منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 09-21-2017, 12:22 PM الصفحة الرئيسية

اراء حرة و مقالات
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

شروع في الزنا قصة قصيرة بقلم أحمد الملك

03-17-2015, 04:31 PM

أحمد الملك
<aأحمد الملك
تاريخ التسجيل: 11-09-2014
مجموع المشاركات: 123

للتواصل معنا

FaceBook
تويتر Twitter
YouTube


شروع في الزنا قصة قصيرة بقلم أحمد الملك

    04:31 PM Mar, 17 2015
    سودانيز اون لاين
    أحمد الملك-
    مكتبتى فى سودانيزاونلاين



    في ظلال شجرة الجميزالعتيقة جوار المسيد إنعقدت المحكمة. جاء سعد الشهير
    بأبو الجاز وكان اكتسب الاسم منذ سنوات بسبب بيعه للجاز المسروق أيام
    عمله كمسئول عن توزيع البترول للمزارعين في اللجنة الشعبية. جاء بذقن
    طويلة أعطته مظهرا رسميا لم يكن ينقصه سوى أن يرفع أصبعه نحو السماء ،
    ليصبح مسئولا كبيرا حسب الدستور، وغرة صلاة في جبهته أكسبته ورعا حكوميا،
    كان يرتدي جلبابا فخما وعمامة ضخمة حتي بدا كأنه القاضي وليس المتهم.
    افتتح شيخ الطيب المحكمة: نبدأ الجلسة يا اخوان، وين حاجة ست البنات جاءت
    ست البنات تسحب معها ابنتها . ابنتها كانت لا تزال قاصرا، وكانت جافة
    الجسم مثل عود من العشر وقد لفت حول رأسها قطعة قماش أزرق وارتدت فستانا
    طويلا من قماش الشيت الرخيص. فبدت أشبه ب (الحقن برو) او عروس القصب
    باللغة النوبية.
    افتتح شيخ الطيب المحكمة بعبارته التي يستخدمها دون معني سوي انه كما كان
    يقول شيخ النور يريد تكذيب مزاعم من اعترضوا علي تعيينه كقاض شعبي قبل
    سنوات. حضرت انذاك لجنة يرؤسها قاض للفصل في الطعون المقدمة ضد تعيينه،
    كان صاحب الطعن الاول رجل درس في الازهر الشريف ثم عاد ليستقر في القرية
    وبسبب مطاردته لسبل العيش بدأ ينسي تدريجيا كل ما قرأه في الازهر، ضاعت
    ألفية ابن مالك في متاهة السنوات والتفاسير وفقه السنة أثناء مطاردة
    الأرزاق، وكان كل ما جاء شخص يستفتيه في امر ما ويكتشف انه نسي الجزء
    الشرعي الخاص بتلك القضية يعلّق قائلا: حاولنا أن نجمع بين الدين والدنيا
    ففقدنا الاثنين!.
    وحين قرر فجأة العودة عن طريق الدين والدنيا الى طريق الدين بعد ان مضت
    السنوات، لم يكن قد تبقي شيئا من علمه السالف سوي بعض الاحاديث الضعيفة
    والروايات غير المؤكدة.
    ضحك شيخ النور حين وقف حاج الأمين ليعظ الناس بعد أداء صلاة التراويح في
    المسيد وقال :
    زولك دة خلي بالك لو كان شغال في الازهر دة بواب في العشرة سنين القضاهم
    فيه كان بقي نبي!
    وضحك شيخ الطيب وقال هو اصلا قالو مشي يشتغل بواب في الازهر قام لقي مرتب
    البواب تلاتة جنيه ومرتب الطالب أربعة جنيه، قام اشتغل طالب!
    قال حاج الأمين أمام لجنة الطعون :
    الزول دة بتذكر المؤنت وبتأنث المذكرة!
    علّق رئيس لجنة الطعون : ما مشكلة، الدناقلة كلهم كدة!.
    قال حسين ود التاجر: الزول دة ما بتعرف تكتب!
    أمر القاضي باحضار ورقة وقلم، أمسك شيخ الطيب بتلابيب القلم كأنه يمسك
    منجلا وأعلن مفتتحا الاملاء :
    بسم الله نبدأ…
    قال القاضي متذكرا مقطعا قديما من ايام المدرسة: الولد ولد البلد.
    كتب شيخ الطيب: الود ولد البيت.
    البنت بنت البلد.
    كتب شيخ الطيب: البت بت البيت!
    قال القاضي: كانت حليمة تعمل بائعة للبن.
    وكتب شيخ الطيب:
    كانت حليمة تعمل وتبيع البن!
    طلب شيخ الطيب ورقة اخري لأن الورقة امتلأت وتدفقت الحروف حتي سالت علي
    المنضدة العتيقة في مبني البلدية الذي بناه الانجليز.
    قال القاضي: ودخلت نملة واخذت حبة!
    فكتب شيخ الطيب: ودخلت نملة واخدت واحدة.
    ضحك القاضي بحزم رسمي حين رأي الخط الكبير والكلمات الضخمة الشبيهة
    بعربات قطار، وقال لشيخ الطيب: انت كنت شغال شنو زمان؟
    حك شيخ الطيب شعره الاشيب وقال : سواق قطر.
    قال القاضي: عشان كدة.
    صدر القرار : يعين شيخ الطيب قاضيا شعبيا.

