السودانين هم شعب الله المختار هم الافضل من الشعوب في كل شي في الكرم والجود والاخلاق لا يدركون يسبقون كل الشعوب بسنوات ضؤية وفي المدن عندما ياتي مريض الي اهله من الاقاليم نجد ان الزوجة (تنق) لطوب الارض وتتزمر من خدمة الضيوف والمرضي ولكنها تباشرهم بوجه طلق وعبارات الترحيب فتشجعهم للبقاء ايام اخر للنقاهة بعد الشفاء المرضي ومرافقيهم ..نجد الزوج يسب ويسخط ويلعن انه من تلك القرية ويشكي لطوب الارض وصديقه الذي يستدين منه (ليكفي ) الضيوف وياتي لهم بما لذ وطاب بما لم يره اولاده حتي فقط (عشان ما يشيلوا حاله) ما اصلوا هم اهل الجود والكرم!!؟ الرياضة السودانين هم من قام بانشاء الاتحاد الافريقي للكرة مع مصر واثيوبيا هم اصحاب اقوي فريق لكرة السلة ابطال العالم في العاب القوي كل هذا بدأ في عهد الانجليز وتم توريثه للسودانين (شعب الله المختار ) ولكن اين الورثة الان ..؟ الرياضة تصنيفهم في الاتحاد الدولي للكرة ياتي بعد دولة البنقلاديش التي لا يوجد بها ميدان للعب الكرة من كثرة السيول ...وترتيبنا الكم وكمين بعد المائة ..لكن برضو اسياد الكرة ..!! وفي العاب القوي نستاجر( جراية شدة) من كوبا لتمثلنا وتلفزيون السودان لا يعرض صورها لانها غير (محتشمة) نا في مشروع حضاري هناك ما تنسوا كمان والمشروع دا بيمنع شعب السودان رؤية ممثليه في جهازهم القومي ويبيح للعالم كله رؤية صاحبة الجواز السودان (الغير محتشمة) دا ما الحضاري كدا زاتو ..؟ وفي كرة السلة برغم طول القامة الا ان السلة بعيدة جدا عن متناول يد اللعيبة لذا يجربون حظهم في دول اليانكي والغريبة تكون في متناولهم هناك..؟ ما برضو اسيادها انحنا..! في التعليم منو الزينا ...؟ انحنا اهل العلم والفهم ..؟ لما كان في السودان كلية غردون التزكارية كان معظم سكان افريقيا (ساكين القنيص) ومشركين للغزلان (اكل ولبس) ونحن ننهل من علوم الدنيا ونتفوق وما زلنا ننهل ونتفوق وافريقيا العرفت كرة القدم بعدنا تشارك في كاس العالم وتصدر اليورانيم المخصب ونحن نجني الضرائب من (التمباك المعطرن) ما انحنا برانا منو الزينا ...! في السياسة نحنا اهل راي وفكر ... الشعب المختار جميعه يتحدث في السياسة فصاحب صاج ( الطعمية ) يبدئ اراء يعجز عن ابدائها خريج اكسفورد في مشكلة جزر الفاكينق بين الارجنيتن وبريطانيا ...والمشكلة شنو ما انحنا الشعب القيافة الفايت الناس مسافة ...؟ !! العرب ..؟ ديل ناس وهم ساكت اتعلموا بايادينا والان مازلنا في القرن الواحد وعشرون نمارس الرعي عند الناس الوهم ساكت وتنقل كفالتنا من عربي وهم لعربي اخر وهم كما تنقل صكوك ملكية الكارو وخليها حلوة (الكامري) دا حفاظا لقيمتنا كشعب مختار ..!؟ ما هم وهم ساكت ...؟؟ وانحنا ما يانا الزمان ...!! الخواجات ...شوف الحلب الكفار ال(المعفنين) ...دي خلوها مستورة ... الكلام فيها بدخلنا في الشك واليقين بين المسلم والكافر والاسلام والكفر ... واخدوا نظرة بس من مواعيد الخواجات ... الحلب الكفار..؟ وانحنا اهل العقيدة الراسخة نمارس في منابرنا تلاوة الحديث عن صفات المنافق اذا وعد اخلف ...؟؟ ما عادي ديلك كفار وانحنا اهل دين وسجادة..؟ ولا الكفار ديل لما كان الظلام يعمهم انحنا بنمارس الرفرفة باجنحة عباس ابن فرناس ومازلنا نمارس الرفرفة ولكن كالدجاج المزبوح وهم يحلقون حول المريخ ويدرسون تربته ..؟؟ المشكلة وين ما انحنا اسياد العلم والفهم ..؟ الهكر يسرقون ايميل او ايميلين مليئات بخطابات شخصية وبضع مراسلات خاصة .... وشعب الله المختار موعود بقوات دولية ...؟ لكن المشكلة شنو شعب الله المختار اختار تحرير وحماية الاميلين وترك الحديث عن القوات الدولية ...؟ مافي مشكلة للسودان رب يحميه لكن نحن ارباب الاميلات .. والرسائل ..؟ اتفاقية السلام وقوات الجنجويد وحسابات التبرع لاطفال السودان لا يصرفون البعض عن الاستقالة لانهم لم يستطيعوا ان يحرروا ايميلات حرائرهم فما الداعي لوجودهم؟؟؟... والمشكلة شنو انحنا ما كدا..! شعب الله المختار اهل الحرية والديمقراطية ... يخرجون من بلادهم لانها لا تعطيهم حرية التعبير يتشردون في البقاع ويحكون لطوب الارض عن مشلكلاتهم ... ولكن في وطن اللا وطن له البديل .... امشي يا كوز اسكت يا مجاهد ..انطم يا شيوعي ... عندك كلام يا بعثي...؟ بالله شوفوا حامي بت السيد دا...؟ اقطع وشك يا متاسلم .... ما ترحمنا يا اتحادي .... ما ياها دي الديمقراطية والحرية ... الاخر كسر رقبة يقبلنا ...لكن حرم ما نقبلوا ...؟ ما انحنا كدا العاوزنا يقبلنا زي ما انحنا...! شعب الله المختار الشعب السوداني البطل الشعب المناطل ... ما لكن فكيتوها فينا كبيرة ...؟ كدي اقسموها النص ممكن نبلعها ...!
08-06-2004, 09:57 AM
سجيمان سجيمان
تاريخ التسجيل: 10-03-2002
مجموع المشاركات: 14875
لكن يا سجيمان تعرف وزي ما بيقول صاحبنا انور مافي شي شخصي والهكر زاتو ماسكها ليهو ...فمافي شي شخصي لكن انت زاتك زي السودانين ومثال كويس خلينا نستغلك بتكتب في البورد دا وبورد سودانت في امان الله ومن نجوم البوردين المقرؤ لهم ....قوم يا الشليق امشي اعمل ليك بورد براك ما قادر ويدك لاحقة نقول شنو وانور صحبك وفي رواية مفتون بكتاباتك ...اها المشكلة الموضوع الواحد بقيت تنزلوا في تلاتة محلات هنا وهناك وهناك دييك ...يعني بالجد كدا مفروض موقعك داك كان تخليهو لحاجة تانية وتستفيد من الامكانية الاداك ليها ربنا يعني مثلا قول وبما انك بيطري او كما سمعنا (تحت تحت) فكان ممكن تتكلم عن ثروة السودان القومية التانية وتبث نصايح ما دام الانترنيت بقي مقرؤ في رجل الفولة وشنقلي طوباي لكن وما بيدك طبعا انك سوداني ...اصريت انك تستفيد من سودانيتك وتضيع موقع كامل في صدي كتابات ما ملاحق ترد عليها هنا وهناك وبهناااااااااك كدي بدون فرز او حاجة شخصية ما تشوف كلامي دا كيف؟
08-06-2004, 04:33 PM
Muhib Muhib
تاريخ التسجيل: 11-12-2003
مجموع المشاركات: 4084
بلغه سودانيه بحته _ البوست جميل _ وكنت مسترسل فيه كويس _ بس الحته دي بختلف معاك فيها _
Quote: الهكر يسرقون ايميل او ايميلين مليئات بخطابات شخصية وبضع مراسلات خاصة .... وشعب الله المختار موعود بقوات دولية ...؟ لكن المشكلة شنو شعب الله المختار اختار تحرير وحماية الاميلين وترك الحديث عن القوات الدولية ...؟ مافي مشكلة للسودان رب يحميه لكن نحن ارباب الاميلات .. والرسائل ..؟ اتفاقية السلام وقوات الجنجويد وحسابات التبرع لاطفال السودان لا يصرفون البعض عن الاستقالة لانهم لم يستطيعوا ان يحرروا ايميلات حرائرهم فما الداعي لوجودهم؟؟؟... والمشكلة شنو انحنا ما كدا..!
