|
|
 عصيــر الدليـــب......كيــــة لي فتحيــة
|
انا ما بلوم ناس التفلزيون.... انا بلوم ناس وزارة الاعلام..لي شنو الحقارة دي يا اخوانا....؟.... نحن يعني ما فينا ولازول بيشبة عصير المنقة؟.... يسو العصير عند اهلنا وفي الدعاية يجيبو السوريين يشربو فيهو...وفي تفلزيونا؟...ونحن نتفرج فيهم..اسرة سورية تشرب في عصير منقتنا وقدام عيونا... راجل ومرا ووليداتم....الشراب بالسوري والنضم بالسوري....وحتى المرا السورية خالفا كراعا بالسوري....نحن نسوانا البيعرفن لي خلف الكراع كتار..... وان ما قدرت تخلفا... اليخلفوها ليها ناس التفلزيون.... ويربطوهن علي بعض وبعد التصوير يفرتقو الكريعات من بعضن......اصلو عذر مافي....حسي عليكم الرسول زي سمية عبد اللطيف دي ان لحقت خلفت كراعا في دعايتكم دي وجغمت المنقة..... ما بتشرب لها صفيحتين حقات عصير؟...ان ختت الرحمن في قلوبا....ولاّّ بس عدم سعوال.. فينا؟.....
انا الفهمتو من دعاية عصير المنقةدا.... انو نحن قداديمنا دي ما قداديم عصير....... نحن نشيل المنقة بي حالا ونقعد نكد فيها....ونحلق ليها كويس....ووليداتنا.... يجيك الواحد مارق من اهلو نص النهار....والمنقة مسيلة فوق جضومو وعارقيهو وكرعيهو....ومتجربن كلو.....وشايل المنقة وجاري وتجي امو لافحا توبا وساكاهو في نص الشارع .... يا ولد عصام انت الله يقُصك ويفُصك.... ادخل....من الهجيرة دي......
خلاص عصير المنقة خليناهو ....وقت قالو مو شبهنااليسوى دعاية لي عصير الدليب....وحات الله بنشربو ليهم.........
ودعاية عصير الدليب ما دايرا اي امكانيات.... عنقريب في ضل الضحا....وصفيحة وكوز....وسمية عبد اللطيف وبلقيس عوض.....
يقعدن في العنقريب.... ويجغمن في عصير الدليب... كوزين كوزين..
بعد ما يتملن عصير دليب..... يقومن يردحن.... ويكشفن روسيهن.... ويخلن ايديهن في وضع حي ووووب......
قعاد ضل الضحى فوق العنقريب
وحلاتو جغيّم ... عصير الدليب
وكية لي فتحية
وكية لي فتحية
وكية لي فتحية
|
|
 
|
|
|
|
|
|
|
|
Re: عصيــر الدليـــب......كيــــة لي فتحيــة (Re: سجيمان)
|
Quote: ودعاية عصير الدليب ما دايرا اي امكانيات.... عنقريب في ضل الضحا....وصفيحة وكوز....وسمية عبد اللطيف وبلقيس عوض.....
|
سجيمان يا خوي ســـلام أول شـئ
كـلـمـة كــوز دي يا خــوي اليومين ديل لازم تعمل ليك هامش و تذكر فيه المعنى المقصود علشان كلمة كـوز دي اليومين ديل ليها وقع خاص في عيون أهـل البورد
و بعدين يا خـوي دا عصير دليب ولا مريسة بالصفيحة و بعدوا الردحي دا
بعدين سمية عبداللطيف و بلقيس عـوض عملن ليك شنو ؟؟؟ علشان تبهدلن كــدا
| |
|
|
|
|
|
|
|
|
 Re: عصيــر الدليـــب......كيــــة لي فتحيــة (Re: سجيمان)
|
الجنا المطوفِش ... سجيمان
"....نحن نسوانا البيعرفن لي خلف الكراع كتار..... وان ما قدرت تخلفا... اليخلفوها ليها ناس التفلزيون.... ويربطوهن علي بعض وبعد التصوير يفرتقو الكريعات من بعضن......اصلو عذر مافي....حسي عليكم الرسول زي سمية عبد اللطيف."
علي الطلاق .. التخلف رجلها .. عيلي ينادو ناس الطوارئ
يا زول ها ماك نصيح ..
مرة كلتومة بت عوج الدرب زوجة كرجوز الكمونية ..
حلفت باليدخلوها الكنيسة .. عيلي تلبس بنطلون
جينز وتي شيرت في عرس بت خالتها.. مسعول من الخير ..
حرم بقت زي جنازة البحر .. كِرنتية وطارحة جنا يومين
استغفرتك يا مالك روحي .. وتبت .. لمن جات الساعة واحدة
صباحاً .. وفي نص الحفلة .. سوت الصراخ والحي ووووب ..
الحلاها .. موسى الجزار ... سلخها متل البهيمة
ــــــــــــــــــــــ
لو في دعاية ألت مريسة ولا كنيو مورو .. مممكن أرشح ليك عدد
بس خايفن يزعلن
| |
|
|
|
|
|
|
|
|
|
Re: عصيــر الدليـــب......كيــــة لي فتحيــة (Re: سجيمان)
|
يا سجيمان يا حبوب
سلام بالكوم
الإنتاج التلفزيوني عندنا ما زال {جقلرة} و هي لفظة عند الموسيقيين المعهديين تعني غير علمي أو غير ممنهج, {و الله و بالله} طريقة إنتاج الإعلانات في تلفزيون السودان محزنة لدرجة تبكي...مافي طريقة ذاتو الواحد يحكي عنها....زي ما بقول جدي البلك {الوجع راااااقد}.
و كلمة أخيرة في سرك يا سجيمان
إنت بي طريقتك دي بتكتل ليك زول
| |
|
|
|
|
|
|
|
|
 Re: عصيــر الدليـــب......كيــــة لي فتحيــة (Re: سجيمان)
|
سيجمان
والله فكرة وبالمرة كمان يعملوا دعاية للمديدة والاقاشى اصلو البلد شوارعه بقت مليانة واظرف شى واحد كاتب على محله اقاشى الاحباب وبتاع مديدة كاتب مديدة الاشقاء .
لكن ما قلته لى الدعاية شكلها كيف طبعا ده اخراجك
تحياتى
| |
|
|
|
|
|
|
| |
سجيمان
المسافر
ABUHUSSEIN
aboalkonfod
abas
الطيب بشير
بلدى يا حبوب
Rawia
فيس بوك
تويتر
انستقرام
يوتيوب
بنتيريست