دعواتكم لزميلنا المفكر د.الباقر العفيف بالشفاء العاجل
|
|
 كل تلاتة في محلاته وكل جركانة في مكانة وكل ستة في حتة
|
بهذه الجلكسة التي التقطها في الخرطوم اعنون بوست انطباعاتي عن السودان بعد مرور اربع سنوات من الغياب الطوعي
واهدي هذه الانطباعات الي الاخوة الشرفاء الداقسين وما عارفين في المنبر حول النت داخل الشبكة والذين هم اون لاين
اول ما لفت نظري ان القصة ( بقت سايبة ) عند صالة الوصول مطار الخرطوم حيث استقبلني اخي الطالب الجامعي داخل الصالة ( اي محل اجراءات الجوازات واستلام العفش ) وعلي ذلك قس حيث اختلط المستقبلين مع الواصلين قبل استلام المتاع والشنط فعلمت ان القصة جابت ( رخوة) حيث انه قبل سفري كان ذلك المكان محرم الا علي ابو ايد قوية وبطاقة امنية ودقن دائرية او من يعمل في خطوط جوية هاهاها عجبتني السجعة دي
وبما اني مفتح ومقرم ورابط شبط كنت اخر من يركب الطائرة من مطار المغادرة لاكون اول من يخرج من الطائرة ( ويلحس) الاجراءات بسرعة في المطار استقبلتني الوالدة وابناء شقيقاتي وكانت اول الدهشة ان من تركتهم ( شفع ساي) لاحقوني كتوفا واصبح لديهم وجهة نظر تقيم وتمحص فعلمت حينها اني كبرت عدة اعوام لم اشعر بها الا ذلك الوقت لا علينا فهذا حال الدنيا سوي انها سنوات قليلة والشفع ديل شفقانين ساي
ركبنا الي العربية فلم تقوم بينا كب وتقع بينا رب كعادتها عند مغادرتي ولكنها مشت فوووو والجميل في الامر انها كانت بوكس دبل قبين ذو ماركة سودانية تسمي جياد وتحققت قولة الكيزان ( نركب مما نقلع ) ولاني محظوظ ولاني سكني من مطار الخرطوم لا يبعد سوي غمضة عين في منطقة البراري كان وصولي سريعا ولكن علي شارع اتجاهين احدهما يتحمل اربع الي ثلاث سيارات في وقت واحد واتجاه واحد حينما تركته كان لا يتحمل رقشة وعجلتين ولا ود ابرق من كثرة الحفر اذن الجماعة بقلعوا وبصلحوا وهي ملحوظة ثانية
في هذه المسافة القصيرة رايت كل ( الفسحات التي كانت ) صية قد امتلات بالعمارات والبيوت الشديدة والعربات في الطريق قد تبدلت ايضا حيث كانت الكلمة حين سفري للتايوتا بانواعها والتي تنبي بان اليابان قد توقفت عن انتاج السيارات عند الموديل ثمانية وسبعين وواحد وتمانين وثلاثة وتمانين سيوبر الان العربات الكورية الهيونداي تملا الشوارع والاتوس التي تشبه ( جزم الشفع) لامؤاخزة تملا الساحة وتقف في كل مكان مثل مدخل المسجد الملئ بالاحزية عند صلاة الجمعة
بعد دخولي ووصولي الي المنزل نهار اخر يوم من رمضان هذا الشهر وبعد ان حنكت مع ( ناس البيت وفكيت اخري ) دخلت لاستريح ولفت نظري وجود طبق استقبال ( مصبن خلف الغرفة) فعلمت حينها لما لم يستقبلني اخواني التؤام الذين يحبون الترطيبة زي عيونهم وعنما سالت لماذا الدش ( مدسوس ) قالوا ان الامر يحتاج تصديق ودفع كمية من العملة التي اصبحت بالوان مختلفة وقوات ضعيفة علي الصمود امام السلع
واواصل بعد الفواصل
|
|
 
|
|
|
|
|
|
|
