بعض من ملامح العرس الوئيد "يوميات العصيان الأول...
إلى شباب ثورة العصيان المدني: الحرية لا تقبل المساومة!
منبر التجانى الطيب للحوار بواشنطن يقيم ندوة بعنوان الازمة السودانية و افاق التغيير يتحدث فيها على الكنين
العصيان المدني...... تجميع فيديوهات للتوثيق ومزيد من النشر
19 ديسمبر .. إني أرى شعباً يثور !!
صدور... الهلوسة
منتديات سودانيزاونلاين    تحديث الصفحة    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 12-08-2016, 02:03 AM الصفحة الرئيسية

مكتبة الشاعرة اسماء الجنيد(soma)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

*** قدح العيد ***

10-23-2006, 02:17 AM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

*** قدح العيد ***

    قدح العيد

    فرحتو اكبر منه وهو اكبر من كل الفرح
    التجهيزات ليه بتبدأ من قبال العيد بى يوم
    المغربيه ست البيت وبناتها حمروا البصله وجهزوا الملاحين
    النعيميه والتقليه..
    وبعض اهلنا عندهم عادة ملاح الروب الابيض للفال السمح صباح العيد
    وفى طرف النار الهادئه عقاب الجمر الفضل . يحمروا الشعيريه والسكسكانية
    وايضا بعض الاهل بعملوا الفطير..
    تتم التجهيزات دى من بالليل .. طبعا زمان لا تلاجات لا فريزرات
    المشلعيب والمحنه المكومه فوق معاه ..
    لا فى اكل بتنتهى مدة صلاحيته ولا فى اكل بتخمر
    ولا سمعنا بى زولا اتسمم من اكل امبارح.. والحمد لله
    وبعد التجهيزات دى تتم تبدأ نضافة وتتمير البيت ..
    رغم انه عارفين بكره العيد قبال 11 شهر
    وبرضو ذكرنا رمضان قبال شهر انه بكره العيد..
    لكن لازم نجى نتجارى ونفسنا ينقطع بى فرحة فى آخر لحظات .
    كاننا ورثنا العاده دى من اهلنا القبيل ..
    وعاجبانا ورضيانين بيها بى فرحة..
    غسيل وكى ملابس .. ترزيه وحلاقة وحمام شفع ..
    وفرحة ودموع ..قشقيش حيشان جوه وقدام الحوش ..
    حتى تباشير صباح اليوم التالى
    يوم العيد .. شاى الصباح وبسكويت العيد
    واللقيمات المعتقه بنفس الحبوبات . وقبالو العصيده تكملة القدح..
    لبس الصغار وفرحة الكبار والجلاليب البيضاء والقلوب الابيض منها
    والشالاات والعمم الملفوفه بى فن رفيع..
    والطواقى المشنقه بى مزاج وتوب الصلاة الناصع
    والحبوبات الحنان والسبحة والتبروقه
    وما اجمل العيد وصلاة العيد فى مجتمع القريه.
    فى باحة المسجد ولا ساحة الحله قدام
    بعد الصلاة ودعوات الاهل الطيبين ..
    يتجاروا الشفع للبيوت لى قدح الفطور سيد صباحية العيد
    بى طيبة اهلنا وقعدة محنة كل زول شايل قدحو وماشى بيه لى باحة المسجد
    ولا نص الحلة
    ولمة جماعية فى اريحيه وصفاء باين فى الوجوه
    تطاقش القداحة .. قدحى وقدحك ملاحى حرم تضوق من هنا وحرم من هنا
    وحولهم كبير الحلة بشيبه ووقاره وابتسامته المرتسمه دائما
    مع امنيات تريح البال .. وحوله صغار وكبار معايده ودعوات تمسح غبار سنين..
    ***
    الاهل الطيبين العيد مبارك عليكم .. علينا وعليكم يتبارك..
    العفو لله والرسول

    اسماء الجنيد مسقط
                   |Articles |News |مقالات |بيانات

10-23-2006, 03:31 AM

ايهاب
<aايهاب
تاريخ التسجيل: 05-06-2002
مجموع المشاركات: 2877

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    غايتو يا سوما خليتي الشتات كلو يتمطق
    looooOooooooooooolz
    وانت طيبه واهلك تامين وبي قدحم مستمتعين
    ولينا عازمين
                   |Articles |News |مقالات |بيانات

10-23-2006, 05:47 AM

البعيو

تاريخ التسجيل: 12-07-2002
مجموع المشاركات: 0

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    الأخت اسماء
    كل عام وانت بخير
    وربنا يحقق الأمانى
    Quote: وبعد التجهيزات دى تتم تبدأ نضافة وتتمير البيت ..
    رغم انه عارفين بكره العيد قبال 11 شهر

    الحكاية دى تعبانى شديد

    أنور الشيخ
                   |Articles |News |مقالات |بيانات

10-23-2006, 07:13 AM

فيصل نوبي
<aفيصل نوبي
تاريخ التسجيل: 09-16-2005
مجموع المشاركات: 14194

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    كل سنة و انتي طيبة يا سوما

    و ربنا يحقق امنياتك

    و شكرا علي النص الطاعم
                   |Articles |News |مقالات |بيانات

10-23-2006, 07:29 AM

abuguta
<aabuguta
تاريخ التسجيل: 04-20-2003
مجموع المشاركات: 8268

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: فيصل نوبي)

    اسماء
    انا داخل مخصوص عشان اكتب عن العيد
    لكن لقبتك سبقتينى وما حاقدر اكتب زى كلام دا
    لكن يابت الجنيد عيد الغربة مسيخ شديد
    بعد الصلاة غلبنى امشى وين
    ومع انو اول عيد لى وانا حياتى فيها نصف اخر
    لكن اشعر كانه نفس عيد السنة الماضية
    لكن شايف عثمان حسين قالو فى الرياض
    سوف نتصل على صناع الفرح تمبس والشلة
    نسالهم وين الفرح مشتت فى الرياض
    كل عام وانتو بخير
    عيد سعيد
    اعاده الله عليكم بالخير واليمن والبركات
                   |Articles |News |مقالات |بيانات

10-23-2006, 09:09 AM

Mustafa Mahmoud
<aMustafa Mahmoud
تاريخ التسجيل: 05-16-2006
مجموع المشاركات: 36006

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: abuguta)

    أهلا أهلا بالأعياد
    محجوب شريف


    أهلا أهلا بالأعياد
    مرحب مرحب يا أجداد
    أفتح أفتح يا تاريخ
    أبعاد أبعاد
    وأملا عيون كل الأحفاد
    بالأمجاد
    أفتح محضر باسم الشعب
    بخط الشعب
    لوجه الشعب
    ومجد الشعب
    سجل
    أنحن الغضب الواعى
    ضمير الثورة على استعداد
    وبالمرصاد
    لكل عميل وكل دخيل
                   |Articles |News |مقالات |بيانات

10-24-2006, 00:54 AM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: Mustafa Mahmoud)

    الاهل الطيبين حبابكم يا الزينين
    وعيدكم سعيد وعمركم مديد بركة قبائل العيد
    ***
    سلام ايهاب
    آى انت اقعد اضحك .. ماك قاعد ومحكر وسط اهلك
    تحمد سيدك .. الله لا وراك غربه وشتات بعيد من الاهل
    بغراااااااانه منك والله ما حاسده.. ربنا يديكم الصحة جميعا ..
    وكل سنة وانتو بالف خير
    تحياتى للجميع وخاصة عمى السنى والحاجه قول ليهم دعوات يا طيبين
    تحايا خاصة للمدام والسيد ولى العهد
    شكرا ايهاب ..شكرا قدح محكر تحت نيمه

    ****
    اخوى انور الشيخ حبابك
    العيد مبارك عليك.. علينا وعليك يتبارك
    العفو لله والرسول
    ضحكتنى شديد .. قلت لى التجهيزات آخر لحظه تاعباك
    الله لا جاب ليك يوم تعب يابا
    عارف يا انور يا خوى نحن فى كل شىء آخر لحظه
    غير العيد فى اى شىء .. حتى السفر
    نحن الشعب الوحيد الممكن الطياره تفوفتو عااااااااادى
    والعجب الناس البجوك يتجاروا للحجز فى آخر لحظه
    وهو عارف اجازته قبال سنة
    دى اسألنى منها انا .. النعمونو ده شغلى والموضوع ده تاعبنى شديد
    وحات خوتك ..لكن على قول حبوبه .(( من خلى عادتو.. قلت سعادتو )) لوول
    كل سنة انت طيب اخى انور وشكرا محنة

    ***
    فيصل نوبى .. العيد مبارك عليك يا الحنين
    كتر خيرك انت يابا على الطله يا ود الفريق والحلة
    طاعمه جيتك وطاعم كلامك يا ود القبائل
    يديك الف عافيه يا رب
    شاحده الله يحقق امانيك ويعليك فوق المابيك
    شكرا اخى فيصل شكرا دعوات اهل صباح العيد

    ***
    ابو قوته ود اهلى الحناااااااان
    الحمد لله يابا العيدت فى بيتك ومع ست بيتك
    شاحده الله العيد الجاى عندك تيمان بركة الرحمن
    تلبسهم وتسوقهم معاك صلاة العيد
    يحموك القعدة فى البيت ..
    تمشى تبارك العيد للجيران و للخلان والحبان بيهم
    وهدومهم تتملى حلاوة ويدفقوا ليك العصير فى جلابية العيد
    ويكرفسوا لى امهم توبها الجديد
    وترجعوا تانى تغيروا ليهم
    ربى يملآ بيتك فرحة وحبور
    تحياتى لى زينة البنوت ست بيتك
    والعيد مبارك عليكم
    صحى كلامك اخوى اب قوته .. عيد الغربه ما زى عيد الاهل
    لكن شن نسو الله غالب
    الله يرد غربتنا جميعا
    آميــــــــــــــــــــــــــــــــن
    اب قوته شكرا لمة اهل بعد صلاة العيد وانت وسطهم

    ****
    اخوى الراقى دكتور مصطفى
    يديك العافيه على العيديه الجميلة منك
    ومن شاعر الشعب محجوب
    اسأل الله له فى هذه الايام المباركه
    الصحة والعافيه والعمر المديد
    ربنا يحفظه ويغطيه
    كل عام وانتم بالف خير
    شكرا اخى الدكتور .. شكرا فرحة عيد
                   |Articles |News |مقالات |بيانات

10-24-2006, 01:20 AM

ابي عزالدين البشري
<aابي عزالدين البشري
تاريخ التسجيل: 03-28-2006
مجموع المشاركات: 1178

للتواصل معنا

FaceBook
تويتر Twitter
YouTube

كيف احذف مداخلة من بوستى

بمناسبة عيد الفطر (Re: soma)


                   |Articles |News |مقالات |بيانات

10-24-2006, 07:48 AM

عبد المنعم سيد احمد
<aعبد المنعم سيد احمد
تاريخ التسجيل: 10-13-2003
مجموع المشاركات: 10882

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: ابي عزالدين البشري)

