|
|
 الضكـــر.... الخــايب.."توجد صورة"
|
برنامج تهجين... بين السلالات المحلية من الاغنام السعودية....والسلالات المستوردة.....ونسبة لثقتي المفرطة في الفحل السوداني..من الحمار..مرورًا.... بالضكر البشري.....وانتهاءًا بالديك وبي ود ابرك.....حلفت بالتكسرني علا نجيب خروف مستورد سوداني ......وندخلو في برنامج التهجين دا..... واصريت اصرارًا منقطع النظير..... انو يهجن الاناتي النعجات الاسترالية....لانو انا اصلي مكجّن استراليا دي من زماااااان...... من زمني الصقطت في الجغرافيا... عشان كتبت العاصمة بتاعتها سدني...وهي طلعت ما سدني....اها حسي كيه ليهم اطلق الفحل دا وسط نعجاتهم .....ويلدن منو ويجيبن ... عشان تقعد لهم فضيحة لي جنا الجنا..........جبت الضكر الفحل الخروف السوداني وسميتو "ابدومات"... اسم رجالة ساااااااااكت....ودخلتو في برنامج تعليف... مكثف....وبقيت اطعن فيهو في التستيستيرون..... لكن دي بالدس.....وقدر ما جا سعودي اسوقو اوريهو ليهو..وكيف نحن فحولنا ...من تالا ضكارة..ورجالة ..ما مخلية شي.........وحلفت مافي خروف تاني يدخل معاهو علي النعجات ديل.......خايف ان دخل معاهو خروف تاني ابدومات يزعل ويتحرق وينطحو ويكتلو سااكت..........
يوم التهجين... وانا ماشي علي زريبة الاناتي الاستراليات..... والخروف قدامي.....وانا وراهو وادندن في غنية الشيخ سيرو.....واذكرو انو نحن صرفنا عليهو اكل وعلف.... وما خلينا لو فرضن ناقص.......
تلاتة ارادب عشا
اب دومات سيرو
تلاتة ارادب غدا
اب دومات سيرو
اب دومات راجل الهنا
.....وهو ماشي قدامي يتضرع سااااااكت.......وكل مرة انا اعاين ليهو ..واقولو ..هيع... هلا هلا اب دومات... والله الليلة يا نعجات الخواجات يمرقكن الله دا..... الله دا شفتنو؟ يمرقكن....جاكن الليلة البي يوريكن المكشن بلا بصل.....وبرضو ادندن في الشيخ سيرو
يومو الدخل الزريبة جالا
وبشتن نعجات النصارى
وعشان اشدعو..واخليهو يحس بحجم المسئولية الملقاة على عاتقه...وانو ما يشمّت علينا الناس... اتم الغنية
غنت ليك البنية
اب دومات سيرو
قالت ابدومات شغلتو نجيضة ماها نية
اب دومات سيرو
قالت ما بخون القضية
اب دومات سيرو
ياكا ابقرونا ملوية
ابدومات سيرو
وشمّر ما شمت عليّ
وسرّع جيب الشكّرة ليّ
ابدومات سيرو
...... قلت للعمال... يا جنوّن هوي..... قفلو ابواب المشروع دي كلها.... ما تخلو ولا باب فاتح...... الخروف الكلس دا .. هيع...... ان لحق اتفكا وجرى....ونزل الحلة دي؟..... علي اليمين ما يخلي لا ثيب لا بِكر......دخلنا الخروف علي النعجات.... وقعد يقدل وسطن....... عفيت منك...هيع... يا التمساح العشاري.. ايا..ايا..... اقدل.... مو فوق عديلك.... والليلة يوم حوبتك......ان ما قدلتا انت اليقدل منو؟؟؟؟....... ويمشي بعييييد.....ويقيف في ضليل....وبعد شوية يبرك ويقعد في الواطا.....قلت يمكن يكون خجلان..... يمكن ما لقى طلبو......والنعجات يحومن بي عندو..وكل مرة تجي واحدة تعاين لو.....وتشاغلو..غايتو نعجات الخواجات عليهن جنس انطلاقة وجنس قوة عين وقلة ادبن.....تجي الواحدة تقيف وتسوي حركات زي الاستربتيز .....وهو راقد في رقادو...... قلت يمكن تقله و تغا منو..... لكن دا وقت تغا؟.... قلت يا ربي يكون متوضي وخايف علي وضوهو؟...كدي نصبر شوية..... ساعتين وابدومات راقد ويلوك في لبانتو......اهااااااا انت مرقت اللبانة وقعدت تلوك فيها؟.... عاد كان كدي .. الرماد كال حماد...و الفضيحة جاية جاية.....حسيت بالاحباط يتسرب الي اوصالي.....قلت للناس كدي نمشي منو يمكن ما داير يسوي شي قدام الناس.... مشينا وانا جيت براي..... ولقيت خريّف الجن في رقادو ويلوك في لبانتو....مشيت عليهو وقلت كدي نناغمو وننضم معاهو ونشدعو شوية...... افو..... آآآآ.... ابدومات.. افو....نحن خاتين مستقبلنا واملنا كلو فيك..وتخذلنا؟...... انت يا ابدومات يا عاجبلك ماك ساهل.... انت امة كاملة خاتا املها فيك......يا زول عليك الله ما تتلوم اللوم دا......ابدًا في رقدتو ويلوك في لبانتو..... الشمش غابت.... جيت في الليل وجبت معاي عامل وربطنا ابدومات في حديدة علي الزريبة....واجيب لي خرتوش موية و...وادقو دقة .... بت كلب....وفشيت غبينتي فيهو كويس...... الصباح.. قلت للجماعة اضبحوهو اصلو ما منو فايدة..... ضبحوهو وانا حلفت... حتيتة لحيمة من الخروف الخايب الباطل دا....ما تدخل خشمي..........