 Re: كل تلاتة في محلاته وكل جركانة في مكانة وكل ستة في حتة (Re: اساسي)
|
الأخ أساسى
هل تكتب الينا الآن من الخرطوم أم من جدة؟؟؟؟
كما ألاحظ يا أخى ركاكة اللغة التى تستعملها الآن وهى ما لم نتعوده منك من ذى قبل ، فهل يعد ذلك نتاج طبيعى لما شهدته فى الخرطوم من انحطاط مستوى اللغة والإخلاق كما يشاع ، أم أنك نويت أن تعود الينا ببعض أساليب الشماشة لتزيد من فنيات البوست؟؟؟ وهل ما زال هنالك شماشة يشمون السلسيون والبنزين ، أم أن الوضع أفضل حالا من السودان عندما تركته قبل أربعة سنوات؟؟؟؟
شكرا وكل عام وأنت بخير
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: عاطف عبدالله)
|
العزيز استاذ عاطف عبد الله
اولا مرحب بيك ولك الف تحية واحترام وتقدير
باذن الله كلما وجدت فرصة في هذه الاجازة والتي صارت بواقي ايام ساكتب عن انطباعاتي عن السودان
اما كونك غريبا فهو لا محالة حادث هذا الامر ولكن السودان سرعان ما يجذبك اليه بحنانه المعهود لتدور في عجلته فهي ايام معدودة تكون فيها ضيفا مكرما وغريبا بعض الشئ ولكن ايام سريعة التلاشئ فلا غريب بين ظهرانين هذا البلد العظيم
ولك كامل ودي وتقديري
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: يازولyazoalيازول)
|
الاخ هشام يازول
اولا الف مرحب بيك ومن الخرطوم سلام
قد تكون ملاحظتك في مكانها في اني استخدمت لغة( عامية عن قصد ) فكمااعلم اني لست مطالب سوي بتجنب الفاضح من القول ولكن هذه هي اللغة التي اضحت متداولة في معظم قطاعات الشعب السوداني والتي صارت مفهومة في الداخل اما عن الانحلال الذي كثيرا ما يتداوله الناس فلي رؤية واضحة في هذا الامر وهي ( انه اذا اقر كل شخص يتحدث عن الامر بان هنالكفياسرته الكبيرة اوالصغيرة احدي المنحلات فقط عندها اقر بان الامر اصبح شائع ويجب الحديث حوله امااذا كنا كلنا في نفس الوقت نتحدث عن وجود الانحلال جميعنا ولا احد يقر بان من تقربه احد الامثله فحينها يكون مجرد( ونسة) فنحن انا وانت وهو وغيرناهواسرنا المجتمع فننفي الامر عن انفسنا ونطلق القول مجازا . كل هذا ولكنمن ارادالسؤوبحث عنه وجداهل السؤمنذ مجتمع النبي فحينها لميكن الامر ظاهرة سوي انه كان مقنن وفي مناطقه وحين تم التضيق عليه اتخذ اشكال اخر هي جديدة علي الناس ( سوي ان بنات الناس ما ليهن حد)
اما الشماشة فهو حديث اخر كنت بصددابداء ملاحظتي فيه ولكنبما ان الامر فتح الان فلك هذا
مااستغربته وانا اتجول في السوق العربي اكثر من مرة هو عدم وجود الشماشة الذينيملاؤن الطرقات ومجاري الصرف استغربت جدالهذا الامر ولفت نظري ايضا النظافة النوعية التي اجتاحت شوارع الخرطوم وكثرة عمال النظافة من الفتية في مقتبل العمر يلبسون زيا اصفرا وبرتقالي وكثرة عربات النفاية سالتعن الامر طبعا اي الشماشة فقالواان الفتية الذين رايتهميلبسون الوان العيد هذه هم انفسهم الشماشة تم توظيفهم في شركات النظافة لمدينة الخرطوموتماستيعابهم بالكامل بدوام كامل ووجبات كاملة ففرحت حينها لان مشكلة الشماشة المزمنة قدصار له علاج مرضي بعض الشي ولماسالت عن تعليمهم قالوا ان هناك دار في مدينة سوبا تم انشائها لاستيعاب الصغار منهم اليحين بلوغهم السن التي تمكنهم من تحمل مسؤلاياتهم مع ضمان حرفة علمت لهم اثناء دراستهم ويتم استيعابهم
