيهم انت من الاساتذة الفضليات وغيرهم كثير
بل ومنهم الدكتورة عفاف الصادق
والفنانة امال النور
وسمية حسن وغيرهن من المهتمات بهذا الفن المعبر
وقد قلتى ضمن ماقلتى فى مداخلتك الثرة :
اتمنى ان نجد مساعدة من المهتمين فى نشر هذة الدراسات المهمة فى الثقافات السودانية من الاخوة الموجودين فى القاهرة
ومن ناحيتى سابذل قصارى جهدى لنوثّق لهذه اللونية
واتمنى ان يمدنا الاخ الاستاذ احمد البكرى بالوثائق المطلوبة من مكتبته الزاخرة
مرورك من هنا اسعدنى وارجو ان لاتغيبى ياهادية ..
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: نادية عثمان)
|
الغالية بت عثمان
لفترة من الزمان ظلت اغاني البنات وغيرها من اغاني التم تم توثق لتاربخ السودان الاجتماعي والسياسي والثقافي في عفوية خالصة لا تشوبها شوائب الولاء والتعصب تحكي في تلقائية عما يدور ويحدث في عجلة دوران تاريخ الامة السودانية والفنانة عائشة الفلاتية لها النصيب الاكبر في ذلك شاركها بقية فنانو الحقيبة في ايقاع فريد يحكي عن واقع المجتمع السوداني في تلك الفترات ولا زالت كثير من الاغاني المعاصرة تحمل نفس الجينات وان كانت بدرجات متفاوتة التقط على عجالة ما تغنت به عاشة الفلاتية في توثيق لحادثة الطائرة الايطالية ايبان الحرب العالمية الثانية
طيارة جاتنا تحوم
شايلة البشاتن كوم
جات تضرب الخرطوم
كتلت حمار كلتوم
وكلتوم كانت بائعة للبن في ذلك الوقت فبدلا من تقبض ثمن لبنها الذي ينتظره اطفالها الصغر دفعت روحها الذكية الطاهرة لحرب لا ناقة لها فيها ولا جمل
فلا الخرطوم ولا كلتوم ولا حمارها لهم شان في صراع النازيين - هتلر - واحلافهم الفاشست - موسليني - ولكن الفلاتية لم تترك دماء كلتوم تذهب هدرا فالقمتهم نصيب مقدر في اغنيتها
هتلر يا النفاش وموسوليني يا الهراش
فلم تعد الطائرة بعدها ابدا
لكي الود يا نادية وح نجي عائدين انشاء الله تعالى
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: محمد حسن العمدة)
|
العزيز محمد حسن العمدة
كدى اسمع دى بالله:
ليالى ياسمرنا
وليالى
ياقمرنا
البريدو فاتنا جنا
ايام ماكنت جافى مابعرف الهمو
لانى ماعرفت السعادة مابتدوم
ليالى ياحنينة
ليالى ياضنينة
بالبريدو اجمعينا
ليالى
ياليااااااااااااااااااااالى
متين العودة تانى
النبق
النق
ليالى ..ياليالى
ليالى
يامودة
البحبو فاتنا
جدة
جدة
جدة
ليالى
العودة تانى
النبى كان بتعرف تنزلها لينا يالعمدة
انا هسة بسمع فيها لكن خسارة مابعرف انزلها ليكم هنا ..
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: saadeldin abdelrahman)
|
سعدالدين عبد الرحمن الاكرم
كدى اسمع دى :
البنسلين ياتمرجى
نادو الحكيم ياتمرجى
ماكلموك..ماحدثوك
ماحدثوك ياتمرجى
حقدو ..خانوك ياتمرجى
دكتور صلاح
ياتمرجى
شايل السلاح
ياتمرجى
شايل السلاح
ياتمرجى
وتاح تاح تراااح
ياتمرجى
السسترات كتبو الرقاد
كتبوا الرقاد
يوم التلات ياتمرجى
دكتور نزار
سيب الهزار ياتمرجى
سيب الهظار ياتمرجى
والبنج
حار ياتمرجى
نادوا
نادوا
ياتمرجى
ماتعذبو ياتمرجى
ماتعذبو
ياتمرجى
ده وحيد
ابوه
ياتمرجى
ونااااااااادو الحكيم ياتمرررررررررررررررجى
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: Mohamed Elbashir)
|
سلام نادية
ذي ما قالوا الناس الفوق ديل هو انعكاس للواقع الاجتماعي
السوداني كل مرحلة عندها نوعية محددة من الاغاني
في فترة من الفترات المغتربين كانوا فوق
مغص يا مغص يا العزابة بس تموتوا مغص يا العزابة
البنات حلوات يا العزابة للعرس راجيات
انحنا ما دايرين يا العزابة الامغتربين يا العزابة
وهذه الاغنية ادت الي احباط الشباب المحلي ولترضيتهم
بدلت الكلمات الي
فرح يا فرح يا العزابة عيشوا حب ومرح يا العزابة
انتوا يا الزينيين يا العزابة للوطن حارسين يا العزابة
ليه تهاجروا سنين يا العزابة وتبقوا مغتربيين يا العزابة
وبعد داك المغتربين زاتم بقوا يصنفوا نوع اصلي ناس الخليج
ونوع تايواني زي ليبيا واليمن
ليبيا واليمن ضياع زمن
يا ابوظبي ويا بلد النبي ويا نقعد كدي.
