دعواتكم لزميلنا المفكر د.الباقر العفيف بالشفاء العاجل
|
|
 السفارة السودانية.... تلقي القبض على الهكــر
|
قالو الاي بي بتاع الهكر من السعودية....وبصراحة انا لحمي اكلني...وخفت بعد شوية يجي زول ويقول..سجيمان هو الهكر....وفي واحد قال الاي بي دا بتاع جهاز في مطار الملك خالد بالرياض..... لكن احمدك يا الله انا في بلد اخر مرة شفت طيارة قبال سنة.... وقت نشوف الطيارة ... انا ووليداتي وامهم نطلع راس البيت ونقعد نكورك "ولاد الريف..... رمو لنا رغيف"....يعني انا براءة...براءة المُر اخوي من سرقة الكعك الاكانت قاعدة تدسو امي في الدولاب وتربط المفتاح في طرف توبا....والغريبة بعد دا كلو تجي تلقى الكعك اتسرق...ونحن عرفنا انو في البيت في هكر...واكيد دا المُر...لكن في النهاية طلع براءة واتضح انو الهكر فار.... لقد ظلمناك يا مر بالرغم من اننا واثقين انك بتريد الكعك...ولا انسى اذ انسى عيد رمضان داك.... القضيتو كلو انت في الادبحانة....والسبب الكعك.....
نرجع لهكر السعودية..... انا اقترح علي السفارة بالرياض.... تجمع السودانين... كلهم....وتزيد الطاقم بتاعا...وتجيب بوكسي مليان مصاحف.... ويقعدو يحلفو الناس..واي زول عليهو ضرائب ما يحلف علا بعد يدفع الضرائب.. و كل زول عشان يحلف ويبري ضمتو..لازمن يدفع خمسين ريال...رسوم حليفة...وعشرة ريال خدمات حليفة..واي زول يحلف بالتكسرو انو هو ما الهكر..وان بقى هو الهكر ان شاء الله يتقلب بظبورتي...وكل سنتين يلمو فيهو ناس السفارة ويجدعوهو من مكتب لي مكتب....ويقعد في جيب سيدو جنب كيس الصعوط وتجيهو حساسية....وجلدو الاخدر من وقفت الشمش يجيهو بهق ويتقلب بنفسجي......
واووووووعك يا القنصل تأجل لي زول الحليفة دي...عشان ما عندو قروش.......وبعدينك... عشان الشفافية انت تحلف اول زول انك ما الهكر...واكان بقيت انت الهكر تتقلب مغترب وراعي...وتجي السفارة تجدد جوازك....سلامتك يا يابا انت من المغتربين...وتبرا من الرعية.... والسكن في ود رعية
|
|
 
|
|
|
|
|
|
|
|
Re: السفارة السودانية.... تلقي القبض على الهكــر (Re: سجيمان)
|
يااخي سجيمان
انا ما بعرف حاجة غايتو غير بفتح الانترنت والايميل
وده كفاية علي لحدي هنا
بالله يا سجيمان خسمتك بالنبي عندي موضوع عايزك تكتبو لي في بوست معتبر بكريقتك الحلوة دي
أهاعندي سلطة ( بفتح السين واللام ) ختيت لي فيها عجور وطماطم وجرجير وخس وخيار وبقدونس وشمار وزيت سمسم وزيت زيتون ونعناع وبصل اخضر وشطة خدرا وفول حاجات اها عملت لي صحن كبير ودايرك تقسمو لينا
يعني تقسم لينا السلطة دي (بفتح السين الله يفتحها عليك ) وياريت كمان تقسم معاها الثورة الجاية
جمال
| |
|
|
|
|
|
|
|
|
|
Re: السفارة السودانية.... تلقي القبض على الهكــر (Re: سجيمان)
|
سجيمان الظريف
عليك الله البعرف ربنا وبخاف من القسم بالمصحف بعمل كده ؟؟؟؟
سجيمان كلامك ده خلانى زى المجنونه اضحك براى معى صديقتى من ايران ماشه وراى وتقول لى ( انت فى مجنون اليوم ) .
