دعواتكم لزميلنا المفكر د.الباقر العفيف بالشفاء العاجل
|
|
 الجنيد الحلة ** البنطون ** وبالعكس**
|
الجنيد الحلة ** البنطون ** وبالعكس
العباره الفوق دى تلقاها محكره فى بكاسينا المشلهته بين الحلة والبنطون ،
شايله جواها المحنه بى ألوانها من دغشا باكر.. وطيبة خاطر ...
الموظف المحترم القرأ واتعلم بى بنطلونه الرمادى وقميصو الابيض المخطط بى بنى باهت ، اكلت خطوطو مكواة الحديد المصديه !! ورغم كمية الصدأ الطافح ومغطى كل الجهات لكن برضو تلقاها كريمه ومخلصه بتأدى مهمتها بى مزاج بدون ما تغلط على القميص وتوسخ ملامحو ...
طلبة المدارس بى القمصان المكرفسه والعوينات الزايغه من جدول الضرب والشعر المبروم ليه شهر ما شاف مشط الا عند الحلاق .. والكريعات المخرخرات رملة وغبار من لعب كورة أمس العصر والشبشب المهرود طرفو ..
أمنا الحاجه بى قفيفتها المهلهلة ، وجرجيرها البايت بى مويتو ، محكره فى نص البوكس معاها مفاريك ومقاشيش وكوم ويكه ..
حاج اللمين والجلابيه الجيبها مقدود والعمه النصها مبرقع بى موية الظهر(( البقى تقليد نصو حبر )) وطاقيتو الحمراء باين طرفها..
ست التسالى الجات جاااااريه وتناغم : أقيف يا حاج .. أقيف ياحاج .. شايله صينية الطلس نصها فول مدمس ونصها تسالى ملحو زايد ، مقنعه بى طريحتها ولابسه سفنجتها الخدرا مربوطه فردتا بى دبارة ..
فاطنه أم الصغار لافحه توبا وشايلا وليدها فى صفحتها مدمدم بى طرف توبا
وبشكير اصفر جاها هدية من السعودية .. جاريه لاحقه البوكسى ولاحقه الصف الطويل فى العياده ومقابلة الطبيب البشل الجيب .. ورجعتها بدرى للخدمة وغداء الوليدات ..
وفى طرف الباب كراع جوه وكراع بره .. ولدنا الكمسارى بى قميصو الاتحفظ لى كل الركاب وبنطلون الجينز المرقوع .. خامش ومكرفس فى إيدياتو الضعاف
قروش الركاب والفكه فى الجيب الباهت الرهيف .. يناغم ده ويصابح داك ويسالم الفات .. ويطنطن مع السواق الملفح بى شالو ولابس نضارتو السوداء ، ويبخبخ فى دخان سجارو الزهج بنيات المدرسة ..
كل الملامح الشفتوها دى فى البوكس الكريم البقوم بى واجبو كل يوم ، وفوق لى الشايلو بى جوه .. شايل فوق راسو المسطح ربط البرسيم البتلب قشو بى رقراق السقف فى جيب الموظف القبيل ..
وشايل شوال البصل حق حاج اللمين ، وبمبون البصل طاقه ريحتو وملخبطه بى دخان سجار السواق معكننه الجو لى الوليد المحموم وليد فاطنه .. مصرصر وشيهو ويئن تحت بشكيرو.. لكن ما فارقه مع وليدات المدارس ولا حليمه ست التسالى ..
فى نص الطريق والبوكسى ما قادر يتنفس غايص نصو فى وحل التراب !!
رغم ده بقيف لى نفرين جاريين ، نفسهم مقطوع .. واحد شايل جريده والتانى جارى مخلاية الليمون الملقطو بالليل من الجنائن .. وحزمة النعناع غرقانه فى نص المخلايه ... شويه تدى البوكس نكهة ،، الفواكه البسمعوا بيها وما بشوفوها الا قليل من ربط العنكوليب ، وقصب السكر ، وأكوام الموز ..
المنظر البديع ده بتكرر كل يوم .. لا مرض لا قرف غربه ، لانهم بجو صادين آخر النهار لى ديارهم العامره حنيه ....
لكن حالنا نحن بتختلف الجنيد البنطون المطار .. والدميعات النفسهن حار
والعبرات البتتقطع فى الحلوق والعوينات الرادفه الحزن اتنين, والحشا البدافر الوجع والخطوات المعسمه تتوسل الرجعه للناس القبيل والشوق تقيل... والسفر الطويل.. وكل ما تقول تتناسا يجيك طرف الجواز الاخدر يكايدك بى مغصه ويتحداك
منظر الشنط المردمة بى باقى المحنة الاستلفناها معانا لحين.....
ولى عوده معكم ايها الطيبين ..
اسماء الجنيد مسقط
صباح الجمعه 10/3/2006
|
|
 
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
الشفيفـة سـوما
رفاعـة ** الجنيد الحلة ** المصنع ** وبالعكس
هكــذا .. مكتوبة باللون الأحمر على جبين البكاسي
ياخ أنا ماشي الخرطوم عندي مواعيد مهمة
وخايف بنطون رفاعة يكون خسران
يازول أحسن ليك تمشي بي بنظون المصنع ده مابقيف أصلو
كمان واسع وفيهو سقالتين وبشيل ستة بكاسي وبصين
يااااااااه يالها من أيام
ونركب
نخرج من رفاعة عبر الحلة الجديدة وطوالي نطلع الكنار ( الترعة )
بعد داك طوالي بتجيك ريحة الدنيا وطعم الحياة ولون الفرح
مزارع قصب السكر على اليمن والشمال
عمال يعملون بلا كلل وعربات المصنع تنقل أرتال القصب
جاهز يطلب مكائن المصنع لتعصره وتعتصره
أرض بِكر سمراء لزجة تشهق طالبة معاول الإخصاب
قرى وادعة مغروسة في القلوب قبل الأماكن
العُــك يحيطها الهشاب
الواحد قاعد في البكسي بي جنبة كده مفتول
وبعاين بفرقات السيخ
نساء يتجولن مودةً داخل أزقة القرى
أطفال يلعبون في الأطراف وغالباً في باحات المدارس
دنيااا جميلة يا سوما
فجأة تسمع فرطقة الكمساري يلا يا جماعة مشونا
والعملة الورقية ملفوفة ببراعة بين اصابعة وفي اليد الأخرى عملة حديدية
وساعدونا بالفكة يا جماعة .. عليك الله ما تدفع يا عبدالله
حسابك مدفوع ياعمو
خلاص شيل حق الناس الراكبين قدام يا ولدي برضو قول لي مدفووع كمان
شرق الجزيرة ياسوما لايعرفها إلا من عاش وعايش
ويقيف البكسي في الصف
تنزل أشعث أغبر وقد تحوّل جسمك للون الأرض التي تعشق
تحتحت التراب من شعرك والغبار من البنطلون والقميص
وندي الجزمة مسحة بي ورقة من الجريدة ولا منديل ورق
نكمل الباقي لحدي البنطون برجولنا
تنزل مندفعاً بفعل التدرج وتندفع أمامك كل آمالك وأحلامك
هذا يحمل طفلاً وذلك يُدرّج إمرأة عجوز او رجل كهل
والدنيا ماشية
أول حاجة يغسل وشو ويديها جقمة جقمتين من الموية البتشبّع ديك
الواحد يفرح لما البنطون يكون بالغرب
آآهي فرصة يشرب شاي بالنعناع أو سندوتش طعمية يبشطة حارة
المصنع من خلفك يطلق طنين العطاء
والماء من أمامك يبلل الأشواق
ونسة الجموع فوق المشرع تدغدغ الروح جمالاً وإلفة
يختلط كل ذلك برائحة المولاص
والله ماوقفني من الكتابة إلا إحتداد الشوق
الظاهر يا سوما أنا ح اجي هنا كتييير
خوالص المــودة
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
العزيزة اسماء والعزيز ثابت
يا سلام رجعتونا لشرق الجزيرة وللبطانة وريحت الخضار التى لم اجدها فى اى من بلاد الدنيا,ذلك الوصف الجميل لاهلنا فى رفاعة, الجنيد ,تمبول الهلالية ,الجلفة ,ود رحوم, بانت ,العزيبة,الصقيعة,مدن وقرى لايعلمها الا من عاش فيها ,فقراء فى جيوبهم اغنياء وسعداء بعزتهم ومفاخرين بكرمهم واصالتهم,الله يارب ترجع لينا الايام الجميلة وخصوصا العودة من الخرطوم عن طريق الجنيد الى رفاعة فى يوم خريفى عندما يوحل البص ولا البوكسى يالها من تجربة وبالرغم من مشقتها الا انها رحلة لها مذاقها وطعمها الخاص الذى لايستصيغة الا ابن الشرق النساء فى العربة والرجال والشباب يعاندون تلك الارض الطينية المباركة وقد خم كل منهم جلابيته فى فمة وكفكف الشباب بناطيلهم وسط التعليقات الساخرة والضحك والابتسامات الخجولة للصبايا داخل العربة ,لتكتمل الصوره بمرور تركتر جاى من المشاريع قمة التكافل والرحمة ,يخرج سائق التركتور حبله الغليظ ويخرج العربة من الوحل وسط شكر وعرفان بالجميل...
