دعواتكم لزميلنا المفكر د.الباقر العفيف بالشفاء العاجل
|
|
 ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!!
|
ود الشوايقة
كيف أعيش وأنا روحي ضايقي ؟؟
كنت قبل أشوف عيونك.. قلبي خالي وروحي رايقي
وهسي زاد قلقي وجنوني.. وسببي كان ود الشوايقي
* * * *
عافي منك لو تسيبني.. وليه تكون أسباب شقايا
ماني قدرك في المحبة.. يا النويت تهرد حشايا
كلمتك لسع في خاطري.. (نار شفايفِك سر دَوَايا)
* * * *
يا وِليد الناس وحاتك.. أنتَ ما تفتّح عذابي
يا العيونك مثلي رافضي.. كل قيد يسجن شبابي
خائفة لو اسمع كلامك.. يبقى مُر المُر شرابي
* * * *
قلت لي كلمة بحبِّك.. وارتجف قلبي وكياني
كنتَ شاعرة بكم حنانك.. وصدرك الدافئ احتواني
جد بموت بي همسة منك .. قول بحبكِ بس عشاني
بس عشان بت الدناقلي
قولها ياود الشوايقي !!
وفى النهاية اتزوجوا والحمد لله وفرضوا ارادتهم على حبوبة عشة الشايقية
وست البنات الدنقلاوية !!
ومنو القال الشوايقة والدناقلة مابعرسوا من بعض ؟
ومنو القال مابترايدو؟!!
والله يريدوا بعض جنس ريدة !!
ولا شنو أست البنات ؟؟
|
|
 
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: ودقاسم)
|
يا نادية رغم أيماني العميق بالحب قيمة سامية ألا أنني شعرت ببعض الغيرة على بت عمي الضنقلاوية بحكم الجيرة وليه ما يكون هو متقطع فيها وهي ترضى بغرور
بس كدا هي رخصت نفسها خالص وأخير ليها كان تدي حبها لضنقلاوي فارس حوبة من جنسها
وأهلنا الضناقلة قالوا في المثل (الشايقي كان ملايكة ما تجاورو)
****************
أرجو من الاخوة الشوايقة ما يزعلوا من كلامي
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: نادية عثمان)
|
سلام يا نادية أخيتى المكملى الطيبى والفهم والنجاضى !
وماديللا عليك يا البتعرفى تعزلى ، وبتعرفى تكتبى النضم السمح المو خمج !
وانا يا نادييى أخيتى يعمينى فى كلامك دا عيللى الليلى أكان دابى شوفتو !
ودا شيتن كيف سمح ومجييه بالحيل !
ونان كيفن الشوايقى والدناقلى ماب ينرايدو ؟ مو ولاد أعم يا الحيبيبى ؟؟
والجنى العاقة دا الاسمو حبيب بلدو ، مالو علينا جاييى يفتننا فى اشينو ؟؟؟
نان هى اكان دايرى الدنقلاوى ، ما قعد تشوف فييو ؟
انت ما تخليها التفتش خوتورها وعجبا !
يعنى اكنها فيحال دونقولاويى عيللى تاخد الدونقولاوى ميتلا ؟؟
نان تسوى اشينو ان بيقيت الآخر ياهو العجبا ؟
ويا نادييى العيديلى يريدك رب العالمين ويحققلك الفى مرادك دايمن !
ست البنات .
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: علاء الدين يوسف علي محمد)
|
علاء الدين يوسف على محمد
اظن هذه هى المرة الاولى التى تزورنى فيها وتشرف احد بيوتاتى هنا فى هذا المنبر ..
الف الف مرحب بيك ياعلاء الدين
وبزيارتك بيتنا نور والله
| Quote: حقيقة بوست جميل جداً و كلمات قوية و معبرة و قصة حلوة من خلف الكلمات المقفاة بروح شايقية أحلى. |
تسلم والله وسعيدة ان اعجبتك كلماتى
عارف؟........الغريبة انا من صغرى وفى الابتدائى ست العربى بتاعتنا كانت قايلانى شايقية والاغرب كانت قايلة صحبتى الشايقية دنقلاوية لاننا اتبادلنا اللكنات وصحبتى الشايقية هى الكانت بتؤنث المزكر وتزكر المؤنث..!!
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: ست البنات)
|
ست البنات اخيتى ست الفهم السمح ضمة
يازولة انتى وين انا من البارح ارجا فى طلتك ياالحبيبيى ؟!!
| Quote: ونان كيفن الشوايقى والدناقلى ماب ينرايدو ؟ مو ولاد أعم يا الحيبيبى ؟؟ |
صدقت آستنا صح اولاد عم وبينهم الدم والقول الاهم بتراااااااايدوا والله ..
| Quote: والجنى العاقة دا الاسمو حبيب بلدو ، مالو علينا جاييى يفتننا فى اشينو ؟؟؟ |
لا لا الله ماجاب الفتنى آحبيبتى والله مابكون بينا غير الريدة والدم الحلو ..علا اللاخو حبيب بلدو شالتو الغيرة على الدنقلاوية قال لانها اتكسرت شديد فى ود الشوايقة يعنى !!
| Quote: نان هى اكان دايرى الدنقلاوى ، ما قعد تشوف فييو ؟ |
صدقتى أستنا الفاهمى المكملى صح الحب قسم ..
