|
دعواتكم لزميلنا المفكر د.الباقر العفيف بالشفاء العاجل
|
|
 Re: اناشيد ثورية (Re: suna)
|
سونا اولا كفارة وحمد لله ع السلامة .. ما عرفنا الحاصل ليك شنو
ثانيًا هذا البوست ينتظر منك ومن الاخوه الكثير ولك الود
| |
 
|
|
|
|
|
|
|
|
Re: اناشيد ثورية (Re: bunbun)
|
فتّش في داخل الداخل عن سريرٍ موسرٍ وملاءه
وفي داخل الداخل فتش عن قناعة
ايها الولد الغبي
الذكي
المخاتل
عن ابعد الاشياء فتش
في بلاد التيه
والنيران .. فتّش
ولا تندهش إذا غاب عن عينيك نور الشمس
ومات في شفتيك حسُّ همسك البدوي
فامتطيت ناقةً كالريح
وصهلت في بيدائك
وشهرت سيفًا في التماع النيل
لتقاتل
فتش في بلادك
عن صهيل الخيل
----------
من والى ابوعبيدة الماحي
| |
|
|
|
|
|
|
|
|
|
Re: اناشيد ثورية (Re: bunbun)
|
رسالة إلى الشعب السوداني
محجوب شريف
يا شعبنا
يا والدا أحبنا
يا من منحت قلبنا ثباتك الأصيلا
إليك هذه الرسالة
القصيرة
الطويلة
إليك من زنزانة تخاصم الفصولا
إليك رغم أنف كل بندقية
وحقد بربرية
وكلمة شقية
إليك الحب والسلام والتحية
ودمت يا حبيبنا، وبعد
أدبتنا
أحسنت يا أبى
فلم نتابع الهوى
لكنه غوى
وما أرعوى
وكم عوى
وتابع الهوى
وتاه في الأنا
أراد للدماء أن تسيلا
ونحن مثلما عرفت يا أبى
بفضلك الكريم أشرس الرجال
حينما نقاوم
نموت ولا نساوم
ندوس كل ظالم
ونفتح الصدور للمدافع الثقيلة
ومن هنا
أبناؤك الرفاق
باسمك العظيم
أقسموا
فصيلة فصيلة
أن يثأروا
لفرحة الأمومة الجليلة
بطفلة جميلة
تنفست قليلا
تمددت قتيلة
رصاصة في جنبها
وطعنة في قلبها
ولم تعش طويلا
لكنما مليون مثلها
سينجب النضال
يا أبى حقيقة
فكم حديقة
تفتحت على حطامها حديقة
وكم مكان نخلة
هوت
علت نواتها وزادت ارتفاعا
واجمل الأطفال قادمون
ساعة فساعة
عيونهم أشد من عيوننا بريقا
صدورهم بما وهبت اكثر اتساعا
وحين يكبرون يا أبى
سيوفهم تزيد
من سيوفك الطوال طولا
لأن بذرة الحياة ليست بالرصاص
| |
|
|
|
|
|
|
|
|
|
Re: اناشيد ثورية (Re: bunbun)
|
: محجوب شريف
عمّـــا قريـب
عمّا قريب..
الهمبريب
يفتح شبابيك الحبيب
والحال يطيب
يا محمد أحمد تستجِمْ
والبيت يتمْ
تتلم تلمْ
تفرح فرح
تحلم حِلِم
كم تطمئن
حقك يجيك لافيهو شك..
يمكن واظن
ويفوتو همْ
والعدل يعمْ
وتغني أمْ
كادت تجن
كبر الولد جُوّا السجن
فاقداهو هى
دا كلو كلو ينتهى
دا كلو كلو ينبهى
زولاً تريدو وتَشْتهِى
تلقاهو فى
لا فى السِّجِن..
لا مختفى
لا يقولو ليك ما تمشي لى
دا كلّو كلّو ينتهى
دا كلّو كلّو ينتهى
دا كلّو كلّو ينتهى
| |
|
|
|
|
|
|
|
|
 Re: اناشيد ثورية (Re: bunbun)
|
يا حنين
الله يديك العافية
ما بتبالغ عدييييل كدا
غايتو الليلة البورد ببوستاتك كلو قضيناهو قراية واستمتاع بس
من بعدك نحنا نقعد (فراجة ) بس
وبواعدك في نهار اغبش
يا بن بن
البياز
عوافي
| |
|
|
|
|
|
|
|
|
|
Re: اناشيد ثورية (Re: bunbun)
|
الساعة الوطنية آتية
هكذا تبدأ التربة المالحة
صبرها الانثوي الجميل
بصراخٍ طويل
وخيط دم مستمرِ نحيل
من يقايض هذا الدم
احترسوا
| |
|
|
|
|
|
|
|
|
|
Re: اناشيد ثورية (Re: bunbun)
|
:
فديتك
محجوب شريف
بقيت يا وطنى زى منفاى
مطارد ومستباحة دماى
عساكر من دروب تايهات
حداى، قدام خطاى
ووراى
وذنوبى هواى
يا موطنى وغناى
وذنبى ولاى
وإنك سيدى ومولاى
تعيش يا ذنبى طول ما عشت
عشت معاى
لا عنك بحيد لا جاى بفوت
لا جاى
فديتك يا مديد القامة
يا شعبا، سديد الراى
وقلبى عليك يا حجرا
حنين دفاى
أقبل وين أفوتك
وفي حماك حماى
أسيب عزاى سبية
وكيفن ألقى عزاى
عزاى في وحشتى وسلواى
عيونا وبحة الغناى
نخيلك تمره منه صباى
ونيلك في قواى
هادر هميم جراى
وقبضة إيدى مسكة رمحك
الرماى
أطالع في صحارى الليل
مطالع صبحك الضواى
فديتك لو بقيت منفاى
فديتك لو بقيت مرساى
| |
|
|
|
|
|
|
|
|
|
Re: اناشيد ثورية (Re: bunbun)
|
مساجينك
مساجينك
مساجينك
نغّرد في زنازينك
عصافيرًا مجرحّة بي سكاكينك
نغني ونحنا في أسرك
وترجف وانت في قصرك
سماواتك دخاخينك
برغمك نحن ما زلنا
بنكبر بي سلاسلنا
ونعتق في سلاسلنا
ونسخر من زنازينك
مساجينك .. مساجينك .. مساجينك
حكايات الهوى الاول بنحكيها
بدايات الغنى الطّول نغنيها
حقيقة وليس تتأول ح تهرب من عناوينك
للسودان عواطفنا
وبالسودان مواقفنا
ولما تهُّب عواصفنـا
ما حيلة قوانينك
مساجينك .. مساجينك .. مساجينك
شهر عشره حبابو
حبابو عشرة
وابقوا عشرة على المباديء
مبدأ الحرية اوّل
لم يحوّر لم يأول
والنضال سكة حياتنا
مهما وكت السكّة طوّل
ما تفرطوّا في الامانة
كل شهيد روحو بتنادي
ابقوا عشرة على المبادئ
مبدأ التطهير يصير
ما شعار خاوي وكبير
الحساب لكل واحد
للصنايعي وللوزير
امشوا طهّرو بعدالة
وابعدوا الفاشية غادي
وابقوا عشرة على المبادي
كل ثائر في جهادو
قصدو تتحرر بلادو
نحنا بنساعدو وندعمّ
كل وقفاتو وعنادو
اصلو هدف الثورة واحد
والاعادي هي الاعادي
ابقو عشرة على المبادي
اكتوبر الممهور بالدم
صباح الخير
اهلاً مساء النور
زمنًا تجي وبتمر
عبر النشيد المـُر
تحت الغنا المحظور
تنده تنادي الشعب
الصامد المقهور
هُب من ظلامك هُب
الشمس جوه الجب
والحكمة خلف السور
ضمِّد جراح الحب
والخاطر المكسور
كنا بنسّنك سن
في خندق الاصرار
في خندق الاصرار
يامـا
ادخرنّا غناك
ومسكنا فيهو النار
بذلك التيار
اكتوبر الممهور بالدم
صباح الخير
اهلاً مساء النور
المجد للآلاف تهدر في الشوارع كالسيول
يدق زاحفها قلاع الكبت والظلم الطويل
المجد للثوار المجد للإصرار
لليوم العظيم
المجد للشرفاء المجد للشهداء للموت الكريم
الثورة انطلقت شعاراتٍ ترددها القلوب
الثورة الحريةُ الحمراء شمسسٌ لا تغيب
الثورة التطهير يُرجع هيبة الحكم السليب
الثورة التحرير للثوار من كل الشعوب
الثورة الايمان قاد الشعبَ في اليومِ الرهيب
يا صانع التاريخ
يا شعبي الذي سحق الظلام
المجدُ لك
ما ازهرت في الارض الوانُ النضال
البزل لك ما صوّت الداعي
ينادي يا رجال
الخُلد لك
يا صارم القسماتِ يا حي الشعوب
يا شعب اصبح مرجلاً يغلي
وبركانًا يفور
الالف اللام السين الواو الدال الالف النون
السودان الوطن الواحد
ما قد كان وما سيكون
مارس ماسك كف ابريل
اعظم شعبي واعظم جيل
نعم بنادق لا ترتد لصدر الشعب
الغدر دخيل
مارس حارس
ليس يخون
الالف اللام السين الواو الدال الالف النون
شعبا صمم فردًا فرد
هبّ وهدّم حكم الفرد
وجاهو عديل
اعصار اعصار
خطوة بخطوة وايد على ايد
سِلم سِلم ما بنسّلم
وشعب معلّم زاد إصرار
عصينا عصينا
شلنا عصينا
على الحرية منو بوصينا
نحن الشعب الما بحتار
إختار إختار
ديمقراطية بلا اُمية
بايدي قوية
(............)
