*** إشتهيت عيشة الغبش ***

Quote: اشتهيت عيشةَ الناس الغبش شاي الدغش لبن الزريبة بلا عرش زادى الحنين الفي الحكر اشتهيت طبْعاً عدم في كل بلود عدمانه يالزايلة ام قدود حارياها عند اهلي الغبش خاتية البطر

Quote: العزيزة الغالية / سوما سلام يا ست الكلم الرزين والنغم الحنين.. حروفك شدتني وشوقتني لريحة التراب للاهل والاحباب.. يا يمة يا سعد الغلابة الله يفرحك دوما ويرد غربة وطنا.. ونمشيه رجعة وعودة حلوة بين الغبش.. مودتي

Quote: إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش والشوق يتاوق من بعيد غالبو الصبر كرْوَشْ ترابنا على الجروف دربا حنين خاتي الخدش اشتهيت ريحة الفريق ملخوخة بي شيتا كُتر دوكة وملاح مع فكة الريق الصباح قهوة وعرق والقلوة بتناغم البكر اشتهيت مرقة بهيماتنا الفجر لاحقه المراح ديك الصباح كبر وصاح خابر الذكر اشتهيت لمة عيال عند الكنار جنب الترع زفة مطامير المطر اشتهيت مرقة بناتنا على البحر سايقات نسيمات العصر لافحات طرح طمح الصدر اشتهيت لمة كبارنا بلا وعد والشورة فال عند الخدر اشتهيت يا يمة ريحة هدمك الملتوق ودهنك المعتوق كركارو حر كورتك ممسحة بالودك بتناغم الديس البجر قرضك معتق زى بخور فصين لبان تيمان ضكر ريحة مسيرتك جرْتَقَة معجونه بى طين الصبر غُرة جبينك يمة باقيالي ضي في غربة الخوف والكدر اشتهيت عيشةَ الناس الغبش شاي الدغش لبن الزريبة بلا عرش زادى الحنين الفي الحكر اشتهيت طبْعاً عدم في كل بلود عدمانه يالزايلة ام قدود حارياها عند اهلي الغبش خاتية البطر

Quote: سلام يا أسماء والله شهيتينا حياة الطبيعة مع الحياة العايشنها وما ليها طعم دي اشتهيت فول الملم عروشو عند العصاري وأحرقوا

Quote: مرات تقعد تفكر في الحياة الساهلة والطيبة المشتتة الخليتها بي وراك

Quote: العزيزة سوما ربنا يديك العافية غايتو جو الجزيرة اليومين ديل بشبه القصيدة دي ولو لقيتي طريقة قدي السلك وتعالي ليك كم مطرة كدى وبل الشوق بالمطرة مع الغبش كسرة دي أول قصيدة الواحد يشمها شم موش يقراها الله يخليك

Quote: تزهد للدنيا شنو انت الدنيا زاهداك

Quote: اسماء الجنيد سلام تربيع قريت العنوان والله تذكرت قصة قريبنا مسك السبحة اللالوبة من والدنا المهم بعد شهرين كدة شاف الحكاية كده ماشة سمحة جا قال لوالدنا والله انا عايز ازهد الدنيا خلاص اها والدنا سعلو قال ليهو عندك حساب في البنك قال لا قال ليهو عندك عربية قال لا قال ليهو عندك عمارة قال لا والدنا قال ليهو تزهد للدنيا شنو انت الدنيا زاهداك كمان انا قلت متين اسماء فارقت الغبش عشان تشتهي عيشتهم

Quote: إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش والشوق يتاوق من بعيد غالبو الصبر كرْوَشْ ترابنا على الجروف دربا حنين خاتي الخدش اشتهيت ريحة الفريق ملخوخة بي شيتا كُتر دوكة وملاح مع فكة الريق الصباح قهوة وعرق والقلوة بتناغم البكر اشتهيت مرقة بهيماتنا الفجر لاحقه المراح ديك الصباح كبر وصاح خابر الذكر اشتهيت لمة عيال عند الكنار جنب الترع زفة مطامير المطر اشتهيت مرقة بناتنا على البحر سايقات نسيمات العصر لافحات طرح طمح الصدر اشتهيت لمة كبارنا بلا وعد والشورة فال عند الخدر اشتهيت يا يمة ريحة هدمك الملتوق ودهنك المعتوق كركارو حر كورتك ممسحة بالودك بتناغم الديس البجر قرضك معتق زى بخور فصين لبان تيمان ضكر ريحة مسيرتك جرْتَقَة معجونه بى طين الصبر غُرة جبينك يمة باقيالي ضي في غربة الخوف والكدر اشتهيت عيشةَ الناس الغبش شاي الدغش لبن الزريبة بلا عرش زادى الحنين الفي الحكر اشتهيت طبْعاً عدم في كل بلود عدمانه يالزايلة ام قدود حارياها عند اهلي الغبش خاتية البطر ........................ اسماء الجنيد

يا سلام يا سلام الحبيبة سوما بت عمي الجنيد
يا سلام على الحنية والكلام البيدخل الجوف
ويستقر عميقاً عميقاً جمالاً وروعة
شكراً على إتحافنا بأناقة حرفك
الذي يقطِّر حنــــانـاً يا سوما،
الله يديك العافية على هذا الإنعاش
مع عيشة الغبش.
لكِ المحبة صادقة وعميقة دائماً.