    Quote: الاهل الطيبين العيد مبارك عليكم .. علينا وعليكم يتبارك..
    العفو لله والرسول
    اسماء الجنيد مسقط

    صاحبة الحروف الانيقة
    شاعرتنا الانسانة سوما
    علينا وعليك يتبارك
    وكل سنة وانت واسرتك الكريمة
    بالف خير يارب
    والتحايا عبرك لكل
    الاصدقاء والصديقات..من زمن جميل
    وعيديتك مقبولة يااصيلة
    الود والتقدير
                   |Articles |News |مقالات |بيانات

10-24-2006, 09:02 AM

Mustafa Mahmoud
<aMustafa Mahmoud
تاريخ التسجيل: 05-16-2006
مجموع المشاركات: 36006

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: عبد المنعم سيد احمد)

    بناديها
    وبعْزِم كُلّ زول يرتاح
    على ضحكَة عيون فيهَا
    وأحْلم اني في أكوان
    بتْرحَل من مراسيها
    عصافير
    نبّتَت جِنْحات
    وطارت
    للغيوم بيهَا
    مسافرِ من فرح لس شوق
    ونازِل
    في حنان ليهاَ
    أغنّي مع مراكب جات
    وراها بلاد حتمْشيهَا
    واحزَن لي سُفُن جايات
    وما بْتلقَى البِلاقيه
    بنادِيــــــهَا
    ولمّا تغيب عن الميعاد
    بفتِّش ليهَا في التاريخ
    واسأل عنَّها الاجداد
    واسأل عنّها المستقبل
    اللسّع سنينو بُعاد
    بفتِّش ليها في اللوحات
    مَحَل الخاطر الما عاد
    في شهقَة لون وتكيَة خط
    وفي أحزان عيون الناس
    وفي الضُّل الوقَف ما زاد
    بناديــــــهَـا
    والاقيـــــهَــا
    واحِس بالُلقيا زي أحلام
    حتصْدِق يوم
    والاقيــــــهَــا
    واحْلًم في ليالي الصيف
    بَسَاهر الليل
    واحجِّيـــهَــا
    ادوبي ليهَا ماضيهَا
    واطنْبِر ليها جاييــهَا
    وارسِّل ليها غنوَة شوق
    واقيف مرات واْلُوليهَا
    بنادِيـــــــــهَــا
    وبناديــــــــهــا
    وبناديـــــهــا
                   |Articles |News |مقالات |بيانات

10-25-2006, 04:13 AM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: Mustafa Mahmoud)

    حباب الزينين

    اخى ابى عز الدين
    عيدك مبارك .. علينا وعليك يتبارك
    وشكرا جميله قدر جمال باقتك الانيقه
    شكرا قطوف..

    ****
    الشاعر الشفيف صاحب الحس والذوق الرهيف
    اخى وابن بلدى عبد المنعم سيد احمد
    حبابك ابو محمد وحباب طلتك البتبشر بالخير الوفير
    العيد مبارك عليك انت وست بيتك و وابننا محمد
    يا رب يعود عليكم بالخير والسعاده
    ولى محمد بالاخوان والاخوات يا رب
    العيد الجاى كلنا وسط اهلنا ان شاء الله يا حنين
    شكرا اخى عبد المنعم
    شكرا ضحكة عميقه من محمد ربنا يحفظه ويغطيه

    ****
    الدكتور الراقى اخونا مصطفى
    طلتك بالدنيا والله
    ذوقك فى الاختيار راقى زيك
    شكرا على الطله وعلى بناديها
    حقيقى هدية وعديديه لها طعم خاص فى النفوس
    شكرا اخى الدكتور مصطفى ..
    شكرا لمة حبان فى السودان

    شكرا اهلى الطيبين
    وكل سنه وانتم جميعا بالف خير
                   |Articles |News |مقالات |بيانات

10-25-2006, 06:08 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: soma)

    Quote: يتجاروا الشفع للبيوت لى قدح الفطور سيد صباحية العيد
    بى طيبة اهلنا وقعدة محنة كل زول شايل قدحو وماشى بيه لى باحة المسجد
    ولا نص الحلة
    ولمة جماعية فى اريحيه وصفاء باين فى الوجوه
    تطاقش القداحة .. قدحى وقدحك ملاحى حرم تضوق من هنا وحرم من هنا
    وحولهم كبير الحلة بشيبه ووقاره وابتسامته المرتسمه دائما
    مع امنيات تريح البال .. وحوله صغار وكبار معايده ودعوات تمسح غبار سنين..
    ***


    سوما اختى خليني احكيك عيدنا زمان كيف

    انا سوما كنت الويحيد عند امى ابوى في خمسة بنات نفيسة اكبرهن بتحبني شديييييييد وقت جاتنى الفيزا لعمان ادردقت با########## لانى بعد كبرت وبقيت محامي بنيت لى بيتا قريب منها وبناديها وقت يجو الضيوف تقيف في الاكل مع بت عمي شامة بت الامين - انا شامة دى عرستها عمرى 14 سنة لحدى هسه ما بتجيب اسمى بتقول لى ابو عبد الله بس لكنها ولدت 7 اولاد وثلاثة بنات امسكوا الخشب بس .

    اها يا سومه ايام زمان انا كنت شويطين بسمونى جقدول (الثعلب) لانى كنت بشاغل كتييييييير . قبل العيد بيوم بملس ساى في جلاليبي وبيغلبني النوم اقول متين ا########## تصبح عشان البس الجلابية الجديدة وجيوبها كبار .

    بنمر على اهلنا اولاد شيقوق وهم كتار اكتر من ثلاثين اولاد وبنات من اربعة نسوان . عندنا عماتنا بنمر عليهن اول حاجة وطيبات وحنينات كانن بحبنى شدييييييد وقت اجى اعيد بيملن لى جيوبي حلاوة وكعك - مش زى كعكم الهسه الحلو ده لا لا كعك قوى بسوهو شكلو مدور وبيبسوهو في الصينية .

    بعد نعيد نتلم كلنا ونجهز دوابنا عشان نمشى بيها الصلاة في حلة الشيخ التهامى والدندر كلو بيتلم هناك واى حلة عندها مداح بيعملوا سيرة من الحلة لحلة الشيخ اى اولاد حلة بيتبعوا مداحهم من وراء.

    عندما نكون راكبين دوابنا ويلاقونا ناس من اهلنا الكبار ماشين برجليهم بننزل ليهم عشان يركبوا هم في الدواب . بعد نركب الكبير نتبعه من خلف وبيسالنا انت ود منو وبتقرا وين وبوصينا بقول لينا تصلوا الشيخ يديكم الفاتحة تسهل دربكم في القراية وبقول لينا ماتنسوا تجيبوا ليكم نور من قبر الشيخ لاهلكم يتمسحوا بيهو من البرجم والحسبة والوردة (بكسر الواو وتسكين الراء)

    بعد نصل العمارة حلة الشيخ بنلاقي الاولاد البيقروا معانا في المدارس ونعيد ليهم ومرات بيحلفوا علينا نمشى معاهم حلالهم وعرفونا بامهاتهم وابواتهم واخوانهم واهلهم يتجمعوا لينا بالشاى والكعك واى واحد لازم نضوق شاهيهو وكعكه وبريحونا بى بت السودان انتى صغيره ما بتتطريها سوما.

    بعد نرجع الحلة ننجم شوية والضهر نبدأ المرور تانى الوليدات الكبار مش زينا وما بمروا على الاهل كلهم لا لا بمروا على الناس البناتهم سمحات لانها الشوفة بتكون من حول لحول عشان كده اى عيزومة حتى ان بقت كضبه بتسببوا بيها وبتحكروا واولادنا شطار بيعرفوا البت كان دارتو او ما دارتو اكان عجبته وحسه بانها دارتو وما عندها ود عما حابسها بيجى طوالى بيكلم امه واخواته لو باركنها ليهو الموضوع بيمشى لابيهم عشان يمشى يخطب طوالى .

    نواصل

    العفو والعافية

    (عدل بواسطة الطيب شيقوق on 10-25-2006, 06:12 AM)

                   |Articles |News |مقالات |بيانات

10-26-2006, 12:11 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: الطيب شيقوق)

    ود شيقوق حبابك آآ الحنين
    ود الجروف والطين
    والناس السمحين
    يعلم الله الشوق لى نضميك غيمه ومطرتين
    سوقتنى معاك هناااك لى ناس الدندر والحلال القريبه
    وشفت شامه ووليداتها وبناتها
    الله يحفظهم ليك بى امهم ويحفظك ليهم
    عينى بااااااااااارده
    تصدق يا خوى الطيب خالتى لزم اسمها شامه بت اللمين
    حنينه جنس محنة .. وبتريدنى ريده شديـــــــــــده
    زى ريدة خيتك نفيسه ليك
    ذكرتنى اهلى القبيل يا حليلك
    على فكره افتقدتك يوم الاربعاء المضى وذكريات المدن
    وحكيت عن الجنيد زى كلامك الندى عن حلتك وزمنكم يا ود العم
    الجايات اكتر ان شاء الله
    واصل يا العشا .. هرجك بالحيل سمح
    واصل .. تغشاك العافيه وتضلك السعاده
    آمين يا رب
    شكرا اخى الطيب شكرا سماحة اهلنا
                   |Articles |News |مقالات |بيانات

10-26-2006, 01:24 PM

انعام عبد الحفيظ
<aانعام عبد الحفيظ
تاريخ التسجيل: 12-07-2005
مجموع المشاركات: 8738

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: soma)

    كل سنة وانتي طيبه يا سومه
                   |Articles |News |مقالات |بيانات

10-26-2006, 01:33 PM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: انعام عبد الحفيظ)

    حرام سوما ما اكون حاضر ندوتك عن الجنيد وحرام على ادارة النادى الما عملت اعلان عنها وصل لكل الناس والله كم تمنيت احضر واشارك واسمع كلامك في ناس الجنيد الما غمضت عيونهم من خطف الدخاناب اولاد السيال . كنت عايز اسمع اكان عندك كلام في جيران الجنيد اهلنا حلب ود السيد الرابطانا بيهم علاقة قديمة اصبحت اسرية فاقده النسب لولا عندنا راى في الحلب وعندهم راى في العرب . انا قايل صراع الحضارات ده يا سومة اختى ما حاجة جديدة اهو من زمان موجود .

