دعواتكم لزميلنا المفكر د.الباقر العفيف بالشفاء العاجل
|
|
 رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى ..
|
كتلنى الشعر عشقا وهزتنى القوافى
حبيبتى حروف وكلمة من الزمن الخرافى
بقت فى الغربة مآوى فى قلب المنافى
مصيبة الشعر أكبر فى دنيا الصحافى
وعجبى!!
السلام كان ديمة مطلب وكل جارا ليهو ساعى
بس بخاف المدة تطول ونحنا هدتنا المساعى
الحجج والنقة كترت مابشوف كان ليها داعى
الوطن الجرحو نوسر كان جميل لو ليه نراعى
وعجبى!!
قلت وحدوى قلنا مرحب أكد القول بالسلام
قول وداع للآلة تكتل فى ربا السودان حمام
العدالة طلب اساسى وببقى سفك الدم حرام
نحنا أخوان ده الأساسى وبينا حب جد وانسجام
وعجبى!!
كل مانقول ده موسى يطلع برضو فرعون
ابليس بى قرونو وجد اولادو شيطون
الشر امتلكنا وخت عمارو فى الكون
كل مانقول ده انسان يطلع برضو ملعون
وعجبى!!
أصوات القنابل شيبت أطفال
بقت بغداد مدافن ومقبرة أجيال
أمريكا الغرورة قبيحة الأفعال
عشان بترول عراقى تضحى بالأنجال
وعجبى!!
لو تنسانى برضو مابنساك أنا
روح الزهرة قلبى وعبق السوسنة
يانى الجرتكوها سمحة محننة
ولو تنسانى حقك بيضيع ياجنا
وعجبى!!
ياوطنى القبائلك تشكى من تهميشك
ظالم ولا مظلوم من فعايل جيشك
أولادك بقطعوا فى منابت ريشك
قول ياوطنى حكمك الا بس ببشيشك
وعجبى!!
من شان السلام جابو الوسيط جنرال
ايمكن بالنياشين ينصلح ده الحال
ويرجعوا ناس بلدنا الهدهم ترحال
بين أمريكا كندا وكينيا ست الخال
وعجبى!!
دارفور العزيزة امى الحنينة الغرة
شن سووالوليدات جابو ليك الضرة
كبوا الدم بحورا وشربوك المرة
وين راح خير زمان الكابى جوة وبرة
وعجبى!!
ياعاشق الجمال أعرف انحنا جمالنا مالو مثيل
انحنا الفركة والسوميت وقولة السى معاها عديل
انحنا الخمرة والدخان والريف دور فتيل فى فتيل
معانا بتعرف ايه الحب وبدونا أخير تقع فى النيل
وعجبى!!
نحنا فى زمن المصالح بالقولات والسواطة
وانت يازولى الشفيف أحلى مافيك البساطة
لامنافق لامخادع زى بشر زاد انحطاطها
الا بس حظك معاكس فى زمن سمتو الوساطة
وعجبى!!
شلكاوية حلوة جمالها زى فينوس
شجرة سيسبان ودعامة الابنوس
بى سحر العيون خلبت عيون ونفوس
جننت الجنوب وبيها الشمال مهووس
وعجبى!!
أرفعوا صوت حواركم وأخرسوا البارود
الفور دار سلاطين من جدود لجدود
لابينكم جبان لا زول سفيه وحقود
الحق بالحوار مابالرصاص بيعود
وعجبىّّّّ!!
فى بلد الزرق دار سلطنة وسلطان
بتلقى القاسية هينة والقساوة حنان
أهل حكمة المساليت والزغاوة كمان
أطفوا الفتنة بينكم وكتروا الكيمان
وعجبى!!
الحرب القبيل مالقينا فيها هوادة
حقول الغام ونار لابد من اخمادها
من أجل التحول لازمة لينا ارادة
جنوب وشمال بلدنا ونحنا كلنا سادة
وعجبى!!
صاح انت الملك وفوق رأسك أجمل تاج
مصنوع من دهب أحمر وسن العاج
بس قلبك لئيم أسود بلون الصاج
مابتخاف من الله برغم انك حاج
وعجبى!!
