دعواتكم لزميلنا المفكر د.الباقر العفيف بالشفاء العاجل
|
|
 السودان من عهد الخرتيت
|
بسم الله الرحمن الرحيم
الخرتيت هو وحيد القرن وقد كان شعار جمهورية السودان بعد الاستقلال
حجيتكم ما بجيتكم
خيرا جانا وجاكم
كان يا مكان جمهورية وليدة وتحاول ان توجد مكانها بين الامم’ شعبها متفائل بالقادم من زاهر الايام. وما ان خرج منها ابين عيونا خضر وحكموها ابين عيونا عسلية اختلف اخوة يوسف في السودان هل يقتلوه ام يرموه في غيابت الجب’ وتفتقت عبقرية عبدالله خليل بدلا من ان يقتلوه او يرموه في الجب لماذا لايسلموه للذئب
فكان الحكم الكاكي الاول
ولكن الذئب لم يكن شرسا بل كان وديعا ووطنيا وما زالت انجازاته حتى الان قائمة
كان الذئب امينا وكان جاهلا لا يعرف ان على الحاكم ان ياخذ 15% من اي عملية
( بالمناسبة قالوا سبب الاختلاف بين مبارك الفاضل والجماعة انه قال ليهم عايز حقي عضم - يعني بترول-)
فقامت اكتوبر وهاج الناس وماجو وكان التطهير اردأ شعار رفع حتى الان ( طهارة ودالعوض) وتوالت الحكومات والجنادب تنغمش في عدة ود العوض بدءا من انسان دنقلا مرورا بابن المهدي وانتهاءا بانسان ودبانقا الحالي ( لمزيد من المعلومات ابحث في ال googleعن انسان سنجة الاول
المهم جمهورية الخرتيت بقت ما عارفة هي شنو
تغني بلسان وتصلي بلسان
وتتسرق بالف يد
قروش البترول وين
ضرايب المغتربين وين
عدد الوزراء اكتر من عدد المعلمين والاطباء
وكان في جمهورية الخرتيت الاستاذ بيسال طلبة الابتدائية في حصة الانشاء ما ذا تريد ان تصبح في المستقبل ’ وكانت اجابة معظم التلاميذ انهم يتمنون ان يصيروا اطباء لمعالجة الناس
الان الطبيب يصير بقدرة قادر عامل تربية مواشي
وفي اثناء االفوران الاكتوبري برز الثعلب يوما في ثياب الواعظينا متانقا بالحديث واللباس الباريسي قادما من ود الترابي . وفضل ان يكون منزلة بين المنزلتين حيث انه وبذكائه عرف ان لامكان له في البيتين فتقرب من احدهم بالمصاهرة ومن الاخر بالخطاب الديني الميسر واخرج لسانه لمجموعة صادق عبدالله باعتبارهم دقة قديمة
المهم الحزبين عكوا واثناء العك جاء ابن السيد من اللندرة فاحتفوا به وسالوه :
أها داير تشتغل وين؟
قال ليهم رئيس وزراء
قالوا ليه ما مشكلة
فكان التعديل الاول
ولكن المحجوب ما هين وده لسه غض
فكانت الهزيمة الاولى للصادق - ومازال يعاني الدوخة حتى الان-
ابو الزهور خرق الدستور
ومنذ ذلك اليوم ونحن نغني شليل وين راح
وطرد الحزب الشيوعي من البرلمان
وفات وفات وفي ديله سبعة لفات
والعسكر واقف طابور
يا جماعة شوفو ابو قنبور
وجاء ابو قنبور من خور عمر
وقالوا نغير جمهورية الخرتيت لجمهورية الجديان
ونغير اللون من اخضر زرعي وازرق نيلى واصفر ذهبي
الى احمر دموي
ووهوه الدم في جمهورية الخرتيت حتى الان ( سوبا غرب -مايو 2005)
وبدات هجرة العقول والضمائر لخارج الوطن
وبدات هجرة التغول لداخل الوطن
عبد الخالق قال لي ابوقنبور خلاص كتر خيرك وشكر الله سعيك
بارك الله فيمن زار وخف
ابو قنبور قال ليه انت قايلني هندي
فكانت مذبحة قصر الضيافة
كربلاء السودان الاولى
ونحر وانتحر الحزب الشيوعي
( وعاش نقد تحت الارض قرابة الثلاثين عاما وخرج اخيرا في هذا العام باعثا بورقه الى المدينة لينظر ايها ازكى طعاما)
وتغير اسم ابو قنبور لاب عاج ومعاها اخوي
ــــــــــــــــــــــــــــــــــــــــــ
(اخ/ محمد حسن استميحك فى نقل هذا الموضوع لتعم الفائدة اكثر)منقول
من (سودانيزاون لاين اورغ)
ـــــــــــــــــــــــــــــــــــــــــــــ
الاخ/ محمد حسن يتحدث عن حقب تاريخية واحداث فى الواقع السودانى باسلوب سلس انقلها لكم حسب تسلسلها .
