|
|
 الهوية
|
اتهرينا يا جماعة بموضوع الهوية دا..والقصة دي حتستمر كتير لاننا عايزين نحدد هويتنا..و هي دي المشكلة..ناس قالوا عربية, وناس قالوا افريقية, وناس قالوا عربية افريقية, و في النهاية كلهم عايزين يحددوا ..لكن كدي نمسك الموضوع من الاول..نحن قاصدين شنو بالهوية؟ هل هي حاجة مسبقة و نهائية قاعدة في مكان ما و نحن عايزين نكتشفها و نشبها؟ هل هي بوهية بلون معين , ولا مربع مساحته بتساوي الطول في العرض؟ نحن البنخلق المفاهيم دي بعدين نقعد نقدس فيها..ولمن ننزل مفهوم الهوية المعلق فوق دا للارض و للحياة العايشنها دي حنكتشف انه ما في هوية صافية ولا في جنس بشري نقي ..العرب اتاثروا بالفرس واليونانيين و الافارقة ,والعكس صحيح ..والمسلمين لو فتشنا بنلقاهم اتاثروا بالمسيحيين واليهود و البوذيين و العكس صحيح ..والشرق فيه من الغرب والشمال والجنوب, وهكذا..انا ما بشبه اخوي ود امي و ابوي مية في المية, وهويتي هي مزيج من دا كله وعبارة عن توليفة معقدة من تجاربي زايد تجارب الاخرين في حالة تفاعل و تشكل دايم. والقصة جايطة ما عندها حل نهائ و مريح ..وما زول ضيعنا غير اصحاب الحلول النهائية و النظريات المسبقة. والاخر الانا خلقت منه عدو و غريب هو جزء من تكويني وانا جزء منه..منو الاخر بالنسبة لي هسة , السوداني الاستلم السلطة بالقوة و شردني ولا الخواجة الاحتضني؟ منو الاخر بالنسبة لجنوبي هرب من الحرب للشمال؟جيش الحركة الاتسبب بشكل او باخر في هروبه ولا الشمالي الشغله و اداه فرصة يتعلم؟منو الاخر بالنسبة للمراة السودانية ,الرجل السوداني ولا المراة الاوروبية؟منو الاخر بالنسبة للفلسطيني,السعودي ولا الفرنسي المشى رام الله وعمل درع بشري عشان يحمي عرفات؟ مالو لو فكرنا في مفهوم الهوية بلغة التنوع ولاختلاف و التفاعل و تعدد الاصوات والوجوه ..مالو لو فكرنا في المشاكل البتهدد البشرية كلها زي الفقر والعنف وتغيير المناخ..الخ..وما في مشكلة لو نختلف لانه دا شي طبيعي , لانه انا عارف انه الزول الانا بختلف معاه فيه شي مني وانا فيني شي منه..واصلا مافي اختلاف تام ولا في اتفاق تام,المهم ننفتح على ذواتنا ونكتشفها وننقدا وعلى الاخرين ونتحاور..المهم الفعل المستمر على تفكيك القديم والموجود وتجاوزه للجديد, والجديد زاتو طبعا ما نهائ انما هو فعل مستمر ومتجدد..و في النهاية انا ما صاحب مشروع جاهز ولا عندي حل سحري..لكن كدى نفكر توفيق زيادة
|
|
 
|
|
|
|
|
|
|
|
Re: الهوية (Re: SUKA)
|
الجميل توفيق
الموضوع جد جميل ....وحقيقي مسالة الهوية هي الاولوية في سوق السياسة الفايرة دي ..النقول الجماعة اتقاسموا مصايرنا , السلطة والثروة وربما الثورة نفسها ..ولكن علينا نحن مثقفى السودان ان نجند عصارة تجاربنا في المنافي ونتعلم كيف نكون مختلفين و ونلتقي في الجميل فينا .
