سجيمان احسن زول يغُز كوعو.......على وجه البسيطة.... غز الكوع منتهى الفلهمة والقرضمة....ودائما لما ادور اتفلهم علي زول اقيف علي حيلي....واقدم كراع واخر التانية واغز كوعي.....وانداح فيهو.. لحدي ما يامنو ظاطو.....وما اديهو أي فرصة يفتح خشمو......واخليهو مندهش و مشرور وامشي اهلي....كان عندي اعتقاد انو غز الكوع نوع من الوسامة والاغراء للجنس الناعم....كنت ايام مغامراتي الغرامية اول ما اشوف واحدة جاية طوالي اقدم كراع واخر كراع واغز كوعي....واقعد ارمش واعاين لها...لكن في نوع من الجنس اللطيف لا لطيف ولا شيتين. يحدرني ويصر وشيهو ويقول لي المعولق دا....وللتاريخ وللامانة انا خلال فترة غرامياتي اتقال لي يا معولق متين تلاتة وخمسين مرة....اخر مرة كانت في عام1980... غزيت كوعي لي واحدة ورمشت عويناتي.... وما كان منها الا ان دنقرت ومسحت الواطا وكتبت لي عوااااااااااااااللللللللللليق كبيرة وواضحة وبالخط الكوفي... في النهاية عرفت انها كانت بكماء...... لي كمين يوم كدي..... قايمة علي فلهمة جديدة.... بقيت اكوس لي نضم الشعراء والادباء ....وافرتقو واطلع عيوبو كلها...... اصلا انا عندي حاسة شنافية واجنح الي شيل الحال من كنت صغير...... اصلو ما بقول لي زول انت شيتك دي سمحة.....اصلو.....وان في زول قال لي زول شيتك دي سمحة جنبي النيران تطلق فيني......واكجنهم الاتنين لمن يامنو ظاطو.. العندو الشي السمحة والقالو الشي دي سمحة.......... ان السغافة السودانية تمر بمنعطف خطير.....".يا قول ناس السياسة المالين البورد"...ولابد من منقذ لهذه السغافة......لقيت اني قدري قد كلفني بهذه المهمة الشاقة...... ان مسغفي النت....والدلوكة .....ودعاية مرقة جداد ماجي...هم خطر كبير ولابد من محاربتهم..........ناس يقعدو يشكرو في كواريك الزرازير....ويقولو لها شقشقة...وزغزغة...وما بعرفو شنو؟....كدي واحد فيهم يبقى صايم وراقد ومتغتي بملاية وراقد تحت نيمة وتجي زرازير تكوريك فوق راسو...وكل مرة تجيهو شي واقعة من فوق.... ان شكرا تاني لوموني....ولاّ يقعدو يدلعو في السُقدة ويقولو لها كيروان....السُقدة؟ السُقدة اللوم السوتو هين؟؟؟؟يوم موت الرسول اتكحلت واتمسحت واتمكيجت ومشت البِكا؟ دي دحين ب دلِعا؟.. وربنا جازاها قلب لها رومشا الكحلتن ديل شوك وكل ما تجي تغمد الشوك يطعنا وخلاها الليل كلو ماتغمد وتزوزي وتكورك...... اول زول بدا اللخبتة والسواطة حقت السغافة......المدعو ادريس جماع.... اكِنكم كدي عاينو لي بيت الشعر دا.....
قم يا طرير الشباب غني لنا...... غني
اكِنكم كدي شوفو كلمة "طرير".... هذه الكلمة الشتراء...... اكِنكم كدي اقسموها علي اتنين..... تبقى "طر".... و..."ير"........ امسكو القسم الاول"طر".....لنفرض جدلا انو في زول بيلقي في القصيدة دي وهو زول تمتام....وعلّق في كلمة "طر" دي....وقعد يسوي في ال"طر......طر.....طر....طر"........عليكم الله حسي دا نضم يقولوهو في مجتمع....ولاّ.... قدام رئيس الجمهورية ونائب رئيس الجمهورية والسادة الوزراء؟......يقيف واحد ويقعد يطرطر في وشيهم......باقي لكم بيمرق منها؟......
في واحد مسطول قال لي واحد تمتام قول تراكتور ، اها التمتام قام علق في ترا........ترا...... ترا المسطول زهج وقالو انا قلت ليك قول تراكتور ما قلت ليك دوروا. ولو في واحد تمتام عايز يقول سجيمان ، سج ...سج ... سج ..... سج دس مش شقشقة برضو ولا شنو ؟
10-27-2004, 10:34 AM
wadabdean wadabdean
تاريخ التسجيل: 08-23-2003
مجموع المشاركات: 117
سيجمان .. ازيك وكده على ذكر غز الكوع والبوع يقال انو فى واحد مطلش زيك كده قال يتفلهم ويغز كوعوا لاحلى بت فى الجامعة وهى متقرضمة وعاجباها روحا قدر ما حاول يلقا سكة معاها مافى سكة لا نفع غز الكوع ولا جر النور الطويل .. البت عندها عربية .. قام صاحبنا قبل ما تجى ركب فى الكبود القدام عشان بس تقول ليهو زح او انزل يا عواليق .. جات فتك فتك .. فتحت باب العربية ركبت ودورتها وقامت ضربت ليهو بورى عشان ينزل قرقرقر ودعابدين
10-28-2004, 05:39 AM
سجيمان سجيمان
تاريخ التسجيل: 10-03-2002
مجموع المشاركات: 14875
المطوفِش ... قٌت لي شنو .. (أبعة وابعين) .. يا شقي أها النقولك كمان: استخرج معكوس (طرير) وأقسمو على إتنين ! تحصل على (ري) ... أها أجدعها لي (تمتام) .. الله يرحمك يا خلف الله حمد !!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سجيمان
Raja
wadabdean
aboalkonfod
Dr. Moiz Bakhiet
محمد الامين احمد
فيس بوك
تويتر
انستقرام
يوتيوب
بنتيريست