Quote: للاسف يا سوما دي معادلة الغربة الصعبة.. والمشكلة ان الحياة السهلة يشاركك فيها آخرون...لهم عليك حقوق... بينما الطيبة المشتته الخليتا بي وراك ربما تعرفها انت أكثر ممن يشاركك هذه الحياة الساهلة... وقبل ذلك شكرا علي القصيدة المترعة بالحنين

Quote: وقفة بس وقومة احترم وامتنع التعليق تسلمي و بس

Quote: يا سلام يا سلام الحبيبة سوما بت عمي الجنيد يا سلام على الحنية والكلام البيدخل الجوف ويستقر عميقاً عميقاً جمالاً وروعة شكراً على إتحافنا بأناقة حرفك الذي يقطِّر حنــــانـاً يا سوما، الله يديك العافية على هذا الإنعاش مع عيشة الغبش. لكِ المحبة صادقة وعميقة دائماً.

Quote: بت عمي حبابك ويا حليلك انت كل يوم بتأكد انو حبوباتنا بنات عم ... والله صحي رجعتينا لعيشة الغبش ويا حليلها فهي خاليه من كل تعقيدات حياتنا يا حليل زمن الاخوة ويا حليل زمن المحنة لما كانت الدنيا جنه كل زول بعين اخوه ومافي بين الناس مظنه تحاياي

Quote: يا حليلك ياسومة نكت لينا جروحنا نكت والدم سال وغلب الشيال والذكري جوه القليب في ترحال والله جد صورة رائعة بفتش ليها وما لاقينها ولمن نمشي الاجازة ونسال عنها بيقول يا حليل حياة عايشة باثر رجعي جد بعزك لانك بتقولي اللي انا عايزة اقولو مع تحياتي وحبي واحترامي

Quote: دوكة وملاح مع فكة الريق الصباح

Quote: دي كلام حكم ( بكسر الحاء

Quote: تحياتي أستاذتنا أسماء الجنيد قرأت النص البورتريه تداعت كل الصور بأسود و أبيض كشريط فيلم عتيق بل كادت بعض الأصوات أن تنساب إلى مسامعي ، و بعض العبق و كثير من تفاصيل تلك العيشة دمتم

Quote: جعلتينا نجتر النقاء والصفاء والعفوية فى زمن اصبح كل من فيه يعيش حالة ما قبل الانتحار واصلى يا ام رامى

Quote: الله عليك يا بت ابوي دوكة وملاح مع فكة الريق الصباح وصوت قمريي تقوقي مع النواح وفي الدغش يجيك نضم حبوبة مع النعاج عند المراح وامي تمسح في مسايرها من تالا ود ناس صلاح وبنية الفريق تتبسم مكملة السماح

Quote: الأخت المرهفة ذ/ أسماء الجنيد.. التحيات لك .. ولحرفك الذي يجيد التغلل في المسام .. كوني بخير، أخوك/ الأرباب

Quote: إشتهيت عيشة الغبش إشتهيت طُقطُق مطيراتنا الدُغش

Quote: كلام زي السكر ما أحلاك شكرن كتيرن!

Quote: إبداع لايشبه الأ اسماء الجنيد...الله يرد غربتنا كلنا...لكن بيني وبينك يا بت الجنيد برااااانا عملناها في روحنا.... ماااااالو بلدنا ....والله شبعاً بلاهم جوع مقداره خمسين الف سنه.. والله يا سوما ياختي غربه لي غربه وغربة امريكا دي طعمها بره....دمتم.

