هوي .. والله جنيهنا دا يوم يكتل ليهو زول
بسم الله الرحمن الرحيم إذا كانت قروش الخليج طاعمة وبتحل المشاكل وبتخلي جنيهنا يتضاءل عند حضرة مجلسها فعملة البلد الشغال فيها أنا في الخليج أقوى بل ويتضاءل أمامها الريال السعودي والدرهم الأماراتي وهي الريال العماني والذي يساوي 10 ريال سعودي و10 درهم أماراتي يعني بإختصار ريال ضكر وعيونو حمر حلب الناقة في الشنقاقة .. ريال أقوى من ريال مدريد الإسباني عشان كدا الرواتب تدفع بالميات وليس بالآف كما في باقي الخليج ولا بالملاين كما في الدول الأفريقية ما سبق فهو مقدمة أمبارح كنت بتكلم مع أهلي في التلفون وكان بجواري زميل من الدولة صاحبة الريال القوي وأنا بتكلم قلت للشخص الذي في الجانب الآخر من التلفون (أسمع أنا رسلت مبلغ مليون وسبعمائة الف) عليك الله أمشي أستلمها وبعد أن خلصت المكالمة رجعت إلى زميلي العماني لقيتو مشدوه وينظر لي نظر المغشي عليه من الموت ولسان حاله يقول أنه يتهمني بالسرقة خاصة وأن وظيفتي في الشركة هي محاسب وهو معذور لأنو ماعارف ريالهم بساوي 8 الف من جنيهنا العفيف النضيف من القيمة فالراجل أوشك أن يصاب بالشلل وعرفت فيما بعد أنه أخبر زوجته بالقصة والتي فقدت حملها (سقطت) من جراء هذا اللامعقول وساعتها فكرت في أن جنيهنا دا إرهابي وكارثي وحقو نستخدمو في تخويف أمريكا ومن والاها فعليه ومن هذا المنبر أناشد منظمة العفو الدولية ومركز التجارة العالمي وحركات التحرر في العالم ودوائر الكرة بأندية الممتاز وكل محبي نلسون مانديلا ورونالدو أن يباركو مشروع إعطاء جائزة نوبل لكل من ساهم بماله وفكره ووقته الثمين في تحويل جنيهنا العظيم إلى روث أو ظق

07-27-2003, 07:42 AM

Habib_bldo

Habib_bldo
تاريخ التسجيل: 04-04-2002
مجموع المشاركات: 2350

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
بدر الدين أخوي أخبارك كويس أنه صاحبك ما طب ساكت وورطك في جربمة وكنت خشيت في تهمتين تهمة القتل العمد مع سبق الاصرار وتهمة السرقةوأنت أحمد ربك بـأن المسألة وقفت بالسقيط **** الجنيه الميت الحي يا بدر قبل أكتر من عشرة سنوات عندي ود عمي قال لي الجنيه السوداني خلاص مات وأداه فاتحة كبيرة وقال لي الجماعة خاشين في مأزق وكما تعلم أن أهم أهداف النظام الحالي كما جاء في أول بيان للبشير هو إنتشال الجنيه السوداني الذي وقتها كان يساوي واحد ريال سعودي اي الدولار الامريكي كان يساوي 3.40 من الجنيهات كان لا بد من مخرج للحكومة مع تدهور الجنيه وتم إستبداله للخروج من هذا المأزق الصعب الحاصل بعد موته وقبره وإستبداله بالدينار ما زال أهلنا في السودان متمسكين به وأنا مع حالة الود وحفظ الجميل لهذا الجنيه العتيد (عدل بواسطة Habib_bldo on 07-27-2003, 07:58 AM)

07-27-2003, 07:51 AM

Habib_bldo

Habib_bldo
تاريخ التسجيل: 04-04-2002
مجموع المشاركات: 2350

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: Habib_bldo)
نواصل الحلقة مع حالة الود هذه وبعد أن تدهور الدينار ووصلت حالة مذرية أرجو من وزير المالية إصدار قرار جديد بعودة الجنيه وإخراجه من المقبرة وإعطائه مكانة أكبر من الدينار إذا كان الدينار يساوي عشرة من الجنيهات في التقييم القديم أرجو أن يأخذ الجنيه وضعيته وهيبته بين أمم النقود بأن يصبح واحد جنية يساوي 100 دينار وبذا يمكن للبشير أن يقول بملئ فمه ها قد عدت بالجنيه لسابق عهده وأصبح يساوي ثلث دولار او ريال 1.3 ريال (عدل بواسطة Habib_bldo on 07-27-2003, 07:53 AM)

