|
|
 عزف منفرد على إيقاع نفير النهضه (1 ) الأُبيض ... ياسر قطيه
|
عزف منفرد على إيقاع نفير النهضه (1 )
الأُبيض ... ياسر قطيه
وصوت شكر خاص نزجيه للأستاذ عمر عبدالسيد سعيد مدير مكتب شركة سين للغلال بولاية شمال كردفان وهو يبادر اصالةً عن نفسه ونيابةً عن كل العاملين فى هذه الشركه الوطنيه الكبيره والرائده فى مجالات الدعم الغذائى وجودة الإنتاج فى السودان شركة سين العملاقه والتى برهنت وبما لا يدع مجال للشك إنها ومنذ التأسيس قد رأت النور لأغراض الأمن الغذائى وليس سعياً وراء أي أرباح على الإطلاق ....
سين للغلال هرعت وكانت أول الواصلين ملبيةً نداء نفير نهضة ولاية شمال كردفان ووضعت الشركه كل أمكانياتها الماديه الضخمه وطاقاتها الإنتاجيه الأضخم وقواها البشريه الحيه رهن الإشاره لتلبية أي نداء ينطلق تحت لافتة العمل التنموى أو المجتمعى والإنسانى ... التحيه لهذه الشركه العملاقه التى قامت على سواعد الأبطال وبعزيمة الرجال التى لا تعرف النكوص أو التقاعس والتحيه عبرها لكل شركاتنا الوطنيه الأخرى والتى تملأنا فخراً وأعزازاً لأسهاماتها الأساسيه فى الدعم الغذائى والإنسانى الأجتماعى المباشر .... مثل هذه الشركات تستحق منا كل الدعم والمؤازره والتشجيع بقدر ماهى تعطينا أمننا الغذائى بالكامل فى ظل عالم بات فيه الغذاء يمثل مشكله أمميه تتفاقم يوماً بعد الأخر .......
شكراً للأستاذ الوطنى الغيور عمر عبدالسيد وشكراً للفنان الأصيل حسين شندى وهو يلبى النداء وشكراً لحكومة ولاية شمال كردفان وهى تطلق صافرة البدايه لإنطلاق قطار النهضه عبر محطة سين وشكراً للفرقه الماسيه المصاحبه للرائع الوطنى الأصيل حسين شندى وهى تستهل مشوار النهضه برائعة شندى الأروع قطار الشوق والشكر لصانع الفرح وقائد موكب التطوير وقافلة النهضة والجمال سعادة الأستاذ فتح الرحمن عوض الكريم معتمد محليه شيكان المحبوب ومعشوق الجماهير وشكرنا نزجيه ( ولا على كيفنا !! ) للقيادات الكردفانيه الأصيله وأبناء هذه الولايه الذين وإن إنتابتنا الشكوك حولهم فى بعض الأشياء فذلك لا يعنى أن نبخسهم أشياءهم وهم ابناءنا فى إتحاد أصحاب االعمل ( المنتهيه ولايته بالمناسبه ) ... شكراً لسعيهم الدؤوب فى تسخير علاقاتهم التجاريه الكبيره والواسعه لمنفعة أهلهم فى هذه الوهاد النائيه وشكراً لأحبتنا الرشايده وعلى راسهم يأتى الرشيد الأول بكر ! والذى ثبت وبشهادة الشهود وأعيان البلد وأصحاب الحق التاريخى فى نصف أراضى هذه الولايه ( أنحنا ) أل عبيد بإن مبنى عديله وزين ده حقوا عديييييل لأنوبدأ كويس ودغرى واللولوه دى جات قريب ده ... ( لكن يا تيفا قلته لى دكتور فيصل وصف بيدوا الشمال على الحته دى وقال شنو ؟ ) الشعب يريد أن يعرف لكن ما علينا هسى وكذلك التحيه والتقدير كذلك للأخ والصديق الرشيد التانى الذى أكد وبشكل حاسم إنه ( لا صوت فى جلسة اللجنه الفنيه ولا حتن جاي !) وقد أكد هذه الروايه نسيبنا صلاح أبكر الطالع فى الكفر ... اليومين ديل ... ( أعمل حسابك شديد من ناس كندوره توريه الأرعن رئيس هيئة الأركان والعمليات وقائد القوات البريه لقوات سياج حول المعتمد ) وكذلك لا يفوتنا أن أن ننهال بعظيم لعناتنا ونصب حمم وجام غضباتنا المضريه على البعام التالت الفى حق ناس جدى عبيد بغالط !! ي أخوانا يكون جدى عبيد ده جا من سلارا ونحنا م عارفين ولا قلته لى يمكن من وين يا ود اب كِر المشوطن ؟ ( إنته مسؤول عن إعادة كتابة ونشر تاريخ العائله يا كرو المُضر ... أبدأ لينا من بكره قبل ما ينط لينا واحد تانى كمان فى بيت جدى العمده الزين ويقول كان عاملوا كشك) وبهذا نعزل الرجل التالت ونبقى على الرشيدين الأتنين الرائعين والطاعمين ... سكر بس وحات الله ... !! عسل إنتو يا الرشيد الرشيد الكان عديل وزين وبقى ملولو والرشيد العسل سكر زياده ي أخوانا ( تانى فيها ركابيه ولا نزوليه يا زول بعد لوح السكر ده ؟ ) ما أظن .... ويبقى إحنا بكده خالصين وهنقول للدنيا روقى وتعالى بأحلى إتنين ! سنه ي الرشايده ( عمرو دياب ) لقيتنى كيف يا غندره ؟ وأشهد يا حسن طوسطا كان أنا قصرته مع الناس ديل يطسك مبارك شمو قول أمين وقال لى بقيت ملك الخماسيات بهناك ( جاييك جهز لينا شاي أخضر معاك ) ومن أل رشيد لأل سعود !! ... ( سعود البرير يامولانا ) أديتو متر الأرض بكم يا ناس الأراضى ؟ ( 37) جنيه للمتر الواحد يا أل شيلوك ؟ فى بور سودان بسته جنيه سته سن سجه إنشا الله للزول الفى بالى الله لا كسبكم ... دايرين تطفشوا الراسماليه الوطنيه من الولايه دى ولا كيف ؟ الزول ده داير يكب قروش مطره فى البلد النشفتوها دى تدوا سعر زى ده للمتر هو داير يعمل مخازن ولا ينقب دهب ؟ أدوا الزول ده المتر بإتنين جنيه ونص نصكم فى الطبله إنشا الله ولا بنسوقوا دوغرى لعمك سعيد العبيد حولى عمدة الريف الجنوبى والمالك الأصلى للمنطقه الممتده من دار الرياضه لحدى قريب لأبوكرشولا ... ومن أل سعود لأل محمود ويا قلبى لا تحزن ... ( أهو بقى الجماعه ديل أحلى ناس والله بس محتاجين لشغل زي التمه فى قطر ... فتونسية حمد بن جاسم قامت ) وعلى بالطلاق صحى التسوى كريت بتلقى فى جلدا ... عمك شغال فى الجماعه رفع ! رفع بن على وبدون أي كلام وفى التونسيه ذاته ! شلع على صالح شليعة راكوبه فى الخريف وخلى ليك الراجل وشو يلعن قفا .... قطع القائد الأممى ملك ملوك إفريقيا وعميد البتاعين العرب تذكره لجهنم بدون عوده ، كشكش حسنى مبارك وعيالوا وفرج فيهم خلق الله ودخلم القفص... إستعان بصديق وجاب جماعتنا ناس لمتنا الشغالين بشريحه دفع مقدم وخبره 24 سنه فى خج الصناديق وناسنا يعجبوك سعبطوا مرسى فى الكرسى بخجه واحده خلت ليك عيال بمبه يكابسوا فى الميادين وهم حسموا المباراه من قولة تيت ... البحرين وسلطنة عمان دقت فى العارضه .... تانى وين ؟ على كل حال وعلى بالطلاق ده الرفع كده ولا بلاش ، والشاعر بقول ليك كان رفعته أرفع جمل وكان عشقته أعشق زحل ( بت التقانه ي حكومه إنتى ... تلفونك مقفول ) وسبحان الله ناس ترفع ملوك وناس ترفع وقود الله لا كسبكم
والحمدلله الولايه فى زحمه من النعم .
