|
يوميات رئيس سوداني
|
جلس على مكتبه الفخم وادار في راسه حلمه اليومي والمتمثل في دعوة سيتلقاها من الرئيس الامريكي لزيارة واشنطن...لمعت في راسه افكار عن لون البدلة والكرفتة وعن كيفية المشي جوار الرئيس الامريكي والنكتة المناسبة لاطلاقها في هذا اللقاء. افاق على صوت كباية الشاي بلبن يضعها الساعي على مكتبه
قلب مجموعة الاوراق امامه والخاصة بالتشكيل الوزاري ....امسك باول ملف لموقع النائب الاول
- نائب اول قال ...انا قاعد ليكم في حلقكم يا اولاد الهرمة...دي بلد عايزة ليها رئيس واااحد وقوي زييي كده ....هههه عشان كده انا حاكون النائب الاول ...عااارفو ابجضوم حينط لي ويشبكني ليك ده ممكن يريحك ويمسك الملفات الصعبة زي ملف اولاد بمبة والجيران المتعبين والنزاعات القبلية وما الى ذلك
احسن اجيبم في اجتماع شان اشوف مويتم ولاد الكب ديل.... ما فيهم واااحد وجيع بلد كلهم جو ترضيات قبلية
/نواصل
|
|
|
|
|
|
|
|
Re: يوميات رئيس سوداني (Re: garjah)
|
الاخ العزيز قرجة اولا كمية من الاشواق انقطاعك الاثيري جعلنا نسال منك
والحمد لله عدت لنا بمواضيعك خفيفة الظل عميقة المنعني
ومنتظرين التتمة
| |
|
|
|
|
|
|
Re: يوميات رئيس سوداني (Re: Raja)
|
يا ريس الجماعة منتظرنك في قاعة الاجتماعات
رفع راسه وخلع نظارته ببطء شديد وسال مدير مكتبة
- طبعا نفس الرصة كل اتنين جنب بعض ...وشغالين وسوسة
- صاح ياريس
- ايواااا عملت شنو في جهاز التصنت في مكاتب الوهم ديل ؟
- سعادتك الموضوع في المالية منتظرين فتح الاعتماد
- اعتماد شنو يا مطرطش....معقول انا اقدر احكم بلد في حجم قارة برئيس مكتب مخو مخ زرزور
ده موضوع مافي زول يعرف بيهو غيرك انت تشيل من النثرية العندك وتجيب الاجهزة بعدين نزلا دعم ولايات والا مسيرات ..فاهم ؟
لما تجو تركبو الاجهزة اعملو انكم بتحدثو شبكة الاتصالات مفهوم ؟
- مفهوم يا ريس ... ايي تعليمات اخرى
- خليهم ملطوعين وقول ليهم الرئيس عندو مكالمة مهمة مع البيت الابيض عشان يعرفو انو نحن واصلين
/نواصل
| |
|
|
|
|
|
|
Re: يوميات رئيس سوداني (Re: abas)
|
رمق الجالسين بنظرة ماكرة وهو يلقي عليهم تحية باردة
وقف الجميع وفي طرف فم كل منهم باقي ضحكة كان يتبادلها مع جليسه
- كناس قيادة عليا في البلد عايز اناقش معاكم الموجهات العامة للتشكيل الوزاري
فيكم واحد داير يناقش موضوع تاني
- لو امكن يا ريس نناقش موضوع اجور العاملين في الدولة
- شايفك بقيت مشروع بطل قومي يا ابجضوم تناقش مشاكل العاملين كمان ...
| |
|
|
|
|
|
|
Re: يوميات رئيس سوداني (Re: Tabaldina)
|
اصدقائي الاعزاء جدا
اساسي
رجاء
مانديلا
عباس
بركات
تبلدينا
مشكورين على التواصل
واسف جدا لقصر اليوميات لاني انجرها اثناء العمل
اوعدكم بحلقات اطول
اقعدو عافية
اخوكم
قرجة
| |
|
|
|
|
|
|
Re: يوميات رئيس سوداني (Re: garjah)
|
العزيز قرجه
الشكر على الإبداع... الدعوة للمواصلة ...
الرئيس يعشق أم علي ...
بس معلومة إضافية لعلها جديدة وحقيقية ومن مصدر موثوق جداً ووردت على لسان شاهدها العيان وهو ضابط الحرس الخاص في تلك الليلة، فالمفاجئة أن سيادة الرئيس يحب أم علي !!