فلسفة الموضوع علي طريقتك يا سوكا تصبغه بنوع من الشعور باللاجدوي...لاجدوي السعى للتوحد في الجميل ـ السودان ـ افتراضا
لا اقصد ان نسكت عن التساؤل ولكن ان نوظف ترفنا الذهنى في الذي مابعد قسمة النخاسين لمصائرنا
لك الحب ...ونواصل
| |
|
|
|
|
|
|
|
|
|
Re: الهوية (Re: SUKA)
|
اخوي بهاء, في فيلسوف قال لا يمكن للاجابة ان تستنفذ السؤال. عشان نستعد للجاي و نفتح باب الاسئلة الجديدة وكل الشبابيك المصدية بالمفاهيم البنتعامل معاها كانها مخلوقات نورانية ..ونتطلع من اسر الخطاب المطلق....منو العندو البوصلة ؟ مليون واحد حيقول انا......كيف الدكتورة امل لها الجمال...و اسف على التاخير...و نتواصل...
| |
|
|
|
|
|
|
|
|
|
Re: الهوية (Re: SUKA)
|
تعرف يا دكتور المرة الجاية حاخلي العنوان انقلاب عسكري في السودان ولا ظهور المسيح الدجال في دنقلا يمكن نجيب دخل..توفيق
| |
|
|
|
|
|
|
|
|
|
Re: الهوية (Re: SUKA)
|
كل ما تقع عينى على العنوان بتاعك ده..اتذكر لى دعايه..قديمه لصابون سافو
ولما مشينا فلادلفيا ولاقينا ناس مريم وناس خالده الجنيد واخواتها تنتن وتوتو..اكتشفت انهم حافظنها من اولها لى اخرها..
عليك الله خلينى تغنيها ليك...هنا لانى زهجاااااانه لى كم يوم كده..ومن شدة المواضيع فى البورد بقت دمها تقيل..بقت كلها باللغه العربيه الفصحى..
خلينى اغنى الغنيه دى...وما بخرب ليكم الرصه..
ولا تزعلوا منى ..ولا زول يفتح بوست جديد يقول تماضر "هظرت" فى بوست الهويه ولا اى كلام زى ده..
اغنيها خلاص؟؟:
الهويه الهويه
ياعروسه ياصبيه
عندى ليك اجمل هويه
سافو سافو يافو سافو اجمل هويه
سافو سافو يا قمرنا
سحرو ضاء حتى اسرنا
يحفظ العطر الذكيا
قدمى لى الناس هديه
سافو سافو سافو سافو اجمل هويه
توب زفافك توب جميل
سافو ما ليه مثيل
قدمى للناس هويه
سافو سافو سافو سافو اجمل هويه
اتنتتتا تنتنتا
لحظه سيرياليه ..كده وبتعدى ..ما تاخدو فيها حاجة...
شكرا يا سكا على رحابة الصدر
والزعل مرفوع...
| |
|
|
|
|
|
|
|
|
|
Re: الهوية (Re: SUKA)
|
سوكا يا حبيب انت فعلا مجنون لو فاكر الظهر في شارع النيل في دنقلا عريان داك كان المسيح ... يا حبيبي دا انا كنت ولهان ..وقلت اصلو الناس دي ما بتفهم في الهوية لكن ...لكن من ديك عرفت انو حتي المثقفين عندنا بيفهمو في حكاية الهواية زي هوايتي ديك ..... وانت افتكرتني المسيح ؟
لكن قول لي لو جيتكم بالردا كنتو افتكرتوني منو ؟
يا تماضر اوعي تاني تجي تتزهجي في بوستات (مهوية) زي دي ...نقع بيكي والله ..ونكون في فنانة وقعت ومالقينا ليها سبب وقوع ..مش قالو ليكي المسيح وصل دنقلا ؟ انتو ما بتفهمو ؟
قال هوية قال !!! انت الاول تحدد ...ليه الممثلة المصرية اول ما تبقي مليونيرة تبدا تهلوس بانها شافت جبريل في الازبكية وعشان كدا اتحجبت ؟ ...كانو جبريل شحات ما بيستهدف غير المليونيرات !!!
