|
|
 *** ليه بتنكر ؟؟؟ ***
|
سلام يا احبه ويا اهلى الحنان بعد غياب طال .. طال بالبعاد فى المسافات .. ولكن وجودكم فارض نفسه فى القلب ..يعلم الله ..
التحايا ليكم من القلب لى القلب .. بعد العوده من البلد الحنين واهلو الحنان ..
وليكم الجديد المن نفس البلد مع كل الود ...
كيـــــــف بتنكــــــر
000000
الله اكبر . . . الله اكبر
كيف بتنكر .
ما الاماكن والمعالم واقفه تظهر.
والمساجد والمآذن . . .
والمصليين البتذكر. . .
والعيون الشاربه . . .
من طرف البحور الجاريه تعبر. . .
كيف بتنكر .
الدريبات البتحفر. . .
طمى الجروف الدافق اخدر .
والنفوس الراويه . . .
من بطن العقول الما بتودر .
والقلوب الضاويه . . .
بى رعشة شعاعا . . .
الكان بيجهر.
والمطيرات والبروق . . .
الشاقه نص الليل تنور .
كيف بتنكر .
فى سمانا وفى ضحانا . . .
و رجعة نهارتنا التحمر .
كيف بتنكر .
والجدود الا نحنت . . تحضن . . .
ترابنا الفيه نكبر .
والملامح فى عيونا . . .
وفى وجوها اشكال تسطر .
هيبة قبيله . . وملحمة . . .
تاريخ بلادى اللونو اخضر .
علما برفرف فى سماها . . .
الاصلو زاهر وديمه انضر .
والنزيف المن شهيدنا . . .
قبره طاهر مسك و عنبر .
والدموع الناخره . . .
لى خد البنيات البتصبر .
والشقوق مدفونه عمرا . . .
ذكريات اياما تمطر .
كيف بتنكر .
الحنين الكان رضعنا . . .
وبيه نعمر وكيف بنغزر .
والنفير الفى فريقنا . . .
وفى بيوتنا وفى شوارعنا . . .
بتكبر .
الله اكبر . . . الله اكبر
كيف بتنكر وليه بتكفر . . .
الا ماك اغبش وماك من
قبايل حاره تنتر .
بالسيوف تضرب تحارب . . .
والنياب بتصك تكشر .
وكيف بتنكر.
بالله اذكر . . .
بالله كبر . . .
الله اكبر . . . الله اكبر . .
@@@@
سومااااا
مسقط ـــ سلطنة عمان . . . 12/09/2004
|
|
 
|
|
|
|
|
|
|
 Re: *** ليه بتنكر ؟؟؟ *** (Re: دباش)
|
من البلد جاءت ...بت الجنيد
زى النسمات......بت الجنيد
لوطن الشتات....بت الجنيد
كتبت كلمات....بت الجنيد
اسماء
كيفك ياحاجة...
كيف شرق الجزيرة
وناس الزلط
والمابعرفو الوحل....
ليش ما جبتى لى معاك حبة
موية بوقة...زى الموية الرشتك فى توبك
لما ماشين تعملوا الاجراءت عبر بالبنطون
تحياتى لى ود الجنيد
والعيال
عودا حميدا
اخوك
احمد
| |
|
|
|
|
|
|
|
|
|
Re: *** ليه بتنكر ؟؟؟ *** (Re: abuguta)
|
حباااااااابكم من تانى يا حنان ...
اخوى تاج السر ود الحسن .. حبابك يا العشا وحباب طلتك المتل قمر العشا .. اسعدتنى يعلم الله والود ليك انت ياخوى قدر غناك السمح وتسلم كتير ...
MASSOUB
هلا بى اخو ريا .. كيفك يا اخو البنيات .. تسلم كتير والشوق ليك قدر سكر حلفا والجنيد .. سلامك واصل .. وليك سلام من محمد وخالص التحايا .. ارقد عافيه .. تسلم اخو ريا تسلم اخوى انا ..
حميده الحنين ...سلام يا ود القبايل .. والله الغيبه طولت ..لكن الله غالب .. وحمد الله على سلامة العوده وشوفتكم يا حنان ..
شكرا ليك يا حميده وعلى طلتك السمحه ...وتسلم من كل بلا ان شاء الله ..
اخوووى دباش .. كيفنك واريت حالك زين .. ليك المحنه والمعزه يا اصيل ..
مره واحده سماعين ود حسن الله يرحوا ؟ كتر خيرك كتيـــــــــــــــــــر يا ود الاصول .. ودى شهادة اعتز وافتخر بيها قدر معزتى وفخرى بيك يا اخو البنيات وتسلم يا رب..
احمد ابو قوته .. الخرزة والياقوته .. وينك يا الغالى ونفيس.. الشوق ليك قدر بحرنا وجروفو.. يا ود اهلى العزاز ..
كان جبت ليك بالبقه ولا الهين ما بتشبع الا تمشى وتنتكى براك فى طرف البحر تشم وتشرب .. وبعد ده كان شبعت كويس .. لانه وحات خوتك السودان ما بنفات تب .. الا الله غاااااااااااالب ..
والقصيده الفوق دى كتبتها بينى وبينك فى شان حرقتنى كلمه هسه بقولا ليك ..
يومى الرجعت يا احمد يا خوى .. سالتنى زولا حنينه بالحيل ومطوله من البلد ..
