دعواتكم لزميلنا المفكر د.الباقر العفيف بالشفاء العاجل
|
|
 كيف تعرف انك في سودانيز اون لاين
|
هذه الايام البوستات تراكمية وتميل الي الموضات السائدة والي التقليد من وجهات النظر المختلفة وان كنت سانحي نفس المنحي الذي بداته الاخت التي تحدثت عن كيف تعرف انك في السعودية وقلدها الاخ الذي انتحي نفس المنحي وبدا في عرض انطباعاته بذلك البوست الذي عنونه بنفس النهج كيف تعرف انك في السودان ولكنه اخذ علي راسه غير ماسوف عليهكما انزل الاخ ود الجزيرة والاخت ام در نفس البوست بعنوان هل رايت الجنة وكان المصدر واحد
وساقوم بالتقليد مع سبق الاصرار والترصد
******
اذا كنت جديدا وتكتب بوستا تجتهد في ابراز كل خبراتك التي توعد بها البورد في ابرازك ككاتب يقرا له وتنزل هذا البوست وسريعا ما تجده وصل الي الصفحة السبعطاشر بدون اي ردود او حتي زيارات سوي الزيارات التي قمت بها لتتاكد ان هناك تعليق لم يظهر او مراجعا للبوست ومتحسرا عليه
اذا رايت الضهب يتجمع حول من نطلق عليهم مبدعين وبعض هذه التسميه اظنه جوازا اذا رايت هذا الضهب يجتمع علي اي بوست لهؤلاء المبدعين ولو كانوا يكحون فليس من اليسير مخاطبة المبدع مباشرة والبورد كسر الحواجز فلما التواني ولو حتي بكتابة اي كلام والسلام
اذا رايت النحل يطير خلف كل طرحة ولو كانت هذه الطرحة لا تعرف من الرومانسية سوي النسخ واللصق فحتما هي خلاقة ومبدعة
والنحل هنا يختلف عن الضهب هناك وكلهم مساعد ياي
اذا رايت الادارة تغض الطرف عن كل ما لا يمس المبدعين فكل سوي المبدعين وبعض اعضاء الادارة مسفوح دمه ومباح او كما قال الكوز خيار من خيار من سلطة
اذا رايت الشلة تعمل شيلني واشيلك بورد ولا طوطحانية يا بعيد
|
|
 
|
|
|
|
|
|
|
 Re: كيف تعرف انك في سودانيز اون لاين (Re: اساسي)
|
رجل وأبنه ومعهما حمار، ركب الأب وترك الابن ومشيا، فمروا على قوم فقالوا:
يا له من أب ليس فيه شفقة ولا رحمة يركب ويترك هذا الابن المسكين يمشي وراءه.
فما كان منه إلا أن نزل وأركب هذا الطفل، فمروا على قوم آخرين فقالوا:
ياله من ابن عاق يترك أباه يمشي وراء الدابة وهو يركب الدابة.
فركب الاثنان على الدابة ومروا على قوم آخرين فقالوا:
يا لهم من فجرة حملوها فوق طاقتها.
فنزل الاثنان ومشيا وراء الدابة فمروا على قوم فقالوا:
حمقى مغفلون يسخر الله لهم هذه الدابة ثم يتركونها تمشي ويمشون ورائها.
| |
|
|
|
|
|
|
|
|
|
Re: كيف تعرف انك في سودانيز اون لاين (Re: SAMIR IBRAHIM)
|
سموري لي زمن بعاين ليك وحبابك الجيتني براك
اولا يا سيدي الصحفي الخضرم مثل ما قال لك الاخ مانج النقد البناء مطلوب وهو من ابجديات الصحافة كما اعتقد وان كنت لا اجيد من فنها الا اني احيانا قاري لها
سموري المخضرم
هذا الذي قدرني عليه ربي من الصباح فلا اعرف اني اخز منك اجرا لتحاسبني اخر النهار عليه فالحرية في هذا البورد تبيح لي ان اكتب بما نفلح فيه كشعب سوداني شكاي وكما اتاحت لمثلك طيلة الفترة السابقة اتحافنا وصبرنا علي مواقفك التي ابسط ما يطلق عليها انها مزرية
الثاقب سموري
وانت تملي علي ان اكتب بوستا يدفع الي الامام كان الاجدي بك ان تضرب لي بهذا مثلا في بوستاتك التي انزلتها طيلة الاحداث الماضية والتي تنم عن خزلان مريع مارسته مسبطا به صاحب كل عزيمة ولكن جزا الله خيرا الاخ ياسر فلم يترك لك جانبا ترتاح عليه
الفلتة سموري
كما قلت فاننا شعب لا يفلح سوي في الشكية ولكن سلني كيف نستطيع ان نعمل وندفع الي الامام وبيننا مثلك يخزل فينا ويكسر كل سيوفنا فمثلك الذي يري الغزل في امين حسن عمر دفعا الي الامام هو ما نحتاجه ليكون ركيزتنا وسندنا لندفع بدورنا الي الامام خسئت انت ومن تتغزل فيه يا سموري