    افتتح شيخ الطيب المحكمة بخبطة علي المنضدة و بعبارته الشهيرة : لابأس.
    .. ثم أردف متسائلا : ريحة العرقي دي شنو؟
    تلفت الجميع بحثا عن مصدر الرائحة التي كانت منتشرة بكثافة مع رائحة
    القيظ وكأن الناس كانوا في انتظار قرار من القاضي لينتبهوا للرائحة.
    نادي عبد العاطي علي الشاكية. تقدمت مع ابنتها، وحين أشار لها القاضي
    لتحكي شكواها قالت مشيرة الي سعد أبو الجاز: الراجل دة قابل بتي في السوق
    وقال ليها تقابله بالليل!!
    قال القاضي مدعيا عدم الفهم : وتقابله ليه؟
    نظرت ست البنات الى القاضي بإستغراب وقبل أن تقول شيئا
    إرتفع صوت سعد ابو الجاز: يا مرة ما تخافي الله البت دي انتي براكي ما
    جيتي قلتي لي تعال عرّسها
    خبط شيخ الطيب المنضدة بالعصا وكرّر السؤال : الحصل شنو بالضبط.
    قالت ست البنات: يوم السبت رسلت البت السوق تشتري خضار ولحمة، خالها رسل
    لينا قال جايي يقعد معانا يومين، طبعا هو مغترب زي ما انت عارف،
    وقال شيخ الطيب حتي لا يعطي سعد ابو الجاز الفرصة ليقاطع المرأة: واها بعدين..
    البت مارقة من السوق وقّفها الراجل العايب دة وقال ليها دايرك في كلمتين.
    وكت وقفت جة براحة قال ليها نتقابل في المريق بالليل الساعة تمانية!
    وقال القاضي : واها ما قال ليها دايرها في شنو؟
    قالت ست البنات بصبر نافذ: بالليل وجوة المريق حيكون داير يطلع ليها شهادة بحث؟
    قال شيخ النور مساعد القاضي: دة شكلو كدة شروع في الزنا والعياذ بالله!
    قال سعد ابو الجاز مهتاجا: يا رجل اتقي الله البخليك تقول كدة شنو؟
    وقال شيخ النور: امال داير تقابلها في المريق بالليل تلعبوا صفرجت يعني؟!
    خبط شيخ الطيب التربيزة بعصاه حتي كادت تتحطم وقال هدوء من فضلكم.
    واصل سعد ابو الجاز صراخه: الولية دي دايراني أعرس بتها كان بالحق ولا بالباطل.
    أصدر شيخ الطيب أمرا: اي واحد يتكلم بدون اذن المحكمة حأديه اربعة وعشرين
    ساعة في الحراسة.
    صمت الناس وتعالي فقط صوت ضحكات طفل يبدو انه لم يحمل تهديد القاضي محمل
    الجد أو انه لم يكن يلاحظ وجود فرق بين البقاء في السجن او في خارجه.
    همس شيخ الطيب في اذن عبد العاطي فارتفع صوته، المتهم سعد ابو الجاز
    يتقدم الي الامام. تقدم سعد أبو الجاز، قال له القاضي: رايك شنو في اتهام
    المرة دي.
    كان يضع عدة اقلام فوق جيب الجلابية رغم انه هو نفسه لا يعرف القراءة ولا
    الكتابة وكان يحكي ان هذه الاقلام سببت له مشاكل مع النسوة العجائز
    اللائي يخدعن بمظهره الانيق والاقلام في جيبه فيلجأن له ليقرأ لهن
    الرسائل التي تصل من ابنائهن ويرد عليها. كان يتعامل بذكاء يأخذ الخطابات
    الي البيت زاعما أنه نسي نظارة القراءة في البيت وهناك تقرأ له ابنته
    الجوابات فيحفظها عن ظهر قلب ويعيد قراءتها للنسوة فيما بعد.
    في تلك اللحظة حين واجه المحكمة بدا جليا انه كان مصدر رائحة العرقي.
    كانت رائحة العرقي تكاد تقتلع الأنوف، سأله شيخ الطيب : انت شارب حاجة؟
