نحكى ليكم الطرفه دى .. لى كم يوم بضحك فيها براى برضو نعرف منو الفى اخواتنا عندها الهواية دى .. فى اعتقادى ما عند اى زوله غير سودانيه ..ولا شنو يا بنات امى ؟ اخوانا برضو ممكن يشاركونا النقاش والرأى
*** عندى صاحبتا لى جنها تلملم الملايات كل ما تلقى ليها قرش تجرى تشترى ملايات ولو صادفنا واشترينا سوا .. تقول لى اوعك تفرشيهم يا سوما خليهم للسودان .. وانا بينى وبينكم جنى وجن الدسديس ..ولا بعرفو زاتى ممكن اجى من بره افر الحاجه البسا ولا افرشا فى البيت.. هو الواحد ضامن روحو ؟؟ .. الزمن اللفحى ده ..والعمر البجرى قلت ليها ياختى وقت الله لماك فى السمح استمتعى بيه هنا وفى البلد الانتى موجوده فيها .. كان هنا كان فى السودان العمر زاتو ما معروف .. تحلف ستين يمين لا .. بس الا السودان عشان القشره وسط الاهل والحبان.. اها ياخوانى دواليبا اتملت وبقت ما بتشيل تب .. وبرضو موااااااصله الشرايه .. طبعا كلها ملايات جابت ليها شنطة حديد كبيره وملتها وستفتها وطبعا عارفين البيوت الصغيره والشقق الما بتديك فرصه تضاير اى شىء .. ختتا تحت السرير فى غرفة اولادها لوووووووووووول مبالغه طبعا وكل ما تشترى حاجة جديده تجر الشنطه تملا ها وترجعها تانى تحت السرير.. تعيس الحظ ولدها بقرأ فى الاعدادى.. الشنطه دى منغصه عليه نومتو وحياته كلها كل ما يتقلب تكركب تحت ضهره زهج جداا ..جاها ناداها يا امى عليك الله لمتين انتى بتتعذبى وتعذبينا معاك؟؟ الشنطه دى لما ترجعى السودان بعد 60 سنه الملايات الجواها دى كلها بتفرشيهن بالمقلوب لانه بتكونى طششتى وعمشتى ومابتفرزى الخدرا من الحمرا .. ممكن تطليعهن من تحت سريرى و تخلينا نشبع نوم . لووول لكم التحايا والامنيات بى لمة وسط اهلنا وفرشة ملايات زاهيه فى حوش مقشوش ومرشوش اها بامانه منو الفيكن بتلملم الملايات للسودان اسماء الجنيد مسقط
dear soma unfortunately this is a classical Sudanese habit it is not only in bed sheets but in other household goods like kitchen utensils and dinner plates those who are really addicted to this habit will realize one day the good old Sudan is no longer there so better enjoy living where ever you are before it is too late
هوزيــــــــــــى البشوشه الجميله ياااااا صباح رائع بى طلتك البهيه يا بنيه من وسط الاهل .. نورك ضاوى فى كل محل ما شاء الله وعينى باااااارده الشوق ليك حجا الامات يا غاليه .. تقولى شنو مشغوليات ..لكن ما فيها شراية ملايات لوول والله ديمه فى البال ..لكن الله غالب يمه شكرا على طلتك يا حنينه والحمد لله البقيتى مامن نوع البلملم من طرف لكى كل الحب وشكرا ندى الحقول ..
*** دكتور مصطفى الظاهر على واحمد الله انه خريفى مبكر ونديان بى طلتك اشرقت الانوار وطل الغيم صباحيى دمدم الكون فرح .. ورقصت كل الازاهر حلقت فراشاتنا وصفق النيل طرب ياااااا فرحنا بيك خليك قريب شكرا للمداخله .. وفعلا كلامك ميه الميه .. لملمة من طرف وعدة المطبخ دى خليها ساى لكن زى ما قلت ليك وقالت اختنا هوزى الجميله الحمد لله ما من هواة الطبع العجيب ده .. انا غايتو العندى بستمتع بيه وين ما اكون والحمد لله .. شكرا من تانى .. شكرا لا تحدها حدود شكرا اخى الدكتور ممتده بطول بحرنا ومخضره بخضرة جروفه
06-20-2006, 00:13 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
الشاعرة سوما طبعاًهوس الملايات والعدة هو هاجس الكثير من النسوان وقروشنا كلها رايحة ملايات مرة طبعاً ست النفر اتوفت حبوبتها وهي بتريد الحبوبة دي أكتر مني والله الحبوبة مدة صلاحيتها منتهية قبل 40 سنة والنسوان الولدوهن معاها كلهن مشن المقابر الا زولتنا دي ولمن ست النفر تقول ليك حبوبتي تقول الله يوريني ليها وشها كله مكرفس والله لمن تمرض ونحاول نشيل منها دم البيت كله يكوس للعروق بتاعت جسمها ومانلقاها المهم أخيراً ماتت والخبر كان مع ابوحراز اها كيف أكلم ست النفر أكيد حاتبكي وتكورك والجيران يتلموا فينا وكانت مغرمة بالملايات والعدة اها قلنا نستفيد من الفرصة دي وكنا على سفر قلت ليها رايك شنو 00 تشتري الملايات وللا تبكي على حبوبتك ؟؟ هي 00 حبوبتي ماتت ؟؟ قلت ليها اتلحست ليها يومين قالت لي : خلاص يلاك قبل السوق مايقفل نشتري الملايات ونجي نبكي قال نبكي قال
