|
|
 زهجلوجيا
|
الزهجلوجيا
مغامرة الكائن في فضاء المزاج
هديل القلق
هي :
ان اجترح في سديم اللغة خطرأ انيقاً لي
ان اصعد عتبة الجمال حتي اقاصي التهلكة
و
ان اتعرّي حتي توهّج احتشامي بقلب حبيبتي .
زاي
زقاق
نكهة درب شعبي
نفّاج عشب ازرق
زرقة قلب رجّاف
فتح الصباحات باب
انجمّ دم الطين .
ها
همّيت
هبّاني نسّام الشعر
بشتنّي
اتشهّيت عصيدة ريد
و بت تبداني
من فوق مرق شوشاي الصبر
تقراني
أقر بالحب
و اترجّاني كان اركز
المّ اشجاني .
جيم
جربت امشي براي
باراني الكضب
نسّاني شلّيخ الوهم لي خدّي
زمن اضحك نزيف
و القيف حزن ينتح
براح ضيّق
و لمّة ناس
مسممها النواح مرتاح .
لام
لمّيت علي خوفي
ضاريتو من شوفي
توب الضلام شفّاف
فضح الجسد نوّر
توّر عذاباتو
و انشاف سواد البال
جدع النجوم تيراب
نبت الشدر ابيض
تش البخور للروح
و اتحتّ منّو حريق
ريحة براي طقّت .
واو
واقف
سند طولي الشعر
اشعر بأنّي غريب
اكتب و اروح
في خاطري المجروح
مرّات اقوم ترتيح
اقراني للنيمه
نمّ البلد ضلّي
بلدي احتمال النيل
زمناً يفر عطشي
شارع ملان ألمي
و زمن يزيد ألمي .
جا
تنّيت الجيم تاني
جنب الحلم سلّيت مراكيبي
حفيان من الواقع
جدّفت في المويه
و ركبت مركب شوق
شقّيت لحاف النوم
راجي الهتاف يطلع
من شارع الخرطوم
مردوم وجرّاري
يا جاري وين داري
يا داري ماك داري
انّو العمر جاري
و العشق مدّاري .
يا
يد الهواجس
اصفّق كيف وانا وحدي
اكيد
كتف النشيد حيشدّنا
صفقتنا يوم حتمدّنا
بالصبر
او بالتمر
او بالعمر
هوي يا ضدّنا
وينك تعال ما كلّنا
واقفين نبرّد حرّنا .
آ
الف الحنين
وحدك بحبّك
كم بعيد منّي الشقا
شقلبتو تاريخ العنا
عندك
لقيت ما فات
من الفات و السنا
يا
زهجلوجيا الازمنه
نيلين وقمريّه
رمله و رواعيّه
يرعو القلب في الليل
و صباحنا يا بنيّه
روّاب نضم هيّن
هيّن و ما ليّن
فجراً صحيت بدري
حمّيت كراع عقلي
سرّحت عاطفتي
و لبست توبي نسيم
و ركبت عصفوره
طارت معاها الغيم
ركّت في عينك بيت
نزل المطر دوبيت
و ما بينك و بين لونك
و ما بين البنات و الحب
و ما بين القبيله وكت تكون كونك
و ما بين القرايه ام دق
سؤال كمّك
و نوع دم الوعي في الدم
انا جيتك
صراع ضدّين عليك واحد
و واحد ضد صراعغ زمنين
زمن صاحي
يصحّي فيك مسامات الحنين و الحق
زمن تاني
يفنّك بالضلام تاني
و تاني من بداية آدمك تبدي
تكنّسي حوش سماك تاني
انا جيتك
أيا
حين جهجهات الزهجلوجياتونّسك
و ترتّبك
و تذكّرك بي مختلف
هل نأتلف ممكن سوا ؟؟
يا عقلنة هذا العشق
قلبك نوي
خلّيهو درويش الجوي
وينك
نبات حيلي اكتوي
صفق الصدق
صدق الفروع الفي السما
شايلات قمح
و اعصابي بايتات القوي
اتراكم الشوق هل اذاً
ريق المسامات ارتوي ؟؟
يا زوله جيت
نهد السؤال اتنفّسك
يا زوله كيف
و الزهجلوجيا الصاغت احزانك هنا
حرنت اجيك
بالايدلوجيا الحب غنا
اوعاك
غلاطك بشرحك
يمكن افوت
........