ولاني في عجالة ساعود اليك ولكن بوضوح اقوي
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
ياحليلك ياسمورى
الجابك الحلة ده شنو
لوووووووووول
حقيقى يا اساسى بتلقى انه مافى موضوع وتلقى الناس قادانا قد
وبرضو الناس ترد على الغربال ده بى يارائع ويامبدع وهلم جره
وناس تفتح عنوان يافلان ويافلانة يعنى الناس التانين مايدخلو ولا شنو
غايتو جنس قد
الله يصبرنا
| |
|
|
|
|
|
|
|
|
|
Re: كيف تعرف انك في سودانيز اون لاين (Re: ود العمدة)
|
ود العمدة يا عمدة تحياتي
تعرف الجماعة البيكتبوا البوستات المعنونة والمخصصة باسماء ديل واضحين داخلين البورد عشان فلان وعلانة ديل ما داسينها وريحونا من دخول بوستاتهم لكن ناس طيفو طايف ديل الواحد تلقاهو مقيل في المنبر من الدغش يعاين اول ما يشوف واحد من جماعته تمسكو الكاروشة يدخل البوست يتمنظر بكلام اطعم منه شوربة الخشب زي الضهب البشرك للفنانين عشان يمشي يتونس مع اصحابه انه صاحب الفنان هناي
علي العموم الفايدة في كلامهم المسيخ انه بنزل الضغط البرفعوهو ناس سموري
| |
|
|
|
|
|
|
|
|
|
Re: كيف تعرف انك في سودانيز اون لاين (Re: almulaomar)
|
الاخ الملا عمر اولا تحياتي
مغزي القصة واضح جدا ورسالتك وصلت فالناس لا يعجبها العجب ولا الصيام في رجب وانا من الناس فالبورد ماشي وانحنا بنهوهو لا مشكلة ان كنا لا نجيد غير الصياح فعلي الاقل نفعل ما نجيده ولا نسكت ولا نجامل فنكون نحلا وضهب وقديما قيل في المثل السوداني القحة ولا صمة الخشم اما اما نحن فالناس الذين يتكلمون معلقين علي جميع الاوضاع التي اتخزها الولد وابنه واما الولد وابنه فالبورد واما انت فاخشي ان تكون بين الولد وابنه
تحياتي
| |
|
|
|
|
|
|
|
|
|
Re: كيف تعرف انك في سودانيز اون لاين (Re: 3bdo)
|
يا عبدو روق
سلامات والله مشتاقين وربنا ما يحرمك من الابتسامة
الولا سموري طايح ليهو زمن في العالم وانا ما فاضي والمشغولية زايدة لسؤ الحظ عتر لي
وانا بهديهو اغية الطيب عبد الله يا المصيرك تنجرح بالسلاح المرة بيهو جرحتني
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
لما تلقى حتى للزعل طعم بين الأحباب...لما الذكريات الجميلة تهطل على أشواقك مطر...لما تحس بالالفة رغم المسافات...وتنتشى بالمسنجرات..لما تغشك الحبيبة أو تغشها...لما تنفعل وتجبر خاطرك الأحاسيس النبيلة...لما تغيب عن الميعاد...ويكون السؤال شفقة عليك..لما تتعذب عذاب راحم..أو تفرح ولو بى حلم مسروق
لما ولما..
دى لمة الأحباب هنا فى سودانيز أونلاين..
وانا شميت فى سطورك يا عزيزى أساسى حنية لأيام زمان أيام انت رومانسى وأيام البورد كان ...مشدود على وتر النشيد
لكن..لا يزال الوعد ...ولايزال هنالك اساسى وصحبه والكثيرين والكثيرات الذين يملكون حس الجمال والوطن والجديد
تحياتى
ودعزة
| |
|
|
|
|
|
|
|
|
 Re: كيف تعرف انك في سودانيز اون لاين (Re: PLAYER)
|
اذا رايت الشلة تعمل شيلني واشيلك بورد ولا طوطحانية ))
اساسي للدريب الجاي بحداك اقول امكن اصادف مره القاك اسالمك وينشرح قلبي...والله اي زول يكتب الدايره وكمان اي زول ينتقد الدايره ياخي مش القصه ديمقراطيه
بعدين الزول العتر ليك ده عليك بركات الشيخ ماتقصر معاه الزول ده ذي الاغنية البتقول انا ما سرقت بس جيت اعاين!! و برضو ذي اجتماعات التجمع في الجامعات تطلع تامن الموقف تلقي الشباب اوررررر جاءك متكوم ويقول ليك ده ماتجسس ده دفاع عن العقيدة.... المهم الزول الجاك ماري اكرمو وماتقصر وانا مابفسر
الني تحلا صعابها سهلا بس روق واحلي يا اساسي ...