07-27-2003, 07:46 AM

انور عمر

انور عمر
تاريخ التسجيل: 10-15-2002
مجموع المشاركات: 559

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
الاخ المحترم بدرالدين شنا السلام عليكم ورحمة الله وبركاته حقيقة حال قروشنها يرثي عليها ويا حليل زمن الجنيه عزيز يا سلام يا الشيك باب جمل يا البلاك ما انتم الامل دفع الميه للمشاطه لكن ليس الجنيه الارهابي ولكن الارهاب في الصورة التي تضعها في اسفل الرسالة وعامل زي السبحه

07-27-2003, 09:01 AM

almulaomar

almulaomar
تاريخ التسجيل: 07-08-2002
مجموع المشاركات: 6485

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
اليابان تخفض قيمة الين ، الأرجنتين تخفض قيمة البيزو تدهور مريع في سعر صرف العملة الأفغانية الأتراك يحرقون الليرة التركية ، الدرهم يحافظ على هدوءه. عمرنا ما سمعنا إنو حكومتنا إتدخلت عشان تخفض قيمة الجنيه لأنو بنخفض براهو زي اللبن بعد ما يفور ترشو بي شوية مويه جووووت يهمد. أها سألوا أحد الفطالحة عن إتجاهنا الإجباري من جنيه إلى دينار وهو تحزب وعودة قوية لإستخدام اللغة العربية وتكريس لمشروعنا الحضاري فما كان من الأديب إلا أن تبسم قائلاً إنتو من الأساس شغالين غلط في الورقة فئة العشرة دنانير وخمسة دنانير تكتبون عشرة دينارات وهذا خطأ والكتاب يقرأ من عنوانه. يقال أنه بعد أن ترجل ذلكم الشخص من على ظهر الجمل في الجنيه السوداني ورمى بحربته وأشتري بثمنها حلاوه حربه أصبح الجنيه عندنا جاري بسرعة تفوق فرس أمرؤ القيس في كره وفره وإن كان جنيهنا دائم الفرار في إتجاه واحد إجباري وبعد إحتلال سيادة الرئيس السابق جعفر نميري ووضع صورته في العملة تشبها بشاه إيران والملكة حتشبسوت وملوك الخليج والحكام الديكتاتوريين في دول العالم الثالث فقدنا الثقة في عملتنا ، وبعد الأحزاب أتى الإنقاذ والطريف أن أحد أعضاء الفرقة الإنقلابية قد صرح قائلاً نحن لو ما جينا للحكومة كان الدولار بقى بي خمسة وعشرين جنيه وفي عصرنا هذا نحتاج إلى مكتب محاسبة متخصصة لنعرف كم تساوي العشرة دولارات أمريكية أو اليورو أو حتى الجنيه الأسترليني بالعملة السودانية. وفي النهاية وبرغم تصريحات الرجل فقد تم إقالته ويا ضايقين حلوها مرها ضوقو. أتساءل هل هناك أى مقاعد أو بطاقات عضوية أو إنتساب من قريب أو بعيد للجنيه السوداني والشلن الصومالي والأوقية الموريتانية والليرة اللبنانية وكذا التركية في داو جونز أو نيكاي أو ناسداك وهل سبق لجنيهنا السوداني أن كان سعر الإقفال في مؤشر بورصة طوكيو يناطح اليورو ، ومع ذلك فإن النشرات الإقتصادية في تلفزيون السودان تذخر بمثل هذه الأخبار وأحسب أن الكثيرين لا يفهمون ما يقال والقلة الفاهمة لا تهتم تماماً عندما تحوي النشرة الرياضية أو برنامج اللماضة والمساخة الرياضي الأسبوعي والذي قال فيها الرحمابي ما لم يقله مالك في الخمر عندما يعرض عليك مباراة في هوكي الجليد في عز حر صيف الخرطوم اللاهب ونحن تلج لموية الشراب ما لقيناهو من الكهربا الديمه قاطعه، وما لنا ومال كده هو يا دوب كرة قدم وما فالحين فيها. ---- يقال أن أحد أقاربنا من أهل العوض حضر في زيارة للخرطوم قبيل حكم النميري وعند عبورهم لكوبري النيل من أمدرمان في إتجاه الخرطوم بحري نظر هذا الأهل عوضي مستغربا ومتعجبا وقال مخاطبا قريبه آآجنا هسع الكوبري ده ما بتلقي كلفلو مية جنيه.