Quote: غايتو يا اسماء تزعزعى يقين القانع بنوع كلامك الطاعم ده.. الواحد لا يعرف يشكرك واللا يداعيك الله يخليك بس ولا ازيد،،،

Quote: إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش

(عدل بواسطة خالد المحرب on 06-04-2011, 05:51 PM)

Quote: اخر اجازة كنت في السودان يا استاذتنا الغالية اسماء الجنيد كنت قاعد جنب امي اعصر ليها في كرعيها الذين تعبتا من الجري والرحيح وراي عندما كنت صغيرا وشقيا ومتعبا والقعدة دي في نص الحوش الذي ان رسلت الشافع اجيب ليك من ركنو فردة نعالك التي طارت مع عنفيضة دحيش احمد اخوي امش الشافع وما اجيك راجع فالمسافة تنسيه ما ذهب اليه ولا ياتي اليك بخفك ولا بنفسه اها يا اسماء في القعدة دي تجي خالتي فاطنة ومن قولة سلام علمت بانها تحمل في قسمات وجهها امرا جلل وبالفعل بدأت تسرد ما اتت من اجله على الفور دون مقدمات يا خادم الله اختي انا جيتك لامر مهم خلاس ان قضيتي لي كتر خيرك وكان عاد يا بت امي ما قضيتي لا حاشا جبدت امي كرعيها من راحة يدي وقالت لي كدي يا ولدي حود شوية انشوف خالتك دي مالا ..... خير يا بت امي ... شن جاك خالتي فاطنة : انقول ليك يا بت امي .... ديكي اللحمر ما بتعريفهو ؟ آي بعرفوا تب .... مالو ماااااااااات الفظيفها من خشمك آ بت امي اموت عدوهو ديك بخيتة بت عمي احمد ديكي كان قاعد مع جداد بخيتة بت عمي احمد في امان الله ومولد ليها جدادا ولادة الفورة قامت الليلة جابت ليها ديك ما اياهو المعولق القبيح نافش ريشو زي اليوم الشال احمد اخوي وات يا الديكة .... الديك الديك حارب الديك .... زعطك زعطك ات يا ديكي عافية منو زعط ديك بخيتة بت عمي احمد وجاتني جارية العرق اتخرت منها وزعلانة وفرررررررر جدعت لي ديكي في بطن البيت وخترت وقالت لي تاني ديكك دا كان جاني قسمت بابوي كان اجيبو ليك فطيسة اها اسع ربطو في كراع العنقريب وجيتك قلت اشاورك قبل ما اجيبو ليك اها شن قولك احتارت امي في الامر ولكنها فاجأتها بانه لقيت ديكا الكان رايح منها وديكين في دكة واحدة يصعب تعايشهما فاخبرتها بقصة لقيان ديكها وخاب ظنها وكادت ان ترجع دون ان تبل ريقا بموية لانها حلفت اكان غرضا ما انقضا ما تشرب لا موية ولا جبنة فحاولت ان اتدراك الموقف وتدخلت في الامر وقلت لي خالتي فاطنة ات ديكك دا ما تبيعيهو قالت لي الليام دي الجداد رخيس بخليهو لحدي ما اغلى الجداد والديك اجيب الشي الفلاني طيب يا خالتي فاطنة بعد اغلى بجيب كم ؟ اكان تلاتين ولا كان اربعين اها يا خالتي انا بديك فيهو خمسين رايك شنو ؟ فضحكت خالتي فاطنة ضحكة لو دفعت مقابلها عشرات الخمسينات ما حصلت عليها واخدت خمسينها حامدة شاكرة واخذت امي فورا حق البصل والزيت وخرجت خالتي فاطمة قبل ان ينفطر قلبها بذبحه الذي اصرت عليه الوالدة خوفا من اخذها القروش ومعاهو الديك ..... . . تحياتي استاذنا واميرتنا اسماء الجنيد

Quote: سوما زكرتينى الساريه التى تبدا طقطق فى بيت البرش مع نسمات الصباح قبل طلوع الفجر وان طلع الفجر لابد من عتمه لان السحب تمنع فلق الصباح وتحس با ن الليل مازال طفل يحبو تبدا تنهال بريس بريس حتى تسمع شوووووووووو تسمع الحبوبات يخاطبن مكائيل الموكل بالمكر كيل يا مكائيل بى الربع الكبير فتصبح البلد نفساء و النا ر ما بتولع الا بواسطة الجاز لان العود اصبح مبلول دا جزء من عيشت الغبش

Quote: سوما ازيك وكيفنك اريتك طيبه انقول ليك كلام انا من جيت راجعه من الاجازه مسكني جن المرض الانتي بتنضمي بيه ده وعليه قلت البيان بالعمل اه قمت لفيت بكراع واحده لحدي مالقيت بيت في ارض الله دي وفيه جنينه اه قمت الملم في حطب الراكوبه واليومين دي ناويه افتش كرعين لي الهبابي طبعا من زمن اشتريت المروق والعراضات وبعد ده كلو ياريتو يخفف من البي

Quote: اشتهيت يا يمة ريحة هدمك الملتوق

Quote: إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش والشوق يتاوق من بعيد غالبو الصبر