الاخت اسماء لكم كرهت الغربة والابتسامات المصطنعة كرهت الدولار واليورو والريال وكل شيئ مصطنع ولكن لنا عوده حميدة نروى بيها مشاعرنا وسط الطيبة ورائحة الخضار...
فتكم بعافية
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: حسن الجيلى سعيد)
|
اخى الحنين ثابت
حبابك يا ود العزاز
سقت خطاى معاك بى فوق الكنار ..
رغم البوكسى الراكباه كان متجه نحو العزيبه والصقيعه والحصاحيصا
الشوق كتير والزمن نار والغربه وجعها حار
تفرك فينا زى حجرين زلط ونولع نحن فى النص لهبة حمراء ودخان اسود
جاف ااكتر جفافا وسوادا من دخان سكرنا الحنين
بجيك صاده بعد اكمل مشاورى
تسلم اخى الحنين ثابت وربنا يرد غربتنا
***
اخى ود البلد حسن الجيلى
حبابك يا الفيك ملامحنا
جيتنا من وسطهم بى طيبتهم وعفويتهم البتخدر بلد
نفسهم خريف نديان موطن فى نفوس الطيبه ومطايبتهم بى فوق الحيطان
حبابك يا حنين
لى عودة اخرى معكم عقاب النهار باذن الله
لكم المحنه جميعا قدر الموكره فى قلوب الهناك
ودمتم
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
سوما عطر المحنة المدفق من هنا إلى الجنيد
يا سلام عليك يا سلام يا شاعرتنا المرهفة
رغم أني زرت تلك المنطقة لساعات قليلة .. و لكن و الله شممت في حديثك كل نكهة من نكهات تلك المناظر المختلفة .. لم لا فهي صورة طبق الأصل لكل قرانا الطيبة ..
حفظ الله أهلنا بكل القرى و الأمصار
و حفظك لأهلك و أسرتك
أرقدي ألف عافية و تحياتي لود الجنيد زوجك العزيز
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
اه لو تكبدتي مشاق السفر بطريق الشرق من مدني الشرفة دلوت رفاعة
والبنطون والفرناغة بتاعت شرق الجزيرة
يا سلام علي التعب والمعاناة بكل الجهات لرفاعة مدينة طيبة لا تستاهل
كل العذاب
واجمل حاجة انك تطلع فوق مع الريس وده ليس بفنجرية انما في
الغالب زوغان من الدفع
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: Sabri Elshareef)
|
اخى صبرى الشريف حبابك يا ود الشرق والمطر البرق
مشوارك ده انا مشيت اكتر منه .. من رفاعه بالشرق لغاية القضارف
وكانت محطتنا الشرفه البتشرف كل القبائل
قعدنا فى مظلتها وشمينا نسيمها العليل
يا سلام على بلدنا الجميله وناسها الطيبه
قلت لى داير تزوغ من الدفع لوووووول
نحن غايتو ما بنزوغ لكن بدفعوا لينا اعمامك الكبار يا حليلهم
يعنى برضو بنعدى ملح سااااى
تحياي ليك قدر نيتك الصافيه يا ود اهلنا الحنان
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
فى البنطون وفى طرف البحر تجيك الخضره المى خمج
خدار حبيبكم يا يمه ..
وكيمان الناس تحت الشديرات المفرقه فوق القيف
السواقين والمساعديه وشرطة رفاعه واقفه الف احمر
مافى عربية ملاكى تعدى الا بعد مرور حافلات السفر والاسعاف وعربات الحكومه
المنمره نص نمرتها ملان طين
ونسوان السوق البعدن كل يوم لى رزقن بى هناك
تحت نيم الحصاحيصا الوريف الحاضن القيف..
والجار عليه الزمن الاعوج حتى هو طالتو يدالغدر وشنقوه واقف طولو
حتحت صفيقاتو زى دموع محروقة الحشا ..
وتجار اليوميه والفراشين خامين مخاليهم وحازمين عزيمتهم
ومتوكلين على الله .. لا هم يعكر صفوهم ولا شايلين هم عيشة باكر ..
