|
|
 اسكت يا علي عثمان * عمار محمد خالد مضوِّي
|
اسكت يا علي عثمان
* عمار محمد خالد مضوِّي
الحيل مهدود
والجيب مقدود
وعلي عثمان
خمسة وعشرين سنة بتكلَّم
ويعمل Actoin
ماعندو حدود
شايف الناس لابسة قنابير
ولا الإنقاذ بقَّتنا قرود !
ياخي انطمَّ
سيبنا خلاص بلا لمَّة
البلد الكانت كُلَّها أنوار
بقَّيتوها ضُلُمَّة
الشَّاب الكان مالي الدُّنيا
شايفو يهضرب
جاتو الحمَّى
اتخرَّج من خمسة سنين
مالاقي وظيفة
ولا حتَّة عليها يتلمَّ
خرَّبتوا بلدنا سرقتوها
كل السودن عايش آلام عايش غمَّة
*** *** ***
يا علي عثمان
بالله عليك ما تتكلَّم عن الإسلام
غشَّيتونا وعيَّشتونا
في دنيا الأحلام
يا خي كفاية
إنقاذكم سبَّب لينا طُمام
نص السودان سافر برَّة
أمريكا أوروبا .. مرق الدَّمَّام
*** *** ***
العيشة في زمن الإنقاص
والله بقت صعبة خلاص
ولمَّا النَّاس احتجَّت
قابلتوهم بالرَّصَّاص
كتبنا كتير قلنا وعدنا
وانت اتبلَّدت
فقدت الإحساس
*** *** ***
يا علي نيفاشا
تقسيم وأبيي بترول وبلِف
عارفك فلسفة قاري بتعرف
لو كنت أمين ...
ولو إنَّك منصِف
ما كنت بقيت نائب في حكومة تسِف
*** *** ***
يا علي عثمان جُر السِّبحة
السلطة دمار
بتودِّيك لي باب اللفحة
لوداير بالجد
درب الجنَّة السَّمحة
سيب الإنقاذ وانقذ نفسك
اطوِ الصفحة
* كاتب وشاعر سوداني
|
|
 
|
|
|
|
فيس بوك
تويتر
انستقرام
يوتيوب
بنتيريست