وبعد داك جوا ناس امريكا واوربا واستراليا
ارحك كندا ما كندا فيها الناس
ارحك كندا ناس كندا احلي الناس يا ود البلد
مع تحياتي وتقديري
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: tasneem)
|
الغالية تسنيم
تسلمى على الحضور الجميل ياغالية
وفعلا زى ماقلتى اغانى البنات اتمرحلت وبتتمرحل حسب التطور الفى المجتمع المعنى
ودى زاتها ظاهرة فريدة بتؤكد تفاعل الشارع السودانى مع كل تطور يحصل فى المجتمع سواء كان سياسيا او اجتماعيا او غيره
انتى عارفة انو الغناء من اللونية دى تقريبا ماموجود الا فى السودان ..ولا النقاد رايهم شنو؟
قلتى ارحكا كندا؟
وهسة فى اغنية طلعت لامريكا لكن ماحافظاها انا ..
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: نادية عثمان)
|
نادية
أيتها المنقّبة في معابد الجمال ...
ليك الريدة ، ومنك الروعة ..
ليتنا نعود إلى الوراء ، ونبحث في بدايات الغناء في مدننا وقرانا ،،، سنجد أن البنات هنّ البداية ،،، فالغناء أصلا مثله مثل كل الجماليات ( صنعة ) نسائية ،،، والغناء لم يكن حكرا على فئة دون فئة ، فبعض الأغاني لا نعرف من هي قائلة كلماتها ، ولا ملحنة الكلمات ، ولا أول بنت قامت بأدائها ، ومثل هؤلاء كثيرات ، وهن يمثلن العامة ،، وعلى مستوى الفئة المنتمية إلى الطبقات الحاكمة وفئات الثراء والجاه ، اشتهرت مهيرة بت عبود ، وبنونة بت المك نمر ، والميرم تاجا وأعتقد أنها عمة السلطان علي دينار ،، وفي منطقتنا اشتهرت امرأة تدعى بت الإسيد بتعاطي الشعر والغناء ، وقد سبقت في ذلك كل الرجال ،، والدلوكة هي أول آلة استخدمت في الغناء في أواسط السودان ، إذ ليس لأهل الوسط آلات موسيقية مثل الطمبور أو الربابة أو غيرها من الآلات الوترية ، وقد عرفت الدلوكة على أنها آلة نسائية ،،،
وأخلص إلى أن الغناء هو في الأصل للبنات ، وهن الكائنات الأجمل والأكثر رهافة ، والغناء لا يصدر إلا من الجميلين الذين يفيضون بالرهافة ،،،
وكنّا نستمتع أيام كنأ طلابا في رحلاتنا في الجريف وأم دوم والحلفايا وشبات وغيرها بأغاني البنات ، وأذكر أغنية الليلة ما جا
يا بت يا زوبا
والدنيا رطوبة
نزلت شكشاكة
في جبال النوبة
يا ده ،،، يا ده
الليلة ما جا
والليلة الليلة
حرق بي نار
الكماين ديلا
مشيت لأبوها
وحمادة أخوها
قال لي
too late
البنية أدّوها
وأذكر أن بدايات الغناء الرجالي في منطقتنا كانت على يد رجل بدأ بتأدية أغاني البنات ، ولم يجرؤ أحد على إلصاق صفة ذميمة بالرجل ، فقد كان من أشجع الرجال ، لكنه كان يعشق الفن والغناء فتغنى بأغاني البنات وبإيقاع الدلوكة ، ومما أذكره من غنائه :
أنا يا ناس
الله لي الليلة
خمسة وستة جوني
في القلّاي قلوني
سهرانات عيوني
وأنا يا ناس
الله لي الليلة
البخور والدلكة
خلّن قلبي علكة
وأنا يا ناس
الله لي الليلة
وفي جلسة مع الصديق الشاب صلاح / شتات تحاورنا حول هذا الموضوع وورد على لسانه نقلا عن بورداب الشرقية هذه الكلمات التي تدلّ على المواكبة :
ده كلّو من بابا
علّا البوابة
خلّاني أتشابا
ده كلّو من وائل
قفل الموبايل
لا مس كول لا رسايل
ده كلو من جدّو
ما لزم حدّو
جدو الله يهدّو
ولي عودة ...
