|
|
 خربشات مسرحية (4) مقدمة في علم الإجرام بقلم محمد عبد المجيد أمين (براق)
|
06:13 PM Sep, 10 2015
سودانيز اون لاين
محمد عبد المجيد أمين(عمر براق)-الخرطوم-السودان
مكتبتى فى سودانيزاونلاين
بسم الله الرحمن الرحيم
(يفتح الستار علي نفس المشهد السابق .الشيخ يتجه إلي حيث مقعده ومن وراءه تلامذته وبينما هم يهمون بالجلوس ينتبهون إلي وجود راكوبة تظلل المجموعة الصامتة فيتجهون نحوها ويعاينونها باستغراب . تلاميذ الشيخ يهمون بنزع الراكوبة إلا أن الشيخ يمنعهم )
الشيخ : (للمجموعة الصامتة) مالكم ؟.
( المجموعة تحاول أن تتكلم ولكنها لا تستطيع. الشيخ يأمر تلامذته بنزع اللصقة ولكنهم يمتنعون ).
الشيخ : ( لتلامذته) شيلو اللصقة
التلاميذ : ( معا بتحد واضح) ما بنشيلا.
الشيخ : ( بإصرار) فكو اللصقة.
التلاميذ : ( معا بمزيد من الإصرار) ما بنفكها.
الشيخ : والله عال ... حتي أنتو بقيتو تطاولو؟
الهمباتي : الشيوخ اللي قعدو محلك علمونا نطاول باللسان ونعلي في
البنيان.
قرضمة : ( محتجا وهو يشير الي المجموعة الصامتة) يا شيخنا ديل ناس
"ربش" ساكت ، ما تشتغل بيهم... كان فكينا اللصقة حينبذونا
ويدعو علينا.
هبشة : بيقولو إنو نحنا إظلمناهم وأكلنا قروشم.
كشحة : معقول ياشيخنا نحنا ناكل قروش الضعفا والمساكين؟.
فللي : مش أنت برضو اللي علمتنا التمكين من حقوق الغلابة
والمساكين؟.
الشيخ : ( يبتعد مزهوا ) كيف يا زول.. نحنا بنلعب واللا بنلعب ؟ دا إبليس
ذاتو أداني شهادة " أيزو"... ( بفخر).....قال لي : ( يقلده) يازول
إت ما قصرت معايا تب .... بدل ما أعَترهم واحد..واحد
لمتهم لي حتة واحدة وعترتهم ليك في حركة " توالي".
قرضمة : ( مستغربا ) المافهمنو ياشيخنا أنو جلابيتنا القيافة ديك ..اللي
كانت لمًانا... شرطُتوها حتة حتة وقسمتوها بيناتكم!!.
كشحة : اللي شال ليهو كٌم بجاي.
فللي : واللي شال ليهو الوش بجاي.
هبشة : واللي أخد حتة وفصلها " عراقي".
ملقاط : ما خلو ليك الا الضهر يا شيخنا.
الشيخ : (بغضب واضح) بتسألوني أنا ؟!. روحو إسألو "الإنقاذ".
قرضمة : ما قالو إنك شطحت وكت داير تكوش علي السلطة والزعامة؟
الهمباتي : ( للشيخ بخبث واضح ) والله يا شيخنا ، إنتو بجد تلتلتونا
وحيرتونا!! ... أنت تغرينا بالتمكين وهم يغرونا بالكنكشة
والكندشة وغيرو يغرونا بالكراسي. وداك يغرينا بالدبابير
والعواوير. وغايتو!!... لخبتو الواطا .
فللي : دا حتي الراعي بقًوه "لوا" في زمنا!!.
كشحة : إصطدتونا من المدارس والجامعات وعلمتونا من العلم أرذله .
قرضمة : علمتونا شغل السيخ في حسم المواقف وضرب الرصاص بدل
الكتاب.
( الشيخ بأعلي صوته وهو يحاول مغادرة المكان غاضبا): نعمل ليكم
شنو؟ ...ما انتو اللي طلعتو حمير....اللي قال ليكم تبارونا منو؟.
( التلاميذ ينظرون الي بعضهم ثم ينفجرون في نهيق حاد وهم يلحقون
بالشيخ ويعيدونه الي مقعده).