|
|
 
|
|
|
|
|
|
|
|
Re: السودان من عهد الخرتيت (Re: صلاح الدين عبدالله محمد)
|
ونواصل
ودانت الدنيا لاب عاج
وصرح نايب الرئيس ( ابو القاسم) الثورة تراجع ولا تتراجع وفعلا راجعت الثورة شعاراتها بعد التاميم والمصادرة- سئل عبد الكريم الكابلي في لقاء اذاعي في منتصف الثمانينات عن ادب شعراء البطانة فذكر انهم كانوا فوارس وكانت لهم قيمهم فهم ياخذون من الغني ليعطوا الفقير ومن البخيل ليعطوا المحتاج ولكنه استدرك قائلا ان المسالة في النهاية هي سلب لاموال الناس- فاصبحت لاحرية لااشتراكية لاوحدة
وطلعت المظاهرات تهتف لن تحكمنا حكومة التوت
وجاطت الشغلانية في جمهورية الجديان
محمد نور سعد
محمد صالح عمر
حسن حسين... راحوا شمار في مرقة
شنان طلع ذكي ورقد مستشفى
اتفق الصهران على المصالحة وتمت بين جدة وبورتسودان
الشريف الهندي فضل زمهرير لندن على سخانة الخرطوم . ومات بطلا
الصادق رجع وصار متارجحا بين القبة والاتحاد غير الاشتراكي (تحالف قوى الشعب الخامل)
ما شفتو ابويا يا الجلابة
جملو الكبير يا الجلابة
توبو توب حرير يا الجلابة
..... كتل محمد اخوييا يا الجلابة
وتتوالى الاحاجي
تغني قمرية:
حسن يو يا حسن
كيف حالك يو حسن
حالي حال السواد يو قميرية
اكلي مع الجداد يو قميرية
نومي في قيزان الرماد يو قميرية
تردد القمرية:
لبني يخونك يو فاطنة
يقطع بطونك يو فاطنة
يكسر قرونك يو فاطنة
ده حسن ود امك حنونك يو فاطنة
وتبدل حال جمهورية الخرتيت واصبحت لا هي يمين لا هي وسط لا هي يساروكثرت الحكايات المحزنة المضحكة
1
نايب الريس ( ابوالقاسم) وكان ايضا وزير الزراعة ، وكانت هناك مشكلة مزارعي كسلا ومشوا لاي جهة ما لقوا حل وصادف انو السيد وزير الزراعة ونايب الريس زار كسلا فاجتمع المزارعين وانتهزوا الفرصة وذهبوا ليعرضوا مشكلتهم على اكبر مسؤل في البلد ويبدو انو المسؤل كان سهران سهرة جميلة (زي سهرة يوم دخل التلفزيون في سهرة على الهواء مباشرة وكان الضيف زينكو وقال ليه انت هنا وانا افتش عليك) .. فعرضوا عليه المشكلة وقالوا ليه نحن مشينا الخرطوم وما لقينا اي تجاوب وما عارفين نسأل منو
قال ليهم السيد الوزير: اسألوا العنبة الرامية جنب بيتنا
2
الريس ابعاج قال للوزير ارفع سعر السكر( ليه بس كده بس)
الوزير قال للريس لا
الوزير مشى بيتهم
ابعاج قعد وتوالت زيادات السكر
3