سمعت وقالوا عنك دار تكون مشهور
عاشق الكورة مرة وفى الأغانى سرور
بى قرشك بقولو بتشهر المغمور
تخلى الدنيا تحكى عن الوجيه فرفور
وعجبى!!
شايقى ودنقلاوى أخوة فايتة الحد
فتيل ريحة وبخور عودين عبيرهم ند
ايد فوق ايد تملى بيبقو ساعة الجد
لو تسأل عليهم تلقى عندى الرد
وعجبى!!
أوعك تخاف واغرز خناجرك فى صميم قلب الرئيس
انت الشروق لو اظلمت وانت البتستر للبنيات ياعريس
قلمك درع حبرك رصاص يحرق حشا الاسد الكديس
انت الطريق مرسوم عديل وأصلو العوج درب التعيس
وعجبى!!
ادمان الكتابة منو البشفينى منو
كلماتى الرقيقة وحروفى على بحنو
بعشقو لون محابرى وقلمى العاجبو سنو
ولو ماكتبو شعرا أناملى أكيد بجنو
وعجبى !!
|
|
 
|
|
|
|
|
|
|
|
Re: رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى (Re: نادية عثمان)
|
نادية يا إمرأة أكاد أشمّ عطرها من هنا ..
لك منّي مليون سلام يا جميلة جمال القصيدة ورنّانة زي دوبيت..
صراحة ما عارفة أرد عليك كيف أدينى فرصة.. ولا أقول ليك هذا بعض من حبري..
يا غطاء دثّر عمرى من برد الزمن..
يا نسمة أطلّت على صباحى فأزاحت حر الأيام..
يا ضوء تغلغل في صباحاتى فأشرقت مسامى نورآ.. وإبتهل وجهى ضياء..
يا رجلآ يختصر الروعة بحضوره..ويفجّر الدهشة عند لقاه..
عندما تأتى تجلب معك كل الصباحات الجميلة وعندما
تذهب تأخذ معك الأماسى الحالمة وكل مواعيد الغرام..
تعال يا حبيبى كفانا بعدآ..فالهجر شمسه تحرق و ليله موحش..
تعال لتزيح عنّى تعب الشوق وألم الفراق..
لا تسكن المدن البعيدة فأنا ممنوعة من السفر..
الأذن صماء إلى أن تسمع صوتك والعين عمياء إالى أن تراك..
لا تبتعد فرياح بعدك أقوي من أن أتصدّي لها فبيتى من قش..
حبّك أكبر من تحمّلى فهو يفاجئ ويكسّر وينهى ويأمر..
وأنا لا أقوى على حبك... فإنه يقتل النساء شوقآ ولوعة
أشتاق لجنونى وأنا معك .زلدلالى وأنا معك..أشتاق لحبّك لي
أشتاق لحواسى التى أفقدها حينآ ولا أسترجعها إلا وأنا معك..
________________
ولك منّى عودة
| |
|
|
|
|
|
|
|
|
|
Re: رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى (Re: sara fadul)
|
سارة رغم الغربة حارة ..التقينا فى المحطات الشتات
خوة فى معناها روعة ..ودنيا تحيا بعد ممات
لوعة الشوق فى المنافى ..افقدت صبرى الثبات
ريحة الوطن الدعاشة..وخالتى عاشة وقعدة القهوة وحياة
ناس نفيسة وحاجة آمنة ..واحدة فاتت وتانية جات
فى بيوت الشعر غنية ..التقيت بى سارة لوحة
شايلة من توتى النضارة ..وهيبة ام در ليها طرحة
حالمة زى غيمة شجونا ..ومن ليالى العيد هى فرحة
غالى ياوطن الجسارة ..ولون بناتك صافى قمحة
انتى للمنبر شقيقة ..ولى نضال اهلك رفيقة
وطنى حر بى اهلو عامر ..موية فى قلب الحريقة
مهما ليل الغربة طوّل .. بى تجمعنا بنطيقها
القناديل مهما تذبل ..بكرة بتنور وريقة
ونحنا مهما طال غيابنا ..طيف بلدنا بظل حقيقة !!
| |
|
|
|
|
|
|
|
|
|
Re: رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى (Re: نادية عثمان)
|
العزيزه , أستاذه ناديه ..
