التحيه لكم جميع ..ومعليش العيديه جاتكم شويه متاخره لانى كنت مصره انها تكون جديده لنج ..لكن برضو ارجع اقول مافى اجمل من البلد واهل البلد والجديد ياتيكم لاحقا ولكم كل الود والتهنئه بالعيد السعيد لكم احبتى داخل وخارج الوطن الغالى .. ولكم جميعا انا يا بلد
****** انا يا بلد .. ليك بكون .. ضهر البنيات والعرض ... سلوكه تحفر فى الارض ... نيلك بيسقى كل نبض ... زولا تقى صلى الفرض ... شدر اللبان شدر القرض .. لى كل مريض سدً الغرض... عالج شفا من كل مرض ... *****
انا يا بلد انا فيك بشوف ابواتنا فى الحاره بتسد ... كيفن تصد .. كيفن ترد .. اماتنا زى مطر الدغش .. نازل غزير مليان برد ... جنياتنا فى الحوبه الرعد... بنوتنا لى ضيف الخلا ... تعزم تشد عز البرد ... شفعنا تيراب اب كرد... ترفع تشيل تسمع ترد .... اعلامنا راياتاً ترفرف من بعد... ******* انا يا بلد داير اكون .. ود البلد .. بت البلد ام البلد .. اهل البلد .. نهتف نقول... نحن البلد .. نحن البلد ... وانا يا بلد .......
اسماء صديق الطيب الجنيد مسقط سلطنة عمان 25/6/2002
12-09-2002, 06:11 PM
ودالجزيرة ودالجزيرة
تاريخ التسجيل: 09-07-2002
مجموع المشاركات: 10
الله يديك العافية بقدر ما تدخليه من فرح فى النفوس بهذه الكلمات الطيبة هذه لوحة متكاملة لسودان رائع وجميل نتعشقه ونحسه مع النبض نتمنى ان نتغنى بهذه الاشعار فى وطن خير يسع الجميع لك مودتى تسلمى يا مبدعة
12-09-2002, 09:02 PM
BAKASH BAKASH
تاريخ التسجيل: 05-06-2002
مجموع المشاركات: 867
سوما أنا مش قلت ليك جبرتينا وجبلتينا علي الانتظار والدهشة بلدي وبلدك سوف يكون بخير مازال قلمك ماضيا وشعرك ملتزما وقلقك الفكري القا وابداعا واصلي السبح ضد التيار فنحن علي شاطئ الامان ننتظر ومعي الحردلو وملعون أبوها بلد لقدام أخوك د. متوكل
12-09-2002, 10:06 PM
omergoda omergoda
تاريخ التسجيل: 10-19-2002
مجموع المشاركات: 263
الأخت العزيزة سومـا التحايا العطرات و ما زلتى تهدينا الدهشة بمفردة تناسيناها وسط زحمة المدنية أعلم أن قلمك يملك الإمكانيات كلهــا لينقلنا هناك و نعيش السودان كما أحببناه و تبقى البلد و ريحة البلد و وجع البلد قيم رائعة ( جواك) تغض من مضجعك تحياتى سوما و لحسن حظى أنه أول ( تعامل ) لى فى البورد اليوم و لعل الآتى أجمل إن شاء الله أبو مهجة
اخى الكريم ود الجزيره ..الف شكر ليك انت والله على كلماتك اللطيفه وكتر الف خيرك دائما سباق ..يديك العافيه ..
منعم المرهف ..حقيقة كلك ذوق وتواضع ..انت يا منعم كلك حساسيه وشاعر مقتدر بكل ما تحمل الكلمه دى من معانى فلما تقول عنى كل الجكلام الجميل ده ..اكيد انا محظوظه جدا لك منى الف تحيه وتسلم اخى العزيز ..
بكاش ود بلدى ود الشرق مرحب دبايوا اهل الدرق تسلم وكتر خيرك وكل سنه وانت طيب وكريم كعادة اهلك الحنان تسلم اخى..
وليد سلامات يا ذوق شكر ليك وانت كمان كلماتك دائما هديه جميله لى والف شكر اخى الكريم وربنا يديك الف صحه وعافيه وكل سنه وانتم جميعا بالف خير اخوتى الكرام اولاد البلد الحنان تسلموااااااااا
12-10-2002, 06:16 AM
ايهاب ايهاب
تاريخ التسجيل: 05-06-2002
مجموع المشاركات: 2878
انتي بنت بلد صحيح وتشرفي البلد يا استاذة سوما والروعة دايما في شعرك في اي شئ كتبتي وعيد سعيد ومبروك العيد وكل سنة وانتي والجميع بخير ومن العايدين الفايزين
الاستاذ يوسف الموصلى تسلم انت والله يا عاشق الفن والابداع .. وانا لسه فى انتظار سماع الحانك الوعدتنى بيها ..اتمنى ليك كل التوفيق والف شكر ..
