هوس السودانين بغزو بريطانيا قديم منذ عهد الخليفة عبد الله التعايشي الي عهد مصطفي سعيد بطل موسم الهجرة الي الشمال للطيب صالح وكل اراد ان يغزو بريطانيا عبر نسائها .... هذا مشهد تخيلته لفكرة غزو بريطانيا الاول والذي فكر فيه الخليفة عبد الله وارجو من الاخوة في حزب الامة ان لا يغضبوا فانا احب الانصار والمهدية ولكن هذه رؤية للامر بمنظور تاريخي كوميدي سرقت فكرتها مع سبق الاصرار من قصيدة لشاعرنا الطيب برير الخليفة عبد الله التعايشي مع الامير يونس ود الدكيم يجلسان في مجلس الخليفة يتسامران ويقزقزان فول مدمس وتسالي .. الامير: اتا يا ابوي الخليفة دحين ملكة الخواجات الكفار ديل معرسة ولا عزبة..؟ الخليفة : والله يا ود دكيم ماني خابرها لكن !!؟ عندك فوقها راي ولا شنو؟ الامير: والله بيني وبينك يا ابوي الخليفة كان عزبة حرم باخدها.. الخليفة : يازول خير بجيب ليك خبرها تب ...بس اصبر لي اتا .. الخليفة ينادي علي كبير الكتبة في دار الخلافة في بيت المال .. الكاتب : ايوا يا ابوي الخليفة بتدورني انا ؟ الخليفة ايوا بالحيل .. دوايتك وورقك جاهزات ..؟ الكاتب : بالحيل ابوي الخليفة بدور ترسلك مرسول ؟ الخليفة ايوا يا جنا .. امسك اكتب ... من الخليفة عبد الله التعايشي خليفة المهدي الي فيكتوريا ملكة بريطانيا ..سلمي تسلمي .. ونعرض عليك الدخول في الاسلام فان قبلت وامنت ودخلت في دين الله ..طهرناك ( ختناك ) وزوجناك الامير يونس ود الدكيم ان هو قبل بهذا ..والسلام علي من اتبع الهدي . وهكذا ارسلت الرسالة الي ملكة انجلترا اعظم ابراطورية في ذلك التاريخ ولما قرأتها كانت جالسة علي كرسي الملك ..وقفت فجأة ووضعت يدها اليسري في وسطها وفزرت اليد اليمني الي الوراء وقالت : اجي يا بُري!!؟ واسترسلت .. سجمي يا كتشنر ما يكون الدرويش دا جادي ؟؟ وواصلت ... بعدين انا بايرة ولا بايرة !!؟ هو زاتو القال ليهو انا عزبة منو..؟ بعدين عليك الله شوفوا قال شنو (يطهروني ) بعد العمر دا كله يطهروني ؟؟ سجمك يا فكتوريا يا الامك ما شافت جديدك بقيتي لبانة في خشم اليسوي والمايسوي ؟ مييييش اييييش جنس دروشة لكن !! ومنذ ذلك التاريخ لم يهدأ لكتشنر (الجكس بتاعها ) بال الا بعد ان حسم امر المهدية في ام دبيكرات . علي ان مصطفي سعيد حفيد ود الدكيم لم يخيب ظن جده عندما غزا بريطانيا عبر البوابة التي ارادها جده وفعلها مع صديقته الانجليزية حفيدة وصيفة الملكة فكتوريا وخالة مارغريت تاتشر لزم .
قلنا بدون زعل ودي ما شكل ياخي دي نظرة تاريخية بمنظور (كوميدي ) كدي عليك الله مراة الامير يونس ود الدكيم لمن سمعت الخبر ما بتكون قالت :
يالصغيرة وماك كبيرة ..جايب ليك ضرة اميرة يا العاقلة وحاشاك جن الكلك.. جايب ليك بت الملك يا الرزينة وماك خلاقة... جايب ليك بت الكافر الخواجة يا الراسك بين النسوان اطول رقبة... اخر جزاك يطبقوك بالعزبة
03-20-2004, 04:38 PM
اساسي اساسي
تاريخ التسجيل: 07-20-2002
مجموع المشاركات: 16468
طيب قول انه الملكة فكتوريا وافقت واتزوجت الامير يونس و الدكيم انا شخصيا بتخيها قاعدة في البنبر وفي يدها الدوكة تمسح في صاج العواسة وممشطة السودان قفل وعامله مساير لافاها في اضنينها لكن في بالك كان شلخها تي ولا سلالم ؟
Quote: الامير: اتا يا ابوي الخليفة دحين ملكة الخواجات الكفار ديل معرسة ولا عزبة..؟
حـرضت علينا غير المسلمين !!!!!!!!!!!!!!!!!!!
