دعواتكم لزميلنا المفكر د.الباقر العفيف بالشفاء العاجل
|
|
 *** هموم مهاجر ***
|
سلام يا اهلنا الطيبين ..
الشوق محنه ..
والريد قطوف..
والود خدار...
مهما غلبتنا الظروف ..وبعدتنا المسافات..
وجودكم فى البال والخاطر بتحدى كل الظروف
وبقرب كل المسافات..
التحيه ضفاف رويانه متلكم بالمحبه ..
عذرا للغياب المابالخاطر ..
واليكم هموم مهاجر ..
ربنا يخفف الهموم ..ويرد المظلوم
ويرجعنا للوطن الحنون..
***هموم مهاجر***
قدر الهم الطولو صفوف
وقدر الجوع الضرب الجوف
وقدر الخوف الطالنا سقوف
وقدر الكي البى المخلوف
وفيك يا الضلمه المابنشوف
شحدت المولى الفوقنا بشوف
يزيل الغمه تلالي حروف
تضوي قميره وتجلى سيوف
تشيل الرقبة الطايله كفوف
سندت حيلها على المضيوف
و قلبت آية المعروف
بدل الكرم الفوقنا بطوف
بدل اللبن الزبدو ولوف..
وبدل العيش الطعموشغوف
وبدل الخَدر ضهرو قيوف
وبدل الشتل النخله جروف
جاب الطعمو مرارة..
وما موصوف..
وجاب الربحو خسارة..
وكيف معيو ف
وجاب الشين العندو بشارة..
وكيف مخيوف
وولع منو شراره
تحرق الجوف..
حتى حريرنا الناعم..
بدلو صوف
وشمس صباحنا..
صبحت عميا وما بتشوف
وبدل القمر العاشقو لهوف
طل سمانا كلو خسوف
كلو خسوف ....
سومــــــــا
اسماء الجنيد
مسقط
|
|
 
|
|
|
|
|
|
|
|
Re: *** هموم مهاجر *** (Re: soma)
|
الرائعة بروعة تراب بلدي اسماء الجنيد
لك التجل والتقدير وانتي تتحفينا وتلهمينا .. بمعاني الكلم ذات رونق مضئ بالكمة الجذابة.. مثل ظل الضحى .... نهارات الفريق .... رحيل .... ووووووووويابلد واخيراً هموم مهاجر .. وخلافها من الكتابات النيرة ...أختي أسماء نحن سعيدين بأنك واحدة من الاقلام التي يشار إليها بوطني وأتمنى لك المذيد من التقدم والاذدهار .
أخوك زاهرالدين
بامسيكا
| |
|
|
|
|
|
|
|
|
|
Re: *** هموم مهاجر *** (Re: سجيمان)
|
زهر الدين الزول الحنين
حبابك ومرحبتين
تسلم كتير يا بامسيكا على الطله الحنينه ..
والف شكر وتقدير على كلامك الجميل زى دواخلك ..
***
الاخ الحنين جدا ماجد ..وينك يابا ؟ ووين الحى بيك ..
البركه فى هموم مهاجر الجابت لينا عابر..
تسلم يا ود نخل الشمال وتسلم ايامك ..
ليك سلام خاص من ناس البيت وسلام مربع من ود السنى ومحكر من مؤيد
ماجد شكرا ليك قدر نيتك يا ابيض..
****
عمى الشاب اللطيف ارنستو ..
سلامى واحترامى يا جميل
والله طلتك انت بتشرح القلب وبتنور ضلام غربتنا
رد الله غربتنا جميعا
عمى سلامى شكرا ضفاف رويانه زيك
والود نيلين ..
****
سجيمـــــــــان .. المو خمجــــــــــان
حبابك يا عشا الضيفان
والله انت الرائع
اشتقت لى بوستاتك الظريفه زيك
ربنا يمتعك بالصحة والعافيه ..
وشكرا للطله ..
| |
|
|
|
|
|
|
|
|
|
Re: *** هموم مهاجر *** (Re: soma)
|
Quote:
قدر الهم الطولو صفوف
وقدر الجوع الضرب الجوف
وقدر الخوف الطالنا سقوف
وقدر الكي البى المخلوف
وفيك يا الضلمه المابنشوف
شحدت المولى الفوقنا بشوف
يزيل الغمه تلالي حروف
تضوي قميره وتجلى سيوف
تشيل الرقبة الطايله كفوف
سندت حيلها على المضيوف
و قلبت آية المعروف |
فراشتنا الجميلة : سوما
أشرقت الأنوار
وضحك الزمن الجار
وليلناالدون انوار
جانا وحاضنو نهار ..