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: ابو جهينة)
|
العزيز ابو جهينة
الله
مااسعدنى
ومااسعد هذا البوست بكل المخضرمين الذين زاروه وسجلو توقيعهم الباهى ومداخلاتهم الثرة المفيدة جدا جدا
ونقاط بحثك مهمة جدا ..بس استوقفتنى بعض الاشياء مثلا:
(( سهولة الحصول على مغنية في أي مناسبة ( ناحية مادية ) .))
انت عارف يااستاذ ابو جهينة انو بعض الفنانات البنات بيطلعوا الحفلة باكتر من مابيطلعو بيهو فنانين كبااااااااااار لهم ثقلهم ووزنهم فى الساحة؟
فى عرس اخوى جبنا واحدة على قدر حالها كده واخدت تلاتة مليون كاقل شئ فى السوق
وبعرف فنانة الصلاة على النبى عينى باردة وماحسادة والله عندها عربية اخر موديل وفيلا فى السودان!!
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: ودقاسم)
|
الاستاذ ناية
انا من عشاق أغاني البنات وعندما أكون في حالة (دبرسة) استمع مثلاً لهاجر كباشي بعدها احس بشي من الراحة والبهجة لا لانه هابط بل لانه يحرك أعصاب لا يهبشها إلا هذا النوع من الغناء الذي أحب
هاك دي:
عزيز وعزيز غنانا يا ريت
دا العكر صفانا ياريت
انا بخش السفارة ياريت
طالبة عمرة وزيارة ياريت
الباقي ما حفظتوا لكن حا احفظو اكيييد
ولك كل الود
| |
|
|
|
|
|
|
|
|
|
Re: غناء البنات هابط .. (Re: خدر)
|
الله اجازى محنك يا بت عثمان؟؟
دوبيت قلنا سمح اها جابت ليها جنس المسكوت عنه ده؟؟
اها شيلى شيلتك؟؟
ما تقولى لى مهنة متاعب؟؟
ده التعب زاتو؟؟
اثنى ما قاله الحبيب حمزه
واثنى نظام الاخ خدر لانه جد ده موضوع مهم
على المستوى الاجتماعى وربما يؤدى الى فهم
ما غاب عنا فى اشكالية المجتمع السودانى؟
وما ذا نسمى ماهو جارى الان فى السودان
بدعوى انه غناء بنات؟
لكم الود
انور عبد الرحمن
| |
|
|
|
|
|
|
|
|
|
Re: غناء البنات هابط .. (Re: anwar abu gaidaa)
|
الأستاذة الفاضلة / نادية
صدقيني كل مرة أحرص على دخول الموقع لأقرا البوست من الأول للآخر و أسرح مع الغناء ( الفوووق ) .. المشكلة أنني لا أستخدم سماعات في المكتب و بالتالي فاتت على فرصة السمع .. و بس بعاين .. أما في البيت فحينما أستخدم سماعة تصر يارا على أنها ملك لها فأكتفي بمتابعة هزها لراسها و أحد كتفيها إذ لم تبلغ مرحلة هز الكتفين معاً .
كما قلت لك أجد في غنا البنات متنفساً من المجهود الذهني الشاق .. قد يقول قائل غريبة !!.. طيب ما تسمع ( زأمفير ) و مش عارف مين .. و أقول يا جماعة دا جزء من ذوقي .. يكون لي عدة أذواق .. يعني يا كدا يا كدا .. ما عاوز ..
في كافة المناسبات الفرايحية التي تخص أسرتنا أحرص على أن تحيى الحفلة فنانة أو طقطاقة أو فنان بتاع غنا ( فوووق ) و أصر على كل من يعارضني .. ياأخوي أنت لو عايز تسمع غناء راقي أمشي أشتري شريط و أسمعو براك عشان مافي زول يزعجك .. الناس جاية تهجج ما جاية تسرح ..
في زواج صغرى شقيقاتي في عيد الأضحى كانت ( بدور و بدرية ) تؤام قمة في الروعة وهن يبتدرن الحفل بأغنية خفيفة و لطيفة و ظريفة ..
يا واد يا شيحة
سيب الفضيحة ..
شن قولك .. ياجميل
سيب الفضيحة
جيب الشريحة ..
غنولك .. يا جميل ..
ثم تواصل الإبداع المهجج ..