(القصة برتوش قليلة)
المشهد الأول:
في ليلة من ليلي الصيف وما بين الساعة الثانية والنصف والثالثة صباحاً فوجيء ضابط الحرس (الراوي) بالرئيس يدخل عليه في مكتبه مرتدياً العراقي البلدي والسروال بدون فنلة داخلية والكرش مكورة وتبدو من خلف العراقي السكوبيس الخفيف كبطيخة مسمدة بسماد بلدي ... فهب الضابط الذي كان مسترخياً على مقعد الجلوس الوثير الموضوع بجانب المكتب ضمن مقعدين آخرين للضيوف وقد خلع نعليه ،،، هب واقفاً مؤدياً التحية العسكرية ضارباً موكيت الغرفة بقدمه اليمنى الحافية !!! وبدأ على عجل في حشر قدميه في الحذاء وفي ذات الوقت مد يده على عجل وتناول الكاب ووضعه على رأسه المنكوش الشعر .
ابتسم الرئيس وداعبه قائلاً: ما في مشكلة يا .... أخد راحتك ,,, الضابط: تمام سعادتك ... أي أوامر سعادتك ؟؟ الرئيس: أبداً بس والله شعرت لي بي جوعة ،، وأنت عارف (فلانه) ما بتكون هسع في المطبخ (وفلانه هذه هي نفس طباخة نميري سابقاً).
الضابط: سعادتك ما في مشكلة أنا أمشي المطبخ أحضر لسعادتك أي شيء تاكله؟؟ الرئيس: لا لا مش كده بالضبط .. بس عليك الله أضرب لي ناس فندق (.......) أطلب لي أم علي ... الضابط: هه .. أم علي منه سعادتك ؟؟؟ الرئيس يضحك بخبث .. يا أخي أم علي دي أكله مجنونة ... أنت ما أكلتها قبل كده ؟؟؟ الضابط: ابداً سعادتك أول مرة أسمع عنها!!! الرئيس: طيب كدي أضرب لي ناس الفندق خليهم يحولوك للمطبخ وكلم الطباخ يحضرها ورسل العربية تجيبها حالاً... الضابط يؤدي التحية العسكرية ويرفع سماعة التلفون ويتصل بالفندق وينفذ ما أمر به الرئيس.
المشهد الثاني:
الضابط بعد الإتصال بالفندق وإبلاغهم بطلب الرئيس ووعدهم بإرسال أحد الجنود لإستلام الطلب على أن ترسل الفواتير إلى حسابات القصر الجمهوري. الضابط يخرج من مكتبه مسرعاً وينادي على الجندي عبدالمتعال. يحضر عبدالمتعال مسرعاً والكلاشنكوف على مدلدلاً على كتفه الأيسر ورباط البوت يجر خلفه !!
يؤدي التحية العسكرية ... أفندم سعادتك.
الضابط: شوف يا عبدالمتعال ،، تاخد العربية اللآندكروزر وتمشي لي ناس فندق (....) وتجيب أم علي. عبدالمتعال: حاضر سعادتك،، بس أم علي دي بلقاها قاعدة في الاستقبال ولا بسأل عنها ناس الفندق؟؟ الضابط: يا عبدالمتعال يا أخي أنت بس بتمشي للجماعة ديل وبتقول ليهم مرسل من بيت الرئيس وهم بدوك ليها تشيلها كويس وتختها في العربية وتجي بسرعة عشان ما تبرد. عبدالمتعال: ؟؟؟؟؟؟ يتمتم بصوت منخفض (... تبرد @#؟$%!&@؟!؟!؟!؟)... يا ربي الحاصل شنو... أم علي دي البتبرد !!!... هي المسخنه شنو ؟؟؟ ..... ما علينا نمشي وننفذ الأوامر ؟؟؟
المشهد الثالث:
عبدالمتعال يعود بصينية كبيرة مغطاة وملفوفة بشرائح الألمنيوم اللآمع ويسلمها للضابط مشفوعة بتحية عسكرية .... تمام يا سعادتك.... الضابط: تمام .... أنصرف ...
يأخذ الصينية ويذهب إلى مدخل بيت الرئيس ويطلب الأذن بالدخول ,,, فيخرج الرئيس بنفسه وعلامات اللهفة بادية على وجهه،، يدعو الضابط إلى الدخول وفي غرفة الطعام يضع الصينية على طاولة السفرة ويهم بالخروج ...