    اهلنا الطيبين يا سومه اختى زمان بيعتقوا ليك بت عمك من تتاتي بيقولوا دى من هسع حقت فلان وتانى مافي حد بيقرب ليها وكانت بت عمك دى تحبس معاك الطير في البلدات وتركب معاك في الحاحاية ( الحاحية لاهلنا ما بيعرفوها راكوبة صغيرة بيعملوها جوة البلاد بعد العيش يلبن عشان يطلعوا فيها الوليدات والبنيات ويحاحو الطير من العيش اما بالصياح او بالفرطاق والفرطاق بيعملوهو من السعف يشبه سوط العنج عندما تضربه بيعمل صوت زى الصاقعة بهوب الطير) وعادة تمشى انت ومعاك اخواتك وبنات عمك حت المعتوقة ليك لمحاحات الطير وبنكون شايلين لينا مخلاية فيها كسرة حامضة وحلوة معاها زيت وبصلات بس ودى في الخلاء احلى من البيتزا والكنتاكي ليها طعم لذيذ يا سومة اختى . مرات انا بشيل معاى كراس المذاكرة بحب دائما اشيل الاناشيد بتاعة الجغرافيا البتقول
    في القولد التقيت بالصديق انعم به من فضل صديق
    وطوالى انا بنشد وصوتى حلووو زمان
    ومن هناك قمت للجفيل ذات الهشاب الناضر الجميل
    كنت بحب سورة الفجر وليال عشر والضحى والليل اذا سجى برتل بصوت عالي وانا في الحاحية واخواتي بيرتلن معاى كانن يحفظن القران بدون مدرسة .
    انتو المناهج دى ما حضرتوها حلوة حتى تلحين الاناشيد دى في الخلاء بصوت عالي واخواتك وبت عمك معتوقتك بيشيلوا معاك كورس وهم في الحاحاية والصوت بخوف الطير وبيطير من الزراعة بيمشى الغابة .
    بعد ا########## تبقى عصر بنمشى نجمع العنكوليب والتبش والبامية ونشيلها في المخالي ومرات نلقى لينا حميضات نفرح بيها الاطفال عشان يتلقونا من طرف الحلة مبسوطين وفرحانين . بس الاطفال سوما كانوا ما بطلعوا من طرف الحلة بعيد لانهم سامعين في الدماسات ( الزمن بين المغرب والعشاء) السوابح والشواطين بيطلعوا .
    بطرف حلتنا في عرديبة كبيره من زمن جدودنا الزمااااااااااااااان بسموها المدقة عشان بالليل قالوا بسمعوا الشواطين فيها بيدقوا حاجة زى البن والعرديبة دى انا لحدى هسه ما بقدر امشى تحتها بالليل.

    نواصل
                   |Articles |News |مقالات |بيانات

10-26-2006, 03:16 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: الطيب شيقوق)

    الحبيبه انعام عبد الحفيظ
    انعم الله عليك بى خيراته يمه
    والعيد مبارك عليك
    ربنا يعيد عليك العيد بالصحة والعافيه
    شكرا اخت انعام .. شكرا محنة

    ***
    اخوى ود شيقوق
    والله عندك سماحة نضمى .. وروعة سرد .. ما شاء الله وعينى بارده
    صحيح ما عشت جوكم الجميل ده.. لكن والله كل ما اجى اجازة للجنيد
    بمشى مع حبوبه الله يرحمها للجروف.. وبشوف زراعة اللوبيا والطماطم والتبش
    وبرجع معاها البيت عشان استمتع بى ضفيرتها للسعف وصناعة التباريق و
    المقاشيش من عقاب السعف (( الحنقوق ))..
    والحنقوق ده حكيت عنه نكتة فى ذكرياتى عن الجنيد الحلة..
    فى الاجازه يا الطيب اخوى بنجى من القضارف العشنا واتربينا فيها
    مره خالتى قاعده معانا .. ورسلت اختى الصغيره لى حبوبه.
    قالت ليها امشى قولى لى حبوبه قالت ليك خالتى ادينى شوية حنقوق
    عشان اعمل بيه مقاشيش..
    جرت اختى فرحانه عاجبها الاسم بدون ما تعرف الحنقوق هو شنو !!
    لما وصلت ناس حبوبه .لقتهم ملمومين كلهم مع حبوبه فى الحوش بشربوا فى الجبنه
    قالت ليها حبوبه قالت ليك خالتى ادينى ...... ونست الاسم
    ما اترددت طوالى قالت ليها ادينى خشم الحلوف .....
    حبوبه والناس المعاها كلهم ضحكوا.. قالت ليها اجى !! سجمى حلوف شنو يا بت ؟
    قالت ليها بعملوا بيه المقاشيش .. طوالى عرفوه وضحكوا فيها شديد
    ولى هسه بتذكروا ليها النكتة دى..
    حقيقى اتكلمت عن الجنيد وعن ود السيد والبويضه والعك (بضم العين) وكل الحلال القريبه مننا وعن المصنع
    وقبة شيخنا حياتى فى قرية الصقيعه لو سمعت بيه
    لك التحيه اخى ود شيقوق
    واصل ونحن مستمتعين بى سردك الشيق
    شكرا اخى ود شيقوق.. شكرا تبروقه من حبوبة
                   |Articles |News |مقالات |بيانات

10-26-2006, 06:25 PM

النذير حجازي
<aالنذير حجازي
تاريخ التسجيل: 05-10-2006
مجموع المشاركات: 6777

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: soma)

    كل سنة وإنتي طيبة ياأسماء وإن شاء الله السنة الجاية زي ماعايزة، والعفو والعافية لله والرسول. (ماعرفتيني طبعاً، كنتي عاملة لي بلوك فى البالتوك أسألي دينق بوريك أنا منو، والله ماعارف عملتي لي بلوك لي ياسومة، بس مامشكلة إنتي برضو أختي الكبيرة)
                   |Articles |News |مقالات |بيانات

10-27-2006, 00:59 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: النذير حجازي)

    يا حليكم سوما انتو كمان عشتوا في القضارف اها انا تانى بنضم ساى كنت خايف يغلبك نضمي ده.

    اها سومة اختى انا كبرت شوية وشامة كبرت شوية . انا بقيت في رابعة اولية في السلم التعليمي الزمان ( يا حليل زمن رابعة اولية زمان خريجها افهم من حامل شهادة الدكتورة اليوم وخطاطين الواحد اكان كتب ليك سطر تعاين ليهو يمين وشمال من جماله) . فزت في الامتحان وقالوا بودونى مدينة القويسي (ده اسم مدينة الدندر القديم الموجود الان على خريطة العالم وتلقيهو في القوقل ايرس) وكمان قالوا بسكنونونى الداخلية مع اولاد البندر النضاف كانت الداخلية بتلم اهلك اولاد قبيلة رفاعة ومعاهم اولاد السوكى وكركوج بلد الشريف محمد الامين وكساب السكن فيها زمان الشاعر اسماعيل حسن ايام كان بيعمل في مشاريع ناس ابو العلاء عندنا هناك . اتحزمت واتلزمت ابوى حاج مضوى اكان عنده عربيه تيمس . قال للسواق دور اها ركبنا انا وابوى وعمى ابو شامة بقدام ودورنا . العربية اكان فيها لحافي الجديد وملاية جديدة واشتروا لى اول مرة في حياتي صباعين معجون ابو وردة - اكان تتطريهو - كنا في الحلة بنسوك بالشاو والاراك مسواك الرسول (ص) . المسافة كانت كلها عشرة كيلو من حلتنا البردانة للقويسى وما شفتى الاهل ببكوا كيف لفراقي امى اسبوع ما اكلت وخالاتى واقفات جنب العربيه يبكن والحبوبات الكنت بنوم معاهن بهبابي الصغير المفروش بالبرش الدقة ( البرش الدقة ده حاجة تانية بيعملوهو من السعف وبلونوهو بالتفته الملونة وبتكون ضغفيرتو دقاقة بعد يطلعوا الحنقوق منه ( مش خشم الحلوف)

    السواق دور وانا بعاين ليهو بدور كيف وبعشق كيف وبفرمل كيف واتمنيت لو بقيت سواق كمان . السواقين زمان سومة اختى ما بدوهم الرخصة الا يشتغل مساعد عربيه يمكن كمان عشرة سنوات مساعد يتعلم يفك الماكنة ويحل ويربط اى حاجة في العربية . رخصنا زمان في الخليج ببدلوها طوالى بدون تردد مش زى ملطشتنا الهسه .

    اها وصلنا المدينة وقالوا يفطرونى ويودونى الداخلية فطرنا زيييييييييييييين ومشينا على الداخلية . بوابة المدرسة كبيرة ومحروسة وما بخلوك تتدخل الا تورى شهادتك الدخلت بيها . طلعت الشهادة والحارس عاين فيها وعاين لى وعاين في ابوى وعمى وابتسم وقال اتفضلوا معاى . تبعناهو ودانا مكتب المسجل (زمان المدارس الوسطى فيها مسجلين زى الجامعات هسه )

    المسجل قرا الاسم ولقيناهو عنده قوائم لتوزيع الطلاب على الداخليات التلاته (الدندر والرهد وعطبرة) ولقيت نفسي في داخلية الرهد و اى داخلية كان عندها رئيس وهو عادة اكبر طالب فيها . المسجل نادى رئيس الداخلية وقال ليهو استلم عندك الطالب ده وقال لابوى وعمى انتظروا هنا ولدكم بيمشى وبيجيكم . مشيت الداخلية سومة كانت داخلية حبيبك كل حاجة جاهزة لحافي رجعوهو لاهلي وادونى سرير سمّح مفروش ومعاهو بطانية انجليزية من الصوف ودولاب ملابس ومكتبه . رجعت لابوى وعمى وودعتهم وانا ابكى (كلها عشرة كيلو)

    تعبت سومة بواصل ليك بوريك مشوارنا البقانا خبراء في البورصات الخليجية طولى لى بالك بس

    مودتى
                   |Articles |News |مقالات |بيانات

10-27-2006, 03:22 AM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: الطيب شيقوق)

    سلام يا الاهل الطيبين
    النذير ود عمى حجازى
    حبابك وكل سنة وانت طيب
    وحات خوتك عمرى ما بعرف البلوك ولا بخبر التكنلوجيا المشاتره
    لكن ما بغالطك تب .. حصلت لى مشكلة فى البال وسرقوا اسمى 8 شهور
    والحاجه دى عارفنها مجموعه من الاخوة والاخوات .. ممكن تسالهم
    وصاحبنا السرق الاسم الله يسامحوا ..صال وجال بى اسمى القديم soma_25
    اها اخوى الحنين مصطفى السنى ( شماسى اساسى ) كان معانا هنا الايام ديك
    فى مسقط واجتهد يرجع لى الاسم ومجموعه من الاخوان.. لكن بدون فايده
    اها مصطفى قال لى سومه اعملى اسم تانى وادخلى بيه وكلمى الناس
    عشان الزول الشايل الاسم ده ما يتفسح على كيفه بى اسمك
    وفعلا حصل عملت SOMA_125
    ربك رب الخير رجع الحق بعد 8 شهور يعلم الله من حسن حظى اسمى كان بالبلو
    اقترح على احد من الاخوة الاعزاء ااقدم شكوى لادارة البال
    وقد كان بوجوده.. وفعلا رجعوا لى اسمى القديم..
    لقيت مجموعه من المعاى مافى فى اللست
    حتى بديت من اول وجديد اعمل اضافه واعتذرت للجميع
    بعتذر ليك ياخوى رغم انى ما عرفتك حقيقى
    ودايره اقول ليك .. اختك سومه دى غبشه من وسط الغبش
    ما بنخبر نسد الباب.. ولا بنعرف نتاكى حتى.. فمستحيل اعمل بلوك لى اى كان
    اسال منى ود عمى ود شيقوق ده
    شكرا اخى النذير على المداخلة
    والعيد مبارك عليك.. علينا وعليك يتبارك
    العفو لله والرسول
    شكرا محنة
    ***
    اخوى ود شيقوق بجيك راجعه بى مزااااج
    الرسول كان تقيف.. واصل الله يخدر ضراعك
    بركة الجمعه الجامعه والدعوة العند الله سامعة
                   |Articles |News |مقالات |بيانات

10-27-2006, 03:51 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: بمناسبة عيد الفطر (Re: soma)

    Quote: اخوى ود شيقوق بجيك راجعه بى مزااااج
    الرسول كان تقيف.. واصل الله يخدر ضراعك


    سومة اخنى ما تاخدى في خاطرك انا عارفك مشغولة شديييييييييييد انا كلامي كتير في البوست ده خليني اخد راحتى في رحابه وعندى راي اكتب كتاب عن مسيرة حياتي بكل الصراحة والوضوح والاخوان طالبونى به كتير وكنت كسلان منه لكن كلامك الحنين وحلووووو بشجعنى اكتب كتير وبمزاج . انتى بس تابعي كتاباتي ولو فيها اى تعليق او ملاحظات قوليها لى بس موضوع اللغة ما بهتم بيهو الان لان الالتزام بقواعد اللغة يفسد طعم الرواية لكن عند اعداد الكتاب بحاول الالتزام بها بالقدر الذى يمكن ان يحفظ منظومة الرواية .

