دعواتكم لزميلنا المفكر د.الباقر العفيف بالشفاء العاجل
|
|
 *** غبشه ***
|
*** غبشه ***
السمحه وارده على البحر
شايله الصفيحه على الصفيحه
وتوبا بالواطه بيجر..
تتناطا من بين الغنيمات المبطحه فى الدريب
وتناحى فى الديك المجفلا غادى كر..
تزازى جاى .. ومره جاى
وتنهر الكلب البهوهو خايفه وتقول ليه جر..
*****
رفيقاتا القبيل سبقنها فاتنها
ما لاقيه واحده تآنسا وتبقالا فى الحالتين وزر..
فطومه مره تمد .. ومره تجك ..
وتتعتر تقشقش فى العرق والدنيا حر..
قديمات الحمام اتغبرن .. والشبشب المهرود
يبرطش فى التراب جاراه فوق كرعيها جر..
****
احى انا .. نفسى انقطع..
تنهيده تمرق من رويحة السمحه
زى فصين درر ..
****
لمن لفت نص الطريق ..لاقت رفيقاتا القبيل
رجعن خلاص من البحر..
يتهامسن .. و يتضاحكن ..
نظراتن الشمتانه تكوى السمحه..
زى كى الجمر..
وقفت ... وبى نظرة عتااااااااب ..
انا ما رفيقتكن .. نسيتن اللمه فى ضل الشدر ؟
اتلملمت لفحت طرف توبا وجرت..
ما عاينت قداما.. فجأة اتعترت فوق الحجر..
****
السمحه مى شبه التعب والبهدله ..
لكن ظروفا القاسيه اقوى من الدهر..
فطومه ديمه شايله شغل البيت..
لا يوم شكت لا اتململت .. واياما فى الدنيا بتمر..
*****
وكتين دنت سمحتنا من طرف البحر..
رمت الصفيحه وكوعت ايدينا فى نص الضهر..
ملت الصفيحه .. اتنهدت ..
لوت الوقايه بى ضجر ..
وهطت الصفيحه.. ورجعت تجرر فى الخطى..
والمويه من خرمين تسيل فوقا وتخر..
***
وصلت خلاااااااص آخر المطاف.. والفيها كملت
من مشيوير الورود ساعة العصر...
تكت الصفيحة تكبها فوق الزوير..
البالى من زمن الجدود مال واتنخر...
فلتت ادياتا الصغار من الوهن ..والمويه سالت..
تحت كرعيها زى جدول عبر..
اتزحلقت .. اتمايلت .. وقعت تراااااااااااح ..
فى لحظه كانت سابحه فى بركة مطر..
اتاوهت .. اتوجعت .. اتندمت 00 اتحسرت
والدمع من عينيها طفر..
اتحكرت فوق طينا داك .. تندب الحظ
المعتر ليها دوم طول العمر..
تندب الحظ المعتر ليها دوم طول العمر..
سوما @@@
اسماء الجنيد مسقط ...
|
|
 
|
|
|
|
|
|
|
|
Re: *** غبشه *** (Re: soma)
|
Quote: فلتت ادياتا الصغار من الوهن ..والمويه سالت..
تحت كرعيها زى جدول عبر..
اتزحلقت .. اتمايلت .. وقعت تراااااااااااح ..
فى لحظه كانت سابحه فى بركة مطر..
اتاوهت .. اتوجعت .. اتندمت 00 اتحسرت
والدمع من عينيها طفر..
اتحكرت فوق طينا داك .. تندب الحظ
المعتر ليها دوم طول العمر..
تندب الحظ المعتر ليها دوم طول العمر..
|
سوما الرائعة
كلماتك أبلغ من الصور .. ربّنا يحفظ ويسعدك زى مابتسعدينا بالجمال ده .
ــــــــــــــــــــــــــــــــــــــــــــــــــ
[email protected]
| |
|
|
|
|
|
|
|
|
|
Re: *** غبشه *** (Re: soma)
|
سوما فراشتنا الجيملة / كلام جميل ومعبر لى بساطة اهلى الحلوين والطيبين الزينين ..... كم كنت مشتاق ان اسمع مثل هذا الكلام لانه يداوى جروح الغربة المريرة .... فكى احترامى وتقديرى
السمؤل
| |
|
|
|
|
|
|
|
|
|
Re: *** غبشه *** (Re: soma)
|
Quote:
وكتين دنت سمحتنا من طرف البحر..