للسودان الوطن الحر مرفوع الراس
للحرية بلا دورية ولا تفتيش
ولا حد ينداس
ديمقراطية بنين وبنات
نغني و نحلم باطمئنان
بحكم الشعب صمود وثبات
من دم القرشي واخوانو
في جامع ارضنا مروية
ما اعظم غضبك يا شعبي
ما اجمل حبك يا شعبي
لارضك وانت بتفديها
يا شعبي الثائر يا شعبي
يا قوة .. السلم امانيها
يا شعب غرامو الحرية
والعزة شبابو يغنيها
ما اعظم غضبك يا شعبي
ما اروع حبك يا شعبي
لارضك وانت بتفديها
اكتوبر 21
يا صحو الشعب الجبار
يا لهب الثورة العملاقة
يا مشعل غضب الاحرار
ارجو تصويب الكلمات لو فيها خطأ **
| |
|
|
|
|
|
|
|
|
|
Re: اناشيد ثورية (Re: bunbun)
|
بـــــنبـــــن
شكرا جزيلا لهذا البوست الروعة
و نتمنى أن يتواصل الإبداع
this is my favorite
ما طال ما بحرك فى مــى
محمد الحسن سالم حميد
ما طال فى بحرك فى مى
وتمرك مفدع بالجريد
شدرك أمد حد السمى
طينك معتق بالطمى
نبنيك أكيد .. نبنيك هوى
نبنيك أيوه سوا .. سوا
من وجديد .. نبنيك أكيد
إيد أبوى على إيد أخوى على إيدى انا
على إيد و إيد... تجدع بعيد
فى اللجة فى من راس ميضنه
حيكومة الفقر الدمار
الكضبن و الصهينة
اللى نقاص أيامنا كاس
اليالطيف سوس البحر
نردم قفاهو حجر حجر
من ها الرصيف
الما قدر قدام سريحة الموج يقيف
الماانستر ...الارزقية وناس مو ياه
نسقيها كاس اسقتنا يا
نوريها كيف عشق الحياة
سنانا فوق حجر القصاص
سوانا ناس ضرب البحر
جوانا احر من الرصاص
يا ضو حبيبين القسا
طول ما انت غرقان فى الأسى
تبت يدين ما ترمى ساس
ما تبنى مجدك من جديد
تفتح شبابيك الخلاص
تدخل نسيمات النشيد
بيت القصيد.. يستقبله
مستقبله .. و الحاضر الماضى التليد
يابلدى يافردة جناحى التانية
وكت الناس تطير لى عالمه
وآ فجعة الزول البيجيك
ما يلقى فيك غير الهجير ناسا تواتى مسالمه
كل البشاشات القبيل يلقاها ميته مسممه
والجاته جاته من الأرض ما جاته من تالا السما
ما أعتى غبنك يا ولد
وأعدل قضيتك وأعظمه
لاترجع السيف الجفير
والدنيا فايره مصادمه
من غير تجيب تار البلد
ريح العوارض تهزمه
تطرد مع ابليس الأخير دعة الضلال
من جنتك يا آدمه
تاكل من الشجر الحلال
يغشاك نعاس فى ضل رمى
تختال هضاريب الصعب
كربة ليالى المظلمه
يانيل قبل خاطرك يطيب
أرضك تفزع باللهيب
تكشح تواريب الغضب .. صعب المراس
نوبه و زنوج و بجه و حلب
رطانه عربان مو أشو
ومولدين تلقانا أو نلقاك ضوء
ظلمة لياليك العجاف
رشه نهاراتنا النشاف
آمنا بيك وموحدين
فى إيدنا فاس وقلم رصاص
شتله و كمنجه و مسطرين
و طبنجه فى خط التماس
حراسة من كيد البكيد
ضد الرصاص و الإنتكاس
نبنيك هوى و أشد بأس
| |
|
|
|
|
|
|
|
|
|
Re: اناشيد ثورية (Re: bunbun)
|
| |
|
|
|
|
|
|
|
|
|
Re: اناشيد ثورية (Re: bunbun)
|
| |
|
|
|
|
|
|
|
|
|
سؤال (Re: bunbun)
|
يا بنبن
اسألك
هل تعرف بلدة اسمها حميد
تقع فى الضفة الغربية لنهر النيل
ينشطر فيها النيل الى اجزاء تكون جزيرة صاى ونلوة
هل انت من اسرة محمد مختار شيخ تلك القرية التى فيها حمامات جابرين
| |
|
|
|
|
|
|
|
|
|
Re: سؤال (Re: sharnobi)
|
الاخت سارة
شكرًا يا روعة
العزيز شرنوبي
كل سنة وانت طيب
واسمح لي اهنيك واشكرك على بوستاتك
ومداخلاتك
إبداع عدييييييل
انا من صيصاب
وبيبتنا على مرمى حجر من بيت خليل فرح
بس الخلاك تحدد شنو ؟
حميد بعرف منها بعض الزملاء
نتلاقى في الماسنجر
السارة
شرنوبي
والبوردجية الكرام
اليكم هذا النشيد
يُّمة يا يمُّة
نحن البلد فالا
القماري قوقن يا يمة
ومستقبل اجيالا
القماري قوقن يا يمة
في عطبرة العمال
الركعّو الراسمال
الديزل الحلجان
الماشي للعصيان
يا يمةيا يمة القماري قوقن يا يمة
يمة يا يمة القماري قوقن يا يمة
ودانا لي شالا
القماري قوقن يا يمة
عزتنا ما شالا
القماري قوقن يا يمة
ودانا بورسودان
القماري قوقن يا يمة
غنينا للسودان
القماري قوقن يا يمة
ودانا لي كوبر
قماري قوقن يا يمة
غنينا لاكتوبر
قماري قوقن يا يمة
ود الفضل ما مات
القماري قوقن يا يمة
ما همتّو الضربات
القماري قوقن يا يمة
ما همتو الضربات
القماري قوقن يا يمة
دا المحنّ الجلاد
القماري قوقن يا يمة
اُستاذنا ود سلمان
المات فدى السودان
القماري قوقن يا يمة
والحيّر الكيزان
القماري قوقن يا يمة
تار البلد جوزيف
القماري قوقن يا يمة
يوليو القلم والسيف
القماري قوقن يا يمة
الشعب ماهو جبان
القماري قوقن يا يمة
الثورة ليها زمان
القماري قوقن يا يمة
الشعب ما هو بليلد
القماري قوقن يا يامة
يا فاقد التـأيد
القماري قوقن يا يمة
يايمة يا يمة القماري قوقن
يا يمة
ويمة يا يمة
القماري قوقن يا يمة
| |
|
|
|
|
|
|
|
|
|
بنبن (Re: bunbun)
|
صيصاب
بلد محمد صالح ابراهيم
وسيد مكاوى
وعثمان امبى
والهادى
انا من كويكة
| |
|
|
|
|
|
|
|
|
|
Re: يا ناس حمر (Re: bunbun)
|
يا بن بن
اول حاجه إزيك وكل سنه وانت طيب
وبوستك غاية في الابداع والله
بس عندي طلب ...لو في مجال تكتب لينا كلمات أغنية
غني يا خرطوم غني... شدي أوتار المغني
ولو اي واحد من الاخوه عارف كلمات الاغنية كامله أكون شاااااااكره جدا
| |
|
|
|
|
|
|
|
|
|
Re: يا ناس حمر (Re: تغريـــد)
|
العزيزة تغريد
كل سنة وانتي اطيب
غني يا تغريد وغني
أغنية حب للخُرطوم
غني يا خرطوم
وغني
شدّي أوتار المغني
ضوي من جبهة شهيدك
أمسياتك واطمئني
نحن منك ريح وهبّت
نار وشّبت
في وجوه الخانو اسمك
يا جميلة
ونحن يا ست الحبايب
من ثمارك
في دروب الليل نهارك
وقبل ما يطول انتظارك
نحنا جينا
ديل انحنا
القالو فتنا
وقالو متنا
وقالوا للناس انتهينا
جينا زى ما كنا
حضنك يحتوينا
لما فارسك فينا هبّ
وعبّ حجرك بالمحبة
وبالأماني
صحا نار الثورة ثاني
وجانا داخل
زي شعاع الشمس من كل المداخل
جانا أقدر
ختّ من فوق كتفك ايدو
وهزّ بالمنشور وبشّر
يومها فرهد في عيونك
غصن اخضر
وفرحة اكبر
من شجونك
والسلاسل، ياجميلة
يوما كان ميلاد شهيدك
يلا غني
ولاقي عيدك
ولي ثمارك لقّي ايدك
جيل مكافح حلا جيدك
وفك قيدك
ومن غضبنا الحّرو لافح
يا ما باكر
من زنازين العساكر
نبني مجدك ومهرجانك
وكل قطرة دم عشانك
لي جديدك
يا جميلـــة
=========
| |
|
|
|
|
|
|
|
|
|
قصائد وطنية (Re: bunbun)
|
محمد الحسن سالم حُميّد
تستغرب يارسول الله
يااول وثانى الخلفاء
تستغرب يا ابذر لو جيت فى هذا الزمن الجهجاه
لو فيكم حد يا حنفاء إتجاسر وقال مامعناه
(فى الدين الطيب لا اكراه)
وبنى آدم ادرى بدنياه
او ان العالم شركاء
فى الكلأ النار وفى الماء
او حاول ينصح يتطاوللى حاكم ظالم قال لا
يالاقى جهنم مأواه
فتحولو ترابيس شالا
ياراجع نفسه اقلاه
السيف فوق راسو مخاواة
بالذات الزيك يا ابذر بالذات الزيك لو جاء
راكب دغريتو العرجاء
دايماً غلباوى وغالاط
لخباط للعيشة الخمجاءبالذات الزيك لو جاء
فى زمن الزيف المنشر
والتشريعات العوجاء
يا انباع يا يرجى الراجا
ياواقف فوق عمق الدين
ياشايف لآخر دنياه
ياطيب يا ابن الغبراء
الشركة يسارك ياابذر
من إسمك والا من الذر
الكسحت ديكا كريسيدا
وداك سيدا اب دقناً شمطاء
وجيب ايدك يلا النيلين لو درت تشوف العنقاء
ياصاحب النفس الامارة
بالوعىالدينى المحتارة
دة الدين المقلعه دة الدين
والمزرعه منفضا الله
سال يسفك داقش شقيش؟
قدامك عاين كم جيش
الزمن اندقش دقيش
الامن...محاكم التفتيش
اجلاف كنزوها بلايين
والناس بى الله ويامين
بتحلحل دين الكنتين
تتلفت كايس لى مين؟
الامن محاكم التفتيش
واصحابك جوه زنازين
واسيافن صقروا ما فيش
ما انبعنا وباعتنا قريش
لامريكا وبى حبة عيش
والحاكم قبض البقشيش
سال سيفك داقش شقيش؟
المن محاكم التفتيش
جنسيتك..بظبورتك...الفيش
فى كل المدن العربية
حاتلاقى النفس العربية
فى مصحة امراض عصبية
بين الحجبات والارتيل
تتململ شاحبة وصفراء
وقافلاها متاريس الجيش
والكضبة عمايل الامراء
سال سيفك داقش شقيش؟
إتراجع ياابن الغبراء
ياصاحب النفس الامارة
بالثورة القادرة الجبارة
إترجع وانسى الفقراء
امثال العسكر غدارة
زراعك تنفدتتنفض
عمالك منك تتجارى
وكل الكادحين الشرفاء
وراح تفضل وحدك فى الدارة
راح تفضل وحدك فى البر
لا زوجة لاقطة ولا غطاء
لاتقتل نفسك يا ابذر
سيب خونة مكة وتجارا
إتراجع يا ابن الغبراء
فى لجة انكسرت بى السارة
ولقتنى عجالة الشعراء
فلقتنى من الربذة حجارة
سرقتنى بدمى الصحراء
اب ذر لا سمعنى ولا تبعنى
طبطب على همى بيسراه
وكان دمى إتمازج بدماه
بى دم الغبش الشهداء
من اول وتانى الخلفاء
إتجمع فى رسول الله
زى نهر بيحفر مجراه
مصلوب فوق عتب الفيحاء
مجلوب فى السوق السوداء
وما صرخت بنت ابى بكر
(واسلاماه..اسلاماه..اسلاماه)
كانت هى الاخرى ورا القصر
تتململ بين الدهماء
تجار الدين الساقطين
الجنرالات الجبناء
مكتوفة الارجل والايدى
مكفوفة الاعين بكماء
| |
|
|
|
|
|
|
|
|
|
Re: قصائد وطنية (Re: bunbun)
|
طيبة - حميد
كل ما تباعد بيننا عوارض ..
كل ما هواك يا طيبة مكني
تلد الغربة القرب الواحد ..
بيك أسمي الشوق وأكنّي
لما أفوتك من دون خاطر ..
أو دون خاطر مني تفوتي
بلقى حبايب فى كل حتة ..
وكل بيوت الفقراء بيوتي
لا غيرت وراك الجتة ..
لا بدلـت ملامح صوتى
لا غافلنى وهادن فنى ..
رمل المدن الما عرفتنى
تبن الشوق الصبرو مصوبر ..
للارياف الكم وفتنى
وللاطفال الناشفة ضلوعها ..
ونازفة بغنى
أطّمن روعها واهدّى دموعها ..
ببسمة بكرة الماها تمنى
ولا مصنوعة
أغنى لشعبى ومين يمنعنى ..
أغنى لقلبى إذا لوعنى
مخير دربى اللي ما رجعنى ..
إذا طلعنى نخلة القر
ولا الغربة الكدرومية ..
تنزل غنوتى بقمرية
أو وقعنى فى بطن الجب ..
يطلع يوسف بألاغنية
أغنى الناس الما بتسمعنى ..
المنى بعيده المبعد عنى
النادى نشيدها وكنت المعنى ..
الأيدى فى إيدها..
وإيدها بتبنى
فى دنيا جديده
اليوم راح تبنى ..
واريت غنواتى فى ناس شغالة ..
تكون سندالة
وعود طورية ..
ضراع رجالة ..
كتاب أطفاها ..
وجملة فالها الما مكرية
سدة مالها وبقة فالها ..
فى ليلة الدخلة على إسمى قضية
حبيبة قلبى يا سودانية ..
يا أسمى معانى فى زول بيعانى
يا ود ضكران يا بت دغرية ..
وانا إن سامعانى فضلت
أغانى غبش فقرية وروح ماليانى ..
هويتك منك يا دافعانى
..براحة يدى كما الأشواق
ويا جابدانى برفق على
وما بتحير بين الفوق ..
وبين الناس التحتانية
إلا مغير ولا عقوق ..
ولا كفيف الإنسانية ..
ومنك وين يا كاشفة عيني ..
بنور الإلفة ضي الحنية
وحلم العالم ناس تتسالم ..
والبني آدم صافي النية
للاطفال الناشفة ضلوعها ..
بطمن روعها وتبدا تغنى
غناوى البكرة الكم مسموعة ..
حسيس طنبارة مع نقارة
صفقة حارة ودارة تغنى ..
فيا حلتنا عليك ترابك
وأنت شبابك زينة الجنه ..
أحلى عروس البلد إلتنا
ولا الغبش الرابة تهنى ..