تمت الموافقة على انشاء مطار الحاج يوسف وفرح الجميع وجاء الدعم من حكيم العرب
ولكن حكيم السودان قال ليهم ماتبنوا لينا نحن بنبني برانا بس انتوا ادونا القروش
وظهر Mr 10%ومن ذلك التاريخ صار كل من لاعمل له عايز ال!10%
,وبرز الثعلب مرة اخرى وتم تعيينه مستشار
فقال للريس رايك شنو ناسلمها وتبقى الامام بدل الاستاذ ( راجع بمبر الاستاذ للمرحومة ليمونة)
وكانت قوانين سبتمبر
طبعا سيد الصادق لقى المسالة ما لافقة ورجع للمعارضة مرة تانية ( دخل الغابة)
وكانت مهزلة قوانين سبتمبر
وسكرت اسماك النيل حتى الثمالة
اعدم محمود محمد طه
فكان بداية الطوفان
تم التشهير بالاسر
شريعة والجلدة سريعة ونسوا ( وما أرسلناك الا رحمة للعالمين)
وتفتقت عبقرية شعب جمهورية الجديان فسموا الامام ( الرصين)
على اساس ان كل من يتبعه يقولون نحن مع الرصين
وجاء بوش
وقال ليه يانميري يا تخش
يا يخش
نميري قال ليه : يخش
وادخل الترابي السجن ومعاهو جماعتوا
فاض النيل
وكانت الدميرة الرائعة في ابريل
ولاول مرة لم يكن اول ابريل اكذوبة
سوار الدهب كان رجل حق وليس رجل فرص وكان صادقا مع نفسه
اجبر على اعتلاء السدة
دكتور الجزولي اتهم ان به بعض من اسلمة
عثمان عبدالله كان ينظر للامام اتهم باليسارية
( الرئيس المخلوع كان يتابع اخبار د.الجزولي فقال ليهم هسة مخلوع انا والا مخلوع ابو عين منططة ده)
تم تسليم الحكم للسيد الصاق بانتخابات حرة ولكنها ناقصة
اسقطت طائرة الخطوط السودانية من قبل جون قرنق
سقطت الكرمك وقبلها سقطت برلين
تنازل السيد الصادق وقابل جون قرنق كرئيس لحزب الامة وليس كرئيس للوزراء والمحصلة صفر
الجبهة القومية تعلن عن مؤتمرها العام-
في صينية الاتحاد الاشتراكي سابقا تم تعليق لافتة كبييييييييرة من امانة المرأة بالجبهة القومية كتب فيها( نضال المرأة لذة في البذل ونشوة في العطاء) وحاشى لله ان كون قد بهت احد
البقية في العدد القادم
والامام المشير ما عارف
| |
|
|
|
|
|
|
|
|
|
Re: السودان من عهد الخرتيت (Re: صلاح الدين عبدالله محمد)
|
بسم الله الرحمن الرحيم
لماذا يحمل هذ السيد وطني في جيبه الخلفي
مظفر النواب
يا خليج يا واهب اللؤلؤ والمحار والردى
فيرجع الصدى طكأنه النشيج
ياخليج يا واهب المحار والردى
السياب
تتميز الجبهة برصيد مالي ضخم وعدد من الصحف والابواق-
وقال سقراط .....
