دعواتكم لزميلنا المفكر د.الباقر العفيف بالشفاء العاجل
|
|
 ملــكة جمــال العــالم
|
خلاص ...نويت.... اخلي بنتي فوفو ...ملكة جمال العالم لعام 2025..... الوفت داك حيكون عمرا 23 سنة...نويت اسعاها من حسي... عشان تكون... طويلة... معصعصة.. تمشي ملولوه.... ما تعرف قلبتا من عدلتا....اولك بالتبادي... ن يوم الليلة..... حاوقف منها الطحنية...والحلاوة....وحارقدا علي بطنا...عاوزا تتعلم لغات....واول شي جاري "محسن" الدنقلاوي امو جات زيارة... اخليها تمشي تاخد كورس عندهم....وتحت يد امو...اول لغة حتتعلما....لكن برضو عشان ما تصوط العربي العارفاهو..... نعملها مراجعة يومية في البيت...
لابد من المراجعة الجمالية ليها.... لماتبكي قاعدة تفتح خشما للاخر.....ودي حاجة يتساعد في انو الخشم حيكون كبير...وبعدين ما من الاتوكيت تبكي وهي فاتحة خشما....حنمرنا علي انهاتبكي وخشمامقفول.... او مفتوح ضلفة واحدة.. البزة واللهاية من عوامل كبر الشلاليف... ما حنحرما من البزة لكن لما تجي ترضع ندخل الشلاليف جوا الخشم في الاول وبسرعة نلحقا البزة...ولازم الرضاعة تكون تحت اشراف الضاقم كلو انا وامها واخواتا.. عشان كلو ما شلوفة تجي ناطة واحد فينا يدفسا جوا تاني..الحقيقة هي مشاكلها الجمالية كتيرة... لكن كلو مع الاصرار...حيكون تمام....نخرينا مفرجخات اكتر من اللازم.... نحاول بالعلاج الطبيعي نرجعن شوية ونصغرن..... بي مشبك هدوم... نجيبو نجمع فتحتين النخرة على بعض ونربطن بالمشبك... لمدة خمستاشر دقيقة كل يوم....لمدة عشرين سنة... لانو لو غفلنا منهن يوم واحد يبتقن تاني ويقومن...برضو الضحك بتاعها ما مضبوط...لما تضحك.. بتضرب كراعا بالواطا وتمد لسانا....برضو نحاول مع الطاقم... نسيطر على الكراع لانو ضرب كراع واحدة بالواطة يدي فرصة للكراع دي تكون كبيرة والتانية اضغر منها شوية...بالاضافة لانو العادة دي كعبة ما معقول اثناء العرض لاختيار الملكة تقوم تضحك وتضرب كراعا بالواطا واللسان برضو لما يتمدا كتير حيطول..وبرضو ما ممكن تقيف قدام اللجنة وتضحك وتمد لهم لسانا ....طبعا مع التمارين وبمرور الوقت المسعلة دي حتروح..
الرقاد بتاعها يكون تحت المراقبة.... ما نخليها تتكرفس كلو كلو... عشان القوام يكون ممشوق ...وما تطلع لنا ملولوه ومعفصة...كل ما تكرفس كرعيها نجرهن راجعات...ونمطهن...
يعني كدي لما تصل عمر ال23 سنة حتكون في غاية الرشاقة......والاوتوكيت......وندخل بها مسابقة ملكات جمال العالم وانا متوكد حتفوز......بس لبس المايوه....ما معانا
|
|
 
|
|
|
|
|
|
|
 Re: ملــكة جمــال العــالم (Re: Adrob wad Elkhatib)
|
سيجمـــــان
ازيك وأخبارك لكن بينى وبينك انتا نسيت أهم حاجة
بالمناسبة الجمعة الفاتت واحد ادروباى حلق بالطلاق الا اقرأ ليه (حمام القاش وين يا منقة ) بأعلى صوتى فى المواصلات من الجريدة بحجة انو ما بقدر يقراهو لانو عينو تعبانة ...المصيبة خنجرو ظاهر من على بعد كيلو ...... الله يسترك دينا واخرى يا سيجمان
مرة أخرى تحياتى
ناجـــــــى
| |
|
|
|
|
|
|
|
|
|
Re: ملــكة جمــال العــالم (Re: سجيمان)
|
يا ناجي.. بالله إنت بي جاي.. شايفاك كاتب لي في البوست بتاع ناس هوزان .. لكن والله ياخ ما لحقت أرد.. وبعداك ضاع نمي.. عن إذنك يا دكتور نسلّم على الزول ده..