شكرا لك على إهتمامك ودأبك على الكتابه .. هو امر يسر القلب
ويرحمه ..
الآن تطوف ببالي مشاهد جميله ..
القاهرة : ذلك الباب المفتوح على العالم والحياة ..
هناك رأيتك مره !
في الطابق الثاني المطل على شارع الجمهورية عند Gallery Grant .
كان هناك معرضا للتشكيل ..
كان حسان يرففع درجات الحراره في ذلك الشتاء بألوانه الزيتيه
الدافئه ..
تحياتي لك وللقاهرة وليلها المسحور .
ولكل شوارعها وبناتها وباعة كتبها المفترشين الأرض .
...
طلال
| |
|
|
|
|
|
|
|
|
|
Re: رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى (Re: أحمد الشايقي)
|
Quote: عاشق الجمال أعرف انحنا جمالنا مالو مثال
أنحنا الفركة والسوميت وقولة السي معاها عديل
أنحنا الخمرة والدخان والريف دور فتيل في فتيل
معانا بتعرف إيه الحب وبدونا أخير تقع في النيل..
... عجي يا نادية ودة الكلام
إنشاء الله بتاع البوست بتاع زواج الهنديات يقرا الكلام دة |
سارة....
انت قاصدة ابقوتة ولا زولا تانى...
ياسارة الجمال عندك وفى كل بيت سودانى...
فى حسن الطبع ونظافة توب ولسانى...
ورائح خمرة ووشاف وطلح وزراق دخانى>>>
اما الهنديات فيهن جمال ظهرانى...
شعرا طويل.. ريحة الزيت تقلب المصرانى...
جسيما اصيفر لادن..تفوح منه ريحة غسيل واوانى...
اخوك مو صعيليك ...لكن زميلات دراسة فى لحظة من الزمان
| |
|
|
|
|
|
|
|
|
|
Re: رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى (Re: HAMZA SULIMAN)
|
Quote:
أُمْحُمّد تعال شكّر بنات الشاشة
ما خلّن سمح فاتنّو أحلف حاشا
معزولات عزل زي برتكان الباشا
وكان دُرْتَ الرزق اقعد مع الفرّاشة
|
اسمحا لي يا سبيل وكمال بشاشا...والله النية بيضاء....ولتسمح لي كذلك اميرة هذا البوست
أمحمّد تعال اهديه لينا بشاشا
يفتل في حبال الفتنة من نيفاشا
اشميقو اللسان نضما معاه هشاشه
والراي مو قحف فالتنو بس في الشاشه
اترسو في الكلام غتيه بي دشداشه
وان سرّب ورطن اكسرو في حواشه
واندهلو اللبيب تاج سرنا الرشاشه
بيعرف كان زعل يمسكو المقشاشه
| |
|
|
|
|
|
|
|
|
|
جوه الجك (Re: نادية عثمان)
|
دحين اهلي القبيل سايقاهم الحكامة
بي وصف الجميل في طبعو او في القامة
تكتب ناديه شعرا راقي زي هنداما
ميراث الجدود ومنو البقيف قداما
وعجبك
| |
|
|
|
|
|
|
|
|
|
Re: جوه الجك (Re: وليد محمد المبارك)
|
عشنا وشفنا جمال مزدان
لكن فاقد قيم وروح انسان
ولقينا الجمال في السودان
الاخوات الكريمات
نعم اقتنعنا بمزايا بنات بلدي
لكن يا ابقوتة خنت العهد لبلدك الثاني الهند
وسوف نعقد محاكمة في بوست الاتحاد
اما الهنديات فيهن جمال ظهرانى...
شعرا طويل.. ريحة الزيت تقلب المصرانى
... والله اجمل من رائحة شعرهن لم نعرف حتي الان الا عندك في حيدراباد وما تجامل كتير
جسيما اصيفر لادن..تفوح منه ريحة غسيل واوانى...