كيف السودان على حسك يا سوما ؟؟
قلت ليها والله حنيـــــــــــــــــــــن وسمح وما بنفات والحمد لله كلو تمام .. وده احساسى فعلا يعلم الله وما كضبت .. اها يا احمد يا خوى .. عويناتا رقرقت وقالت لى .. الله يطمنك طمنتينى بالحيل .. انعمنو سالت قبال 3 يوم زول جاى من البلد نفس سؤالى ده ودبرس بى شديد .. قلت ليه كيف السودان على حسك .. رد المصخوت ما لقيتو زاتى .. لووووووووووول بالغ مش ؟ مساخة العدو .. قالت ليه يعنى كيفن ياخوى ؟ قال ليها كده .. مش قلتى لى لقيتو كيف؟ يعنى دايرانى اقول ليك سمح ولا شين صاح ؟ .. قالت ليه اكيد .. قال ليها انا زاتى ما لقيتو ..
وحرقتنى ما لقيتو دى بينى وبينك .. رغم انى ما سمعتها منو شخصيا .. عشان كان سمع ردى الفوق ده البقول ليه ليه بتنكر؟ وتانى بقولا .. ليه بتنكر؟؟
احمد ودعتك الله والرسول .. ومعليش وقفتك على حيلك كتير وشايفاك جارى ومستعجل .. لى قدام ..سلام
| |
|
|
|
|
|
|
|
|
|
Re: *** ليه بتنكر ؟؟؟ *** (Re: omar_ragab)
|
حباااااااابكم ..
رائعنا استاذ الاجيال الاخ الموصلى .. تسلم يا ذوق يا اصيل وربنا يوفقنا جميعا ونشوفك معانا فى مهرجان مسقط يا رب .. التحايا ليك انغام حنينه وتسلم ..
بلدى يا حبوب .. يا هلا بيك انت يا رجل يا حبوب ..
وكلامك برتب الحروف المشتته .وبدينى دفعه اواصل معاكم حقيقة طلتك اسعدتنى للغاية ..ربنا يجعل ايامك كلها سعاده وسرور يا رب ... الشكر ليك جرف اخضر يا ود البلد..
عبده الحنين .. سلامات .. الشوق ليكم دافر يعلم الله .. انا زاتى مشتاقه لى كلامكم المن الجوف .. البخلى الابداع يجيكم دافق براه ..انتو زاتكم ما نبع الابداع والمحنه .. عبده التحايا ليك شدرة محنة وجدول طيبة... وتسلم..
ايمان بت الاهل الحنان .. حبابك انتى يا اصيله والدار منوره بيك انتى والله وبى الزيك من بنات بلدى الغالى .. تسلمى يا غاليه.. وليك كل الود .. وشرفتنى حقيقة مشارتك يا حنينه .. الشكر ليك يا ايمان .. دعوات اهل ..لا بتكل لا بتمل .. وتسلمى ..
| |
|
|
|
|
|
|
|
|
|
Re: *** ليه بتنكر ؟؟؟ *** (Re: soma)
|
الاخ عمر رجب .. سلام يا فنان يا مبدع ومتعدد المواهب .. تسلم يا ذوق وشكرا على الطله ..
والمظاهرات الجميله .. لووووووووووول عمر.. تحياتى للاهل عبرك ..
| |
|
|
|
|
|
|
|
|
|
Re: *** ليه بتنكر ؟؟؟ *** (Re: saif massad ali)
|
سوما :
مليون حبابك
يا ما بيك منبرنا نور
بى ورجعتك
بى روعتك
وحرفك الرويان واخدر .
*********************
وأرجع واقول لحروفك الرائعةكمان :
ارتحت ليك
ارتحت ليك
لأنك من تراب بلدي
عجين الطين مع الرملة
ملاح الويكة والسبروق
لقمة زول رجع مريوق
وتاريخ الوطن جملــة
ولأنك في سما بلدي
غيوم بى خيرا بتعدي
ومحاسن للعيون تملا
مزارع في الخريف خدرا
جداول موية منحدرة
وملامح اخلاقنا مكتملة**
وارتحت ليك
لأنك نبتة فوق النيل
ضاربة جذورا في الاعماق
ولأنك انتي ســـوميتا
مضوية في الليدين والساق
ولهفة زول سنين غايب
راجع للبلد مشــتـــاق **
وارتحت ليك
لأنك للجمال عنوان
وفي عينيك أغاني زمان
ملامح عزنا الســودان
ولأنك رنةفي طنبور
ولأنك شقشقة عصفور
ينطط فوق غصين فرحان
ولأنك ياصفا عمري
ضحكة فجرنا البدري
ودليل الضايع الضهبان
تائه في صحاري الهم
سحايب احزانو تتلملم
تمطر آهة في الوديان
وشاف عينيك
وارتاح ليك
رقص طربان
عانق فيكي ام درمان
لقاك في دربو ملجأ أمان
وفي زمن الضياع عنوان .
**********************
لك المعزة .. وتاني مرحب بيك يا سوما .