النعم المتلتله ... والله يخلى لينا المحاميد ... للمفروشات طبعاً والله يطول لينا عمر أل محمود عشان شيراتون الدوحه للمفاوضات الترطيبه وكده ( فى ناس لسه قاعدين هناك راجين الجوله الألفوميه ... غايتو الجات من السما قطر تستحملا .... نقول شنو ؟ ) شرطوا عينا لحدى م خجلنا وخلينا الإغتراب الله يشرطكم دبلان يا عيال أم زغده .... ومن المحاميد لأل ياسر ( عبدالسلام ) وإن موعدكم الجبنه ! ( شنو ياسمى حكاية التسعه جنيه زياده فى صفيحة المضفره دى ؟ يعنى داير إبليس يرسل للجماعه فى الخرطوم قنقليس ولا شنو ؟ داير تودى الراجل التوج ولا كيف ؟ الله يلعن أبو دى 33 مليون قديم دى الكرهتوا بيها الراجل العيشه على الطلاق لو لمه دى على بتاعت تكريم مولانا جلال الدين على كور الهلال الإتنين زايد كم تمرين كده أنحنا ما جايبين خبروا خته عليها بتاعت زيارة دكتور نافع ولمه عليها حقت مولانا دوسه !! برضوا م بتلحق للجماعه هناك وديلك حيزعلوا ويقعدوا يأخروا فى المقالات وإحتمال كبير يجوطوا الشغله كلها ويجيبوا سيرة الختم !! سمعته بحديث الختم يا أبو اليا ؟ هههههههه خلاص خليها مستوره وهاك على الحاج ده ... الغريبه إبليس إتخصص فى ناس وزارة العدل وزول بياكل قروش الجماعه ديل وبدون أي تردد بصراحه كده خاف منو .... أعمل حيطه عديييييييل من زول زى ده ، وده ال الله قاصدوا وقال بيسلط عليك من لا يخافنى ولا يرحمك ... وأعوذ بالله ....... جدوا الأكبر دور مشكله فوق مع الكريم وعلى بالطلاق حتاها مع الجماعه قرض !! أعلن تمردوا من جوه القصر ومرق دربوا عدييييييل وقال للكريم أنظرنى ليوم يبعثون !! بالله دى مله وسلاله فى زول فى الدنيا دى بجى بجمبا ؟ نقص شويه يا سمى خت ليك جنيه جنيهين تلاته ... ما مشكله لكن تسعه دى يا مان بتولد إبليس ده عديل كده خليها تلاته شيل خمسميه وأدينا الإتنين جنيه ونص فى كل صفيحة دمغة نهضه ! غندره ورطكم بعشره مليون ومولانا ده ما عندوا هزار فى القروش ... ي تحلجوا غندور وتقولوا لمولانا الزول ده فكت منو وتدعموا كلامكم بتقرير طبى البكتبوا هناي داك ومتعوده ... دايماً ههههههه أو أدفعوا الدمغه ( عشره بنات حفره ) وأنتم صاغرون ...... الزول ده خوفنى أنا لمن إنتوا... نادانى ومشيت قايل القبه فيها فكى ... واليوم داك خليت تلفونى فاااااااتح من الصباح الأمر الذى كاد أن يصيب بتاعين البقاله ومدارس العيال والترحيل بالصدمه ... وأي واحد فيهم إتصل رفعته بقلب قوى وقطعت لهم جازماً بالتسديد عقب خروجى من لقاء مولانا الذى وصفته لهم بالهام ويا مؤمن يا مصدق ركبته أتوس بخمستاشر جنيه تمرق من صف العدو ( كاش ) دخلتى لقيتوا مارق ( لإجتماع طبعاً ) والله أنا ما عارف الزول ده الهدا على الإجتماعات دى منو ؟ شفته ليك سته إجتماعات فى إجتماع واحد ؟ المهم لم يستغرق اللقاء الواقف ثلاثه ثوانى .. سبعه كلمات على الواقف ببقوا تمنيه لو أضفنا يا النداء ( يا 2 قطيه 3أمسك 4قلمك 5وخشمك !! عليك ... ودى تعليمات !!