ولاهدير المدن التصحا
وتمحى ظلام الحاصل عنى
| |
|
|
|
|
|
|
|
|
|
قصائد ثورية (Re: bunbun)
|
يا والدة يا مريم .. محجوب شريف
ياعامرة حنية ..انا عندي زيك كم ..ياطيبة النية
بشتاق وما بندم..اتصبري شوية .. ياوالدة يامريم ماني الوليد العاق
لا خنت لا سراق.. والعسكري الفرّاق بين قلبك الساساق وبيني هو البندم والدايرو ما بنتم.. يا والدة يامريم
عارف حنانك لي .. راجيك تلوليني دايمًا تقيلني وفي العين تشيليني .. القاهو عز الليل .. قلبك يدفيني
ضلك علي مشرور ..قيلت في سنيني انا لو تعرفي الفيني انا كم بحبك كم والعسكري الفراق بين قلبك الساساق وبيني هو البندم
والدايرو ما بنتّم
طول النهار والليل في عيني شايلك شيل لكني شادي الحيل لا خوف علي لا هم .. هاك قلبي ليك منديل .. الدمعة لما تسيل .. قشيها يا مريم
ما بركب السرجين وماني زول وشّين ياوالدة دينك كم
دين الوطن كمّين
ما شفتي ود الزين الكان وحيد امو
قالولو ناسك كم ورينا ناسك وين؟ ورينا شان تسلم
العودو خاتي الشق
ما قال وحاتك طق تب ما وقف بين بين لي موتو يتقدم
انا ما بجيب الشين
انا ما بجيب الشين
انا لو سقوني الدم.. والعسكري الفراق بين قلبك الساساق وبيني هو البندم والدايرو ما بنّتم
وكم من حبيبًا لي .. كان مالي بينا دروب
ما ودّع الحباّن
ما وسدوه الطوب
حي
حي قولي ما حي ووب
ما خلّى ساعة الموت
يمة السرج مقلوب
إتشتت الرصاص في جسمو واتقسم
لاقاهو يتبسم
والحولو حبلو وكان ريحة صباو تنشم
زي التقول يوم داك يوم العرس يادوب
انا ما بجيب الشين
لو سقوني الدم والعسكري الفراق بين قلبك الساساق وبيني هو البندم
يُّمـة السجن مليان
رجالّة ما بتنداس
الختّو قبلي الساس
والشالو هّم الناس
والفات وليدًا ليه
وما مسّكو الكراس
ما سمعو يتكلم
ما نحن عود الفاس
فرسان حمى وحراس
في الحارة نتحزّم عشان القدر ما كاس مالاقي بيت يتلم
عشان ماالطواهو الجوع
المُتعب المعدم
والعسكري الفراق بين قلبك الساسق وبين هو البندم .. والدايرو ما بنتّم
ما تقولي شن سويت
ما تبكي ما سويت غير البطمّن ناس
بي همّهم حسيت
حارس مع الفرسان
حارس بلدنا البيت
إخواني علّو السور .. انا طوبة ما ختيت
ديل من زمان تاتيت لامن كتبت قريت
وعرقنا ياما يدر
يمّة اللبن والزيت
الكسرة والكراس
لي قشة الكبريت
وتقولي جيدًا جيت
راجع مع الفرسان
فايت الحدود واسيت
وتغني يا مريم
لينا وتجرّي النّم
والعسكري الفراق بين قلبك الساساق وبيني هو البندم
والدايرو ما بنتّم
يا والدة يا مريم
| |
|
|
|
|
|
|
|
|
|
Re: قصائد ثورية (Re: banadieha)
|
العزيزة تغريد
مساء الخير
انتي تأمري ونحن نطيع
العزيز بناديها
لماذا تريد ان تربكني وانت تعرف اني انهل هنا من معينك دومًا
| |
|
|
|
|
|
|
|
|
|
Re: قصائد ثورية (Re: bunbun)
|
هادئًا كان اوان الموتِ
عاديًا تماما
وتمامًا كالذي يمشي بخطوٍ
مطمئنٍ
كي يناما
وكشمسٍ عبرتها لحظةٌ كفُ غمامة
قال مع السلامة
لوّح بابتسامة
ثم ارتمى
وتسامى
وتسامى
وتسامى
غارقًا في دمه
واسمنا في فمه
وتسامى
وتسامى
وتسامى
والاسى حزمة كبريتٍ رماها
في ملايين الايادي
ناهضًا بكل عينٍ وفؤادي
مالئاً كل زمان ومكان في بلادي
وغدا المت والجلاد
اسيرين حسيرين
ذليلين حقيرين أمامه
سيبقى رغم سجن الموتِ
غير محدود الاقامة
يبقى غير محدود الاقامة
................................................................
صديقي بمبن فعلاً احساسك في محلو النشيد لشاعر الثورة محجوب شريف وكانت ناقصة حبتين فتميتا ليك ما نحن بنتم بعض وزي ما قال حميد
( يا الفي القلب بيتك يا عُشرة زميل ) وكتب هذا النشيد عند استشهاد الشهيد عبد الخالق محجوب وحمل أسم ( هكذا استشهد البطل ) .
ويا بمبن لو عندك مشتاقلك كتير والله وللجيران وللحلة وبرضو جيناك وكنا طلعنا منك مرفوعي الرؤوس ارجو منك انزالهم في البورد وشكراً ليك يازوز
| |
|
|
|
|
|
|
|
|
|
نعم (Re: bunbun)
|
نعم القصيدة لشاعر الشعب محجوب شريف ...عن الشهيد عبدالخالق محجوب
تحياتى
ود عزة
| |
|
|
|
|
|
|
|
|
|
Re: نعم (Re: wadazza)
|
شكرا ود عزة على التوضيح
ولك وللجميع تلفون العالم حوّل
محجوب شريف
إتنين وتلات أصفار
البرق هناك
مستني
والشمس على
استنفار
فلنزحف نحو
النور
لو ننحت بالأظفار
من حقنا نحلم
بي عالم
بي عالم
يتسالم
ضدَ التسليح
الخبز .. الحريات
المكننة
والتلقيح
لن نقبَل بالمعتاد
العكننة والتبريح
العدل بلا تمييز
الحظر على
البمبان
العطر مهب الريح
دوران الأرض
مراجيح
والشفع لؤلؤ منثور
سادين السكَّة
أناشيد
ما دين الدنيا
بساتين
ورداً..قمصان
وفساتين
والنهر بيعمل زقزاق
من خضرة وحفلة
ياسمين
ناساً جينا تم زيناتم
جنياتم خِلقة
وأخلاق
شبت حبت من لسَّعَ
في الخاطر شوق
وحنين في عيون
العُشاق...
كم مُدُناً طيَّ
الأشواق
حاراتا حتملا
الأسواق
وشوارع تجري
ملايين
لِسَّع في سنَن
الأقلام
أنفاس الناس القِدام
وخُطى الأقدام
في القرن الواحد
وعشرين
من خير الأرض
الممتد
تنعم أفواه
ومناقير
والحبّه ظلال
وعصافير
والخطوة بتبقى
جماهير
والهمسة بتبقى
هتافات
تتفكك لعب
أطفال
وأسرّة وإسعافات
آفات
فتكت بالسلم
جنازير
وتقرب بينَّا
مسافات
كنا بنمشيها
محاذير
وتفرهد ياما
ثقافات
تتنفس حق
التعبير
لا رجعة لظلمٍ
قد فات
تلقوه هناكَ
ملفات
فى ركن القرن
العشرين
إلقاء القبض على
الخوف
الخلا النسمة
أعاصير
والشجر الأخضر
أوتاد..
من حَقنا إننا نحلم
لن نقبل بالمعتاد
نتماسك أيدي
ونرتاد
القرن الواحد
وعشرين
شُبَّاكاً جنب
الشُباك
آفاقاً ذاتَ مصابيح
تلفون العالم حول
لا شك االرقم
!! صحيح
| |
|
|
|
|
|
|
|
|
|
Re: نعم (Re: bunbun)
|
شكرا شديد على الاناشيد الرايعة دي يا رايع
لعلو في يوم تلفحنا شمس الثورة....
ونبقى اولاده السمر
ماليانا العزه واخدانا الكرامه
و الدنيا فاتحالينا ابوابه
وليك كتيير الشكر لترحيبك بي
وربنا يديك العافية
و يا بلدي يا حبوب
| |
|
|
|
|
|
|
|
|
|
Re: نعم (Re: REEL)
|
ريل
اكيد التحايا
باكر ضواي
ويوم بكرة جميل
لك لجميع القراء
اهدي
نص
الشهيد
محجوب شريف
صدقنى أنا لقيتو أمبارح
لا بحلم كنت ولا سارح
كان باسم وشامخ كالعادة
نفس الخطوات البمشيها
نفس الكلمات الوقادة
كان فاتح قلبو على الشارع
صحيح أنا قبلك صدقت
قريت وبكيت لما سمعت
يوم نفذوا حكم الإعدام
لكنو بكل تفاصيلو
بأدق أدق تفاصيلو
اسمو ولونو
ضحكو وصوتو
مشيهو وطولو
لاقانى وبحلف متأكد
لا طيف، لا واحد من جيلو
فوجئت حقيقة وبصراحة
لو مش أبعاده الشخصية
والسوق .. الحركة هدير الكارو
حديث المارة مع الباعة
والناس، الداخل للبوستة
الطالع منها، والساعة
زى سبعة صباحا
والشارع
مليان عمال وأفندية
وطول الوقت وكنت بفكر
إمكن بحلم
كل الحاصل يمكن إشاعة
بس لكنى جريده قريتها
ليالى المحنة
سمعت إذاعة
وكل الزملا الشهدا، شرفنا
صانو شرفنا بكل شجاعة
واستبسالم كان في الدنيا
حديث الساعة
وشفت بعينى
فتشوا بيتنا وبيت جيرانا
رفعت ايدى
مره الدبشك، مرة السنكى
مره السنكى مرة الدبشك
دا كلو تمام
أنا عشتو وشفتو
لحظة بلحظة، مشاهد حية
بس لكنو هداك قدامى
كمان شايفنى
بعاين لى
وطول الوقت .. وكنت بفكر
يمكن بحلم
يمكن أمانى
يمكن بشبهو واحد تانى
وفجأة الصوت إياه .. عرفتو
عرفتو .. الما بغباني
ياخينا إزيك
إهلا مرحب .. أيوه اتفضل
نادانى
*
مشيتلو مصدق .. وما مصدق
سلمت بقلبى وأحضانى
شعرت كأنه بيعرفنى
شعرت كأنه بيقرانى
راجل نكتة
عميق ومهذب
رائع جدا وإنساني
ولما جمعنى وشجعنى
سألتو بدهشه عن الحاصل
قاطعنى .. بتعنى الإعدام؟
إعدامنا .. بتقصد إعدام؟
الموت .. لو شنقا حتى الموت
الموت .. لو رميا بالرصاص
ما هو الموت
الشعب بقر رمين الحى
والميت مين
ونحن عمرنا القدام
الحزب
اليقظة
الإقدام
الحزب
اليقظة
الإقدام
الحزب
اليقظة
الإقدام
وبسرعة إتكسر الميدان
بالناس
عشرات العشرات
أطفال .. عمال .. طليعيين
وبنات طيبات
ومنشورات
| |
|
|
|
|
|
|
|
|
|
Re: من غيركم يعطينا الامل؟ (Re: eyes of liberty)
|
الاخوان
ود الديم
&
عيون الحرية
تسلمو يا رايعين
آه ما اقسى الجدار
عندما ينهض في وجه الشروق
ربما ننفق العمر
كل العمر
كي نثقب ثغرة
ليمر النور للاجيال مرة
ربما لو لم يكن هذا الجدار
ما عرفنا قيمة الضوء الطليق
| |
|
|
|
|
|
|
|
|
|
Re: من غيركم يعطينا الامل؟ (Re: sultan)
|
لمحجوب شريف ولحميد
وكل من خلد صرختنا حرفا جميلا
وإليك بنبن
كل التحايا والأخ سلطان وسارا
وياريت تنشر آخر أعماله خاصة قصيدته إلى الشهيد علي فضل
وما زلت في إنتظار مزيد من التواصل
| |
|
|
|
|
|
|
|
|
|
Re: اناشيد ثورية (Re: bunbun)
|
redيا متخبية خلف وضوحك
محمد الحسن ســالم حميد
يا متخبية ...
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك
... ... ...
يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .
... ... ...
يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..
... ... ...
يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..
... ... ...
كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..
... ... ...
كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة
... ...
بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل :-
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة
... ... ...
وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة
... ... ...
رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"
... ... ... ...
البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك
... ... ... ... ...
يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل
... ... ...
حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول
... ... ...
سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك
... ... ...
جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك
... ... ...
المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة
... ... ...
شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك
... ... ...
تنمسيبو
هديراً طيِّب
وتصحي
خرير الفجر
صبوحك
... ... ...
عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة
... ... ...
يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك
... ... ...
قدمك قاشر
قطع الفاشر
سمسم باكر
باهي مسوحك
... ... ...
سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك
... ... ...
تسلمي واضحة
وراء مخباكي
أو متخبية
خلفِ وضوحك ؟
| |
|
|
|
|
|
|
|
|
|
Re: اناشيد ثورية (Re: bunbun)
|
أكتوبر*
محمد المكي إبراهيم
* هذه القصيدة مأخوذة عن كتاب "50 قصيدة من شعر الفصحى في الغناء السوداني" جمعها وقدّم لها "النور حمد"
إسمك الظافر ينمو
في ضمير الشعب إيماناً وبُشرى
وعلى الغابةِ والصحراءِ يلتفُّ وشاحاً
وبأيدينا يوهّّجتَ ضياءً وسلاحا
فتسلحنا بأكتوبرَ لن نرجعَ شبرا
سندُقُّ الصخْرَ
حتى يُخرجَ لنا زرعاً وخُضْرة
ونرودُ المجدَ حتى يحفظَ الدهر لنا إسماً وذكرا
****
باسمك الأخضر يا أكتوبرُ الأرض تغنّي
الحقولُ اشتعلتْ قمحاً ووعداً وتمنّي
والكنوزُ انفتحتْ في باطنِ الأرضِ تنادي
باسمك الشعب انتصر... حائط السجن انكسرْ
والقيودُ انسدلتْ جدلةَ عُرسٍ بالأيادي
****
كان أكتوبرُ في أمتنا منذ الأزلْ
كان خلفَ الصبر والأحزان يحيا
صامداً منتصراً
حتى إذا الصبحُ أطلْ
أشعل التاريخَ ناراً واشتعلْ
كان أكتوبر في غضبتنا الأولى
مع المكِّ النمرْ
كان أسياف العُشَرْ
ومع ألماظِ البطلْ
وبجنب القرشي.. حين دعاه القرشي حتى انتصرْ
--------------------------------------------------------------------------------
بلدي
بلدي بلد ناسا مواريثم
في أول شي ..كتاب الله
وحصان مسروج، وسيف مسنون حداه درع
كتاتيبم تسرج الليل مع الحيران
وشيخا في الخلاوي ورع
وكم نخلات تهبهب في جروفا الساق
وبقرة حلوبة تتضرّع وليها ضرع
بلدي أنا
تشيل الناس ، كل الناس وساع بي حيلا وليلا يسع
وتتدفق مياه النيل على الوديان
بياض الفضة في وهج الهجير بيشع
بلدي سهول ، بلدي حقول بلدي الجنة للعاشوها
ولي البرّة بيها سمع
بلدي بلد ناساً تكرم الضيف
وحتى الطير يجيها جعان ومن أطراف تكيها شبع
بلدي بلد الصفقة والطنبور وجاراتن تنق بالليل
وبنوتن تحاكي الخيل
يشابن زي جدي الريل
بلدي أمان ، بلدي حنان وناسا حُنان
يكفكفوا دمعة المفجوع
ويبدّوا الغير على زاتم
يقسموا اللقمة بيناتم
ويدّوا الزاد حتن كان مصيرم جوع
يحبّوا الجار
يموتوا عشان حقوق الجار
يضوقوا النار عشان فد دمعة
وكيف الحال لو شافوها سايلة دموع!
