تعاطفا مع كل اهل الشواكيش....والمشوكشين والمشوكشات..وبما انني من قدامى اهل الشوكيش...وعشان ما كل مرة يجي واحد ...ولاّ...واحدة تحكي قصة شاكوشها او شاكوشو ...وانا اقعداتمحن معاهو وعيوني يرقرقن واقعد اقشقش في دميعاتي... انا قررت جاد اعمل مجلة شواكيش.. المجلة حتكون عبارة عن تحذيرات واعلانات دورية....يعني كل خمستاشر يوم....عن اخطر المشوكشاتيه...والذين يلعبون بلقوب العذارى.....و الآئي يلعبن بقلوب العوارى من الجنس الخشن....
تحذير
نحذركن من المدعو كمال نيفيا...كمال نيفيا من عتاة المشوكشاتية.... اوصافو كالاتي بالاضافة الي الصورة.... طويل... رقيقوني... حليق الراس والشارب والدقن ..يمشي الهوينا كما يمشي الوجي الوحلُ.... متخصص في طالبات الجامعات.... الجايات من الاقاليم.... اماكن نشاطو...موقف باظات الخرطوم-كسلا-بروتسودان و بالعكس... يستطيع ان يحدد فريستو بكل دقة... اول ما تنزل من الباظ... تطوهم وتتلفت ...وتقطع شارع الزلط مبرطعة..وتملص نعلاتا..... لابسه اسكيرتي اخدر بلوزة حمرا..طرحة بنفسجية...مسرحا شعرا كلو لي ورا...ومخليه قُصة... نازلة على عيونا..قُصة ماركة ضنب الغنماية...غبشاء الساق والكاحل...عوجاء الركب ..عندما تلبس كعب عالي....على الاخوات القادمات على هذه الرحلة... ان يتنكرن...ويلبسن عراريق وسراويل اخوانن...امعانا في التنكر....وعشان يمقلبن ويطيرن ...كمال نيفيا ....طيرة حلوف من الجروف.....
تحذير
الي الرجال من عمر خمسة واربعين الي عمر...ستين..... اعملو حسابكم من المدعوة سعاد رصعة.....وايضا تسمى سعاد"عليك الله ما ماشي كدا؟"...ان سعاد رصعة مدمنة زواج عرفي...تزوجت الى الان من تسعة رجال وكلهم لي حسي في حبالا....والغريبة قادرة تقسم وقتها بينهم قسمة الحلال والبلال.....سميت سعاد رصعة.... لانها عندما تتبسط تب وتضحك تشيل ايدا وبكل قوتا ترصع اي زول ولاّ اي شي جنبها...والرصعة ممكن تجي في اي بكان انت وحظك ولطف ربنا.....حكي انها مرة كانت في زيارة لاحدى صديقاتها...وقعدت تتونس وبعد الانبساط.... قهقهت وقرقرت..ورصعت اقرب شي ليها...كان كلب ناس صاحبتا... اتخلع الكلب ونطّ فوقا وعضاها في جضما... وهي علامة مميزة لها الان...سعاد رصعة ممكن بكل بساطة تغشك وتعرسك عرفي...متخصصة في العربيات واصحابها.... فريستا يكون رجل كهلٌ..متجوهل...مصباغ الشعر... متحكنش علي كِبْر...والله يكفينا ويكفيكم شر حنكشة الكُبُر....
تحذير نحذر كل الباحثين عن الونسة...مع البنات..وتقضية وقت..ويفرتقو... نحذرهم من المدعوة اميرة لصقة.... اميرة لصقة... ذات فعالية التصاقية عالية.... تلحق تلصق فيك وتحبك..... تاني يحلك الحلا بله...ولو قلت ليها ازيك...خلاص الله قال بيقولك تحبك وتتشعبط فيك..وتقعد تطير منك باقي الجكس...وتباريك محل ما تقبل....وما عندك حل علا تطلب هجرة من البلد
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سجيمان
تولوس
abas
صديق الموج
فيس بوك
تويتر
انستقرام
يوتيوب
بنتيريست