اكثر شعب يستعمل البودرة المعطرة هم الهنود
اخوك مو صعيليك ...لكن زميلات دراسة فى لحظة من الزمان
شعب جميل ضحوك محبوب يا احمد
اسف لهذه المرافعة الصغيرة
بوست جميل بس لو كان بدون تحميل
| |
|
|
|
|
|
|
|
|
|
Re: جوه الجك (Re: مهاجر)
|
مهاجر شكرا على المرور
لكن عشان تكون عارف ابقوتة زول عااااقل وبعرف يميز كويس جدا
صاح ياابقوتة؟
| |
|
|
|
|
|
|
|
|
|
Re: جوه الجك (Re: نادية عثمان)
|
عشنا وشفنا جمال مزدان
لكن فاقد قيم وروح انسان
ولقينا الجمال في السودان
الاخوات الكريمات
نعم اقتنعنا بمزايا بنات بلدي
الاخت نادية
ليه ما لاحظتي ما كتبت جيدا
عشان تعرفي رايي من راي ابقوتة
لكن اختلفت معه في رايه في الهنديات
والله لولا تلتلة الاولاد بعدين كان تزوجت هندية زمان
فيها فوارق كبيرة عن السودانية
فيها حسن المعشر والحب والحنين الي زوجها طول الوقت
فيها نظام توفير لن تجدي له مثيل عند السودانية
فيها نظام تربية حديث وممتاز
جمييييييييييييييييييييييييييييييييييييييلة جدا
وجمالها دائم حتي لو انجبت خمسة اولاد برضو هي هي
لدينا زملاء تزوجوا والان زواجهم ناجح جدا
ايضا نحنا اتعلمنا اللغة الهندية ونجيدها
| |
|
|
|
|
|
|
|
|
|
Re: جوه الجك (Re: وليد محمد المبارك)
|
وليد محمد المبارك
ربى حبانى قلبا مافى زيو قليب
ولسان حالى ولطيف مابنطق أصلو العيب
أبوى ربانى شابة وهسة بعد الشيب
بقول ياالله يفضل قلبى صافى حليب
وعجبك !!
| |
|
|
|
|
|
|
|
|
|
Re: جوه الجك (Re: حبيب نورة)
|
حبيب نورة الرسول خليك شوية معانا
مستعجل دوام بى كلمة بس تغشانا
مابنستاهل انو تقيل انت حدانا
ولايعنى بتخاف زعل الحبيبة فلانة
وعجبك!!
| |
|
|
|
|
|
|
|
|
|
Re: جوه الجك (Re: نادية عثمان)
|
نادية
شكيتك علي الله زكرتيني غنية حنانا
النسي أهلوا ما نسانا
ما جانا لو جانا بغيظ فلانا
لكن انتي والله زي البرتكانة
أسمعي
ما تجي نقول حاجة بتشبه المطر
تعالي نرجع الروح للوتر
نشيل أسانا يرحل يمشي الخطر
يفرهد الريد يخضِّر مد البصر
سامعة ؟؟!!!
.....!!!!!!!!
| |
|
|
|
|
|
|
|
|
|
Re: جوه الجك (Re: وليد محمد المبارك)
|
الى نادية عثمان
الليلة الصعيد شالعات بروقو كُتاااار
وقش الصَيْ بتَق.. الكيك عِرفلو دَبار
شاحد الله الكريم يملانا صيد وخدار
وكان جَنْ اللواري عاد ماسَجَم سنار!
| |
|
|
|
|
|
|
|
|
|
Re: رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى (Re: نادية عثمان)
|
الكنداكة الجميلة مالكة القوافى
ناديةعثمان
جئت متأخرا لهذا المولد الجميل وطربت لرباعياتك ووقفت مرات امام اكثر من رباعية ارقص كالصوفى:
قلت:
لا مغرورة حاشا ولانى زولة عنيدة
امنت بآلهى خلقنى شبه الصيدة
نعم عرجونة لآدنة وبرضو جد صنديدة
ساعة الشدّة صلبة وناعمة ساعة الريدة
وعجبى !!