بنت الحسين
| |
|
|
|
|
|
|
|
|
 Re: ملــكة جمــال العــالم (Re: مريم بنت الحسين)
|
| Quote: الرقاد بتاعها يكون تحت المراقبة.... ما نخليها تتكرفس كلو كلو... عشان القوام يكون ممشوق ...وما تطلع لنا ملولوه ومعفصة...كل ما تكرفس كرعيها نجرهن راجعات...ونمطهن... |
سجيمان...يا اخوي....اه يازوول الكريعات المساويك ديل بتعمل ليهم شينو
| |
|
|
|
|
|
|
|
|
 Re: ملــكة جمــال العــالم (Re: سجيمان)
|
لانو لو غفلنا منهن يوم واحد يبتقن تاني ويقومن...
لكن دي يا سجيمان اخوي حبايب البي بعرفوها ليك بعرفوك مزور
وثانيا الولد البعلمون الرقيص بتخليها ترقص معاهو
والبنطلون الضيق والصرة البره والعجب لو جابوها ليك نايمه والناس كلهم شايفنها نايمه ناس البلد بيشيلو حسك ساكت ازول
| |
|
|
|
|
|
|
|
|
|
Re: ملــكة جمــال العــالم (Re: abas)
|
سي جي
(بس لبس المايوه....ما معانا )
بدون مايوه ما حيقبلوها ليك تدخل المسابقة .. عشان كدة ممكن تلبسو من فوق للهدوم الحشمة و يا دار ما دخلك شر
| |
|
|
|
|
|
|
|
|
|
Re: ملــكة جمــال العــالم (Re: abas)
|
عباس
| Quote: وثانيا الولد البعلمون الرقيص بتخليها ترقص معاهو |
لا لا ابدا.....يعلم اخوها واخوها يجي يعلما الرقيص...نحن برضو ناس مفتحين يا فردة
| |
|
|
|
|
|
|
|
|
|
Re: ملــكة جمــال العــالم (Re: سجيمان)
|
سجيمان
سلام والله فوفو دى جننتها جن
بعدين للوقت داك يمكن يغيروا الشروط وبنيتك تكون ملولوه ومكعوجه وتتمقلب ما تلقى ليها عريس لانو الموضه الجايه حتكون البنات الماليات عودهن
لكن افكارك جميله للغايه وياقراء جريدة الاضواء جاكم بلا وتتصور الجريده لو مشيت الساعه 10 ما بتلقاها تفتكر لييييه؟؟
تحياتى لك ولفوفو وام فوفو واخوات فوفو وبزز فوفو
ام الاء
| |
|
|
|
|
|
|
|
|
|
Re: ملــكة جمــال العــالم (Re: Teeta)
|
ام الاء
| Quote: سلام والله فوفو دى جننتها جن |
دي تجنن بلد بي حالا.....
Quote: لكن افكارك جميله للغايه وياقراء جريدة الاضواء جاكم بلا وتتصور الجريده لو مشيت الساعه 10 ما بتلقاها تفتكر لييييه؟؟
|
جريدة اضواء قاعدة تخلص قالو يوم التلاتاء....عشان صفحة بروفسر معز عمر بخيت....لكن حسي برضو بقت تكمل عشاني ....هيع
| |
|
|
|
|
|
|
|
|
|
Re: ملــكة جمــال العــالم (Re: سجيمان)
|
| Quote: دي شنو دي يا ربي؟....ان بقت الفي بالي ما نسيتا....علا داير ابقى خفيف علي المعدة |
تاني قمت للعوارة يا عمر أومو
ملكة جمال الأبوها سجيمان إلا تكون ملكة جمال بكسر الجيم
دا حين في سباق هجن
ألبل وردت عووك
جني
| |
|
|
|
|
|
|
|
|
|
Re: ملــكة جمــال العــالم (Re: سجيمان)
|
سجيمان ,,
أنت ما من جامعة الخرطوم و لاشنو ؟؟
Omar Omo ,,,
راجل مزحلق شوية(وقد كان طالبا فى السابق) كان لديه صولات و جولات فى الجامعة و مكتبتها العامة .....ولديه الكثير من القصص و الاحاجى الطريفة ....
