|
|
 عروس النيــــــــــــل
|
شباب كيف امسيتو .. واللسه الدنيا عندهم صباح ..كيف اصبحتو
والله الليله ساهرت شديد .. لكن عشان خاطر عيونكم يهون كل شى ..
ارجو المعذره من كل الاخوان والاخوات لو اتأخرت عليهم فى الردود
مهما حصل التاخير لكن وعد منى حا ارد.. لكن مستحيل اتجاهل .. العتبى لكم حتى ترضوا لى الشباب الاخرت ردودهم
اها اسمحوا لى امشى عشان اجيكم باذن المولى دغش .. وقبل ما اودع خلونى المره دى احجيكم بى الحجتنى بيه حبوبه .. لكن من هسه اعرفو انو ما ممكن تكون كل يوم حجوه ..ده هسه بس عشان انا جديده معاكم
المرات الجايه لو حصل ما حجيتكم اعزرونى برضو
لكن بحاول اتذكر حجى زمان
اها حجونى بى عروس النيل وهاكم ليها وفتكم بى الف عافيه
عروس النيل
زمــــــــــــــــــــــان
فى مره نادتنى حبوبة ....
منتكيه فوق ضل الضحى..ومتوسده توبا..
فارشالا برشاً من سعف ..
فوق عنقريب تاكلاه بى طوبه...
تقلالا بناً فوق جميراتاُ تشطشط ...
طاشه لما تهب نسيمه او هبوبا....
وريحة القلوة تعكل...
والفنيجينات تهلل..
جاهزه للبكريه لما تجيها مصبوبه ...
وجبنة الطين محكره فوق وقاية السكسك..
البلخرزه معصوبه ..
قات لى..
تعالى يا بنيتى جمبى حداى ..
بدور احكيلك الليله ..حكاية السمحه زينوبا..
بنيةُ من بنات الحله جاهله صغيره يا دوبا ..
فريعة بانا منقسمة ...
غزال نافر جبال التاكا والنوبه ..
يغنيلا الفريق كله..وحياتا ديمه حلفوبا ..
جنيات البلد يتلمو..ساعة الورده..
فوق البير يحلموبا ..
كتير من دق باب بيتا .
.وكتير من صدً جارى الخيبه والتوبه ....
شى يقولولو لسه صغيره يا دوبا ..
وشى يقولولو مخطوبه ..
رباية عز..جدودا رجال .
.ركيزه الحله وكت الحاره والحوبه ...
الا القسمه لما تحين تجيك عديل .
.موبى سكة مزروبه ...
***********
فى يوم عصريه جاتنى التومه بت احمد ..
تجر توبا..
تقول كرعيها مكروبه ...
وبى آخر نفس قات لى ...
سمعتى الليله بت العازه زينوبا ....
جاها عريس قدر جدى ..
وابوها اداها بت امى..
بنيه رضيه مغلوبه ...
فى شان شيخ من قبيله مأصله...
ياختى القصه ياها عديله محسوبه ..
عليك الله . . !!!!
.واشرى بت العازه..
يالدفنوك حليل الكان بغنوبا ..
وجات السيره شايله الشيل ..
دفوف وطبول ترز قدامهم النوبه ..
شى زغاريد... وشى نواحات ...
عليك يالزينه بت الحله محبوبه ..
عيون شاردات.... وناس واجمات ...
وكل الحله مقلوبه ....
وفجأة تدوى صرخة تشق سواد الليل ..
تصحى الكان فى غيبوبه ....
الحقو على يا جنيات ..الحقو على جنايات..
الحقو على انا الموجوعه احىى ووبا ..
فى ديك الساعه كان النيل..
ختف نوارة الحله عروسنا السمحه زينوبا ..
اسماء صديق الطيب ..الجنيد
سلطنة عمان مسقط
تحياتى وحبى لكم جميعا
|
|
 
|
|
|
|
|
|
|
|
Re: عروس النيــــــــــــل (Re: soma)
|
الأستاذة أسماء
تحية طيبة..
قرأت لك أشعارك أعجبت بها جدا .. وبالأمس قمت بتجهيز رسالة مطولة .. وعندما هممت بارسالها .. اختفت من الشاشة الغشاشة .. وتركتنى حائرا أصك بأسنانى غيظا .. بعد كل هذا العناء راح تعبى هدرا ..
حيث كتبت لك أبيات شعر ارتجالية .. ومن الصعب الآن اجترارها..
علمت أن أباك كان معلما .. كما أن والدى كان معلما فى المدارس الأولية .. ولهذا تنقلنا فى بقاع السودان المختلفة .. من قرية الى قرية .. ورغم حداثة سنى وقتذاك .. الا أننى مازلت أذكر تلك البقاع جيدا ..
فمن طريقة اختيارك الكلمات والتى تحكى التراث القديم .. أخالك قد استظليت من نفس شجيرات القرية .. وارتويت من نفس ماء البئر .. وأخال نفسى فى تلك القرية .. وتحت تلك الشجيرة .. وبجانب تلك البئر ..
ألا رحم الله أباك الطيب .. صديق الطيب ..
ولكن نعما لك .. لأنك خير خلف لخير سلف ..
فالى الأمام .. حفظك الله.. ..
...
عمك العجوز
أرنست أرجانوس جبران
..
| |
|
|
|
|
|
|
|
|
|
Re: عروس النيــــــــــــل (Re: soma)
|
عمى العجوز الشاب .. تحيه واحترام .. سعدت كثيرا بكلماتك .. وحقيقة كل ما ذكرته عن الوالد له الرحمه .صحيحا كان معلما وكم تنقلنا بقرى بلادى الحبيبه .. وكانت ايام لا تنسى وسوف لن انساها طول ما حييت فى هذه البسيطه التى يسمونها الارض ..
بالنسبه لى رسالتك تاكد انها وصلتنى حتى ولو ضاعت منك.. فلم تضع منى.. احسست بكلماتك التى سطرتها لى وحتى الاشعار . يديك العافيه ويخليك لينا يا عم ..
كتر خيرك كتير .. والشكر بلا حدود ..والقومه ليك يا ود بلدى ..
| |
|
|
|
|
|
|
|
|
|
Re: عروس النيــــــــــــل (Re: soma)
|
سوما ... 0
امس دخلت البورد ... واتلفته ... بوردا بااارد ... ياربى من وين جاتنا الطراوه ؟؟... اتاريها شبابيك الفرح الفتحتيها لينا دى
كليماتك ... ترد الروح
تعابيرك تعلم زهرة الياسمين الفوح
تطيب انة المجروح
تزيلها غشاوة الغربه ... ويفيض البوح
يرفرف بيها ناس البورد فى اعلى سفوح
ولك مع الود احترام
ديك الجن
| |
|
|
|
|
|
|
|
|
 Re: عروس النيــــــــــــل (Re: soma)
|
سوما
يا سمحة
و يا فاطنة السمحة
ام قصبآ احمر
شكرآ على هذه الحجوة الطيبة على نور القمراء
و صوت الحبوبة الحنون
و نعاس الاطفال قبل اكتمال الحجوة
و اندهاش الحاضرين حتى نهاية القصة
شكرآ ليك على السياحة الشاعرية الاثيرية
زيدينا من حكاوى زمان المطبوعة على تجاعيد زمنا اللاهث
و تسلمى الف
| |
|
|
|
|
|
|
| |
Sudany Agouz
ابو يسرا
KOSTA
فيس بوك
تويتر
انستقرام
يوتيوب
بنتيريست