وقال القران ( ولاتنابذوا بالالقاب)
وظهور الراية-( كانت ترفع في الانادي - راجع الباحث الطيب محمد الطيب في كتابه الانداية)
مازال الشيخ يترنح من هزيمته في الصحافة اكبر معاقلهم
وينتشي اليسار بفوز نقد في العمارات
وانتشرت الصحف فى عاصمة جمهورية الجديان وبكل الالوان ميدان و حمراء راية والوان وصفراء. واصبحت تهيء الناس للانقلاب الجاي والكاكي القادم وغاب المثقفون وسطع انصاف المتعلمين
سئل محمد المكي ابراهيم عن الاكتوبريات ( كان سفير السودان في باكستان يوزع المنح لاعضاء الاتجاه الاسلامي ويستمع للكوالي -قصايد ملحنة باللغة الاردوية اقرب للمديح-) فاجاب بانها مراهقة شعرية وخجل ان يقول مراهقة سياسية
احمد سليمان اصدر مذكراته ( مشيناها خطى ، مذكرت شيوعي اهتدى؛ بس اهتدى لايه الى الان لم نعرف) وتصنف بأنها اردأ من مذكرات كارتر . بالمناسبة مذكرات كارتر وصفت بانها اسوأ مذكرات صدرت
كوكا دام وظهور النجم الاكاديمي الرائع تيسير محمد احمد( بامناسبة الزول ده وين - قرنق ورجع)
منصور خالد يثري الساحة الفكرية السياسية باسفار قيمة ( تجاهل تام لمؤلفاته واتهام بالعمالة للCIA) الان في لجنة مفوضية الدستور - عجبي
اتفاق الميرغني قرنق
تاييد شعبي
رفض جبهوي
الامة عمل مجنون وقال ندخلها البرلمان لمزيد من اليمقراطية ونحتكم للتصويت
يا عبد الرحيم قدامك قطر
من المدفع طلع خازوق
خوازيق البلد زادت
الصباح البلد صحيت ولقو انو البلد فيها انقلاب -وناس مبارك الفاضل في عرس ناس الكوباني
وصار الهمس جهرا ( هل هؤلاء الرجال جبهة) وتم تنفيذ فقه التقية ودخل الترابي السجن
وبدأ البشير رحلة كسب التاييد في اقاليم السودان _ استمرت هذه الرحلة شهرين تمت خلالها اكبر مجزرة في تاريخ السودان للخدمة المدنية. وبدات رحلة التمكين الرائد يونس يجعجع كل صباح ايها الشعب السوداني البطل - افتقدناه هذه الايام لانا كنا نتمنى ان يخاطب الشعب السوداني الفضل-
انقلاب رمضان- واصبح العيد على اكثر من نيف وعشرين اسرة ثكلى
لماذا
لانهم قاموا بنفس الفعل الذي قامت به المجموعة الحاكمة
الشعار ( الزارعنا غير الله يجي يقلعنا)
وبدات بناها لله وليست للسلطة ولا للجاه وانتهت بانها للسلطة والجاه
وبقى في البلد راسين
راس بي عمة
وراس بي كاب
والشعب السوداني الفضل ما عارف هو مودينه وين
وبدات فيالق الدفاع الشعبي ومقصدها ان تأتي براس قرنق وعرمان والمارق منصور خالد عميل ال CIAوبدات افراح الشهيد
دمغة الشهيد
مؤسسة الشهيد
عرس الشهيد
وكل البلد شهيد على انهم كضابين
الاحتفالات انتظمت البلاد وفي ليلة جهادية في بدايا الانخاذ ( كما يسميها اخوتنا من جنوب الوطن بعد ابدال الذال سين) وكان المنشد يصرخ امريكا روسيا قد دنا عذابها ( بالمناسبة اخيرا صرح وزير الخارجية لوكالات الانباء بان الحكومة هي عين واضان امريكا في المنطقة- عجبي-) فقال احد الدبلوماسيين للمسؤل :?Both وطبعا اخونا ما فهم ومشاها
والتف كل المايويون حول الشيخ
بسم الله الرحمن البرحيم
كل المسلم على المسلم حرام دمه وعرضه وماله
حديث شريف
وبدات حقبة جديد لاشكل لها ولا ملامح ولاندري هل هي شرعية ثورية ام ثورة شرعية