| |
|
|
|
|
|
|
|
|
|
Re: ملــكة جمــال العــالم (Re: Outcast)
|
اوتكاست
| Quote: راجل مزحلق شوية(وقد كان طالبا فى السابق) كان لديه صولات و جولات فى الجامعة و مكتبتها العامة .....ولديه الكثير من القصص و الاحاجى الطريفة |
بعرفو.............بس حبيت اشاغل جني شوية
| |
|
|
|
|
|
|
|
|
|
Re: ملــكة جمــال العــالم (Re: سجيمان)
|
سجيمان
قلت لي سنة 2025 ملكة جمال العالم بمقاييس عشرين سنة للخلف
طيب الفكرة كويسة لكن خطتك متخلفة إنت أعمل العكس تماماً
لأنو صراحة أنا شايف إنا الحكاية ماشة هووووبة ساي
يعني قصة الطول دي حتبقى موضة قدييييمة والغنية بتعت فريع البان
دي حتختفي أمسك في ( يا قصير يا محيرني ومتحير من حسع ) يعني كرفسها وموضوع المكوة ده خليهو لأنو الكرفسة أكيد حتكون موضة GL
بعدين ياخي توقف الطحنية توقفها كيف دي أهم حاجة وخاصة مع الطول القصير ( خلي بالك في الطول القصير دي ) وأنصحك تخلط الطحنية دي بي حاجة بقولولها (عفنة) شوفها عند العطار وشكلك كده حتمشي تفتشها لي نفسك يا سجمان لأنها خطيرة جداً في زيادة الوزن.
وبعدين الخشم الكبير مطلب أساسي يعني شوف أول ما فوفو تبكي شوف ليك عود ولا ملعقة وشبكها بين الفك الأعلى والأسفل عشان تقوي عضلات الخشم وبي كده حتصنع وجنات طبيعية قابلة للإزالة بعد إنتهاء المسابقة المعنية.
بالنسبة للشلوفة لازم تكون مربربة يعني تشوف ليك لستك قروش وكل يوم تكوم الشلوفة من جهة وتديها عقدة.
النخرة وما أدراك ما النخرة أوعك تقرب المشبك نهائياً على العكس كل يوم تحشيها قطن ودي بتساعد في إنو الخشم يكون مفتوح طوالي والمرحلة التانية بعد ما النخرة تكون اتوسعت شوية تشوف حبتين مكرونة من النوع التخين بتاع مصنع أمبدة وتغزّ كل واحد في نخرة طبعاً اخترنا المعكرونة لأن فيها فتحات بتساعد على التنفس
ولازم كل يوم تجضمها لأن الجضيم بساعد على ترطيب الخدود وهو بديل فعال للجلسرين في فترة الشتاء ويمنع من الشقيق كما أنه يساعد على المضغ الجيد للطعام وإخراج كل حرف من مخرجه الصحيح أثناء الحديث.
بالنسبة للكرعين حتكون مهمة جداً في المراحل النهائية وتقوم تعمل شنو تدخلها في كورس مع الكورس بتاع صديق أحمد ولا أرقي ولا أقول ليك دخلها معسكر صفا و إنتباه ولا بقولو شنو هم المهم تضرب الأرض برجليها الاثنين وإذا ما عندك إمكانيات تخليها تنطط كل يوم مدة ثلاثة دقائق وهذا يساعد على توازن الكراعين وهذا يفي بالغرض.
بعدين خلي البت تاخد راحتها في الرقاد ولما ترقد مع أخواتها لازم تخلي كراعها في رقبة يد التاني وبطنها في ضهر وش التاني فهمت الحتة دي كويس (أنصحك راجعها تاني ).
وأوعدك إنو الوقت داك ما حيكون في مايوه خالس ..خالس
| |
|
|
|
|
|
|
| |
سجيمان
مريم بنت الحسين
Adrob wad Elkhatib
تولوس
abas
ابو جهينة
jini
Outcast
ابو يسرا
فيس بوك
تويتر
انستقرام
يوتيوب
بنتيريست