    مقدمة الكتاب ستترك لك يا اختى سومة عنوان الكتاب سيكون ( مسيرة حياتي من البادية للبورصات)
    سوف تحكى الرواية عن التعليم ومناهجه بين الامس واليوم
    وكذلك ضياع الالاف من ابناء الريف لاسباب بيئية واجتماعية واقتصادية
    سيتطرق الكتاب الى ظاهرة الزواج المبكر ما له وما عليه
    وتجربتي في التوفيق بين الزواج والدراسة
    الصراع العائلي بين الاب الصفوي والام المتواضعة فكريا
    دراسة القانون وممارسة مهنة المحاماة في المناطق النائية وكيفية اعمال النظريات والفلسفات القانونية في قضايات هذه البيئة .
    ثم تجربتي في العمل السياسي عند ترشحى للانتخابات البرلمانية
    وسيخصص الفصل الاخير من الكتاب عن الاغتراب ( واقترح ان يكون هذا الفصل مشتركا بيني وبينك )


    لك معزتى

    (عدل بواسطة الطيب شيقوق on 10-27-2006, 04:05 AM)

                   |Articles |News |مقالات |بيانات

10-27-2006, 04:58 AM

د.محمد حسن
<aد.محمد حسن
تاريخ التسجيل: 09-05-2006
مجموع المشاركات: 14230

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    العيد معاك

    روعة حروف نديانة ريد

    والعيد معاك

    بهجة قلوب

    تعزف نشيد

    والعيد عيونك يا عيوني

    واي عيد؟!

    -
                   |Articles |News |مقالات |بيانات

10-27-2006, 07:12 AM

mamkouna
<amamkouna
تاريخ التسجيل: 12-05-2004
مجموع المشاركات: 2246

للتواصل معنا

FaceBook
تويتر Twitter
YouTube

كيف احذف مداخلة من بوستى

أحلى ناس.. (Re: soma)

    العزيزة..الحنينة..سوما..
    كل يوم بخش آكل في قدحك و أمسح يدي في توب حبوباتك و حبوباتي..
    بوست حنين..و ونٌاااااس و مثير للشجون..
    تسلمي يا ست البنات..
    واصل يا شيقوق حكاياك...وصلنا لغاية ما أدوك البطانية السمحة و قعدت تبكي لفراق الأهل..أها بعد داك حصل شنو؟ دايرين كل التفاصيل لغاية ما نصل للبورصة و الإنتخابات..سمح؟؟!!

    صحي و الله..ناس السلطنة ديل أحلى ناس.
    كل سنة و قدحكم مليااااان و فايض..و خيركم عمراااان وزايد.

    ممكونة
                   |Articles |News |مقالات |بيانات

10-27-2006, 11:27 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: أحلى ناس.. (Re: mamkouna)

    Quote: واصل يا شيقوق حكاياك...وصلنا لغاية ما أدوك البطانية السمحة و قعدت تبكي لفراق الأهل..أها بعد داك حصل شنو؟ دايرين كل التفاصيل لغاية ما نصل للبورصة و الإنتخابات..سمح؟؟!!


    ازدان البوست بحضورك معنا وما اسعدنا ونحن نرتشف القهوة الجميلة في بوست صباحنا سومة واكيد قهوتنا ما خمج فخار ووقاية جميلة وتعقبها البركة الحنينة.
    القلوب شواهد اختى ممكونة بصورة لا ارادية اشرت لاسمك في بعض مداخلاتي في هذا البوست وما كنت احسب انك متابعة والمجالس بالامانات لكن ذكرناك بالخير والبركة .

    كتر خيرك واعدك باننى ساواصل الكتابة عن مسيرة حياتي التي كنت افكر منذ زمن اعدادها في كتاب ولكن مشاغل المهنة .

    لكم مودتى
                   |Articles |News |مقالات |بيانات

10-27-2006, 12:01 PM

mamkouna
<amamkouna
تاريخ التسجيل: 12-05-2004
مجموع المشاركات: 2246

للتواصل معنا

FaceBook
تويتر Twitter
YouTube

كيف احذف مداخلة من بوستى

مشوار ود شيقوق.. (Re: soma)

    Quote: عنوان الكتاب سيكون ( مسيرة حياتي من البادية للبورصات)
    سوف تحكى الرواية عن التعليم ومناهجه بين الامس واليوم
    وكذلك ضياع الالاف من ابناء الريف لاسباب بيئية واجتماعية واقتصادية
    سيتطرق الكتاب الى ظاهرة الزواج المبكر ما له وما عليه
    وتجربتي في التوفيق بين الزواج والدراسة
    الصراع العائلي بين الاب الصفوي والام المتواضعة فكريا
    دراسة القانون وممارسة مهنة المحاماة في المناطق النائية وكيفية اعمال النظريات والفلسفات القانونية في قضايات هذه البيئة .
    ثم تجربتي في العمل السياسي عند ترشحى للانتخابات البرلمانية
    وسيخصص الفصل الاخير من الكتاب عن الاغتراب


    ود شيقوق..
    كل نقطة من النقاط دي بتحتاج مُش ل بوست منفصل..
    بتحتاج ل (( بورد )) منفصل..
    شوٌقتنا أكتر..
    نحن..وراك..أمامك..يمينك..يسارك..
    و معك قلباً..و قالباً.
                   |Articles |News |مقالات |بيانات

10-27-2006, 12:40 PM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: مشوار ود شيقوق.. (Re: mamkouna)

    Quote: ود شيقوق..
    كل نقطة من النقاط دي بتحتاج مُش ل بوست منفصل..
    بتحتاج ل (( بورد )) منفصل..
    شوٌقتنا أكتر..
    نحن..وراك..أمامك..يمينك..يسارك..
    و معك قلباً..و قالباً.


    تسلمى ميمونة اختى كلامك جميل ودافع للكتابة و( مشوار ود شيقوق يصادف هوى الكثيرين من الاخوة والزملاء) وبالتالي سيكون واحد من العناوين المقترحة للكتاب. بالمناسبة اختى ممكونة احيي من هذا البوست الدكتور القانوني الضليع محمد احمد الطاهر الذى يعمل الان مستشارا قانونيا بالمملكة العربية السعودية . كلامه لى نفس كلامك ده عندما كنت في جلسة معه مع زمرة من الاصدقاء كنت وقتها اروى بعضا من مسيرة حياتي .

    لك ولاختى رائدة البوست سومة اطيب المنى

                   |Articles |News |مقالات |بيانات

10-27-2006, 02:15 PM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: مشوار ود شيقوق.. (Re: الطيب شيقوق)

    نواصل يا سومة اختى وممكونة الحنينة متابعة معانا

    كان من ضمن الطلاب الذين تم قبولهم معى من اهلي اخي ابن عمي دكتور البدرى بابكر احمد (امبلي) والذى لديه مسيرة حياته الخاصة من البادية الى لندن حيث يعمل الان طبيبا للنساء والتوليد ببريطانيا . كنا كابناء قرية واحدة نمثل مجموعة تتميز بثقافة فريدة داخل المسرح المدرسي . كنا نحاول ان ننأى بانفسنا عن ابناء المدينة الذين يقيمون معنا في الداخليات وكان لدينا راى في طريقة حديثهم وملبسهم وسلوكهم . كان هاجسنا الوحيد ان نكون في غرفة واحدة وقد كانت بداية المواجهة مع ادارة الداخلية هو كيفية ايجاد غرفة تجمعنا لوحدنا .

    لم تبدا الدراسة وقتها بصورة منتظمة في بداية العام الجديد لان الحشائش كانت تغطى مساحة كبيرة جدا من حرم المدرسة وقد جرت العادة على ان تستفر طاقات الطلاب للنظافة في بداية العام . وكان لايسمح لاى طالب ان يخرج من سور الداخليات الا بعد الحصول على اذن من الرئيس العام للداخليات ولفترة زمنية تحدد من قبل الرئيس . كان همنا في الايام الاولى هو الذهاب الى السوق لشراء ملابسنا وكانت المتعة في الخروج تتمثل في امكانية مقابلة بعض من الاهل الذين ياتون للسوق اما للتسوق او لعلاج مريض في مستشفى المدينة او للحصول على عمال للعمل في مشاريع اهلنا الزراعية ومجموعة من اهلنا تاتي المدينة لشربة عبار او عبارين من المريسة وعادة تعود هذه المجموعة الاخيرة الى القرية في العصريات وكنا نجلس تحت سنطة ظليلة في لحظة عودتهم الى القرية مرورا بمدرستنا لنشاهد هولاء وهم عائدون يترنحون يمينا ويسارا ونجد فيهم ، رغم انهم هكذا ، حنان الاهل وربما يتبدد جزء من مآسي الغربة بمشاهدتهم وربما يكونوا وقتئذ مادة للحديث عنهم الى ان يتوارون عن انظارنا .

    كنا ننظر لعصافير الخريف تشقشق على اغصان الشجر ونلومها في البقاء هنا في المدينة طالما لديها الحرية والحركة للذهاب الى الريف .

    نواصل
                   |Articles |News |مقالات |بيانات

10-28-2006, 00:39 AM

أبوذر بابكر
<aأبوذر بابكر
تاريخ التسجيل: 07-15-2005
مجموع المشاركات: 5505

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    أيامك كلها أعياد إن شاء اله يا اسماء
                   |Articles |News |مقالات |بيانات

10-28-2006, 01:05 AM

munswor almophtah
<amunswor almophtah
تاريخ التسجيل: 12-02-2004
مجموع المشاركات: 18557

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: أبوذر بابكر)

    وبيراع تصويرى دقيق رسمت سومه كل تفاصيل القدح وهيأت الناس إليه وكأنها تقدم لمن غابت عنهم تلك الطقوس قداحة أونلاين عيدية شامله كامله تفوق بذلك حاتم طى لأنها تحقق الأشواق لأتيانها بلبن الطير لمن سرقتهم بلاد الأعاجم ومن بلعتهم بوادى الجزيرة والخليج قالشكر لسوما لذلك السرد السليقى الجزل ولشيقوق شقيق إبداعها..........................