هذا جانب وجانب اخر وهو العطالة علي الطرقات والتي كانت منتشرة حين هجرتي مع حلم الهجرة المزمن للشباب اضحت نادرة جدا فمن استطاع سبيلا فهاجر ومنلم يستطع وجد عملا ولو يكاد يكفيه الرمق وهو باي حال افضل من العطالة وجلوس الطرقات فالكل اصبح مشغولا وملتزما بشئ يؤديه
اذا والله سآئلني من قولي ان السودان اصبح افضل حالا كثيرا من يوم تركته ومن اراد فيه عملا وجده سوي ان لي بعض الملاحظات والتي ساقوم بكتابتها تباعا في ردودي وهي قوة العملة والتي اشك انها صارت ( حلاوة قطن) فهي سريعة الزوبان لا تصمد ابدا امام شروة او بيعة
ولك عظيم تقديري اخ يازول
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: sheba)
|
الصادق ومؤمن بقضيته الاخ خالد شيبة
دعني افعل واحيك علي جهدك واجتهادك في ما تذهب اليه وكما اتحفنا مرة الصديق الطيب برير بقصيدة في جلسة لبورداب جدة مفادها ان الرجل قال ( احب واقتنع بالذي يقوم بالامر علي اكمل وجه اي بلغتنا ( ينجضه) او كما تفعل في التوثيق للاستاذ مصطفي فهذا الامر تستحق عليه الاشادة والتقدير
وباذن الله سوف ارسل لك رقم هاتفي في الماسنجر لاني اكثر منك شوقا للقيا ودعني هنا اشيد بالاخوة حبيب الكل وفيصل44 والاخ ود الديم والذين افرحوني بجلسات كثر واكرموني في دياري ايما اكرام اسال الله ان اتمكن من ايفائهم جزء من جميلهم علي واغداغهم علي الحب والاشواق فازالوا غربتي باسرع مما توقعت
علي ان لي لهفة في لقياك اخي خالد
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: اساسي)
|
اساسى حمدلله على سلامة العودة
انت عارف الزملاء القضو اجازات بيقولو انو فى مقولة دايرة على السنة المواطنيين بتقول ( ناس ماتت فى الجهاد و ناس ركبت جياد ) و اخرى (ناس ماتت غبينة و اخرى ركبت دبل قبينة) طبعا استوقنى فى انطباعاتك الجياد و الدبل قبينة انت عارف انا لحدى عام 2000 كنت طالب فى الجامعة الاهلية قبل ما اصبح من الديسابورا الحاجة العارفة انو جياد كلهاسيارات الكيزان و المحاسيب
رايك شنو
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: abuarafa)
|
الاخ ابوعرفة
لك التحية والتقدير
اولا ولله الحمد لا نملك سيارة في منزلنالا جياد او تايوتا وما ذال اهلي واخواني يستخدمون 11خ اذا نت تعرفها سوي ان الجياد كانت شدة من صديق اخي اي سيارة والده ولم اسال الي الان هل هو كوز او داف لاف التجارية لوووووووول
يازول اي زول عايش في السودان والصور البنسمعها في هذه الدياسبورا افردت لها هذا التوقيع
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: nazar hussien)