    علّق شيخ النور : الزول دة مش كان كوز وشغال مع اللجنة الشعبية؟!
    أوضح أبو الجاز للقاضي: يا مولانا بالليل بطني كركبت شوية، مشينا كرامة
    رجوع ولد ناس حاج الأمين من العراق، كانوا ضابحين، انت عارف مع الغلاء
    اللحمة بقت نادرة، تقلت شوية في اللحمة، بالليل تعبت مشيت جبت لي نص.
    وقال شيخ الطيب: اها وانشاء الله بقيت كويس!
    قال المتهم رافعا يديه للسماء : الحمدلله تمام التمام. نعمة من الله!.
    قال القاضي : طيب موضوع السكر دة نجيه بعدين، هسع رايك شنو في كلام الناس ديل.
    وضع سعد ابو الجاز يده فوق صدره وقال : الحقيقة يا مولانا الناس ديل
    كلامهم نصو صاح؟
    استفسر القاضي : كيف؟
    انا فعلا قلت للبت داير اقابلك علي انفراد. علّي غرضي كان شريف !.
    ضحك شيخ النور وقال : شرف شنو جوة المريق!
    تنحنح القاضي ونقل جسمه الي الامام قليلا ليستمع جيدا للاعتراف الفضيحة:
    وقال لسعد ابو الجاز: وليه عملت كدة.
    قال سعد ابو الجاز : الحقيقة انا كنت عاير اتفاهم معاها في امور داخلية جوهرية !.
    ضحك شيخ النور وقال : والله النضم بتاعك بقي سمح بلحيل.
    ضرب شيخ الطيب المنضدة. وسأل : تتفاهم معاها في شنو؟ وايه حكاية جوهرية دي؟
    قال سعد ابو الجاز: انت ما قاعد تسمع رادي يا مولانا جوهرية معناها مهمة جدا..
    وقال القاضي : وايه القضايا المهمة الداير تناقشها بالليل جوة المريق؟
    وقال سعد ابو الجاز: والله زي ما تقول يا مولانا كدة الموضوع خاص،كان
    محتاج لمكان خاص!
    وقال شيخ النور: أها..
    وقال شيخ الطيب: لا بأس.. ممكن نعرف الامر الخاص دة لأن في اتهام لازم نفصل فيه..
    نظر سعد ابو الجاز الي الناس التي تجمعت لسماع الاخبار وقال بعد تردد :
    يا مولانا البيوت اسرار.
    أصر القاضي: يا توضح الموضوع يا أحكم عليك بالشروع في الزنا!
    وقال سعد ابو الجاز: ودي تهمة جديدة ولا شنو، انا يا مولانا ما عملت شئ
    وين شهودك الاربعة العدول؟ البت اهدي قدامكم ودوها الدكتور يكشف عليها.
    قال القاضي: الشروع في الزنا معناه انك ما زنيت لكن كنت ناوي تزني .. فهمت!
    ضحك سعد ابو الجاز وقال : طيب ما اي زول اذا كدة مجرم يا مولانا، هسع انت
    ذاتك قبل سنين مشيت طلبت بت ناس حاج علي للزواج، لكن رفضوا يدوها ليك
    عشان عندك تلاتة نسوان، يبقي تصرفك دة برضو شروع في الزنا يا مولانا!
    قال مولانا وقد بدأ الغضب يغطي علي هدوء صوته: كيف؟
    انت كنت داير تعرسها يا مولانا وقالوا مخصوص اتوسطت وعينتها كاتبة في
    المجلس عشان تكون قريبة منك وتشوفها كل يوم.
    خبط شيخ الطيب المنضدة: واصل كلامك.
    بما انك يا مولانا كنت معجب بيها وداير تعرسها لازم حتكون فكرت فيها
    ونويت تزني معاها.
    قاطعه القاضي: ازني معاها شنو يا رجل انا كنت عايز أعرسها علي سنة الله.
    وقال أبو الجاز: ما خلاص.. النتيجة واحدة..
    خبط القاضي المنضدة خبطة اخيرة: حكمت المحكمة شهر سجن علي المتهم سعد أبو
    الجاز لاهانته المحكمة الموقرة وأربعون سوطا حد الخمر!
    رفعت الجلسة…