دا كلو من بابا
بابا علا البوابة
خلاني أتشابا
زي ( قرودة ) في غابة
دا كلو من عمو
عمو التقيل دمو
ناس الحلة لمو
ودو الشمار لي أمو
أواصل ..
وبجي .. بجي .. بجي
| |
|
|
|
|
|
|
|
|
|
Re: غناء البنات هابط .. (Re: خال فاطمة)
|
غناء البنات هو اصدق تعبير عن واقع المجتمع.
فاذا هبط المجتمع , هبطت معه اغانى البنات.
وهو ايضا يعبر عن تطلعات وامال واحلام بسيطة جدا لا تستطيع الفتيات الحصول عليها الا من خلال الاغنية.
| |
|
|
|
|
|
|
|
|
|
Re: غناء البنات هابط .. (Re: nour tawir)
|
الاستاذة
الباحثة
الغالية نور تاور .....القاهرة تفتقدك ياعزيزتى ..وعبد المكرم يبلغك التحايا الطيبات
قلتى :
Quote: غناء البنات هو اصدق تعبير عن واقع المجتمع.
فاذا هبط المجتمع , هبطت معه اغانى البنات.
وهو ايضا يعبر عن تطلعات وامال واحلام بسيطة جدا لا تستطيع الفتيات الحصول عليها الا من خلال الاغنية.
|
وهل بعد قولك هذا قول من شخصى المتواضع ياااستاذة ؟
| |
|
|
|
|
|
|
|
|
|
|
Re: غناء البنات هابط .. (Re: خدر)
|
الغالى خدر
براحة علينا يازول ..مالك نفسك حار كده؟؟
انت جعلى ولاشنو؟
ههههههه
اولا انت لازم ترجع تقرأقرأة متأنية لكل المداخلات الفاتت ..والله فيها مداخلات ثرة ومفيدة جدا بتؤكد انو البوست ماشى فى الاتجاه المرسوم ليهو تما
ولو كنت بتقصد طريقة التناول لبعض المداخلات يعنى واستصحاب اغنيات وكده فده مهم لنقف على نماذج حية ..ولاانت رايك شنو؟
بعدين ياخدر ..ياعزيزى الموضوع ده وموضوعات اخرى جادة جدا يمكن تناولها بشئ من السلاسة والطرفة والدعابة وبرضو بتكون المعالجة ناجعة والبحث مفيد
وهنا كل زول بيقول رأيو ببساطة
وفى مداخلات ومنها مداخلتك الرائعة اضافت الكتير
ومازال السؤال قائما كعنوان جوهرى ومدخل رئيسى للبوست ..من اين جات التسمية (هابط)
اذا كانت اغنية البنات اصلا تعبر عن مجتمعنا الذى نعيش فيه؟؟
خدر العزيز كن دوما مارا بارائك الجادة والموفقة من كل بوياتى فوجودك يسعدنى جدا
وهديتك رااااقية ومقبولة ياراقى..
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: ودقاسم)
|
العزيز ..الباهى ود قاسم
مداخلة هامة وثرة جدا
وعجبنى جدا الكلام ده
((وأذكر أن بدايات الغناء الرجالي في منطقتنا كانت على يد رجل بدأ بتأدية أغاني البنات ، ولم يجرؤ أحد على إلصاق صفة ذميمة بالرجل ، فقد كان من أشجع الرجال ، لكنه كان يعشق الفن والغناء فتغنى بأغاني البنات وبإيقاع الدلوكة ، ومما أذكره من غنائه ))
وفعلا فى رجال يجيدوا غناء البنات ..فى بعض الاحيان احسن من مغنيات كتييير
ثم ان الفنان المخضرم كمال ترباس غنا اغنية
ابو لى بى
ابو لى بى
يالبنة
ابو لى بى
امى قالت لى اخدى ود الخال قلت ليها لا
اريتو بالخلال
الديمة شيال
حال
يالبنة
وهكذا ..
وغير ترباس كثيريين
ود قاسم وجودك فى بيوتاتى يسعدنى فلا تغب ابدا
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: ملكة سبأ)
|
الحبيبة ملكة الحرف الانيق بلقيس
ملكة سبأ
والله بعد المداخلة الثرة والقيمة جدا دى :
Quote: أأكد علي قولك في ان تلك الاغاني تعبير صادق عن رغبات مكبوتة ومرآة واضحة نستشف من خلالها كثير من واقع المجتمع بمختلف اتجاهته .. وتعكس التغيير والتطور الذي يطرأ على كثير من العادات والمعاملات ..