اخى الدكتور متوكل لك عظيم التحايا والتقدير وكلمة شكر صراحه بسيطه فى كلماتك الكبيره وتقديرك الاكبر لما اكتب من قصائد متواضعه .. يسلم لسانك وبنانك وانا محظوظه لانى موعوده منك بتعاون كم حلمت ان التقى انس مثلك اتعاون معهم يعشقون البلد وتراثه الف تحيه لك ودمت يا ود البلد ...
اخى الشقيق عمر جوده ..كم انا فرحت ايضا بوجودك فى هذا البوست وما اجملها من عيديه ..لك التحيه وتسلم كتير ودعواتك لى بالمزيد ..
اخى الشاعر المرهف ود شاموق ..لك التحيه وكل سنه وانت طيب .. شكرا على كلماتك اللطيفه ..وصدقنى البلد ما بتنسى والزيك انت بالزات لو حاول ما بقدر ..بس قول يا رب نرجع كلنا ونعيش فى امان وسط اهلنا واحبابنا ولك الف تحيه
.. اخى الصديق ابو مهجه ..والله انا السعيده بوجودك بيننا وعقبال بى شقر والله .. يا ريت تجيبو معاى هنا ..لكن كم سعدت بى ردك وعرفتك من العنوان.. سوما ديجتال كاميرا حتى ركزت فى الاسم اوووووه ابو مهجه ما فى غيره ابو بشار تسلم وكل سنه وانت طيب وانت زاتك ما هين انت زول مرهف وحساس والشهاده من منال ..لوووول التحيه لها وللعيال ولكم تحايانا بالعيد السعيد وتسلموا كتير ...
الحبيبه الرقيقه ليون تسلمى وكل سنه وانتى طيبه يديك الف عافيه وشكرا ليك يا رقيقه يا ذوق على كلماتك الرقيقه زيك واتمنى دائما اكون عند حسن الظن تسلمى يا ظريفه ..
اخى ايهاب سلامات شكرا ليك يا ايهاب يا ذوق .. وينك وين عيدتك لى ولا بس تعرف تكاوى لوووول نسيت انا يوم عيدت عليكم يوم عيدكم ..اها نحن عيدنا ما تانى يوم انا كنت مستنيه العيديه ..كتر خيرو عمى السنى هو البسال بس .. تسلم يا ايهاب وتحياتى للوالد العزيز وقول ليه سومه بتهديك انا يا بلد والبلد كلو وان شاء الله تعجبو والف شكر
مر حب بيك اخى جمال والف شكر ليك وكل سنه وانت طيب اخى الكريم ..غبت عن البورد مده ان شاء الله خير .. اهم شى العوده تكون بى ابداعاتك الشعريه يا ريت نقرأ ليك قريب .. الفراشه دى هديه من هلالاب برضو ..يديك الف عافيه
اخى الفاضل حمزاوى ..كل سنه وانت طيب يا انسان يا ذوق ..والله كلامك كلو ذوق وانسانيه وانت زاتك ود بلد واصيل كتر الف خيرك على كلامك الكبير الجميل واتمنى ان اشرفك واشرفكم واشرف البلد كلها امنياتى الصادقه ان اسعدكم دوما .. فقط ارجو واتعشم فى دعواتكم الصادقه والف تحيه اخى حمزاوى واخوتى جميعا
احبتى كل عام وانتم بخير والشكر ليكم مطر الشرق .لا يوم وقف ولا بنطبق.. تسلموااااااا
12-10-2002, 01:25 PM
Al-Shaygi Al-Shaygi
تاريخ التسجيل: 11-16-2002
مجموع المشاركات: 7904
اللــــه عليك يا سوما ،،، ويديك الصحة والعافية ويحفظ من العين.
كما أتحفت منابر البال توك بأشعارك الرقيقة الجميلة نجدك تتبوئين نفس المقعد بالمنبر الحر بس في المنبر الحر بنفتقد الإلقاء الجميل والصوت الدافيء اللذي يذكرنا دائماً بخضرة جروف بلدنا ونسيم النيل ساعة العصرية لامن الشمس تكون مايله ناحية الغرب نعسانة ماشية تنوم والطيور عائدة أسراباً إلى أعشاشها لتحتضن صغارها بعد غيبة نهار بحثاً عن الرزق وأصوات تأتي من هنا وهناك من أفواه الغبش الذين يحشون اللوبا والبرسيم لعشاء البهائم و و و
معليش سرحت في البلد في القرير
الله يديك العافية وما تحرمينا من كلماتك الرقيقة الجميلة
12-10-2002, 01:31 PM
قرشـــو قرشـــو
تاريخ التسجيل: 02-05-2002
مجموع المشاركات: 11385
مدد يا بتنا ما اجمل الكلمات حينما تكون مغروسة فى اعماق البلد فتأتى بكل حرف حنين للبلد وما اروع من ينظم تلك الكلمات ليجعلنا هنالك فى البلد نشتاق ونحن وننبذ الغربة اللئمة فاين نحن من اولاد البلد الذين يزودون عنه بالروح وبالغالى والنفيس ..
