|
|
 من سيربح المليون
|
عزيزى القارئ تخيل ان عملاقاً مدجج بالسلاح كسر عليك باب منزلك وادعى انك لاتصلح لإدارة اسرتك وأنه دخل عليك بالقوة لانك راجل دومك وراسك ناشف مافتحت ليهو الباب وسمحت ليهو بإدارة حياتك وإنقاذك من الهرجله والخرمجه الأنت عايش فيها دى وكل المطلوب منك انك تسمع الكلام وانت ساكت وماترفع صوتك الا عند التصفيق او الهتاف للقائد الملهم وتسلم دينك ونفسك ومالك وعقلك وعرضك وشوف ليك جنس نظام حضارى مصلح بالجبنه.
وقبل ماتوافق يقوم العملاق بترتيب بيتك حسب نظرتو الحضاريه ......
يحول ليك الصالون حمام... راس البيت حوش... وغرفة النوم مطبخ.... والمطبخ صاله... وحفرة الدخان بلاعه...
ويطرد اطفالك عشان يحول غرفة الأطفال مسجد.
بعد مايخلص من الترتيب الحضارى الجديد يقوم يقلع ملابسو قدام مرتك ويدخل الحمام (حالياً) الصالون (سابقاً) بعد مايأمركم بغض البصر ياأيها الفاسقون.
الفجر وانتو نايمين فى الحوش راس البيت (سابقاً) يرشكم بى موية حفرة الدخان البلاعه (حالياً) ويأمركم بالأستعداد لصلاة الفجر بشرط أن لاترفعوا أصواتكم بالقراءة حتى لا تقطعوا احلامه الورديه مع التركيز فى الدعاء له بطول العمر والعافيه يافسقه.
قبل الظهر بساعه يتمطى العملاق ويقوم بشرب كبايتين شاى جمعاً وقصراً وأحدة نيابة عنك والأخرى نيابة عن حرمك المصون ثم يلقى فيكم خطبة الصباح مبتدئاً بحمد الله الذى رزقه كبايتين شاى بالبن وحرمكم من الشاى الأحمر بسبب بعدكم من الله وأقبالكم على الدنيا ياأولاد ال######.
ثم يطلب منك الأستعداد للذهاب للجهاد حتى تنال الشهاده ليغفر الله لك ذنبك وتريح فى القبر جنبك فتشبع من التفاح والعنب وماتدى الجنبك .
كما ان استشهادك يجعل وجوده فى المنزل شرعياً بعد زواجه من حرمك المصون يالشهيد اب راساً ناشف.
ثم يدلف بعد ذلك فى شرح الأهداف الربع قرنيه القادمه
1 ـ الخمسه سنين الأولى ..... تشبعوا مماتسمعون.
2ـ الخمسه التاليه ..... تستتروا وانتم تلحسون.
3ـ الخمسه الثالثه.... تخزنوا ماتشفطون.
4ـ الخمسه الماحقه ... فكوا ماتصرون قبل ما الدولار يلحق دشليون.
5ـ الخمسه الأخيره ...... من سيربح المليون
المهندس صلاح سالم محمد سعيد
|
|
 
|
|
|
|
صلاح سالم محمد سعيد
رشا سالم
فيس بوك
تويتر
انستقرام
يوتيوب
بنتيريست