ولو سعيد حظ تصادف ليك سيرة عريس جايبنو يجرتقوه عن القيف
سايق ست الحسن ويقدل زى الامير وسط خالاتو وعماتو
ابشر يا عريس والزغاريت تشق البحر نصين
وبى حنية اهلنا المعهوده يشاركك فرحتك المابعرفك
اعمامنا الكبار كل واحد يجر عصايتو وهاك يا نقزه ومقالده ابشر يا عريس
حتى الفى البنطون بى غادى يتشابا .. وسواق البنطون من فوق يرسل بسيماتو وبشيروا
والفرحه تكبر مرتين والنسوان تتعالى زغاريتن والبنيات يخبتن الدلوكه والشتامه
وتتشتت الفرحه فى الساحة فرحه صباحيه لكل الماره
فتكم بى عافيه
والتحيه ليكم مجرتقه
بجيكم صاده ان شاء الله
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
سوما
يا سلام علي بنطون الجنيد
وود السيد والبويضة والعك
ولما اكون بنطلون الهلالية معطل
ونذهب عبر الجنيد لابوك الشيخ الطيب ود المرين
ونمشي حلقة الذكر
ونسمع مديح علي الهادي
وود العجيل يمدح
خيول ابشام جقلبن شايلات تقيل سافرن
وابوك يا الضوء ايدو بتسو
وقوم بالليل قول كب يا النيل
زمنو قبيل قبطي ومانجل
وعاجني انا وبريدم
القوم العزو مريدم
لك التجلة
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
الأخت اسماء
لك زاكي التحيات
جنس البوكس دا لاقاني في فجات كتيرة في الجزيرة
مرة كنت راكبو من الحصاحيصا جاي المحيريبا
يعني جينا بي محطتكم البي جاي الجنيد والبي جاي قنب
وتاني بتذكر اتشعبطت فيه كتير جداً من العزازي لي طابت المحمود وبي العكس
وكمان مرات كدا - ما عارفن كم أظن بعدد ايام شهور - امتطيناهو من المناقل ولي العزازي وكمان بالعكس
وكتير جدا من الحصاحيصا لي طابت
نعمل شنو شبكة أهل في المناطق الذكرتيها دي
نص في المحيريبا
نص في العزازي
قراية في الهدى
شيوخ وأهل في طابت
اطراف في المناقل والحصاحيصا
وحبوبات لي العيال في تورس
نسابة اهلهم في دلقة
يعني محل ما اقبل القى البوكس بتاعكم دا راجيني
الله عليك يا سوما
والله مرقتيني من زحمة حاجات قفلتني من المنبر دا كتير خلاص
شكراً
ورائحة البصل أخف من تدخين السواق
والشافع قطع شك كتبو ليهو كلوركين - وكينين إذا لزم الأمر
عاجل الامنيات بشفائه
ونتمنى من البوكس ان يصمد امام المنافسة الشرسة التي تخوضها معه ..الهبابات
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: عادل فضل المولى)
|
ابو جهينه يا عطر الاهل المعتق
طلتك براها بالدنيا
الاحساس انت سيدو وموكر فى دواخلك
كتبا تك بتسوقنى لى موطن الحدث يا سيد الابداااااااع
كلامك دائما بدينى دفعه قويه لى الامام
احساسك المرهف مطوقنا كلنا بالمحنه الفى دواخلك
يديك الف عافيه وين ما تقبل
سلامك لود الجنيد وصل وبرسل ليك قدرو مرتين وهو من المعجبين جدا بكتاباتك والله
بقول ليك لك التحايا والاشواق ولكل الحواليك وسلام خاص لاسرتك الكريمه . وشكرا يا ملك
اخى ابو جهينه يكفينا شرف انك زرت وشفت اهلنا الغبش فى شرقنا وغربنا الحنين من الجزيره الوديعه
شكرا اخى ابو جهينه شكرا دعوات طيبين
****
اخى خليل
حبابك
سقتنى معاك لى اهلنا اهل الصوفيه والذكر
والمدائح والزياره والخبر البشاره
بى طيبتهم طاويين المحنه حجاب
وطارحين الحنين فى كل باب
يديك ويديهم الف عافيه وان شاء الله نرجع لى اهلنا طيبين
***
اخى عادل ود عمى فضل المولى
حباب ود القبائل ود العم البفرج الهم
ياخوى حلالنا دى كلها متشابهه فى كل شىء
المحنه الطيبه العفويه البساطه
حتى فى حركتهم ومعيشتهم وعاداتهم وتقاليدهم
طقوس متشابهه جدا
ومواصلاتنا ايها زاتها .. الفرق الوحيد تلقى فوق البوكس
بدل الجنيد .. المحيريبا ولا العزازا ولا الهلاليه وغيرها كتير
اجمل مافى التشابه ده يا عادل يا خوى التواصل بى ارهاق المشواير
لكن الطيبه والمحنه المرسومه فى كل الملامح تزيل اى تعب ومعاناة سفر
والتجىهو قاصده تفقده وتسلم عليه
يطايبك اليوم كلو ويقالدك بى محنه ويحرسك كده لى الصباح
لامن تجى راجع .. يودعك بى محنه زايده وبى جوده وموجوده ما ببخل عليك
يوصلك لى عند البوكسى ويحلف يمين يدفع ليك المشوار
التحايا لهم قدر طيبتهم الساكناهم
ويا ريت اولادنا وبناتنا يتشبعوا بى السماحه الانعدمت الايام دى
شكرا اخى عادل
شكرا محنة وطيبة اهلنا
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
يا سلاااااام يا أسماء
فعلاً مشهد بانورامي جميل وتلقائي يتمنى الما عاشو يعيشو حقيقةً.
جعلتي صباح الجمعة هذي رائع روعة الوصف.
تلك البساطة وتلك الطبيعية وتلك الانبهارات وملعون أبو الغربة القسرية.
نحن نخاف الرحيل ... ونخاف الحنين أكثر.
ولكِ ما تحمل هذه الصورة من ذكريات.
تحياتي
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: إسماعيل التاج)
|
اخى اسماعيل التاج
توج الله كل ايامك وصباحاتك بالمحبه والسعاده والفرح
متل ما توجتنى يابا بكلامك البرد الروح ويشفى الجروح
سعيده للغايه انه بوكسينا الصباحى ده بى فرناغته دى
زاح عنك هم الغربه ولو لقليل
الغربه هدت حيلنا يعلم الله
الله داك من فوق يرد غربتنا جميعا
ونعيش وسط اهلنا بالمحنه والموجود
لمتين نحن نساكك فى لم الريالات والدولارات الما بتتلم
نشيل ونضاير وما بتتحسب ولا بتضاير
فى الاخر تلقى روحك خسران كل شىء
واكبر خساره بعادك عن اهلك وحبانك
شكرا بلا حدود اخى اسماعيل التاج
على الصوره الرائعه لبنطون رفاعه
وكده اكتملت اللوحة
يديك الف عافيه ويجمع شملنا قريب باهلنا
شكرا اخى اسماعيل شكرا محنة***
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: othman mohmmadien)
|
الأخت سوما
ردي دا لأنك ذكرتينى محلتين عندى معاهم ذكريات، مصنع الجنيد ومسقط، الجنيد لأنو عمى كان شغال هناك، مصطفي احمد سليمان وزوجته الله يرحمها (تيتا)، ومسقط زرتها مرتين والغريبة برضو لبنت عمي منال مصطفي.
المهم ياما ركبنا بنطون الجنيد، وبحكم انو الوالد اسماعيل كان شغال في الجنيد والكلام دا قبل ما يلدونى وبعد داك اشتغل في سكر سنار، لكن رجلنا ما انقطعت من الجنيد، وكمان من مسقط وانا زرتها مرتين في 98 وفي 2000 ولي فيها زكريات جميلة.
المهم حنتواصل
وليك الف تحية
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: الصادق اسماعيل)
|
اخى عثمان محمدين
حبابك ات يا الحنين
يعلم الله كان مافيك الصفات السمحة زاتها ما كان خزنت فى ذاكرتك
كل هذا الزمن هذا الموقف الشهم البشبهك وبشبه اهلنا الطيبين وات واحد منهم
اهلنا الغبش اخى عثمان فى كل بقعه من بقاع الوطن الحنين بتشابهو فى نفس الصفات والحمد لله
الكرم .. الشهامه.. طيبة الخاطر.. والمحنة....... وغيرها كتير ..