رمت الصفيحه وكوعت ايدينا فى نص الضهر..
ملت الصفيحه .. اتنهدت ..
لوت الوقايه بى ضجر ..
وهطت الصفيحه.. ورجعت تجرر فى الخطى..
والمويه من خرمين تسيل فوقا وتخر..
|
استاذتنا سوما
دوما هموم اهلنا البسطاء ملء كلماتك
الصورة اعلاه ما زالت - لمن يتشدقون بتهميش مناطق فى السودان - موجودة فى شمال السودان ووسطه وما زالت المرأة تسقى وتروى الانسان والحيوان هنالك حملا للماء على الرؤوس الجميلة ..
شكرا عزيزتى
| |
|
|
|
|
|
|
|
|
|
Re: *** غبشه *** (Re: قرشـــو)
|
فراشتنا الجميلة : سوما
كلما هبطت بنا غيمة عند دارك العامرة بالسماحة والزين والعديل
تلقفتنا غيمة أخرى لمرافئ أكثر دفئا وأمنا في زمن الخوف والرعب
الملتحف لحياتنا كل يوم .
العافية تبقالك هدم وأنيس وجليس آناء الليل وأطراف النهار .
سوما لك الود والمعزة دوما .
خضر عطا المنان
| |
|
|
|
|
|
|
|
|
|
Re: *** غبشه *** (Re: soma)
|
الغالية المبدعة سوما
السمحة فى المشوار تضج
ما لقت غير التعب والضجر
السمحة سايقا هموما البقت
ما بتنحلّ الا فى غايات الصبر
مسكينة تندب فى الحظوظ
بالطرحة تمسح دميعات السهر
لك الياسمين ... سوما ... وكأنى الان اركض نحوها... هذا البوح الصافى يجعلنى
اختلط مع النص واعايش ذراته .... مالو الحزن بشيل اجمل الورود وبهديها الحرمان ؟
ما اجملك يا مبدعة ... ربنا يحفظك ... شكراً ليك مرتين وعليك الله ما تطولى تانى
الفاتح
| |
|
|
|
|
|
|
|
|
|
Re: *** غبشه *** (Re: alfatih)
|
غبشة
سلام وحبابكم يا غبش من وسط الغبش...
قعدت بعيد اتفرج بعدما رسلت ليكم السمحه.. الغبشه ..
قلت يات من يجى يتاوق هنا .. احلف انه اغبش زى وزيها .. بتهز مشاعره الحنينه سماحة خصالنا السمحه البسيطه الاصيله ..
فطومه الغبشه والحياة الساهله العايشاها بى حلوها ومرها اكيد ليها طعم خاص ونكهه خاصه للناس الحنينه زيكم وزى باقى اهلنا الما قادرين يتواصلوا معانا فى لمتنا دى..
يديكم الف عافيه يا حبايب...
نبدأ بالضى الحنين ... لؤى .. ضى بيوت الاهل كلها..
كيفنك يا عقاب النضم السمح ..ان شاء الله تكبر معانيك وتغزر وتبقى ضلاله لينا كلنا ..يغشاها كل ماشى ويتعطر بى دعاشها وتكبر الضلاله وتبقى غيمه تعم البلد يا ود البلد..
........
الضى لؤى ..تسلم يا الحنين ...
*****
سمباتيكو ...
مشيت البحر ولا شنو ؟
عارفاك بطحانى حار ماشى تشوف البنيه دى وتجاملا .. وممكن تجيب ليها خرجين مويه..
تسلم يا عشا القبيله على المتاوقه ...
****
عمر رجب يا ظريف ..
سلامات وحبابك يا خوى ..
كتر خيرك ..دائما سباق والله ..يديك الف عافيه وتسلم يا رائع ..
تحياتك لى ناس البيت وصلت وبهدوك عاطر الود والاحترام
وتسلم..
***
السمؤل .. حاباااااابك يا اغبش من ريحة الغبش..
اكيد الزيك يا حنين بعاودو الحنين للذكريات النبيله ولى حنية اهلنا المافى زيها فى الدنيا ..