Quote: الامير: والله بيني وبينك يا ابوي الخليفة كان عزبة حرم باخدها..
و هـنا كـمـان البـايـركـس
Quote: من الخليفة عبد الله التعايشي خليفة المهدي الي فيكتوريا ملكة بريطانيا ..سلمي تسلمي .. ونعرض عليك الدخول في الاسلام فان قبلت وامنت ودخلت في دين الله ..طهرناك ( ختناك ) وزوجناك الامير يونس ود الدكيم ان هو قبل بهذا ..والسلام علي من اتبع الهدي .
و هـنـا حرضت علينا المناوئين للفكر الذكوري
يعني يا أسـاسـي ننتهي من حــرب تفتح لينا ثلاثة حـروب في بـوسـت واحد
03-24-2004, 05:19 PM
اساسي اساسي
تاريخ التسجيل: 07-20-2002
مجموع المشاركات: 16468
العزيز ابو حسين حرب شنو ياخي انت عارف انا فتحت البوست ا عشان ارتاح من الحرب الهدت حيلنا ومسخت علينا المنبر عليك الله ما شايف المنبر بقي ممل كيف من كترة الحروب والخلافات انا شخصيا قررت من الليلة تاني لا مشاكل لا سياسة زول ساي بس لكن مع زي ناس سنتي دا الجايب لي بعاعيت دا يسو فيهو شنو الراجل قال هبشنا جدوده طيب نهبش منو هاهاهاهاهاهاها التمسكو كله يطلع ليك من تحته عقرب غايتو نغمض ونكتب تاني لووووووووووووول او كما قال ايهاب
03-24-2004, 05:35 PM
PLAYER PLAYER
تاريخ التسجيل: 04-23-2002
مجموع المشاركات: 10283
اساسي يا فرده ما تقول لي الامير يونس ودالدكيم جدك.. و ناوي علي خواجاتيه واحد من دكاتره(ديك وتور علي قول خالي ) قال: ان المشاكل في البورد تدل علي صحه وعافيه الديمقراطيه فيها واحدي ظريفه بس دمها تقيل قالت: انا اشاكل اذن انا موجوده في البورد بسم الله والقادر الله ...انشاء الله كلامي دا مشاكل
03-24-2004, 05:41 PM
اساسي اساسي
تاريخ التسجيل: 07-20-2002
مجموع المشاركات: 16468
الحبيب بلير ود الدكيم ما جدي لكن السودانين ديل كلهم قرايب بعض كل ما ترجع ورا تلقى جد واحد والعرق دساس زي ما بيقولوا عشان كدا خواجاتية كان لقيتها هوادة حرم باخدها لوووووووووول يازول كدي خلينا نعمل ضريبة الوطن ونحرق قلب راغب علامة في بناتنا العاجباتننا ديل وبعدين نفتش للخواجيات لكن تصدق الموضوع دا ما تستبعدوا تب بس ما يسمعونا يازول قول لي الديك تور دا المشاكل دي دليل اه الناس وصلت معاها خلاص وبقت ما بتشوف غير رايها هي وبس رايها وبس ومستعدة تموت من اجله وتخسر اي زول عشان رايها يكون هو السائد ودا بعيد عن اي حرية في الدنيا اما البتشاكل اذن هي موجودة دي كان لم فيها واحد من ناس دكين بخليها زي ملكة الخواجات دي لمن خطبوها لود الدكيم هاهاهاهاها
03-24-2004, 06:30 PM
PLAYER PLAYER
تاريخ التسجيل: 04-23-2002
مجموع المشاركات: 10283
اساسي الفرده ضريبه الوطن لابد منها...لكن ناس الوطنين زينا ديل يدفعوا لياتو منهم اوعاك ضريبه الوطن بيعفي من خدمه الوطن اما موضوع شيخ راغب(ما اندو علاقه بالدين)..حبوبتي قالت: الراجل ما اندو موضوع قلت ليها :كيف يا حبه(دا اسم الدلع لحبوبه) قالت: شوف ياضنا ضناي..المابتلحقوا جدوا اما في البورد...كلهم صاح زي ما قال جحا (جيران جحا مراه وراجلها اتشاكلو، المراه دخلت لجحا وحكت ليهو، جحا قال ليها :انتي كلامك صاح..مشت..الرجل جاء وحكا..جحا قال ليهو انتا كلامك صاح ...مراة جحا زعلت وقالت ليهو: انتا قلتا للمراة صاح وللراجل صاح دا نقاق...جحا قال ليها: انتي كلامك صاح قلتا لي النيه للخواجاتيه واصلة...هاك الخبر دا(بس ما تكلم زول)