| |
|
|
|
|
|
|
|
|
|
Re: كيف تعرف انك في سودانيز اون لاين (Re: PLAYER)
|
اها يا بلير يا فريد عصره جيتني تتمرجح
شكرا للترحيب البشبه الصورة بتاعتك دي
كلهم دمهم رايق بس مركز شوية
لا دا انا كاتب الكلام يا بلير
ما واحد حاسدني ولا واحد عاوز يكون نجم من نجوم البورد
ديل انحنا ناس لا تفيد ولا تستفيد
وربنا يوصلنا مرحلتكم يا النجوم يالابرد من الجليد
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
اساسى الكان رومانسى
براه شوية علي
بقيت نجم النجوم انت
اما ناس لا يفيد ولا يستفيد
فانت خرجت منها بهذا البوست
فقد افدت الغلابة مثلنا
واستفدت بالهجوم عليك
شايفك لبدت...
يا اخوى متاكد قاصد الكلام دا
ولا دا حالة زهج
وبتروح
انت في جدة
امش حوش على دينار
اسال من الفكى ارون ود اساق
يمكن يساعدك
قلتا لي ترحيبى ذي شكلى
وجيتك اتمرجح
وداك جاك مقنتر
ابشر
دا علامات الشعر
الجنونى اقصد الفنونى
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
أســاسـي الأســــاســـي الســــــــلااااااااااام
كــلامـك ياهــو ذاتـوووووووووووو زي ما عـودتـنـا
لــكـــن الـزول دا قـال أمـيـن حـسـن عـمر دا مـنـاضـل
الله إحفظنا و إحفظك من الضغط و السكري و كمان من النيران الصديقة قول آمييييييين
| |
|
|
|
|
|
|
|
|
|
Re: كيف تعرف انك في سودانيز اون لاين (Re: ABUHUSSEIN)
|
ابوحسين يا عسل
مشتاقين بكميات غير مقدرة
قالوا الخلا عادتو قلت سعادتو
سموري ومناضله وجه واحد لعملة اصبحت من كثرتها وقلة قيمتها تحمل علي الشوالات مثل الفحم ولكن للفحم فوائد وان اشترك مع سموري ومناضله في تلويث البيئة
لك الود
| |
|
|
|
|
|
|
|
|
|
Re: كيف تعرف انك في سودانيز اون لاين (Re: tariq)
|
العزيز طارق وين الحي بيك فقدناك في لقاءات جدة الاخيرة
بوستاتك تتحدث عن نفسها ولا تحتاج من يشيلها
ولا تحتاج ان تكون من اؤلئك المشاهير الذين زكرت فانت مشهور فينا بكلماتك وهي تفرحنا
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
اساسي
ياحارسنا وفارسنا ياحارسنا
لينا زمن نفتش ليك وجيتنا الليلةكايسنا هههه يكه
قلت لي يا اساسي الزول جاك مدردق هههيكه
ليك وحشة يا اساسي والله ولي بوستاتك القوية والهادفة
والمابعرفك يجهلك
زاتوووو
| |
|
|
|
|
|
|
|
|
|
Re: كيف تعرف انك في سودانيز اون لاين (Re: ALZOLZATOO)
|
الحبيب زاتو
رجعنالك والشوق كتلنا
مع لسانك الزي الكرفته دا يا زاتو بتحتاج ليك حارس انت
عندي ليك اقتراح تاجره للسورين في المرحلة القادمة
بيني وبينك الامريكان طايحين ومحتاجين ليهم كم لسان زي حقك والصحاف
والجاية من السماء بتحملها الواطة
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
الاخ أساسي ..حبابك
وين انت يازول؟ من ديك وعيييييك..
والله يا اخوي حليل زمن الكعات ..لأنها مفراز الحقيقة..
لكن اقول ليك أبني بنايتك ساكت وما تتلفت..اصلو معروف البناي واحد لكن البسكنو البيت كتار..يعني البيستفيدوا من الضل ما شوية
وحبابك
ودمت
كبر
| |
|
|
|
|
|
|
|
|
|
Re: كيف تعرف انك في سودانيز اون لاين (Re: Kabar)
|
العزيز اساسى
والله ضحكت ضحك اصلو ما معقول
اضحك الله سنك
والله بوستك ده فش ناس كثيرين منهم الصرح ومنهم القطعوا فى مصارينوا
ولعل الشللية فى البورد شىء واضح وضوح الشمس ولا ينكره الا من هو داخل شلة واوافقك فى اشياء كثيرة الا حكاية الطرح دى ... هاااى يكه كما يقول حبيبنا..
هو فى زول شايف حاجة ياخى ما الكلام كله على الكى بورد ولا بالاحساس بس يا حبة...