اولا _ سرقه الايميلات عمل غير جميل _ مهما كان السبب _ ليس هنالك مبرر لفعل هذا الامر _
ثانيا _ اذا كان لديك رائ _ حول التدخل الاجنبي الوشيك في السودان من اجل تصحيح الوضع في دارفور _ارجوا ابداء هذا الراي بوضوح بعيدا عن الربط بينه وبين موضوع سرقه الايميلين _بالمناسبه عن اي اثنان تتحدث ؟ _ ان كنت لا تعلم _ سوف يتم التدخل _ اذا تم _ فقك من اجل تصحيح الوضع الغير انساني في دارفور _ طالما الاطراف السودانيه فاشله في حل الوضع _فمرحبا بالتدخل الاجنبي _ فقط من اجل حل الوضع . قبل فتره استفزني احدهم بعباره _ جهزوا اخواتكم من اجل الامريكان _ فقلت له _ لقد تم اغتصاب اخواتنا قبل فتره طويله في دارفور من قبل الجن جويد _ فايهم اجدي بالاهتمام _ افتراض بان السيئ سوف يحدث جزافا وتخيلا وافتراضا _اذن علينا انقاذ وايقاف هذا الوضع قبل حدوثه _ ام محاوله فعل شئ من اجل ايقاف السيئ الذي يحدث الان وكل يوم في دارفوووووووور !!!!!!!!!!!!!
ثالثا _ في اعتقادي ان اي شخص تم سرقت ايميله _ له الحق في الحديث عن هذا الامر _ له الحق في مناقشه الظاهره _ له الحق في رفع دعوه لاسترجاع حقه _ له الحق في فتح مئات البوستات _ الخ ...
رابعا _ لا اري غضاضه ان يهتم بقيه الاعضاء بموضوع سرقه الايميلات _ ولا اري غضاضه في كونيه الاعضاء يساعدون بعضهم البعض من اجل افشال سرقات في المستقبل _ ولا اري ان الامر يتعارض مع الاهتمام بدارفور وبقيه القضايه ..