وظهر رامبو وبدات حملات همجية، الاصلاح شعارها ولكن ما يحدث باسمها كان الدمار ( بالمناسبة الزول ده مشى وين بعد ثورة الصواني وجفاف المغالق)
وبدا النزف المالي الاول بما سمي بتغيير العملة وجمعت كل السيولة من اصحابها وصار لا يصرف لاصحاب الاموال الا خمسة الاف جنيه في اليوم بدعوى التحكم في السيولة وكانت هي في الاصل سحب اموال الناس وتمويل جهات جديدة وظهر في السوق فجأة راسمالية جدد ( من هؤلاء ومن اين اتوا وما ذا يريدون)
وقالوا تاني مافي عملة صعبة وفي واقع الحال الجنيه السوداني نفسه بقى عملة صعبة
اعدم مجدي عشان قروشه
امه قالت ليهم شيلوا القروش وخلوا الولد قالوا ليها لا.. نكتل الولد ونشيل القروش
المرحوم الزبير قال للقاضي اصدر الحكم القاضي قال ليه انا قا عد اقو ليك اديني الدبابة اسوقها
القانون ده مهنتنا والدبابة مهنتكم ومافي مادة في قانون السودان بتسمح باعدام الزول عشان بتاجر في العملة
تاني يوم القاضي اقيل وجابوا قاضي تاني واعدم مجدي
وبعده اعدم جرجس القبطي ( عشان تتوزن)
وظهرت مؤسسة اقرأ واستبشر الناس خيرا بان هذه الحكومة ستهتم بأمية اهل السودان وتعلمهم القراءة ولكن ويا للعجب ..اقرأ كانت مؤسسة لتوزيع الدجاج والبيض
وبرز نجم عصام الترابي كرجل اعمال جديد وما في شوال سكر يطلع من كنانة الا ويدخل نصيب في كنانة الشاب الوجيه والمسالة عمت القرى والحضر فذهب ثلاثة من كبار الجبهجية الى الشيخ الترابي وهم الشفيع ابراهيم سعيد والاستلذ خالد بابكر وشخص ثالث واخبروهو انو عصام ريحته فاحت
فقال لهم الشيخ وبالحرف أهو داك عصام العايزين تعملوا فيه اعملوا)
وخرج الثلاثة
وخوفا من ان يتسرب خبر الاجتماع بسرعة جماعة الشيخ طلعوا اشاعة انو عصام كابن نوح عليه السلام
وهاك يا موائد الرحمن
ناس تفطر بلح وبليلة وناس تبني في العمارات ورمضان كريم
وقالو نعمل حزب جديد نسميه المؤتمر الوطني على غرار المؤتمر الهندي( و زي ما يقول اهلنا المصريين ايش جاب لجاب) واجتهد اللواء حمرين عملا وتبشيرا لهذا الحزب الجديد حتى ظهر للوجود وفي اول انتخابات للامانة العامة ترشح حمرين والدكتور غازي صلاح الدين – في دبابة اسمها صلاح الدين للذين لايعلمون شئ عن الاسلحة- وانتخابيا فاز حمرين ولم تعلن النتيجة بل سلمت للشيخ فاعلن انو الفايز غازي صلاح الدين ( وكانت هذه هي البداية الحقيقية لمشكلة دارفور ونذكر فان الذكرى تنفع المؤمنين)
___
| |
|
|
|
|
|
|
|
|
|
Re: السودان من عهد الخرتيت (Re: صلاح الدين عبدالله محمد)
|
بسم الله الرحمن الرحيم
ابو العباس والعشرة الكرام)
اسم مطعم فول في الخرطوم
ودخل السودان في عصر جديد . تغير قانون الجنسية والجوازات بلمح البصر تقيم في السودان سنتين تاخد جواز ( والسودانيين مشتتين بالعالم ديرين جواز)، الغنوشي بقى سوداني والخرطوم تحولت لكابول افريقية. تحولت عاصمة بن لادن لحي الطائف بدلا من قندهار واستمر مسلسل اراقة الدماء هذه المرة انتقل الى مسجد الحارة الاولى بمدينة المهدية، وانتبه الناس الى ان هذا زمان المهازل فبدأت تمرح. الهلتون وعمارة الفيحاء هى مقار سكن واجتماعات اعضاء المؤتمر الشعبي الاسلامي وتبدأ الاجتماعات العلنية صباحا والرسمية بعد الحادية عشر ( بعد بدء حظر التجول) وبدأت المنادة جهرا بالشريعة من قبل اعلام الحكومة ومنظماتها. بدأت المنظمات للحكومة المختلفة تلملم في البسطاء ( الحماعة جابوهم من بورسودان بالبصات علشان يهتفوا في شارع النيل مطالبين بالشريعة ، اصحاب البصات قبضوا حقهم مقدم وقالوا للناس انزلوا في اركويت ناس اوشيك قالوا ليهم لا، شارع النيل تنزل شريعة تقول)