العزيزة / اسماء كل سنة وانتى طيبة يارب لوقلت الكلمات حلوه وفى غاية الروعة برضو ح اكون قصرت فى حقك يا سوما اسماء نور ساطع نجم لامع كل العالم سامع تحياتى وتقديرى
12-10-2002, 09:23 PM
rahmy rahmy
تاريخ التسجيل: 05-16-2002
مجموع المشاركات: 69
الاخت...سوما كلماتك جات فى الصميم يا رائعة....كم افتقد البلد واهل البلد وتراب البلد وطيبة اهل البلد وسماحتهم وهم يهنئون بعضهم البعض بالعيد السعيد.............كم افتقد ليالى العيدوسط الاهل والاحبة والاصدقاء...........يا ليتها تعود تلك الايام..يا ليت يا ليت وكل سنة وانت بألف خير
ود السجانة
12-11-2002, 00:55 AM
Kabar Kabar
تاريخ التسجيل: 11-26-2002
مجموع المشاركات: 18547
الأبهـة ..ســوما تحية بلون الشمس..معليش جيت متأخر شوية ..ظني أنا مازول شعر ..الا الكلام جاب البلد..وكت داك عاد في زولا ما بيقدر يقول في البلد حاجة؟ ما أظن.. لك للأوفياء في مقام الحرف الوضيئ هذا الكلام..
كتبتك..والقول حرن..انتسب صـوتي لمدارج النار..سافرت في شرايين البوح ، غشيت تعاريش القول الجميل،نضح خاطري بتقاسـيم شقاك، كاتلني فيك طيف الغربة وتهاويم العبور، ما قدرت أقول..وكتين كاشفني زمن الحضور.. انتميـــتك في ذاكرةالهيـــاكل ، اتوضيت بدم القصـايد،وصليت حضـورك ..نشوة الضـو البهية، ضميت نبضـي بخشـــوع، تليتك لزمن الصمت الحضـور،الكـلام شاترني فيـك،و اتقفلت مداخـل البــــــوح كتبتـك رقيـات الزيف المفضـوع بي جوع الصبايا، ومشيت للنيل، لقيت النيــل مخمور، سكران بالحـزن الودار، الوهـم اعترض خطاي ، وجاهرني فيك بالعداوة.. وقفـني، في قلب الليـــل، صـوت دوريةهاربة من صدى الخوف، رنت أنفاسـك في صدرالمدينة، جريت عليك، لميت توب الحـروف، وكانت الحــروف عريانة، والظروف برضك كانت عريانة أبت تنســتر.. مرقت من بين رؤاي ..اتمـاثلتك في حضن و كاتلت بيك حزن المواسم... كتبتك سورة الشجن الاسيف، لغة زهت في فنارات البحـر ،ورسمت مياسم السفرالعنيد.. كيف أقدرأجيك،وخطـاي ما عرفت طعم الحضــارة كيف أقدر أجيك، والنبض جواي خان الجسارة كيف أقدرأجيك، والليل ضفر جدايلو وكتفني بحبال السكوت كتبتك، والقول حرن، انتسب صــوتي لمدارج النار محمد النور كبر
اخى بامسيكا كل سنه وانت طيب ..كالعاده اخى الكريم دائما كلامك وتعقيبك يدخل فى نفسى كثيرا من البهجه والسرور لدرجة انى اتعقدت عديل وخجلتنى اخى العزيز والله ادامك الله ويديك الف عافيه واتمنى ان اوفق فى ارضاء الجميع ودعواتكم ووقفتكم هى زائدى فى دربى الطويل هذا الف شكر اخى بامسيكا ..
اخى الكريم رحمى ود السجانه ود بلدى .. رد الله غربتنا جميعا وكل سنه وانت طيب وبارك الله فيك حقيقة نفتقد البلد جميعا خاصة فى مثل هذة المناسبات تحس انك فاقد كل العالم ..ودى ضريبة الغربه باذن المولى نرجع ونستمتع بالعيد وسط اهلنا ..كتر خيرك اخى واتمنى ان تعيد العيد القادم وسط اهلك مرتاح وتتذكر كلامنا ده يكون مجرد ذكريات لك كل التحيه والتقدير..
