|
|
 الي التي رســلت ليّ خطــاب غـــرامي.......
|
اخير لك تطلقي دربي
والله الحق انشبك فيكي تاني يحلك الله مني
انتي قايلاني .... بريدك واقعدساكت؟....اريدك واخت الخمسة فوق الاتنين؟ واقعد اعاين لك؟
لا
لا
يا اختي دي تلقيها عند الغافل
..................
ريدي كعب..... النوع الصمغي..... ان لصق فيكي تاني جالون جاز ما يمرقو منك
ريدي النوع العوير.....ريدي شـِبكة.....يتشعلق فيكي....
ومحل ما تمشي تلقيني غازي كوعي وواقف قدامك.....
وانتي قايلا شنو؟...... انا كمان النوع القاعد ينضم وهو نايم...... الاسويهو بالنهار في الليل كلو اقولو......
ان ربنا داير يفضحك..... خليني انفرد بيكي.....وكتلي عيوناتك...وغمديهن.....وقولي لي تعال عصر لي كرعي.......دايرات يتكسرن من الدواحة.....
كرعيكي بعصرن ليكي...... علا ان لحقت اتعودت علي العصّير.....يوقفني رب العالمين......
اها في الليل وانا نايم.... النضم دا كلو ارصو زي ماهو.........لا اختشا لا خجله
وبرضو عندي حمار النوم ..حمارن طبعو شين….. يشيلني من عنقريبي.. ....ولا احرى و لا ادرى ... القى نفسي راقد جنب البريدا....... اها زي دا شن قدّرك عليهو؟
........................
تقولي لي عيوني فيها ..... سر
يا بت ها..امشي كدي
المحيرني عيوني دي انا قلت لك في المرايا ما بقدر اشوفا عديل
لو ما قاعد اشوف اقول رقبتي ما عندي عيون.......
وانتي تكضبي علي وتقولي لي عيونك فيها سر؟.....اريتو كضب السواد والرماد
اها شفتي نوع النضم دا ال بيخليني اتشبك فيكي.....
..........
ما تشوفي فصاحتي دي
انا زول بوووووومة.....
والبوامة تزيد ان وقفت قدام زول سمح
لساني يتربط.....واقعد اطيّر في عيوني القلتي فيها سر دي
وابلع ريقي.....
وكرعيني يتلولون.....
وبطني تكركب....وان كركبت اصلي ما بتلوم فيها....محل ما يكون يكون.....
اها بعد داك..اكفكف ايدين قميصي..واتوكل علي الله.. واتشعبط....
.........
ديك السنة..... زينب بت مصطفى... رسلت لي متل نوع نضمك دا
وقالت لي بريدك..... وانا قلت النواجبا... رديت عليها وقلت لها انا برضو بريدك
بعد يومين من جوابي قومي يا زينب امرض و يجيكي غريقان.........وقالت دا كلو من ريدتي..... شفتي الدايرة تبقى عليّ؟.......اريت يا زينب بت مصطفى ريدك طاير وانتي في كرعيهو.....
وانا خايف باكر دي...... انتي تمشي تطوهمي وتتبومي وتقطعي الشارع وتدقشك ركشة....وترقدي اسبتالية....وتجي تقولي دا كلو من ريدي لي سجيمان..وتسويني في بوليص وفي جناية......
انا ريدك ماني ما بيهو..... علا خايف نهارة باكر...يجيكي قدرن من الله ..و تبهتيني تقولي دا كلو من ريدتي لي سجيمان.....
........
دحين يا بت الناس
لمي ريدك عليكي
وما تفرطي فيهو.......
|
|
 
|
|
|
|
|
|
|
|
Re: الي التي رســلت ليّ خطــاب غـــرامي....... (Re: سجيمان)
|
السلام عليكم ورحمة الله وبركاته
أخونا سجيمان
موضوعك دا ذكرني بايام ناس حلمنتيش
المنتكل الشجري يصف نفسه:
أنا الطزة البحرس امو
وأنا المابيهو بت عمو
وانا الدلمة التقيل دمو
****
شوف دي كمان
احبك يمين ولو تشكيني للكيزان
أحبك كان قلع كان سرقة كان طرزان
ماك عارفاني كان انا فوقك اتلولوت زول (سجمان)
يكون خازوق
ماك عارفاني انا اللايوق
زولا لكة لا بينحل
آ الغالية آ كيلو البصل
******
أنا اللكة
انا اللصقة الماب تنفك
ويومي الفوقك انشربك
واكنكش فوق ضنب حبك
آ داب يا زول بقيت تعبك
كان تجقلب كان تفنجط كان تنطط
ياني الفيك متشعبط
وانا الضبانة لاصق زط
واكان حتيتني ماب انحت
وما الناس الا هالك وابن هالك
وذو نسب في الهالكين عريق
| |
|
|
|
|
|
|
|
|
|
إلي التي أرسلت أرسلت لي جواب غرامي (Re: سجيمان)
|
ريدي كعب..... النوع الصمغي..... ان لصق فيكي تاني جالون جاز ما يمرقو منك
جننتينا يا أمونة وهبلتي الكبار الفي المسيد قرونا
الزول إن لقاك فى خلا وقهبونا يلصق فيكي لصق الطوبة وسط المونة
التمبلول لول لول لول
| |
|
|
|
|
|
|
|
|
|
Re: إلي التي أرسلت أرسلت لي جواب غرامي (Re: Ali Alhalawi)
|
سجيمان العزيز
Quote: انا ريدك ماني ما بيهو..... علا خايف نهارة باكر...يجيكي قدرن من الله ..و تبهتيني تقولي دا كلو من ريدتي لي سجيمان.....