خضر عطا المنان
| |
|
|
|
|
|
|
|
|
|
Re: *** ليه بتنكر ؟؟؟ *** (Re: Hadia Mohamed)
|
Quote: الله أكبر دى القديمه؟؟
قبل ماتحل الهزيمه
وقبل ما تجدب حقولنا
وتابى تغشى سمانا غيمه؟؟ |
وقبل موت الفرحه فينا
بالشعارات العقيمه
واللجام حدد سكاتنا
واطلق الكلمه السقيمه
والغراب طار فوق رؤسنا
وظل ينعق بى عزيمه
فى سمانا الله اكبر
وانتو اصغر تبقوا ديمه
ســـوما حمدالله على الســلامه
| |
|
|
|
|
|
|
|
|
|
Re: *** ليه بتنكر ؟؟؟ *** (Re: osly2)
|
Quote: فى سمانا الله اكبر
وانتو اصغر تبقوا ديمه |
وديمه تكبر ياوطنا
وأيدك الحانية الرحيمه
على الجنوب ضميت شمالك
وفى الغرب حاجات اليمه
ذى شرقنا نشوفو باسم
وترجع أيامنا العظيمه
بكرة لا هم لا مجاعه
والحياه تصبح كريمه
*** التحية لك يا أوسلى وللرائعه أبدا سومه,
| |
|
|
|
|
|
|
|
|
|
Re: *** ليه بتنكر ؟؟؟ *** (Re: تاج السر حسن)
|
Quote: وديمه تكبر ياوطنا
وأيدك الحانية الرحيمه
على الجنوب ضميت شمالك
وفى الغرب حاجات اليمه
ذى شرقنا نشوفو باسم
وترجع أيامنا العظيمه
بكرة لا هم لا مجاعه
والحياه تصبح كريمه |
الزمن يا تاجو دائر
الا داير بس عزيمه
انو نعرف شان بلدنا
وشان ارض طاهر اديمه
البشر من طينه واحده
او نقول من فد عجينه
النسيب للمولى حقو
وللوطن تبقى العزيمه
| |
|
|
|
|
|
|
|
|
|
Re: *** ليه بتنكر ؟؟؟ *** (Re: osly2)
|
Quote: النسيب للمولى حقو
وللوطن تبقى العزيمه |
بالتسامح والتصافى
والعلاقات الحميمه
كل واحد عندو دينو
لا قطيعه ولا نميمه
الحقيقة تكون شعارنا
والنوايا تظل سليمه
| |
|
|
|
|
|
|
|
|
|
Re: *** ليه بتنكر ؟؟؟ *** (Re: تاج السر حسن)
|
Quote: الحقيقة تكون شعارنا
والنوايا تظل سليمه |
الكذب من دارنا ينجع
وبى دواخل جد هميمه
نبنى سودان المحنه
باقتصاد سانداهو قيمه
وبى علوم نوعيه نبدأ
ونترك الكم لى قديما
وبكره كم فى الكوره نحلم
نهزم ايطاليا العظيمه
| |
|
|
|
|
|
|
|
|
|
Re: *** ليه بتنكر ؟؟؟ *** (Re: osly2)
|
Quote: نبنى سودان المحنه
باقتصاد سانداهو قيمه |
مافى زول ساكن العلالى
وتحتو ناس ساكنالا خيمه
ناس عشاهم بوش ... رشوشه
والمناضل ساو وليمه
العداله ضمان سلامنا
لا ظلام لا يد ليئمه
بالمساواة بنبنى جنه
والحياة بنضوق نعيمه
با(ألأمانى) تغنى (روضه)
و(بالرجاء) تفرح (حليمه)
| |
|
|
|
|
|
|
|
|
|
Re: *** ليه بتنكر ؟؟؟ *** (Re: soma)
|
Quote: ذكريات اياما تمطر ..كيف بتنكر .
الحنين الكان رضعنا . . .وبيه نعمر وكيف بنغزر .
والنفير الفى فريقنا . . .
وفى بيوتنا وفى شوارعنا . . .بتكبر .
الله اكبر . . . الله اكبر |
الأخت سوما:
دوما تهطل حروفك علينا.. كإنسياب المطر علي الجروف فتفعل بنا الأفاعيل علي أسلوبك السهل الممتنع...
Quote: سومااااا.....
مسقط ـــ سلطنة عمان . . . 12/09/2004 |
وفوق كل هذا وذاك ..أنك عدتي إلينا بعد غيبه ..أهلا وسهلا بك يا أميرة الحرف ..
| |
|
|
|
|
|
|
|
|
|
Re: *** ليه بتنكر ؟؟؟ *** (Re: Ehab Eltayeb)
|
سجيماااااااااان .. جد الناس الحناااااان
حبابك انت والله .. والجيت منهم طيبين وبغروك السلام كيمان.. كيمان .. يا سجيمان شكرا ليك اردب ونسه وتسلم يا بسمه فى عز الجفاف ..
الاخ سيف مساعد .. حبابك وحباب طلتك البهيه وكلامك الحنين
عارف ياخوى يا سيف .. كلمة جيدن جيتى .. دى بتدينى احساس جميل بمحنة اهلنا وكلامهم المن الجوف .. شكرا على طلتك وجيدن جيتنا انت كمان ..
حبيــب الكل .. حبابك انت يا حبيب كل الناس .. يديك العافيه يا ضهر البنيات .. وياحليل اخونا ود الجيلى والله ليه وحشه .. ان شاء الله يسمع كلامنا و يجينا هسه
تسلم يا الحبيب وشكرا لكلامك السمح .. شكرا ريدة اهل...
خضــــــــــر ود عمى عطا المنا ..سلااام يا عشا الضيفان .. حبابك جدول الوديان ..
حبابك مقنع الامات .. عشا البايتات ..
التحايا ليك متل غناك السمح .. يا جرف ملفح بالخدار ومدمدم بى تيراب الجدود.. مروى من نفسهم وعرق جبينهم .. التحايا ليك حجا حبوبات ..