Quote: كان القى غردي انا فرّ اطِيّر... يا اخواني مُشتاق شوق كتيّر شوقاً يهِد حيل البعير شوقاً قدُر جرف الكِرير شوق المريض للعافية اضناهو السرير شوق البِتِب في قيدو للحرية في الظلمات اسير انا شوقي للنيل والبلد، شوقاً قسَم بالحيل كتيّر كان القى غردي انا فرّ اطِيّر الحق بنياتنا البِيردن في الحفير واشرب مع حبوبة فنجان جبنة في ضُل العِصيّر واخدِم مع تربالنا في وهج الهجير وإتغدى في الرآكوبة بدمعة وفطيّر والنِيّمة مكدُوّن فيها زِيّر مويّة بحر، تحلف تقول مويّة عصير... اكان القى غردِي انا فرّ اطِيّر الحق مع صِبيانا لمآت النفير ولماتنا في الحوش الكبير ود العوض، وعلي الصغير، عبد الحفيض و ود النِعير يشاغلوا في شنبو العوير ورُقادنا في حوش التمُر فوق عنقريب، مافوق سرير القمرا فوقنا ملجلجة وبابور حسن يهدر هديّر مِندلقة في الحيضان جداولوا معربدة وبحرنا كِيّر كان القى غردي انا فرّ اطِيّر للسمحة في حِلتنا اقدِل زي أمير وإدسى في دِيسا الغزير وحفيان ازور شيخنا الضرير يا شيخنا واقع في حوآك ومن الفُرآق بيك مِستجير انا وين اروّح؟ انا وين اطٍيّر يا اخوانا عُووووووووك حالة البلد مازي زمآن والغربة عِيشتا زمهرير ياخواني عآد انا وين اطِيّر؟ انا وين اطِيّر؟ انا وين اطِيّر؟ انا وين اطِيّر؟ انا وين اطِيّر؟ ؟ ؟ ؟ ...........إلخ ود المدير... غايتو يا بت الجنيد يا قول حبوبتي: الله يلزمنا الصبُر...

Quote: يا سلام عليك إنتـي إزّيِّك

Quote: سوما لعلك طيبة والله اشتهينا كلماتك التي تزيل الهم وتمسح قليل من عزابات السنين المثقلة سلام لنبضك .. واحاسيسك .. الجميلة .. التي تتغلغل مباشرة بين المسامات .. وتضخ في الجسد الطهر والجمال والوصال ووو يااااا سوما وردة ودوشوق لكي .. لقلمك .. ولقلبك ومتابـــع فاكهتك الطازجة ---------------- التعديل لاضافة حرف

Quote: ياسلام ياحبيبة على الكلام الحنين الأنيق ألمن القلب ويدخل القلب .. سلمتي من كل بلا .. وإشتقت ليك يا خيه ..

Quote: قارعين الدموع بالتصقيع ردالله غربتنا اجمعين

Quote: الأستاذة/ أسماء - سلام كتير كتير ---- شن أسو بت الجنيد متلك مشتت لا في الأرض لا في الجو ورايا البلاد مطرت الشوق لي بت المطر حبيبات البرد في ريسينا تنقر كو كو كو بكرف يوت دعاش القبلي الهجيع ودرني ... هداني تب ... قت هوووو متين أرجع أحش وأزع أموص الكسرة فوق سنام ترعتنا أترع واضرع متل صقر طاير في سماء الله الواسعة أسوي خو خو خو الكاربني يا بت الكرام حمل البيت كتير بلحيل يهد الحيل ... الهجيع ودرني هداني تب ... قت هووو قريشاتا تطير ... متل سرب الرهو شقيش راحت ... دا الما قدرت أوجهو كو كو مرة مرة يجيني هاتف مهاجر شأن اللاكل؟؟؟ تأكل القوووووووو ... +++ حمد إبراهيم محمد دفع الله

Quote: اشتهيت مرقة بناتنا على البحر سايقات نسيمات العصر لافحات طرح طمح الصدر اشتهيت لمة كبارنا بلا وعد والشورة فال عند الخدر اشتهيت يا يمة ريحة هدمك الملتوق ودهنك المعتوق كركارو حر كورتك ممسحة بالودك بتناغم الديس البجر قرضك معتق زى بخور فصين لبان تيمان ضكر ريحة مسيرتك جرْتَقَة معجونه بى طين الصبر غُرة جبينك يمة باقيالي ضي في غربة الخوف والكدر[/QUOTE ياسلام عليك يا أسماء يا رائعه .... كلام زي الكلام زكرنا الناس الحنان ، ياخ يالغت عدييل كده كورتك ممسحة بالودك بتناغم الديس البجر أقول ليك شنو بس الله يديك ألف عافيه قدرت ما سويت فينا من دروب الإبداع والبهره .....