    mailto:[email protected]@gmail.com
    للحصول على نسخة بي دي اف من رواية الحب في مملكة الجنجويد
    http://www.4shared.com/office/r4BbIa54ba/__1.htmlhttp://www.4shared.com/office/r4BbIa54ba/__1.html



    مواضيع لها علاقة بالموضوع او الكاتب


  • فصل من رواية الحب في ممكلة الجنجويد بقلم أحمد الملك 02-23-15, 01:50 PM, أحمد الملك
  • بين رجل الخير أعمى البصر، ونظام المشير أعمى البصيرة! بقلم أحمد الملك 02-16-15, 02:05 PM, أحمد الملك
  • العقرب قصة قصيرة بقلم احمد الملك 02-09-15, 02:47 PM, أحمد الملك
  • بين بلة الغائب وقصر المشير وإتحاد الكتّاب السودانيين! بقلم أحمد الملك 02-02-15, 03:20 PM, أحمد الملك
  • سنبني قصرا جديدا سيدي الرئيس! فصل من رواية: الحب في مملكة الجنجويد بقلم أحمد الملك 01-28-15, 01:39 PM, أحمد الملك
  • حين يعلن المشير: إنتخبوا من يخاف الله فيكم! بقلم أحمد الملك 01-20-15, 01:16 PM, أحمد الملك
  • ويظل ذاك الليل طفلا يحبو في الذاكرة! في ذكرى الراحل المقيم محمود عبد العزيز بقلم أحمد الملك 01-19-15, 02:22 AM, أحمد الملك
  • حول خطاب البشير في ذكرى الاستقلال بقلم أحمد الملك 01-05-15, 03:55 AM, أحمد الملك
  • تحية الصمود والمحبة لأهلنا في لقاوة بقلم أحمد الملك 12-30-14, 03:47 AM, أحمد الملك
  • الموسيقار الراحل محمدية وشيوخ (الاسكايب) بقلم أحمد الملك 12-22-14, 01:44 PM, أحمد الملك
  • بين هوجو تشافيز ووكيل خارجية السفّاح! بقلم أحمد الملك 12-15-14, 02:17 AM, أحمد الملك
  • بين (تربية الشيوعيين) وتربية (الاسلامويين)! بقلم أحمد الملك 12-08-14, 05:46 AM, أحمد الملك
  • لنا (القصر) دون العالمين أو القبر! بقلم أحمد الملك 12-01-14, 01:39 PM, أحمد الملك
  • المشير في المتاهة! بقلم أحمد الملك 11-23-14, 09:52 PM, أحمد الملك
  • تابت خطاب ولاية المشير الجديدة!؟ بقلم أحمد الملك 11-17-14, 06:26 AM, أحمد الملك
  • الصبي الصغير لم يسرق الانسولين أحمد الملك 11-09-14, 10:37 PM, أحمد الملك
                   |Articles |News |مقالات |بيانات

03-17-2015, 05:44 PM

ابو جهينة
<aابو جهينة
تاريخ التسجيل: 05-20-2003
مجموع المشاركات: 19905

للتواصل معنا

FaceBook
تويتر Twitter
YouTube


Re: شروع في الزنا قصة قصيرة بقلم أحمد الملك (Re: أحمد الملك)

    سلام أحمد

    دي لو إنتشرتْ فهي بحق محاكمة العصر
    حكي طاعم
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>

تعليقات قراء سودانيزاونلاين دوت كم على هذا الموضوع:
at FaceBook




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de