كلامك سمح بالحيل .. يشيل الاهه ويبقى دليل .. يرجع لى ديارنا رعيل .. يفرش الخدره جمب النيل ..
بهديك غناك المحكر فى دواخل اهلنا الطيبين .. انت منهم وفيهم . .. من وسط اللمه ..
ذكرتنى ورجعتنى لى قعده عصريه .. وضل ضحاويه.. وجبنه متكيه ..
بهديك دعوات وامانى حبوباتنا الحنان .. يديك العافيه ويخدر ضراعك ويديك الفى مرادك وين ما تقبل يا خدر ود بلدى ..
التحايا ليك ممدوده بى طول بحرنا ورويانه زى قيفو الاخدر
وشكرا ليك .. حواشات وجروف .. وتسلم يا سقف الاهل ...
الحبيبه هاديه ... هادية الطبع جميلة الخصال .. اهلا بيك بت امى الحبيبه .. انا المحظوظه والله التقيك وتسمعينى وتردى على .. يديك العفيه يا حنينه ..
تسلمى كتير وشكرا يا نواره ...
اوسلى يا نخل الشمال
حبابك يا ضل الضحى وحباب طلتك بعد غياب .. وحبااااب كلامك السمح البروى التراب
تراب البلد الفقد الزيكم . رجعتكم ليه هى المحريه فيكم ..
اوسلى بهديك قنديله و جبنة تحت نيمه
ولى رجعه معاك يا نخلنا ... ابقى داخل ..
اخوى تاج السر ود الحسن
حبابك من تانى يا شدر الهشاب
والله كلامك نفض الغبار وعطر هضاب
وطل الغمام ورحل الرهاب
تسلم يا حنين وابقى معنا ..
شكرا مطيره باكريه وتسلم..
الاخوه اوسلى وتاج السر .. مداخلاتكم رائعه زيكم وكلامكم مروى بى نفس الجدود يديكم الف عافيه يا حنان ...
شاعرنا المرهف صاحب الحرف المميز الانساسن الحسا س .. عبد المنعم .. سلام ويا هلا بيك يا ابن جزيرتنا الرويانه .. رويانه بى ابداعكم وطيبتكم ومحنتك المرسومه فى ملامحكم
التحايا ليك اخى منعم 4 كما يحلو لنا انا نناديك بهذا الاسم المميز فى غرفنا العامره بوجودك ..
منعم شكرا ليك ضل ضحى ولمة اهل ..
نســــــــــــمه
يا نسمه فى عز الهجير .. حبابك وحباب عليلك البارد النفح جوه النفوس وبردا
تسلمى يا حنينه .. ولا تحرمينا طلتك يا نسمه يا رقيقه
شكرا ليك فل وياسمين .
ايهااااااااااب الطيب .. عمى لزم .. عم صغير لكن .. ما تقول كبرتك ..لووول..
حبابك يا حنين والله طلتك تبشر بى خير ومطر دغش .. وتهلل زى فرح اطفال فى صباحية عيد ..
كلامك دائما حنين زيك ..بدينى دفعه يا عم لمواصلة المشوار رغم الظروف .. طول ما انتو نبراس ومظلة تحمينى من برد الزمن ووجع المسافات ..
يديك الف عافيه ويغطيك ويعليك فى المابيك .. وينور دربك ..قادر يا كريم ..
ايهاب التحايا والشكر ليك قصب سكر اخدر ..وتسلم ود بلدى ..
****
اهلى الحنان .. لكم الشكر قدر فرحتى بيكم .. وبى طلتكم .. فرحه كبيره وما ليها حد وبتكبر فى كل لحظه وكل ما امر على حرفوكم النديه ..
التحايا والود لكم جميعا ودمتم ..
| |
|
|
|
|
|
|
|
|
|
Re: *** ليه بتنكر ؟؟؟ *** (Re: soma)
|
الغالية سومه
والله ليك وحشة لا تحد ابدا ولحروفك الندية التى فرقت علينا كثير جدا وقد تساءلت كثيرا عنك وعرفت انك فى اجازة بين الاهل والاصدقاء والاقارب فارجو انها كانت ممتعة وان الجميع بخير ..
رائع ما اتيت به عزيزتى وليبقى الوطن ابدا فوق الهامات وملء القلوب
| |
|
|
|
|
|
|
|
|
|
Re: *** ليه بتنكر ؟؟؟ *** (Re: قرشـــو)
|
سلااااااااااام اخوى ود الجزيره .. حبابك وحباب الاهل المعاك .. كيفنك واريت حالك زين
والبركه الطليت واطمأنينا عليك ..
ييك الف عافيه يا ود الجزيره الحنين وكتر الف خيرك يا ملك..
قرشـــــــــــــــو
يعلم الله اسمك نور البوست وانت اصلك يا عمده منور البورد ومشرفنا فى كل الاماكن .. يا سفيرنا فى كل البلود ..
كيفنك واريت حالك زين يا الحنين .. ما تسال منك شينه يا دخرى الامات وركازة الاهل ..
والله انا برضو فقدتك شديد قبل السفر وبسال منك ومن احوالك .. ان شاء الله انت وكل الاسره بالف خير .. وتحايانا عبرك للاهل الحنان..
الاجازه وسط البلد وريحة الاهل ونفسهم الحنين .. اكيد ممتعه اخوى قرشو .. لكن فراقهم حار وتبقى ذكراهم جوانا هى الزاد النعيش بيه لما ربنا يلمنا فيهم تانى باذن الله .. وتبقى حروف بلدى الحنين هى اليراع فى ضلمة الغربه ونارها الفى الجوف والحشا .. نحاول نبردا بى كلام الوطن الحنين ..