    وكل عام وجميعكم بخير



    منصور
                   |Articles |News |مقالات |بيانات

10-28-2006, 01:14 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: munswor almophtah)

    Quote: وبيراع تصويرى دقيق رسمت سومه كل تفاصيل القدح


    وباحرفك الندية اخي منصور يزيد القدح جمالا والقا.

    لك ولسومة التحايا النواضر

    شيقوف
                   |Articles |News |مقالات |بيانات

10-28-2006, 06:20 AM

waleedi399
<awaleedi399
تاريخ التسجيل: 08-20-2003
مجموع المشاركات: 2766

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)


    العزيزة .. الشاعرة الرقيقة اسماء الجنيد

    او كما يحلو لي واصدقاءها ان يسمونها وينادوها بسوما ..

    عيد سعيد عليك .. وكل سنة وانت بالف الف خير

    ربنا يحقق كل امانيك الطيبة .. ويرد غربتنا جميعاً
    Quote: يوم العيد .. شاى الصباح وبسكويت العيد
    واللقيمات المعتقه بنفس الحبوبات . وقبالو العصيده تكملة القدح..
    لبس الصغار وفرحة الكبار والجلاليب البيضاء والقلوب الابيض منها
    والشالاات والعمم الملفوفه بى فن رفيع..
    والطواقى المشنقه بى مزاج وتوب الصلاة الناصع
    والحبوبات الحنان والسبحة والتبروقه
    وما اجمل العيد وصلاة العيد فى مجتمع القريه.
    من أجل ان نعود ونشوف كل العادات والتقاليد القديمة على الطبيعة

    على الرغم من أنها قد بدأت تتلاشى وتندثر شيئاً فشيئاً ..

    اعاد الله تلك الايام الخوالي يا سوما .. قولي أمين

    أمين ثم امين
                   |Articles |News |مقالات |بيانات

10-28-2006, 01:41 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: waleedi399)

    حباب اولاد امى الحنان
    عشا الضيفان وركازة الحبان
    تسلموا كلكم يا رب

    صاحب السرد الشيق ..اخوى ود شيقوق
    حبابك ..
    ياخوى آخد خاطرى فى شنو ؟ وشغلة شنو البتشغلنى
    من متابعة سردك بى شوق وتشوق
    بالعكس .. علمتنى النشاط اليومين ديل
    اجى جاريه جرى ..اقول اخلص الفى ايدى ده
    واجرى اقرأ نضمى اخوى الطيب السمح
    عجبتنى الفكرة جداااا عن توثيقك لمسيرة حياتك
    ومتابعه معاك والله بى شغف
    اما ما يتعلق بموضوع الاغتراب والمغتربين..
    ابشر بالخير العندى كلو بديك ليه
    طبعا مانى قدرك فى النضمى والسرد ..
    لكن بباريك تب وان شاء الله ربنا يوفقنا
    واصل يا عشا الضيفان خيتك معاك تب..

    ***
    دكتور محمد الحسن
    العيد مبارك عليك .. علينا وعليك يتبارك
    العفو لله والرسول
    كل سنة وانت طيب ..ربنا يحقق كل امنياتك يا رب
    شكراااا اخى على نداوة حروفك ورقة معانيك
    والبوست معاك بزيد بهجة وتألقا
    شكرا اخى ..شكرا لمة اهل وفرحة عيد...

    ****
    الحبيبه الغاليه ممكونه .. حبااااااااااااااااابك يمه
    وانا اقول قدحنا ده مالو مبروك كده وزايد محنة
    اتاريك انتى معانا فى بطن البيت ..
    حبابك يا ست البنيات لى حدهن
    طلتك براها عيد يعلم الله ..
    كل سنه وانتى طيبه ..ربى يحقق احلامك ويسعد ايامك
    بوستينا عمران بى وجودك والله
    خليك معانا يا ست البيت
    شكرا يا غالية من وسط الاهل
    شكرا ممكونه جبنة متكيه ولمة عصريه

    ***
    ود امى الحنين .. ابو ذر المطر
    العيد مبارك عليك يابا ..
    العفو لله والرسول
    عارف يا المطر اتذكرتك فى احدى ليالى رمضان الجميلة
    بالنادى السودانى بمسقط وحديث عن ذكريات المدن والقرى
    وتم اختيارى للحديث عن الجنيد الحلة
    وجات سيرة جدنا الشيخ حياتى وقبته المبروكه
    اريتك كان معانا يا العشا
    عارف يا الطيب يا خوى .. ابو ذر ده ود عمى لزم
    حبابك من تانى وسلامى للعقاب يا الحنين
    ***
    اخوى منصور
    يااااااااااا سماحة الطلة
    ود الفريق البفرج الضيق
    زغرتن يا بنوت وكبرن القدح
    جانا سيد الكرم البشتت الفرح
    قدحنا مااااااكن تحت ضل نيمه
    جمبو هبابين وبنابر هول ناس حليمه
    النعمنو ضيوفنا كتار
    وشفعنا فى الميس لامين الغبار
    وبرضو فرحانين
    حبوبه بى قلايتها وبنها
    فناجينها فى صينية الالمونيم البتلمع زى فص الماس
    الونسة مع الضحك جابت الجيران
    حبابكم يا السمحين
    تسلم اخوى منصور ..
    يديك العافيه يا اصيل على كلامك الديمه جميل
    شكرا اخوى منصور شكرا موية زير نقاعو بااااااااااارد

    ****
    وليد هلا يا الغالى حباب العيد وحباب وليد
    يعلم الله طلتك عيديه ... وكلامك عيديه
    ومافى احلا من عيديتك يا ود ملوك النيل
    ود الاهل الطيبين الناس القبيل
    كل سنة وانت طيب يا السند
    ربى يحقق امنياتك ويعيد عليك العيد بالخير الكتير
    آميــــــــــــــــــــن ..
    وآميـــــــــــــــــــن لدعواتك السمحة زيك
    ربنا يلمنا كلنا بى قدحنا ده وسط اهلنا وفى ضل بيوتنا
    وناكل قدحنا ونكمل فرحنا
    شكرا اخى العزيز وليد .. شكرا امنيات جاية منك
                   |Articles |News |مقالات |بيانات

10-28-2006, 02:10 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    اخوى ود شيقوق ..
    عارف من ما قريت كلامك عن التوثيق
    طوالى مشيت افتش فى الشىء الكتبتو زمان
    واتذكرت بوست الجنيد الحلة .. لكن وحات خوتك غلبنى القاه ليك
    الا ببحت ليك كم موضوع كده وبستعين بذوى الاختصاص فى الحصول
    على المخفى..
    فى محاولة كتابة رواية .. كتبتها بدرى قبال 5 سنه تقريبا
    اسمها ( حكاية من الواقع).. لاقت صدى كبير
    من الاخوان فى الغربه وداخل البلد
    نزلت بدرى فى سودانيز اون لاين وكانت الردود ليها اثر عميق فى نفسى
    كل الشغل ده كان فى الموقع (( سومات)) لظروف فنيه مقفول حاليا
    اترددت كم مره انزل ليك حكاية من الواقع .. لانى عارفاك حنين
    وما دايره اخرب ليك مزاجك مع القدح والعيد ..
    لكن برضو قلت لازم انزلها ليك ..لانه فيها ذكريات
    وذكرتنى بى طريقة سردك الشيق
    اسمح لى انزلا هنا واتمنى انه تعجبك وماتعكنن مزاجك ومزاج
    اخوتنا واخواتنا زوار البوست..
    ومن هسه اعفو لى يا اهلى..