"صورة تذكارية.. لي اب دومات... يوم الحنة.. وهو مادي ايدو عشان يحننوهو"
|
|
 
|
|
|
|
|
|
|
|
Re: الضكـــر.... الخــايب.."توجد صورة" (Re: ودقاسم)
|
ود قاسم اها جيتك
| Quote: أب دومات كان داير ليهو إنتاية سودانية بت بلد وبت قبايل ،،، تقوم تجيب ليهو نعاج ما منّهن غير ريحة الصناح ؟ |
انت عارف ابدومات دا....اصلو ما كان بي يعاف شي.... ولا عندو قشة مُرة..علا بس تكون عين سودا وصابتو.......
| |
|
|
|
|
|
|
|
|
|
Re: الضكـــر.... الخــايب.."توجد صورة" (Re: عمر محمد عبد القادر)
|
و الله يا سجيمان اشهد انك لداهية كبيرة ... ففي هذا الخايب تتجسد بعض شخوصنا السودانية ... التي تعتقد بانها الاول و الاخر في كل شيء في هذه الدنيا وهي ليست كذلك... و بدلا من الاعتراف بفشل هذا الخايب الرمز حاول البعض منا ايجاد المبررات له وهي اوهن من خيط العنكبوت... شوف يا عزيزي سجيمان هذه الخيبة اكثر من عادية اذا ما جاز لنا تسميتها بذلك ... و انظر لعدد خيباتنا و عدد نجاحاتنا التي تكاد تكون معدومة لتري الفرق بنفسك ... و عفارم عليه ابو قرون فقد عمل ما يستطيع عمله و لم يدع غير ذلك فلماذا نشيل حاله المسكين؟ ام نريد له ادعاء الفحولة و البطولة حتي يقول الناس ان الخراف السودانية فحلة قوي...و لك حبال الود ممدودة يا عزيزنا سجيمان الداهية.
| |
|
|
|
|
|
|
|
|
|
Re: الضكـــر.... الخــايب.."توجد صورة" (Re: برير اسماعيل يوسف)
|
برير اسماعيل برير
| Quote: ففي هذا الخايب تتجسد بعض شخوصنا السودانية ... التي تعتقد بانها الاول و الاخر في كل شيء في هذه الدنيا وهي ليست كذلك.. |
الحكاية دي في كل البشر.. يابرير....ودا شي عادي وزي الزبادي وممكن يلقو الزول اليشجعهم علي فشلهم....ويوريهم انهم ناجحين...... لكن برضو انا قصدت الخروف بس.... ما رميت لاي تفسير تاني...... وما تدخلني في ضفوري عليك الله
| |
|
|
|
|
|
|
|
|
|
Re: الضكـــر.... الخــايب.."توجد صورة" (Re: سجيمان)
|
يا دكتور سجيمان ..
| Quote: بلغت الاحقاد ب....البنابر |
عثمان يقصد هنا جنس السويتوهو في الضكر المسكين اب دومات دا ..
والحقد مقصود به السكينة الضبحتو بيها اب دومات في حنجرتو دي ..