ويا مراحب سوما
افقدتنا كتير .. حتى ترعة الجنيد لو سألتيها كانت كلمتك .
حمد لله على السلامة .. وعبرك سلامي الكتير لاهلي الافاضل في الجنيد .
خضر عطا المنان
| |
|
|
|
|
|
|
|
|
|
Re: *** هموم مهاجر *** (Re: soma)
|
سوما المبدعة
طال غيابك جدا
أرجو أن لا تكو غيبتك بسبب شللية هذا البورد
وطريقة شيلني واشيلك
واصبحت الصفحة الاولى دائما ويوميا لـ (أسماء) معينة
ويتسرب كل من هو في مثلك (أسماء) إلى الصفحات الداخلية بسرعة
ليت كل الـ (أسماء) تكون مواضيع شيقة
ولا تكون كل المواضيع عبارة عن (أسماء) وفقط
حضورك البهي يا (أسماء) يسعدنا كثيرا
وياليتك (أسماء) تبق بيننا دائماً
جمال
| |
|
|
|
|
|
|
|
|
|
Re: *** هموم مهاجر *** (Re: soma)
|
سوما ...
كنت مهموم بيك
ومسكون بيك
ومحمومه في وتر شوقك
قصيدة
ابعد الهم بالكتابة
وانصر الفقراء الغلابة
ويظل التواصل عبر طفل المعرفة ورمل الصحراء والغربة
| |
|
|
|
|
|
|
|
|
|
Re: *** هموم مهاجر *** (Re: وحيد)
|
اخوى خضر
سلاااام يا ود القبايل
يعلم الله فرحتنى شوفتك
وسر بالى انك طيب وبى الف عافيه
يا حليلك ويا حليل ترع الجنيد وجروفا..
ترع الجنيد زاتا بتكون مشتاقه لى قعده منك فى طرفا
تحكى ليها غناك .. وتبرد جوفك من نار الغربه ..
كريمه زيك .. وحنينه زى نضميك الحنين ..
اخوى خضر يديك العافيه قدر دعوات الاهل
ويخدر دربك ويسهل امرك .. قادر يا كريم
تسلم يا الحنين على الطله ...
***
جمااااااال السمح
سمح الخصال الحنين الرزين
طول مافى الزيكم يا جمال .مافى عوجه تب
ومهما كانت الشلليه على قولك .والكيمان ،
برضو فى الاخوان وفى الاعمال البتجبر انه الزول يعرج
ويتاوق يقرا الزيكم .. ويشم ريحة الاهل من خلالكم
تسلم يا جمال على كل الجمال الفى دواخلك وفى كلامك
اشحد الله يلمنا فى اراضينا وبواديها. ووسط طيبة اهلنا
تسلم كتير يا حنين ..
وشكرا بمساحة الطيبه الفى نفوس الطيبين..
***
وحيد الحنين .. الشوق ليك معطر يا ود امى
تشتاق ليك العافيه .. قول آمين
وان شاء الله ما تهم ولا تشيل هموم .ولا تشوف هم.
ربى يسمح ايامك ، ويعلى مقامك ، ويضوى ضلامك
وحيد الشكر ليك محكر..
تسلم كتير .يديك الف عافيه ان شاء الله
**
اعذرونى يا اهل على الغياب الطال ..
وزى ما قال جمال الواحد يغيب يجى يلقى حتى الغمام رحل
ومشا بعيـــــــــــد .. تقعد تبارى الغيمه وتتضارا من حر الهجير
وتبارى القيف عشان تلم فى اهلك الطيبين اولاد الجروف والطين . لما يحن بيك الزمن
تلقاهم مشتتين فى طرف الخدار ، ورغم الشتات برضو تلقاهم ما زالوا حنينين وتريانين....
اهلى الحنان .. الود محنه
والشوق نيلين . تسلموا...
| |
|
|
|
|
|
|
|
|
|
Re: *** هموم مهاجر *** (Re: soma)
|
الشاعرة المبدعة سوما
كل عام وانت الحب
شكرا ليك مرتين لهذا الشجن الاليم
كما عودتينا دوما بروائعك ... فلنرفع لك الاكف تضرعا بأن يحفظك
لهذا الوطن الشايلنو فى الاهداب...
وما تطولى الغيبة عليك الله
الفاتح
| |
|
|
|
|
|
|
| |
bamseka
عبدالماجد فرح يوسف
Sudany Agouz
سجيمان
خضر عطا المنان
جمال السنوسي
alfatih
فيس بوك
تويتر
انستقرام
يوتيوب
بنتيريست