نحن يا السمؤل اخوى اكان ما بتغشانا ريحة اهلنا المعتقه .. وضو رقراقهم فى ضلام الغربه دى ..كنا بنتحمل ونقوى ونقدر على المواصله ؟ الله لا حرمنا منهم
تسلم يا السمؤل .. والله لا وراك يوم مر فى غربتك .. وترجع لى اهلك سالم غانم يا حنين..
*****
ادرووووووووووووب ..
سلام يا ادروب ابو بدلة ..لوووووووووول
ادروب ياخى ما معقول ..بعد القلوه والرمله والفناجين والجبنه دى كلها .. تتحكر لى بى بدلة الافرنجه دى ؟
ياخى وين الصديرى والمركوب؟..
حبابك ادروب يا ولوف ..
وبهديك فنجان قهوه فوق الجروف ..
****
قرشو عمدة البلد
حبابك يا اصيل
حقيقة ما زالت الصوره العالقه بذهنى من صوره حيه وجميله وفيها كثير من الوفاء والتضحيه .. موجوده فى بعض قرآنا النائيه فى بلادى..
وكم تمنيت اخوى قرشو انا اعيشها واقع ملموس .. ولكن هيهات مع تكنلوجية العصر العجيبه
حتى القرى شملتها الحضاره والتكنلوجيا المشاتره فى كثير من مناطق السودان...
لم تكتفى التكنلوجيا بالمدن .. وطافت حتى شملت كثير من القرى ..ولكن لم تغير وبكل فخر طباع ونفوس اهلى الغبش .. رغم التيار الجارف .ونحمد الله على اصالة اهل بلادى ..الانت منهم يا قرشو الاصيل..
تسلم اخو البنوت وربنا يديك الفى مرادك يا يابا ..
الحنين ود عطا المنان ..
حبابك انت يا الركازه البتجينا بى دعاشك عز الهجير.. متلفح بالنسمه البارده ومعمعم بالطيبه السمحه..
وحباب نضميك الزين يا ود قبايل النيل..
وانت ان شاء الله العافيه تغطيك وتباريك وين ما تقبل ..
وربى يخدر دربك ويسهل امرك ..
كتر خيرك ود عمى ..وان شاء الله ما نعدم المتلكم ..
*****
الفاتح الحنين ..
مغموس بالمويه والطين الاخدر لى جواك الزين ..
عارف يا الفاتح ..انا بشوفك انت بى غادى لى طرف البحر شايل شبكة ومحكر فى القيف
تعاين ساى وساكت ما عاجبك السونو البنوت مع رفيقتن السمحه ..
ولومتهن بى نظراتك مو بالنضمى .. فى شان مو من طبعك النضم الحار.. وبردت عليها بى صفيحة مويه وربطة قش فى رجعتك ..
وشربت شاى المغيرب عندهم
ولاقيتك فى طرف الدرب راجع بيتك ..عرفتك جيت من عند السمحه يا السمح جوه وبره
الفاتح الغيبه مو بى ايدى ..
اريتنى كان كنت مع ناس الغبشه ما كان غبت تب..
فهمتنى يا العشا ؟
تسلم الفاتح ويسلم فهمك.. وقلمك .. يا الضو.
| |
|
|
|
|
|
|
|
|
|
Re: *** غبشه *** (Re: سجيمان)
|
سجيمان .. الماك خمجان تسلم يا عشا الضيفان..
التحيه ليك يا جنا الحنان ..كيمان كيمان
وشكرا على المتاوقه وبهديك فنجان قهوه بى هبهان..
| |
|
|
|
|
|
|
|
|
|
Re: *** غبشه *** (Re: soma)
|
Quote: اتزحلقت .. اتمايلت .. وقعت تراااااااااااح ..
فى لحظه كانت سابحه فى بركة مطر..
اتاوهت .. اتوجعت .. اتندمت 00 اتحسرت
والدمع من عينيها طفر..
اتحكرت فوق طينا داك .. تندب الحظ
المعتر ليها دوم طول العمر..