هااااى يكه
لعل حديثى يكون مجروحا ولذا اكتفى بالـ هااااااى يكه
وتسلم لينا
| |
|
|
|
|
|
|
|
|
|
Re: كيف تعرف انك في سودانيز اون لاين (Re: قرشـــو)
|
الغالي عمدتنا
تسلم لينا انت وبسمتك
الطرحة (ما حقت المحطة الوسطي الخرطوم وامدرمان ) هايييكة في ناس متخصصين فيها وديل ما يطلق عليهم جوازا النحل وان اردت التاكد فراسلني علي الاميل واعطيك اكثر من اسم اذهب وعلق علي بوستاتهم وانتظر الرد فاذا جاءك ردا حينها ساقوم طائعا بحلاقة النصف الايسر من شاربي وفي نفس البوست اذا مرت طرحة تلقي التحية فقط سوف تري المعلقة التي سوف يرد بها علي تلك التحية العابرة
| |
|
|
|
|
|
|
|
|
|
Re: كيف تعرف انك في سودانيز اون لاين (Re: Kabar)
|
العزيز كبر
الكعات كما قلت مفرزة المعادن
يحضرني بيت الشعر لامرو القيس
أصاح دع الصعلوك يبكي زمانه
فما همك الديجور ناء بكلكل ؟
هنا سوف نبني في الرياح خيامنا
ونضرم نيرانا بتلة حومل
ليست المشكل في البناء ولكن في من يريد ان تفصل له البناء وحده ليسكنه وحيدا مثل هذا السموري الذي يجيد الدفع للامام
| |
|
|
|
|
|
|
|
|
|
Re: كيف تعرف انك في سودانيز اون لاين (Re: Yassir7anna)
|
اساسي
اخوك مقابل القون
وانت تشوت براك
ما تباصيها يا فردة...
...لكن احسن مدردقة
والا مقنطرة
في كوم تراب
ذكرتني
تكس راجع
اول بلنتي
وفي الجوك
كش اللين
وبوكس الخشب بتكون شايلو في الجيب
ويبدا الضرب تروح لابسو في يدك
وليهو سنون يا ويلو وسواد ليلو من ذاق منه بونية
حليل الشكل بقى شكل نت سااااي
| |
|
|
|
|
|
|
|
|
|
Re: كيف تعرف انك في سودانيز اون لاين (Re: garjah)
|
العزيز قرجة
اصبح الشكل الان بالكلمات الم تري كيف وقف لسان الصحاف في وجه الدبابة الامريكية وجهجه باكاتها
يازول والله الكور كتيرة ومقنطرة انت بس تعال مغمض وشوت
زمان كنا بنقول شكل البنات باللسان واسع بقينا اسياده
لكن بيني وبينك زي سموري دا بيحتاج ليهو بوكس كيس نايون خلي خشب
| |
|
|
|
|
|
|
|
|
|
Re: كيف تعرف انك في سودانيز اون لاين (Re: garjah)
|
يا عمدة انا فتحت البوست ده امبارح وتاني فتحته الليله وبديت اضحك براي وانا قاعد في المكتب... والهنود يتفرجوا فيني
قلت لي يا ياسر حنا كنت ماسك ضحكتك
حليل ايام البورد اللذيذة... ايام ما كان عندنا مبدعين
ود عزة
سلامااات
مشتاقييين كميات يا حبيبنا
| |
|
|
|
|
|
|
|
|
 Re: كيف تعرف انك في سودانيز اون لاين (Re: اساسي)
|
كنت تتعلم تجامل لو فؤادك مرة جرب
صدق انا والسنجك وانت وكتير من الناس ما يعجبهم كلامنا
لكن اجمل شي انك تخرج ما بداخلك من راي صحيح
لكن رؤية الناس تصحبها مشاعر كاذبة تخاف من فلان وعلان
صراحة لما شفت بعض الناس ارائهم مشت بعيد بقيت ما بدخل بوستاتهم خالص لانوا الضغط حايرتفع
وبرضو لما تلقي واحد ناقل موضوع وما يوقل منقووووووووووول زي ما بنكتب
شكرا اخونا
قشر الكورة وتعال شوف الشوت ما بنقصر معاك
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
اساسى
قلنا ندخل نعلق . لقينانا ما تبع كومك
وبعدين خفنا تقولوا داير شكل ولا غزل ولا مجاملة ونكون دايرين نظهر
على كل اساسى بأمانة كدا أنا بوستاتك بتعجبنى بالجد وخفت أقول كدا أتصنف معاكم وحقيقة كدا أنا ما بدوركم
دا موضوع تانى موضوعى انى قلت أضع بصمتى على هذا البوست خصوصا أنه ود عزة طرزته بروائح الحنين للماضى .. أساسى نحن بنحن للماضى ليه لأنو جميل ولا لأننا أفلسنا
ود عزة انا ما تبع كوم اساسى ولا تبع كومك
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