الشيخ : ( يعدهم واحدا واحدا وهو يتحسر ) يحليل زمان ... لما كتو أمة
وهسي بقيتو " لمة" ؟
هبشة : وحاتك ياشيخ هما اللي فركشونا
قرضمة : وحدين مننا مشو مع الشيخ فلان. ( التلاميذ يرفعون أيديهم
ويدعون عليه.)
الشيخ : (بابتسامته المعهودة ) هو كمان عمل فيها شيخ .. أوعاك يكون
بفتي ليهم كمان؟
الهمباتي: لا يا شيخنا....دا شغلو "نفرة " و " نهضة " ودسدسة
كشحة : ( مكملا لزميله ) ومعاها خباسة ودهنسة
قرضمة : ...يبيع في البلد علي كيفو وياكل ويأكل ناسو... ويحرش
القبايل في بعضهم.
ملقاط: وآخر المتنة يعمل فيها وزير دفاع ويدي الأوامر
فللي : في يوما " نحس" .. رسل تحياتو الحارررة للشعب.... SHOOT AND KILL
هبشة : وهاكم..إمممح ( يقبل الهواء ) ..... أممح .....( يتظاهر
بأنه يطلق النار علي المجموعة الصامتة القابعة هناك ).
الشيخ : والباقين وينهم ؟
قرضمة : ديل برضو مشو مع الشيخ فلتكان .
ملقاط : دا براه كارثة ياشيخنا...عمل ليهو بيوت أشباح.. وهاك يا
عبادة...يقتل في ديل ...ويعذب في ديل ..ويشرد في ديل ... لمن
طفش نص البلد. ( التلاميذ يرفعون أيديهم ويدعون عليه).
كشحة : ( مكملا ) يالطيف دا عندو لداحة لسان .. تقول سوط عنج
و...لب .
الشيخ : ( يتظاهر بعدهم بأصبعه من مكانه) برضو لسه ناقصين .
هبشة :( غير مكترث ) الباقين ديل خلاص ... اقنع منهم ... إتفرتقنا ..
وبقينا كيمان ..كيمان.
ملقاط : وحدين عملو أحزاب براهم ووحدين طشو في الخلا... ووحدين
بلقطو في الأكياس في الشوارع، ووحدين " لغفو " اللي فيهو
النصيب وقطعو الحركة ووحدين لسع قاعدين ياكلو مع الحكومة
قرضمة : ( مقاطعا ) ووحدين سجلو إشتراك مع شيخا جديد .... حلاته
شيخا علي الموضة ، بتاع كرامات...بسقي حيرانه " البيبسي" .
فللي : الجماعة قالو: أخير نمشي ورا شيخا " حيرانه م الجكسي" ـ
أحسن ما نباري شيخا ماسورته محلوجة .
الهمباتي: الناس اللي مشو ليهو قالو إنو زولا كارب في البسبس
وحيطلع لينا الدهب... اطنان ..أطنان ، وشغلو كلو ع الموضة .
هبشة : أحسن حاجة عملتوها فينا أنو علمتونا التمثيل.
فللي : مش نحنا " ممثلين " للشعب... كده شوف الحتة دي يا شيخنا
( التلاميذ يفتحون "جاعورتهم" فجاءة وينخرطون في بكاء حار)
.... واك ... واك .. واك...... خسارتك يا حوا ... يا الوالدة
أنصاف الرجال.
كشحة : ( ينهض ويبتعد ) جبتي لينا حدادي وصقور وغربان.
الهمباتي: ( جالسا في محله) كواسر ...ثعالب تنهش في لحوم الناس.
ملقاط : ( ينهض ويبتعد ) واللي بيسوقونا ... يهم ذاتم ...طينتهم واحدة
هبشة : ( جالسا في محله) عوارة ف هبالة ف سفالة .. زبالة ف زبالة.
قرضمة : ( ينهض ويبتعد )بعنا دينا واشترينا بيهو سياسة نخاسة
فللي : ( جالسا في محله) خساسة ف خساسة ولعب علي الدقون وكلو
نجاسة ف نجاسة ...ترباية سجون.
( التلاميذ يحاصرون الشيخ ويصرخون فيه بصوت واحد ).
أنت السبب .... أنت السبب.... أنت السبب... أنت السبب
الشيخ : ( يبتعد مذعورا ) مالكم ... ما كتو كويسين ؟.