ديل أهلي .. واللــــــــــه ديل أهلي
البقيف في الدار في نص الدار
وأقول لي الدنيا. كل الدنيا ديل أهلي
عرب ممزوجة بي دم الزنوج الحارّة
ديل أهلي .. ديل قبيلتي لمّن أدور أفصل للبدور فصلي
ديل فصلي
أقول بعضي
ألاقيهم تسرّبوا في مسارب الروح
بقوا كولي
ألاقي قلبي والإحساس
وسافر في بحار شوقم زمــــان عقلي
أنا محل قبّلت ألقاهم معاي ، معاي زي ضليّ
أنا لو ما جيت من زي ديل كان وا أسافاي ، وا مأساتي وا زّلي
تصوّر كيف يكون الحال لو ما كنت سودان...
وأهل الحارّة ما أهلي تصوّر...
undefined
| |
|
|
|
|
|
|
|
|
|
Re: اناشيد ثورية (Re: bunbun)
|
بن بن شكرا على الاشعار الرائعه ياخي
داير منك طلب في قصيده سمعتها ايام انا طالب بتقول ياعم صابر خليك صابر ممكن بالله لو حافظها وبعدين اتحفنا بي الجابريه تحي الثوره عايزين بسطه ومدرسه اسطى والشفخانه وسوق منضبطه
زاتو
__________
| |
|
|
|
|
|
|
|
|
|
Re: اناشيد ثورية (Re: ALZOLZATOO)
|
للعزيز بنبن وجميع الإخوة والأخوات
هناك نص رائع للرائع حميد
مطلعه
كونفدراليتك خارم بارم
فمن يحفظ هذا النص رجاءا يشركنا في قراءته
| |
|
|
|
|
|
|
|
|
|
Re: اناشيد ثورية (Re: nadus2000)
|
الاعزاء نادوس
والزول ذاتو
تحايا بعمق ما بيننا
للاسف لم اطلع على النصوص المذكورة
عم صابر ، والكونفدرالية
مرثية علي فضل احفظ منها القليل من الابيات ادناه
الزول ذاتو
نص الجابرية
موجود في بوستات الاخ ابو يسرا في المنتدى بذات العنوان
وممكن إذا حبيت نجمع القصيدة في بوست واحد
عاش متزن ونبيل زيو زي اي زميل كالخضرة في الاشجار والموية جوا النيل عاش متقد زي نار خلوية عز اليل زول لي طريقو اختار واختارو دغري عديل قابض على الاصرار على يوم ح يأتي جميل غير الغبش ما اختار جهةً عليها يميل
| |
|
|
|
|
|
|
|
|
|
Re: اناشيد ثورية (Re: bunbun)
|
حبيبنا بن بن
هل لك ان تتحفنا بنص
محجوب شريف
اهي الخرطوم
صاحيه بتصحي ما بتنوم
وتغلي هموم وريح وسموم
...............
...........
.........
......
....
| |
|
|
|
|
|
|
|
|
|
Re: اناشيد ثورية (Re: bunbun)
|
الود والتحيه ليك يا رائع على المساهمه الاروع
اتحفنا بالمزيد و ياريت لو في نصوص مسجله
ودوما ماشين في السكه نمد .....من سيرتك للجايين
| |
|
|
|
|
|
|
|
|
|
Re: اناشيد ثورية (Re: bunbun)
|
الزميل الرائع بن بن في قصيدة سمعتها بدري ولي زمن بفتش لية اسمة (الضوء وجهجهة انتساب لمحمد الحسن سالم حميد) ياريت لو عندك تكتبة لينا ولك الشكر
الضوء حكي
| |
|
|
|
|
|
|
|
|
|
Re: اناشيد ثورية (Re: belsharif)
|
الاخ العزيز ايهاب
اطيب تحية
والشكر لك
البوست مفتوح لجميع الاخوات والاخوان للمساهمة
وماشين في السكة نمد
الاخ العزيز belsharif
تحياتي الحارة والاكيدة لك
قمت باضافتك بالماسنجر
وسعيد بالتعرف عليك
من موقع الزميل العزيز الخواض نقرأ معا رائعة حميد الضو وجهجهة التساب
http://www.tibri.4t.com/ash3ar/index.html
العزيز ايوب
مرحبا بيك وشكرًا على الوصلة الجميلة لقصائد حميد بدوري اهديها لكل رواد المنتدى ، الشكر مرة اخرى على ايميلك وسعيد بالتعرف عليك
تقبل تحيات الصادق الجيو الذي اسعد بتواجده معي هذه الايام
| |
|
|
|
|
|
|
|
|
|
Re: اناشيد ثورية (Re: bunbun)
|
كان أسد الله حمزه
هاشم صديق
ها قد استرد السادةُ
الخلفاءُ والأمراءُ
أملاكَهمُ وأسلابَهُم
قصورَ المدائن
حدائقَ بابل
((ايوان كسرى))
وبيتَ المزارة.
لكن متي يعيدون
لبيتك اشياءَه
فأنت تباعاً
لتُسكت جوعك
بعت الأثاثَ
بأرض (الدلالة)
وجُلّ اَلأوانى
وراديو الأغاني
صورِ الجدارِ.
لُعَبَ الصغار
وحتى الأماني
بثمنٍ خسارة.
(2)
ها قد استردوا جميعاً
أشياءَهم
فمتى يعيدون لحمَكَ
فوق العظامِ
بأمر النظام
وختم الأمارة؟!
وكيف يعود ابنك
طائراً
-بعد أن صار أجنبياً-
من جليد الاقاصى
لدفء الدَيارِ
((بفيزاَ)) السفارة؟
وكيف يعود لحقلكَ
بعد أن صادروه
ومزقوه
غناءُ البشارة؟
وكيف يعود
من سنين الهوان
لهذا المكانَ
وتلك الحوارى
_بأمر الطوارى_
غشاءُ البكارة؟!
(3)
يخرجون بإسمنا
سراً
من ظلامِ الحدودِ
ويعودونَ جهراً
بإسمنا
تحت ضوءِ المطارْ.
يسترِدونَ في كل مرةٍ
أشياءَهم
فمن يعيد ((لدولابك))
بعضَ الملابس
ومن يعيدُ لبيتكَ
ضحكَ الصغار؟!
ومن سيفتح منهم
باب صدرِكَ
ليشهدَ هذاَ الدمار؟
ومن سيعيُد ظلكَ
يافعاً
في عيون الجدارْ؟
ومن يملكُ منهم
بعضَ ((الشطارة))
لينزعَ من قلبِ
البيوت
نصلِ الَمرارة؟
(4)
جميعهم امطرونا
جواً وبحراً وبراً
بحمم الخطابة
كلما جاء منهم نبى’’
مزقَ أوراد السالفينَ
وحاكم آياتَهم
وأعلن في المذياع
عصرَ الغلابة
ثم رويداً رويداً
يخرج الزيف
من خُبئه
ويسوم الامنياتَ
صفع ((الحقارة))
ومن جاء منهم
ولم ينافح من أجل ((أمك))
وثأر ((عزة))
ثم أدَار للايتامِ ظَهْرَه
وأقام على الفَجرِ
حدَّ الحرابة؟!
من منهم لم يُبشّر
بعدل المصاحفِ
وسُنن الرسول
ثم صادَر من الشمسِ
زيتَها
وأسْمى الافولَ
((ازدواج الادارة))؟!
(5)
رضعنا الطفولةَ
لبن الكلامْ
أكلنا الخطابةَ
بعد الفطام.
سقتنا الرجولةُ
لهبَ الصدام
وعند الكهولةِ
ملوكاً دعاة
وكانوا جميعاً
ولاة حواة
يخرجون ويدخلون
يدخلون ويخرجون
((يقولون ما لا يفعلون))
يخاصمون ، يصالحون
يستردونَ في كل مرةٍ
أشياءهم وتيجانهم
فمن يعيد لحَمكَ
فوق العظام؟
ومن يجففُ
من ثقب أذنكَ
لغوَ الكَلام؟
ومن يعيدُ لصدرِكَ
بعض الهواء؟
وكيف يعودُ لجيبكَ
(حق الدواء)
ومن ينفض عن اسمِكَ
رملَ الحرابة
وينزعُ من حلقِ عمرِكَ
شوكَ الكآبة
ويقطع من حول عودِكَ
حبلَ الرتابة؟!
ومتى تستردُ أشياءكَ
بأمر الإله
وليس الإمارة؟!
ومن ينفخ
في جسد المقابر
روحَ الجَسارة؟!
(6)
جميعهم يتشابهون
مثل التوائمْ
بغتةً يتعاركون
مثل الصقور
فجاةً يتعانقون
مثل الحمائم
يعلنون باسمنا
الحروبَ على بعضهم
ثم يتلون باسمنا
بيان السلام.
تمزقنا بين إدبارهم
وإقبالهم
وأكلنا وشربنا
من حصادِ الكلام.
هل جاع منهم
يوماً نبى’’
وهل عَرفَ الخليفةُ
ذلَ الطعام.
كان رمضانُ شهراً
واحداً
ثم صار العامُ
شهراً للصيام
وهم يطيرون ويهبطون.
يُصرِّحون ويخطبون.
يستعيدون في كل مرةٍ
أشياءهُم وأحلامَهُم
فمن يعيد لحلمك
طيرَ البشارة
ويرفعُ عن ثوبِ صمِتِّك
أثرَ القذارة
ويغسلُ عزمَكَ
بماءِ الطهارة؟
(7)
هل رأيتَ؟!
تُنهبُ الآياتُ
من حلقِ المآذن.
تُوضعُ الثوراتُ
فى جُبُ المخازن
وكان أسدِّ الله
((حمزة))
ثم اصبح ((ابن لادن))
تبعث السننُ الجميلة
فوق ساحات الفداء
تشرب الغاباَتُ
من فيض الدماءْ
وخلف نار الحربِ
رَقَص الاغنياء
صاروا شحماً
من شقاء التعساء
((فكوا)) عَهد الله
في (عكس الهواء).
ليس عدلاً يا رسول اله
أبداً
ان يصير الدينُ
كلَّ الدينِ
في غُررِ الجباه
وأن يصَير السوقُ
((كعبة))
والمصارفُ ((كربلاء))
من لى بأفعالِ الصحابة؟
من لى بسيفَ
مثل ايمان الغَلابة؟!
من لى بقبسٍ
من منارة
يرسلُ الضوءَ
الى قلبِ المغارة!
(
عفواً
فهذى الارضُ أضحت
من بياتِ الحلمِ
جُرزاً
لم تزل تهفو
الى نيل ينافحْ
منذ ((هولاكو)) و ((كسرى))
تعزفُ الشُمس
على وترِ المذابح
بعد فجر((القادسية))
لم يقف نجم’’
على خشبِ المسارح.
كل زيد جاءَ ليلاً
اوبصبحٍ
كان مشروخ الملامح.
يدخلون ويخرجون
من ((اليمين))
وبالأواسط و((اليسار))
يحرقون الوعدَ
فى حمم التناحر والشجار
كل طاؤوس تطاول
كان فحلاً فى الخطابة.
ينحرُ الافعال جهراً
في التناقضِ والغرابة
من يصدق
_يا إلهى وأنت جاهى_
أنهم قد (خصخصوا)
الحبَ الإلهى؟!
من لى((بفيزا))
من سفارة
أو بعقد
تحت وضَع اليد
أو رهن الاشارة؟
(9)
((اتبكى وتضحك))
وانت تغادرُ كرسي
الوظيفة؟
يأتى الصغارُ
لكرسى الكبارِ
بأمر الوزيرِ
وختم الخليفة
كأنك تدفعُ
مهرَ الجدارة
قبض السرابِ
ولسعِ المرارةَ
وتجنى التزام
الايادى النظيفة.
واليوم تسأل
أين الغذاء
(وحق الدواء)
وتركَض لهثاً
لأرض ((الدلالة))
لتُسْكتَ جوعَك
بعتَ الاثاث
وجُلَّ الأواني
وراديو الأغاني
صورِ الجدارِ
لُعبَ الصغارِ
وحتى الأماني
بثمنٍ خسارة.
تمهل وأنظر
يغنى الملوكُ
لكرسى الإمامة
وينسوا اقتراب
صهيل القيامة
وأنت تصلى
لربِ السماء
وتدعو بصوتٍ
شفيفِ البكاء
وترنو صبوراً
ليومِ الحسابِ
وطيرِ البشارة
(10)
لا زال جُل القومِ
في شبقِ التناطح
والحَرابةَ.