ياخي جر قناة الجزيرة لورة شوية وشوف شيخ الشيوخ الطاهر الترابى عشان تفهم هواياتك ... الله يرحمو ابو حراز كان حيقول ليك ؛قال هوية قال، ..
لكن انا برضو مؤمن انو السودان مهوي شوية ...
بس ياابو داني ما تقول لناس دنقلا مافي مسيح عشان مايكفرو بالهوية ..مش انت براك بتحب الاسمها ايه دي ؟
| |
|
|
|
|
|
|
|
|
|
Re: الهوية (Re: Arbab)
|
ازيك يا سوكا
موضوعك سمح بالحيل واجمل مافيه انه مكتوب بلغة ساهلة وما مقعرة ودراب دراب وخالية من المصطلحات
ولغتك سمحة شديد وما تغيرها
بتخش القلب توش.. بس ما يجى زول يقول امى ذى
عارف يا اخوى ليه فى مشكلة فى تعريف الهوية ؟
انه بتقرأ الكلام من الاول للاخر ما بتقدر تفك طلاسم المصطلحات ديك ناس اوجى شنو وشنو اوجى.. عشان كدا ما قدرنا الى الان نعرف الانتماء ومنو جابد منو
المهم يازول كلامك دا بالحيل عجبنى وجد اول مرة افكر فى كلامك دا كدا.. انا كتبت لى بحث كدا ما شديد شديد عن مدرسة الغابة والصحراء ومفهوم الهوية عندهم..
عايز بوستك يكون جزاب تشوف ليك مرة تشاكلها وتعمل عوة كبيرة
وتعمل وتدعى انك بتعرفها مع انه ما حصل الشرف..
بعد داك عناوينك كلها تكون مشروع عوة الناس بتجى تتاوق تشوف
العوة قامت ولا لا
وطبعا ما تعاين للردود لانه فى ناس كسلانة ما بيكتبها الا الشديد القوى.. بس لعدد من تاوق ودا النجاح الاصلى
واهم حاجة يكون عندك كوم باتع وكبير اجبارى الكوم يرد
كله بعد شوية تلقى الناس كلها لافة حولك
يا تماضر
لمة فلادلفيا ما تنفعكم(حساااادة ما بقر) اتخيلتا كمية الضحك
قلتى لى صابون شنو؟
الخرف حصل
| |
|
|
|
|
|
|
|
|
|
Re: الهوية (Re: bayan)
|
أزمة المثقف وأزمة الهوية في الوطن العربي
عبده مختار موسى*
في وقت سابق من هذا العام دعا المفكر الأفريقي علي مزروعي إلى عودة الاستعمار إلى قارة أفريقيا، وجاءت دعوته على الأرجح، كرد فعل لتردي الأوضاع الاقتصادية وتصاعد الاضطرابات الأساسية وتراجع الثقافات الوطنية أما تيار الغرب الجارف وانتشار الحروب الأهلية، والصراعات الأثنية والنزاعات الحدودية بين الدول الأفريقية.
وتمثل هذه الدعوة إحباطاً لشعوب الدول النامية، خاصة وأنها جاءت من أحد رموز الفكر والثقافة في العالم الثالث*، فهي تمثل نوعاً من الارتداد وتحمل الكثير من الدلالات التي تعبر عن انتكاسة النخبة وتعكس أزمة حقيقية يعيشها المثقف في العالم الثالث، " ومن ضمنه الوطن العربي"؟ وهل هي أزمة مثقف أم أزمة ثقافة؟ وما هو دور المثقف (خاصة العربي المسلم) في المجتمع وما هو موقفه من السلطة. وكيف يمكن تجاوز هذه الأزمة؟
إن المجتمعات النامية، وبعد مرور اكثر من ثلاثة عقود (في المتوسط) على استغلالها لا زالت تعيش مشكلات أساسية من أبرزها مشكلات الهوية والبناء الوطني والتنمية الاقتصادية والاجتماعية والسياسية. فما زال قطر كالسودان والذي مضى على استقلاله اكثر من أربعين عاماً، لا زال المثقفون والكتاب فيه يسألون كيف يحكم السودان؟.