الهمباتي : ( يطمئن الشيخ ) معليش ...دي حتة تعريجة مسرحية من
إندنا.
فللي : ( وهو يبكي ) الشعب قاعد ينبذ فينا ويدعي علينا..ياشيخنا ..
واك .. واك .
قرضمة : ( وهو يبكي ) ونحنا عملنا شنو في دنيتنا السمحة دي ياشيخنا
.. واك ..واك؟.
ملقاط : .... قلتو لينا أي زول أهبل وعوير وبتاع دنيا يسجل معانا
وهنجيهو..... إستهبلنا وجينا سجلنا معاكم.
الهمباتي :حلفتونا يمين .. وما نفع جيبتونا يمين . قلتو تعليمات..وما نفع.
قرضمة : جبتونا شمال... وقلتو أوامر....وبرضو ما نفع.
فللي : كل واحد يقطع كلام من راسو ... وما عرفنا نطيع منو
والا نسمع كلام منو؟.
هبشة: ( وهو يبكي ) جو ناس المعتمر قالو : نكبر كومنا .... اي زول
كوز والا ما كوز حرامي ومنافق وكضاب يسجل معانا...
كشحة: الجماعة الغربا والبعاد والقراب وكل الحرامية اللي في البلد مشو
سجلو.... ونحنا أصلو مسجلين " خطر"...مش جحا أولي بلحم
تورو؟.
فللي : ( يقوم بحركة بيديه تدل علي النهاية ) .... وجاطت .
الهمباتي : كبراتنا بنو في القصور والفلل والعمارات وقعدو يدكنو في
القروش ويرمو لينا الفتات... نسكت ليهم ؟... لازم نحاكي
قدوتنا.
فللي : وحاتك ياشيخنا نزلنا ليك في " العضعضة " بجاي و بجاي
لمن ربينا " كروش" و عملنا برضو كم عمارة ومرتين تلاتة...
وكلو بالقانون.
ملقاط : ( متحسرا) إنعل أبو السياسة واللي عملو السياسة اللي جابت
لينا النبذ وقلة الاحترام.
هبشة : ( للشيخ ) ما يهو دي تربياتك ياشيخنا ؟.
قرضمة : ( للشيخ ) ويهي دي شورتك يابشورة .
( التلاميذ وقد ملاءهم الغيظ يحاصرون الشيخ ويمطرونه
بالأسئلة).
قرضمة : ( للشيخ ) لما أنت كدا " فتك" وعامل فيها بحر في العلم
الشرعي وحريص علي الدين ، ما كت تقعد قبلك في الزربون
وتنشر الدعوة لأهل الكتاب؟.
الهمباتي : ( للشيخ ) علي رأي أودلا بمبة : جاي تبيع الموية في حارة
السقايين؟.
كشحة : ( للشيخ ) والا كت دربت ناسك بتاعين " الحركة" علي أصول
الدعوة ومرقت بيهم يطوفو العالم زي ناس الدعوة والتبليغ.
قرضمة : ( لزميله ) هو العالم ناقص ضلال!!
ملقاط : ( للشيخ )...ناسك ديل.... ياكافي البلا... لا عربي ولا إنجليزي.
ومعاه تخلف عقلي.
فللي : ( للشيخ ) إواعاك تفتكر إنو أنت اللي بيجي علي رأس ميت سنة
يجدد الدين ؟.
الهمباتي : ( للشيخ ) شغلك كلو غلط... فتاويك " الزربونية" كلها غلط
هبشة : ( للشيخ ) بالمناسبة ... إنت دعوتك دي خالصة لله والا فيها
"إن"؟.
كشحة : ( للشيخ ) يا ضلالي... الدين ذاتو بذكر " المسلمين"بس ...
"إسلاميين" دي جبتوها من وين ؟.
فللي : ( يقرأ) وَمَنْ أَحْسَنُ قَوْلًا مِمَّنْ دَعَا إِلَى اللَّهِ وَعَمِلَ صَالِحًا وَقَالَ إِنَّنِي
مِنَ الْمُسْلِمِينَ".
ملقاط : ( للشيخ) وتقول لي " تمكين" ... ما اليهود ذاتم إتمكنو من العالم
بالمال وخربو الواطا.... الفرق بيناتكم شنو؟.