كل طاؤوس تطاول
كان فحلاً
في الخطابة
كلهم يطأوون
أحلام ((الحوارى))
وكل ((كسرى)) يدِّعي
طهر الايادى
وكل ((قيصر)) يدِّعى
غسل الجنابة
وهل رأيتَ
تُنهْبُ الآياتُ
من حلقِ المآذنْ
تُوضعُ الثوراتُ
في جُبِ المخازن.
وكان اسدُ اللهِ
حمزة
ثم أصبحَ ((إبن لادن))
من لي بقبسٍ
من منارة
يرسلُ الضوءَ
الى قلبِ الم
| |
|
|
|
|
|
|
|
|
|
Re: اناشيد ثورية (Re: bunbun)
|
وينك يا ابو الزوز ايه اخر اخبارك طبعاً محمد ادريس معانا هنا ولحدى الان بنتقابل عن طريق التلفون وقال لي نازل تعرس فبالله ادينا اخبارك .
طبعاً اخيراً اشتركت في البورد الجميل ده وبالمناسبة دي حارسل ليك (مصابيح السماء التامنة ) على اخر تنقيح لحميد وقريب حانزل ست الدار بعد الاضافه العملها حميد وبرضو لا نغنيك ولكنا نناضل .
يا جايي مارق
من دخول الغيث
شرايين التراب السايفة ..
أوردة الوطن .
قشره اليباب ..
نشره العطش..
كلما سرت
قطرات دِرِبَّ الرحمة
في جوفو ارتعش ..
بال الشجر
حال العصافير
الخياله مع الدغش
مشدوه متل
خاطر طفل
من ضل ضهر راكوبة
فوق حافة حجر
واقع سجر ..
واقف يعد نقط المطر ...
ويتمطق إحساس السحاب
بين لهفة الطين
والشمش
لمَّت ورا طرف الحقاب
آخر رمش
باقيله في عِب الشفق
والليل ملقِّيله الطرف .
شفق المغيب ..
قفا غيم بِهِت
كان نفضة الريشة الأخيرة
حَمَاره .. فوق لُوحةْ الوكت ..
يَا كرْكُدَايْةَ الله
إترشق ناقع عصيره
من إيد ملاك
فوق المغارب بي تحت .
كانت مراكيب حين صلاة
والترعة قِدّامن .. طشِت
ولاّ المراكب من بعيد ..
ودعات على النيل
والنخيل المتكي
دار يقرا البَخِت
قنّب يحِت ..
قلّــع زريزير غفوتو
عضَّ إنطلاقة غنوتو
وقام منحفِت ..
والكمبو ..
ينشاف .. من مسافة ..
قطر بضاعة
العربجية الطيبين ..
سبّابة والمتسببين ..
شعراء ومغنين الأنادي ..
أنصاص لصوص ..
حلب البلد ..
عرب الجبال ..
منسللين من لاتحت .
والريح يشيل
للنيل
مع هرج المغنين
الدعايات
نشرة أخبار الولايات
الوفيات
الملايات
العبايات
المرايات
التصاوير
التعابير
الحكايات
النِكــــِتْ .
عشم البنيات في الضراع
الضاع
وكت حرَّ الكفِت
زاغ الصراع
ذات جمعة
قدَّت من وطن
توب السبت .
نقد الحمام خُرج الوكِت
طارتلو نقطة لحظة
من موية ملح
في حلقو
مرّرت الهديل ..
كَمَد الجرح ..
جبد السكات ...
لكنو فات ...
وأبى يتلفت ؟
بال الطفل ..
يرقل على ضهر الحَمَار
يجمع مصابيح السما التامنة..
ويطش
ينكربش الحلم البعد
قرب يوافينا
ابتعد
لو مدّت ايد
كان إنجبد ..
يا الدنيا
بي ريحة الدعاش
لو تنعرش ...؟
أو تنفرش
تحت الفراشات
بالبَرَد ؟
فوقُو الوعد
صادق يمش .
لو يلقى راس رسن الزمان
ديك لحظة
ما كانت تمش
شان يندهش
أو ينبرش
بين نجمة الملكوت
ونسمة رضية
من رب العرش .
يا غادي منك
فوت كلام الشوق
من القلب
الخشم بابو البلد
لو خشَّ هدهد
في رماد ما فيهو
يمرق قانقرد ..
والقانقرد بابُو الحمام
راجيهو لمليم الطيور ..
ضمَّة جناح ..
صمّة عدد ..
إيدين بنيات الفريق
قادرات على
صد الحِدَيْ
جاسرات على
صقر النكد .
إيدين بنيات الفريق
بتهدهد الطفل الرضيع
بتعدي شيخ
دومة الحفير
تشلخ لبق ..
تسقي الخدير
بتعوس
وتفرك للملاح
بتورِّق اللوبي
وتحش
تمسك مراح ..
تحلب ، تخُش
تغسل هموم أيامه
في طشت الحلم
تنفض تشر الشوق
هِدِم
تنشل من البير
أم تلاتين باع
تعتِّل ..
تفزع الطيّانة
لو ما تجدع التبّانة
بتجيّه بيوت ..
تغزل خيوت ..
بتطرز المنديل
تخيِّت لي طواقي العيد ..
صبر ..
بتَتَبِبْ السجاج
مع الفجاج
تقوم
إيدين بنيات الفريق
بتحش تمر ..
تخرت سبيط
بتعتِّق الدكّاي ..
وتخبز للصفاح
بتكفّي عيزومة
وضيوف ..
بتغني قيدومة
وتطوف
بتهني ..
بتودي وتجيب
بتحني ..
بتدلك حبيب
بتولِّد الأمات ..
تربِّي على الصلاح ..
زي ماب تضمِّد للجراح
إيدين بنيات الفريق
إن داهم الحلاّل
خطر
قادرات على شيل السلاح .
يا مناحته
وبلاّله
يا ..
رجع اللي راح
يا ود عيون ..
فِرْحَن .. بكن
تِرْحَن يغطْسِن
في الدموع ..
الدنيا عامرابك تظل
وإن كان رحيلك
فرتكه
أو يا لسان نار الصراع
لهليبه بعدك لو هكَع
مين شالُّو شيلة بلا اتكَّأ ؟
مع إنو صبرك .. ما نفد
برشمت .. أو كبسلت
كيف سعة الوجود في ضيق لحد ؟
باغتنا ريح الفجعة ليل
فرنب في جوفنا مرابنات الصبر
شات سعن الجلد
صادنا الذهول ..
زي التكنو قبل دا
ما فارقنا زول بعد الرسول
واللاّ التقول أول قلوب في الدنيا
يغشاها القدر بعدن تضيع منّو الدروب
تنطمبج الساحات حريق
يدغي الطريق المحتمل
كل الفريق سوقر وراك
يا جرحنا الكيف يندمل
ما بار وراك شهد الغنا
ونحل الحناجر ما همل
صادر خلايا أبو الدبر
صاقر حناياه نمل .. نمل
... .. .... ....
وين ماشي ..
يا نبض الرحيق
سايب المشاعر ريق دقيق
نهب المغنين التِفِل
غنواتن الورطانة
أو لوطانة في الريد المقق
حُترب صفق .. في طين ذبل
أوصاف على جسد الحبيبة
بهق .. بهق
تحت احتماله مرضرضة
زي لعبة ما استهوت طفل
وين داجي يا قمر الهنا
الكرّمنا عند مغرب مرق
سايب لياليك لي نجوم
واقفات وجوم على فد رجِل
وفرع الغُناء الميَّل هنا
على مين وراكَ . . حيتِّكل
والشيل تِقِلْ ؟
قَدْر اليشيلو الشيلة في
لكِن ظروفن هل تفي ؟
تحتاج جماعة من الرجال
الليها كنت براك تقل
دارت قبيلة من الحبال
الكان يقيله فرد حبل ...
الخوف قلوبنا التشتهيك ..
تنشك في ذاته وتنقفل
من بعد ما اتوحدنا فيك
ننفك قبائل وتنكتل
وينشعنفِن مسّار بعد فتل الحبل .
حب يا خيالي الوين وصل
دُر يا لساني وماك فَسِل
أطهر وزيزيناً يعوم
في النيل ، مع الصير منشغل
ولاّ اليقوم يوم بعدِ يوم
يغسل دمومو عديل غسل ..
ولاّ الوطن قال ماب ينوم
إلاّ الفجر يا ليل يهِل
ماسك وضوهو من الغيوم
السالو سيل ساعة محِل ؟؟
كيف الدبارة ؟
و ما العمل ؟
لمّا القبيلة تشيل سيوفه السوق
تبيعه على عجل ..
تغشى الكناتين العويش
عُقُب المغارات الحشيش
تاخد بخور ، ودخان
ولفّافات سطل ؟
ورق المواثيق إنبهل
كاويق جريح
طلوحبو ريح
كيمان مقنبرة للمديح
والطار مجلّد من حشا الفي القبّة
عصب الفي الضريح ؟
حلقات قمار تحت النخل
والخيل مجهزة للرهان
آخر النهار فوق السهل
لما الجدل يبقى الدجل
والأيدولوجيا هي الملاججه
واللواجه بلا عمل
اللخبطة
الخمج
البوليس كتا كتل
ليش البلاد ما تستباح
يوماتي كل ما الليل دخل
اشمعنا يا شوفنا الرحل
ما انصدقت زرقا غناك
ما كان حصل الحصل
والبت نصيرة سنة محل
بَنَت الدهب
بنيانه ما فات الرُكب
حزنت على التِقِي
والتِبِن وين تِبني لِبني
أبى يتلقي ..
والكيل كرب
ساعة الرجال سكنوا التُرَبْ ..
والدنيا موية وسط حريق
تصبح كُرَب تتمسى ضيق
قامت نصيرة تحِت تعب
بِرَت الفريق ..
يا اخواتي ستات البيوت
ناولني قوت
قبّال أموت
دور والعيال
ما فكُّوا ريق
طبق الدهب
بي مِدْ دقيق
دهب الجبال
صافي البريق
بي مد دقيق
أُن كان مريق
يا أخواتي ستّات البيوت
أدِّني قوت ..
عربون أموت ؟"
مطفية نيران التكول
رغم الدخان
والحلة زي المافي زول
رغم البطان ؟؟
يا اخواتي
ستات البيوت
صافي البريق ...
.. بي مد دقيق ..
أدني قوت ...
عربون أموت ...
عين الشمش زي التقول متشوشة
أو مرشوشة بي حمرة غضب..
زبد الحَمار زي رغبة المالح
بعد خجة غريق ..
والليل دخل كبت الفريق
قنعت نصيرة من البلد
قنعت نصيرة من الدقيق
كشحت على كوشة الدهب
وجات صادِّي بي نفس الطريق
لا رحمة غير الموت قبل
لمّت عياله على عجل
اتشهدت واستغفروا
وقفلت على روحه الجبل .
كانت نصبرة
بتفتكر
جوف الجبال
أولابه من عيشـة الوبال
أولابه من حرس الرجال
ساعة يصيب البال خلل
والحال مو يا ..
كم من نصيرة بلا نصيرة
اتريحت .. وفضَّل براك
رغم الفشل والإستياء
من مسخرة هادي الحياة
بي إيد تدهده للأجل ..
وبي إيد تهدهد .. في الجراح
بي إيدين تفتِّح للدروب
في كبرياء .. ..
والسايقي لابد من تصل .
ضُلْ النهار .. الليل ..
مُو .. يا ..
تبرد غبينتك ولوعتك ..
طول الأزل
ويا روعتك لامن تجادل دمعتك
دائماً تكون فوق العيون
مرحيبة بالداخل عليك من دنيتك
عبّيت مصابيح الصباح
ببياض ضميرك ونيتك
بعرق جبينك وبنيتك
وبالشمشِ ماروق الرجال
وجّت جنائن غنيتك
ما كان رحيلك غير دليل
للجايي ماسك سكتك
يا شدو عصفورنا البسيط
كل الحلوق إتوكتك
إن ماب تبيت فوق السبيط
طوِّل مسافة ركتك
ما صمتك مطراً غتيت
لا ريح لديح .. يوم سكتك
عذراً إذا حال الوطن
بالجاتو ذات ليل بكتك
سايقين بأيادينا الزمان
شادِّين خيوطو الفكتك
يا بئر تكلة الناس عليه
وما قطَّ ..
يي شنو دلو إنهتك ؟
يا صاحنا في الزمن الغلط
يا سابلو دمك كالغيوم
لا صرَّ وشك لا عبس
إيش يعني لو سالن نقط
من كل عابر نقطة بس
يصبح شرايين الظلط
تبقى الشوارع أوردة
وجسد البلد عافية عريس
لاف العتامير قرمصيص
لأجمل عروس النيل رحط .
والكون صحابك وإنبسط
فاتحة صحابك ولاّ موج
دا برش فراشك ولاّ شط ؟
سيل الدموع الما انحبَس
في الواطة بيقوِّم تَبَسْ ..؟
شهى المدائن تنتفض
ما تمتعض ..
موكب زفافك للأرض
شهداء الوجود تتلقى ليك
محتفية بيك ... شوقة الربط
مركب شرط .. هوجة البحار
شايل خبار الهاربين
كان البشارة لكل شط .
عِلت إبتسامتك حين هبط
ما من جواز غير راحة إيديك
لا من ربط عملة وشنط
نية رسول ..
إنسان فقط .