اخى محمد نور ..فى هذا الصباح البهى ..طليت على بكلماتك الساطعه كشمس هذا الصباح فغمرتنى بى روعتها حد الدهشه ..يالك من مبدع يالروعة بنانك يالسحر قلمك ..يالك من متمكن هنيئا للاخوان بالبورد بك فى زمن اتلاشت فيه مفرداتنا السوادنيه الدارجه بكمها الهائل من الجمال والروعه وقوة المعانى ..اخى محمد حقيقة اقف امامك محتاره ماذا اكتب وكيف اعبر لك عن مدى اعجابى بكلماتك الصادقه التى تغللت فى دواخلى وتمكنت و احيانا اخى محمد تضيق العباره .. التحيه لك بلا حدود وشكرى لك بلا قيود واتمنى ان نلتقى ..واتمنى ان احظى بقدر وافر من كلماتك على كتاباتى المتواضعه واهديك تحيه واهديك سلام برضو من البلد يا ود البلد شكرا مطر....
سلام من البلد
سلام.. اغرف من بحر الكلام .. اغلا الحروف انسج سلام... فى ثوب موشح بالمحنه والوئام.... واقلع من قيف الجرف شتلات غرام ... اجدع فى الثوب القبيل ... ارسم طيور.. فوق الغمام ... حاضنه الحنين .. حاضنه الوله .. شوق وابتسام ... وارسل تحايا معبقه بالمشاعر والهيام ... مليانه بى ريق الاهل.. نفس الاهل بتقول كلام ....وتقول سلام من الشرق... اهل الدرق .. شوقا الف .. طبعا ولف.. مرحب دبايوا يا كرام .. من الغرب اهلا حبابكم باحترام ... من الشمال صفق الشدر ... صوت الوتر... ريحة التمر.. تقلد تطايب فى انسجام ... ******* ومن الجنوب نغما طروب.. سكسك يكشكش فى فرح ... يجرى ويجوب.. كل الشوارع والدروب ... و يقول سلام بدل الحروب ... ******* ومن البطانه الداره بالضرع الحلوب بيتين شعر تصدح تدوب ... جنيات تدوبى .. تسرح.. تنم ترسم جمال ساعة الغروب ****** واقيف هناك وسط الاهل .. و ريحة البخور.. اكتب سطور .. تعبر جبال تعبر بحور .. تحمل تحايا من شهور زى دهور ... من قلبا سعيد مليان سرور .. مليان حبور... لى ناس عزاز قلوبا نور .. ووجوها نور ... ضيا متل بدر البدور... ولهيجا زى نفس الزهور ... اتمنى من ربى الشكور ... يصل السلام مرسال محبه .. ولى الاحبه ..الف ورده ... و زحمة من باقات عطور ... ا لف ورده وزحمة من باقات عطور .. اسماء صديق الطيب الجنيد مسقط عمان 1/9/2002
عافاك الله ، فقد أخرجت بهذه الكلمات رعودا تعربد في دواخلنا ، و لكنها ترقد في خمول و يأس ، كلماتك تجرد أنفسنا من أنانيتها ، و تجعلنا نفرد صدورنا متباهين بالبلد و الإنتماء إليه ، و نملأ خياشيمنا بهواء بلادي المغموس في طين الجروف و سعفات النخيل و أنات السواقي و بكاء أوتار الطمبور و زغاريد الفرح و مناداة الفزعة و برق الخريف و زخات المطر ، و وووووووووو
ابو جهينه يا ابن النيل .. يا سلالة ود حبوبة وود تكتوك كلامك غنى ودوباى .. يديك العافية وانت يوما بعد يوم تنظم عقود ولآلىء من درر الكلام .. قلتها واكررها مرات ومرات ..اتباهى بها .. تعقيباتك يا ابن بلدى .. اطار من معانى الروح والاصالة تزيين بها كتاباتى المتواضعه .وتزيدها جمالا ورونقا .. يجذب كل عابر طريق للنظر بتمعن .فى لوحاتك الرائعه المخطوطه ببنانك الصادق المعبر ..ويحمل فى طياته حبك للبلد واهل البلد .. ابو جهينه القومه ليك يا ابن سليل الفراديس .. تسلم ود امى.......... .فتك بى الف عافية
06-14-2003, 09:23 PM
عشة بت فاطنة عشة بت فاطنة
تاريخ التسجيل: 01-06-2003
مجموع المشاركات: 4572
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ودالجزيرة
moniem2002
BAKASH
waleed500
Elmosley
Mutwakil Mahmoud
omergoda
ود شاموق
ايهاب
جمال السنوسي
Al-Shaygi
قرشـــو
bamseka
rahmy
Kabar
ابو جهينة
عشة بت فاطنة
فيس بوك
تويتر
انستقرام
يوتيوب
بنتيريست