|
|
 خواطــر زول عنــدو نزلــة......
|
حاجتين قاعدات يطرطشني ويجهجهني في الدنيا دي.... الفلس والمرض....الفلس يخليني اكاتل ضُلي...واتمسخ علي أي زول...المرض... يشيّلني هم... واتكبّت بالبطاطين..واقعد اقنت... بطول حسي....واول ما اغمد عيوني وادور انوم....قدر ما عندي زول ميت بعرفو.... يجي ويقيف قدامي ويمد ايدو وداير يسلم علي.....لكن نان انتو قايلني قاعد امد ايدي لي زول فيهم؟.... هه..... يلقوها عند الغافل....والله دا انا ال بمد ايدي لي زول ميت اسلم عليهو عشان يكُرني معاهو....لكن اظنهم كشفو نومتي.... لانهم اخر مرة جوني.... اربعة من ناسي الميتين....اتنين مسكو الايدين واتنين مسكو الكرعين.... وهيلاهوب....يجدعوني.....وانا اصرخ بي طول حسي.... وتجي ام الخير جارية وتلقاني واقع من السرير....في واطة الله.... حنّت عليّ مسيكينة..وقعدت تتنهف وتبكي....قلت لها يا زوله احمدي ربك وما تبكي زغردي وبركة القليتنيني في الواطا... علي اليمين انا قايل نفسي في القيامة.......
النزلة اسغل مرض في الدنيا....دي ما فيها شك. وانا لمت فيني نزلة.... لكن اكتشفت انو النزلة.... اثرت في الحبال الصوتية....وصوتي بقى مكسور.. ابح.....اتبسطت غاية الانبساطة..... وقررت من باكر دي ابقى فنان..غناي.... اصلو ما بضيع الحس المكسور دا ساكت......وفكرت اسمي نفسي مجاراة لي اسامي الفنانين ناس حسين شندي وجلال الصحافة وحيدر بوتسودان.. قررت اسمي نفسي سجيمان عرعر
.. بقيت امشي اقفل الحمام عليّ واقعد اغني....ولقيت غنيت حمد الريح....البيقول فيها ما قوقن قوقن جنياتو..... احسن غنية ولافقة مع البحة....وخاصة الحتة بتاعت قوقن قوقن دي.....عصرت عليها وبقيت اقولها واكررها عشرة مرات...
اغفل ناس البيت وادخل الحمام واقعد اسوي في ما قوقن قوقن جنياتو...... البارح بعد ما جربت البحة حقت حسي في الحمام جيت مارق....والقي ام الخير ماسكة التلفون وتنضم مع امها في السودان.. وتقول لها والله الايام دي مرضان علينا سجيمان.....عندو نزلة السواد والرماد....واظنها طارت لو في راسو..... بقى اضانك طرشا.... يدخل الحمام ويقفلو عليهو بالساعات ويقعد يقوقي..........
|
|
 
|
|
|
|
|
|
|
|
Re: خواطــر زول عنــدو نزلــة...... (Re: سجيمان)
|
العزيز جدا سي جي
ألف سلامة عليك .. و أجر و عافية
لكن اظنهم كشفو نومتي.... لانهم اخر مرة جوني.... اربعة من ناسي الميتين....اتنين مسكو الايدين واتنين مسكو الكرعين.... وهيلاهوب....يجدعوني.....وانا اصرخ بي طول حسي
 
أكيد الأربعة ديل ما من أهلك .. ديل من الجماعة ديلاك .. عرفتهم ؟؟؟؟
| |
|
|
|
|
|
|
|
|
|
Re: خواطــر زول عنــدو نزلــة...... (Re: سجيمان)
|
CJ:علي وزنDJ
ده كلللللللللللو هييين اها اسة كان المغتربين عاملين حفلة بي مناسبة راس السنة في استراحة عاد يا اخوي الا تشيل معاك البانيوم للمسرح وتشغل الدش عشان تغني..
بعددين ما لقيت غير غوغن غوغن غوغن ؟؟؟ما كان خاتي المرحوم ابداؤود لمن قال :-
" والله غنا حمد الريح ده كان جبت لي نبلة بفرتق ليهو حفلتو دي كلللللللللها"
حمام الوادي - القمري فوق نخل الخميل- طير الرهو
واسة انت تميت الناقصة بي غوغن غوغن غوغن ...
بعدين ياسجمان ورمدان البتعمل البحة دي الكحة لكن العندك انت" نزلة والنزلة عزلة"
دي علي وزن " اللابسة طرحة والطرحة راحة "
نصيحة اخيرة :
سبب واحد يخليك عايش ماف وعندك اربعة من اهلك مافيشين !!! افقد الناس ديل واتطمن عليهم ياخ !!!!"
| |
|
|
|
|
|
|
|
|
 Re: خواطــر زول عنــدو نزلــة...... (Re: سجيمان)
|
الجنا المطوفِش .. سجيمان .. الله يودر محنك
Quote:
اغفل ناس البيت وادخل الحمام واقعد اسوي في ما قوقن قوقن جنياتو......