وتفتقت عبقرية الشيخ عن قانون التوالي والى الان مافي زول فاهم توالي يعني شنو
وقامت اول انتخابات وكان الحضور حسب الصحف اليومية لايتجاوز العشرات فامرت الصحف الا تنقل مثل هذه الاخبار
ونزل سبدرات في جبل اولياء عند اهله وكان المنافس ليه واحد رجل بر من اهل المنطقة وحتى الساعة 11 مساء كان هذا الرجل فائزا وفجأة ظهر احد اعضاء مجلس الثورة البارزين في جبل اولياء ولما اصبح الصباح كان سبدرات فايز بفارق 22 الف صوت
وبدات المشاكل في الصحف ( تيتاوي ومحمد طه ) محمد طه( يسمى في داخل الحركة الاسلامية ديك العدة) قال لتيتاوي انت حرامي سرقت مطابع الصحافة وديتها بيتكم تيتاوي طلع ليه المسدس (تكساس في الخرطوم) وكل هذه الاحداث مدونة في الصحف اليومية
امين محمد عمر كل يوم يرفع في حواجبه فى التلفزيون مبشرا بان قانون التوالي هو المخرج لانه لا يأتيه الباطل من بين يديه
عبد الوهاب الافندي طلع كتاب سماه الثورة والاصلاح السياسي ( الغريبة الكتاب ده مهم جدا لكن الناس يتجاهلوه
الطيب زين العابدين انتفض
حسن مكي عمل تنظيم جديد بعد ما قال ليه الشيخ( دي بيعة فوق بيعة) وشعر بانه البيعة بقت تحت بيعة
قنيف احسن وزير زراعة منذ الاستقلال شالوه عشان اختلف مع عبد الدرحيم حمدي ( فتى الشيخ المدلل) وعملوه والي في الشمالية (عجب)
محجوب عروة قالوا عميل واستخباراتى لدولة مجاورة (لانو فتح المجال لعبد الوهاب الافندي) واوقفت جريدة السوداني الدولية وجو ناس الامن الصناعي ونفسوا لساتك العربات وكانوا بفتشوا علي عزالدين بتاع الكاريكاتير وصادف انو اليوم داك عزالدين جاء متأخر ولابس جلابية ناس الامن سألوه بتعرف عزالدين بتاع االكاريكاتير قال ليهم لا عمري ما شفتو
. واحتج كل بطانة الحكومة من الصحفيين علىاساس انو الصحافة يحب ان تكون حرة
الصحيفة الوحيدة التي لم تتطرق لخبر اعتقال عروة لامن قريب ولا من بعيد هي صحيفة احمد البلال الطيب _ جريدة اخبار اليوم- واحمد البلال زاتوا لبد ( عادي)
والسبب انو جريدة السوداني الدولية تطرقت لمسالة مذكرة العشرة والتي كانت بداية لنهاية شيخ حسن
الحزب الشيوعي السوداني نحروه ام انتحر
الشيخ حسن نحروه ام انتحر
كان الشيخ في اوج مجده وهو اشبه بالطاووس فلم يكترث للماء الذي يجري تحت اقدامه ، المهم لما شعر بشوية حركة قال نحتكم للشورى وما درى صاحبنا العجلان( استعير هذه العبارة من د/ منصور خالد) ان الامر قد دبر بليل فكانت الهزيمة النكراء للشيخ في عقر داره حاول الجماعة يصلحوا وقالوا لعلي عثمان انت احسن زول ممكن يرضي الشيخ امشي وصالحه ، ولكن علي عثمان لمن مشى للشيخ كال ليه بالعيار التقيل وقال ليه انت سبب كل بلاوي السودان وانت وانت الخ ( نقلا عن جريدة السوداني الدولية)، امالا في الجانب التاني فناس الاحزاب اتكتلوا في كتلة التجمع الوطني برئاسة مولانا الميرغني والامين غير الامين مبارك الفاضل وكانت مقررات اسمرا للقضايا المصيرية والتي نعتتها الحكومة بابشع الصفات وسموهم تجمع الفنادق –الان جزء كبير من مقررات نيفاشا مأ خوذ من مقررات اسمرا- وبدا التصعيد العسكري وناس المعارضة ذاتهم في موضوع التصعيد العسكري قلوبهم شتى