اخوي اساسي يااساسي(زي شعار المظاهرات ههههههه)مش كده
لك كل الحق ان تعبر عما بداخلك وهذا مايميز بوستاتك في هذا البورد
دائما منفعل وتظهر مابداخلك وهو شئ طيب لك ولكن ربما يكثر عليك الاعداء
قرات البوست مرارا وضحكت كثيرا علي تعليقات المشاركين فيه والذين اتفقوا معك وامنوا علي كلامك
واهم شئ في الموضوع انك استطعت ان تستفذ هؤلاء الجهابزه ليخرجوا بعضا مما لم يعجبهم ولكنهم فضلوا السكوت عنه
لكم تحياتي
بس زعلتني بحكاية الطرحه والنحل دي
| |
|
|
|
|
|
|
|
|
|
Re: كيف تعرف انك في سودانيز اون لاين (Re: bint algazeira)
|
يا بت الجزيرةقصة المظاهرات دي زكرتني نكتة قديمةوقت كنا اطفال
ولد يموت في المظاهرات ابوه اصر عليه يبطلها ويلتزم شوية الولد سمع كلام ابوه وبقي مداوم في المسجد يوم الامام اتاخر وقدموا الجماعة الولد بتاع المظاهرات صاحبنا بيقرا في سورة الفاتحة وصل لحدي ولا الضالين الجماعة بوراه قالوا آآآآآآآآآمين صحبك ما صدق مسك عمتو في يدو وبدا يهتف في نص الصلاة ولا الضالين والجماعة امين ولا الضالين امين
ربما يكثر علي الاعداء زي ما قال ليك الملا عمر في القصة الفوق ديك تعمل اي حاجة الناس ما بتريح عشان كدا الجمل ماشي والكلب ينبح
اما حكاية الطرحة دي والله صاح بس انت ما بتشوفيها عارفة ليه ؟
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
اساسي الشكال جه
يا سلاااااام والله طولنا ما شفنا شكلة في البورد
تعال وريهم كيف تصنع شكلة بمزاج وتطبخها على نار هادية
ولمن تولع تتسحب وتقول ده ما انا هم الشاكلوني
لووووووول
مرحب بك في البورد مجددا
في سؤال محيرني لناس البورد القدام
الزول ده بالجد كان اسمه رومانسي؟
تحياتي زولة123
| |
|
|
|
|
|
|
|
|
|
Re: كيف تعرف انك في سودانيز اون لاين (Re: zola123)
|
الزولة123
الزول دة كان رومانسى وكان اسمو رومانسى
اتعلم المشاكل وسمى رحو اساسى
هو نجم ومبدع واى حاجة لكن ما بستحمل الا يعمل مشاكل
ما تراكا اهو قنطر ليك بلية وحكمها نظر والناس جوا بى ضراباتهم وجوك
مشكلتك شنو؟؟؟؟
وانا جنى وجن المشاكل المفتعلة تحت اسم المبدعين والشللية
البورد دة ساحة رحبة
فى ناس كتيرين ما عندهم اسماء حقيقية ونحن ما عارفنهم منو
اثبتوا انهم جديدرين بالانتباه وبقولوا كلام من ماس
وبجبروا الناس على الحوار والمساءلة
المشكلة ما مشكلة منو؟؟؟؟ المشكلة بتكتب شنو؟؟؟؟ واى كتابة جميلة ما بتقع واطة
والتعليق على الكلام مرات بضرو
ومرات بنفعو
فما تتعاملوا بامشاحنات دى لانها ما بتودى لى قدام
المنبر ازدحم بالمشاركين لانو ساحة ديمقراطية وعندها قراء ومعجبين ، خلى يكون هدفنا الاساسى هو النشر والمشاركة والمساهمة القيمة لكن منو كتب لى منو ومنو رد على منو ومنو صهين من منو ، دى انصرافية بتضر بالمنتدى وما بتديه قوة الدفع اللازمة البتخليهو يكون مثمر
انت يا اساسى لما اصلك بتحلل المنتدى
ما تعمل مشاريع تحليلية اكتر فايدة وتجمع الناس فى مواضيعهم دى عشان افكارهم تتحول لى نتايج وحاجات عملية
بدل ما تبكى على الاطلال
ما تزعلونا معاكم من الصباح
الليلة عيد شم النسيم والنسيم عليل لى درجة انه درجة الحرارة عشرين ، نحن ربيع ما عندنا مع الناس
قبل يومين درجة الحررة كانت تمانين فى الضهر المغرب بقت اتنين وعشرين
تقول لى النسيم؟؟؟؟
ما تجننونا برانا زهاجى
| |
|
|
|
|
|
|
|
|
|
Re: كيف تعرف انك في سودانيز اون لاين (Re: Tumadir)
|
تماضر
انت مصنفة في خانة مبدعة اذن انت غير معنية بحوار النحل والضهب دي مشاكل عائلية الدخلك فيها شنو ما لووووووووول
