بحكم عملي في منطقة بدو وبحكم وظيفتي التي تفرض علي التعامل المباشر مع الزبائن تعرضت اليوم لي شكلة طويلة عريضة وكادت أن تؤدي بحياتي لو لا لطف المولى عز وجل يازول بإختصار البدوي زعل وكان داير يفطسني عديل كدا لكن الحمد لله بيناتنا كان في حيطة وشباك البيع ما بدخلو فقعد يرغي زي الجمل ويضرب في الحيطة المهم لمن غلب حيلة تب بدأ يجمع كل ما يمكلك من زخيرة الشتم والسباب وفرشها قدامو عشان يختار أقذعها وأكثرها إيلاماً عشان يرميني بيها وأنا شايف الشتائم مفروشات قدامو فيهن واحدات طعن في الشرف وواحدات سب للأب والأم وفيهن واحدات عرقيّات وأنا متابع حركة أصابعينو وسط هذه الشتمات والسبات وخايفو يشيل واحدة منهن لكن ربك ستر شال ليهو واحدة هو بفتكرها كيماوية عديل وممكن تقضي علي في اللحظة المهم ملأ بيها خشمو تب وفكّاها لي بي الشباك سوداني واحد أها بعد فات عرفت من الجماعة إنو الراجل خلاص فكّا آخرو يعني دي منها والسكين فقلت معناها لو كنت الماني حايقول لي الماني واحد أو أمريكي واحد فتمنيت لو كنت من مدغشغر ولا جزر الفوكلاند عشان اشفوا بنطقها كيف؟؟؟ إذا كان شكلة واحدة قال لي سوداني واحد طيب الزميلة سودانية 2000 دي تكون عملت كم شكلة؟؟؟ غايتو أنا كلمتكم والداير يبقى سوداني إتنين يجي بسرعة وأي زول يتأخر ما يلومني
لوووووووووووووووووووووووووووول وتانى لوووووووووووووووووووووووووول لكن ما بالغتا يا سودانى واحد الزول دا لازم تجيبو يشترك فى بورد بكرى دا عشان ينضم لناس الشتائم ويخترع لينا شتائم زى دى جديدة كرت عشان تحيرنا فى معانيها
08-21-2003, 05:23 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
هي يايما البركة الجيتي الراجل ما كان داير يكتلني إنت عارفة دا لو إنضم للبورد أول بوست حايدخل فيهو (طالعني الخلا) لكن كان حايطفش ناس كتار وبعدين لو عايز ترد ليهو زي دا ما تقول ليهو ياشفيف أو ياكثيف دا تقول ليهو هيع الله منك آب صدر
08-21-2003, 05:40 PM
bayan bayan
تاريخ التسجيل: 06-13-2003
مجموع المشاركات: 15417
يا بدر الدين حلا .. انت ما فهمت الحكاية الظاهر عليك الزول ده ح يحسب ليك لحد تلاتة .. وبعد داك لو حصلت شكلة .. بتكون النهاية الشكلة الجاية سوداني اتنين والبعدها سوداني تلاتة .. كُفْ حجّار .. و ديك بتكون آخر فرصة ليك
08-22-2003, 04:57 AM
hammama hammama
تاريخ التسجيل: 12-19-2002
مجموع المشاركات: 296
يا بدر انا كنت واقف هو قال ليك بي خشم مليان ... روووح سوداني واحد وبعدها قمنا قسنا ليهو الضغط ليقناهو نزل كتير مع انو في بدايه الشكله كان ضغطو عالي جدا عموما بعد داك عملنا ليهو جلسه علاج نفسي لقينا انو المشكله الاساسيه في حياتو جايه من الدريول الهندي الذي يجد في البيت حظوه من الصغير والكبير اكثر منه هو من يدفع . غايتو صاحبك اعتزر لما عرف انك احتمال تكون مش سوداني وكان ممكن تكون اي جنسيه تانيه واتفق معانا وهو يهز راسه وقال ( اي والله ايش كان يكون حالي لو كان الريال هندي الله يلعنك يا ابليس ) هذا ما قاله طويل العمر ما تزعل ياخ ديل ما بينزعل منهم
08-22-2003, 06:25 AM
zola123 zola123
تاريخ التسجيل: 08-22-2002
مجموع المشاركات: 7
بدر الدين السمح انا كنت فاكرة العمانيين ديل والله مؤدبين يعني كدة خاتاهم نمرة اتنين كان ما كان واحد بين الخليجيين يمكن عشان هم اصلا ما خليجيين مية في المية
لاكن زعلتني كيف تخليهو يمشي ساي كدة مش الشباك فيه شبك؟ ولو ما كان فيه شبك برضو عندنا ليك ردود
تحياتي زولة123
08-22-2003, 05:24 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
إنتي عارفة أنا عمك؟؟؟ إنتي بيان رقم واحد وأنا سوداني واحد أصلو أنا و(رقم) أخوان وجدّناالله يرحمو واحد أها (واحد) الله يرحمو جاب رقم وجاب سوداني
فهمتي ولا لع؟؟؟
حبيبي الفاتح سلااااااام وحب شديد أيوة في سوداني إتنين وفي سودانية 2000 كان ما عجبك ربنا يحفظك من كل بلا
الظريف شنتير وليس شانتير سلااااااااااام من جوا قلبي ياخوي أنا بعد الشفتو في فيلم سوداني واحد أظني أغير لي سينما تانية قال سوداني تلاتة قال
