|
|
 البوســت الاخيــر..." العفـــو....والعـافية"
|
روحي محرقاني..وزهجان لي كمين يوم......وقدر ما كتبت في المنبر نضم اعوج ونضم ما راكب عدلو... حلفتو يا ناس المنبر ما تهببو لي وتسو لكم كشف وتقول اطردو الزول دا......
وبعدين منبركم دا زاااااتو كعب....وملولو....واصفر ومليان فيران... القبحة فوقو...وكل يوم ضهبان... سيدو حايم في الشمش والهجيرة عشان يجيبو.... يحيبو يخُتو.... يغفلو ويغفل الناس ويمرق برااااااحة من خشم الباب تاني.....دا منبر دا؟....ناسو نصهم كضابين......والتانين بلباصين....وحااااسدين...نوح من دي الحسادة..... من حسادتم قالو عمر البشير يخلي شغلو... يخلي شغل ويستقيل؟ يشتغل شنو؟.... عندكم ليهو شغل ولا حسادة بس؟.....ولا ّ دايرنو يقعد في الحلة ويمرق كرسيهو في ضل الضحا...ويقعد يعاين لي الماشي و الغاشي....حسي انتو ان الواحد فيكم قالو ليهو خلي شغلك واقعد ساكت ...بي يرضى؟...ما بيزعل ويتحرق....
مو منبركم دا؟.....اها.. دا طرفي منو....وعودي فيهو تاني عود مرا.... عود المرا دا شنو كمان؟....والله نحن عندنا جنس نضم؟.... يمحّن......الله لا وراني مرا قايم لها عود....ولا تلاقيني.......غايتو ان لاقتني مرا وقايم لها عود والله اعضي طرف جلابتي في خشمي واقوم صوف......غايتو في مرا قاعدين يجيبوها في تلفزيون السودان الايام دي.... انا متاكد اقل حاجة عندها عوديّن......وبعدين طوااااالي قاعدة تقول في نضمها" انا اتعودت... انا اتعودت" ......وبعدين كمان بي فلهمتنا دي عندنا جنس امثلة.... ما نعرفها علا برانا....تلقى الناس قاعدين ويشربو في الجبنة نسوان علي رجال ينط واحد....ويقول" الشقي يعترن ليهو ......" شنو كدي ما عارف؟.....نان كان عندو حاجات قدر دا ويعترن ليهو...قاعد لي شنو في السودان؟....ما يمشي هوليوود.....والله العتيّرة الواحدة حلفو قالو بالشي الفلاني.... وقدر ما يعترن ليهو كتير قدر ما قروشو تزيد.......بس مضطهد عندنا نحن في السودان..... يا اخونا الهنايات ديل ما عندهن لجنة حقوق..زي حقوق الانسان؟.......دا كوم والمثل حق المجنون كوم براهو" المجنون لا تونسو ولا تخليهو يونسك".....نهارت باكر يشوفك في عرس وانت منجعص وسط الناس وتتبوبر وتكضب يقوم يكورك لك..... دا ان ما كورك في مكرفون الحفلة......اها دا مثل عليكم الرسول؟.....دا ما شيل حال عدييييل........
ارجع لي نضمي..... منبركم دا خليتو لكم... اشبعو منو.....حردتو...... ومافي زول يجي يحنسني....ولاّ يقعد يقول يا حليلك يا سجيمان انا قلبي رهيّف... بجي راجع.......
و يا اخوانا ان في زول زعلان مني يعفا لي.......وانا عافي لي أي زول غِلِت فيّ.........
ولحدي ما نتلاقى السنة الجاية................
|
|
 
|
|
|
|
|
|
|
 Re: البوســت الاخيــر..." العفـــو....والعـافية" (Re: سجيمان)
|
سجيمان
انت الله يجازيك
| Quote: والله العتيّرة الواحدة حلفو قالو بالشي الفلاني.... وقدر ما يعترن ليهو كتير قدر ما قروشو تزيد.......بس مضطهد عندنا نحن في السودان..... يا اخونا الهنايات ديل ما عندهن لجنة حقوق..زي حقوق الانسان؟...... |
يا أخوي ديل قطط سيامية و اللا شنو؟؟
| |
|
|
|
|
|
|
|
|
|
Re: البوســت الاخيــر..." العفـــو....والعـافية" (Re: سجيمان)
|
سجيمان
كل سنة وانت طيب ياخى
وربنا يخدر ضراعك .... ويديك ال فى نيتك
والعفو كمان
| Quote: و يا اخوانا ان في زول زعلان مني يعفا لي.......وانا عافي لي أي زول غِلِت فيّ......... |
الجملة الاخيرة ناقصة ليها كلمة ولا كلمتين كدى .... ولا انا عيونى مطششات ... ما عارف والله .... المهم انا كلام العفو عاجبنى شديد .... وانشاء الله الناس كلهم يبقو زيك ويتعافو كمان
| |
|
|
|
|
|
|
|
|
|
Re: البوســت الاخيــر..." العفـــو....والعـافية" (Re: محمد عبدالله محمود)
|
محمد عبد الله محمود
| Quote: الجملة الاخيرة ناقصة ليها كلمة ولا كلمتين كدى .... ولا انا عيونى مطششات ... ما عارف والله .... المهم انا كلام العفو عاجبنى شديد .... وانشاء الله الناس كلهم يبقو زيك ويتعافو كمان |
انا طلبت العفو وعفيت.... الغريبة لي حسي الناس كايسة تتطير ناس من هنا... ليه؟
| |
|
|
|
|
|
|
|
|
|
Re: البوســت الاخيــر..." العفـــو....والعـافية" (Re: سجيمان)
|
الزيييك يا سجيمان يا خوي كان عايز يطردوهو من المنبر يكتب الكلام العدل لكن كلامك المكعوج ده ياهو زاااااااااااااااتو البيقعدك ...