نحن كشعب سودانى نتميز كثيرا .. كثيرا عن بقية الشعوب باشياء تشبهنا نحن فقط ونعتزبها
تشكر على مرورمك اخى عثمان
ولك الشكر والمحنه اطنان
***
اخى الصا دق حبابك يا ود الاهل
الله يرحم الوالده تيتا ويرحم معاها كل شهيدات ذلك اليوم المشؤوم
الذى راحت ضحيته اكثر من 40 سيدة
الدفن كان جماعى اتذكر ذلك اليوم
سبحان الله ربنا اراد كل الجارات المترافقات ان يدفن فى وقت واحد
وده بقودنا لى محنة اهلنا وسبب الوفاة والحادث كان المرحومات عليهن رحمة الله
فى مشوار عزاء لمواساة احدى صديقاتهن فى فقد احدى قريباتها فى منطقة حنتوب على ما اعتقد
لهن الرحمة جميعا .. وكنت حينها فى اجازه بالجنيد
حقيقى لا اعرف قريبتك المرحومه عليها رحمة الله
لكن التقيت الاخت منال وتعرفت عليها هنا فى مسقط
التحية لك اخى الصادق وشكرا كريمه على مشاركتك لنا هذا البوست الحنين بوجودكم جميعا
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
Quote: ياخوى حلالنا دى كلها متشابهه فى كل شىء
المحنه الطيبه العفويه البساطه
حتى فى حركتهم ومعيشتهم وعاداتهم وتقاليدهم
طقوس متشابهه جدا
ومواصلاتنا ايها زاتها . |
العزيزة : سهام
الموضوع يخاطب شآفيف القلب إن بقي فيه شيء بعد أن تورم من وجع الغربة ، فحسناً فعلت بهذا الترياق الطيب ووالله عندا أرجع لأهلي في الحلاويين أنسى العالم كله وأغوص في تفاصيل هذا العالم المليئ بالدراما والنصوص الحية المتحركة أمامي .
ولي عودة
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: عبدالرحمن الحلاوي)
|
| Quote: كل هذا الزمن هذا الموقف الشهم البشبهك |
عفوا
Soma
كلامك يؤثر الآهات التي تتململ على المراقد
أخطأت بالتاريخ لو كان العام 94 نقول الوضع الإقتصادي كان أحسن ولكن أن يحدث العام 2004 فهو قمة الجسارة
لعلها فرصة أخري أغتنمها لأشيد بذلك الإنسان - الإنسان حينما عبرنا الجسر عبر صفاته وأخلاقه
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: Mohammed Ahmed Saeed)
|
الاهل الطيبين ناس الجروف والطين
الشوق غيمه ومطرتين
وسهله واااااسعه وقمر دورين
قعدة تلمنا وسط اهلنا الطيبين
***
قريبى الحلاوى
حبابك يا ود الاهل
اريت حالك زين
بركه الجيت بى جاى اتفضل وشاركنا قعدتنا البتنفض مننا غبار الغربه ولو لحين... عارف يا الحلااوى يا خوى
عارف انا لما اكون ماشه الاجازه بكون فرحانه اكيد
لكن بشيل هم متين نطلع من المطار وبشيل هم لو الرحلة بتصل متأخره
اكيد اهلنا فى البندر ما بسيبونا نمشى .. رغم انه البيت الكبير فى العاصمه
لكن اليوم البنقعدو فى البندر بكون بى سنة الغربه كلها
متين تصبح الواطه ونركب العربيه ونمرق من جو العاصمه
ما برتاح الا لما اشوف ليك المسيد والتى والتكلة رفاعه واب عشر
خلااااااااص يجيك النسيم هابى من طرف البحر بى ريحة طينو
يا سلام احساس بديع .. تانى الجنيد ما بمرقنى منها الا الشديد القوى
واكره يوم.يوم نجى راجعين نمر بى حلالنا دى زاتها مودعين الديار ...
الحلاوى تغشاك العافيه ان شاء الله وتعشعش عندك
زى ما غشيتنا بى حجا اهلنا الهناك
شكرا الحلاوى شكرا محنة
اخى عثمان محمدين
الزول الرزين
عجبتنى طلتك مرتين
ويا ريت تجينا صادى وتتحكر معانا فى بوكسينا ده
لما نرجع عقاب النهار بنقعد تحت ضل النيمه وبنسقيك جبنه
كلامك انت يا ضى البيوت هو الضوا الساحات وشرح الصدور
يديك العافيه ويسمح دربك ويسهل امرك آمين يا رب العالمين
****
اخونا وقريبنا ود بطن اماتنا
محمد احمد سعيد
وحات الله انت قطع شك ود اعمى لزم
ياخوى انت مادام قطعت البحر عوم اياكا انت من ناس البيت تب والله
عارف اولاد خالى واعمامى وقبيلتنا كلها تقريبا فى ابو فروع
كم وكم مره بحكوا لينا بى طرائفهم وقصصهم ونوادرهم لما يسمعوا حفلة فى ابو فروع ويقوموا نص الليل يربطوا هدومهم فى راسهم عشان يقشروا بيها فى الحفله وسط البنوت ..
ويعوموايصلوا هناك يتموا حفلتهم ويرجعوا عايمين تانى
عندى خالتى ظريفه جدا ..
مره بحكوا لينا فى نوادرهم دى قالت ليهم وحات الله اولادنا زمان كانوا غبيانين غبا شديد
كبروا بى جهلم ..هسه لو قالوا لى اولاد الزمن ده تمشوا بى البنطون لى حفلة ..يقول ليك ما عندكم موضوع
لكن والله ما احلا غبا زمان وبساطة الكبار المنعدمه فى اطفال اليوم
لك التحيه اخى الكريم
ولك تحية خاصة جدا من زولا زيك قطع البحر عوم من الجنيد لى ابو فروع عدة مرات
بقول ليك انت اكيد دفعه .. كدى كده فى البرايفت يا محمد ياخوى ورينا الكلام ده كان سنة كم ؟ لانه خيتك راس الصوت وصلها بالحيل
لووووول ما تقول لى قبل يبنوا بيارة الجنيد ؟؟
لك عاطر التحايا وشكرا اردب محنة
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
| Quote: الحلاوى تغشاك العافيه ان شاء الله وتعشعش عندك |
وأنت كذلك وكل أخوانا الذين مروا على هذا البوست ومن لم تنسح له سانحة بالمرور وجميع أهلنا هناك في الجنيد وود السيد والبويضة والهجليلج وعموم قبائل رفاعة على ضفتي النيل الأزرق ومن جاورهم .، ويدوم التواصل إن شاء الله
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: عبدالرحمن الحلاوي)
|
سوما السكرة
لك التحية يا أبنة السكرين ( سكر الجنيد وسكر حلفا)
تؤمة توجتها السكر منذ ستينات القرن الماضي
لم تنقطع سير الحركة عبر البطانة .
للجنيد معزة ولحلفا العزة .
زهاء الشهر قضيته منتدباً هناك .
كان مقري الأستراحة الرئيسية ، تارة أدخل الحلة وأزور قريبي (محي الدين)
رحمه الله كان في الأدارة بقسم الأرشيف .