ما بينا بيناتك ربط
بي أسمى مبدأ .. وأقوى خط
ما جانا عشقك من فراغ
لا نحنَ غنيناك عبط
جرح الوطن خطالنا خط
ختالنا قول ما منو نط
والليلة يا موت يا حياة
خاتي البيختار الوسط . ..
ويا بلد فوق اللِمِيلِس
لا تَهِمْ
لاب تميد الأرض تحتك
لا مغنيك بتردِم
مادلك نغمو اليكاجر للبتاجر بالنضم
يشطب الشخمت مشاعرك
ويرسم الإحساس رسم
في الزمانات الكتم
غنوة تدخل .. زي نسيمة
زي شعاع قمرة ونجيمة
لا خشم باب لا تدق ..
لا في إمضاء رقيب غريب ..
لا تراويس لا ختم .
غنوة من بق المغني
وفي القلوب بالفال تبق
تحرق السقط التدني
وبي تأني ..
واثقة تفتح في الدروب
المارقة منك وداخلة منِّي
المارقة فيك وداخلة فيِّ
الداخلة فيكَ ومارقة منِّي
وشايلة حنِّي ..
ضريرة .. حُق
سيرة ..
دلوكة وتدُق
وتنطلق من بُق لِبُقْ
تنهرد دارات تغنِّي
رابَّة حس درويش مفرتك
صانّة زي شيخي التبنِّي .
ومن بعد دا ولا يهِم
المغنِّي مع قضيتو
يقضوا ليلات القِسِم ؟
كلما تنبح كلاب
كلما اِنكشَّح عذاب
كلما طفّح سِباب
كلما عانى الجسم
كلما غرّوهو سِم
كلما كان المغني
كما المعاتيه يبتسم
على التجني كأنو جِنِّي
سديد بصيرة وملتزم .
ويا ...
المغني الما نِدِم
يوجد غنوتو وينعدم
خاتم المغنين الوفاء
سي يا خَتِم ..
سلِّم على الشهداء وكفى
وإنجم من بعد السلام
يا ال … مصطفى
طابت عينيك
والحب عليك
يبراك وسِم
يكسيك هدم ..
أرقد .. قَفَا
ويكفيك إسم
الشتلة طالت ..
والسبيقة
بعد دا لاشنو
التنهدم ؟
قول للبلاد ..
الطلوحت عينيها
في دمع السواد
قول الله فِي .
قول ليها ما غنَّى الأسف
تتأسفي
لا حضَّ نمُّو على الحداد
تتكتفي
عد عود ما ودّع شهيد إنقريفي
في السكة يوت
في شهيد جديد
لأيام جداد
هيّا أنزفي
لمَّا الشوارع تكتفي
وينهض جواده المنكفي
وتتكيفي
قول للعباد
الطلوحت عينيها
في دمع السواد
ذات مرَّة .. ما خِبر السأم
لما البلاد صاده الوخم
صار المضاد الما اتلخم
دغم النغم في حرفو
وانفرطق لغم
ينسف مطاميس الألم
بي سن قلم
كل القواميس الوهم
جرفه المداد
لمّا الأماسي بقن رماد
خرم الزمان بي غادي قاد
وإندقّه في الخازوق سهم .
... ... ...
دُودر نويرات الفريق
قِربَن بعد كانن بعاد
كورك لنا ..
وما كُنَّا في
بعنا السيوف في السوق
أخدنابه السطل
هايصين كُتُر والخيل حِفِي
كورك لنا ..
( قبل المصابيح تنطفي
وينزل سواد
إنفقدوا الخيل والعتاد
إتمعنوا الدرب العديل
إتضحوا بالصبر الجميل
زمن الخساسات الخفي
إن زالف الشوق في الرقاد
قدح المواعيد بنكفي
في الضلمة برد الليل مخيف
قاسي إحتمالو مع التعب
والجوف خفيف
صعب إحتمالو على الضعيف
فِطْنَ النويرات الرغيف
فِطن الرغيف لِب الدِفي
فطن الدِفي إحساس الصباح
فِطن الصباح كل العصافير تحتفي
بي روعة الكون والعباد..
فطِن العباد جية البعاد
فطن البعاد الماهو في)
رجّع صداهو أعاد .. وعاد
زي أيِّ درويش إندغم
في نقرة النوبة الأرض
بين باطو يا دوبك شتم
أو قوق حمامة مولِّفِي
فوق راس بيوت سبلوقه دم
"إياكي تشربي يا طيور
في الترعة موية الترعة سَم
إياكي تقربي لي بذور
فوق القبور تحتن لغم
إياكي تضهبي والصقور
بيشموا شم
قوقت حمامة إلى الديار بعد السلام متقريفي
قوقت فجر
قوقت ضهر
قوقت عصر
بعد العشاتين
كيْكَت ..
سفهوها قالوا
مخرِّفِي ؟؟
كورك وراها
وكنَّا في
صانين زهاجي
كما التراب
حين كل غيمة
مطرِّفِي ..
على قَدْرِ ما اتحزم
يلملم فينا من نتش السموم
الدنيا تصحى مخرِّفِي
يجي ريح يسوق غيمو
المعوَّق ويختفي .
غلبو التعب
كوَّع على جرحو اليسار
وسكت .. سكت
قيرة الكمنجات إتكت
فوقو وبكت
أنشودة الفوت الوفي
أغرودة
أو زغرودة الموت الحفِي .
فيا مَن تحيَّر في سرُّو الفنا_
إذا الهاربين الجدد
خيَّروك يا تفوت
يا تخون البيوت
تكون من أنا ؟
إذا الغالبين في أحُد
أجبروك يا تموت
يا تعضِّي السكوت
فكيف الغنا ؟
وكت ما الشفوت
بصوتك تصوت
تعلِّق بكرتو على الميضنة
تحرِّم عليك مناجاة ولوفك
ملاقاة طيوفك وراء المشجنة
تغمد تشوفك
تتبِّن حروفك
قبُل توزنه
تقلبن كلامك
تعد إحتلامك
بباكر زنا
فنم لا تهم
لامن السلطنة
تكشُر الألسنة
يسري قول الشعوب
من مسام دندنة
مش يسد الدروب
المطر بالهبوب
والخبوب والخنا
وماب تعوذ الخلوق
من طريق ممكنة
مُش في هادي الدنا
من قشيش الجبال
التطاهو النعال
باقي نال الرجال
في بعض يفتنه
بين فرقة النبال
والقميري الوبال
والحياة المحزنة
الجنات الجهال
والبنات أم حجال
ضو بيوت الحلال
من هنا ولي هِنا
فجُّوا فورة الفنا
البقيرة أم ضروع
نقَّعن دم .. دموع
شمموها الجنا
والشديرة أم فروع
ركَّعن في خشوع
شعبُّوها القنا
طيَّبوها التلال
من خبوب الكتال
بي حبوب السنا
سوُّوا قيرة ومطيرة
أرووا شوق الرمال
غنُّوا .. يا هودَنَا
"لعبة قديمة عندنا
كان شبعت يا جنا
ما شبعت قول لنا
بت العسكر
تمشي وتسكر
بت النوبة
تغني طروبة
من الحنِّية
مع عرُّوبَه
تقلب الهوبة
في الراكوبة
على اللالوبة
تشر لي توبة
ترسِّي الغربة
تنسِّي التربة
مآسى حروبة
تكسر الحربة
بعود الحربة
تدق النوبة "
ربُّوا .. يا سودنة ...
بقَّروا الطير رجع
والبلد كع كرَع
ركَّ في الميضنة
دكَّ للميضنة
الهِي ما مئذنة
كانت الميضنة
الهِي ما مئذنة
ضاربة في نصنا
حقنة لي مصَّنا
مدخنة حربنا
مدمنة سبَّنا
وإحنا ما ذنبنا
بي طريق ربنا
جينا لي ها البلد
وإنولد حبنا
ليها لي شعبنا
والله عالم بنا
وعارف الميضنة
الهي ما ميضنة
ساسه مما إنبنى
ماها لي ربنا
ميضنة بشتنة
والرسول كجنة
ميضنة كشتنة
والله قد لجَّنا
من مياضن الدمار
الله هوي نجَّنا
وأبني فينا الوقار
لي جنا الكم جنا
إنت فارج الكروب
للبطولبو العنا
يا مخارج الدروب
من متاه الضنا
حكمتك في القلوب
بس ندور نتْبِنَا
إنت ياك طبَّنا
وياك خلاص قلبنا
من دواس شعبنا
سو رصاص حربنا
فاس لقى وعبَّنا
بالصلاح رضّنا
لي فلاح أرضنا
نبني للميضنة
التبر فرضنا
التصون عرضنا
وما تضر بعضنا "
إنها السودنة
منّها الهودنة
ويبقى يا حاكمين
كلمة العالمين
مافي من يلكنة
وحكمة الآدمين
مافي من يسجنة
ولاَّ ماب ننكتم
ننهزم .. ننهزم
إلاَّ ماب ينحكم
بالضلال شعبنا
فنم لا تهم
كشكشة كوزنة
والبغُش الغبش
ماب يغش ربنا
حزب من كذب
ماب يقوِّم بناء
وبناء منخرب
ماب يعمِّر بنا
فهِدَّ الرديف
العليه حقّنا
وأبن لك صريف
من عضاك أو قنا ..
وطن قول وطن
وطن يا جنا
وطن من تِبن
ولاّ قمحة هَناوطن
ثم من
وطن
ثم من
وطن
لا ثمن
باعك الزنزنة
وطن واحتمل
وطن واحتلم
برجع الحبيب
من متاه الضنى
في ناساً عزاز
مشتهنك رزاز
في ناس الرزاز
مشتهيهن هِنا
يغيض الحراز
حين يفيض البحر
عشان يذدهر
طول فصول السنة
قوانين تجوز
حتى في الأزمنة
هو الضد يكون
سكون في الغضب
غضب في السكون
هو المستقيم
هو المستدير
هو اللولبي
هو المنحنى
هي الكائنات
في الطيور مسكنة
وتستخف بالصقور
والحِدَيْ إن دنا
بالصراخ بالضفور
بالجناح اليفور
حين تفقِّع جنا
نِم .. حين تهِم
هِم وإدلهم
عليك الصدام
سرَّة المأمنة
عليك الكلام الجديد
الحديد
عليك النشيد
يا شهيد الغناء
تموت ماب تفوت
تموت أو تفوت ...
الشفوت العنا ...
ويظل الوطن
سيِّد الأمكنة
ريِّس الأزمنة
وأروح يات بكان
ألاقيك ..
معمِّر ..
مقيل أمهاتنا
أماسي أبهاتنا
ونهار البطان
يصنُّوا الجنات
يغنُّوا البنات
بذات المعاشم
يحاكوا الكمان
تصدِّق لقيتك
في شافع في خلوة
صباحاتو حلوة
مدنقِّر في لوحو
ينقِّر ..يدندن ..
بصوتو الملان
غناكَ المسخِّن
يبرِّد جروحو
ويدفِّي الكيان ..
وكت تمرق آهة
تصنقِّع تراها
يصنقِّع تراها
يشوف الدخان
تجمَّع سحابة
تكوس في الغلابة
وترابه الزمان ...
لقيتك في قهوة
ودا شيْ عادي كان
بس الماهو عادي
خلا ويا بلادي
صحارى وبوادي
جروحو الحجارة
التقرِّب تحارب
قبُل ما تعادي
دخلة المغارب
تبردب .. تقارب
كهارب.. كهارب
ترازي وتزازي
صواقع ترجف
بروقاً …توقِّف
قلوب الروادي ..
ورواديك معادي
غنا الإعتيادي
شريطك حدودي
حجارتك وسادي
مسجِّل صحاك
المنام الزيادي .
بس الماهو عادى
دا من وادى حلفا
ودا من كاجو كاجى
ودا من ريره غادى
ودا من كردفان
ودا من كل حته ...
عقاباتو شتّى
وجميعن يغنّوا
يغنّوا ... ويصنّوا
يصنّوا ... ويحنّوا
يذات الكيان
لذات الكيان
ناس ولا انشافوا
عنوه يتعارفوا
فلان ود فلان
ودفلان
قلنا سرك تعدى
الزمان والمكان
هبشتك ,.. نقشتك
مغمِّد حدرتك
منو المن شدرتك
طعم كم لسان ؟؟
أظل فيكَ حائر
كما العش في طائر
يا سِر الرحيق
كما البرتكان
شنو أصلك
غمائم ؟
حمائم ؟
هديله ؟
نسائم ؟
جنان ؟
طبول القبيلة
سيوفه وحصان
اليقيف فوق قتيله
لغاية الأمان
محل نمشي فينا
مهقد عديلة
وبشائر تجينا
شنو أصلك أذان ؟
جرس من كنيسة
إذا رنَّ عيسى
يصِن في الكهان ؟
ألوص فيِّ حافي
أكوس في اللي مافي
أظل فيكَ مدرك
لخافي البيان .
وتظل نبع المياه والضو
قمحنا ..
كسانا ..
عافي ..
سكن .
وين ما نسكتك .. نسمع
عصيفير الحكاوي رطن
متين ما نفقدك نلقاك
تحانِن بالغناوي وطن ..
مع إنو حباكَ ميتة الغربة
وإستكتر عليكَ كفن .
قدُر وطنك مع الأوطان
إذا ما كان سحايبو أبن
يمرقن قش من الوديان
عشان تدِّي السعية لبن
قدُر وطنك ..