تسلم اخوى قرشو وسعيده بى طلتك البهيه والف مرحب بيك
والتحايا ليك ملونه بى كل الوان الطيف يا حنين وتسلم
| |
|
|
|
|
|
|
|
|
|
Re: *** ليه بتنكر ؟؟؟ *** (Re: Mutwakil Mahmoud)
|
أحبتي ... سادتي .... سيداتي .... آنساتي
أرفع اليكم جميعا ـ دون استثناء أو أقصاء أو فرز ـ دعوة
أخوية صادقة صدق حبكم لهذه السوميتة التى أضاءت مساحات فينا
منذ أن وطأت قدماها المزينتان بالمنى أرض هذا الحوش الكبيرز
دعوة لتحيوها معي . هناك أيضا عبر البوست الحامل لعنوان :
(( حيــــــوها معــــي فـراشـــــة تحلق بالجميع )) .
لكم ودي لا حدود .
خضر عطا المنان
| |
|
|
|
|
|
|
|
|
|
Re: *** ليه بتنكر ؟؟؟ *** (Re: تاج السر حسن)
|
لؤى حباب الضى ..
كيفنك انت يا ضى القبيله الفى الضلام باين
يديك الف عافيه وينور دربك ويضللك متل ما مضللنا بى كلامك الوارف يا كثيف العباره
لؤى تسلم انت ان شاء الله
والشكر ليك مدفق وما بنحاش .. تسلم..
الحنيـــــــــــن ود الحبوبات متل اخته سوما..
د/ متوكل محمود ..
تتعلا انت فى مراتبك ان شاء الله .. زى ما رافعنى فى قمم كلامك العتيق المعتق ..
وموشحنى بى جمال حروفك الحنينه .. وملبسنى ديمه تاجا من درر كلامك المنضوم وموزون
يا صاحب الحرف المميز ومحكر فى الوجدان ..
صدقنى دائما احاول قدر المستطاع ان اجمع قواى الادبيه والفكريه لارد عليك بعبارات تحاول خجلا ان تتوارى خلف حروفك المنيره .. وببساطتك المعهوده اجد نفسى نقطه امام قمه شاهقه ورائعه فى جمالها وبهائها .. احاول ان اتسلق اطرافها ..كى اوصل باقه من الشكر والتقدير علها تجد مكانا وسط جمال وروعة كلامك يا اصيل .
رغم البعاد وتعدد اللهجات والاختلاف الزمنى والمكانى.. لكنك انت ما زلت انت ..
الاصيل ود البلد الحنين .. متوكل ود حاج محمود .. ود الامات والحبوبات .. ضهر البنيات . حقيقة افتقدتك وافتقدت اطلالتك المشرقه .. وكلامك البروى الظمآن ..
وابشرك اننى لا اسمح لنفسى رحمة بها ان تبعد من اناس كانو هم النبراس فى زمنا ضرير
اناس عرفتنى بهم الاحاسيس السودانيه الاصيله .. بكم ومعكم بدات مشوارى الطويل .. وبوجدكم باذن الله تكون الاستمراريه ..
د/ محمود لا استطيع ان اشكرك .. لانى صراحه لا اقوى على ذلك ..
فقط اسمح لى ان اهديك امنيات حنينه من حبوبتا حنينه
الله يديك يا دخرينا الفى مرادك .. ويهنيك ويسعدك قدر فرحة اهلنا بى الزيك ..
وين ما تقبل يخدر دربك ويستر عرضك ويسهل امرك .. قادر يا كريم
ودعتك الحى الدائم الصاحى ما نايم .. وتسلم.
اخوى خضر ود عطا المنان ..
التحايا ليك كيمان
حقيقة اخجلتنى بما طوقتنى به من كرم وبشاشة استقبال .. لم تكون غريبه من امثالك سلالة الجود والكرم.. اتمنى من المولى الكريم ان يقدرنى على مواصلة المشوار معكم وبكم فى دربكم المنير بوجودكم وبفنكم المعتق .. والتحايا لك قدر دواخلك النقيه يا ابيض..
اخى خضر احيانا تضيق العباره .. شكرا مطر..
تاج السر ود الحسن .. حبابك اتفضل لى جوه
فنجان جبنه هدية ليك منى فى صينية المنيوم ملمعه .. وسته فنجاين .. امكن يجينا ضيف داخل .. وجبنة طين .. و سكريه فيها سكر الجنيد الاغبش...و وقاية سكسك وجمبها هبابه ..
تحت نيمه فى عنقريب مفروش برش معتق بريحة حبوبا .. وهنااااااااااااك فى طرف النيمه زير لقايو ينقط .. طق.. طق.. طق فى كوره خدرا .. وهمبريب بارد ... و.. وكفى بالهنا ان شاء الله يا يابا .. وتسلم..
| |
|
|
|
|
|
|
|
|
|
Re: *** ليه بتنكر ؟؟؟ *** (Re: soma)
|
Quote: كيـــــــف بتنكــــــر
000000
الله اكبر . . . الله اكبر
كيف بتنكر .
ما الاماكن والمعالم واقفه تظهر.
والمساجد والمآذن . . .
والمصليين البتذكر. . .
والعيون الشاربه . . .
من طرف البحور الجاريه تعبر. . .
كيف بتنكر .
الدريبات البتحفر. . .
طمى الجروف الدافق اخدر .