07-27-2003, 11:15 AM

قلقو

قلقو
تاريخ التسجيل: 05-13-2003
مجموع المشاركات: 4742

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
الأخ شنا اولا حمدالله على السلامة لأنى شايف الأخت شيرى عاملة فيكم عمايل بطالة خلاص انت والأخ اساسى (وتستاهلو) اما بخصوص اوراق التيشوز بتاعتنا فأبشرك بصدور الورقة ام عشربن الف وفى الطريق ام خمسين الف

07-27-2003, 12:03 PM

ابو جهينة

ابو جهينة
تاريخ التسجيل: 05-20-2003
مجموع المشاركات: 22484

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: قلقو)
بدر الدين : لك تحياتي و مودتي مسكينة عملتنا يا أبوالبدور. فقد مرت هي الأخرى بمراحل كالدقداق ، فمن أيام التعريفة المخرومة أيام الدولة الواحدة ، إلى العملة الوطنية الأولى ، ثم الجنيه أبوعمة ، ثم الجنيه بدون عمة ، ثم تغيير إسم بدون سماية لذا صارت بركته شحيحة. ما تنسى زيارة أم عطية. و لك تقديري .

07-27-2003, 07:02 PM

بدرالدين شنا

بدرالدين شنا
تاريخ التسجيل: 07-30-2002
مجموع المشاركات: 3514

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)

بسم الله الرحمن الرحيم

الأحبة حبيب بلدو
أنور عمر
الملا عمر
قلقو
أبو جهينة
أعتذر على التأخير وذلك لإسباب خارجة عن إرادتي خاصة بالسيرفر العنيد والذي تمرد ورفض العمل بالنهار

المحبوب حبيب بلدو
سلااااام وإحترام

عجبتني جملة بدرالدين (أخوي) شعرت فيها بدفء وحنان أحتاجه
والله أضم صوتي لصوتك وأتمنى أن يعمل المسئولون على إعادة الجنيه إلى كرسيه حتى تعود الحياة لجمالها وروعتها
جنيهنا زمان .. جنيهنا زمان وصانا على الوطن
على التراب الغالي الماليهو تمن

الغالي أنور عمر
سلاااام وريد

فعلاً جنيهنا كان عزيز وكان الخمسمائة جنيه بسموها (نص الألف) والألف يحتفلوا بيهو ياريت تعود تلك الأيام
أشكرك وأنت تصدر شهادة براءة لجنيهنا من تهمة الإرهاب

الرجل الثروة الملا عمر
سلاااااااااااااام وعافية

Quote: يقال أنه بعد أن ترجل ذلكم الشخص من على ظهر الجمل في الجنيه السوداني ورمى بحربته وأشتري بثمنها حلاوه حربه أصبح الجنيه عندنا جاري بسرعة تفوق فرس أمرؤ القيس في كره وفره وإن كان جنيهنا دائم الفرار في إتجاه واحد إجباري

يعلم الله إنت غالي غلاوة الجنيه السوداني
وما عندي ما أضيفه للوحتك التي وقفت عندها طويلاً وإحترت منها هذا الكوت الذي أدهشني يديك العافيه يا صفي

العزيز قلقو
سلااااااااااااااام بعظمة طلتك
إنت عارف شيري لقت السيرفر بتاعي ما شغال وشرت غسيلها لكن قول ليها أنا مسامحك طالما هناك إبداع ونثر للفرح
أما بخصوص الفئات الجديدة نحن نقول ربنا بارك لنا فيما رزقتنا وقنا عذاب النار

المتفرد أبو جهينة
سلامي وحبي وشوقي وإعتذاري لعدم التواصل أو تعثره

يديك العافية وإنت تذكرنا بالمراحل التي مر بها جنيهنا الحبيب وياريت يعود
مرحب مرحب بأم عطية والله يا أبو جهينة أنا قاعد لي في صحراء الحر الفيها كفيل بأن يقلب أم عطية بن لادن

07-28-2003, 12:54 PM

khal fatma

khal fatma
تاريخ التسجيل: 07-21-2002
مجموع المشاركات: 715

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
عندي مداخلة صغيرووووونة الريال العملاق دة وبقية الريالات الجبارة والدراهم الخارقة الثابتة في مكانها زي حكامنا العرب دي مافيها بركة !لاحظتو الشي دة ولا لا؟ يافرد ودمتم