وناس الحركة قعدوا مع الحكومة في ابوجا 1 وابوجا 2 والاشاعات بتقول انو قرنق قال لعلي الحاح رئيس الوفد المفاوض انت قاعد بي هناك ليه ما تجي تقعد معانا ولف الزمن ودور وعلي الحاج قعد مع قرنق بي هناك . هسة قرنق بقى بجوة وعلي الحاج بي برة دنيا فرندقس
المهم جوة المسالة بقت مهتزة لانو بقى القتال في جبهتين أو تلاتة . الصادق هرب وسماها تهتدون
وحقيقة فعل التجمع تفعيل شديد الى ان و صل الامر بمؤتمر القاهرة وكانت كل الاعلاميات العربية والعالمية في القاهرة وأذا بمصنع الشفا يهاجم وتحولت الكاميرات من القاهرة الى الخرطوم وشكرت حكومة الخرطوم كلينتون ومن قبله مبارك الفاضل وكان هذا اول مسمار في نعش التجمع
الحرب اولها دماء
الحرب اخرها هواء
محمود درويش
واشتعل الشرق وكان التجمع في اوج قوته، الزبير في القاهرة وبداية التطبيع مع مصر ومحاولة للضغط وللتقرب الى التجمع ’ ثم ذهب الى الرياض ومن بعدها الى الامارات حيث التقى بحكيم العرب رحمهم الله جميعا واطلقت ما عرف بمبادرة زايد والتي وافقت عليها معظم الاطراف ( التجمع ، الزبير، الدول العربية) ورفض الترابي هذه المبادرة ودون تبرير. رجع الزبير وبعدها بقليل استشهد او اغتيل( الهمس جهرا)
الالة الاعلامية للحكومة شغالة للاخر والمسيرات وفرصتك يا عشوشة
ثم حدث انقلاب القصر
ودانت الامور لعلي عثمان، وتحول ملف السلام لغازي صلاح الدين لانو سلام الداخل كان هش وفيهم جماعة رجعوا العابة تاني بعد ما حرسوا مواقع النفط كانوا متوقعين الحكومة تكون اكثر سخاءا لكن الحكومة عينها كانت على الحركة الشعبية. وباتدأ الجولات المكوكية بين الحركة والحكومة
الصادق خارج التجمع-مشكلة هيكلية-
التجمع يطالب بالجلوس فى مفاوضات الايقاد واخيرا الحركة توافق ويذهب وفد التجمع الى اسمرة برفقة وفد الحركة وهناك يفاجأ وفد التجمع برئيس وفد الحركة الشعبية يقول ليهم انتو تقعدوا ساكتين ورايقين لانكم ضيوف
نجحت الحكومة في فصل الحركة الشعبية من التجمع في مفاوضات السلام (ودي كانت اكبر اخطاءها واخطاء الحركة) واصبحت المفاوضات ثنائية
علي الحاج يلتقي بالحركة الشعبية ويصدر بيان مشترك للعمل السياسي المشترك لاسقاط حكومة الخرطوم ( وراح الشهداء شمار في مرقة)
واكتفي بهذا
_
| |
|
|
|
|
|
|
|
|
|
Re: السودان من عهد الخرتيت (Re: صلاح الدين عبدالله محمد)
|
ياحمامة مع السلامة ظللت جوك الغمامة