والبنابر للكمونية وام فتفت والمرارة ،، أاااامممممم ما احلاهـم  
| |
|
|
|
|
|
|
|
|
|
Re: الضكـــر.... الخــايب.."توجد صورة" (Re: سجيمان)
|
السلام عليكم ورحمة الله وبركاته
أخونا سجيمان
عجبني موضوعك (كالعادة )
لكن احسن حاجة
| Quote: ..واخليهو يحس بحجم المسئولية الملقاة على عاتقه |
ذكرتني بالكلام الكبار كبار بتاع الجماعة المثقفين
لكن سمعت تحت تحت انو بعض اللعيبة من فريقنا (الأتغلب ستة من المصريين داك)
قالوا أخدوا منشطات عشان ينتقموا من المصريين الديمة غالبننا
اها باقيلك عندهم فرق من ابدومات حقك ده ؟؟
| |
|
|
|
|
|
|
|
|
|
Re: الضكـــر.... الخــايب.."توجد صورة" (Re: سجيمان)
|
أهلا أخي سجيمان
دائما اسعد بكتاباتك والتي تعالج بعضا من أمورنا بشى من روح الدعابة والظرف واليوم أجد في حديث أبو دمات الكثير من إخفاقات البعض وقليل من نجاحتنا والتي نتغني بها وربما نصنفها أحيانا بأنها إتجازات تحسب مع المعجزات والخوارق
عموما حديث أبو دومات حديث رائع ذكرني أنشودة صيغت كلماتها لأحدهم يدعي حمد وكان قد تعرض لإنتكاسة تشابة إنتكاسة ابو دومات
هلا هلا يا حمد
كنت بتسد وكنت بتقد
وفوق ابودمات تركب وتشد
وللبنسون تجبد
ولشنو كدة تسخى وتمد
ولا بسه الجلابيه والتوةب الفرد
وهسى بقيت زى القرد
طالعه جبد ونازل جبد
الأبيات الأخيرة تشير إلى أنه أنتقل ليعمل بالدريسه السكة حديد
| |
|
|
|
|
|
|
|
|
|
Re: الضكـــر.... الخــايب.."توجد صورة" (Re: بلدى يا حبوب)
|
Quote: تنوية
هذا البوست يتكلم عن خروف حقيقي.....ولا يقبل اي تأويل اخر" البوست".. ليس المقصود منه اي شخصية سياسية او اجتماعية.....او حتى عادية.... |
العزيز/سجيمان
تحية طيبة مجددا و اسمح يا عزيزي ان اقول لك ان الحكاية قد طلعت من ايدك خلاص و من حق الناس ان تقرأ هذا النص قراءات متعددة و لا يستطيع تنويهك هذا مع تقديرنا له ان يقف سدا منيعا في وجه تلك القراءات ... خلاص الحكاية طلعت من ايدك يا عزيزي... و لك مجددا كل الاحترام و التقدير.
| |
|
|
|
|
|
|
|
|
|
Re: الضكـــر.... الخــايب.."توجد صورة" (Re: سجيمان)
|
سجميان العزيز
انت ماك عارف الحقيقة
اب دومات ده سالنا زملانو في الجامعة (اقصد الزريبة) قالو متزوج عرفي من زمان وهو خروف وفي جدا وما بيقبل باي شي تاني
اها كان تسالوهو قبل ما تجيبوهو
كمان سمعنا تحت تحت انو جاي بفيزة قرد
اها الكلام ده صاح
جمال
| |
|
|
|
|
|
|
|
|
|
Re: الضكـــر.... الخــايب.."توجد صورة" (Re: سجيمان)
|
سجيمان الظريف...ذكرتنى ايام الديمقراطيه وزمن الوزير ابو حريره...
فقد إستورد الوزير-وبحسابات غير معروفه حتى الآن-خرافا استراليه لذبحها فى السودان!!!..وكتبت كاريكتيرات ساخره بهذا الخصوص(طبعا الزمن داك ما كان فى بيوت أشباح)...وفى ذاكرتى الآن من هذه الكاريكاتيرات:
خروف أسترالى مرسوم وكتبت تحته الآيه الكريمه:" ولا تدرى كل نفس باى ارض تموت"
********************
خروف استرالى قال لنعجه سودانيه:آى لف يو (I love you)
فردت النعجه: يلفلف يا يمه مصارينك!!
| |
|
|
|
|
|
|
| |
سجيمان
ودقاسم
almohndis
Osman M Salih
waleedi399
الزوول
صديق الموج
Abureesh
نزار باشري ابراهيم
ابو جهينة
Elsamani A.Malik
بلدى يا حبوب
saif massad ali
جمال السنوسي
mekki
فيس بوك
تويتر
انستقرام
يوتيوب
بنتيريست