والنفوس الراويه . . .
من بطن العقول الما بتودر .
والقلوب الضاويه . . .
بى رعشة شعاعا . . .
الكان بيجهر.
والمطيرات والبروق . . .
الشاقه نص الليل تنور .
كيف بتنكر .
فى سمانا وفى ضحانا . . .
و رجعة نهارتنا التحمر .
كيف بتنكر .
والجدود الا نحنت . . تحضن . . .
ترابنا الفيه نكبر .
والملامح فى عيونا . . .
وفى وجوها اشكال تسطر .
هيبة قبيله . . وملحمة . . .
تاريخ بلادى اللونو اخضر .
علما برفرف فى سماها . . .
الاصلو زاهر وديمه انضر .
والنزيف المن شهيدنا . . .
قبره طاهر مسك و عنبر .
والدموع الناخره . . .
لى خد البنيات البتصبر .
والشقوق مدفونه عمرا . . .
ذكريات اياما تمطر .
كيف بتنكر .
الحنين الكان رضعنا . . .
وبيه نعمر وكيف بنغزر .
والنفير الفى فريقنا . . .
وفى بيوتنا وفى شوارعنا . . .
بتكبر .
الله اكبر . . . الله اكبر
كيف بتنكر وليه بتكفر . . .
الا ماك اغبش وماك من
قبايل حاره تنتر .
بالسيوف تضرب تحارب . . .
والنياب بتصك تكشر .
وكيف بتنكر.
بالله اذكر . . .
بالله كبر . . .
الله اكبر . . . الله اكبر . .
|
الله الله عليك
ما اروعك حقيقي
وحشتيناووحشنا كلامك
السمح الف حمدالله على السلامه
لك تحياتي ومودتي
| |
|
|
|
|
|
|
|
|
|
Re: *** ليه بتنكر ؟؟؟ *** (Re: maha abdella)
|
ود ملوك النيل .. نصار سيف
القبيله الفى الضلام بلمع .. وانا فخوره بيك جدا .. وفخوره بوطنيتك المرسومه فى ملامحك ومحكره فى جوفك..
انتو زاتكم يا نصار ياكم الوطن بى اطرافو كلها .. انتو سلالة الجدود الطيبين فراس الخلاء وحراس البلد..و حنين الاهل .. انتو الشمال ونخيلو.. والشرق وطيبته .. والغرب بى محنته .. والجنوب بى اصالته وتراثه.. انتو الجزيره الخضراء بى خيرها .. وقلوبكم بيضاء زى قطنها .. يديك الف عافيه يا نصار ويرجعك البلد المحتاج ليك وللزيك .. ترجعوا بالسلامه وتعمروا من تانى .. نصار شكرا بغزرة معانيك السمحه يا اصيل ..
مها عبد الله
حباب بت بلدى
حبابك وحباب شوقك المدفق .. ما تشوفى وحش يا حنينه .. انا برضو مشتاقه ليكم قدر شوقكم لى يعلم الله.. وبتنفس كلامكم وبتحرك بيه وبتحرك قلمى عشانكم ..
شكرا ليك انتى يا غاليه ولكى كل المحبه والود
مها شكرا بااااااقه فل وياسمين ..وتسلمىى
| |
|
|
|
|
|
|
|
|
|
Re: *** ليه بتنكر ؟؟؟ *** (Re: soma)
|
العزيزة سوما
افتقدناك كثيرا
وكثيرا وكثيرا
في زمن اصبح فيه البورد مجرد حائط (شخبطة) وما اكثر (المشخبطين)
مرحبا بك نبراسا مضيئايضيئ سواد هذا البورد ويعيد دوزنة الحروف
لنغني معك جميعا
أغاني للوطن
حمد الله 1000 على السلامة
جمال
| |
|
|
|
|
|
|
|
|
|
Re: *** ليه بتنكر ؟؟؟ *** (Re: جمال السنوسي)
|
((** خضــــــــــر ود عمى عطاالمنان ..سلااااام يا عشا الضيفان ..
حبابك جدول الوديان .. حبابك مقنع الامات ..عشا
البايتات ..التحاياليك متل غناك السمح ..يا جرف ملفح بالخدار . ومدمدم بى تيراب الجدود.. مروى من نفسهم وعرق جبينهم .. التحايا ليك حجا حبوبات .. كلامك سمح بالحيل .. يشيل الاهة ويبقى دليل .. يرجع لى ديارنا رعيل .. يفرش الخدرة جمب النيل .. يهديك غناك المحكر فى دواخل اهلنا الطيبين ..انت منهم وفيهم ..من وسط اللمة ..ذكرتنى ورجعتنى لى قعدة عصرية .. وضلضحاوية..وجبنةمتكية ..
بهديك دعوات ..وامانى حبوباتنا الحنان ..يديك العافية ..
ويخدر ضراعك .. ويديك الفى مرادك ..وين ما تقبل يا خدر ياود بلدى ..
التحايا ليك ممدودة بى طول بحرنا..ورويانة زى قيفو الاخدر..
وشكرا ليك ..حواشات وجروف .. وتسلم يا سقف الاهل **)) .
انتهى .
****************************************************
كانت تلكم يا سادتي / سيداتي / آنساتي ..
هي كلمات تحلق بالانسان في فضاء بلا اجنحة ..
فضاء بهي ..زاه ..باهر ..مضاء بثريات المنى ..بقمر يراقص رمال شاطئ ذهبي .. فضاء قرمزي ..تتمايل أطيار أغصانه طربا..
