|
|
 زكاة الراتب
|
الراتب
الاهداء الى سجيمان
ابراهيم جالس فى فناء ما يطلق عليها فلته الغير مكتملة البناء والتى تقف اعمدة بلا سقف كرمز شامخ لخيبته الخليجية التى سلخ فيها 20 عاما من عمره مع كفلاء من معظم دول البنزين وتقطعت انفاسه من الطلوع والنزول فى البواخر والطائرات والمرور عبر ضباط الجوازات حتى صار مثل ورل قديم .. الان ابراهيم تلقى الصفعة الاخيرة من ابن خالته الذى وعده باكمال بناء منزله فى الازهرى وكان يرسل اليه الهلل ابتداء من الدينار الليبى ونهاية بالدرهم الاماراتى ولكن ادريس ابن الخالة العزيزة الحاجة كتيرة بت الطيب ود الجك ملا جك جده بفلوسه وعمر بيت اهله واكتفى ببناء شواهد على قبره الحى .. ابراهيم كان يتامل وعندما وصل الى هذه النقطة المصرورة فى جبينه كتقطيبة وجه والمدفونة فى اعماقه كمن شرب الحرجل المخلوط بالقرض .. عندما وصل الى هذه النقطة المؤلمة بكى وجعر جعرة كبرى .. اهتزت لها اعمدة الفلة المتهالكة..
ابراهيم فقد صوابه وكل شئ ... سنوات عمره راحت هباء
دفع كل الضرائب .. ابتداءا من زكاة الراتب التى لم يجد لها اى دليل شرعى او مسوغ قانونى او حديث شريف او نص قرانى .. لكنه وجد لها تفسيرا عند العامل عليها فى جهاز شؤون المغتربين الملئ بنساء شحمانات ومدعوكات بالدهن وحلاقيهمن مثل كيزان اللوارى عندماتطلع اقوازا فى منطقة حمرتى الوز والشيخ .. العامل عليها فى ديوان الزكاة قال له : يعنى يا شيخنا انت ما عايز تدفع حق الله .. الزكاة دى حقة الله ما حقة جهاز المغتربين ..
ورد عليه ابراهيم: يا مولانا .. مافى زكاة فى الراتب ودى اى قرد فى الدندر ولا شلعوها الخوالدة عارفا انتو جبتو الموضوع دا من وين ..
وحتى كمان علماء السعودية قالوا ما فى زكاة فى الراتب .. انت جبتا من وين ؟
تمطى العامل عليها وانفرط عقد جسده السمين مثل حلوف الخلاء الربيان ليقول له:دا اجتهاد هم رجال ونحن رجال .. واهو اجتهدنا وجبنا الزكاة دى وما عندك حلل لازم تدفعها حتى لو تدين ؟
وانتفض ابراهيم قائلا : يا مولانا .. البتقول فيهو دا دين ولا كركار .. ادين شنو؟ادين عشان ادفع زكاة ما واجبة عليا اساسا..انا ما بدفع عديل .. وما عندىىىىىىىىىى.. والزكاة ذاتا انا مستحقها ..
وانتفض العامل عليها قائلا: ايوه انت كده ارتديت .. لمن تقول ما قادر ادفع الزكاة شئ .. ولمن ترفض الاقرار بها كركن من اركان الاسلام الخمسة دا شئ تانى .. الزكاة يا ملحد ياكافر ممكن عدم دفعها يخرجك من الملة وبالتالى يجوز رجمك.. والسودان دا كلو حجارة .. اقرب ملف يتلموا عشرة من الراشدين المسليمن يرجموك لمن يطلعوا زيتك... وبتعتبر كده مرتد وكافر .. حتدفع ولا ما حتدفع ؟
ورد ابراهيم : يا مولانا الزكاة دى على ما يحول عليه الحول وسيدو مكتفى وهو زايد عن حاجتو ومركون .. انا ما قاعد اركن ماهيتى .. لانها اساسا ما مكفيانى ..
مولانا انا باخد 1500 ريال سعودى .. ساكن بى 800 بدفع اكل وشراب 600وعندى مية للعلاج والمواصلات .. وبدين على طول الخط لانو اولادى فى المدارس .. زادوا الاولاد وما زادت الماهية .. بستحق الزكاة ولا ما بستحقها؟؟
ورد العامل عليها: تستحق الدق .. سمح المقعدك فى الخليج شنو .. يعنى حاكونا حاكونا.. قاعد طبعا تشرب فى الببسى وراقد تحت المكيف 24 ساعة وتاكل فى الجداد المكرفس وبعد دا ما داير تدفع الزكاة .. تزكك كلبة والدة.. هوى انت حتدفع وراء عينك .. وبعدين تعال انت اما كضاب ونصاب ..او حرامى عديل .. او بتبيع حاجات ممنوعة.. انت عندك كم ولد وبت ؟
رد ابراهيم : داير تسحرهم بعينك الواحدة دى .. مالك ومالهم عندى 100
قال العامل عليها : بطل اللماضة .. يمكن نخفض ليك الزكاة لانو فى الاجتهاد بتاعنا السودانى كما تقول الفنانة هاجر كباشى .. ابوى النيل امى سودانية .. يا بت بلدى ود البلد شخصية .. سودانى مية المية .. المدرسة السوداينة فى الزكاة بتقول يمكن تخفيض النصاب لظروف محددة ترتئيها السلطات المختصة كما يمكن رفعه لذات الاسباب عشان كده سالتك عن اولادك ؟
ورد ابراهيم : عندى اربعة بتين وولدين : العامل عليها : بقروا؟
ابراهيم : البت فى الثانوى والبت التانية برضو فى الثانوى والولدين فى المتوسط والابتدائى
العامل عليها: اهو وقعتا بلسانك.. عندك اربعة عيال وكمان ساكن فى شقة وبتدفع ايجار .. طيب الاولاد ديل قاعد تقريهم كيف وانت راتبك 1500 ريال فهمنى .. ايمكن نكون نحن بتاعين الزكاة والعشور ما بنفهم فى الحساب الاصلو هو ولد .. يمكن يكون مخنا اتلحس من كترة التضريبات .. امكن قسا وامكن نساوامكن ظروف المدرسة..
شاك نواصل
|
|
 
|
|
|
|
فيس بوك
تويتر
انستقرام
يوتيوب
بنتيريست