07-28-2003, 12:58 PM

Osama Mirghani

Osama Mirghani
تاريخ التسجيل: 03-17-2003
مجموع المشاركات: 689

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
بدر السمح والله زي ما قلت ليك في التلفون امبارح إنك لمست وتر حساس خلاص..يرن بالأسي لحال جنيهنا الذي كان يهز ويرز في سوق العملة في أي مكان في العالم..ولكنه مشهد لايخلو من الطرافة والمفارقات...هل تصدقوا إني تزوجت سنة 1980 وكلفني الزواج الكان زواج خمج...كلفني 12000 جنيه....بالتمام والكمال..شامل الذهب وفتح وسد الخشم كمان....و بحسبه بسيطه بأسعار اليوم تجد أنو التكلفه 2 ريال عماني.. أو حوالي 20 ريال سعودي وشايفين فوائد الزواج المبكر!! وبالمناسبه عندي اصحاب دفعتي لسه ما إتزوجوا و طبعا ديل مزنوقين الان زنقة كلب في طاحونه لكن عاوز أقول شيء مهم.....الملام الأول في كارثة الجنيه السوداني هو رئيسنا سيء الذكر أبو سفّه-بتشديد الفاء - وإن شئت بفتح الفاء دون تشديد ورغم أننا نصب جام غضبنا علي الإنقاذ لتردي جنيهنا العتيد...لكن أري أن المشير أبو سفه هو العملها فينا...والمصيبه انو مازال فاكر نفسه آدم أسمث...وشر البلية مايضحك

07-28-2003, 02:07 PM

bayan

bayan
تاريخ التسجيل: 06-13-2003
مجموع المشاركات: 15417

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: Osama Mirghani)
سلام يا البدرى الدفعة ياخى عاين لنصف الكوب المليان اسع متلنا دا كان كيف يبقى مليونير لو ما الجنيه دا ضرب الدلجة اسع تمشى السودان طوالى ممكن تطرح نفسك مليونير وتحلف عليها كمان يا حليل 30 جنيه المعهد الكان بنوفر منها

07-28-2003, 03:23 PM

سجيمان

سجيمان
تاريخ التسجيل: 10-03-2002
مجموع المشاركات: 14875

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: bayan)
بدر الدين.........لكن اوعك تقول ليهو ريالهم بيساوي تمانية الاف..........بيقع تاني والمرة دي حيموت

07-28-2003, 06:52 PM

بدرالدين شنا

بدرالدين شنا
تاريخ التسجيل: 07-30-2002
مجموع المشاركات: 3514

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
بسم الله الرحمن الرحيم الأخوة والأخوات خال فاطمة أسامة ميرغني بيان سجيمان بالنسبة لتأخر الردود عندي شوال إعتذارات تاكلو جنب الحيطة فوق كل واحد يشيل البرضيهو وخلوا الباقي لأخوانكم الجايين حبيبي خال فاطمة سلاااااااااااام وإحترام والله فعلاً ملاحظة إنو هذا الريال العاتي القضنفر الشرس ممحوق خلاص ولا يقوى على مقاومة جبروت السوق صديقي أسامة سلاااااام وحب شديد إنت تزوجت سنة 1980 بي 12000 وأنا تزوجت بعدك بي 8 سنوات بي 16000 يعني في تمانية سنين كان الفرق 4000 معناها خمسمائة جنيه لكل سنة أها أنا جيت الغربة هنا سنة 1992 وخليتو كم وتمانين جنيه وبعد كم شهر عندنا قريبنا يعمل خبير إقتصادي في دولة الإغتراب مشى إجازة لما رجع قال لي والله أسمع أقول ليك كلام الدولار دا إذا ما يصل 200 جنيه ما تديني إيدك يعني معناها هسع لوّ أديتني ليهو كلي ما برضى بي خلي أديهو يدي يديك العافية دفعتي بيان صدق من قال بيان رقم واحد صاح نحن بقينا مليونيرات لكن المليونيرات بقوا (مليارديرات) والله كتابتها غلبتني دحين كدي صاح؟؟؟ الله ... يا دكتورة ذكرتيني تلاتين المعهد والله كانت مبروكة وفيها فائدة أنا كنت بسافر منها البلد بعد مرات الظريف محبوبي الفنان سجيمان سلااااام بقدر محبتي أقول ليهو بساوي 8000؟؟؟ يعني أسلمو (كعب أخيلي) بي يدي؟؟؟ ياخوي ديل ما بموتوا إلاّ بحوادث المرور صامدين زي ريالهم