ضحك في تعليقك
سمي روحو اساسي
اكون ضبحت في السماية اسد ولا شنو عشان المشاكل
بعدين عجبتني لغة حوارك معاي جدا زكرتيني لم الاستاذ يخت ليهو ولد مشاغب في الواطة ويفهموا واحدة واحدة بلغة سهلة
بعدين الله لا جاب مشاكل لا باسم الشللية ولا باسمكم انتو
انا بقول في وجهة نظري بكل امانة واحدين الكلام حرقهم وشافوهو مشاكل انا اقعد اقول وجهة نظري واربيهم يعني ولا شنو
بعدين بيني وبينك مافي حاجة بتكون عملية وملموسة في البورد دا لينا سنتين بي الطريقة دي كله كلام ساكت يوم واحد سمعتي كلام كتل ليهو زول
زي ما واحدين راجين البورد دا يقلب ليهم الحكومة والله ما يقلب ليهم المخضوب فوق للكاحل
بعدين زنبي انا شنو بالحر بتاع نشرة جوية يا بعيد
| |
|
|
|
|
|
|
|
|
|
Re: كيف تعرف انك في سودانيز اون لاين (Re: zola123)
|
زولا 123
يعني ما بتتزكريني الا بالمشاكل طيب الكلان رومانسي دا منو
بالمناسبة يازولا انا عندي اكثر من 1400بوست باسم رومانسي كلها ما شفتيها عاملة فيها جديدة خالص
بالمناسبة النكتة بتاعة الشفع الاماراتين (علوج)هي المزعلة بكري مني
تعرفي كيف اسالي يازول
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
لووول يا تماضر... دي زهجة من النوع أبو كديس
أحسن الواحد ياخد ساتر يمكن تجيب ليها فليق
أضم صوتي لتماضر يا أساسي و بامكانك أن تصنف ذلك كنوع من التضهب و التلصق و التسلبط بالمشاهير.. لكن كلامها صاح و الدليل ألولو.... أنظر حولك: بت قضيم، شيري، أبو حراز، بامسيكا، شيبه، انتهازي، الرحمابي، ود شاموق، أساسي و غيرهم .....
بوستاتهم بتلقى تجاوب أكتر من بوستات المشاهير
و لك كل الود
| |
|
|
|
|
|
|
|
|
|
Re: كيف تعرف انك في سودانيز اون لاين (Re: أبوالزفت)
|
أساسي
متفق معاك ،وذات دبرسة وزهج من عدم تناول بعض البوستات بما تستحق من عناية،ومتابعة حتى يتحقق الهدف {الأساسي}منها،عمدت إلى تصنيف البوستات على حسب الموضوع ووفقآ للكاتب ،مع إحصاء عدد الداخلين لللإطلاع،والمساهمين بالردود ، ومع تمييزي بين البوستات الجادة والهادفة،،وبوستات المتعة والإبداع،والتي لها دورها المطلوب،،لكني لن اكتم دهشتي لردود الفعل لموضوع كتبه النضيف عن ابوذر الغفاري ،رغم اهميته ولكونه يصب في مجرى حملة ،موقف عام ضد التعذيب،وتغييب مخالي الراي او مناهضي السلطة الدمار وبالراي والوسائل السمية،سواء كان هذا التغييب باعلى صوره {القتل} حتى ادنى صوره بحجب الراي الآخر وعدم السماح بالتعبير عنه،حتى ولو بالمقال،،هذا الموضوع أطلع عليه285 وكتب فيه 16 شخص فقط،،تلمست ان هناك رأي عام في المنبر ضد التعذيب،لكن لماذا لم ينعكس ذلكعلى حجم الإطلاع والردود،،مع ان بوست{رايكم شنو،لبكري ابوبكر ،على سبيل المثال،إطلعوا عليه خلال يومين فقط 1098،وساهم بالنقاش 103،،بوست
ابذر وصل المشاركين 16 فقط في خلال شهر تقريبآ ومع الدفع به للأعلى
أعرف التفاوت في قدرات الناس على عرض وصياغة الموضوع،واثر ذلك،وكذلك اعرف التفاوت والإختلاف في أمزجة الناس،بالطبع، لكن ما لا اهمه التقاعس عن التعاطي مع موضوع /قضية،غلى الدرجة التي ذكرتها إحصاءآ
عفوآ ىساسي فقد إكتشفتك يا دوب وحتمآ سوف أراجع مساهماتك السابقة،،وبالتأكيد القادمة
| |
|
|
|
|
|
|
|
|
|
Re: كيف تعرف انك في سودانيز اون لاين (Re: بكرى ابوبكر)
|
1:_ أساسي
فات على ان اوصيك خيرآ بالجاك مدردق ده ،وكان في واحد بفتش على نبله يا ربي لقاها؟
2:- بكري ابوبكر
1- ممكن تهديها لي انا كمان