    ***
    حكاية من الواقع
    الزمان في شهر مايو2001. ألا جازه السنوية. المكان قريتي الصغيرة الكائنة في قلب الجزيرة وسط الجروف والبحر والحواشات الكتيره . كنت زي كل مره وزي كل الناس بفرح بالا جازه . امشي السوق واتبضع والملم في الهدايا لي الأهل العزاز, والجيران, والأصحاب , وباقي الأحباب . استف شنطي قبال شهرين وامكن تلاته, و اقعد احسب في الأيام تمشي تمر زي سلحفاة يمر يوم ويرجع ورا أسبوع , النوم يطير من الفرحة , بعد الناس تنوم اقعد احسب في باقي الأيام الجايه, أتخيل في يوم الوداع من ما يجوني صاحباتي واشيل ليهم الحاجات, والجوابات , و لازم اتذ كر الصاحبات عشان اخلي ليهم مساحة في الشنيطات ..واسرح بعــــــــــيد أتخيل يوم السفر من الصباح حتى الغيار البلبسو يوم السفر بتخيلو . ما دا بكون اشتريتو قبال ما أفكر في السفر .
    لانو بذ كرني بي السفر و يوم السفر , ويوم اللقاء المنتظر, اصحا بدار لا باكل ولا بشرب شاي الصباح. ولا رأسي اليوم داك بحس بالصداع , ما الفرحة اكبر من كل الظروف , حتى التعب من السهر براه بروح , امشي المطار زي الصغار, اضحك أتبسم وعلى البشوفو كلو اسلم . استنا في صف العفش والناس دافسه دفس . كل الشنط مردومة ردم , وناس كتيره اكتر من الشنط الفي المطار, تخاف تقول ديل كيف شايلم المطار. ولا الكلام الطيارة ! يا جماعه ديل كلهم ماشين معانا ؟ لكن وللاسف ما كلهم حا يضو قو السفر . فيهم الليهو سنين ما قادر يسافر , ولا حتى بقدر على حق التذاكر, الله كريم عليهم. ما في زول ما بدور السفر وشوفة الأهل , لكن الظروف القاهرة نعالجا كيف ؟ المهم أصحابنا ديل عندهم الجوابات , دايرين يرسلوها ومعاها حبة قروش وشوية حاجات , يجوك يستأذنوك, لو ممكن تشيل يا زول ؟ . فيهم البتضارا من الناس ويتصرصر , الله لا وراكم لا بساعد ولا وجها صبوح منو يعتزر . أهلنا مجبورين يمشو لي أتنين تلاته , محمد المسكين ليه من اهلو عشرة سنين.. والزيو كتير مشهد بسيط لى الزى محمد المجدوع فى بلد الغربه وبفرح لما يلم ليه قروش ويحسب متين يلقى ليه زول مسافر البلد ولامن يغلب يجى المطار وزى الطيره الضايعه يقعد يتلفت لى زولا يعصر سلامو ووصيتو ويوصلا البلد والاهل بى شوقو الطول .. يمشى لى كم زول ، مرورق الدمعات من الجفا مره والاعتذار مرات .. يضارى دمعتو ورا شوقو لى اهلو وفرحت الناس المسافره الماشه لى داره . بتخيل وبتمنى اللحظه دى ويصحا من حلمو ويرجع يفتش تانى مكسور خاتر .. وغيره كتيرين جايين مودعين وما مسافرين . وفيهم البجى يتبرك بى الجو راجعين من البلد وفيهم غبشة اهلنا وريحتهم . محمد مر على كل الجموع دى شايل عشمو فى كفه وشوقه لى اهله فى كفه تانيه ويشحد فى الله يلقى مراده .. الله كريم .. في النهايه وقبل مواعيد الاقلاع بى زمن بسيط . يشوف ليه حاجه جايه , يقول احسن لى الحاجه الكبيره دى . . وكلامو صاح تلاقيه الحاجة تتبسم وتتلعثم في الكلام , وبالأحضان بتسلم , اهلا حبابك آعشاي
    كيفنك يمه .. خلاس مسافره ؟ آى يا ود حشاى الليله ماشه تب . كان الله هون وراجعه لي وليداتي , جيت لي ولدي العشاى دا , طولت منو بالحيل .. اتو آولادى مالكم بتنقطعوا مننا كدى .. والله يا الوالده الحالة هنا صعبه لكن الله غالب .. اتدعى لينا الله يسهلا لينا ونرجع ليكم قريب ان شاء الله .. تخت الحاجه كيسها الشيلاه فى قدامها وتهجروا بى رجليها وترفع يديها لى رب العباد .. شاحده الله ورسول مكه يا اولا دى يجيبكم لينا سالمين تامين غانمين بركة رب العالمين ..قولوا آمين ..آميــــــــن . اها يا حاجه بس اديك الجوابات ديل لي أهلي, بتصلو بيك وبجوك في بيتك , من مكانك ما تتحركي. سمح يا ود حشاى لكن اكتب العلوان. وصاحبنا يتنفس نفس طويل سمح يمه .. ويتحزم يساعد أخوه ود الحاجة في العفش , لما ينتهوا من الوزن يقيف مع المسافرين , لما يدخلوا الصاله .. والحاجه تمشي يجيها بي الأحضان يودعا كأنه بعرفا من سنين , ونمشي الصالة , وهاك يا لخمه وإزعاج , كل واحد يصلح في الأكياس ا لشايلا , كل واحد فرحان زي يوم العيد, وتجي الطيارة , والجميع يتشابا يشوف الطيارة , زي أول يوم يشوفا. بعد التعب وزحمة الناس , وركوب الطيارة..
    يبدا المشوار. العالم جايطه والأطفال تجارا, كأنهم في حارة ما في طياره. والباين عليه التعب, شويه يتقلب, ويتقلب, وهاك يانومه. والبقرا في جريده, والبشوف في مجلة لا فيها قصه ولا قصيده, بس تكسير زمن ..
    رحله طويـــــله , ومن فوق يلوح لينا غبار بلدنا, والطوب الأحمر المجدع في الشوارع , والشجيرات , والعربات السمحة والمكسرات , وكيمان كيمان العمارات , قلبى يقول تح... تح.... اها وصلنا يا ناس . ديك الخرطوم , وامدرمان, وديك شمبات والجريفات ، أدور أطير من الكرسي واجرى أخلى القاعدين. اقعد اضحك براى من الفرحة, واتمتم بى كلمات بس ما فاهمه شئ . ولا المعاى سامعنى كل زول في حالو. ولما تقيف الطيارة , نتزاحم اكتر من أول؛ زي الماشين كلنا بيت واحد, بنتسابق على الطريق نشيل ونخمخم في الشنط والا كياس الشايلنها في أيدينا. التوب يتكرفس, والوليدات يتصايحو من الفرحة .الكل فرحان , كبير, صغير, مافى فرق في اللحظة ديك من كبير ولا صغير. وجوه المطار هاك يا انتظار . اصعب انتظار, طياره طيارتين قدامك ,ما دا زمن ألا جازه. اقعد بعيد واتفرج شديد. لما العفش يجيك ، وأعمامنا الكبار الشغالين في المطار، متلهفين زينا لي رزقم من بخشيش , أكان دولار, أكان ريال، ما هم برضو بحسبو لي ألا جازه وجية المغتربين لي اهلم .. ولما نكون خلصنا من التفتيش ولم العفش، والشنط زاتا ما بتشيل كل العفش ,التقول ما كان فيها ده كلو . نحن ما كنا دافسنها دفس... ومتين نخلص من العفش, نمشى لي الناس الحنان المستنينا من زمان , في الحر والغبار. ليهم ساعات طوال ...
    بعد السلام والمطايبه, نفكر نجرى لي الناس الكبار , المابقدرو لي جية المطار , والزينا شوقو بيطول .. ما نحن ما من امبده , ولا السجانة, ولا المحلات القريبة.. نحن من الجزيرة , ساعة ولا أتنين بالكتير ونصل الحلة . بعد ما نمر بي حلال أهلنا من سوبا , والمسعود يه , الأجمل من السعودية ،والتي و المسيد وأبو عشر, لمن نصل البحر . وهناك يجينا نسيم أهلنا والطين , والجبنه , واللمه ,ولمن نصل تكتمل اللوحة بالسلام , والدموع , والابتسامات , وصياح الأطفال والجيران.
    اها الجماعة وصلو ؟ آي وصلو , ألف حمد الله على السلامة ، الله يسلمكم يا أخوانا ،العمات , الخالات , الجارات , الصاحبات ,كلهن يجن جاريات , بعد السلام واللمه الكبيرة ,نشوف المهم من أحوال الديره , نمشى نعزى في هوايد الليل قبال الصباح , ما ناس عشه بكاهم حار وما بتخلى لي الصباح ,والباقي من أخبار الحلة لي الصباح , قبال شراب الشاي.
    وناس البيت في عقاب الليل يتقسموا في الحاجات , دى حقتى ، ودى حقتك ,والبيت كلو يقيس ويعبر في الحاجات , وتجيك ريحة الحبهان , والصابون, والمعجون , وتمشى تنووووووووم . بعد سهره طويلة , لا فيها تعب , ولا مرض . وكمان من الصباح اول زول تلقاك صاحى وفرحان , مشتاق لي شاي اللبن , وموية الزير .
    وتبدأ أحلي أجازه مع الأهل .سلام بالأحضان من أول الحلة لي آخر الحلة ,الصغار , الكبار , أسبوع سلام الناس داخله ومارقه أفواج, أفواج , منهم من شايل عامود أكل , ومنهم قهوة ضهر ,والعروس بالليل تجيك تكوس .
    ولما ألا جازه تنقضي يجوك مودعين تانى بالعشيات , والونسات , والضحكات ,وأنت سارح هناك تتذكر نهاية اجمل اللحظات . وتودعم على أمل اللقاء بهم في ألا جازه الجايه بأذن الله .تفارقم وقلبك معصور ألم , مع نغمات الوداع الحنينه , الحزينة , ترن في مسامعك . ودعتك لي الله والرسول , وداعتاً تغطيك وتحفظك وترجعك بالسلامة , ودعناكم الله والرسول , ودعناكم لى أمين الوداعة البختا البلا والساعة.. . وداع وأمنيات جميلة تصبر وتجرس في آن واحد .....المرة دي وقبل ألا جازه بي أسبوع بس, يا خوانا بعد ما اشتريت كل الحاجات وعملت كل التجهيزات الحكيتا ليكم.. من الصباح التلفون صاح.. اللهم اجعلوا خير في شنو؟ جاني الخبر. خبر السواد... خبر الرماد... أبوك مات... آه أنا . ابوى مات ؟؟؟ وووووب انا .....
    أنا الولهانة لي شوفتك ,أنا المشتاقة لي ضمك...آه أنا... بعد غياب سنه ونص آه أنا.. الكنت بتكلم معاك قبال يوم بس ... آه أنا... الماشة ألا جازه أعيد احلي سيناريو بتكرر علي كل مره . لما نصل بتجي جاري قبال ما تقيف العربية ,ووووب انا لمن تسلم بتلمنا, وبتخمنا كلنا, آه أنا... وو ووب أنا... اتجر ست, واتبهدلت, والخبر يا أخواني في الغربة حار..
    و موت الابو يا خواني نار.. صعب الفراق , صعب البصدق الخبر . والأصحاب ما بقصرو بس الصعب انو الخبر كيف تتقبلو.. خليت, الشنط ,خليت العفش, وشالوني شيل لي المطار, الكنت بمشيه براي بي شوق وفرحه. كرهت المطار, وكرهت السفر في اليوم داك, ولمن وصلت لا شفت بلدي, ولا غبار بلدي , ولا العمارات, ولا الشديرات , ما العيون بالدموع مليانات , آه أنا.. من اللقاء جوه المطار, من الأهل الواقفين بره المطار , الكل جاي يعزيني , يواسيني , الموظفين, الموظفات , الطلبة , الطالبات, أولاد أهلي الفي البندر, والبنات الفى الجامعات, واه أنا من شوفة الأهل, كمان معاهم محمد اخوي الصغير البعد موت ابوي بقي كبير وجاي يصبرني ومستقبلني في المطار. آه أنا... يا أخوانا السلام كان بالفاتحة, والقبلات كانت بالدموع , والجاني كلو شايل السلام بعد الفاتحة.. أتغير ا لكلام, العبارات اتبدلت من المصيبة الهلت علينا, الله يصبرك, والله يصبرك, وآه أنا من المشوار لي الحلة. وشالوني شيل وختوني في البوكسي , وماسكني من الحالة العلي أهلي الكبار,واه أنا من الوصول , قبال اصل شلت الهم كيف اصل, وين أبوي الكان بجينا قدام الباب؟ وين أبوي الكان بسلم بي ترحاب؟ وين أبوي ؟ وين أبوي؟ نزلت زي المجنونة ما شايفه الناس, ولا شايفه اللمه, حتي الملامح اتغيرت, من ناس بيتنا لي الجيران, والأهل كلهم, لانهم بكوه شديد, واتبهدلو, وجيت أنا بصوت مبحوح, ما بطلع حتى لو طلعت الروح.. دايره اكورك, دايره ابكي, ما قادرة أنا. اه أنا... أخواتي الصغار ,أخواني الصغار, أهلي الكتار, ابكي مع منو؟ اعزي منو؟ أمي الحنينه المتوجعة, ومتصبرة, وبي التوب الأبيض متلفلفة؟ آه أنا... ووووب أنا... يمه صحي أبوي مات ؟ قولي الحمد لله يا بتي استغفري الله... احي أنا ..وو ووب أنا.. ما شفتو.. أسبوع واحد بس. واجيكم. يمه هيــــي يا يمه صحي أبوي مات؟؟ يا أخواني هيــــي. صحي أبوي مات ؟ حتى أخواني الأولاد الكانو بالعين عبرتم ومتصبرين شافوني زي المجنونة ما مصدقة قالوا ووووووب. ونسوا الصبر. ونسو الناس المعانا , قالو ووووووب, آي أبوك مات, أبونا مات....