فمثلا من ناحية التعبير عن المكنونات والمحظورات فالناظر لتلك (الجبجبات) لا يجدها سوى فضفضة وبوح صريح لما يعتمل بالنفوس .. وتسمية (حت النبق) تصبح اسم على مسمى اذا طرحنا النبق فهي تحلل (مؤقت) من الهموم ومتنقس لما يؤرق وتوجد ((مشكلة)) في الإعتراف به صراحة لكثير من الإعتبارات ...
عندما تصدح (الغناية) مثلا :
الأخضر اب لمعة بكاني بالدمعة
فعندما تعلو الجبجبات
جب .. جب .. جب
ايوا ..
قلبو .. قلبو ..
اتمنى تواجد اب لمعة (المعني) في تلك اللحظة لينتزع ذلك الإعتراف من افواههن والذي غالبا لا يتحصل عليه بعيدا عن موقف التجلي هذا ..
وعندما نتأمل الوجوه عند مناشدة اب شرا (لمتين يا اب شرا؟)
او يالطيف سعدي يبقى خفيف
نقرأ حالة الرجاء بوضوح على التعابير والخلجات ..
....
وفي حالات الخنوع للآباء والأمهات تتمني الواحدة ان توصل رسالتها وهى تٌغلي صوتها معاتبة :
يا ابوي يالوالد
ماتبقي لي عارض
جرحت ود الناس
بكلامك الحساس
او
يايمة يالوالدة
ماتبقي لي عارضة
اجرجتى ود الناس
بكلامك الحار دا
وفي ظل الدبلوماسية والحرب الباردة نرى تحول أغاني البنات من :
العجوز القاعدة برة
قاعدة للأذي والمضرة
يانكير اديها طلة
إلى
تعبش امه كان حية
بشيلها في عيني
واطيعها زي والدي
او من :
ياعريس جيب لي حلاطة
اخلط امك ببناتها
الى
اختو البسامة
الطاعم كلاما
(شقتو اللعب دا كيف ؟)
ويمكن ان نلحظ التحول الكبير ومعايشة الواقع وتغير الأوضاع من خلال :
سيد الكارو تعال
تعال بالشايلو تعال
تعال بالعندك تعال
ابوي بيسندك تعال
و
والمظاهر ماهمية
كفاية طيبة اخلاقو
بعد ان كانت معظم الفتيات ينادين ب :
الما مغترب
يبقي تاجر غرب
و
جاب الشيلة مية
ونرى الإنقلاب الخطير على المغتربين ( المقندلين سابقا) بصورة عامة :
ساعتو السويسرية
في ايدو الشمالية ( لسان الحال يعني الفشخرة الفارغة )
تعيش السعودية
اللامة العواطلية ( وهو الانقلاب عينه ) ..
المهم هى مفاهيم تطول كل المناحي كما أسلفت ولم اجد تصوير أظهر لما يدور من خلط لأمور وتخبط في ساحات الساسة وتنبيه اوعي من صرختهن :
يوم الخميس أمسية
جات طايرة امريكية
جات تضرب المنشية
ضربت وليد وبنية
ماشين سوا
الموضوع شيق جدا وانا استمتع بمتابعته إستمتاعي بسماع تلك الأغاني
وعنهم احكي عن اخي الصفير الذي يهوي جدا تريددها وهو اول من يمدنا بكل جديد من غير ان يقصد واعترف اني (البد) الى ان اسمعها حتى ازجره موبخة ( انت كان تنفع !! ياحسام بت) ..
وكثيرا ماحجزته من (كبع) امي على ظهروا عندما تضبطة يترنم : باوب علي انا لو احي انا على وزن
الربة الربة
حي انا
في الكلاكلة القبة جنبنا
وفي بغض الأحيان احيل بينهم واسأل امي ماله ؟
فتجيب انها ضبطته يردد :
المابتصفق إنشاء الله مايعرسوها !!
فاخلي بينهم !!