والسلام ياخ اساسي .. محب
08-06-2004, 04:50 PM
اساسي اساسي
تاريخ التسجيل: 07-20-2002
مجموع المشاركات: 16468
ما ياهو يا محب كان ما اختلفت معاي نكون كيف شعب الله المختار ...لازم كل زول عنده راي ورايه الكويس والمفروض يبقي ...طبعا في ناس بيقولا دا دليل صحة وعافية وفي ناس بيقولو دا تحصيل حاصل خلينا ما نختلف معاهم كلهم ونمارس سودانيتنا وزي ما بيقول المثل ما بيصح الا الصحيح راي في دافور كتبته في بوست منفصل وراي في التدخل الاجنبي وبعدها غبت عن المنبر لفترة لظروف صحية وعند عودتي الي المنبر فؤجئت بان المنبر يتخذ موضوعا واحدا وقد يستمر هذا الموضوع لسنوات ولا ينتهي وبامكان الهكر كل يوم سرقة اميل احدهم وهذا الاحدهم كل يوم ينزل بوست ويتضامن معه الجميع ببوستات استنكارية ...والقصة تتطول وتاخد مدة ...ورانا شنو ما سودانين فاضين شغلة نشوف حدها وين ..؟ الموضوع لو وضع في حجمه الحقيقي وعومل كما ينبقي له لما اخذ كل هذه الهيصة لدرجة انه اسبوع وكل الموضوعات في الصفحة الاولي والثانية هي نفسها عن موضوع واحد استهلكت لمدة عشرة ايام فقط الصفحة الاولي والثانية وتم هجران المنبر من اقلام مفيدة ... من ذا الذي يقول ان سرقة ايميل احدهم (حركة جميلة) او حركة في شكل وردة حتي ...؟ ولكن هو ايميل لا راح ولا جا وبالامكان بعد دقيقتين عمل عشرة اميلات اخري وينتهي الموضوع ...؟ ولكن ان يناقش باكبر من حجم مناقشة مشكلة دارفور ووالتدخل الاجنبي والذي قد يغير مصير السودان لقرون قادمة ..تبقي حركة ما جميلة وما بيعملها الا شعب مختار ..؟ المنبر هذا محب لم يكن منبرا له اسما وصيت وجمهور من القراء الا لانه كان حساسا لعصب قضايا السودان ...اما ان يهجر المنبر من الكتاب ليحل محلهم (النواح) علي الاميلات فمنه العوض وليهو العوض واحسن تقلبوا غرفة شات ...ونشوف الحنك شنو ...! وفي النهاية انت بتري وانا بري والباقين بيروا وسيد (صاج) الطعمية بيري وكلنا شعب اصحاب رؤي ...
08-06-2004, 10:49 PM
اساسي اساسي
تاريخ التسجيل: 07-20-2002
مجموع المشاركات: 16468
Quote: كان ما اختلفت معاي نكون كيف شعب الله المختار ...لازم كل زول عنده راي ورايه الكويس والمفروض يبقي
هلا أساسي
كلامك دا بكون صحيح لغاية الواحد ما يلقى ليهو شوية ضباط عايزين يزوغو من معارك الجنوب، ويبدأ شغل التمهيد، ويرسم خطة التحرك، وههووووب يتلبوا بالليل......ومن ثم يبقى بس رأي واحد، وما في زول عندو أي رأي تاني، عشان المسألة في تطورها جابت ليها بيوت أشبح، وخوازيق.