Quote: 200 إسترليني لزيجة مرتبة تصمن إقامة وعملا في دول الاتحاد الأوروبي لندن: «الشرق الأوسط» تستطيع بمائتي جنيه استرليني ان تتزوج اوروبية، او اوروبيا اذا كنت فتاة، وتحصل على جنسية وجواز سفر بلد اوروبي وان تتجول في دول الاتحاد الأوروبي وتعمل فيها بكل حرية.[/
B]
03-25-2004, 08:38 AM
شمهروش شمهروش
تاريخ التسجيل: 09-14-2002
مجموع المشاركات: 1052
اساسي المؤرخ بيني وبينك الخواجيات طااااااعمات وفي نفس الوقت اللون بديك احساس السكون. لكن والله لو تم مراد ودالدكيم كان ماكان وكان الدوقة مريومة الامير كسار الجبور امير مقاطعة ويلز الليدي ام مساير والدة ادم وكوة وتبن ومحمد احمد اصحاب متاجر الكلكة الماليها ملكة حي التعايشة بمانشيستر عبدالله المسيري هداف الارسنالشمهروش عمدة لندن وصاحب شركة اللواري المعروفة فورد
وقلنا بدون زعل
03-25-2004, 08:40 AM
faisal44 faisal44
تاريخ التسجيل: 04-07-2002
مجموع المشاركات: 617
يا بلير اسع فتنتنا مع شمهروش دا والله كان سمع الخواجية بي متين استرليني حرم يبيع الكارو حقتو والوراهو وقدامو بس عشان يصل
شمهروش تحياتي يا صديقي اعرف انك مهوس بهذا الغزو منذ دهور هذا الهوس يجري في دمائك ويستفذك مثلما استفذ اجدادك ود الدكيم ومصطفي سعيد لغزو بلاد الخواجة فالساميات لك هدف والعيش في ديارهن امسك بلير نزل ليك اعلان مجاني تبيع الكمبيوتر وبتاخد خواجية حمريطيةهاهاها لكن مبالغة لو الكلام دا حصل زي ما قلت كان اسع حالي غير اساسي يتحدث في الهايد بارك ويهاجم رئيس الوزراء بلير لتضليله الشعب في حرب العراق ( ويورور ليه في عيونه)
العزيز فيصل
والله دي مبالغة صاحبنا في الرياض رامي عينه في عجوز النصاري دي بالله هاهاهاهاها ياخي دي جده ما بيرضي بيها لكن بيني وبينك زولنا دا ما مضمون ما عنده قشة مرة ههههههههههههههههههههه
03-25-2004, 11:35 AM
شمهروش شمهروش
تاريخ التسجيل: 09-14-2002
مجموع المشاركات: 1052
اساسي بقدرة عجيبة قد البست السياسة ثوب لو اننا نتوق لحياة كريمة تحترم فيها الادمية التي ننتمي اليها ولكننا لانمارسها فيما بيننا. نحن قوم اذا غضب الرجل من اخيه تحول النقاش الى ونسة مشاطات وقمة الروعة حين يطلق الواحد منا لفظ يا ابن الكلب. فكيف يكون الكلب قد تمخض وولد بشراً
ويا اساسي وجع الضرس بتاور فلو قررت ان لا تتحدث عن السياسة نطقا فانك ستخرجها غصبا عنك وعني وعن الحكومة والمعارضة ورغم عن انف اسطول بني الاحمر (ههههههههههه)
علاقتك حلوة مع بلير اعمل لي توصية ولاقوني قدام العقد عقب صلاة المغرب بمسجد حي سوهو العتيق
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
اساسي
ABUHUSSEIN
PLAYER
شمهروش
فيس بوك
تويتر
انستقرام
يوتيوب
بنتيريست