الرئيس لا لا خليك .. كدي أقعد يا (......) يتحرج الضابط في البداية ثم يجلس بينما يقوم الرئيس على عجل بفك اللفة ويرمي بالورق ورقائق الألمونيوم جانباً فتفوح الرائحة الذكية لأم على الساخنة والبوخ يتصاعد منها... بعجلة يتناول الملعقة ويهبر بها هبرة ويدفع بها إلى جوفه ... ثم يتأوه من شدة الحرارة فمن اللهفة لم يعمل حساب الحرارة !!!
يلحقها بأخرى فثالثة ... ثم يلتفت إلى الضابط ويدعوه لتناول أم علي معه..
أكل يا أخي والله رهيبة كان ضقتها ....
يناول الضابط الملعقة الأخرى ويناول منها بأدب وحياء ويعلق مؤيداً كلام الرئيس ( .. آآآي والله لذيذة...) ،، الرئيس بعد أن كاد أن يشبع وبدأ يقزقز شوية شوية ..
تعرف يا (.....) (فلانه) قاعد تسويها اسمح من ناس الفندق ... والله كان ضقت حقتها ما تخليها تاني كله كله... يوافقه الضابط وهو ما زال يلتهم أم علي .... الريس: تصور ناس الفندق ديل ما قاعد يكترو الزبيب وقاعدين يسووها بالفول لكن (فلانه) قاعد تكتر الزبيب وتسويها بالمكسرات ناس اللوز والجوز .. وبعد داك كمان تسوي ليها القشطة .... الله يا (.....) كان أكلتها يوم.... الضابط يهمهم بالموافقة .... الرئيس: خلاص يوم راح أناديك تاكل أم علي حقت فلانه معاي ...
ممكن هسع ترجع مكتبك بس أنتبه كويس للحراسه وخلي العساكر يفتحوا عيونهم كويس،،، الدنيا ما معروفه والعالم ديل ما مضمونين....
يهم الضابط بالخروج ....
الرئيس مستدركاً .... أسمع يا (......) الصباح كلم ناس القصر قوليهم يلغوا الارتباطات حقت بكره أصله الليلة ساهرنا كتير ويمكن أمشي القصر بعد صلاة الضهر ،،، وعبدالرحيم لمن يجي يقولوا ليه ما يصحيني بدري .....
فجأة يلتفت الرئيس فيجد عبدالرحيم جالس على الطاولة مبتسماً ويأكل ما تبقى من أم على في الصينية العملاقة .... معلقاً والله حاجة تمام يا ريس ...
فصاح بصوت مكتوم ... بسم الله ... بسم الله ... ده يا كافي البله ما نجيب سيرته إلا نلقاه قدامنا ؟؟؟ وأخذ يقرأ أية الكرسي .....
إنتهى المشهد....
+++++++++
نكته عن عبد الرحيم يحكيها البشير نفسه ،،، (من مصدر موثوق)...
قال / كنت في الحمام وبعد ما رغيت الصابون على وجهي وأنا مغمض عيوني الصابونة وقعت ،،، مديت يدي عشان أحاول أرفعها لقيت عبد الرحيم بيناولني ليها .....
,,,,,
| |
|
|
|
|
|
|
Re: يوميات رئيس سوداني (Re: Al-Shaygi)
|
ايوا يا ود النوبة
- ياريس بكصوص تسكيل وزالي دي ..نرجو انكم تدو جبال مكان طري شوية
ضجت القاعة بالضحك
-تدحكو شنو ادونا وزارة فيهو روح شوية موش وزارة ميت زي بتاع سياحة والا حيوانات ...لازم تدونا لحم لين شوية نهن سبعنا من كوارع دي
-هو في الذ من الكوارع ...لكن انت عارف الوسط والشمال ده بياكل السودان كلو عشان كده بياخدو الوزارات المهمة
- يعني بترول لما يتلع اندنا بتخلو لينا الوزارات الطرية دي
- كدي لما يطلع نشوف
| |
|
|
|
|
|
|
Re: يوميات رئيس سوداني (Re: ابو نور)
|
الاخت العزيزة مريم
مشكورة على الطلة الوسيمة ..وانتم اول من علمنا مسرحا
العزيز الشايقي
مشكور على المساهمة الثرة ...وهات تاني
العزيز ياسر حنا
تحياتي ايها الصديق العزيز
اخوي الصغير ابونور
تحياتي ايها الجميل
| |
|
|
|
|
|
|
Re: يوميات رئيس سوداني (Re: garjah)
|
قرجة ليك وللقلم الساخر الجميل الف وحشة وياخوي سرع بي حكاية التشكيل الوزاري وبالجد داير اسال شنو حكاية نلئب اول ونائب ساكت للرئيس.