وتتغنى جداول مياهه باشجان الزمان الراحل منا كفراشات
حاصرتها رياح بحر عاصف ..فأبت أزهاره الا ان تركع بين يديه..
طالبة اذن بالرحيل الى حيث .. لا عواصف .. لا بروق .. ولا رعود .
تلكم كانت كلمات :
انسانة ..فراشة ملونة ..جاءت الينا بالامس وهي تبشربمقدم خريف عامر ..وخير وافر .. وذلك في زمان االجدبوالقحط المميت ..
وذلكم ما خطها يراع شفيف .. يستحم في بحر من الود الندي ..
يغسل من عيوننا غشاوة طالما شكونا منها ..يصرخ في وجه زمن أغبر ملأ دروبناعفاره ..وغطت ملامحه الكالحة سموات حياتنا ..
يراع ملأ دنيانا بروائع الالحان وشجي الموسيقى .
أنها فارسة الكلم القادمة الينا .. وهي ترقص أمامنا بسيوف أجدادنا اللامعة.. ودعوات حبوباتنا الرائعات حقا ..انها تحمل تحت ابطها عبق ماض تليد ..وفوق رأسها صفيحة عطر يفوح :ألقا.. سموا .. رفعة..
وبين يديها المعطاءتين : فن ..فكر .. ابدع ..أصالة ..عبق تاريخ ..
ونفحات حاضر ..واشراقات مستقبل لن تكونه الا هي .
حيوها معي ..
صفقوا لها ..
أنها سليلة مهيرة ..تلكم الرائعة أبدا : " ســــــومـــــا..
وقد كان ذلكم في عقدها الذي طوقت به أعناقنا جميعا ..
في بوستها الرائع هذا .
فهل أنتم معي ؟؟؟؟؟؟ .
خضر عطا المنان
| |
|
|
|
|
|
|
|
|
|
Re: *** ليه بتنكر ؟؟؟ *** (Re: خضر عطا المنان)
|
Quote:
تلكم كانت كلمات :
انسانة ..فراشة ملونة ..جاءت الينا بالامس وهي تبشربمقدم خريف عامر ..وخير وافر .. وذلك في زمان االجدبوالقحط المميت ..
وذلكم ما خطها يراع شفيف .. يستحم في بحر من الود الندي ..
يغسل من عيوننا غشاوة طالما شكونا منها ..يصرخ في وجه زمن أغبر ملأ دروبناعفاره ..وغطت ملامحه الكالحة سموات حياتنا ..
يراع ملأ دنيانا بروائع الالحان وشجي الموسيقى .
|
Quote:
((** خضــــــــــر ود عمى عطاالمنان ..سلااااام يا عشا الضيفان ..
حبابك جدول الوديان .. حبابك مقنع الامات ..عشا
البايتات ..التحاياليك متل غناك السمح ..يا جرف ملفح بالخدار . ومدمدم بى تيراب الجدود.. مروى من نفسهم وعرق جبينهم .. التحايا ليك حجا حبوبات .. كلامك سمح بالحيل .. يشيل الاهة ويبقى دليل .. يرجع لى ديارنا رعيل .. يفرش الخدرة جمب النيل .. يهديك غناك المحكر فى دواخل اهلنا الطيبين ..انت منهم وفيهم ..من وسط اللمة ..ذكرتنى ورجعتنى لى قعدة عصرية .. وضلضحاوية..وجبنةمتكية ..
بهديك دعوات ..وامانى حبوباتنا الحنان ..يديك العافية ..
ويخدر ضراعك .. ويديك الفى مرادك ..وين ما تقبل يا خدر ياود بلدى ..
التحايا ليك ممدودة بى طول بحرنا..ورويانة زى قيفو الاخدر..
وشكرا ليك ..حواشات وجروف .. وتسلم يا سقف الاهل **)) .
|
نحيها مليون الف تحيه
ونحيك معاها ونحي كلامكم
السمح الوصلنا في بيوتنا
لكم الف تحيه وتقدير
| |
|
|
|
|
|
|
|
|
|
Re: *** ليه بتنكر ؟؟؟ *** (Re: maha abdella)
|
مها:
مثلما هو أسمك سيدتي
فأنت ( مها) تسرحين وتمرحين ودا .. ألقا.. وتقديرا
يغطي مساحات دروبنا المزدهرة بك في كل المواسم
والفصول .
دعوات صالحات لك بعافية تسربل دنياك بعمر مديد
ان شاء الله .
خضر عطا المنان
| |
|
|
|
|
|
|
|
|
|
Re: *** ليه بتنكر ؟؟؟ *** (Re: محمد الامين احمد)
|
حباابكم من تانى يا اهل..
شااااااعرنا المرهف صاحب الاحساس النبيل والمشاعر الحنينه
جمــــــــــــــال السنوسى
وينك انت يا يابا ؟ والله مشتاقين لي كلامك وحروفك الحنينه
تسلم اخوى جمال ..
والله ذكرتنى ا يام جينا البورد مع بعض .. وكنا كل يوم ننزل كم قصيده
وقصايدك انت كانت بتعجبنى جدا والله . ملحنه بى نفس البساطه والوداعه الفى كلامك
وتحس بكل قصيده من قصايدك بتنافس نفسها قبل ما تنافس رفيقاتها من قصائدك الاخرى ..
جمال اخوى ارجوك ما تحرمنا من ابداعك واتحفنا بى الجديد منه دائما
ولك كل الود
جمال شكرا قدر سماحتك يا حنين ..