استلم د/غازي صلاح الدين ملف محاثات السلام وهو احد المحسوبين على محموعة الصقور ( الاثني عشر نقيبا الا اثنين) واستمرت الجولات –يبدو ان غازي كان ينطلق في مفازضاته من المبادئ وليس من التاكتيك السياسي وفى الفترة دي رجع عديله مبارك الفاضل للسودان –صلاح ومبارك متزوجين اخوات- واستقبل سليل المهدي بما يليق ونصبوه مستشار ودخل امين التجمع القصر وضربو الهوا فاصبح يكيل للسيد الصادق بما لايليق- واختلفت الرؤى حول السلام وازيح الدكتور غازي من المفاوضات واقام علي عثمان بنيفاسا( لا اعرف ان اقول نيفاشا اظن اني اصبحت الثغ) وانطلق من السياسة وليس من المبادئ وخرج الغازي من القصر واتضح انه من الحمائم. واستكان الفاضل في القصر وجماعته بقوا وزراء اما السيد الصادق فاصبح لا يدري اهو في الماء ام السماء .عليز يعمل تحمع جديد (طيب القديم عمل شنو) واكتملت بروتوكولات الحكماء بما سمي ببروتوكولا مشاكوس او مشاكس, وحمل ياسر عرمان على الاعناق حينما رجع الخرطوم بدلا من ان يعلق في المشانق كما كانت تنادي صحف الحكومة وحتى وقت قريب
وطلع نايب الرئيس في الكفر وغرق الرئيس في العسل. ورجع الجميع الا السيدين والحكومة كسبت ملعب جديد ولاعب جديد ( رونالدينو التجمع – قرنق-) . الصادق يحاضر ويعلن ان مشكلة السودان في احزابه التقليدية وكأن حزب الامة تقدمي. الختمية احتموا بي مصر المؤمنة وللميرغنية حضور رغم انف الحكومة وتبدا جولات على استحياء بين الحكومة والتجمع بمباركة مصر الشقيقة يا حقيقة . عيال دارفور بين مطارق الامم المتحدة وسندان الحكومة ومداعبات القذافي الخشنة محتارين . الحركة تعلن انها على استعداد للمساعدة في ازمة دارفور وكانها ليست بطرف في الازمة. ودخل علي الحاج المزاد ( واحتمع غي اسمرا مح ناس اسياسي افورقي!!!!!!!). وجات للحكومة باردة باكتشاف السلاح لمحاولة الانقلاب الفاشلة في الصيف الماضي والحاصل انو كان في واحد سكران جاي بالليل شاقي مقابر البكري في امدرمان فوقع في حفرة صغيرة وعلي حسب السكرة عايز يشوف العتر ليهو ده شنو فلقاها قطعة سلاح كلم ناس الامن الشامل الامن الشامل كلم ناس الامن الكبير وبعد شوية القصة كبرت وفبضوا على مجموعة فيهم محمد الحسن الامين وحسين خوجلي ( وشمت الهادي الضلالي) بعد يومين ظهر محمد الحسن الامين في التلفزيون واعلن انو (اهتدي) لانو المؤتمر الشعبي تخلى عن المبادئ واعلن انو الخطر ما زال قائم وفعلا بعد يومين احبطت محاولة انقلاب في ظهيرة جمعة . واصبح فتى نقطة النظام نجم الاسبوع اما ماخفي فقد تمت الصفقة بان الاعلان مدفوع التمن الا وهو عدم التعرض لعمارات الاستاذ المحامي . اما حسين خوجلي حينمايأس ان باتي رامبوات الدفاع الشعبي او الدبابين اخوانه في ان يفكوا اسره قال احسن يهدي اللعبة وبفى في ( الزينبية حلاوة لبن يا سلام عليكم الله خلوني) عبر جريدة الوان –والجعليين زمان قالوا الصقر كان وقع كترت البتابت عيب- ولك الله يا نيلسون ما نديلا
واختم هذه السلسلة بالمقولة التلية
Leadership is An Action not a Position
| |
|
|
|
|
|
|
|
|
|
Re: السودان من عهد الخرتيت (Re: صلاح الدين عبدالله محمد)
|
فوق
بمناسبة
1 - اطلاق سراح الترابي والمؤتمر الشعبي والسوق الشعبي
2- نقد قابل الرئيس وعمل ندوة شتم فيها حكومة الرئيس
3- قرنق جاي بالمطار وحيشرب الجبنة في حوش بانقا او شندي سيان المهم انها دار جعل
وحتى تظل ذاكرتنا متقدة دوما
ـــــ
| |
|
|
|
|
|
|
| |
صلاح الدين عبدالله محمد
فيس بوك
تويتر
انستقرام
يوتيوب
بنتيريست