........ |
قدر الله من قدرك انا بفرزو!!!
وراضية بالبتجينى من الريد
علا ياسى جى هسة شيل الحال ده لزومو شنو ؟
نحنا موش توصلنا لحل جذرى فى القصة دى ؟!!
وبريدك ساهى زندية !!!
| |
|
|
|
|
|
|
|
|
|
Re: الي التي رســلت ليّ خطــاب غـــرامي....... (Re: عبد الحميد البرنس)
|
استاذي البرنس
شكرًا ليك .. لي رفعة البوست
مسطول واقف يصلي مع جماعة قبل اقامة الصلاة الامام قبل عليهم عشان يرص الصف كويس..قعد يقولهم... انت تعال هنا.... انت امشي هناك.... انت زح شوية.....
المسطول حرد
يا زول مالك؟ الامام سعلو
قالو يا اخي انت داير تصلي بينا ..ولاّ داير ترفع كورنر
هههههههه..ههههههه.....هههههه..... بس
| |
|
|
|
|
|
|
|
|
|
Re: الي التي رســلت ليّ خطــاب غـــرامي....... (Re: سجيمان)
|
سيجمان اقوليك
طنش بس بشرط تحول
لكن نكتكمافى السلك÷÷÷÷ههههههههههههههههه
قالوا الفنان محمد الامين كان فى رحلة فنية خارج السودان وفى لقاء اذاعى لمندوب الاذاعه عن تطور الاغنية السودانية وعلى طول جواب
غايتو ان بعرف ان فى فنان دخل الكهرباء على الربابة(ابوعبيد حسن)وامكن لمن نرجع يكون دخل المويه.................................
تحياتى
| |
|
|
|
|
|
|
|
|
|
Re: الي التي رســلت ليّ خطــاب غـــرامي....... (Re: سجيمان)
|
عارف يا سي جي
حكاية الجوابات بتدخل في حيص بيص
مرة كدي في الجاهلية الاولي قلت النرسل لي سوسن جارتنا دي
كانت بتقرا في العالي .. ونظام انا اللون الطوبي بكسرني عديل كدي
من زمان مظاهرات الرغيف .. وانا متكسر في الطوبي
اها رسلت ليها جواب مع ابنعوف ود السرة ست اللقيمات
امشي يا الشافع اللديح دق الباب تجيهو امها يديها الجواب
ويطلق رجلينو
الباقي فضيحة والله .. !!
من ديك .. انا بطلت احب زاتو
بقيت حاقد علي المجتمع ..
يعني كان في داعي تكلم ابوها !!
| |
|
|
|
|
|
|
|
|
|
Re: الي التي رســلت ليّ خطــاب غـــرامي....... (Re: هشام مدنى)
|
Quote: نادية ده اعمل حسابك منها اصلو بتغير من ريدة ندى القلعة ليك
تحياتى |
والله يالغت ندي القلعة بتحب منوووووووووووو؟؟؟؟؟؟؟؟؟؟؟؟؟؟
ليه ضلامية هي ولا محوصة ؟
سا سجيمان ما تناقرنا وتفكها فينا ساي قالو لو ما شفت سجيمان تشوف اخوهو في بوست عمر بخيت
| |
|
|
|
|
|
|
|
|
|
Re: الي التي رســلت ليّ خطــاب غـــرامي....... (Re: فضيلي جماع)
|
فضيلي جماع
| Quote: سجل أنني من معجبيك. لقد نقلت إلى هذه الصحيفة الإليكترونية أدب الدعابة الجاد..وروح المرح المسئول |
استاذ فضيلي.. اثلجت صدري....وافرحتني ايما فرح.. ان يأتي هذا الثناء من رجل في قامتك
لك شكري...و..تقديري..واحترامي
اما عن المعجبات... نسوي شنو يا اخي؟.... قدر ما ندسا منهن يلحقننا....
| |
|
|
|
|
|
|
|
|
|
Re: الي التي رســلت ليّ خطــاب غـــرامي....... (Re: سجيمان)
|
وشخصى الضعيف يا د.سجيمان
| Quote: سجل أنني من معجبيك. لقد نقلت إلى هذه الصحيفة الإليكترونية أدب الدعابة الجاد..وروح المرح المسئول |
وكمان ارشح د.سجيمان لرئاسة الجمهورية
والما عاجبوه يــشرب من البحر المالح حتى يروى حٍــسده وحــــقده.
| |
|
|
|
|
|
|
| |
سجيمان
الزوول
Fadl Karrar
عبد الحميد البرنس
بلدى يا حبوب
humida
صباح احمد
فضيلي جماع
فيس بوك
تويتر
انستقرام
يوتيوب
بنتيريست