مها الحنينه سلام يا ست البنات
يا نوارة الشدره الطارحه البكره
يا مرسومه بقندول عيش ورزازة مطره
يا بت بلدى ..
مها تسلمى يا حنينه وشكرا ليك غنا حبوبات ..
****
اخوى خضر حبابك من تانى يا ضلنا ..
وحباب البجى من طرفك كلو .. وتستاااهل والله كل الكلام السمح .. لانه اصلا منبعو منك ومن دواخلك الصافيه النقيه يا حنين
شكرا نخيل وهشاب يا مطر..
****
اخوى محمد الامين احمد
وانا بحييك تحية اماتنا الحنان
حباب ود امى حباب الحنين .. الخزين .. ركازة الحاضرين والغايبين
عارف يا محمد يا خوى اختك تربية حبوبات وبموووت فى كلامهم الحنين
شكرا على اطلالتك الجميله
وشكرا ليك امنيات حبوبه حنينه
وتسلم يا رب..
| |
|
|
|
|
|
|
|
|
|
Re: *** ليه بتنكر ؟؟؟ *** (Re: alfatih)
|
اخوى الفاتح .. حبابك وكيفنك يا العشا.. اريتك طيب ..
شكرا لى القصيده الجابتك لينا انت .. شرفتنا وشرفتنا جيتك يعلم الله
كتر خيرك كتير اخوى الفاتح .. وفتح الله لك ابواب السعاده والخيرات وين ما تقبل .. قادر يا كريم ..آمين
الفاتح شكرا شدرة محنه.. وتسلم
| |
|
|
|
|
|
|
|
|
|
Re: *** ليه بتنكر ؟؟؟ *** (Re: بدرالدين شنا)
|
سوما يا شجرتنا الوريفة ويا ضل ضحانا ونكهة شتيلاتنا وزهورنا على ضفاف نيلنا العظيم
حباب الجيتي طيبة وصارة لينا معاكي في طرف توبك ذكريات جميلة من مراتع صبانا وجروف نيلنا وخيرات ارضنا وحجوات حبوباتنا وملامح جدودنا وقيمنا الأصيلة
تسلمي يا رائعة
| |
|
|
|
|
|
|
|
|
|
Re: *** ليه بتنكر ؟؟؟ *** (Re: samwal ebrahiem)
|
اخوى ايهاب ود عمى السنى ..
كيفك واريت حالك مليح .. وكيف عمى السنى والمدام العسل
تحياتنا ليهم بالله
والف شكر يا ايهاب على الطله .. وتسلم من كل بلا يا رب ...
****
البدرى ود امى عشه.. كيفك يا الحنين .. والله مشتاقين ..
مالك طولت الغيبه .. ان شاء الله خير ..
ما داير باقى اخبار الاهل .. ما بديك ليها الا تجى المره دى بالدرب..
اسمع يا البديرى ود الانصارى .. انت هسه المويه البتكب فيها من الجكيك ده .. نعلها من غرف اضانك ..
غايتو لو منها كلمنى عشان اجيب ليك معاى جرادلنا وجرادل الجيران .. والاضان دى اقطعا .. اخير عدما.. انت مشكلتك مع الحواس شنو بالضبط .. ما بتشم .. وهسه داير يجيك عدم سمع؟
الكبر بخيت بى ربه.. لكن الخرفوا قبلك لا طرشوا ولا فقدوا حاسة الشم .. والدليل على كده حبوبتنا السمعتك بتنقنق داير العرس مره تانيه هههههههههه ليها هسه مضحكنى ردها ليك .. (كدى القى ليك قورش امشى بيها الجنيد )
البدرى حباب طلتك
وشكرا مرااااااااااااح .. تصنقع وتشرب لبن ..
***
حبيب بلدو ..
حبابك 100000 يا الحنين
تسلم يا حبيب بلدنا كلنا .. وكتر خيرك على المتاوقه يا حنين والمطايبه
ذكرتنى الجيت منهم .. من ما تصحا من النوم تسمع المطايبه بى فوق الحيطه ..
كيف اصبحتو ؟ ان شاء الله طيبين .. وصياح الشفع يتجاروا من الدغش .. الماشى الدكان .. والمرسل للجيران .. وناس المدرسة .. واهلنا المزارعيه ماشين لى حواشاتهم ورزقهم..
ولوحات رايعه من الصباح صوره وصوت ..
الله يديك العافيه يا حبيب البلد .. ويرد غربتنا كلنا للبلد الحنين
حبيب بلدو ..شكرا جروف..
****
حبااااااااااب السمؤل
ما تفقدك شينه يا يابا ان شاء الله
تفقدك العافيه والسلامه يا ود اهلى الحنان
كتر خيرك يا السمؤل .. وبتسعدنى طلتك البهيه يا الحنين
السمؤل شكرا فرحة اهل ..
| |
|
|
|
|
|
|
| |
MASSOUB
humida
abuguta
Elmosley
بلدى يا حبوب
إيمان أحمد
omar_ragab
سجيمان
saif massad ali
7abib_alkul
خضر عطا المنان
osly2
عبد المنعم سيد احمد
Ehab Eltayeb
ودالجزيرة
قرشـــو
لؤى
Mutwakil Mahmoud
نصار
جمال السنوسي
محمد الامين احمد
alfatih
ايهاب
بدرالدين شنا
Habib_bldo
samwal ebrahiem
فيس بوك
تويتر
انستقرام
يوتيوب
بنتيريست