07-28-2003, 06:59 PM

bayan

bayan
تاريخ التسجيل: 06-13-2003
مجموع المشاركات: 15417

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
قلتا العرس بكم؟؟!! والله كان تمشى بلد ناس محمد عباس قال فى حلتنا مرة الخمسين جنيه الحمار ما بيشيلها :D :D :D :D

07-28-2003, 08:46 PM

maia

تاريخ التسجيل: 03-05-2002
مجموع المشاركات: 2613

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
بدرالدين الجميل لك كل التقدير في هذه الدول نتجنب تماما الحديث عن سعر الجنية السوداني ( عفوا الدينار الانقاذي) مقابل غيره من العملات ذات الشخصية القوية التي يقف امامها جنيهنا منكمشا هزيلا اشعث اغبر وطبعا اهل الخليج يجيدون السؤال المتكرر عن سعر الجينه امام عملة بلدهم ( سؤال لما يجيب الدم) وتلقى السوداني مسكين يزوغ ويحاول يلطف المسالة وفي كل مرة تسلم الجرة لكن يبدو ان الجرة معاك ما سلمت لذلك نرجو تحويل عملتنا الى عملة ذات هيبة وجبرة وشخصية ماكنة تخوف العملات التانية وده انشاءالله حيتم لما كل الشعب السوداني يكون اتشتت وما فضل زول في السودان تلقي عليهو الحكومة الجديدة بيانها الاول ما طمنتك مش كده ؟ ده من قهرنا وغلبنا

07-29-2003, 04:40 AM

بدرالدين شنا

بدرالدين شنا
تاريخ التسجيل: 07-30-2002
مجموع المشاركات: 3514

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
بسم الله الرحمن الرحيم العزيزة حد الخوة بيان سلااااااااااااااام بقدر سماحة محمد عباس ذلك الشخص الطيب البرئ العفوي .. قلتي لي قال في حلتن مرة الخمسين الحمار ما بشيلها والله ضحكت ضحكت حتى إندهش من حولي إنتي عارفة دي ما بتكون مرة الما بشيلها الحمار دي بتكون حلة كمونية وهي مرة الحمار ماشالها أنا أشيلها كيف؟؟؟ يحفظك ربنا إنتي وعيالك وأبوهم الغالية بتنا ميّا حقيقة إفتقدتك في الفترة الفائتة كيف حالك وإزيِك ما طمنتك مش كده ؟ ما طمنتيني ولا خلعتيني مرة واحدة نتمنى يا عزيزة أن يترجل جنيهنا ويقوم على حيلو ويستحما ويسرح شعرو ويمرق لي برة ووقتها يمكننا أن نفاخر به وإن غداً لناظره قريب أنا متفائل مش كده؟؟؟

07-29-2003, 11:01 AM

maia

تاريخ التسجيل: 03-05-2002
مجموع المشاركات: 2613

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
بدرالدين الجميل التحايا والتقدير تسال عنك العافية دوما وتسلم لا نملك غير التفاؤل بان ياتي يوما زي ما قلت بان ينهض جنيهنا وينفض عن نفسه غبار القهر ونسمع اسمه وسط العملات الاقوى من ريال مدريد والله لغاية يوم الليلة ما قادرة اتعامل هذا الدينار اللي بيديك احساس بالبلادة الانقاذية بس حنظل نتحاشى قول الحقيقة عند السؤال ( الجنيه السوداني بيساوي كم ؟) سلمت يابدر

07-30-2003, 04:55 AM

بدرالدين شنا

بدرالدين شنا
تاريخ التسجيل: 07-30-2002
مجموع المشاركات: 3514

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: هوي .. والله جنيهنا دا يوم يكتل ليهو زول (Re: بدرالدين شنا)
بسم الله الرحمن الرحيم ياغالية يا نبع الحنان يا ميّا يا زينة الحسان سلامي ليك أطنان أطنان إنتي الدينار دا يكون من زمن علي دينار؟؟؟ لأنو بسمع يقولوا صلاح دولار لأنو الناس في زمنو عرفو الدولار ربي يسهل أمرنا ويرفع شأننا والعزة للسودان والعزة للجنيه

[رد على الموضوع]

صفحة 1 „‰ 1: << 1 >>

��

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]