2- أتسأل عن مصير وردتي الحمراء العاجباني، والتي إختفت في ظروف مريبة،،يرجى مراجعة بوستك {حركة تحرير السودان/فرع كندا }
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
[email protected]
والله يا اساسى انت ختير ومبدع حتى فى شكلاتك لكن عندى سعال ليك الشعار حق حلاوة حب دا جبتو من وين بالمناسبة ياعذابة انا قاصد حب يعنى الحاء مفتوحة ما
مضمومه برانا زهجانين وما ناصين مشاكل
انت مسعول من الخير عندك خبر ود عزة جاء من بغداد والله
لسه سمعتا لى كلام تحت تحت قالو شغال مع مفتشين اليونايتد
نيشن لكن الكلام دا بينى وبينك
| |
|
|
|
|
|
|
|
|
|
Re: كيف تعرف انك في سودانيز اون لاين (Re: WAD ELGAALI#4)
|
سلام مربع
اول الحكي
ليه نلوم عصفور حنين
مره تلقاهو بغني
مره في وادي المحنه
طاويي حريته في جناحو
عمرو ماملا الرواح
الغناء النور الجيلاني
_________________
ايه رايك يااساس انا عايزه
اكون اتجاه فكري براااي
كده ، وماتقوم تنط لي هسع
في الكفر
وزي مابتقول العصابة في بيتنا
تكتح لينا الشاشه
عشان كده يااساسي
خت الكوره واطه ، وبلاش تكتح شاشتي انا
شاشة الناس التانيين مامسعوله منها
والله احرش البواليص البختوا في راسهم انصاص البطيخ ديلك
وانت عارفهم . شكلك كده من الناس الكانوا
بعملوا المظاهرات ايام الجامعة
هاهاهاهاهااهااه
امازحك ايها الشكال
ماتقوم تدورها معاااي انا ماقدرك ولا لحم سدرك
وبالله خت الكوره واااطه
| |
|
|
|
|
|
|
|
|
|
Re: كيف تعرف انك في سودانيز اون لاين (Re: shiry)
|
البت النضامة شيري
اتجاه فكري مرة واحدة
ودا اشارته بعملوها كيف ناس المرور
عليك الله اعملي فيهو عبور مشاه
معاي اخوي في البيت لقاني طابع بوستات ولسؤ الحظ فيها بوست ليك
قام قال لي اطبع لي كم بوست من حقات شيري
قلت ليهو ما لقيت الا بوستات النضامة دي ثلاثة بوستات كملن كرتونةورق عشان كدا قلت لسؤ الحظ ناس الشغل قطعوا معاي
وبرضو تقولي لي ما تشاكلني
اصبري بس اعمل يو تيرن
| |
|
|
|
|
|
|
|
|
|
Re: كيف تعرف انك في سودانيز اون لاين (Re: بكرى ابوبكر)
|
بكري سيد الكورة ازيك يا كبيرنا
منو القال ليك زعلان منك انت ما خليت سماع الشمار دا لسع
عليك الله انت بزعلوك ولا بزعلوا منك
كان شلت كورتك وقلت ما داير
الناس ديل يلقو الدافوري دا وين تاني
وشكرا يا عسل للاغنية
بس بصراحة فرفور دا صوته زي السخيل
كان تجيب لي خضر بشير عليك الله
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
اسوسى
ازيك
عارف يااسوسى دى على وزن سمورى
الغربية سمورى اختفى من البوست
احتمال يكون اسم الدلع ماعجبو
اكان دة السبب عليك الله غيرو ليه
او احتمال تكون سميت بدنو بكلامك
اها اكان ده السبب خليك حنين عليه
عارف يا اسوسى انا عفرت البوست
ده ليه
لا قول انت
كان ردت بجيك صادى
اخوك زفوتى
ضككككككككككككككككج
دى الترجمة حقت
لوووووووووووووووول
(عدل بواسطة أبوالزفت on 04-20-2003, 12:55 PM)
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
ابو جهل يا اساسي....
للاسف للان لم اقرأ لك طرحا واحدا ....يتكلم عن مشاكل السودان ....وهذا لاحد السببين...اما انك مفلس ...او جاهل....الشي الثاني للاسف دايما تلجأ الي اسلوب النبذ الشوارعي وهذا يدل علي انك ...متربي علي الرزيله او الشارع....
بعدين انت لو الكفيل بتاعك مسكك وانت بتستعمل كمبيوتر العمل وتضيع وقت العمل...بيرحلك.....لانو الخمج ده في السودان ما هنا....بيعمل ليك خروج بدون عوده وحا ترجع لشجر النيم وضل الضحي.....