|
حبيبنا الاولانى ... اساسى القاسى
ولا اساسى الشماسى ...لوول
اخباك والاهل عساك وجدتهم فى رفاهية ونعمه
طبعا انا معاك الخرطوم فيها تغيرات كتيره وحاجات جميله كتيره
بس ماعايز اقول ليك امشى الاقاليم .... لالالالا
اقطع كبرى امدرمان .... وشوف الشوارع ... والنضافه
عموما ان شاء الله البلد ترحب بيك
تحياتى لحبيب الكل .. وفيصل والجميع
ديكو
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: اساسي)
|
أساسي .. ازيك
تعرف صدام كمشوهو لأنو مراتو قالت (قاعد ) يكلمها كلو اسبوع مرة
الجماعة لقطو الخيط دا .. وتابعوهو
دحن ابقى عشرة على الدش حققكم .. بعد ما فتيتو
ولا يكون ناس الأمن ديل أصاحابك؟؟؟؟؟؟؟
يا اساسي ليس الوطن هو الخرطوم وبس؟؟؟؟؟؟
أمرق على ( الضهرة ) والصمصي .. وشوف .. يا ما تشوف؟؟
حمدلله بالسلامة
وعقبال الفي بالنا
رحمابي
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: AlRa7mabi)
|
اساسي الف حمد لله على السلامه والشوق كميات والله
ان شاء بس حسمتا الحجات المصيرية وكدا عششان نبارك ونهني
يا اساسي الكلام القلتو كلو صاح الشوارع بقت اوسع وانظف والخرطوم بقت اجمل والشماشة ما عارف شنو لكن وين الحاجات الاساسية
التعليم وصل وين وبقى شنو
الصحة والمستشفيات
الكهرباء واالموية
دي هي الاساسيات اي منقة
وزي ما قال ليك ديكو كدي اطلع لي برا شوية وشوف ولا السودان دا بقى شارعين في الخرطوم وخلاص
باعوهو ولا شنو ؟؟؟؟؟
والله بكونو باعوهو واحنا ما ناقشين
سلام تاني و منور البورد
| |
|
|
|
|
|
|
|
|
|
Re: كل تلاتة في محلاته وكل جركانة في مكانة وكل ستة في حتة (Re: almulaomar)
|
الاحباء
ديكالجن
ابو نور
الرحمابي
ايهاب
الملة عمر
لكم جميعا ودي وتقديري واسف للتاخر المسبب عن الرد
ومتابعة بقية الصور التي اشهدها يوميا هنا في السودان الزاخر كل يوم بجديد فاذا لم تكن متيقظا وانت بالداخل فاتك الكثير دعك من ان تكون بالخارج
الحمد لله خرجت خارج الخرطوم لاكثر من ولاية وايضا داخل الخرطوم لم اترك صديقا لي في اي مناطق طرفية او وسطية الا وذهبت ورايت بعيني ولكن من يقول ان السودان لم يتحسن كثيرا وكثيرا جدا فهو لم يقل الصدق ابدا علي ان هناك بعض الملاحظات والمشاهد التي تدعوا للدهشة واحيانا للرثاء ولكنها تؤكد دوما علي تناقض هذا البلد وهو سبب تميزه كما اظن واوعد بان اضيف صور ومشاهد كثيرة في مقبل الايام فقط لان الاجازة اصبحت في ( الحركرك) ولا اريد اهدارها في النت وانا استطيع ان استمتع بها وسط الاهل والاصدقاء او كما افعل الان لذا لي وعد بتفصيل كبير ودقيق جدا عن التعليم والصحة والفقر وكل المشاهد التي تهمنا جميعا فانا الان مشغول بجمع معلومات من قطاعات كثيرة لانشرها في هذا المنبر ولكم جيعا ودي وتقديري
| |
|
|
|
|
|
|
| |
اساسي
يازولyazoalيازول
عاطف عبدالله
sheba
abuarafa
AlRa7mabi
ايهاب
almulaomar
فيس بوك
تويتر
انستقرام
يوتيوب
بنتيريست