كم قطعت الأزرق بالبنطون ، تارة للخرطوم وأخرى لمدني .
يا سلام عليكي ، دوما تشجينا بحلو الذكريات .
ويلا تعالي نفرد بوست لســكــــر حلفـــــــا ، مع الحزن الجميل
لك التحية والمودة
أحمد - الرياض
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
يا اسماء الأمكنة الحسنى
بحميمية الأهل ومعزة الأرض
كنا هناك منذ أذل التكوين
وسنبقى
ما دام فى نبض الأرض حياة
وطالما كان هناك مسام ينز
فى جسد النهر
الجنيد، ود السيد
الهلالية، رفاعة
والصقيعة
حيث توحد تراب الأرض مع أجساد الأجداد
ثم تحول نارا يعرج صوتها صوب بوابات السماء
مع تراتيل السور وضوء الآيات
الشيخ حياتى
الشيخ المبارك
حبل سرى مقدس يربطنا
يصل بيننا والنهر والأرض والسماء
حياكِ الخالق وابقاكِ
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
العزيزة سوما
تحياتي للجنيد الحله والجنيد المصنع ورفاعه وامهم كلهم الحصاحيصا
طبعا انا البنطون ده عندي معاه مشكله كبيرة جدا وهي كنت بخاف منو عديل كده
الوالد الله يديه العافيه كان برسلني اجيب مولاص للبقر من المصنع وكنت لامن انزل بلبوكس فاضي بكون مطمئن لاكن بعد الطلعه من المصنع مشكله العربيه مليانة والنزله للبحر صعبه غايتو كنت بكون سايق وخايف جدا جدا واتخيلو معاي المشوار ده كان اسبوعيا تمشي وتجي شايل براميل المولاص
تحياتي للمنطقه الحلوه كلها
تحياتي لي ناسها الحنان
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: قرشـــو)
|
شاعرتنا الرقيقة سومه
أحباب الشرق الاوفياء
شرق الله البارد
دوما حينما اقرأ اسمك عزيزتى سومه يفيض الحنين ويتدفق نحو الوطن الجميل واعرف اننى موعود بدفق مشاعر ليس لها وجود فى الغربة بل هى تحنان احبابنا هنالك الذين ما زالوا على الفطرة ولم تغيرهم ردهات الغربة ومغايسها وما زالوا كما هم كما النيل وكما الاشجار الباسقة وكما النسائم العليلة فى الامسيات الحانية ...
رحلة طرزها الأحباب بكل روعة وكل ابداع حملت كل الاصالة وازدهت بأجمل ما كان وليته كائن حتى يومنا فقد طال الغياب وزاد الشوق والحنين ...
كما الاخ صبرى الشريف عاد بى الاخوان الى الشرق حيث يبدأ من بنطون حنتوب ( طبعا ده قبل الكبرى وقد يستغربه البعض ) وهنالك حيث يزدحم ويختلط الكل بالكل فتجدى العربات والحيوانات والاحمال والبشر من رجال ونساء وصغار وكبار ومن عجب اننا ما كنا نعرف الجندرة فكل منا ياخذ مكانه ومعروف ان الكنب للنساء والباحة للرجال والحيوانات والعربات والعفش وهنالك كما فى البكس تجدى أكثر فى البنطون وهذا يطول شرحه ولكن تحلو ذكراه فما اجمله وهو يتهادى يمخر عباب النيل ومن اليمين واليسار الحدائق والجنائن الخضراء الباسقة أشجارها ...
ياااااااااااااااااه يا سومه
الله يديكم العافية يا اهل شرق الله البارد ....
واقعدوا عافية ...
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: قرشـــو)
|
اخوى الحلاوى حبابك ديمه
تسلم يا دخرى المحنه
مكانك محفوظ تعال فى اى وقت
حباااابك الف
****
ولياب المحنه والشوق لى اهلنا
يا حليلك يا ود الشرق
والبرق الببق
والرعد البطق
والسيل الدفق
ناس المحنه و الطبع الولف
والريد الجرف
عارف يا ولياب
اختك ادروبه بعيشتها مع اهلك الحنان
يوهطوا الجبنه وسطهم بى بخورا ويدندنو نغمهم الحنين
والغيم كااابى كاسى الديار .. ولون الخدااار
القريه .. الترعه .. ريحة القصب غبار المصنع والحكومه
معانده الاهالى فى الظلط .. والوحل فى زمن الخريف
آآه يا ولياب رجعتنى لى النكهه الهناك
يا ريت نفتح بوست عن سكر حلفا وناسها الحلوين وعسل
رغم الوجع الجوانى والذكريات البترجعنى لى فراق الغالى
لكن بجتر الحنين القبيل وبسعد مع الاهل الطيبين
ولياب شكرا معزة
****
محمد احمد ود عمى سعيد
مش قلت ليك قرابه شديده..
والله البوكسى الحنين ده لاقانى بي الاهل والحبان
بتخيل نفسى لاقيتك فى قيفة البحر يا محمد والمطايبه دى حقيقى
ما بالكى بورد وعبر الاثير .. لكن الله غالب
يعلم الله الاحساس واصل وفايت بى هناك
عارف لو صبرت شويه كنت جبت ليك الاسماء الذكرتها دى كلها
عمى صالح الله يدى العافيه رغم الطول الشديد والغربة العجيبه لكن الحى مصيرو يلاقى
والشباب الذكرتهم اولاد عمنا لزم .. قلت لى ضيعتك ؟ لووووووول
هسه عليك الله نهاية السبعيانات قريبه ؟ فرقتها من البياره كم؟ لووول
الله يديكم العافيه والله..
اما ناس طارق وابراهيم اولاد عمنا حسن البدوى الجنيد يديهم العافيه ان شاء الله
سعدت جدا والله بمعرفتك وصاحبك فعلا طلع دفعه ..
تحياتى عبرك للاهل ولكل المعاك
ولك تحياتنا ..
شكرا جروف ...
****
الاحبه الغاليين بجيكم صاده تانى ان شاء الله
ونتواصل بالمحنة والشوق الدافر
| |
|
|
|
|
|
|
|
|
 Re: الجنيد الحلة ** البنطون ** وبالعكس** (Re: soma)
|
سوما العزيزة تحياتي واحتراماتي لك بلا حدود
ياله من وصف يعيدنا لذكريات خلت وأيام مضت ليتها تعود مرة أخرى ما أحلى تلك الربوع وتلك الديار التي ما فتأت أرواحنا تتعلق بها وتتلهف لها بين الفينة والأخرى برغم عدم طول الزمن ولكن هي الغربة نارٌ مشتعلة لا تنطفي إلا بالإياب لأرض الوطن واستنشاق هبوبه ونسائمه وعبيره الفواح بهذا الوصف السرمدي البديع وهذا الخيال الواسع وهذا التألق المتميز جعلني أعيش تلك اللحظات خطوة خطوة وأنا أنظر أمامي لشاشة الكمبيوتر وكأني أنظر للبحر والبنطون وتلك الوجوه المغبرة بتراب البحر والجروف والمياه والخرير ورائحة البوقاص من المصنع عبرت بهذا البنطون مرات ومرات ونترك عرباتنا جانباً في الصف حتى يحن موعد الدخول ونصطف طويلاً ونذهب ونحن صغار لشراء فول وتسالي الحاجات وننزل رويداً رويداً للبحر وكلنا خوف وحذر ونظرات الأمهات والآباء تراقبنا من على البعد وهي تنظر إلينا وكلها خوفٌ وتوجس مما قد يعترينا عندما نصل إلى المياه ولكن نغفل عائدين من حيث أتينا سراعاً يلاه من مكان حفر في الذاكرة لا يمكن بسهولة ان ينسى أو ينمحي من الذاكرة برغم من اتساع الزمن .