واها...ورينا اللسان الشوارعي....
| |
|
|
|
|
|
|
|
|
|
Re: كيف تعرف انك في سودانيز اون لاين (Re: SAMIR IBRAHIM)
|
المفروف في امثالك ايها الجيفة ان يعلم جيدا من تربي علي الرزيلة فالذي يبيعها ادري بتربية يديه لذا انت محتار
اما عن الطرح فقد تركته لامثالك الذين يبدعون في اتحافنا بتعقيد ماهو معقد اصلا
ولما توصف الخمج بانه في السودان لانك متاكد من ما تفعله حكومتك بانه خمج ومسخرة فانت تمثل به
ايها القيح المتعفن ما اجمل ان اعود الي السودان تحت اشجار نيمه وظل ضحاه ولكن تاكد حينها انك ستكون لاعقا لحزائي اثناء استرخائي علي ظلال النيم فمن تعود ان يكون راسه بين الاحزية لابد له ان لا يغادرها
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
اساسي
هسع انتا هجتا في المطبلاتية والشيالين في البورد.... وقام البورد دا كلو جاك هنا وشبكك
وين يا اساسي ..وما عارف اساسي الختر ووينك يا راجل من زمان وما عارف اساسي الشكال وانحنا معاك بنرى ما ترى ولا ناسف لما ترى ...
تخيل انا ومعاي اربعة مطبلاتية - واحد منهم واحدة بي طرحة في الكتف- اتحيرنا وقلنا (طيب اساسي دا قاصد منو كان الامة دي كلها جات هنا واتحكحكت)..
بعد شوية عاينا لي بعض كدااااااا....وقلنا معقولة ود الذين يكون قصدو كدا ...
*********************************
ياخي خليك واضح للنهاية ....قول انا قاصدكم الاربعة ومعاكم الموصلي ..
سامر ابراهيم المسكين دا القدرتا عليهو
انتا
عينك في الفيل .... بقد الدلو
| |
|
|
|
|
|
|
|
|
|
Re: كيف تعرف انك في سودانيز اون لاين (Re: اساسي)
|
اساسى
ديل انتو بتقولو كده .. نحن نعمل شنو
عليك امان الله نزلت لى بوست ..خلال يومين
لقيتو ليك ماشى على الصفحة العاشرة عديييل
كان ما لحقتو براى .. كان يكون مشى بورد تانى هسى
الله يدينا ويديك الصبر
| |
|
|
|
|
|
|
|
|
|
Re: كيف تعرف انك في سودانيز اون لاين (Re: OmDur)
|
ياسر محجوب
دكين
ارتيقا
ام در
البوست دا والله اخد اكتر من حقو
انا زاتي ما داير اكتب فيهو تاني
ودا اخر كلام لي فيهو
ياسر انت ماشة فيك الوصفتين فانت نحل مضهب ويجوز اطلاق كليهما عليك
لوووول
دكين
يازول والله انا ما متابع بوستاتك لا انت ولا الاربعة المعاك
ارتيقا
ياهو دا الحال نسوي شنو بس
ام در
جيم جواب
اسمك سقط سهوا واظني قبل الدخول للبوست كنت اقرا لك لذا تشابه علي لك العتبي حتي ترضي
الكاتبة هي روعة
هل رأيت الجنة ؟؟
هل رأيت الجنة ؟؟
وختاما استغفر الله العظيم واتوب اليه واستغفروه انه كان غفورا رحيما
| |
|
|
|
|
|
|
|
|
 Re: كيف تعرف انك في سودانيز اون لاين (Re: اساسي)
|
الاخ اساسي اعجبتني جدا اغلب الردود التي حوها هذا البوست ولكن الاخ سمير على ما اعتقد ان لديه قضية يريد نشرها باي وسيلة وطريقة ووجد في هذا المنبر ضالته ان لم اقل هدفه بوجود كتاب ومفكرين وفنانين يريد ان يطرح عليهم افكاره او افكار من يدافع عنهم وبالتالي هو يبحث عن قضية حتى ولو لم تكن هنالك قضية واغلب البوستات التي يكتبها او يرد عليها تنحو في هذا المنحى وما سؤال الاخ صفر له في احدى بوستاته عن من هو ومن هم الا دليل على ذلك
....
...
..
.
انت يااساسي انت المنبر طول من المشاكل كدا مالو ولكن اشم رائحة شكلة قريبة والحجازين قاعدين
| |
|
|
|
|
|
|
| |
اساسي
almulaomar
PLAYER
ABUHUSSEIN
tariq
Bakhaf
ALZOLZATOO
Kabar
قرشـــو
Yassir7anna
garjah
مهاجر
falcon
ود العجمى
bint algazeira
zola123
Tumadir
Yassir Mahgoub
أبوالزفت
أبو ساندرا
cola
بكرى ابوبكر
WAD ELGAALI#4
shiry
ebrahim_ali
فيس بوك
تويتر
انستقرام
يوتيوب
بنتيريست