إذا هلكان
قدِر ينقذ قرف دركان
قدِر يقسى ويخيِّب ظن
حِبَيْبُو .. الطيِّب .. الإنسان
يطفِّر ريحو .. روح الفن .
وطن .. ؟
لكنو ..
ما هولك
ولا الزول القبيل بي خيرو
بات زولك ..
وطن محتل
بشوف مختل
رؤى ووجدان
خيال مكسور
وشن جابرو
ينوم والجنّة في خاطرو
صُرُف غلمان
بنيات حور
خمور وقصور
يشِب من تل بخور تيمان
بلا رحمة وبلا رحمن
يقع يابس على دابرو
يرجِّع شهوتو الشيطان
إلى الدنيا ويقوم مبتل .
وطن من هولو ما هولك
ولاك الهولو من هُولك
فما معنى الأرض
بالضبطِ ..
أو بالربط ..؟
شن قولك
وكت تكدح
تكد حولك
تباصر الموية بالسرقة
غرامة
ودردرة
وعلقة ..
ويصادر الوالي محصولك ؟
يلز ضل المقيل تعبك
ينصِّل منجلك قصبك
يهز لك راسو قندولك
ولادة التابى ماب تابى
تحت باطك تجر الريح
بدل مسدار وورتابة ؟؟
وطن ما ليكَ فيهو وطن
بحر لي جرفو يتغابى
لو ما ترمي فطنو حجر
كركجايي .. دُرَّابة
لو ما هبَّ ريح الشيم
وريح الشيمة هبّابة
تقول مرسوم ؟
أو أنو الغيم
ملقّى عليهو
رقّابة ؟؟
بحر يا أخيْ
خسارة .. أفي
عوارضو الجَنْ
يحندك فينا بالمي الني
يملِّينا الشراب ألجن !؟
نصاقر لامتين الصيْ
والعالم صحاري سِقن
إشن عبّاك وقالك غن
أو غبَّاك وقالك عن ؟!؟
وطن خلوهو للأقدار فِتَن
ما خلُّوا فيهو خدار
خلاف الطرفي طرفِ أغن
وطن ما خلُّوا فيهو وطن
معلَّق بين لهات عربيهو
والزول الحويلو رطن
... ... ...
ولكنك تغنِّي وطن
بعد دا ,,,
وطن
بي دا ,,,
وطن
يي دا وطن
لاكلَّت مزاميرك
ولا ضرب الربابة وهن
عشان تتفتح الأبواب
تغنِّي حقيقة مو هوّاب
تغني صواب
تغني وشن
فيا دخلت هِبَيْب الرحمة
يا مرق الحِبَيِّب إذن
تغني طليق كما الطالق
تغنِّي .. تغني ما اتيقن
تبشِّر في التقانتو بكن
يكون المدفع الخاذوق
مكانو مكن
بدل ها الدم من الأمّات
رضيعاتنا اللبن مكّن
ومن بعد المناحة الضيق
زغاريد الفرج طقَّن
نقاقيرو اليسوِّن ... دُن
تطمِّن في المرق وحِّيدو
لا خوفاً عليك لا حزن
تغني من التعب لامَن
كلاك دمَّن
ولا شكراً رجيت
لا مَن .
فهل يعني النهاية الموت
وينبعزق غناكَ سدىً
أم أن الغيم حينسابق
على الأرض العزيزة فدىً ؟؟
؟؟؟ ؟؟ ... ؟؟ ؟؟؟
وطنّا حبيبنا رغم البين
هي الأشواق
حنينا إليكَ زين ..
يا زين يظل دفّاق
... ...
ما حوجتنا وندِّيك
وغيمنا عليك دوَم ساساق
يلاقي البينا بين واديك
أناقي غزيرة ماها أفراق
نحبّك من طرف من جم
برغم قطائع الإملاق
ماب تنذم .. علاقة دم
وفاء وتاريخ على الإطلاق
إذا ما الغربة لمتنا
على ذات الخلق وأخلاق
وطن وين كان في ذمتنا
فكيف يبقى الزمن فرّاق
هي الأشواق ..
وما بين السماء والأرض
مد أشواق
وما طال المطر بيصب
طبيعي إنو البحر .. ما راق
كما إنو العكار من طين
كمان من طين
يجي الروّاق
صحيح إنو المطر رائق
ولكن السحاب قد ضاق
خبارو الريح بأشِن سائق
وكت كبد التراب مشتاق
إذا ما العشق منسابق
ومنطابق على الأعماق
كذلك حضرة العشاق
مع غيبوبة الأشواق
..............
يا مسكون هيام وقيام
مع ليل الحنين الطاق
قسمتك من شتا الأيام
تضوق زي الوطن ما ضاق
... ... ...
وطن ساكت وطن نضّام
وطن ما فيهو أي كلام
وطن صابر
وطن علاّم
وطن آخر
وطن قدّام
وطن ساهل
ولاب ينحام
وطن ماهل
وطن قوّام
فرد واحد
عديد أقوام
وطن خالد
على الأيام
وطن ساكت
وطنّا وبس
في جوفنا إندس
ألف
ميم
لام
.......
متين ينبث
يلم قدّام ..
رمز لي مجدو صانو تمام
نحوت العزة ماها أصنام
مسيحيتو وسماحة إسلام
تقول للفوق حويتو سلام
بطن بطراني يا مريام
ويا مريوم هي الأرحام
ويا أدروب وتيّة أمام
وطنّا ونيتو بيضا تمام
إذا إنهبشت هويتو حرام
عندها بندقيتو كلام
وطن لا جوع .. وطن آمن
تبس في الصحراء لا ألغام
مصابيح السما التامن
تغيب في الغابة غيم وأنغام
دقر يا عين
وطنا الزين
ولا تنضرا
لا ننعاق
نظل في حبلك الواحد
حبيببين مافي بينا فراق
وهيط شايلنا
شيلة السيبي
سعن الباشِّي
والمعلاق عشيوة الداج
أواخر الليل
كهاربو ضي النجم
بوّاغ
يسد لبق الأسى
الشايل بلد فاتحلو
غلبو بلاغ !؟
جروحو .. جروح
ويا النبي نوح
شقييان والدهر لدّاغ
.. .. ..
متينك يا غربة الجن
نسكِّت صنِّك النقناق
بلد جية المطور للطين
نجيها وتصدق الأشواق
لا زنزانة تترجانا
حي الشعب يا إشلاق
بلد وأحضانة تتلقانا
جنة الجدول الرقراق
... ... ...
نطلق همبريب الحن
على لفح النوى الحرّاق
وفي وش الطراوة دحين
منو اليطبل سماك بأطواق
.............
يا وطن النفوس البكرة
يا وادي الحشا البرّاق
إذا ما الريح جرح لليح
وصيفاً حتحت الأوراق
حطبنا نصيح
أتبني الساق
أمان يا غيمة
مو البتّاق
..........
يا وطناً قريب للحي
وسرّك للبعيد لحّاق
حلُّو حلاوة ماب تنضاق
ومراً كلُو كلُو إن ضاق
..............
من كنّاك ما خنّاك
لا فينا الضلالي العاق
ويا حاسب سكاتنا رضاك
أماني بطونّا ماها غُراق
.... .... ....
صدورنا على البعادي زقاق
ضهورنا إلى المنادي رقاق
رضينا بلا قرن ننساق
وحين نحرن جبل يا ساق
... ... ...
الجرَّب يطير ماب يمشي
لو حرّت عليه الأشواق
ومن قولب لهيب الشمشِ
ما كوَّش من الرقراق ؟.
... ... ....
وطن لو رزّه .. يكسر الرزّة
... ... ...
وإنت المالي عيونو معزّة
وين متراوح سايب عزة
ودابه اشتغلت فيها الغنيه
دابو ضمير الدنيا اهتز
وبدا في القدح الكوني يتبّن
شوقه يضوق للعالم لذه
وين متراوح .. وين يا طالي
باب النيل بحنين الوزة
وعمرك كلو تغني عليها
وتترجاها تعالي ... تعالي
أول ما هي بدت عينيها
نهمة غيمة مشيت طوّالي
كوركنا لك
كوركنا لك
كوركنا لك
يا ...
الله ...
سبعة أيام في سبعة ليالي
رجع الصوت الطالع ... آه ...
سرسار جدول رادُّو العالي
... .... ....
كنّا غلابة وليل وربابة
متلمين فوق قوز ونغني
قلنا الصحراء تشهِّل غابة
حلم قريِّب ماهو تمني
... تنسف فجأة الشوق دبّابة
وفينا غنانا يصن فد صَنِّي
اتنقطت سحابة سحابة
وبدا يتلقط طير الجنِّي
نفس الريح الحرق الغابة
قطَّم فرحك ليلة الحِنِّي ؟!؟
... .... ....
رغم بهاظة وعظمة فقدك
إلا إنو الحياة ما وقفت
إلا إنو في ناس بيغنو
عشان تخضر الأرض النشفت
ناس من بعدك
بعضها بعضك
أرضها أرضك
وناس لا عرفت
ليك
لا سمعت
بيك
وتكنُّو غناك الليهُن
ماشي عليهُن
تتلافاهو الريح
وتفنُّوا .........
ورا الأحلام
الجفّت ورهفت
رهفت وخفّت
خفّت وطارت
طارت ورفّت
روحك فوق
الغنية إتلفت
بي بشكير الصبرِ إندفت
وإنشتت
كواني
كواني
قلنا الله بيخون الخائن
لملمناك والعين بتعاين
مدَّ النيل الوافي ضراعو
سوِّيناك باجور .. وجنائن
شيدنابك دور ومدائن
حندكنابك حز الريح
حركنابك شوقنا الكامن
أو قلنابك ..
ظل مطّامن
إنو حيشرق فجر العالم
بي بني آدم
طيِّب ... وآمن
ونفضل نطلق
نار الغنية
تالا الذمم الخاتي نظامن
تنسف ونجرف
دبش الدنيا
وغَش الفجر الكاذب
لامِن
تبرق
ويمرق
شخب الباكر
وتضوي سماك
يا يومه التامن .
..........
لما وطاك
ما خِبِر البوت
برفع قدرك للملكوت ؟!
مافي القِدْرَك حتى الموت
حيَّر قَدَرَك
هادي الصوت
حيّر صوتك
هادي الروح
حيّر روحك
عشق الناس
الوين ما تروحك
تأبى تفوت
من يتأمل فيك
يتجمل
من يتجمل
بيك يتكمل
إنو الحق مبسوط مبسوط
يا الخلِّيت الزمن الأطرق
زمن الموت
مضبوط
مظبوط
يا زول يا حبيب
يا الأروع مافي الدنيا
الغيب
إتجمع بيك
إتوزع فيك
ومرقت في رقّة
شوارع
أزقة
ونفاجات
أبواب السر
بتودِّي تجيب
وتندِّي الأرض
تلاقي قلوب الناس بي بعض
بلا ترتيب
إنتاوق فينا
ولا تثريب
على خوفنا عليك
بتلاقي الحب
في عيون كدّاح
للشغلة تخب
تنباخت بيك
مع كل صباح
يا زول يا كيك
لو راح الحب
لو ضاع في القاع
الدنيا دي راح تنقرقر جُب
قدّام عينينك
مرّت قافلة
وكانت غافلة
يا يوسف في الدنيا القافلة
منو اليترجل ينزل ليك
أو يتروجل ينشل بيك
النجمة .. الحب
عوّد عينيك
في الضلمة تشوف
حفِّر بي إيديك
عتبات للجب
سمُّو .. أنسف جوف
صنّات الخوف
الشوف الرعب
يا ألزم فيك درّابة الصبر
أنا دربي عليك
جاييك
جاييك
... ...
فسراع .. فسراع
قلَّعت أشميق الشوق
ملتاع ..
أنتل وأفتل
فضَّل فد باع
والحبلِ يتم
كمل الأشميق
ما تحتي نِكِت
تنْقِت .. تنْقِت
فوق أرض حجر
لفِّيت .. لفِّيت
دُخْ بالسيسيق
يا جاو وسجر
يا نخلِ طوال
وأنا رجلي عضير
أنا نفسي قصير
من شرب القامشة
الشيشة ... البنقو
ومضغ القات
سف التمباك
لف الحبشاي في ورق قصتير
شم البنزين
الجن .. الطين
برد الأحراش
حر الزنازين
من يسقط وعاش
أضرُب بي إيديْ
قرَّبت أطير .
في الوضع الكير
تبَّنتَ عضاي
حين شفت الريح
ينتق في دلق
من لكدة جير
ما احترتَ كتير
الرب فزّاع
يا الفطْن القاع
شرَّطت هدومي
وتمَّ الباع
برطع .. برطاع
صدِّيت البير
أمسك .. يا ..
يوسف ... هاك أمسك
يوسف سامعني .. وماب يمسك
طمِّني عليك
لو ماك مارق
أمرق حسَّك
يوسف قول خير
أربط نصَّك ..
وأمسك في الحبلِ
وما تنتق ..
يا انقطع الحبلِ
ويا إنشقلَبفي الفيها معاك
لاحظ يا يوسف
إنِّي ضعيف
والحبلِ أضعف
من حيل موقف
سيل ريق الفِقَر العربية
قدّام اللقمة الغربية
خلِّيك حريف ..
بالذات أحرف
من عِرق الغضبة الشعبية
الهبَّة النار المطرية ...
كل إيد في جدار
شمشِم وإتحسس بأقدامك كل الأجحار
ما عِدم الجب قبل إعدامك
من عكن أحجار ..
