|
|
 الإجتماع السري العاصف بين السيسي والبشير/عباس خضر
|
من الحوارالسري، السيسي للبشير:
يازول هيي فتِح عينك دي كويس زي الفنجال أنا سكت ليكم كتيروالله تكتروا
تقللوا بدل حلايب وشلاتين بس، نخش ليكم بورتسودان وسواكن وطوكر عديل
وأساساً كلها من الأجزاء المتاخمة والرابطة لحلايب شلاتين السويس فأحسن
ليكم قفلوا خشومكم الكبيرة دي.
أصلا البداية كانت:
في الطائرة الملكية الخاصة ذات الطابقين والأجنحة الفندقية الراقية والتي
إلتقى فيها جلالة الملك عبدالله ملك السعودية مع المشير(سابقاً تنازلاً
للترشح) عبدالفتاح السيسي رئيس جمهورية مصرالعربية الجديد وهاك ياونسة
كبارة: دولار،ريال إستثمار ودٌقاقة أخوان وإرهاب وإعدامات مهمة وجيران
معدمين مشاكسين.
وفي حكاية جيرانكم المفلسين وسليطين وكرهوا شعبهم البلد والدين ديل الفي
جنوبكم ، قال الملك للسيسي شوف ليك طريقة ناجعة معاهم وأخرسهم في حكاية
إنقلاب ..إنقلاب بتاعتك ومدعومين من قناة الهبر الجزيرة وكأنهم أتوا على
جناح طائر الديموقراطية المأمون في السودان المنكوب ديكتاتورية دينية
متسلطة فاتت حد المعقول،ونحن ذاتنا وكل دول مجلس التعاون مكرهننا
الإعلام والمرقة مرة مع القرضاوي وخطب ماأنزل الله بها من سلطان ومرة
إتفاقيات في دوحة قطر لاتهدأ وتنجح ولا تستقر والترابي ماشي والترابي جاي
وحتى الصادق معاهم ماقصر، ومرة يشحنوا سلاح لسيناء ومرة ذهب في الحدود
ومرة الإمارات وشركات في دبي ومرة بوارج إيرانية في السودان وكمان جابت
ليها صواريخ بعيدة المدى ضد السعودية من بورتسودان، الناس ديل لازم تشوف
ليهم حلل ولوكان ذكر تمساح ما مهم ونحن معاك قلباً وقالباً.
والله نحن ــ مازال الملك مواصلاً حديثه للسيسي ـ حاولنا نصلح ونستثمر
أراضيهم ونزرعها ليهم ونفيد ونستفيد وكنا نسمع كلامهم وشعاراتهم في الدين
نصدق لكن لقينا عمائلهم مافي غير البلع والقلع والرشاوي والكوميشن
والعمولات والفساد ما عندهم عمارفنستغرب وكل واحد فيهم عامل أب
عرام،فهربنا فررنا ومرقنا بجلودنا زي شعبهم المسكين ده جري، وأقول ليك
وما تكلم زول: أدونا مليون فدان إغراءاً بتراب الواطة زي التقول لآعبين
ليهم لعبة خطيرة كدة أودايرين يبيعوا السودان ويهربوا ماليزيا أو الصين
ولاد الملاعين ديل بيسووا في عملة ويزوغوا ويورطونا مع الشعب الطيب ده،
لكن إنت معاهم في الحدود ومحتل منهم حلايب وشلاتين وعاملين أضان الحامل
طرشة وبيخافوا منك خوف الجن عشان كده توعدهم بالمزيد وهددهم وخليهم
يمسكوا الدرب الصحيح.
وسافر السيسي لغينيا الإستوائية وهويفكر في كلام الملك عبدالله وريالاته
وبتروله والكيزان والخاذوق الفي جنوبه هذا ملياً.
فقررالسيسي أن يعرج على البشير ويجري معه ذلكم الحوار العاصف:
• يابشير هوي سمعت إنكم شابكننا إنقلابيين ..إنقلابيين صحي الكلام ده!؟
• ما حصل...
• ما حصل كيف وجرائدكم بتقول كده يازول هوي فتِح عينيك دي كويس جداً زي
الفناجيل أنا سكت ليكم كتير والله تكتروا تقللوا بدل حلايب وشلاتين نخش
ليكم بورتسودان وسواكن وطوكر عديل أحسن ليكم قفلوا خشومكم الكبيرة دي
وإنت عارف إنو الساحل وكل شمال خط 10 درجة بل وحتى إهرامات البركل
وقيل إهرامات مروي والبجراوية جزء لايتجزأ من مصر.
• منو القال ليك الكلام الفاضي الفارغ ده يا أخوي السيسي، وكمان نحن
عندنا حرية صحافة.
•
• كمان الملك بيكضب زيكم يازول وللا شنو!؟
•
• علي باليمين كضاب وستين كضاب وأحلفلك بالطلاق كمان، ونحن ذاتنا كضب
فينا وقال نصبنا صواريخ عابرة للبحر الأحمر ضد السعودية حسادة ساكت منو
،أمشي تأكد براك بي نفسك وشوف كان عندنا صاروخ واحد ولو مثل صواريخ علب
صفائح حماس المدخنة ديك عشان تآمن.
• وبعدين معاكم في سد النهضة الإثيوبي وتأييدكم له معاكسة لمصر فقط دون
مبررات وبدون شروط وبدون فهم فلابد من قطع لسانكم الطويل هذا، فكلما نقول
إتحسنتوا شوية تزيدوا كلام صرتو طويلي لسان وقليلي إحسان إنتو قايلننا
زي شعبكم الفتران المغشوش ويأكل قرقوش ولعبتو عليهو وأكلتو بتروله وذهبه
وأراضيه بدلاً من يأكل مما يزرع ويلبس مما يصنع أكلتو قرض وكمان دايرين
تلعبوا مع المصرين!؟
• خلاص قول للملك رسلنا ليكم إناث الإبل والضان حتى ترضون وإنتو ما بنقصر
معاكم في القطن والسمسم والعجول والخرفان المدغلبة للضحية.
• لا..لا..لا نحن مازي صاحبك مرسي وجماعته نا س لقف وأخونة وتمكين ساكت
وتطردوا الشعوب أنا ما بصدقكم وأسع سمعت قالوا في مظاهرات عندكم تأييد
لمرسي ، نحن وشعب السودان شعب واحد وما بنرضى له هذا الغلاء الفاحش
والجوع فالسودان جزء لايتجزأ من مصر وما يصيبه يصيبنا بس إنتو ومرسي
وجماعتكم مصيبتنا الحقيقية والقضاء المصري قال كلمته فيهم وإنتهى ،فأعمل
حسابك.
وفي المؤتمرالصحفي السريع تحدث السيسي برسالة عامة للشعب عن المياه وإنو
السودان جزء لايتجزأ من مصرواللبيب بالإشارة يفهم.
|
|
 
|
|
|
|
عباس خضر
فيس بوك
تويتر
انستقرام
يوتيوب
بنتيريست