لك الشكر وبالله واصل الراجيك كتير
عبد الله جعفر
| |
|
|
|
|
|
|
Re: يوميات رئيس سوداني (Re: Abdalla Gaafar)
|
-المفروض نبتعد عن النظرة القبلية الضيقة وننظر لمصلحة الوطن
-مسلحة الوتن دي يا ريس كلنا ممكن نسويها .... ما المفرود تكون حكر على ناس وناس لا بعدين الوزارات دي ماشة بالتكنوقراط الفيها ناس عفنت في وظائف وكيل وزارة ديل هم البيديرو العمل الحقيقي في الوزارات ......الوزير معروف انو ضيف ثقيل على الوزارة بيقضي ايامو وبيمشي
-عشان كده البلد وحلانة ....لازم تعرفو انو نحن جينا نغير كل حاجة كل وزير لازم يكون عندو برنامج مستمد من نهج الثورة ويسعى لتنفيذو ....ما عايز وزارة متفرغة للقطيعة والتكتلات وتاركة مصلحة البلد
ساد صمت طويل ....والرئيس يجول بنظره على الجالسين كانه يلعن اليوم الذي اجتمع فيه معهم
دخل البيت
- ياولية جيبي الغدا - شوف السفرة بيكون جهزا ادم - انا موش قلت ليك انا داير من يدك وما عايز أكل الطباخين ده - يا راجل هووي انا فاضية ..انا زاتي من الصباح في انتماع - هههههههه تقولي للرئيس يا راجل هووووي تاني اسمعا منك علا ادخلك الحراسة ...مرة مطرطشة - والله ياهو الثورة تاكل نسوانا - عايزك تصحيني الساعة ستة عندي اجتماع مع منافقين . - اللبس جلابية والا كاكي - لا بمشي ليهم ساااي - سجمي ساااي كيفن كمان
/نواصل
| |
|
|
|
|
|
|
Re: يوميات رئيس سوداني (Re: garjah)
|
قرجة أبو العباس صديقي الصدوق تحياتي و مودتي و تقديري أتابع هذه اليوميات فأرجو أن تواصل ،، فهي متعة بقلمك و بقلم الإخوة المتداخلين تسلم
| |
|
|
|
|
|
|
Re: يوميات رئيس سوداني (Re: garjah)
|
حبيبنا قرجة يا ( مشخصاتي )
ليست بعيدة من ( محيط ) ترطيبة ، الواثق .. مشاهدة حية تتحرك يوميا بين أيدينا وأمام أعيننا ، ولكنها تحتاج لعدسة فاحصة لتسلط الضوء على ( موضع الجرح )
بس أرجو ما ( تكلفتنا ساى ) المرة دي السرد دا شكلو شمحااان أديهو شوية إهتمام ولو على حساب ( مشاغلك )
تسلم
عبدالرحمن
| |
|
|
|
|
|
|
Re: يوميات رئيس سوداني (Re: كبسيبة)
|
نزلت طائرة الرئيس الهيلكوبتر وغبارها الكثيف يغطى المستقبلين .... رفض الجلوس في مكتب مدير المصنع وطلب الذهاب مباشرة لافتتاح مصنع السكر الجديد.