واقول لك:
يا نادية وندية ويا شبيهة الصيدة
ما احلى الأغانى تتسمع من سيدا
وما احلى الجمال مزدان بلحن قصيدة
ويا بؤس اللى ماشاف نادية او باس إيدا
------------
شاعر ومن زمان راجى الخطوط تتشابك
وتسمح لى اسافر فى بحور اشعارك
من طليتى فى البورد والجميع فى مدارك
لافين فى الصوانى بدون حلل ومفارك
-------------
هذا الشعر من دنيا السحر يا نادية
ومن عبقر بلادنا ومن جروفا النادية
جانا بهمبريبو وصحى ارواح صادية
وخلى البورد إجقلب زى غزال البادية
------------------------
ما احلى الشعر لمان تقولو بنية
مثل الحور يمين واجمل من الحورية
العجب العجيب فى لسانها بس عربية
لكين كليوباترا وفى اللسان نوبية
------------------------
| |
|
|
|
|
|
|
|
|
|
Re: رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى (Re: Mannan)
|
الاخ منان
منان يأخى نادية الليلة جد يوم عيدها
يالطليت مليت بورد الحبايب ريدة
بوح الاغنيات منك يكون تريدها
والشوق ياشفيف شوفة الأماسى اكيدة
راجياك من زمان انا برضو ليك مشتاقة
الزول الجميل طب القلوب ترياقها
الدوحة الظليلة الليلة زاد عشاقها
فى ساعة الغروب يلاك تعال نتلاقى
الشعر الحلال بالكأس بنشرب منو
الحرف العنيد نحرث مزارع فنو
القمرى البقوقى وناس سعاد بيغنو
وكم ياقيس كتير فى الدنيا غيرك جنو
ماأحلى الشعر لمّن يكون لى فارس
حبيب بنوت فريقو وزول قراية ودارس
ركازة القبيلة وللعقاب الحارس
يامنان تعال زور كايرو أول مارس
| |
|
|
|
|
|
|
|
|
|
نشوف حدك (Re: nazar hussien)
|
قالت نادية
وليد محمد المبارك
ربى حبانى قلبا مافى زيو قليب
ولسان حالى ولطيف مابنطق أصلو العيب
أبوى ربانى شابة وهسة بعد الشيب
بقول ياالله يفضل قلبى صافى حليب
وعجبك !!
عيون الناس شبابيكاً.. بتفتح جوه
عيونك فضحت الداساهو .. صَدق الخوه
بدورو غلات ؟؟!! طبعك زين وروحك حلوه
ابوك رباي .. تقول كان حاري بيك نبوه
عجبي وعجبك !!
| |
|
|
|
|
|
|
|
|
|
Re: نشوف حدك (Re: وليد محمد المبارك)
|
وليد محمد المبارك
عيون الناس شبابيكا مفتحة برة
ماتخاف ياشفيف تب مابتجينى مضرة
محروس الآله ماعندو الا مسرة
بس خليك معاى اوعك تسوى الشرة
| |
|
|
|
|
|
|
|
|
|
Re: نشوف حدك (Re: وليد محمد المبارك)
|
وليد محمد المبارك
عيون الناس شبابيكا مفتحة برة
ماتخاف ياشفيف تب مابتجينى مضرة
محروس الآله ماعندو الا مسرة
بس خليك معاى اوعك تسوى الشرة
عجبى وعجبك وعجب العاجبهم !!!
| |
|
|
|
|
|
|
| |
المسافر
sara fadul
mohammed alfadla
سجيمان
لؤى
samwal ebrahiem
Ehab Eltayeb
أحمد الشايقي
طلال عفيفي
abuguta
نصار
Abulbasha
waleed500
Dia eldin khalil
nazar hussien
محمد عبدالقادر سبيل
عصام عبد الحفيظ
HAMZA SULIMAN
مهاجر
حبيب نورة
Mannan
فيس بوك
تويتر
انستقرام
يوتيوب
بنتيريست