ولن ننسي أيضا رائحة الجروف وقصب السكر ونحن ركوباً للحمير نجلب الروبة وهي  ما تبقي من القصب بعد قطعه) ونعبر الكبري بتاع الترعة بين رفاعة والجنيد والعسكر واقفون يقولون ماذا تحملون فنقول لهم روبة فقط ونحن في تلك اللحظات قلوبنا ترتعد منهم ومن نظراتهم ونحن نخبي القصب في وسط الروبة وكل هذا الرحلة تبدأ من آذان الفجر نتجمع نحن صبية للذهاب للجنيد لجلب الروبة ولا نعود لبيوتنا إلا عند الساعة العاشرة صباحاً وفي تلك الأيام البرد لا مثيل له ويزداد قساوة بفعل الترع والمياه الجارية والحواشات المخضرة ياسلام علي ذلك الزمن الجميل ليته يعود ليته يعود برغم الشقاوة التي عشناها ولكنها لحظات جميلة وخالدة في الذاكرة .
وبهذه المناسبة أدعوكي وجميع زوار هذا البوست من أبناء الجزيرة والشرق لزيارة موقع أبناء رفاعة بالشرقية وهو موقع مميز وشامل وليس حصرياً على أبناء الشرقية بل هم الذين لهم الفضل في إنشاء هذا الموقع .
www.rufaaeast.com/board
*تخريمة وكده *
كتب الأخ عثمان محمدين يسأل عن قرية (ود رحوم) هي قرية تقع في شرق الجزيرة بالقرب من رفاعة وهي على ضفاف النيل الأزرق وهذه القرية أنصارية عن بكرة أبيها حتى هذه اللحظة لا يحلفون إلا بقولهم ورب المهدي لا يمارسون أي شيء نهاهم عنه الأمام محمد أحمد المهدي وأقرب مثال على سف الصعوط محرم عندهم، وغيرها وغيرها وفي كل زيارات السيد/ الصادق لا ينزل إلا في ود رحوم حتى ولو كانت له ليلة سياسية في رفاعة فإنه ينزل عند هؤلاء القوم الكرام لهم التحية والتجلة والاحترام .
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: ebrahim_ali)
|
ابو ذر الغزير
غذير المعانى وريف الكلام
كنت متأكده يا المطر انك ما بعيد
وكنت واثقه تماما انك قريب جدا
واحساسى ما خيبنى تب
لقيتك مننا ووسطنا وامكن اعمق من جذور الاهل
كل المناطق الذكرتها لى فيها ذكريات بعمق النيل
بالزات الصقيعه الشيخ حياتى
ديل اهلى وجدودى واهل الوالد عليه رحمة الله
الجنيد مسقط الراس والساس اهلى البضربوا نحاس
ود السيد القرابه والنسابه والبيوت الفاتحا بابا
الهلاليه الروابط الازليه بين الاهل و الاصدقاء
رفاعه الجاره فى كل حاره زى ضل الضحى للشفع الصغار
ولا الميس .. يلعبوا ويجوا راجعين ليه بى لهفه وحنية
يا سلام عليك يا المطر دائما كريم نازل غزير معطر الساحات ومخدر
كل المساحات وشارى فرحك نيلين وراوى كل البكانات ومغرق المطامير
ابو ذر الحنين شكرا خريف شرق
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
سوما ما دام نحن في حضرة شرق الله البارد
فهناك من يقول
اذا اغترت حسناء بجمالها فعليها الذهاب لبنطون رفاعة لتري الجمال في بنات رفاعة
وعند ذلك امامها حلان
اما ان تقتنع بان حواء رفاعة والدة وترجع لاهلها
واما ان تنحر في النيل
ويا حليلك يا البطانة
قبال اسوولك جزارة وسوق
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: منصوري)
|
اخى العزيز عباس
ود البكرمو الناس
ود اهلنا الطيبين ناس اتفضل تعال
نقوم نحن .....
اسياد المحنه والكرم الدافق
يجودو بى الموجود بى طيبة خاطر
الوالد الله يديه الف صحه ان شاء الله
ويخليه ليكم ويخليكم ليه
لكن ضحكتنى قلت بتخاف فى الرجعه بالبوكس وهو معسم ضهره بى شيل المولاص
انت عارف نحن لما نكون معديين ماشين ولا راجعين للحله ..
بخاف اكون جوه العربيه وهى فى البنطون ..
لازم انزل واقيف جمب الحديد الكبير داك
يا روح ما بعدك روح لووول
يخيل لى العربيه دى بتقوم جاريه تقع فى المويه
شكرا اخى عباس على المداخلة الظريفه وآسفه على تأخير الرد
شكرا ربطة قصب محروق ..(( المحروق طبعا احلا من العادى ) لوول
****
قرشوووووو الحنين
الشوق ضل الضحى الكابى فى قفا البيوت
والناس بتجوط فى المعيشه صباحيه
واللمه قدام الدكان الواحد وسط الفريق
والحبان بى جهالم معبيين الطريق
لا زعل لا من ضيق
نفسهم الطيب يفك الريق
يديك الف عافيه والله يا عمدتنا المخضرم
سعيده بى طلاتك وسعيده بى مداخلااتك
وكلامك المن الجوف
ونداوة الحروف
البتدى البوست دفره لى قدام
الاحساس بالاهل الطيبين حواليك شىء رائع جدا
وجودك دائما اخى قرشو ليه نكهه خاصة
زى نكهة كلامك المميز وبشبهك انت بس قرشو
يديك العافيه يا ود القبائل
شاحده الله السعاده تبقالك رفيق طول الطريق
والعافيه تبقالك هدم يا ود العم
اخى قرشو شكرا دعوات حبوبه
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
Quote: بالزات الصقيعه الشيخ حياتى
ديل اهلى وجدودى واهل الوالد عليه رحمة الله
|
كان كدى يا اسماء
نحن أهل تب، لحم ودم وروح
تعرفى الشيخ حياتى بقرب لى كيف
إسمه الشيخ حياتى حمد العربى
وأنا أمى إسمها
صفية أحمد محمد حمد العربى
الشيخ حياتى وأخوهو الشيخ المبارك، أمهم بنت الشيخ محمد ود بدر فى أم ضبان
وجدى أنا أمه بنت الشيخ ود أرباب
لو جيتى بى شارع مدنى الخرطوم وشفتى البشاقرة غرب
فى المقابر بتاعتها فى قبة واحدة كبيرة
دى قبة الشيخ ود ارباب، والشيخ ود أرباب أمه بت الخليفة بركات خليفة الشيخ إدريس فى العيلفون
وخالى عليه الرحمة
إسمه الشيخ المبارك
أسموهو على الشيخ المبارك حمد العربى شقيق الشيخ حياتى
وأولاد حمد العربى اصلا من ودراوة وبقية أهلهم برضو فى الهلالية
وكان بحتنا شويه لى جوه، أكيد تلقانا أهل يا سوما ومن بيت واحد
وأعتذر عن سياحة الأنساب الكتيرة دى
وتحياتى ليك والود الكتير
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: أبوذر بابكر)
|
رائعة يابت الجنيد
صدقي نفس هذه الاشياء هي التي تكون في كل المناطق المشابه فاتذكر اهلي بمنطقة المتمة غرب شندي وهم على نفس الفئات طلبه اساتذة موظفين زائرين مستشفى مسافرين الخرطوم .........