عارفة يا سوما ، السودانيات عندهم مرض ( لمليم) الحاجات وتكديسها لمتين ما معروف يعني ما بيفترضوا انهم طالما قعدين في بلد يستمتعوا بالحاجات البيشتروها واللي مصيرها بيكون شنطة حديد كبيرة زي ما قلتي يا في البلكونة يا في المخزن وكلو يقولوا ليك لما نمشي السودان!!! اها فرضا لا قدر الله ما مشوا السودان ، يعني الفيران تستمتع بالحاجات دي؟؟
وحاحكي ليك موقف حصل لي في الشارقة ، الوالدة كلفتني اشتري ليها ملايات ، وانا وحياتك لا بعرف ولا بفهم النوع الاصلي من الما اصلي ، اول ما بديت اشتري استلمتني ليك حجة كبيرة لقيتها واقفة جنبي في السوق جاية تشتري ملايات عشان مسافرة السودان ، ويلا هاك يا بتي عليك الله عندي في الاوضة الفلانية 3 سراير ، شوفي لي لون ظريف ، وعندي بتي عندها في برندتها 4 سراير برضو شوفي معاي شكل ظريف تاني ..و..,واختي منو ديك بيتها فيهو كم سرير كدا..و.. وحياة الله يا سوما بعد ساعتين لقيت اني دخلت في برنامج الحجة دي وفرشت معاها بيتها وبيوت بناتها واخواتها .. ولما جيت اشتري لامي عيوني كانت زغللت وراسي لف ..وبقيت اشوف الملايات كلها عشرة عشرة.. واقرب تكسي وقفته لانه جاتني تخمة ملايات
لكن صراحة السودانيات مبااااااااااالغة في شراء الملايات تقولي داخلين مسابقة
لكي ودي واشواقي
06-20-2006, 02:08 AM
قرشـــو قرشـــو
تاريخ التسجيل: 02-05-2002
مجموع المشاركات: 11385
حكايات الملايات يا ستى مسلسل مكسيكى ولا ينتهى ابدا
انا بصراحة ما عارف ليه الواحدة بتشترى اجمل الاشياء ولا تستخدمها كما ذكر الاحباب اعلاه من ملايات وعدة ؟؟؟ ربما حب التملك أو حب طمأنه النفس لعاديات الايام لست ادرى ...
ولكن الرجال عموما اصبحوا يكرهوا حاجتين العدة والملايات والمصيبة لو الواحد راضية وزاهدة عن الحاجات دى يجوها الباقيات ويخلوها تقلب وتبقى زيهن دى مصيبة شنو دى ؟؟؟
كيفنك وكيف ست النفر .. سلامى بلا حدود يا ركازة الجدود الله يرحما الحبوبه ويجازي محنك بالخير
عارف الحبوبه الله يرحما .. اهم شىء فى الفراش بكون الملايات عشان كده ست النفر فضلت الملايات على البكيه .. لانه البكى ملحوق ..الملايات البجيبن ليها منو ؟ انت ؟ اكيد لا ..لووول المصيبه فى اللملمة دى كلها مافى استمتاع بيها فى وقتها انا متأكده 90 % من اخواتنا وخالاتنا ديل بكونن ما عارفات الكميه العندهن ولا حتى الالوان .. وممكن يحصل تكرار عااااادى جدا .. والاغرب من كده حكاية الطقوم والعدة الراقيه .. بشتروها بى غالى القروش لكن لو الواحده جاها ضيف هنا ايا كان ما بفتحوا ليه طقم واحد ولو بالغلط يقول ليك لى السودان .. يعنى الضيف ده عارف عندك حاجات راقيه بس داساها للسودان ؟ طيب ضيف هنا ولا هناك مش واحد ؟الفرق شنو ؟؟ جد الحاجه دى انا محيرانى جدااا فى بنات جنسى .. طبعا ما كلهن .. البعض ..لكن للامانه الغالبيه .. *** مايا الحبيبه .. والله مشتاقين اطنان لا تقدر بى اى اوزان وينك يا الغبتى وطولتى .. ان شاء الله امورك كلها تمام .. وتحياتى للاهل عبرك اتمنى الاقيك فى السودان والله .. بأذن الله ناويه شهر 7 .. الله يسهل بس ..دعواتك معانا اتخيلت منظرك وانتى بتبحتى فى الالوان فى سوق الشارقه لوووول والله غايتو الله يهدى الجميع .. شكرا مايا على الطله شكرا مطرزه بحرير ناااااعم ***
حباب قرشو الحنين .. تسال منك العافيه ان شاء الله .. تقول شنو يا خوى والله غيبه كانت ما بالخاطر شوية مشغوليات .. والحمد لله انه فى ناس زيكم بتسأل منه يديك الف عافيه اخوى قرشو كلامك صاح ..انا بعرف رجال بكرهوا السوق والتسوق .. لانه متأكدين انه الواحد فيهم لو زوجته ولا اخته دخلت السوق .. اول شىء بتفكر تتفرج فى الملايات والعده .. ومستحيل تطلع فاضيه الحاجه التانيه حب الحاجات دى عندهن بالفطره .. يعنى الواحده ما محتاجه زول يحنسا او يغير ليها رايها .. لووول.. ربنا يهديى الجميع .. ونتمنى من صاحبات الهوايه دى يحاولن التقليل قدر المستطاع او الاكتفاء بالشىء المحتاجين ليه شكرا احبتى جميعا شكرا بكل الوان الطيف .. مش الوان الملايات لوول
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Mustafa Mahmoud
ابوحراز
قرشـــو
فيس بوك
تويتر
انستقرام
يوتيوب
بنتيريست