فازت الغنماية " عنيفة" بي لقب ملكة جمال المعزا في مسابقة ملكا جمال الغنم في السعودية....وكانت في غاية الاناقة والجمال..... غنماية شامية.. يعني جاية من سوريا....اوصافها.... طويله ..خشمها معكوف...سنونها التحت.... يلمعن زي بريق العينا.. لملمي السحابة وخلي المطر يجينا...ممدودة اللسان تحاول دايما تجرو لي جوا وما بتقدر..... عيونها بندقيتان.....ان شاء الله اتقلب تيس شامي لو عارف بندقيتان يعني شنو؟.... لكن في واحد جنبي قاعد قال كدي....والله انا جني وجن البنادق والكبسيبة....لها نهدان كاعبان بالرغم من انو صاحبها قال ولدت مرتين......لكن الله اعلم ما كانت قاعدة ترضع.. حفاظا عل رشاقتها...ممتلئية الارداف...حتى يكاد الضنب ان يروح في حق الله.... الضمير زي صيد القلع...تمشي ولا تسمع لها كشتة....من الله خلقا ولي حسي ما اكلت ورق جرايد....ولا اكياس نايلون..ولا اكياس مخدات ولا قمصان معلقة في حبل غسيل..... اتظكرت قميصي"تحرمني منك"..دا اسمو..... اتظكرتو وكيف جات غنماية ناس عمر دهب..وشالتو من الحبل وجرت....وانا شفتها وساكية نهار كامل.. عشان اقلع منها القميص... القميص الحاجة الوحيدة الكنت بلبسها عشان امشي احب بنوت المدارس.. في النهاية طلعت بي يد قميص بس....واثقة من نفسها" الوصف ما زال لملكة جمال الماعز".... تعاين لي لجنة التحكيم في عيونهم....فازت في مسابقة ضمت متسابقات من ماعز السعودية والكويت....وكانت هي الاولى..... عزمني واحد صاحبي من البادية..... راجل كريم.. مضياف... عيبو الوحيد انو عندو سخل عمرو اربعة شهور.... مدلعو.. سخل مدلع حد الدلع ما يقيف لو حد...قعدت انا معاهو وجا السخل.... ماشي علي.. وصاحبي يعاينلو ومبسوط... قال لي سجيمان خلي بالك السخل دا محترم جدا... امو شامية وابوهو شامي..... اصيل ما فيهو نضم.... السخل جا ماشي علي وانا مادي كراعي في الواطا..... السخل يمسك اصبع كراعي الشمال الكبير ويقعد يرضع...وما بقدر انهرو.... غايتو خليتو يرضع في رضاعتو وبقيت اتونس.... السخل بقى يناتك في الاصبع ويرضع واداني ضهرو وقعد يهز في ضنبو.....والله يا جماعة ما طالبني حليفة.... انا قلت الاصبع دا حسيع دي يجيب لبن....انتهى من الاضبع.. طلع اخد لو قعدة فوق حجري....شوية كدي قبل علي.....وشال كرعيهو القدام وختاهن فوق اكتافي كل كراع في كتف..... وبقى يلحس في وشي..... بصورة منتظمة من فوق لي تحت.....وانا غايتو فوضت امري لله وغمت عيوني وخليتو يلحس في لحسيبتو....وصاحبو.. صاحب السخيل ابدا ماسعلو ولا قالو تلت التلاتة كم ولا انت بتسوي في شنو؟...بالعكس مبسوط ويقرقر لمن عيونو دمعن من الضحك والبسط والكيف....السخيل يلحس ونزل علي النخرة لحسا...ونزل علي الشلاليف... ونزل علي الرقبة.. وبقى يلحس..... انا هنا صراحة اللحس كلكلني... وبقيت اضحك....وسيد السخل ضحك... لسوء حظي كنت لابس لي قميص فيهو زرارتين مفكوكات.... السخيل ينزل من الرقبة ويمشي علي السدر...وانا النوع الربنا مديهو بسطة في شعر السدر....يقعد السخيل بعد ما يلحس... يمعط في الشعر ويمدغ..... غايتو بالميت كدي يكون ماكل لو فدان شعر من سدري...والمصيبة السخيل ماشي لي تحت...وقت حسيت انو الحكاية ماشة في نضمن اخر..... انفض السخيل مني واجدعو هنوووك....وصاحبي يزعل لكن تاني اتظكر اني ضيف....قال لي السخل دا حنين ومحترم وبحب الناس.... وعادة اللحس واكل الشعر دي عادة عندو من صغير.... وابدا ما قاعد يميزّ ضكر من انتاية.. الي يلم فيهو كلو يقعد يلحس وان لقى لو طرف في شعر بي ياكلو والغريبة ما يريد علا الشعر الفي بكانات غميسة........قلت لو وانا مارق وزعلان.... يا زول انا هين لكن سخلك دا اوعى يدخل علي العوين ديل...... يقوم يسوي متل سواتو دي....... انا ما خايف عليهو انا خايف علي العوين تقوم انت تضبح السخل... ويبقن هن اتعودن ........
سيجمان انا هنا صراحة اللحس كلكلني... وبقيت اضحك....وسيد السخل ضحك... وانا ذاتى بضحك بس والله متخيل الموقف وذى ما قال عادل امام انا يطلعى اسد بس انت حظك سخل تحياتى
09-25-2005, 04:57 AM
سجيمان سجيمان
تاريخ التسجيل: 10-03-2002
مجموع المشاركات: 14875
والله يا سجمو قصة ملكة جمال الغنم دي اليوم دتك قاعدين نحضر في الاخيار في الغربية الفارغة الشغالة بي اخبار السعودية الفارغة قعدن نضحك انا والحماعة وفكرت اكتب عنها لكن انت ما بتقصر الحمد لله لكن صدقني اتذكرت غنمايتنا كريت الكان مغلياني في الرعية كانت سمحة سماح لكن كل يوم كانت رايحة مني اقوم الف الحلة افنش فيها وطبها كان ما لقيته مافي لي دخله للبيت المصيبة الجائزة 25000 الف ريال حليلنا منها
Quote: وفكرت اكتب عنها لكن انت ما بتقصر الحمد لله لكن صدقني اتذكرت غنمايتنا كريت الكان مغلياني في الرعية كانت سمحة سماح لكن كل يوم كانت رايحة مني اقوم الف الحلة افنش فيها وطبها كان ما لقيته مافي لي دخله للبيت
تعرف يا دكتور...... غنمايتكم كريت دي... لو جبتها المسابقة..... احتمال كبير كان تفوز.....وترجع انت تاني اجازة
09-27-2005, 12:48 PM
عبد الباقي الجيلي عبد الباقي الجيلي
تاريخ التسجيل: 06-23-2004
مجموع المشاركات: 1613
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سجيمان
عبد الله عقيد
بلدى يا حبوب
فيصل نوبي
المسافر
ابو جهينة
albagir altahir
عبد الباقي الجيلي
mamkouna
Siddig A. Omer
فيس بوك
تويتر
انستقرام
يوتيوب
بنتيريست