كتاباتك رائعة تخلي الواحد يعيد الذكريات الحلوه وانا بين اهلينا في منطقة المتمة ومنطقة شندي ومزيدا من الابداع
ابومصطفى
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
حوار يومي:
- الأول: الليلة البحر دا مالو طامح كدي ... قالوا في مطر تقيل علي جهة الصعيــد ...
- الثاني: يازول والله السنة دي باطلة تب ... الله يجيب المطر ...
ملامح لشكلة:
الأول: يا زول زح غنمايتك دي ... إت قايل روحك في زريبة بهايم يا خي الجنبك ديل بشر ...
الثاني: أوديها وين يعني ... كدي زح إت أضاير شوية يا خي كلها دقيقة واحدة وبنصل ...
العزيزة سوما ...
أيقظتي فينا الشجون والذكريات .. لكي التحيــة .
تخريمة:
أنا أتخيل إنك يوم الجمعة قمتي الصباح، وكان الجو في مسقط اليوم داك حاجة حلوة ذكرك البلد . عشان كده قمت تحت هذا التأثير وكتبتي لينا البوست الجميل دا. لك خالص تحياتي ومودتي.
الحلاوي
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: ALHALAWI)
|
الحلاوي الغالي الديمة في بالي
سلام بالتلاتة بريدك
بسم الله ما شاء الله يا ربي أحفظها من كل بلاء ومن عين كل حسود وأكرم بها أهلها
| Quote: الصور دي جبتها من وين .. دي موردة الحصاحيصا ولا شنو ؟؟؟؟ |
لا دا مريخ الفاشر
لك خالص معزتي يا حلاوي
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: عبد المنعم عمر عثمان)
|
اخى العزيز جدا ابراهيم على
يعلا شأنك ويعظم مكانك يا كريم الخصال
ذكريات الطفوله جميلة وخاصة لما تكون فى بوادينا وقرانا المشبعه محنة
ووسط اهلنا والرفقة البريئه .. ملامح اولاد الخلوة الصغار ..
وهمهم كلو يحفظو الجزء .. ونفوسهم انقى من الحليب
طموحاتهم .. رضا شيخهم عنهم .. ووالديهم ..
وفرحة فى قليبهم الدافىء بالمحبة..
اطفال زمان تربيتهم ساهلة
مطالبهم محصوره من عيد لعيد ..وقدر المستطاع
وممكن يكون فى تنازل منهم فى عيد الاضحى
لانهم عارفنو عيد شراية خروف وميزانيه تانيه
لكن تعال شوف جيل اليوم .. الله يسهل بس
سردك ووصفك للحالة الزمان ومشية البنطون
وخوف الاهل عليكم .. رجعنى ايام بنجى من القضارف وجاريين مسابقين العربيه نعدى
عشان نصل الجنيد .. والاهل ينادوا بشفقه وقلق بالراحه حاسبوا عاينوا قدامكم
وياما خمينا من تسالى وفول حاجات البنطون.. وما احلاها موية البحر بطعم طينها
لا مرض لا هم لا موية معبية فى زجاج .. حتى المويه بقوا يعبوها ..قادر الله
شكرا اخى ابراهيم من الاعماق على موقع ابناء رفاعه .. كان اجمل هديه فى زيارتك لينا
وطلتك الفرايحيه
شكرا اخى ابراهيم شكرا فرحة اهل
****
خليل الزول الجميل
والله عاد يا ود الحنان ما خليت شىء تب لبنيات البطانه ورفاعه
معلومه جديده اعرفا انه بنوتنا بضربوا بيهن المثل فى السماحه
حواء وااااااالده وبنتونا كلهن سمحات يعلم الله ..
يديك العافيه ويسمح ايامك
وبهدى ليك ومن خلالك قصيدة جديات
كتبتها عن بنوتنا الواردات من البحر وبتجمعن ويتونسن تحت القمر
وعن الطبيعه الجميله والطبع السمح فى كل ضواحينا ونقاوة اصلنا وفصلنا
شكرا خليل شكرا جدول محنة
جديات
ناس ليلى جن..
شايلات فرح عمرى الموشح بالزمن..
يتراقصن… يتمايلن ..
مرات يمين ..مرات شمال يتفدعن..
يتسابقن بين المرافىء والحقول.
لا توب وقع من الكتيف لا اتعترن…
جريهن المثل الغزال ..
نافرات ولى كوم الضفائر يجدعن ..
ضحكاتن الرنانه زى وتر الصباح ..
يمسح جراحات المدائن .. والمحن ..
همساتن الحان الغروب .
صافات وزى طير البرارى يدندنن ..
مرات يفرن زى فراش ..
مرات يجن يتجمعن ..
يتماسكن ..يتلاصقن ..
نضمة عقد لولى ومضفر بالحنن …
لمن خلاص تعبن..
وبى نفسا طويل اتنهدن ..
قعدن تحت فى ضل شديره ..
ولى القديمات مددن ..
اتنحنحن ..اتاوهن ..
ضربن كفوف فوق كفوف .
ما صفقن …
لمن طريفات توبن المجدوع ..
وليه اتوسدن …
اتضاحكن .. واتغامزن …
والبسمه تضوى والخدود يتلالان ..
حكن الحكاوى .. اتمازحن …
والقمره صافيه يقصقصن ..
فى جلستن ما اتزحزحن ..
لى بعد العشا اتونسن ..
ديل هن بنيات البلد ..
اللى الشباب كيف بهدلن …
رضعن تميرات النخيل …
من الارض عبن ملن …
صانن بداوة الحله ..
ما يوم بالحضاره اتشوهن …
ولا يوم بالحضاره اتشوهن
**
اسماء الجنيد
وبرضز يا خليل لو داير من جنس النضمى ده
بتلقاه فى موقعى المتواضع .. هديه ليك ولكل زوار البوكس
اقصد البوست لوول .. لومكم على الا تشوفوا روحكم محكرين فى طرف بحر ولا تحت ضل نيمه
وكل يوم شاربين الشاى فى ضل الضحى
www.soomat.com
****
منصورى ود نخل الشمال
حبابك يا صوت المطر
بهديك سلام اهلك القبيل وقعدة عصر جمب النخيل
قلت لى امشى ابل شوقى فى الجنيد ؟ ..
والله الا اقعد وسطهم واتحكر واجدع جوازى فى اقرب ترعه
حتى الترعه زاتها بطنها بتطم من جنس الورق التخين ده
يديك العافيه ويسهل كل امورك
يا شيخ منصورى ما تنسانا من صالح الدعاء
تحياتى للعقاب لهم التحيه شوق ومحبة
شكرا منصورى شكرا لحنك الجميل
****
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
ياااااااااااا ود امى ابو ذر الحنين
يعلم الله حومتنى معاك جنس حوامه الليله ..