الهمباتي:( بتوجس ) دحين يا شيخنا ، وبالواضح كدا... حركتنا دي
ماشا بالكتاب والسنة واللا مستوردة واللا مدسوسة واللا
ماشة كدا حلمنتيشي ؟.
الشيخ :(يرتبك ثم يحك رأسه ) البيان بالعمل... البلد ذاتا ماشة كيف ؟.
كشحة : طيب ... نحنا اللي فارقنا جماعة المسلمين والا هم اللي فارقونا؟.
قرضمة : ما تحكي لينا ياشيخنا عن النظام " الخالف" .. مالو ما جا؟.
الشيخ : ( وهو يخلف قدميه ويلقي بظهره للمقعد مزهوا)
( يتبع) 5
الدمازين في : 10/09/2015م.
محمد عبد المجيد أمين (براق)
mailto:[email protected]@yahoo.com
أحدث المقالات
- هذيانُ الكاروري بقلم بابكر فيصل بابكر 09-10-15, 04:26 PM, بابكر فيصل بابكر
- قصة الفداء والتضحية بقلم حامد جربو/ السعودية 09-10-15, 04:24 PM, حامد جربو
- رد على (عمران!) لعله يهتدي فيسكت بقلم طلال دفع الله 09-10-15, 04:22 PM, طلال دفع الله
- الفريق ابو شنب معتمد الخرطوم :مع التحية!! بقلم حيدر احمد خيرالله 09-10-15, 04:20 PM, حيدر احمد خيرالله
- أخطاء ومسلمات في تاريخ السودان تتطلب ضرورة المراجعة 4 متى اتحدت مملكتا نوباديا ومقُرة 09-10-15, 04:19 PM, احمد الياس حسين
- رجال شارع.. أم رجال دولة!! بقلم عثمان ميرغني 09-10-15, 03:19 PM, عثمان ميرغني
- مع الفريق نافع مرة اخرى..!! بقلم عبد الباقى الظافر 09-10-15, 03:15 PM, عبدالباقي الظافر
- لــــــــــــط !! بقلم صلاح الدين عووضة 09-10-15, 03:11 PM, صلاح الدين عووضة
- التفريق بين الإسلامي والعلماني يا عثمان ميرغني! 1-2 بقلم الطيب مصطفى 09-10-15, 03:08 PM, الطيب مصطفى
- ( كريعات جديدة ) بقلم الطاهر ساتي 09-10-15, 03:06 PM, الطاهر ساتي
- عفاف رحمة:كيف تخيلت حقيبة الفن الوطن المأمول بقلم عبد الله علي إبراهيم 09-10-15, 05:25 AM, عبدالله علي إبراهيم
- قاعدين ليه ؟ أمشو بجو غيركم بقلم عميد معاش طبيب سيد عبد القادر قنات 09-10-15, 05:22 AM, سيد عبد القادر قنات
- شاء حظه العاثر أن يضعه بين فكى كماشه .. ما بين شركات الإتصالات العامله فى السودان والحكومه ... 09-10-15, 05:20 AM, ياسر قطيه
- تائه بين القوم/ الشيخ الحسين/ تخاريف المعتوه 09-10-15, 05:18 AM, الشيخ الحسين
- اطفال جبال النوبة في مأساتهم يصرخون في وادي ظل الموت فهل من يجيب ؟؟؟ بقلم ايليا أرومي كوكو 09-10-15, 01:51 AM, ايليا أرومي كوكو
- حقيبة مسافر من غزة بقلم د. مصطفى يوسف اللداوي 09-10-15, 01:48 AM, مصطفى يوسف اللداوي
- ما قلت نوبة !! بقلم اللواء تلفون كوكو أبوجلحة 09-09-15, 11:00 PM, تلفون كوكو ابو جلحة
- اللاجئون بين الواقع المأزوم والتضامن الإنساني بقلم نورالدين مدني 09-09-15, 10:57 PM, نور الدين مدني
- الثـــائر معـدن لا يصدأ!! بقلم ادم ابكر عيسي 09-09-15, 10:56 PM, ادم ابكر عيسي
|
|
  
|
|
|
|
محمد عبد المجيد أمين(عمر براق)
فيس بوك
تويتر
انستقرام
يوتيوب
بنتيريست