حاضر سعاتك ... ثم أندس فى جوف كند كروزر مظلله 8 بساتم 72 صباب ، دبل كام شفط ... فل أوبشن دركسون شمال بور إستيرنغ ... كيب رنق 28 لشاتك مشلين 340 على 170 طبلون 360 M B H ( ميل بير أور ) RBM 18 !!
ده كلوا عرفنا وقلمنا مسكنا المشكله بقت فى أمسك خشمك دى ... أنا بكتب بخشمى يا أخوانا ولا الواحد ونسه ما يتونس كمان ؟ لذلك أحبتى يبدوا وبما لا يدع مجال للشك والحال هكذا إن العبد الفقير لله سبحانه وتعالى محسوبكم أبو قطاطى الخوف الضلمه فى طريقه للحاق بحبيبنا الغالى وصديقنا الصدوق الأصيل الرائع صاحب السهل الممتنع سيدنا طبيق ... !! طبيق الكارثه لذلك أعتبروا الكلام ده ونسه ... ونسه سااااااااكت والعفو .
ومعاً أحبتى ، أصدقائى الأعزاء فى كل المواقع إنى إذ أعلن الأن وأعبر عن حبى لكم جميعاً مزداناً بعميق شكرى وإمتنانى ومعطراً بأريج أشواقى المتجدده دائماً لكم والشغوفه أبداً لمعانقة تعليقاتكم الرائعه والساحره ، الجميله ومروركم الاجمل الذى تطربنى حروفه إلتمس منكم أن نقف لبرهه لنحييى هذا الرجل ... نحي مولانا .... مولانا هارون والى ولاية شمال كردفان الرجل الأصيل الشهم المحب الكريم الشامخ الشجاع والقوى الأمين ونحي معه رفيق دربه فى مسيرة البناء والنهضه الرجل الساحر الأنيق المجد الحاسم الشريف العفيف الأستاذ فتح الرحمن عوض الكريم دفع الله معتمد محلية شيكان المحبوب صانع الفرح ومعشوق الجماهير فهؤلاء الرجال والله إن وزنهم ذهباً وبالأمس فى تدشين فعاليات نفير النهضه وفى كرنفال الفرح الأخضر هتفت لهم الجموع والله لقد سمعتها بإذنى هاتين وجماهير الفرح الأخضر سواعد بناء النهضه شعب هذه الولايه الرائع كان يهتف ويدعوا ويبتهل الى الله سبحانه وتعالى بإن يمتع هذين الرجلين بالصحه والعافيه وان يخليهم لولاية شمال كردفان والله أكبر ! نقف لنزجى هذه التحيه العطره معاً ونحن نردد مع مولانا ودوله وبصوت واحد ونقول :
مويه ..... طريق ..... مستشفى ......
النهضه خيار الشعب ....
والله أكبر والعزة لكردفان .
[email protected]
|
|
 
|
|
|
|
ياسر قطيه
فيس بوك
تويتر
انستقرام
يوتيوب
بنتيريست