قص الشريط التقليدي وتابع مراحل انتاج السكر من مرحلة سكب القصب وتابعه وهو عصير وذهب لمرحلة العسل ( المولاص)
واقتربت لحظة مشاهدة السكر وهو لؤلؤ ابيض يملاء الشوالات . ابتسم الرئيس وهو يقترب من المرحلة الاخيرة ومدير المصنع ووزير الصناعة بجانبه وجمع غفير من خلفه ليشاهد المفاجاءة الشولات تعبأ بعسل اسود بدلا عن السكر الابيض ..امتعض وجه الرئيس ونظر شذرا لوجه المدير الذي ارتعب للمشهد - مولاص ؟..... مولاص ؟ يا اولاد ( .............ط) - والله يا ريس امس عملنا تشغيل اختباري مرتين والسكر طلع ابيض ما عارف الحصل شنو؟ - مدير عام وما عارف ؟.... صمت الجميع وهم يشاهدون العسل الاسود يسيل في الجولات بدلا عن السكر . اخفى البعض ابتسامته الشامتة بصعوبة شديدة وهو يتمتع بالفرجة على الموقف ... الكاميرات التي احضرت لتصوير الانجاز جالت في الموقع لتصوير خيبة الرئيس ...وركزت كثيرا على وجهه المنتفخ والالفاظ الغير مفهومة تتطاير من فمه . - ده شغل شيوعيين يا ريس - هو عندكم هنا شيوعيين ما شملم التطهير - ايوا كتاااار .... حاج تبيدي وقيلي ديل عملو دقون وسبح لكن يظهر لا زالو على ضلالم القديم - ياخي انتو الضلالية النايمين وما شايفين التخريب البيحصل
اشار للوزير باصبعه السبابة ...واومأ الوزير براسه دلالة انه فهم القصد فصل المدير العام ومدير الانتاج
/نواصل
| |
|
|
|
|
|
|
Re: يوميات رئيس سوداني (Re: garjah)
|
اخي وصديقي الغالي جلال
تحياتي ايها الغالي وعشمانين في توجيهكم
صديقي الغالي النقيب قصاص الرحمابي
تسلم من الكلفتة ...وليك علي ان ان اشحم في الجايات
الغالي جدا كبسيبة
اولا حمدا لله على السلامة وكيف عملت مع الخروف
الجميع بيسال عنك
| |
|
|
|
|
|
|
Re: يوميات رئيس سوداني (Re: garjah)
|
يا ريس اليوم عندك اجتماع مع السفير الامريكي ...في الاجتماع الفات يا ريس السفير كان طول الاجتماع خالف رجلو عى وشك الافضل اكلمو انو ما يخلف رجلو في حضرتك
- لا بس كلمو ممكن يخلف رجلو ...لكن في الجهه الانا ما قاعد فيها ...والا اقول ليك سيييبك منو ...هو كويس لو خلف رجلو ولم لسانو الخواجة (الا.....لف)
- لا بس انا كان قصدي شان الفضائيات وكده
- ياخي بدل تكلمو جيب ليهو كرسي ما يقدر يخلف رجلو فيهو ... الناس ديل عندنا عندهم طلبات متلتلة...ما عايزنها تتعطل بسبب خلفة رجل سفير وقلة فهم مدير مراسم .
جلس السفير ورجله في وجه الرئيس بسبب الكرسي ففي الاجتماع الاول كانت رجله متدلية بعض الشئ .
- سيدي الرئيس انا اسف جدا ان انقل لكم قلق دولتي لاوضاع حقوق الانسان المتردية في بلادكم.
همهم الرئيس ديل كانو اولاد عمك والا باقي قبيلتك يا خواجة يا ( ا..لف )
- افتكر نحن عملنا خطوات جيدة في موضوع حقوق الانسان ده وممكن تزور السجون الزرتها المرة الفاتت حتلقاها فاااااضية
- نحن عندنا علم انكم غيرتو مواقع السجون
البلد قدامك فتش ... اصلو ما عارف مين الحاكم البلد دي انتو والا انا
| |
|
|
|
|
|
|
Re: يوميات رئيس سوداني (Re: garjah)
|
اسمع هنا ا زول هه .....الناس النحن قافلنهم ديل ...ارهابيين ...ارهابيين ...انت طبعا عارف يعني شنو ارهابيين ... زي بتاعين سبتمبر الفن لكن على بلدي شوووية ....وبلدكم بتحارب الارهاب ....ونحن قافلنهم في قرية الغنم نامو ...وهي على وزن غوانتنامو .....شايف التوافق بل التطابق في وجهات النظر ده .
- اوكي سيدي الرئيس ممكن نجيب خبراء في مكافحة الارهاب لمساعدة بلدكم وعمل معاينات للجماعة المقفولين في الغنم نامو لترقية البعض لغوانتنامو ... المهم عشان نعلن بلدكم خالي من الارهاب لازم تنفذو الحاجات المطلوبة منكم ...عشان نخلي الشركات الامريكية تجي تشتغل في السودان.
- شوووف هنا يا سيدي السفير انتو الخسرانين ... الشركات الصينية والهندية والماليزية مسكت كل المشاريع وما خلو مكان حتى لاولاد البلد سيبك منكم انتو
-انت عارف البلدوزر الامريكي لما يدخل بيكنس كلو
-سجم حبوبتك يا خواجة والله الا تسوو شوالات الخيش
| |
|
|
|
|
|
|
|