|
وتقعد أم الخير ... تكورك بي هناك .. القماري قوقن يا يومة
Quote:
وفكرت اسمي نفسي مجاراة لي اسامي الفنانين ناس حسين شندي وجلال الصحافة وحيدر بوتسودان.. قررت اسمي نفسي سجيمان عرعر
|
وحات نضري .. ابيلقبوك .. العُرة أب قوقاين تخين .. متل الودك
Quote:
....وخاصة الحتة بتاعت قوقن قوقن دي.....عصرت عليها وبقيت اقولها واكررها عشرة مرات...
|
القوقاية نمرة واحد .. باقيلك بنفس قوقاية عشرة .. وحات عُشرتك جنا ود ستونا
كان لمن يقوقي .. يطير الدباس من راس التمر
| |
|
|
|
|
|
|
|
|
|
Re: خواطــر زول عنــدو نزلــة...... (Re: سجيمان)
|
أخي الدكتور سجيمان
ألف حمداً لله على سلامتك ، وبعد الشر عليك - الشر بمعناه القريب والبعيد - الحسي والمعنوي. وبرضو راجع ليك بس ما تعطس لينا في البوست ده تجيب جلي وأجل جداداتي وديك العده.
| |
|
|
|
|
|
|
|
|
|
Re: خواطــر زول عنــدو نزلــة...... (Re: سجيمان)
|
الدكتور/سجيمان
تحياتي
نشكرك علي اتاحة الفرصة للضحك والانبساطة..دخلنا قلنا نهببو ليك ونتشكرلك..وكمان نحكيلك حكاية حصلت جد جد...ايام كنا طلبة في الجامعة اصبحنا الصباح لقينا اخونا ج.م.س كوعو مبروطة او قول مزلوطة زلطة عدوك...والراجل نام كويس ما عليهو حاجة..اتحيرنا...لمن قال لينا واحد ياجماعة يمشي معاي الكلنك...قلنا يمكن الراجل وقع من الدبل بد..ولا جو الكيزان ادو علقة...وهو بالمناسبة زولن مسيكين الغنماية تاكل عشا...ومن الامتحانات بخاف خوف الجهلا ...تجيهو حمة بي بردها ..تشبه حمتك الجاتك زمان ديك...المهم في النهاية الراجل قال امبارح حلمت حلمن عجيب ...احلم في المنام ابوي جاني ومدا لي ايدو ومديت ليهو ايدي ..وايدي في ايدو ..اتذكرت انو ابوي دا ميت ..وقلت كدي وكوركت فيهو...فك ياخ ..ونتلت ايدي بقوتي كلها ..لامن الحيطة برطتني البرطة اياها..
بالمناسبة الليلة ...مالك غيرت اللون
ليك المودة
سيف الدولة احمد خليل
| |
|
|
|
|
|
|
|
|
|
Re: خواطــر زول عنــدو نزلــة...... (Re: democracy)
|
يا سجيمان انا النزلة دي بدور تودرني في لندت عليك امان الله ضربو لي العربية ام صفارات انا قت خلاس الحكاية تمت علا زول يبكي علي مافي نسوان لندن فيهن واحدة بتعرف السكلي ولا الحي وب الله يقطعن
| |
|
|
|
|
|
|
|
|
|
Re: خواطــر زول عنــدو نزلــة...... (Re: saif massad ali)
|
سيف مساعد علي
| Quote: يا سجيمان انا النزلة دي بدور تودرني في لندت عليك امان الله ضربو لي العربية ام صفارات انا قت خلاس الحكاية تمت علا زول يبكي علي مافي نسوان لندن فيهن واحدة بتعرف السكلي ولا الحي وب الله يقطعن |
سلامتك والله
لكن كانن نسوان السيرة بي يقصرن معاك
| |
|
|
|
|
|
|
|
|
|
taslam inta (Re: سجيمان)
|
Dear CjMan.taslam inta ya seed alnas w inshalla ma tageek 3awaja.Do you know you have been the only person who can made me laugh just by reading your words.keep up the high spirit.
| |
|
|
|
|
|
|
|
|
|
Re: taslam inta (Re: Ibtihal Elshikh)
|
ابتهال الشيخ
| Quote: Dear CjMan.taslam inta ya seed alnas w inshalla ma tageek 3awaja. |
تسلمي انتي يا ست البنيّات لي حدهن......من نمولي لي حلفا وبالعكس
| |
|
|
|
|
|
|
|
|
|
Re: خواطــر زول عنــدو نزلــة...... (Re: سجيمان)
|
سلامتك يا السجيمــان
وكلهــم كرامتك, أول ما حدســوني جــريت علي الدكتور الجــمبــنــا طــوالي وقــال دواك عنــدو بس عــبــي ليــهــو الروشــته التحـــت دي بكـــل صــراحـــه وخــليــك كدي من موضــوع الغـــنــي الجـــاك متـــأخــر ده
عــشــان نشـــوفــك متــألق تـــانــي
محمد علي
| |
|
|
|
|
|
|
|
|
 Re: خواطــر زول عنــدو نزلــة...... (Re: سجيمان)
|
ها سجيمان
انت قايل النزله دي حقتك براك يمين عامله مع اخوك كونترات تحلف كل خميس لازم تخرب علي الويك إيند كل خميس وجمعه العيون محمره والدموع دافره والله يسلمك من العتيش اتشه اتششه اتشششششه اتششششششششششششششه حتى ناس البيت بقوا ما شايلني معاهم خميس جمعة انا تبعهم فقط في بقية الاسبوع وانشاء الله النزله لجون قرنق !!!