ياحمامة السلام سلاااااااااام وإحترام هو فعلاً قال رووووووووح سوداني واحد الله يقطع الدريول الهندي كان قطع نفسي هو دا عليك الله ضغط ولا بورصة عملات البرفعها هندي وينزلها سوداني؟؟؟ لكن أوعدك يا حمامة إني ما حا أكررها تاني
الغالية زولة 123 سلااااااااام وإكرام لا عليك الله ما تغيري رأيك في العمانيين والله والله ديل أطيب شعب والله الواحد بيناتهم ما بشعر بي إنو غريب وأنا أكاد أجزم إنو ما في شعب متسامح زي العمانيين لكن أنا بتكلم عن شريحة بسيطة وغير مؤثرة لم تنل حظها من التعليم وهي شريحة البدو وصدقيني إنهم كرماء وحصل لي معاهم مواقف كتير نختلف ونتصافى في نفس الجلسة لكن بعض الأوقات يتدخل الشيطان وخاصة في مسائل المال فعليك الله رجعي الفكرة بتاعتك وختيها في تربيزتها الكانت فيها وتسلمي يازولة
عليك الله الزول دا زي ما قلت فك آخره يعني ألعن من سوداني واحد مال قلى ليك شتيمة بس أنا مافهمت وين الشتيمة في حروفه دي بالله فتش في مجتمعه ودردش ولف ودور وأفهم لينا البدوي دا قاصد شنو أنا .. في انتظارك
تحياتي
08-23-2003, 03:48 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
عند محاولتي لسبر أغوار هذه الشتمة أو السبّة (سوداني واحد) وجدت التحليل الآتي عندنا هنا في هذه البقعة من الخليج (عمان) هناك عمانيين أصليين وهناك عمانيين جاءوا من زنجبار وذلك للعلاقة التاريخية التي تربط بين الشعبين والتصاهر الذي حدث وهناك عمانيين جاءوا من بلوشستان منذ زمن بالإضافة للعمانين أصحاب الجبل وهؤلاء يتمركزون في مدينة صلالة الجميلة وكل هؤلاء يرفرف فوق سقوفهم العلم العماني ولابد للنظرة الإستعلائية والعرقية أن تعيش وتنمو ففي أحايين كثيرة تجد العمانيين الأصليين إذا إحتدم النقاش يقولك هذا زنجباري واحد أو بلوشي واحد وهي للتقليل يعني زي لمن تقول (حتة سوداني لايودي ولا يجيب) وهذا ما توصلت إليه من تحليل من شخصي حسب تواجدي بينهم لمدة لا تقل عن الأحد عشر سنة لك تحياتي
كنت تقول ليه ..والف كمان !!..مش واحد الم يسمع بأنه يكفي النيل ابونا والجنس سوداني هو كان ما ..الجبر ..السودان بنفات الله يحفظكم ..ويعود كل الطيور المهاجرة ..سالمين ..غانمين
08-23-2003, 11:11 AM
Ahlalawad Ahlalawad
تاريخ التسجيل: 02-05-2002
مجموع المشاركات: 2832
والله ياخوي يبدو إنك أحسن حالا مني .. فقد حاول واحد أن يشتم أمامي رئيسنا الهمام عمر البشير إثر نقاش حاد ، فرمى بآخر ما في كنانته قائلا : سوّد الله ها الويه (الوجه) – إبن الزول ... طبعا بعد أن لكت هذه الكلمة كوييييس .. اتضح لي بأنها أقسى ما يمكن أن يذهب إليه ساب من سباب ... استعمل كلمة زول في أسوأ معانيها ... والله بيني وبينك نحن زااااتنا بنجيب السب لي نفسنا .
08-23-2003, 11:31 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22758
بدر الدين سلام بالكوم قول لى البدوي دة وين عشان أرسل ليهو الصحفي إياه ، زول خشمو فالت و عضلاتو تبش. و الله نضمي بياكلو ، ضرب بيدشدشو لأنو ما شاء الله قبضة إيدو زى كلاى. تسلم
08-23-2003, 11:44 AM
bayan bayan
تاريخ التسجيل: 06-13-2003
مجموع المشاركات: 15417
سلاااااام بنت النيل كيف حال ابونا النيل والله نحن من ما فارقناهو فارقنا مشهادنا غايتو زي مابقولوا الترك دارو قلّ مقدارو نسأل الله يحفظ كرامتنا
أهل العوض والعرض سلاااااااااام وشوق
الويه (الوجه) المسود دا حقك ولا حق الريس؟؟؟ والله يا أهل العوض نحن ما عارفين نلاقيها من منو ولا منو صحراء وسيرفر ضعيف وفراق أهل وعيال وبدوي غليد مفتول العضلات
الصديق أبو جهينة سلاااااام مدنكل
والله دا لا ينفع معاهو صحفي ولا أم عطية بس عليك بالتركين تحياتي
بت كنبتي بيان سلااااااااااام مشبّع ثكلتك أمك شنو؟؟؟ دا زول إيقاعو فارق عديل كدا غايتو ربنا يسامحو وأنا متأكد هسع لو لاقيتو حا يضبح لي ويكرمني
الغالية شيري سلااااااااااام مسلّح الراجل ما فقع مرارتي ياشيري سيرلانكية شنو؟؟؟ دا سيرليستاك ولا سير كهرباء ما عارف دي دايرة ليها حلة كمونية عديل كدا
أهل العوض والجمال سلاااااااااام رأيك شنو في ضب صحراوي؟؟؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بدرالدين شنا
bayan
alfatih
Shinteer
hammama
zola123
Ahlalawad
ابو جهينة
shiry
فيس بوك
تويتر
انستقرام
يوتيوب
بنتيريست