ست البنات لى حدهن علا عندى ليكى قول الرسول لاتفارقى البكان ده لانو الليلانا نحنا الاتنين ياالسمحى الظريفى بت عم كمبال الطيب..
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: ست البنات)
|
حبيبتى الربنا ادانى ليها فى شتات غربتى الشينى
هوى آست البنوت لى حدهن ..
Quote: نان قالولك البوكان دا انا بفارقو تانى ؟؟؟
وحات ربى كيضب !
انا حتى لقدابتى قفلتها وسوويت كوشارى فى عيبى !
وتانى من هينى مانى فايتى ضوومة !
هو الزول داير شينو بلا الضل السمح والناس الطيبى العندها عرض ؟؟؟
وانت يا العيديلى الزينى بتنفاتى ؟؟؟؟
سيى فوقك وسيى فوق الدناقلة الحينينيين ! |
وحاة ربى نضمك السمح ده نزل فوق حشاى متل المى الساااااقطى آستنا الزينى
وهسى من دربى ده ماشة انوووم ..علا باقيلك الناس والجنيات الهنا واقع لهم الريدة دى آستنا ولاحاسدين الشايقى فى بت دنقل ؟!!
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: نادية عثمان)
|
Quote: عافي منك لو تسيبني.. وليه تكون أسباب شقايا
ماني قدرك في المحبة.. يا النويت تهرد حشايا
كلمتك لسع في خاطري.. (نار شفايفِك سر دَوَايا) |
نادية ..
أتاريك مكسرة فيني و أنا ما عارف ؟؟؟؟
كله ده كاتماه في قلبك و صابرة عليه ؟؟؟
ما أنا شايقي و أبوي شايقي و أمي شايقية
و أعمامي و أخوالي و حبوباتي شايقيين ..
وصفك ده بينطبق على رسمي و شعبي
   
ملحوظة:
أظنك ما قاعدة تشوفي المسنجر ..
مش كده ؟؟؟
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: محمد ابراهيم قرض)
|
الغالى ..الزميل محمد ابراهيم قرض
Quote: أتاريك مكسرة فيني و أنا ما عارف ؟؟؟؟
كله ده كاتماه في قلبك و صابرة عليه ؟؟؟
ما أنا شايقي و أبوي شايقي و أمي شايقية
و أعمامي و أخوالي و حبوباتي شايقيين ..
وصفك ده بينطبق على رسمي و شعبي |
بركة الوقع ليك آود امى ..نان انى من الصباح بقول فى شنى ؟!!
Quote: ملحوظة:
أظنك ما قاعدة تشوفي المسنجر ..
مش كده ؟؟؟
|
انا قلت آبت آناديى خلاص نان قولييها هنا على الملأ فى البكان ده وخلاصى اها مانى فالحى الرسول آ قرض ياود امى ؟
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: نادية عثمان)
|
| Quote: (الشايقي كان ملايكة ما تجاورو) |
الصاح كدا ياحبيب بلدو
| Quote: إذا جاورت في الفردوس بني دنقل فعجل بالرحيل إلى سقر |
وبرضو المرجو من أخوانا الدناقلة مايزعلو
هى كلها مكايدات كترة ريدة (مش بقولو كتر الريد دعا وقميد)
فنحن كلنا أبناء بيئة واحدة
| Quote: الدناقلة والشوايقة اولاد منطقة واحدة واتربوا بالقنديلة واللبن سوة |
ينصر دينك يانادية
لكن الملاحظ انه اولاد الدناقلة دائما (بتكسرو) في بنات الشوايقة واغلب الزيجات دي بتكون العروسة هي الشايقية ..
اما ظاهرة بنات الدناقلة (البتكسرو) في اولاد الشوايقة دي جديدها لنج 
حفظ الله يانادية وحفظ حبك وحفظ الأواصر الحميمة بيننا
ولك حبي
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: ملكة سبأ)
|
ملكتنا المتوجة بلقيس
ملكة سبأ
| Quote: وبرضو المرجو من أخوانا الدناقلة مايزعلو |
طيب مازعلانين لكن بالجد انتى محسية ؟
Quote: هى كلها مكايدات كترة ريدة (مش بقولو كتر الريد دعا وقميد)
فنحن كلنا أبناء بيئة واحدة |
وهذا هو لب الموضوع كما يقولون !!
Quote: لكن الملاحظ انه اولاد الدناقلة دائما (بتكسرو) في بنات الشوايقة واغلب الزيجات دي بتكون العروسة هي الشايقية ..