| |
|
|
|
|
|
|
|
|
|
Re: خواطــر زول عنــدو نزلــة...... (Re: سجيمان)
|
سيجيمان تحياتى ،
عليك الله يا سيجيمان تانى أشرب الكركدى كل يوم فحال لا تمرض علينا وتمسخ علينا الأكل عشان بيكون ما فيه كسترد ....
وخلى أم الخير تبخرك بالقرض لامن تعرق حتين تخليك . وتبل لك حبات مشرق فى اللبن تكتحن وتنوم وتانى النزلى ماب تشوفك تب .
عيلى عليك الله هبش شيويي فى الآلام الوطنية وهجعة الناس الشقيي وفك رقابهم من ايدى الماسك القضيي !!!
والسلام ومنتظرين .
ست البنات .
| |
|
|
|
|
|
|
|
|
 كفــــــارة (Re: سجيمان)
|
عزيزنا د. عادل
ألف ألف كفارة وسلامة ليك والبورد كله كرامتك
(ده بيني وبينك ما تكلم زول)
والله انا وصف الدكاترة بتاعكم ده ما بعرفو لكن بديك وصف حبوبتي
لي علاج النزله وعليك بيهوك
مشروب اسمه الجامعة مكون من سبعة (كليات) مكونات نباتيه هي:
1- كركدي
2- قرض
3- أم قليقلة
4- جنزبيل
5- قرفة
6- قرنجال
7- قرنفل
التجهيز:
كما الشاي والسكر يضاف حسب المزاج ( والحالة الصحية)
وكان ما بقيت كويس (بإذن الله) تعال أسألني
إسماعيل
| |
|
|
|
|
|
|
|
|
 Re: خواطــر زول عنــدو نزلــة...... (Re: سجيمان)
|
دكتور عادل الظريف ... غايتو زي ظرافتك دي ما قابلتني تـــــــــــب ... وعلشان كده انا مصر علي راي الزمان انتي لما تكون طالع بتكون راكب الفيل ولما تجيك النزله بتنزل من الفيل وفي الاثنين خطير يا دكتور الله يستر من الجايه ... وياربي حتعمل شنو في حكاية تشفير النيل الازرق ما تقول لي حتشترك اها البيضمن ليك شنو ..... انو حيجيبو الحاجات الحلوه الفي بالك والجابت ليك النزله اها بعد ما تدفع الاشتراك وتلقي الحكايه كلها قوقن وقوقن وقوقن
| |
|
|
|
|
|
|
|
|
|
Re: خواطــر زول عنــدو نزلــة...... (Re: willeim andrea)
|
الزول السمح ود الحنان
المو سجيمان ولو خمجان
سلاااااامتك يابا .. ان شاء الله لى عدونك ..
اجر وعااااافيه ان شاء الله
لكن يعلم الله ضحكت ضحكه كده بى دميعاتها ..
لوووووووووول ود/ بيان ما قصرت تمت الناقصه
سلامتكم الاتنين والله ..و الف سلامه عليكم ..
وتبروااااا يا يمه..
| |
|
|
|
|
|
|
|
|
|
Re: خواطــر زول عنــدو نزلــة...... (Re: soma)
|
يا أخي/ سيجمان
| Quote: واظنها طارت لو في راسو..... |
نزلة أنثى البعوض
(أنوفلس)
أقع قرض قرض قرض
ما عليك
أمضغ مضغ
وأتخيل إنك ماكل نيم
قالو متألم شوية يا أخي بعد الشر عليك
عبدالرازق عيسى الطالب
| |
|
|
|
|
|
|
|
|
|
Re: خواطــر زول عنــدو نزلــة...... (Re: سجيمان)
|
كفارة ليك يازول .. المرض ما كتلو زول
تعرف يا سجومى لو ضربت لى تلفون أو حتى مس كول قبال ما البحة و إنكسارة الصوط تتلحس .. أكان رسلت ليك حميدو جارنا .. ماكانيكى شاطر و أيدو لاحقة .. أكان قرط ليك البحة قريطة جماعة الزرقاوى ما يحلوها.. و تجينا تقوقى قوقاية ندى القلعة ما تقوقيها
لى قوق
| |
|
|
|
|
|
|
| |
سجيمان
bayan
ابو جهينة
azhary taha
abas
مريم بنت الحسين
alfatih
saif massad ali
Raja
zola123
بلدى يا حبوب
حبيب نورة
Mohamed Elbashir
luai
Safa Fagiri
Salah Abuhigill
ست البنات
Ismaeil H. Mohamed
willeim andrea
A.Razek Althalib
Rawia
فيس بوك
تويتر
انستقرام
يوتيوب
بنتيريست