دعواتكم لزميلنا المفكر د.الباقر العفيف بالشفاء العاجل
|
|
 مــراحل تطور الزواج.....تجربة شخصيــة
|
الزواج...تجيب لك زول تقعد تصاقرو ويصاقرك عمرك كلو.....وتجيبو ناس يبقو لك في رقبتك لحدي ما تموت......الواحد اول ما يكبر ويحس انو بقى زول كبير يفكر في العرس......يقعد يحوم ويكوس... لحدي ما يعرس.....اول شي يفكر فيهو العريس او العروس... انو يظهر بصورة سمحة قدام شريكو.......انا خاصة نفسي.... كنت بدس السفة من ام الخير..... ولما اسف بسف تحت الشلوفة الفوق....ولما اضحك وانا سافي سقافي..... بمد شلوفتي الفوق قدر ما اقدر...عشان ادس السفة.....وافتح خشمي واضحك.... منظري كان شين انا متاكد.... لكن ام الخير لي حسي ما قالت لي لما تضحك وانت سافي فوق يسكو بك الوليدات....كنت وانا عريس قاعد احاول اخفف دمي واضحّك عروسي..... وان شاء الله ربنا يغفر لي غايتو السويتا بها تدخلا هي الجنة.... غايتو بنيت الناس.. مرضتها مرض شديد.... اقعد انكت والنكتة باااااااايخة.... ام الخير الله بيسعلني تضحك لمن دموعها يجرن...... مسكينة تسوي كيفن؟ تضحك تجامل..... ودا راجلا الربنا قسمو ليها.......وهي برضها ما قصرت.... تصحا من النوم بدري....وتحضر لي الشاي وشربات الليمون..... ملحوظة لي من شربات الليمون من الصباح عشرة سنوات وتلاتة شهور وخمسة ايام وتلاتين دقيقة واظني تاني فارقتها فراق الطريفي لي جملو.........وتقابلني وهي مبتسمة.......
العروس دايما تحاول توري انها حنينة ورقيقة.......مشينا السينبا...دخلنا فلم هندي اسمو من اجل ابنائي....ام الخير مرقت من السينبا وهي تبكي....رجعنا البيت برضو تبكي..... قدر ما حنست...وقدر ما قلت لها الخرابة دا تمسيل وكضب... كضب الله يكسرني كضب.... ابدا..... خمستاشر صباح وانتي يا ام الخير حلفتي ما تسكتي.....يا الله ويا امين سكتت بعد دخلنا فلم تاني كايبوي....كلو دقش......الفلم الكايبوي كضما كضمت عدوك.....نان تاني بكت؟
اجي من الشغل.... تقابلني عن خشم الباب مسيكينة فاتحة خشما تضحك......وان ساكت قلت راسي موجعني.... تقعد عن راسي وتقرا...... غايتو ما بعرفا بتقرا في شنو....لكن وجع الراس قاعد يروح.....تكون يا ربي قاعدة تقرا لي دعاية الكافينول عن راسي؟.....
وبعدين ما كانت بترضى من زول يطراني ساكت..ولاّ يقول فيني شي...... اختها جاتنا مرة وشافتني وانا نايم......سمعتها تقول لام الخير ......والله يا ام الخير سجيمان يا شناتو وهو نايم علا فيهو....ام الخير اتحرقت..وحاربت اختا علا جات امها صالحتن....كلو عشاني........النصيحة لك يا الله انا نومتي شينة.....
جبنا جنانا الاولاني...... الاهتمام قلّ.... بقت ام الخير مقابلة البنية...... وتنضم معاها....وانا انا داير لي شي.... تاشر بايدا وتقول لي...هنوووووووووك.....وهي تسوي لي بنيتها ..كدي..كدي كبرت...كدي كدي...نضمت...كدي كدي ضحكت...كدي كدي غمدت.....وانا نص ساعة اكوس للشي الدايرا.....وام الخير مع معلقة كدي كدي...
الوليدات زادو......وانا بقيت زول يدخل ويمرق.....وياكل....وان قلت نكتة... مافي زول يهببو لي.....لمن ادخل في ضفوري....وان جيت من الشغل...... يقولو للبنت يا بنت امشي شوفي ابوكي جا؟....والبنت تجي تتاوق لي....ولما تشوفني..تمشي تحدس امها...... وام الخير تقول لها...بسم الله متين جا؟.... غايتو ابوكي دا يحير ؟؟؟؟؟؟........يتلبد ويدخل براااااااحة زي الضُل..... غايتو جنس حالة؟؟؟؟؟؟
|
|
 
|
|
|
|
|
|
|
 Re: مــراحل تطور الزواج.....تجربة شخصيــة (Re: سجيمان)
|
و الله يا سجيمان ياخوي صدقت بالحيل
و الحمد لله انك بعد عشرة سنين نسيت عصير الليمون براهو
و ما قالت ليك انت اتاريك يا سجيمان احوص و انا ما عارفه
بس لو عاوز تعمل نص عمرة لمكينة الزواج جيب طاري العرس
و شوية اهتمام بنفسك و شوف النتيجة
| |
|
|
|
|
|
|
|
|
|
Re: مــراحل تطور الزواج.....تجربة شخصيــة (Re: سجيمان)
|
...... بس ..... لقيتها...... اها انا دي الوقت عرفته السبب في خفت الدم والكلام البيجيب كل الناس وخاصتا اللطيف ... ما تقولي يا خي انته بتفكر في التانيه ... لكن اعمل حسابك كله كده يعني مرحلي ............. بيبداء بالعسل وبينتهي .... حسب ظرف الزمان والمكان .... قال شربات ليمون قال ... ارجي رمضان اهو قرب
| |
|
|
|
|
|
|
|
|
 Re: مــراحل تطور الزواج.....تجربة شخصيــة (Re: سجيمان)
|
سيجمان
الله يديك العافيه والله برافو عليك بس تعرف انته كويس واحسن من الزول القالوا كان بدس السفه تحت الشلوفه الفوق وكمان معاه تصليحة من اليوم الاول للزواج وبعد شعهر قالوا صاحبنا دردم سقته وهاك بمزاج فى الشلوفه التحت المهم زوجته شافته وقالت ليه معقول انته بسف صعود وانا ماعارفك على طول الزول قال ليها (تعرفى انا بسف صعود وكمان بطلق )
تحياتى
| |
|
|
|
|
|
|
| |
سجيمان
خالد
falcon
nour tawir
تولوس
willeim andrea
عثمان عووضة
بنت الاحفاد 2001
بلدى يا حبوب
فيس بوك
تويتر
انستقرام
يوتيوب
بنتيريست