كبرت يا وطن أوتاوا والله وكبرت يا وطن وفي العمر بقيت ستين بالحيل كِبِر يا وطن واتوالت عليك سنين ما ضقت فيهن عز ولا شفت فيهن زين.
والله وكبرت يا وطن وحالك سجم في طين كبرت هرمت وكبرت معاك المحن وعيالك حداك قاعدين كعبين في العمايل وفي الفعل شينين سووك كُدة اتشاوتوها مرات شمال ومرة يمين وجيفة رِمة اتنهاشوها زي كلاب ضالين ما راعو حُرمه أو عرفو ذمه أوخافو فيك الدين.
والله وكبرت يا مسكين بالعمر وصغرت في التكوين نصك مشى والباقي..... حُمرة عين .... قرموه ناس "قرماي" ونشلوه ناس "شيرين".
والله وكبرت يا وطن كبرت وبقيت ستين كبرت وكبرنا وما زلنا ما عارفين كيف نتحكم وليه نتحكم ونتحكم بي مين وإلا من رحم، اتناوبوك مارقين أوغاد، لصوص قتله وأفاكين، بياعين كلام أكَّالين حرام للعروض هاتكين، سارقين حلم ناقصين خلق وعلم وفي اللغف شاطرين.
والله وكبرت يا وطن و صرت قاب قوسين من الزوال وبقيت أثر بعد ما كت ملء العين.
والله وكبرت يا وطن في العمر، لي قدام مشيت وفي الحال، لي ورا اترتحت وادحرجت وما معروف حتوقف وين لي قدام تمشي خطوة ولي ورا .... كان عشره كان عشرين.
والله وكبرت يا وطن كبرنا معاك، كبرت همومنا وصرنا موهومين نمسي نطبطب هم ونصحى نلقى الهم كبر..... وصار همين مرة الغاز الصِبحِ ألغاز ومرة المويه والبنزين مره اللحم، مره الفحم مره الجمره مره طحين مره الهم ومره الغم وكل شيئ صبح بالدين.
أما الصحه والتعليم بقن ألم ...... تأليم ووقفاً على القادرين قطيت من الحكما قطيت من العلما وفنانات وغنايات، فتنا حتى الصين.
في العمر ستين بقيت ... يا وطن وكل يوم يندق فيك أسفين بالك مشتت دستورك مؤقت مليون حزب كلهن كضب في كضب وكل حزب زيو زي كنتين إن سيدو مات يفتحو الوارثين وبضاعتو هي هي قديمة معتته ما بتسوا ولو قرشين.
يا وطن في العمر ستين بقينا بين أمرين: منهارة أو فاشلين أراضينا مسلوبه حقوقنا منهوبه قيادتنا مطلوبه نتصدر قوايم العار وفي قوايم العز في اسفل السافلين.
يا خي كرَّهتونا قرَّفتونا، طفَّشتونا شبعنا نوح وأنين قلنا الرووووووووووووووووب وحي حي وووووووووووووب وإنتو ما سألين يلا انكشحو غورو..... كلكم في ألف داهية في ستين خلونا نتنفس، نحس نفِسنا وإننا عايشين خلونا نبدا من ألف .. با .. تا .. سا من ألف وتسعمية وسته بعد خمسين. ******
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الفاضل إحيمر
فيس بوك
تويتر
انستقرام
يوتيوب
بنتيريست