    قالوووو وووووب, زي النسوان الواقفات , قالوا وووووب , و جاني عمي, وجاني خالي, والناس الكبار , ما فيهم من قال اتصبري, اتصايحو معاي وردحوا ردح وصرخوا زي شفع صغار , والدموع ماشا جاريه زي بحر حزين, وأنا أقلد في الكبير والصغير, أمي, أخواني, أهلي وحباني, جاتني الخالة, جاتني العمة, يا عمتي هووووي صحي أخوك مات؟؟ احي أنا يا بت أمي أبوك مات.. . مات الاخو, مات الابو, مات الخال مستور الحال , طويل البال. خال الوليدات. مات الحنين, مات الخزين, أحي أنا... مات الوسادة, مات الركازه, مات المهل عشا الأهل, مات المربى , مات المدرس, مات الكلس, مات ألما بعرف لم القرش , احي أنا وو ووب أنا... يايمه كيف السلام؟؟ كيف الحضن والضمه؟؟ كيف مع الأهل اتلمه؟؟.يا يمه يا حبيبة الضلمه... يوم طويل يوم ما بتمناه لي عدو, ولا حبيب , وكل ما أقول أتصبر, أشوف أمي متلفلفة بالتوب الأبيض واتذكر, والعيون ترقرق, والدموع تنهمر, وحا تظل تنهمر, وتنهمر, لمن أموت واحصلك, يا يابا .ما بقدر اعمل شي دا القدر, وكل البقدر عليه ا رفع الأيدي أتتضرع, لي ربي الكريم يرحمك, وفي جنان الخلد يكون مسكنك, ويا الله الكريم تصبرني, و يا أخواني الكرام أتدعو لي , الله الكريم يرحم أبوي, ويصبرني..
    اسماء الجنيد مسقط
    اكتوبر 2001


                   |Articles |News |مقالات |بيانات

10-28-2006, 03:34 PM

Omayma Alfargony
<aOmayma Alfargony
تاريخ التسجيل: 09-01-2004
مجموع المشاركات: 1434

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    سوما

    كل سنة وانت وجميع افراد اسرتك طيبين.

    ربنا يديك الفي مرادك.
                   |Articles |News |مقالات |بيانات

10-28-2006, 10:44 PM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: Omayma Alfargony)

    Quote: اسمح لى انزلا هنا واتمنى انه تعجبك وماتعكنن مزاجك ومزاج
    اخوتنا واخواتنا زوار البوست..


    سوما تاني يا بت امي ما تقولى كدى بزعل منك .

    كلامك يا السومة في الغربة بيحكى عن لوحة يمتزج فيها الفرح بالبكاء . وسردى الشيق يا السومة اختى من فيض ابداعك الروائي .

    كتر خيرك يا بت القبائل وبعود ليك نواصل

    شيقوق
                   |Articles |News |مقالات |بيانات

10-29-2006, 02:45 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: الطيب شيقوق)

    في الساعة الثامنة مساء يوم الجمعة الموافق للأول من يوليو لعام 1969 م رن جرس الصفرة إيذانا بحلول ساعة وجبة العشاء . كنا وقتئذ لابسين( كاجوال) عراقي ساكوبيس شفاف بلون ابيض ناصع و سراويل طويلة وطواقي مطرزة باليد . كان أبناء المدينة يلبسون الأردية والقمصان الجميلة وأحيانا بناطلين مصنوعة من مادة الترلين الأملس خالص . كان هاجسنا هو كيف نتعلم لبس الأردية ورباط الأحزمة بل حتى كيف نكشف عن ساقينا .

    كانت وجبة العشاء دسمة للغاية فيها الخبز وفيها العدس وفيها الفول وفيها الجبنة وفيها الطحنية والمربة . حسبناه يوما لاستضافتنا ولكننا أدركنا أخيرا أن الحال ستبقى هكذا . كانت بالفعل لحظة فرحة يبدد سعدها تارة العودة بذاكرتنا للريف وللوالد و الأم كيف لهما ان يجدا من ينش أغنامهما من الصباح الى المدرسيب ( محل تجمع أغنام القرية ) من سيرسلا صباحا لشراء السكر والبن ومن سيجدا ليحمل الماء على ظهر الدابة إلى عمال الزراعة ومن يلحظ ناقتهم الولودة وهى ترعي باطراف القرية ومن يسجل لهم اسماء النساء اللائي يشترين الزعف- تجارتهم الرئيسية منذ اكثر من خمسين عاما وحتى يومنا هذا – ولا يدفعن كل أو بعضا من القيمة ومن ومن ...

    نواصل
                   |Articles |News |مقالات |بيانات

10-29-2006, 10:40 AM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: الطيب شيقوق)

    الحبيبه اميمه بت الفرجونى
    بت الحسب والنسب.. حبابك يا وش الخير
    طلتك فرحة صغار يوم العيد يا بت القبائل المى خمج
    يديك الف عافيه يا رب
    العيد مبارك عليك .. وربنا يحقق كل احلامك ان شاء الله
    شكرا اميمه .. شكرا باقة ملونه..

    ***
    حباب ود شيقوق .. واصل سردك الممتع
    متعك الله بى نعمه الكتيره
    حقيقى ابداااع .. ما شاء الله عليك
    اخى شيقوق .. اهديك الدهشة
    شكرا قطرات الندى
                   |Articles |News |مقالات |بيانات

10-29-2006, 11:22 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    Quote: حباب ود شيقوق .. واصل سردك الممتع
    متعك الله بى نعمه الكتيره
    حقيقى ابداااع .. ما شاء الله عليك
    اخى شيقوق .. اهديك الدهشة
    شكرا قطرات الندى


    سوما اختى البوست بوستينا نعزم عليه الناس وندق فيهو النحاس ونلعب فيهو الدرقة سااااااااااى .

    لك معزتي
                   |Articles |News |مقالات |بيانات

10-30-2006, 01:12 AM

الزنجي
<aالزنجي
تاريخ التسجيل: 09-05-2003
مجموع المشاركات: 4137

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: الطيب شيقوق)


    يا سلام عليك يا اخت سوما
    وانت تقلينا الى ذاك العالم الخرافي
    بكل الاريحية والعفوية وبهجه العيد وفرح الاحبة والاهل و الجيران

    لنا الله فى هذة الغربة اللعينة


                   |Articles |News |مقالات |بيانات

10-30-2006, 10:30 AM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: الزنجي)

    حباب الزنجى
    العيد مبارك عليك
    وكل سنة وانت طيب يا الاصيل
    ان شاء الله قدحنا عجبك يا الحنين
    ربنا يحقق امانيك ويرد غربتك سالم غانم يا الزنجى اخوى
    وتحضر القدح وسط اهلك وخلانك
    آميــــــن يا رب العالمين
    كتر خيرك على الطلة اخى العزيز
    وكل سنة وانت بالف خير
    شكرا الزنجى
    شكرا لمة فرح
                   |Articles |News |مقالات |بيانات

10-30-2006, 11:08 AM

معتصم دفع الله
<aمعتصم دفع الله
تاريخ التسجيل: 12-18-2003
مجموع المشاركات: 12722

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    Quote: ولمة جماعية فى اريحيه وصفاء باين فى الوجوه

    يا سلام عليك يا سوما وعلى كلامك الطاعم الفيهو ريحة الأهل وتراب الوطن ..
    كل سنة وأنتِ أجمل ..
    وكل الأماني الطيبة ..

    محبتي ..
                   |Articles |News |مقالات |بيانات

10-30-2006, 01:27 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: معتصم دفع الله)

    معتصم دفع الله .. يديك الفى مرادك يا رب
    وينك يا الحنين.. يا دخرى السنين
    العيد مبارك عليك.. علينا وعليك يتبارك
    العفو لله والرسول
    طلتك لينا صباح عيد يا صباح الخير
    يا حليل اهلنا ومحنتهم
    ان شاء الله نتلم كلنا وسطهم ونحضر معاهم الاعياد
    ونكمل معاهم القدح بالمحنة والفرح
    شكرا ليك مخلاية محنة
    معتصم دفع الله ... ودعتك الله
                   |Articles |News |مقالات |بيانات

10-31-2006, 03:52 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28975

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    Quote: حباب ود شيقوق .. واصل سردك الممتع
    متعك الله بى نعمه الكتيره
    حقيقى ابداااع .. ما شاء الله عليك
    اخى شيقوق .. اهديك الدهشة
    شكرا قطرات الندى


    بت العم سوما

    كيفك وكيف اخبار اهلنا كلهم

    ثمة اصوات نادت بضرورة تخصيص بوست لروايات العمر ليتسنى للقراء متابعتها من خلال عنوان يمكن ان يدل الى الرواية حيث ان عنوان (قدح عيد) ، في تقديرهم ، لا يتناسب مــع مواضيع الرواية وبالفعل خصصت بوستا لها بعنوان ( رحلة العمر ومشوار السنين)

    وحتى لا يفقدها المتابعون هنا فقد حرصت على نقل الجديد منها الى قدح العيد على الدوام .

    سيظل التواصل مستمرا معكم على الدوام

    لك معزتى
                   |Articles |News |مقالات |بيانات

10-31-2006, 09:08 AM

سجيمان
<aسجيمان
تاريخ التسجيل: 10-03-2002
مجموع المشاركات: 14875

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)



    سوما

    كل سنة وانتي والوليدات وابوهم والاهل كلهم بخير
                   |Articles |News |مقالات |بيانات

10-31-2006, 12:57 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: سجيمان)

    سلااااااااام يا دكتور سجيمان
    العيد مبارك عليك.. علينا وعليك يتبارك
    العفو لله والرسول
    كتر خيرك يا العشا على الطلة
    ربنا يعيد عليك العيد انت ووليداتك وامهم
    بالخير والسعاده و فى بلدكم ووسط اهلكم
    وتكمل القدح براك .. تخلص قداحة الاعياد الفاتتك
    قول آميـــــــــــــن
    شكرا سجيمان
    شكرا قدح مااااااااااااكن محكر تحت نيمة
                   |Articles |News |مقالات |بيانات

12-01-2006, 03:56 AM

لؤى
<aلؤى
تاريخ التسجيل: 06-01-2003
مجموع المشاركات: 14343

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)
                   |Articles |News |مقالات |بيانات

12-01-2006, 03:46 PM

nourelhadi awad

تاريخ التسجيل: 10-24-2006
مجموع المشاركات: 1111

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    العيد الكبير

    سوما العيد مبارك عليك وإن شاء الله من العايدنو
    جلابية ام لياقة من قماش البوبلين لسع ماانفشت وقد كنا لانعول علي الكي كثيرا... وكم يكون رائعا ان يكون مكتوب في طرف الجلابية صنع في اليابان... وشدة أو بلبل وصفارة و حنبوكة ونضارات بلاستك ظهرية لزوم القشرة.
    تقوم من الصباح تشرب كباية ( دبلة ) الشاي الماخمج ومعاهو اللقيمات
    كنا نخرج ولانعود للبيت حتى تتعب شمس الجزيرة ( كرني ) وتميل الى الزوال
    الجيوب عامرة بالفكة والناس في ذلك اليوم طيبون
    ودكان الحاجة نخل البقيع (الله يرحمها) ابوابه دائما مشرعة.. حلاوة عجل وحلاوة لكوم(اصبع بشير)وحلاوة جكسا وبالونات على أشكالها تقع....