08-07-2004, 05:43 AM
اساسي اساسي
تاريخ التسجيل: 07-20-2002
مجموع المشاركات: 16468
طبعا دي قصة تانية وقصة ضناعة سودانية خالصة وهي حكومات شعب الله المختار ... دونك كل النكات عن ان الذي يستيغظ من نومه باكرا قبل الجميع هو الذي يحكم السودان نحن الشعب الوحيد الذي جرب في صف قرن ما لم يجربه الانجليز مثلا في الف وخمسمائه عام من حكومات مختلفة ما بين الديموقراطية (النص كم) لحدي الديكتاتورية البتخلينا نغني رئيسكم مين ... الانتفاضة يطلع فيها الشعب السداني كله ويندد بالدكتاتورية ...اسبوعين بس من الديمقراطية نفس الناس الطلعوا الانتفاضة يطلعوا مسائر تايد للعسكر المسكوا الحكم
08-07-2004, 00:45 AM
AnwarKing AnwarKing
تاريخ التسجيل: 02-04-2003
مجموع المشاركات: 11481
غايتو يا انت ود شيوخ يا ود رحات واحد في الاتنين لكن غير كدا ما عندك حل ود شيوخ لانه اهلك بيدعوا ليك وود راحات لانهم محظوظين تعرف بتاريخ بوستك الذي انزلته مستفسرا عن غيابي ومكفرا لي وعكتي ..يومها وانا في كامل تهيئ واستعدادي لكتابة بوست بعنوان انور كنق عايرة وادوها سوط لكن منعتني تلك الوعكة التي اخبرتها عني الحقيقة الايام دي انت مختلف جدا عن انور لكن ما مختلف عن كونك احد افراد شعب الله المختار ... وخليهو الكلام في البوست الموعود بيهو بس القي لي فرقة تعرف اطرف حاجة انه بورد الهكر ما عارف جهته بي وين وخجلان اسال منه اشوف الحاصل شنو ( يقولوا ظلامي ما عارف درب بيتهم ) لكن تعرف لقيت ليك الهكر زول دمه خفيف جدا وقريت كلامه لي قبل يومين الحقيقة اضحكني كما لا يفعل هنا
08-07-2004, 05:52 AM
حبيب نورة حبيب نورة
تاريخ التسجيل: 03-02-2004
مجموع المشاركات: 18581
أساسي قبل الكراسي وينك يا حبيبو! مشتاقين عديل يا مان لكن والله كلام لذيذ وفي الايام دي العايز يشتهر يعرّض أيميلوا للخطر يدس الباس وورد ويقول ديل الهكـر
08-07-2004, 06:28 AM
اساسي اساسي
تاريخ التسجيل: 07-20-2002
مجموع المشاركات: 16468
تعرف ناس المنبر لسان حالهم مع الهكر ( ولا حتي تحلموا بيها) الضجة الاعلامية دي ...بس يا دوب الهكر ادوهم المفاتيح والجماعة سرحوا ما ديل شعب الحديث في كل المواضيع ...وبيني وبينك ما عندهم قشة مرة اخر اشاعة الان قالوا الهكر داير يفتح بلاغ في ناس المنبر اشانوا سمعته ولاكو سيرته اكتر مما عمل فيهم
08-07-2004, 12:14 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39370
حـمـدا لله على سـلامتك لـكـن ما عايزه ليها خـــروف ؟؟؟؟؟؟
بي مناسبة شعب الله المختار شايف إنو أي موضوع زي موضوع الهكر دا الناس اللي ما سمعوا بي الهكر قبل كــدا برضوا شعب الله المختار إستلموا الموضوع و كل يوم 50 بوست عن الهكر بدون أي معرفة عن الهكر إستلموا الموضوع
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
اساسي
سجيمان
بتكتب في البورد دا وبورد سودانت في امان الله ومن نجوم البوردين المقرؤ لهم ....قوم يا الشليق امشي اعمل ليك بورد براك ما قادر ويدك لاحقة نقول شنو وانور صحبك وفي رواية مفتون بكتاباتك ...اها المشكلة الموضوع الواحد بقيت تنزلوا في تلاتة محلات هنا وهناك وهناك دييك ...يعني بالجد كدا مفروض موقعك داك كان تخليهو لحاجة تانية وتستفيد من الامكانية الاداك ليها ربنا يعني مثلا قول وبما انك بيطري او كما سمعنا (تحت تحت) فكان ممكن تتكلم عن ثروة السودان القومية التانية وتبث نصايح ما دام الانترنيت بقي مقرؤ في رجل الفولة وشنقلي طوباي لكن وما بيدك طبعا انك سوداني ...اصريت انك تستفيد من سودانيتك وتضيع موقع كامل في صدي كتابات ما ملاحق ترد عليها هنا وهناك وبهناااااااااك 
Muhib
nadus2000
AnwarKing
حبيب نورة
ABUHUSSEIN
فيس بوك
تويتر
انستقرام
يوتيوب
بنتيريست