ياااا ربكتك
فضحت سكاتك و وجعتك
هل تذكري ؟
راهنت انّك زي بلد
سمّنها في ايدي
اتر نيلها
علي باب الوريد و الريد
حماس نساني حمّستك
و عرّيت الدواخل فيك
برق نجمك
فردت جناح شعور شعرك
عرشت البال
رقدت الليل
اعد نجم البعاد الطال
سهرت الولي فيني الصاح
و صاح انّك معاي كنت
كما نخل البرق شاهقه
شهق ضوّك
تنفّستك
وقع منّك بلح قولك
و رطّب كبد ماعوني
و ما بينك وبين الزهجلوجيا من البلاد
طلّيت
و ما بين البلاد و الوهجلوجيا من العباد
طلّيت
و ما بين العباد و الزهجلوجيا من السكات
طلّيت
و ما بين السكات و الزهجلوجيا من الموات
طلّيت
و
طلّيتي
معاً صلّينا غربتنا
و مغربنا
دخلنا حوش حوار الذات
و كم ليلات واصبحنا
جدعنا في الشوارع همّنا
اوراق عمل
اركان نقاش
في اليد بيان
في العين حواديت للجنا
نتمنّي
لو صاحب يضاري ها الضنا
و مشينا كدّاري
مرات يغالبنا النعاس
مرّات هزيم الزهجلوجيا يمدّنا
بالمن و السلوي
نهيم
و هدمنا في الخاطر
زمن اعوج
و حاضرنا
مشي يحاضر دفاترنا
و بكرانا
يحندك في الشعر
تيرب حداثتو
و ما حديث الواطه
الّا انهزام القمرا
هل قمريه فيغصن الكتابه حتنتبه ؟
و تغنّي احلامنا البلد ؟
و ولد وبت ؟
و الروضه
انسنة السياسه الجب ؟
و تاتينا
كبرنا كان حلم مغشوش
صحينا
كان درب ممنفوشبسم الشوك
طعن ايدنا
و تاني
من جديد صلّينا غربتنا
و مغربنا
دخلنا حوش حوار الذات
و فات الفات
تلاته بلاد
انا و انتي
و بينّا الناس
توحدنا
علي باب الحنين مسدار
قرينا الزهجلوجيا كتاب
و تاب الحس !
و تب فتنا
اذاً
هل حب
قلب وطني
و راكوبه ؟؟؟
***********
و سلام الي مطلع الامر
|
|
 
|
|
|
|
|
|
|
|
Re: زهجلوجيا (Re: عاصم الحزين)
|
عاصم ..
قرأت هذا النص للوهلة الأولى
فحضرت (عقد الجلاد) ..نص يشى بلحنه
ليتها (تصل) لعثمان النو ..ليتها..
ودمت مبدعا أيها الحبيب..
| |
|
|
|
|
|
|
|
|
|
Re: زهجلوجيا (Re: zumrawi)
|
ياخي نجضتنا الله ينجضك
هسة مالك علينا في الوقت
المتأخر دة
والله عملت لي صداع و رعشة
شوق حسب توقيت حنينولوجيا
أحححححي ياخ
| |
|
|
|
|
|
|
|
|
|
Re: زهجلوجيا (Re: هدهد)
|
Giwey
لك العافية
ولعقد الجلاد تمام النصوص البتشبه بريق الاغاني الهنا في الوطن .
زمراوي
تلك الشذرات التي تلقيها هنا و هناك انتبه لها يا صديق .. لك رؤية الناقد في تمام الاقتراب من النص والحوار معه .. اتمني لو اعملت ادوات معرفتك في هذه الكتابه .. احتاج ان اري النص من مواقع اخري .
حبيب نوره
اهلاً
و
.
.
هاك الورده دي ( الغياب ...... الجلوس علي مقعد الاشتهاءات وهي نحيفه)
هدهد
وانا احتاجك لتنمو في البال الرائحه .. رائحه حوارات لم تنتهي بعد بيننا .. اها من ياتو شارع ادخلك .. في ايّ موقع للحنين اتوقّعك .
| |
|
|
|
|
|
|
|
|
|
Re: زهجلوجيا (Re: عاصم الحزين)
|
اتوقني جواك كما تشتهي أن أكون فانا بقدر زمنك فيني اتمناك ذي حلم خرافي
ذي جدول ضل درب ساقتو وزع موتو لمسكين الزرع
مشتهيك لدرجة حواصل الكلام جواي بتترج بمعاكس المعنى
فيك لون رقة اديني منو مسافة اشتهيك واحزن كما ينبقي لفراقك
الفيك جلس ضوء وجه الارض وحلم فيني الكلام
وهجتني البت الحديقة واذدريت باقي البنات
وعرفت لون الصمغ العربي بين الدهبي والشفاف ما صدفه
كم جلبيق فيني بيقطع ويتروب بفعل الانثى
نادي رفاق الدرب وافتح ركن نقاش
واشرح الحاصل في العطر والحمامة والرعب
الداخل فيني فيك من الحظة
اللحظة الفيك من رعب
ان يكون هذا العلام بلا ضوء للقمر ولا متسع للحلم
لكن كون لحظتك لمن تنا ديك
كن ابداعاً وكن خالد الحاج في لحظة ما
| |
|
|
|
|
|
|
| |
عاصم الحزين
Giwey
حبيب نورة
mohamed elshiekh
فيس بوك
تويتر
انستقرام
يوتيوب
بنتيريست