وفي كل تلك الأزمات والمشكلات يلعب المثقف دوراً أساسياً، لان القاسم المشترك في كل ذلك هو "التخلف" وما يرتبط به من جهل وغياب للوعي. والمثقف هو أهم أدوات استئصال الجهل ومحاربة التخلف، وهو أهم القنوات الفاعلة لضخ الوعي وغرس القيم الحضارية في الجماهير. وهو كجزء- من النخبة- من أقوى المؤثرات في الطبقة الحاكمة.
والحديث عن المثقف هنا هو بالمعنى الشامل لكلمة ثقافة بما في ذلك البعد السياسي (Political culture).
http://www.fikria.org/mogala/3/mothgaf.htm
| |
|
|
|
|
|
|
|
|
|
Re: الهوية (Re: SUKA)
|
بهاء , بيان, ادروب ..شكرا على الطلة..و اسف جدا على التاخير لاني كنت مافيش وبعدين حصلت مشكلة في الكمبيوتر و المطرة صبت و المواصلات صعبة و...انتو وراكم حاجة.....يا جماعة الواحد يمشي للسطر التاني كيف؟..المهم.. بعد الانترنت و الاتصالات البقت زي اللعب و المعلومات الحايمة في الهوا ساكت والتجمعات البشرية البتتكون في العالم الافتراضي دا كل يوم ..موضوع الهوية دا يخيل لي ببقى عايز قراية بشكل تاني..والخايفين على الهوية الكائن المحدد داك يدبروا راسهم
| |
|
|
|
|
|
|
|
|
|
Re: الهوية (Re: SUKA)
|
شوف يا سوكا..........
أنت تتحدث عن مواضيع الهوية في زمن فيه نرى تكتلات الاحزاب الاثنية ...جبهة كوش...أبناء دارفور...امبارح عرفت أنو اهلب بدأو ما يعرف ب " جمعية الجعليين الخيرية " ....و لسة...غايتو السؤال بتاع : " أنا منو ؟" ....سؤال صعب و ساهل....!!!
قلتلي ....منو ده الظهر في دنقلا؟؟؟؟ ده مشى يسوي شنو ده؟؟؟....
كل سنة وانتو أطيب...
| |
|
|
|
|
|
|
|
|
|
Re: الهوية (Re: SUKA)
|
العزيز مانديلا ..شكرا ليك..الظاهر انه الموضوع دا حياخد وقت طويل لسة طالما انه السؤال لسة زي ما هو ..انا منو؟؟ بدل كدا ليه ما يكون انا بقدر اعمل شنو عشان اكون جدير بالزمن النحن فيه دا..بقدر اضيف شنو بالفعل والمعنى..لانه انا الليلة ما انا امبارح..وانا هنا ما انا هناك..والقصة جايطة..توفيق
| |
|
|
|
|
|
|
|
|
|
Re: الهوية (Re: SUKA)
|
في ناس قالو لي دا موضوع جاد وما مفروض اكتب فيه بالدارجي..الراي شنو؟؟
| |
|
|
|
|
|
|
|
|
|
Re: الهوية (Re: SUKA)
|
الإسلام كمكون لهوية الجماهير
إن الإسلام يشكل مكونا مهما من مكونات هوية شعبنا. ولذلك لابد من دراسة التراث الإسلامي في كل جوانبه, وخاصة في علاقته وتفاعله مع شعبنا لنتقدم في فهم سمة من أهم سمات الذاتية السودانيه ذلك أنه إذا استثنينا المبادئ العامة للعقيدة الإسلامية والعبادات, فإننا نجد أن الإسلام يختلف من منطقة إلى أخرى ومن مرحلة إلى أخرى.