احكى ليك حكايتى مع السفارة السودانية فى ابو ظبى وحليفة المصحف
قدمت لأقامة لوالدتى ( الله يرحمها ) طبعا هنا ماعندنا تعقيدات زيكم وقع لى مدير عام الجوازات بالموافقة على ان اقدم ما يثبت ذلك من السفارة ، مشيت السفارة ، جاب لى المصحف قال لى تحلفى القسم وتدفعى ثلاثمائة درهم ، قلت ليه لو ما امى الجابرنى شنو اجيب لى واحدة واعمل ليها اقامة خمسة سنوات من غير ما تكون امى ، عموما انا ما بحلف المصحف حتى لو صادقة ، والحاجة دى امى ، قال لى خلاص ما تحلفى ادفعى الرسوم القلتها ليك هناك ونحن بنديك شهادة انها امك ، قلت ليه وتدينى شهادة على حاجة انت ما متأكد منها انت العرفك شنو انها امى ، وطبعا بعد الفصاحة والشكل ودخلت فى الحكومة والشتائم ليها رفض ما يعمل لى الشهادة ، مشيت الصباح لمدير الجوازات وانا اعلم تماما انه عمره ما رفض شىء لسودانى ابدا وفاءا للسودان قال درس فى كلية الشرطة فى السودان ، مشيت على طول وقلت ليه والله عملت مشكلة فى السفارة ورفض يدينى شهادة لكن انا مستعدة احلف ليك القسم انت قال لى بنشوف ليك حل ان شاء الله وفجأة ربنا حلانى من المشكلة ووفر لى قريشاتى ( الانقاذ معدمانا القرش من الضرائب انا ادفع وابو وضاح يدفع ) شاف جواز امى عنوانها بالسودان بواسطة ابنها و مكتوب عنوان شقيقى بالكامل وقارنه مع اسمى وعمل لى الاقامة .
عشان كده ما غريبة يحلفوكم بخمسين ريال ؟؟ انتوا بتحلموا فيك الخير قول متين ريال .
الله يبارك فيك يا سجيمان كان طلعتنى من الزهج الانا فيه وخليتنى اضحك .
ام وضاح
| |
|
|
|
|
|
|
|
|
 Re: السفارة السودانية.... تلقي القبض على الهكــر (Re: سجيمان)
|
والله الهكر ده يا سجيمان من ما قمنا وفتحنا بنعرفو انو الحاجة القديمة المجدوعة فى المخزن ومنسية ومافى زول جايب خبره !! وبعد شوية بقينا نعرف الهكر انو دى العربية القديمة ومكركبة ودخانه ما يديك الدرب وانت راقد فى بيتكم تعرف انها وصلت الحلة وهى لسة على بعد شارعين من بيتكم ولا الصباح بدرى يدقو ليك بابكم عشان اللزة لامن نفسك ينقطع .... لكن جنس هكركم الهسى ده يطرشنى ويعمينى !!!!
| |
|
|
|
|
|
|
|
|
|
Re: السفارة السودانية.... تلقي القبض على الهكــر (Re: osly2)
|
سجيمــان وأم وضــاح،
انت محظـوظـة يا ام وضـاح لأنهـم ما طلبـو منك تجيبى واحـدة تانيـة معاكى، لأنـو شـهـادتك عنـدهـم نص.. المرة التانيـة سـوقى معاكى صديقتك الايرانيـة، فقط للظروف.
لكن انتو نسيتـو انـو دى حكـومـة التأصيل الحضـارى،
يا جماعـة البقولو ليكم عنـو مصحف دا هـو جهـاز أشعـة تحت الحمــراء، موصل لاسلكيـا بالكمبيـوتـر بتاعهـم، وهـو بيقـرأ البصمـات ويرسلهـا للكمبيـوتـر.. الكمبيـوتـر يقارنهـا بالمعلومـات المخـزنـة عنـدو عن مقـدم الطلب، ومنهـا إسـم الوالـد والوالـدة وهـكذا الخ.
| |
|
|
|
|
|
|
| |
سجيمان
جمال السنوسي
Elmosley
MASSOUB
essam&amal
ayooby
Outcast
osly2
HOPEFUL
Abureesh
حبيب نورة
صديق الموج
فيس بوك
تويتر
انستقرام
يوتيوب
بنتيريست