تعرفوا السبب شنو ؟
عشان اصفق من غير مايشوفوني
والصفقة وين ؟ |
اقايتو ماخليتى شئ
الا بس اقول ليك :
طق ..طق..طق ..دى الصفقة
ثم يالطيف يالطيف
سعدك يبقى خفيف
يالملكة
هههههههههه.......ززوالله ربنا يحضرنى يوم سعدك عشان اجيب ليك هويدا الديامية ..بتعرفيها؟
مغنية رهييييييييبة جدا
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: نادية عثمان)
|
الحبيبة نادية صاحبة البوست والحبيبات و الاحباب المتداخلين
انا من الفئة التى تعتبر غناء البنات هابط ليس من أى منطلق الا لانه لا يحوى قيمة فنية غير تراص مجموعة كلمات متشابهة القافية و الوزن،وكلمة "هابط" ليست بمعنى "خارج" انما للفن وظيفة لا اعتقد ان غناء البنات يقربها،قد يكون مسلياً ومرحاً لكن لا احسب انه ذو قيمة فنية
محبتى للجميع
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: lana mahdi)
|
لنا بت عم مهدى الغالية
اقايتو يانوية حبيبتى وصحبتى وزميلة مهنتى الملكة البنحبها برضو فى قولك ده :
| Quote: انا من الفئة التى تعتبر غناء البنات هابط ليس من أى منطلق الا لانه لا يحوى قيمة فنية غير تراص مجموعة كلمات متشابهة القافية و الوزن،وكلمة "هابط" ليست بمعنى "خارج" انما للفن وظيفة لا اعتقد ان غناء البنات يقربها،قد يكون مسلياً ومرحاً لكن لا احسب انه ذو قيمة فنية |
بقيتى عاملة زى الشريك المخالف الناس كلها عاجبهم غنا البنات الا انتى ..السياسة خربت طبعك يالنوية !!
ههههههههههههه
يازولة مرحب بيك الف مليون ورايك محل تقدير الجميع فهو بالتأكيد لايفسد لودنا المقيم ابدا اى قضية !
| |
|
|
|
|
|
|
|
|
 Re: ياجماعة منو القال انو غناء البنات هابط ..والهبطّو منو وشنو ؟؟ (Re: نادية عثمان)
|
| Quote: بقيتى عاملة زى الشريك المخالف الناس كلها عاجبهم غنا البنات الا انتى ..السياسة خربت طبعك يالنوية !! |
نادية الحبيبة اتخيلي ممكن كلامك يكون صح؟؟؟
انا اتنظمتا رسمي من عمرى 17 سنة اظاهر دة عمر الزهور قضيناهو فى اشواك ساس يسوس..
بمناسبة السياسة خربت طبعك احكى ليكي قصة:
يوم كنا بنتغدا قام ابوي قال لى :"اكلي سمك"
قلتا ليهو "السمك دة ما من اولوياتى"..
وكمان السياسة خربت مفرداتى ولغتى كمان!!
ليك على اجيب شريط غنا بنات اسمعو باذن جديدة،لانى ما كنتا بحب اسمعو من اصلو،
لكن ما برأى جديد هههههههههههههه
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: lana mahdi)
|
لنا صحبتى الحبيبة بت عمى مهدى
قلتى :
Quote: نادية الحبيبة اتخيلي ممكن كلامك يكون صح؟؟؟
انا اتنظمتا رسمي من عمرى 17 سنة اظاهر دة عمر الزهور قضيناهو فى اشواك ساس يسوس.. |
يالنا مابالغتى لكن من سبعتاشر سنة ؟ ياخى ده عمر الزهور ..عمر الغرام ..عمر المنى ..ولاكمان ماسمعتى وردى بيغنى كده ..لمن دخلتى انتى السياسة القدرك يجكسو ويدلعو ولاعلى بالن.!
Quote: بمناسبة السياسة خربت طبعك احكى ليكي قصة:
يوم كنا بنتغدا قام ابوي قال لى :"اكلي سمك"
قلتا ليهو "السمك دة ما من اولوياتى"..
وكمان السياسة خربت مفرداتى ولغتى كمان!! |
اما موضوع اللغة دى فاسكتى ساكت سبب شكلة يومية مع راجلى .....لمن يجى يقول لى عاملة ملاح شنو ؟ اقول ليهو فاصوليا ..يقول لى ليه انا موش قلت ليك داير بامية ..اقول ليهو والله وفقا لتطورات كتيرة فى الوقت الراهن فالفاصوليا هى المتاحة !!
Quote: ليك على اجيب شريط غنا بنات اسمعو باذن جديدة،لانى ما كنتا بحب اسمعو من اصلو،
لكن ما برأى جديد هههههههههههههه
|
الرسول كان تسمعى ندى القلعة وتورينى التاثير المباشر على نفستك المسييسة دى شنو ..وممكن هاجر كباشى .. سمعتى بيها قبل كده ؟
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: Mohamed Elbashir)
|
محمد البشير الرااااااااااااااقى
والله ماعارفة اقول شنو ياخى على الروعة دى ؟
وطبعا كلمة شكرا صغيرووووووووونة عليك شديد جدا !!
| Quote: المره الجايه لي عموله عشان ندي |
اصلو ماعندك مشكلة يازول
وبالمناسبة ندى حاتغنى من كلماتى عدد من الاغانى منها مابتستاهل التفكير الفى البوست التانى ديك شفتها؟
ويسلم
لى محمد يالبنيااااااااااااااااات !!