تندب الحظ المعتر ليها دوم طول العمر..
|
التحيه لك ايتها المبدعه
بشوف فيك اخواتي واماتي وحبوباتي
وسوداني الله ايريحك يا اختي دوماً
الى الامام عزيزتي
ما اجملك
| |
|
|
|
|
|
|
|
|
|
Re: *** غبشه *** (Re: soma)
|
احى انا .. نفسى انقطع..
كر عليك يا الغبشة
الجابك شنو..
وسط العجاج والدفسة
وكركبة الضجيج
البورض دا مقدود من قبل
ما من دبر
وبطانتو مهرودة
زي بالي النسيج
خليك في ضراك..
مكنونة في العين والقلب
نمان تزول الغمة
او من خلاف تلقينا مصلوبين
فوق الدرب
يبرونا بالبكا والنشيج
| |
|
|
|
|
|
|
|
|
|
Re: *** غبشه *** (Re: humida)
|
حبابكم من تانى يا قبلة غناى ..
اتفضلوا ادخلوا لا جاى ..
نصار النجيض حبابك يا الصنديد.. و المطايبه سمحة تب
وغشوتك بندورا حتى كان واقف طولك.. تسلم يا اخونا..
****
مها بت عمى عبد الله ...
التحيه ليك بت امى قدر حنيتك ..
وانا يعلم الله سعيده بيك انتى .. البتشوفى فينى اخواتك ، واماتك، وحبوابتك ... واهلك كلهم ..ده كتير يا مها الاجواده
..انا بشوفك لمة محنة .. ونسة عشيه فى ضو القمره .. كل زول شايف التانى باحاسيسو ومشاعره والقلوب ملتحمه..
يديك قدر نواياك يا بيضاء وتسلمى يا الحنينه...
****
طيفور حبابك ..
برد جوفك يا العشا وادنا لا جوه ..
الغبشه بندورا ما تفوت عيونا ولا خاطرنا .. فى زمن العولمه ..
ننفض روحنا ونصنقر فى نص الواطه .. ونطرى الغبشه ورفيقاتا ..
عشان ترتاح اعصابنا وننجم شويه من القلتو فوق ده كلو ..
الغبشه حاتفضل مكنونه طول الدهر ..لا بهزها بورد ولا ببدلا كى بورد ..
عشان هى غبشه .. ومعدنا نادر عمروا ما بصدأ..
انتكى يا طيفور تحت الشدره دى واشرب ليك فنجان جبنه من ايدا ..
وكتــــــــــــر خيرك على الطله يا ود البلد المى كتر..
****
ود احمد .. حبابك يا المنهم ..ات زاتك ما من طرف ناس الغبشه
تسلم كتير وكتر الف خيرك يا اصيل ..
اسعدتنى طلتك بعد غياب طال من اللقيا عبر السطور..
ود احمد شكرا بحور
ودعتك الله والرسول ..
****
عمر ود حاج الماحى ..
حبابك يا قبلة اهلى الطيبين ..
حبابك يا غرة الوالدين..
حبابك ود اهل الذكر والدين..
جيتك براها شرفتنى كتير
وشرفت الغبشه الحنينه .. العندها عقاب متلكم
شكرا على الطله ..
وبهديك تعبيرك الشفيف ..
وبهديك رقراق ضو من صريف..
اخى عمر ..شكرا خدرا متل القيف ..
*****
حميــــــده وينك يا عشانا ..
حلوووووه شولا دى .. لوووووووول قدر ضحكتى
مرات بنحتاج لانتكايه نضحك فيها لمن تنقط دميعه ..
بتبرد الجوف والحشا
..
يا ريت لو اقدر اسافر كل 3 شهور ولا حتى كل 6 شهور يا ود امى..
لكن الله غالب .. والشوق بمرق بى جنس الحاجات دى
الله لا حرمنا من اهلنا وسماحتهم
تسلم حميده ويسلم قلمك..