إن الهوية ليست ثابتة بل إنها تركيب معقد ومتحرك ومتغير باستمرار, بتركيب لعدة مكونات منها الدينية والقومية والوطنية والإثنية والاجتماعية الطبقية, وهذا التركيب ليس جمع مكونات مفصولة عن بعضها البعض بل هو تفاعل مستمر بين هذه المكونات.
وهذا التركيب يحدده في نهاية المطاف وبشكل جدلي, الواقع المادي الملموس لهذه المجموعة البشرية أو تلك. فمعلوم أن الإسلام الممارس فعلا يختلف من بلد إلى آخر, بل حتى من منطقة إلى أخرى في نفس البلد في بعض الأحيان حسب تغير الأوضاع الاجتماعية والاقتصادية والملابسات التاريخية.
كما أن تصور الجماهير الشعبية للدين أو للوطنية مثلا يختلف عن تصور الطبقات السائدة.
إن دراسة مادية تاريخية لتراثنا قد يساعد على فهم أحسن لمكونات هوية الجماهير الشعبية ولدور الإسلام في تكون الهوية. كما قد يساهم في ضرب النظرة المثالية للهوية التي ترى فيها جوهرا ثابتا لا يتغير ورثناه عن أجدادنا مما يؤدي إلى تلك التقييمات اللاتاريخية حول "طبيعة" هذا الشعب أو ذاك بل يفسح الباب أمام بعض الأحكام ذات النزوع العنصري. لذلك لابد من التأكيد أن الهوية ليست معطى مسبق أو قدر محتوم يحدده ماضينا وليس لنا إلا أن نستسلم له.
إن هويتنا تفاعل حي بين ماضينا وحاضرنا وطموحاتنا المستقبلية. ومعنى هذا أننا نساهم, عبر ممارستنا, في صنع هويتنا. لذلك فإن مفهوم الهوية نفسه ميدان للصراع بين القوى الاجتماعية المختلفة ذات المصالح والأهداف المتباينة. فلا غرابة إذن أن نرى الإسلاميين يحاولون اختزال هوية الشعب السوداني في الإسلام بل إنهم ينتقون من التراث الإسلامي الغني والمتنوع العناصر التي تدعم فكرهم الأصولي المتزمت, واضعين الباقي – وهو الأهم والإنى- على الرف بينما تضخم بعض الاتجاهات مشكل الخصوصية الإثنو/ثقافية لتجعل منها المكون الأساسي لهوية السودان , في حين تسعى قوى أخرى إلى إعطاء الجانب القومي العربي أو الافريقي أو الاجتماعي الطبقي مركز الصدارة.
وخلاصة القول, أن الصراع حول الهوية صراع اجتماعي من أجل مشاريع مختلفة... أنه ليس صراعا حول لماضي بل هو صراع حول الحاضر والمستقبل, إنه صراع يهدف إلى المساهمة في صنع هويتنا إما إيجابيا أو سلبيا ( أما في اتجاه تقدمي عقلاني متفتح على منجزات الفكر البشري وديموقراطي يحترم كل مكونات شعبنا وإما في اتجاه متعصب متزمت, متراجع, منغلق على نفسه ومضطهد ومختزل لهويتنا الغنية ).
ونحن نطمح إلى المساهمة في تحرير بلادنا من التبعية وشعبنا من الاستغلال الطبقي والاستبداد السياسي والاستيلاب الثقافي لابد لنا أن نساهم بقوة في هذا الصراع بهدف تطوير هويتنا وأغنائها وتنمية الجوانب المشرقة فيها وفتح الآفاق أمام التطور الديمقراطي لكل مكوناتها التقدمية وفهم جذور ما يشوبها من عوائق وحواجز واستيلابات.
شقرور
مع تحياتي الي داني وام داني
| |
|
|
|
|
|
|
| |
Tumadir
bayan
Adrob wad Elkhatib
فيس بوك
تويتر
انستقرام
يوتيوب
بنتيريست