وماتغيب ياود عم البشير بالله
سمح؟
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: عشة بت فاطنة)
|
لنا بت مهدي عليك الله هسي الجاب السياسة هنا شنو امانة في ضمتك دا مكانا ؟؟؟
كدي خلينا نشيل مسجل بت فاطنة دي ونخش بيهو راكوبة راكوبةQuote: ليه يازمن كبرتني وأنا لسه يافع
أنا لسه بدري على الهموم أنا دوبي شافع
|
ونجبجب للصباح فما زال الليل طفل في مهده
يلا يا شباب جب جب جب جب جبجبجبجبجببجبجب
قال سياسة قال موش برضو في سياسة هابطة ؟؟؟؟ البلد كلها هابطة لي ورا
بعدين تعالي نسعلك السيد موش قال الانسان بطبيعته وفطرته محتاج لاشباع النواحي العاطفية ؟؟؟ اها خلينا بالله نشبع جب جب جبجبجبجبجب انتي قايلة الرقيص دا ما زاتو رياضة هسي عليك الله جنس الهكج البرقصو السودانيين دا ما رياضة اكتر من كاس العالم زاتو ؟؟؟
بعدين عارفة يا لنا غنا البنات دا اجمل مافيهو التلقائية بتاعتو والشحنة العاطفية الكبيرة الفيهو اها جبجبجبجبجبجبجبجببجبجبجب حتى الفليل
كدي اسمعي نضم عشوشة دا عليك الله بنفات ؟؟؟
Quote: وود الخال أريتو بالخلخال .ز
:::: وشوفو لي فقرا كان من قعر شدرا
حبيبي ود الناس ضو القمر بالليل
بالله شوف الكلام دا جميل كيف
حسي دا هابط ؟
وتناجي صديقتها شاكية
سميرة أنا ما جنيت سميرة دا الغرام والريد
والله لي الليمون شقايتو عشية
وشوفو لي شربة خلي النقص دربة
الليلة والليلة دار أمبادر يا حليلها
وحليل تومي
شفتو الحنان دا
|
لا ما شفناهو
وكمان
Quote: ودكتور لؤي كشف على
وعنت المرأة للمواصلات
والكرسيدا السمحة وسمح سيدة
وغنت لحمادة
ودالجيران
حمادة بابو جمب بابنا
حمادة بوظ أعصابنا
الولد تقيل ملاحظين !!
والقطر الشال انت أتكسر حتة حتة
وفي نفس المنوال ـأتي :
اغنيت كركبة أم كركابة ندلى في العزابة ودي مرحلة أـسمت بمزيد من البوح عندما
دخل الرجل سلك الوظيفة ، وسكن مع العزابة ..
الدنيا ما دوامة
وبعد داك سافر الحبيب لدول الاغتراب
يا يمة ووب و ويين على البريدو سافر دبي
وغنت بنات الشمالية لرجوع الحبيب
لان الاغتراب اشاعة ولاشى يعدل الوطن حتى لو أكلوها بموية
حبيبي المنقة والتفاح حبيبي عسل والناس مساخ
حبيبي تعال ..
الكويت راعي جمال
والسعودي .ز
تقصد المغتربين في هذه البلدان لا يجدون الاعمال المشرفة وأولي بهم الوطن
هكذ كانت الفتيات يناجن الاحباء ويعن للزواج بهن وبلا أي مقابل أو مهر ولكن المجتمع والامهات كان لهن راي اخر ..
يا عيني اللول اللول
يا عيني عروسنا دبل
ما بدوك للمفلس
بدوك للمهندس
.ز
وكذك المهندس جاء ورسم البنا
وكذلك غنت الامهات للشيلة والبذخ
تلاتة قدور محلبية وتلاتة قدور سرتية
ولكم كان المجتمع قاسي على الشاب المفلس الفقير
|
شوفي تلفونك وتعالي وكان جبتي وصلات وروابط بالاغاني دي كمان تكوني ما قصرتي
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: محمد حسن العمدة)
|
bb
شوفي تلفونك وتعالي وكان جبتي وصلات وروابط بالاغاني دي كمان تكوني ما قصرتي
· · ·ودالعمدة دا إحتلال عديل ، وانت عارف التلفون مرقني وين طلع بيت الفراش واحدة نسيبة تعيش أنت ، والحكاوي في بيت البكاء كانت عن الخيانات الزوجية ، اصلو في واحد لحس قريشات مرتو ، وكمان جاب ليها ضرة وفي ليالي الاتراح تحلو مثل هذه الحكاوي ، قبيل أ،ا ما قت ليكم الحكي أنثى والكتابة فحل على قول عبدالحميد الكاتب ..وبمناسبة الخيانات وخطف الازواج جات الخاينة الجاسوسة الفي بيتنا مدسوسة ، وفي قولة الاخرى هي الجمرة الخبيثة (فاتورة الكهربا) والخطفت حبيبي بخلصو من عيونة ، وشفتة يا العمدة أثناء النقاش كل النسوان بفتكرو ان الرجل مسكين والزوجة الجديدة هي الملعونة لفت عليه وخطفتو ، وقدر ما شيلتة وختيت وقت ليهم الرجل هو الغلطان لان ترك زوجته واطفالو وبارى شهوته ومارس خداع على المسكينة ، ! اصلو كلامي ما ركب ليهن الا واحدة بس ، أهاشفتو يا جماعة النسوان ديل مسالمات قدر شنو !!