| |
|
|
|
|
|
|
|
|
|
Re: *** غبشه *** (Re: ابو جهينة)
|
سوما لوحتك المرسومة عبر الكلمات عبرت بي المسافات الطويلة وحلقت في سماء موطني والمنظر المألوف من زمن الصبا تعود بشريط الزكريات الجميلة المرعى وتجميع الحطب للوقود وجلب الماء ومراتع الطفولة
يا لها من مشاهد محفورة في أعماقنا كما الصخور التي نحتها أجدادنا لتبقى عبر الزمن
*****************
يا قرشو لماذا لا نتشدق بالتهميش والبعض من حر مالنا يمطي السيارات الفارهة والموية بالماسورة والحمام بالدش والبيوت مكندشة والكهرباء على مدار الساعة نعتبر ما ذكرته من الرفاهيات لا نستحقها نحن أهل الريف... ولكننا نستحق التعليم والعلاج والتنمية التي توقفت تماما لتصبح ما رسمتها سوما من لوحات مجرد نقوش في الخيال والواقع غير ذلك قرى هجرها أهلها بحثاً للرزق والتعليم والعلاج والعيش الكريم لتصبح قرانا أطلالاً ينعق البوم عليها
وا حسرتي!!!!!!!!!!!!!!!!!!!!!!
| |
|
|
|
|
|
|
|
|
 Re: *** غبشه *** (Re: abuguta)
|
غبشه
مريم بت الحسين ..
السمحه من البدايه وكريمه للنهايه..
الجمال ياكى انتى يا بت البلد
يعلا مقامك ويرفع شأنك يا نواره
تسلمى يمه وحبابك يا اصيله
نورتى وشرفتى الغبشه ورفيقاتا
تسلمى مريم وشكرا ليك موية بحر
***
ابو جهينه .. الرجل الموسوعه
حبابك بعد غياب طال يا سند الضهر
يديك الفى مرادك يا حنين
تسلم يابا على الجيه نهاريه
بردت جوفنا بى كلامك السمح يعلم الله
ابو جهينه شكرا مرتين وتلاته وبدون توقف
شكرا نسمه فى عز الهجير..
****
حبيب بلدو الحنين
حبابك يا الحبيب ..
خيالك خصب وحنين يا حبيب بلدنا
الباكريه فى الحله .. وزقزقة العصافير فى الشدر ..
وصياح الديك يناغم رفيقو فى الفريق التانى.. وشاى الصباح قبال الملاح .
وقعدة ضحى .. ولمة اهل فى طرف الخور ومطايبه ورزق اليوم باليوم
مافيهم من شال هم الغداْ ولا جبنة الفطور .مع انه وقتها جاء ..لكن ميقنين وراضين بالقسمه واللقمه الموجوده ..0 وحقى وحقك وحق فلان كلو واحد ..لانه النفس واحده والنوايا بيضاء
كتير وكتير يا حبيب البلد .. والله يمتعنا بى طباعهم الما فى مثيل ليها فى كل الشعوب
اريد بلدى .. واريد اهلو..
حبيب بلدو ..شكرا لمة اهل يا الحنين
***
ود الحله والفريق
ابو قوته .. الفجه وقت الضيق
اللقمه البتسند الريق
والمطره البتطفى حريق
سيفنا الفى الضلام ليهو بريق
تسلم ابو قوته
وينك يا سقف الاهل
ركازة سانده جبل
هميم وكريم ومهل
يديك الف عافيه يا شفيف ..
ويسهل امورك .. وربنا يسندك زى ماك ساندنا بى كلامك السمح ..
هنا الدوام يا ابو قوته .. وهناك الباكريه والمخلايه والطوريه
وجرف ملان خدره مرويه .. شديرات رويانات محنة .. وجارك حداك مخلايتو فى كتفو
لوما طايبك ما بفوت ..
مش هنا رغم التكنلوجيا المطرطشه ..الجفا فارض روحو .. وين وين لما تتذكر ترفع السماعه وتطايب زول.. لو ما لكزوك قالوا ليك الدوام انتهى .. وصلاة الضهر فاتت
الشكيه لى الله يا ابو قوته ياخوى
ربنا يرد غربتنا ويعمر قلوبنا ويغزر محنتنا
ابو قوته شكرا لقمه فى الجوف .. من كوره فى طرف القيوف..
| |
|
|
|
|
|
|
| |
لؤى
omar_ragab
samwal ebrahiem
aosman
قرشـــو
خضر عطا المنان
alfatih
سجيمان
نصار
طيفور
wadahmed
omer almahi
humida
مريم بنت الحسين
ابو جهينة
Habib_bldo
abuguta
فيس بوك
تويتر
انستقرام
يوتيوب
بنتيريست