الحفر الجب زول قدّامك
مو قبيلة فار ..؟
ولابدَّ أكيد ساعة تمَّ
لابدَّ طلع من دربٍ ما
تبِّن بي إيديك كوس الجحّار ...
لابُدْ .. لابُدْ
يوسف سامعني
ومابي يرُدْ
يا سيِّد ..
حرِّ الشمش شديد
وأنا بين حجرين
واقف ويحيد
نازف ... حفيان
رادف غلبين
وراجف ...عريان ...
سايف ...
عطشان ...
وآبار الأرض العربية
آباره جميعِن ..
قد قطَّن
والنهر جريح ..
وبعيد جداً
ده درب مقطوع ..
حداً .. حداً
بي فوقو قوافل ما عدّن
من صلبِ يسوع
الإنعرْبَن ..
حِرْدَن .. وصدَّنْ
من عهد محمد
ما جابن
جيهاتو الأربعة
ما ودَّن ..؟
من عهد صلاح الدين
وجمال ..
كل الينابيع طينن قطَّن
والغيم الزنجي دقس لندن
والمطر العربي مشى أمريكا
وبأمريكا .. إنجنس .. وإستوطن
القال يتمدين
جا مديَّن
والكان إنديَّن
جا مطيَّن ؟!
أأطلع عينيكَ توريكا
وين وصِل الحال الإنقطع
مع إنك يكفيك الفيكَ
أمريكا..
وأنصاص أمريكا
مارشات الناتو
مزازيكا
البوسنة
الهرسك
وصربيكَا
... ...
الله يرضاكَ ويرضيك
يا يوسف أخوي
أطلع .. نطلع
يا يوسف هوي
ما عاد يسمع
أنا حافي وساحت كرعيّا
فوق زفتِ الأرض العربية
عسمت كلماتي مع الرقبة
وداخت يا ساكت عينيّا
شاخت أيامي الشمسية
وباخت أحلامي القمرية
أطلع .. ياخي أطلع ..
ياخي أطلع
لا إنعلق يوسف في حبلي
لا إنفكَّ الصبرِ من إيديّا
يا
يوسف
يوسف
يا
يوسف
يؤسفني ما ردَّ عليّا .
.... ... ....
من نخلة على أختها متكيّة
أومت لي نسيمة العصرية
قيّلت إنصنّت وإنكربش
كدرومي الحالة بعينيّا
إنكرفس فيْ ضل النخلة
وإنكفت اللحظة المبكية
قمرية تراحم قمرية
وتحكيله بحرقة وراثية
قمرية من القمري الشاهِد
على خطو الميتة الدغرية
تحكيله وعينيها تناهد
عن كيف إنشرمت أغنيّة
وإنترمت أحرف من كلمة
إنسهكت روحه المقرية
حين سابه مغنّيها براها
في سفرة بعيدة وأبدية
كيف شمط الوتر الموّال
وإنفلت النم من صقريةوإنشابط في لمينة الآهة
بي غم الفجعة الكونية
المرِق السانِد والشال
طقطقبو الدمع الهطّال
إنشقق حائط كان ساتر
وإترقرق سقف الآمال
الكان بيبشِّر بالفال
والبسمة عيون الأطفال
الكان بيوزِّع في العتمة
للضو على كل الحلاّل
الكان بيفرِّق في الزحمة
عن كيف تتلمه العمّال
في الكتمة يرطِّب بي كلمة
عرق المسهوك الشغّال
طوّالي يصبِّر في العالم
مو الصبر الفاوة الهقّال
الصبر المنو البني آدم
يعدل للزالف في الحال
ظل صابر قالت أميّة
دفنت لها كمِّين تربال
كم بِت شيّالة علانية
الريج جزّاها كما النال
قالت والخاطر جوّال
استغفر يا وتر الباكر
والدنيا قديمة يا موّال
قمرية تقاطع الأميّة
خلِّيهن يرتاحوا شوية
ما الفجع الواقع غلاّب
والدمع يريِّح .. يا أخيَّة
انفتق المرتِق بي صفحة
الزافرة الجات دافرة قويّة
ضلعاً ممنوعة من الفرحة
من حقَّها تبكي بحريَّة
البينا وبينو من الإلفة
ما بين الأرضِ وطورية
إحساس روّاسي لقى الضفَّة
عاذب في الجنَّة وحورية
ما حيلة العمر إن ما كفَّى
نفساً مطّامنة ومرضية
ترجع لي ربّها والمنفى
لي شعبها ماب ينسى قضية
الغُصّة تشرق القمرية
وتنعشرق في حلوق الخِلَّة
وين غائب .. سائب ليلاتك
يا شهر أحلامه بلا هلَّة
ولسَّع في مطاليق من غادي
بيجارطوا بنيات الحلِّة
في ربابيط تقطع في الوادي
للبطلع لأهلو ويندلَّى
عكازك مرمي وسيف صادي
وخيلك .. من غلبها .. لا حولة
لسّع في فوارق ..في طوابق
تتعلاَّ ..
ولازم تتعلاَّ
ما طال الرزق اليجي مارق
للناس تنصلبطُوا باسم الله
وين غائب سائب للعالم
يا تامن أيامو بلا طلَّة
ولسّع في جزائر مخجوجة
وفي خلائج لائجة على ملَّة
في عراق والرؤية المختلة
يا معاين في الغبن البائن
يطعن في أخيُّو وما يضلَّه
معنى القومية العربية
ما دلاَّ .. الضلَّ .. وما دلّه
1
أن تقلب للسلطة ...
بالدعم الأجنبي والخطّة
2
تنسلط في شعبك بالشرطة
المقصلة والبلطة ..
بالحمم الشعبية
3
تمرق من ورطة
عشان تدخل
بالأمّة وبلدك في ورطة
وبي دينه .. تدِينه ..
وماب تفرِق
4
أن تحرق بي نارك
قطِّية جارك ,, إيديَّة
5
وتنسلبط لي طينو ..
لي مويتو .. سماهو المهرية
تحت الشرعية الثورية
6
وكان أسمح .. لو تفتّح
نفّاج ما بينك وما بينو
عوّانك وعوّانو يشبوا
عاصرين على بعضِ
ويتربوا ..
من شطرٍ عربيٍ واحد
راضعين ..
في الأول ينحبوا
وفي الآخر .. راح يرموا الحيطة
وعلى بعضِ قلوبن ينكبَّوا
على صدر الأرض العربية
بالنور الأخضر ينعبُّوا
جنيات السلمِ مباديها
الموية البينا تعدِّيها
لا شرطة ...
لا نقطة ..
تلاقيها
كل إجراءاته الرسمية
أن تشرح ويفصح ما فيها
من عشق محبّة وحنِّية
لي كل الأرض العربية
بالشوق بتلوِّح أياديها
على نخلة قديمة على الشاطئ
في طيبة تتذكر أساميها
والحيطة التقفل ترميها
بي ريح الوجد القومية
عقبان الحيطة البعديها
والحيطة البعد البعديها
لي آخر الحيَط الوهمية
على خدر حبيبتي العربية
بتَّاً حبُّوبة ودغرية
لا رحطاً يقطعوا
همباتي ..
لا رحماً فضُّوا حرامية ..
7
وماب ننسى المتلبد
اليانكي
المشكي على الله
متسبب كايس لي علَّة
يدخل بها في الربع الخالي
ولا حاشا تحوشو
ولا كلاَّ ..
ولسّع في فلسطين محتلّة
وفي فلسطينات دار تُحتلّه
؟؟؟ ؟؟؟ ؟؟ ؟؟؟
وين غائب ..سائب
للعالم يا شايل همُّو بلا كلُّة
ولسّع في إفريقيا المحنانة
نشفانة سهوله المبتلّة
آسيا الكحيانة ..
وصبيانه
تنفرج على رمي الجلَّة !؟
لسّع في أوربا الغنيانة
فقرانة روح دار تنسلّه
لسّع في بعايض في العالم
بي دم الآدمي تنسلّى
ولسّع في هوائل
في بلدي
بي إسمي .. وإسمك
واسم الله ؟!؟؟
كيفنك يا وطني المافي
عوافي يا ارضي المحتلة
ولسّع ..
يا المِن خيتك بنسع
سنّارة الصبرِ ..
في جبّادة عشم الأيام
اللي هسّع ...
لا نتَّق كورا
ولا داير من بحر الحاصل
أفوت أقنع
لسّع دم فاير
في وطني
ولسِّع هم تائر
فيْ يلسع
لسّع حكاية عزة زاد
عن خيل رهاب متشرفه
مرق المغني يجيب مطر
لي نخلة روحه مشحتفة
هبش السحابة ..
أبت تصُب
صبّت عليهو العاصفة
فنّت من إيديهو الوتر
والغنوة خرّت نازفة
في حلقو ينعارض حجر
ساد الغناوي العازفة
وهج النجيمة الشايفة
بي ليلو ينطاير شرر
فوق راس نخلتو الناشفة
النار عديل .. النار قَبَل
حرق العطش ..
ما كان كفى
قِدر المغني ..
على دموعو يوقفة ..
قضَف الحجر والعاصفة ...
حين لمَّه في عضم المطر
بعد الصراعات والحَفا ..
النخلة كانت في الكُبُت ..
جمراية ترفِس واقِفة ..
خالفاله شتلة عمر شهر
محنة مغني ..
وعاصفة .
غلبت عليهو العاطفة
ضرّع على الشتلة أم سهر
وفي لُجَّة النار إختفى ..
داخل على حوش المطر
والشتلة بينو ملفلفة
الباقي من ساق نخلتو
فوق كتفو بىْ جمرو انكفَى
يا أمّة ..
فرسانك تموت
مغدورة ..
دائماً من قفا
يا أمّة ..
تقّابة .. وفا
وخانة مشاعر مرهفة
يا مدن شوارعه تستعيض ..
بي أغنياتو
عن النضال ..
ضد الظروف المجحفة
بعضاً على بعض الدروب
قاشرابو .. موضة وقندفة
لو تستعيد نفس أمنياتو
عَلى الطريق
مَافىِ الْعَوارضو توقفه
يا كمبوهات بتّ الحلال
بالطيبة والرحمة المحاننة
مترفة
يا الفارشين الأرصفة
يا الحلمهن حلم الطيور
عيشةً شريفة وأرغفة
في بلد حِنيْنة ... موالفة
يا المن أصابعين الوطن
حتى القيامة ...ولا الزمن ..
لا كُبَّة حامي بتنتفه
يا كلكن في العاصفة
دون عاطفة
مَن كان ..
بيسمع ...
مصطفى ..
صــــــــــنّه
ووهج صوتو انطفى
ومن كان بيسمع ..
ما اصطفى ..
حيْ ..
بي قضيتو ..
وبس ..
كفى .
ـــــــــ.
| |
|
|
|
|
|
|
|
|
|
Re: اناشيد ثورية (Re: الليندي)
|
الرائع بن بن لك التحيه والاحترام
فى حضرت جلالك يطب الجلوس مهذب امامك يكون[/b
ويا شعباً لهبت ثوريتك تلقى مرادك والفى نيتك[/b
لك كل شكرى واحترامى الفائق
| |
|
|
|
|
|
|
|
|
|
Re: اناشيد ثورية (Re: faisal44)
|
الرفيق العزيز الليندي
سرني انضمامك للمنتدى اتئد واجعل من وجودك فيه جلجلة دائمة... نل العبرات من السفهاء والحرامية الذين لم يتعلموا الا الاساءة لحزبنا في الليل؟
وعلى العهد القديم باقيين رغم كثير من الحزن علي مصائر رفاق تلوثوا حتي كتبوا في كتاب الثورة.. كذابون.
انا انا بحب لا يقل ابدا للحزب والبلاد!
بلغ العزيز ود ادريس اشتياقي وقوليهو طمنا عنك اتصلت كمين مرة على جوال اخوهو وما حصلتو عل المانع خير
اخبار العرس صحيحة وكنت فاتحتك فيها لو تزكر .. مزيدًا من الشمار عبر الماسنجر ..
بالمناسبة عثرت على شريط عاطف انيس قبل فترة وشكرًا لخط الاستواء
فيصل 144
كل الشموس في يدك
لك الفال
| |
|
|
|
|
|
|
|
|
|
Re: اناشيد ثورية (Re: bunbun)
|
الاخ بن بن
ممكن اطلب طلب ؟
من حق الشعوب العربية ان تعرف مبدعينا
ومن حق مبدعينا علينا انو ننقل صوتهم للعالم ، واظنك بتتفق معاي تماما
انا كنت عملت حوار مع الاخ الشاعر العظيم حميد من مقر اقامته في مكة المكرمة ونشر في الزمان قبل فترة
لكن الاستاذ محجوب طبعا صعب اجري معاهو حوار لأني في السعودية وهو في السودان فهل ممكن تقدم خدمة للابداع السوداني بأنك تكتب عن تجربته وآثارها علي الشعر السوداني والابداع السوداني ؟
لو ممكن ، رسلها لي علي الاي ميل
واكون شاكر
آه نسيت اهنيك علي الابداعات اللي نثرتها في المنتدي
| |
|
|
|
|
|
|
| |
bunbun
sharnobi
banadieha
khaleel
الليندي
sultan
nadus2000
ALZOLZATOO
ايهاب
belsharif
فيس بوك
تويتر
انستقرام
يوتيوب
بنتيريست