أها ونرجع لحنانة
ونسى اهلو ما نسانة
وقالو امو مجنونة اريده واريد جنونة
وانا حبيت وليدها عشان خاطر عيونها
وقالو امو حنكوشة بتسلم برموشها
وانا حبيت وليدها عشان خاطر قروشها
وهكذا ..
لحظة .. سوف اسكن في هذا البوست ..
| |
|
|
|
|
|
|
|
|
|
Re: ياجماعة منو القال انو غناء البنات هابط ..والهبطّو منو وشنو ؟؟ (Re: عشة بت فاطنة)
|
الحبيبة جدا عشوشة بت فاطنة
| Quote: ودالعمدة دا إحتلال عديل ، وانت عارف التلفون مرقني وين طلع بيت الفراش واحدة نسيبة تعيش أنت ، والحكاوي في بيت البكاء كانت عن الخيانات الزوجية ، اصلو في واحد لحس قريشات مرتو ، وكمان جاب ليها ضرة وفي ليالي الاتراح تحلو مثل هذه الحكاوي ، قبيل أ،ا ما قت ليكم الحكي أنثى والكتابة فحل على قول عبدالحميد الكاتب ..وبمناسبة الخيانات وخطف الازواج جات الخاينة الجاسوسة الفي بيتنا مدسوسة ، وفي قولة الاخرى هي الجمرة الخبيثة (فاتورة الكهربا) والخطفت حبيبي بخلصو من عيونة ، وشفتة يا العمدة أثناء النقاش كل النسوان بفتكرو ان الرجل مسكين والزوجة الجديدة هي الملعونة لفت عليه وخطفتو ، وقدر ما شيلتة وختيت وقت ليهم الرجل هو الغلطان لان ترك زوجته واطفالو وبارى شهوته ومارس خداع على المسكينة ، ! اصلو كلامي ما ركب ليهن الا واحدة بس ، أهاشفتو يا جماعة النسوان ديل مسالمات قدر شنو !! |
اولا يختى البركة فيكم كتير مع انو ده بوست صبحية مابيت بكا
هههههه
وصحى والله النسوان مسكينات ومساااااالمات جدا
Quote: أها ونرجع لحنانة
ونسى اهلو ما نسانة
وقالو امو مجنونة اريده واريد جنونة
وانا حبيت وليدها عشان خاطر عيونها
وقالو امو حنكوشة بتسلم برموشها
وانا حبيت وليدها عشان خاطر قروشها
وهكذا |
..
ده كلو من بابا
بابا علا البوابة
خلانى اتشابا
عشان خاطر هناية
| Quote: لحظة .. سوف اسكن في هذا البوست .. |
الرسول كان تسكنى ياعشة وهو نحنا لاقينك وييييييييين؟
ولاشنو ياود العمدة؟
على الاقل هنا مابجوك ناس الويكة ........مع الاعتذار لهم يعنى
هههههههههههه..هووووى انا بهظر بس جنى وجن الشكل ولاعندى ليهو روح
يلا كملى
قالو امو شنافة
نكير مالو ماشافها
وهكذا..!
| |
|
|
|
|
|
|
|
| |
A.Razek Althalib
saif massad ali
HAMZA SULIMAN
Elmosley
مريم بنت الحسين
عثمان فضل الله
معتصم دفع الله
مبيوع
Mohamed Elbashir
خدر
عصام دهب
ترهاقا
بلدى يا حبوب
سجيمان
Dr. Moiz Bakhiet
saadeldin abdelrahman
ودقاسم
ابو جهينة
خال فاطمة
nour tawir
EMU إيمو
انتصار محمد صالخ بشير
ملكة سبأ
lana mahdi
Rakoba
عشة بت فاطنة
فيس بوك
تويتر
انستقرام
يوتيوب
بنتيريست