اما ظاهرة بنات الدناقلة (البتكسرو) في اولاد الشوايقة دي جديدها لنج |
منو القال ليك ؟
والله يتكسرن ويتكسرن للصباااح بعدين ماتنسى الشايقى حنين وريااااااااد وحنكو سنين وبت الدناقلة قلبها رهيف جدا !!
| |
|
|
|
|
|
|
|
|
 Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: نادية عثمان)
|
نادية الراقية
Quote: ود الشوايقة
كيف أعيش وأنا روحي ضايقي ؟؟
كنت قبل أشوف عيونك.. قلبي خالي وروحي رايقي
وهسي زاد قلقي وجنوني.. وسببي كان ود الشوايقي
|
نادية / كلماتك جميلة للغاية حروفك درر ماسية
عالقة في سماء الابداع وصلت الي قمة
الروعة والانبهار لذلك لا استطيع الي ان
اقــول :-
نادية يا بت الأصول
نادية يا كلك شعور
نادية يا حرفك نغم
يفرح قلوب مليانه هم
شعرك جميل ذي الحرير
وجد تستأهلي التقدير
خالص امنياتي بان يحفظ الرب هذا الحب الجميل
الذي ينادي الي مداخلة القبائل والانصراف عن
العنصرية الذميمة
ودي وتقديري
السمؤل
| |
|
|
|
|
|
|
|
|
|
Re: ود الشوايقة!!!! وبنتراااايد ..ولاشنو آست البنات خيتى الزينى ضمة ؟!!!!!!! (Re: samwal ebrahiem)
|
سمؤل ابراهيم الولد المعجون من خليط الشعر البديع الحميم ..
Quote: نادية / كلماتك جميلة للغاية حروفك درر ماسية
عالقة في سماء الابداع وصلت الي قمة
الروعة والانبهار لذلك لا استطيع الي ان
اقــول :- |
هذه شهادة تقدير تسر قلبى وقول طيب يفرحنى كثيرا لصدقه وطيبته
Quote: نادية يا بت الأصول
نادية يا كلك شعور
نادية يا حرفك نغم
يفرح قلوب مليانه هم
شعرك جميل ذي الحرير
وجد تستأهلي التقدير |
الله وحده اعلم كم تسعدنى هذه الروح المنداحة الطيبة التلقايئة جدا ..عاجزة عن الشكر ياصديقى الشاعر وغلبتنى حروفك الصادقات..
Quote: خالص امنياتي بان يحفظ الرب هذا الحب الجميل
الذي ينادي الي مداخلة القبائل والانصراف عن
العنصرية الذميمة |
والله هذا ماقصدته فالسودان هذا الرجل الطيب قد انجبنا جميعا من صلبه فلما التناحر والتنافر والعنصرية ولصالح من ؟!!
| |
|
|
|
|
|
|
|
|
|
Re: والجعليين ياكلوا قرض (Re: نادية عثمان)
|
وبعدين مع الجهويات والطائفيات من شسايقيات ودنقلاويات
عموما الدنقلاويات بارعات جدا فى اظهار اللهفة وتقطيع حشا المولهين .. والشايقيات عصا نايمى وعصا قايمى .. وانا شايف الكيمان متراصات فى مدح الظل العالى للشايقيات والدنقلاويات .. والجعليات ياكلن قرض .. رشوا الرملة بالموية وحضروا السباتات وسيطان العنج .. وانا تب متحزم ومتلزم كان بالدولار بعرسا كان باليورو بعرسا حتى كان بالدانقا او الين انا جاهز ومن وين يا ربى هى اكتشفت انها لا دنقلاوية لا شايقية مع انى بموت فى الدنقلاويات لحد الرجفان بتاع سيدنا سجيمان لمن يشوف الكوندا ليزا الموناليزيا وبتكسر جد جد ما انا زول رياد وكيميتى بتلفق مع العنصرين الحارين بنى شايق وبنى دنقل لكن الريد قسم والقسمة ما بالليد ولا بالكراع ولا شختك بختك .. القسمة من الهيفن ويبدو انة قسمتى ادق صيوانى فى المتمة وما جاورا ومش قالوا زهرة ارقو حلوة حلاتا فاتت فى الجمال زملاتا .. اموت فى جغرافية بنات السودان ومرة قلت لى واحد صاحبى عايز اعرس واحدة مكونة من جميع بنات قبائل السودان وفتشنا وما لقينا ................................................... واخيرا ليت كل فتيات السودان فى امراة واحدة فاتزوجها واستريح
شاك
| |
|
|
|
|
|
|
| |
ودقاسم
سجيمان
Habib_bldo
ست البنات
علاء الدين يوسف علي محمد
بلدى يا حبوب
saif massad ali
Al-Shaygi
ملكة سبأ
manubia
peace builder
samwal ebrahiem
ابو جهينة
فيس بوك
تويتر
انستقرام
يوتيوب
بنتيريست