الصقيعه شارع شارع ولفه لفه وزقاق زقاق
لامن وصلنا البنية..
ولقينا الحيران والزوار واقفين صفوف وريحة البخور تقول يا ليل
والكرم مشتت فى الشوارع وعربات الحلال الفوق والقدام والضبايح
فى السهلة .. وبراميل الموية ملانات تلج مويه بااااارده
وطاااعمه بى طعم البحر ملانات اهلنا وطيبتهم البترد الروح ..صغار وكبار
ومشيت معاك لى البشاقرة و زرنا القبة ..
قبة جدك الارباب .. الديمه فاتح الباب
بى كل شهامة وترحاب ..
اما اهلنا ناس ام ضوا بان الناس الحنان
ديل عندنا معاهم وود وولف ومحبة كاسره ودافره
ما بحوشا اى ترس مهما كان
المطر الحنين ايانا اهل ولا دايره ليها حسبه
وسعدت جدا بسياحة الانساب والاقارب الذكرتها للغاية
تسلم يابا وجد ليكى يا سومه البقى عندك اخو متل المطر
شكرا المطر شكرا محنة
تخريمة
ويا البدرى الحنين ود امى عشة
شفت جدودنا الشيوخ .. ناس القبب يلحقوك وينجدوك
تعال زور فينا تانى انا والمطر
انا غايتو حواره من الليلة . .لوول البدرى اوعك تجينى بلا بياض ولا بشارة
****
اخوى العزيز ابو مصطفى حبابك
غيبة طويله يا اخو البنات
كيفنك وكيف ولدنا مصطفى وامه وكل الاهل
سلامنا ليهم بالكتير ما شوية
صدقت والله كل حلال اهلنا فى كل انحاء السودان
مشبعه بنفس الطيبه والمحنة .. ونفس العادات وطبيعة الحياة الساهلة
وانتو كمان ناس المتمه محنتكم معتقه و مأصلة للجذور
شكرا اخى الكريم على كلامك الجميل .. مفخره بالنسبه لى والله
يديك الف عافيه ويديم عليكم نعمته
تحياتى عبرك لمصطفى وامه وكل الاهل
شكرا ابو مصطفى شكرا ابتسامة وضحكة رنانه من مصطفى الصغير
****
الحلاوى ابو الاموره الحليونه
ما شاء الله ودقر العين ... وعينا باااااارده
ربنا يحفظا ويرعاها ويخليها ليكم
والله يا الحلاوى يا خوى قريت افكارى مظبوط
قمت اليوم داك والشوق اصلو معشعش
جاتنى لوحة اهلى الطيبين
وسرحت معاها لقيت روحى فى قيفة البحر
وبعاين بى هناك لى البنطون
والناس مالية السقالة تخاف تقول كلهم يقعوا
ونسوان ما شاء الله يدافسن ويكابسن فى السقاله
ما زينا نحن الواحده فينا ترجف لى ضفرها
تحياتى الحلاوى وشكرى للمرور الجميل
وتحايا خاصة للاموره العسل ربنا يحفظا
ولكل الاهل
شكرا موية بحر
**
البدرى بجيك صاده بى مزااااااااااج
زى مزاج صورك دى
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
الشاعرة الرقيقة
سوما
معك دائما نطوف مع جمال الحرف
والتعبير الراقى
شكرا لك حرف كتبتيه...فكانما نعايش
هذه الاحداث اليومية لاهلنا الطيبين
والتحية عبر هذا البوست
لكل سكان الجنيد ..والسلام يوصل
للاهل والاحباب بالحصاحيصا
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: Deng)
|
البدرى الحنين حبابك يابا
كيفنك واريتك طيب
عاش من شافك يا الضى
عليك الله الصور دى جبتها من وين ؟
كان ماك قاعد فى الخلاء .. وكان ماك مطول من البلد
لكن بالغت فى (( ب ح )) دى .. يعنى شنو ؟ بباح ولا شنو ؟ لووول
والخروف يعلم الله ذكرنى الكرامات فى حوشنا الكبير
يا حليل ناس السودان ولمة الضيفان
بالجد الصوره الفيها الركشات دى وين ؟ اتغالطنا فيها انا وصاحبك الجنيد
انا قلت ليه السوق الشعبى الجديد فى الحصاحيصا المجدوع فى آخر الدنيا داك
هو قال لى سوق الحصاحيصا جوه ..
طلتك سمحه ديمه يا البديرى يعلم الله
اها ما عندك جية قريب .. والله الايام دى مهرجان المرأة فى النادى برامج حافلة
والختام مفاجأة رائعه ما تخليها تفوتك .. حصل وغالبا تكون فى 28 و 29 مارس
باذن الله
البدرى السمح شكرا كليقة قصب هدية منى لي خروفك ده
***
اخونا الكريم عبد المنعم عمر عثمان
حباب طلتك ولو كانت متاوقه بالحيطه
برضو شرفتنا وسرت بالنا يعلم الله
المره الجايه ابقى داخل واتحكر وسط خالاتك وعماتك ديل
واشرب ليك فنجان جبنه واخد ليك خشم خشمين مع اخوك البدرى ده
شكرا اخى عبد المنعم .. شكرا لمة اهل فى ديارنا العامره بيهم
***
شاعرنا الشفيف عبد المنعم سيد احمد
حباب ود الحصاحيصا والناس العزاز
طلتك قصيده من نضميك البفرح القلوب
وببرد جوفنا من هجير الغربه المره
التحيه ليك انت شاعرنا النبيل ابن النيل
والتحيه عبرك لاهلنا فى شرقنا وغربنا الوفى
وتحية خاصة للاخت المدام وكل افراد الاسره الكرام
شكرا اخى عبد المنعم .. شكرا بحر
****
اخى العزيز جد دينق
غيبه طويله ومشتاقين
وين الحى بيك .. ياخى تعال فاقدين جلساتك كتير والله
تسلم على الطله والتحيه الراقيه يا ذوووق
تسلم كتير وشكراااا قيف
| |
|
|
|
|
|
|
|
|
|
Re: الجنيد الحلة ** البنطون ** وبالعكس** (Re: soma)
|
سلام من الجوف
بفرحة عامره وشوق ماطر لكم جميعا
ارفع هذا البوست تحية للاخت الحبيبه المبدعه الاذاعيه المتألقه
آمنهسليمان بشاره والفنانه الرقيقة سمية حسن والفرح الدافق تماضر شيخ الدين
وهن فى ضيافتنا هذه الايام
لكم جميعا الاحترام ولهن كل ا لمحبة والمحنة
| |
|
|
|
|
|
|
| |
ثابت محمد
حسن الجيلى سعيد
ابو جهينة
khaleel
عادل فضل المولى
إسماعيل التاج
othman mohmmadien
الصادق اسماعيل
عبدالرحمن الحلاوي
Mohammed Ahmed Saeed
ولياب
أبوذر بابكر
abas
قرشـــو
ebrahim_ali
منصوري
keiga2000
بدرالدين شنا
عبد المنعم سيد احمد
Deng
فيس بوك
تويتر
انستقرام
يوتيوب
بنتيريست