    لكي أن تتخيلي ياسومة حلاوة + لحم = ؟؟؟؟

    ناس الخرتوم وناس أتبره كلهم جو....
    اولاد الخرتوم شكلهم مختلف بناطلين وشبط رباط وشراب وشعر مسبسب ..زي أولاد المجلات
    وكانت تكتلنا الغيرة حين تحتضنهم النسوة ... واحلاتي انت هيل منو ياجنا... بينما ينتهرونا اجرو ألعبوا برا أمشوا ضل التمر... وقد تلحقك مفراكة
    كان طعم العيد كبيرا
    حنة في حلة تحت وصفاح في فريق قدام
    وونسة لنص اليل وقديم بكسر القاف...

    سوما أثرت شجون
    سأعود.. للحديث بقية

    ربنا يحقق الأماني
    نور الهادي





                   |Articles |News |مقالات |بيانات

12-01-2006, 04:38 PM

عشة بت فاطنة
<aعشة بت فاطنة
تاريخ التسجيل: 01-06-2003
مجموع المشاركات: 4572

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: nourelhadi awad)

    يا سلام يا سومة قدحك عامر خليتينا نتمطق ، وبالمناسبة دي لازم نعيد في الجزيرة ، واظنك فهمتي قصدي ، أوع يكون شرك تثير فينا الحنين والحزن القديم عشان الخطوط تشتغل والله محنة يا بت الجنيد تخضرك وتسمح ايامك ..
                   |Articles |News |مقالات |بيانات

12-03-2006, 01:20 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: عشة بت فاطنة)

    لؤى الضى تسلم يا ضى شبابيك الاهل
    وانت يا العشا طلتك تشفى من وجع الفراق
    خليك قريب يا ضينا
    يديك العافيه ويسقيك محنة
    شكرا الضى.. شكرا فرحة صغار يوم العيد..

                   |Articles |News |مقالات |بيانات

12-03-2006, 01:54 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    اخوى ود القبائل المى خمج
    نور الهادى
    نور الله دربك وسهل امرك وعلا مراتبك
    اسعدتنى بالحيل يا الحنين
    ات اياكا منهم .. من هناااااااااك وسط اللمه
    والمحنة الدافقة بلا حدود
    تسلم يا مطامير الجدود
    عجبنى نضميك بالحيل وراجية طلتك من تانى
    قدحنا طعموا اتعتق وقرب البعاد
    يديك العافيه يانور يا خوى قدر المحنة الفى القلوب
    ويسعدك ديمه
    فى انتظار طلتك
    وهدية منى ليك اهل القبيلة يا ود القبيلة



    اهل القبيلة
    ********

    الصندل المكنون
    جرتق الفرسان
    الخرزه والكمون
    من عين حسود انسان
    راكوبه وسبيل
    تيبار سقى العطشان
    بروشنا مفروشه
    لقراية القرآن
    الحلقه مزروبه
    صفوف من الحيران
    اللمه فى حوشنا
    تطمن الضهبان
    الخلوه معروفه
    و الرايه فى الديوان
    نارنا موصوفه
    بتوج مع الآ ذان
    الناقه مضبوحه
    والناقصه بالتيران ..
    الكسره مردومه
    وملاحنا بالقيزان
    الجد البطايب
    ركازة الحبان
    عصايتو معكوفه
    لمباتو بالقيطان
    ايدو مخلوفه
    للشوره والاحسان
    قلبو الحنين
    بياضو زى دبلان
    الغره فى جبينو
    للتوبه والغفران
    الجبنه وبخورا
    تكيه للضيفان
    مراحنا السعيه
    عشانا و الجيران
    عشرتنا الولوفه
    خوتنا زى تيمان


    اسماء الجنيد مسقط
                   |Articles |News |مقالات |بيانات

12-05-2006, 04:42 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: عشة بت فاطنة)

    عشة الحبيبة المن القليب قريبة
    الدار والقدح عامر بيك وحات الله
    والله يا عشوشة لو لقينا العيد فى البلد كلنا بنفرح بيه
    ضحكتينى طبعا .. انتى كان ما شالتك اى خطوط طيران .. تشيلك الاجفان
    يا ريت والله نتلم كلنا فى اهلنا ونعيد ونتبرك بى دعواتهم الحنينة
    شكرا الحبيبه الغالية عشة .. نورتى البوست .. ونورتى البورد بى رجعتك بى جديدك المبتكر
    حبابك ياست الطيبه
    شكرا عشة ..
    شكرا أردب محنة
                   |Articles |News |مقالات |بيانات

12-04-2006, 12:22 PM

nourelhadi awad

تاريخ التسجيل: 10-24-2006
مجموع المشاركات: 1111

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    سوما
    ربنا يديم البسط
    وكتر خيرك وبارك الله فيك
    ويطيب خاترك
    قالو ياسوما أختي : زمااااااااااااان قبل مانحن نتخلق جات فايته جنازة بحر ركزت في ترتور البحر قصاد الجزيرة بالشرق وأبدا لا اتنفخت ولا أكلها الحوت وباين عليها الصلاح وفدعفنه ما مرقت منها وكانت لي راجل غريب وفي رقبتو سبحة بي عدادها ...وشكلو من أهل الصعيد من بعيد.. قاموا اهلنا ناس السافل مرقوه من البحر ودفنوه في ضهر العدوة وعملولو مزاره وسموهو الشيخ راجل العدوة وكان مقطاع بحر بالنسبة لأهل جزيرة كرني وكانت النسوة كثيرا مايزورنو في الأعياد والمناسبات بام أربع كرعين ويشيلن منو تراب البركة (يابة راجل العدوة تلحقنا وتحضرنا) ويختن ديك الفكة الما خمج ونحنايعجبك نتكابس عليها والحشاش يملا شبكتو ( قرش تعريفة وفريني)
    ويعملو فوقو الكرامة يضبحو العتان وبليلة العيش ويغشوهو العرسان بالسيرة ياعديلة يابيضاء ويسوا الجابودي والدلوكة تعكل ويركز الجنيات وسوط البطان يرهز
    كنا ايام العيد نتفكا من الرعية ونستحم بالصابون الحلو الجايبو ابوي من الصعيد حكاية دايرة صبر وكمان الريحة ريفدود لابت السودان ولابت القسيس ولا ريحة السيد علي .
    ونواصل
    مااطول عليك فهو حديث زكريات مسجونة في الخاطر وجزاك الله خيرا في الافراج عنها
    والله يديمها اعياد ولمة ورحمة ولحمة وربيت بركة اللا نام ولا لاك الطعام
    واقعدي في امان الله والى لقاء
    والسلام
    نور الهادي

    (عدل بواسطة nourelhadi awad on 12-05-2006, 07:16 AM)

                   |Articles |News |مقالات |بيانات

12-05-2006, 04:33 PM

soma

تاريخ التسجيل: 09-14-2002
مجموع المشاركات: 4120

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: nourelhadi awad)

    نور الهادى الحنين
    الشوق قمر دورين
    نضميك سمح بالحيل
    يسوقك من باكنك ويوديك للسمحين
    حبابك من تانى يابا
    حبابك يا ركازة الطيبين
    عارف يانور ياخوى
    حلال اهلنا فى مختلف بقاع السودان طبعها متشابه جدا
    خاصة الجزيرة
    نحن عندنا شدرة فى نص الحلة من قمنا لقينا فيها ضريح
    وفوق الشديره دى معلق شوية دلاقين كده..
    البجى يزور كلو بربطوا ليه شريط فى يده فوق ..خاصة الشفع الصغار
    يقولو ليك دى الزواره ويكتحوك بى حبة تراب من ا########## ..
    الشريط ده لو صادف وربطوه ليك فى يدك اليمين فوق
    تحلف تقول كابتن برشلونه لوووول..
    عارف .. فى حاجة كبيره الله يرحمها تجى تعمل الجبنه
    كل يوم جمعه فى الضريح ويجن يتلمن معاها نسوان الحلة كلهن
    فد قعده من عصرا بدرى لامن ياذن المغرب..
    جبنة وبليلة وشفع يتجاروا
    نسيت اقول ليك الضريح ده للشيخ حسن ود حسونه زى ما سمعنا من اهلنا الكبار
    لكن جاء الجنيد كيف علمى علمك .. الا بسأل ليك عشان ما تقول بت الجنيد
    ما ناقشة تاريخ اهلها لوول
    نرجع لى زوارة شيخنا ود حسونه
    اها بعد الحاجه ما ماتت الله يرحمها مسكت بدلها بتها مرا كبيره
    ودرويشه كده الله يطراها بالخير .. اسمها حليمه
    اتى يا حليمه ان وجعك ضرسك تجرى لى الشيخ حسن ود حسونة..
    ساكن جار الضريح ده بالحيطه راجل ظريف ونكتة..
    وحليمه دى جننتو كل يوم جاية تنبح فى طرف حيطته..يا سيدى الحسن يا ود حسونه ..مرات يكون نص الليل .. وتشيل وتحفر فى الواطه وتتبرك.. شفت بساطة الناس دى كيف ؟؟
    اها يوم كراعها وجعتها وقامت جاريه نص الليل تحفر فى تراب الضريح وتتمسح
    قومى يا المويه تعالى ناطه ليها فى وشها .. واشتغلت تكورك سى .. سى .. يلحقنى وينجدنى .. شيخى جانى .. ونست وجع الكراع وقامت تعرض وتزغرت نص الليل
    ما صحت من خلعتها دى الا جاها ليك عمنا مارق شايل عصايتو ..
    حليمه هوىى آآآآ حليمه . حميتينا النوم والقعده ..هااا مرا ها روقى
    شيخ شنو البقبق ليك بى مويته .. دى ماسورة بيتى كسرتيها لى بى كترة بحتيك ده
    الله يكسر كراعك لوووووووول
    وفعلا كان خرطوش المويه مارى بى تحت الشديرة ومن كترة بحيت حليمة قطعتوا النص لوووووول
    وبقت نكتة حليمة متداولة لى يومنا هذا
    لك الود محنة اخوى نور الهادى
    وبرجع ليك تانى

                   |Articles |News |مقالات |بيانات

12-06-2006, 05:12 AM

nourelhadi awad

تاريخ التسجيل: 10-24-2006
مجموع المشاركات: 1111

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: *** قدح العيد *** (Re: soma)

    تحيةواحترام
    ياحليل العيد عشرة سنوات بالتمام والكمال ماضقت عيد في السودان
    الغربة اخدت مننا الزمن الجميل
    متين نرجع للبلد طولنا
    ربنا يرد غربتنا
    وكتر خيرك علي هذه المساحة الجميلة
    وارمي لي قدام
    ودعتك الله

    نورالهادي

    (عدل بواسطة nourelhadi awad on 12-08-2006, 12:05 PM)

                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>

· دخول · ابحث · ملفك ·

اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de