اعمل حسابك وانت طالع من المنبر ده ما تقوم تعتر ..باقي انت شكلك شقي
اها يا خوي العفو والعافية ولله والرسول ونشوفك الليلة بالليل
كان قاعد في امريكا ولا اوربا ياخوي كان نقول راس السنة ده ماشي ليك بار ولا نادي ليلي لكن يا خوي انت في السعودية نويت تعتكف ولا شنو ..؟
همسة اخيرة ..
ارحل وذادك حبنا ...
| |
|
|
|
|
|
|
|
|
|
Re: البوســت الاخيــر..." العفـــو....والعـافية" (Re: نادية عثمان)
|
Quote: بالله عليك الله ياسجيمان تانى ماتهجمنى كده
سمح
وهو كانت انت مشيت شن طعم المنابر بى وراك ياسكر منبرنا وياونسة بنبرنا !!
سيجو بالله انا ضغط الدم عندى مرتفع ماتتسبب لى فى جلطة بى جنس كلامك ده تانى
ولو فكرت تمشى تكون كتلت روح الفرحة والضحكة فى روحى للابد !!
يعنى يرضيك ؟ |
داااااااااااااااااااااااا الكلاااااااااااااااام البجيبو طاااااااااائر ... ابشر يا سجيمان ...
| |
|
|
|
|
|
|
|
|
|
Re: البوســت الاخيــر..." العفـــو....والعـافية" (Re: سجيمان)
|
الاخت الاستاذه ناديه قالت
| Quote: وهو كانت انت مشيت شن طعم المنابر بى وراك ياسكر منبرنا وياونسة بنبرنا !! |
تانى ياسجيمان ماعندنا كلام
مبالغه لكن الوصف ده....
اتخيل يا سجيمان نفسك قاعد فى بنبر و الجماعه كلهم قاعدين فى
برش ..تبقى زى الحجاى بتاع جنة الاطفال
او
تكون قاعد فى بنبر وسط ستات الشاى
قعده بالدنيا
سنفتقدك حتى حلول السنه الجديده
لكن باقى لى يدك حتاكلك و ما اظن تصبر لغاية راس السنه...
غايتو كلها يومين تلاته..بنصبرها
تحياتى
النصرى
| |
|
|
|
|
|
|
|
|
|
Re: البوســت الاخيــر..." العفـــو....والعـافية" (Re: سجيمان)
|
كل عام وانت بخير يا دكتور... انا زاتي مستغربه مافي زول جمع توقيعات عشان يطردوك ليه.. لكن عندها واحد من تفسيرين.. إما بريدوك شديد.. أو الحيلة غلبتم...
وفي كلا الحالتين... سعيدة إنك قبلت التحنيس سريع وقعدته.. 
Happy New Year.. والسنة الجاية نفرح بي فوفو وناجي
بنت الحسين
| |
|
|
|
|
|
|
|
|
|
Re: البوســت الاخيــر..." العفـــو....والعـافية" (Re: سجيمان)
|
أخوي سجيمان ودعم بله
كيفنك يا جنا
اها
والله اعضي طرف جلابتي في خشمي واقوم صوف......
اها وانت قايم صوف لو عتر ليك .......
قبل ما تصل الحصاحيصا
على فكرة المجانين كتار في دوكا باسندا
أموت في محطة شقلبان
انت معزوم عندنا في احتفالات راس السنة
ها السنة كمان عملوا ليها راس
والله السودانيين عندهم كترت روؤس
يرحمنا الله في عبري
| |
|
|
|
|
|
|
|
|
 ســـــــــلام (Re: سجيمان)
|
يا دكتور والله إنت ما بتمرق من البورد ده انا عارفك
وكان ما ظهرت تاني والله إلا أجيب كفني (بعد الشر عليك)
وأجيك في بلدك البعيده ديك.
لكن عليك الله قبل ما تمشي مشيك الكضب دي قول رأيك
في أمثالنا العجيبة دي:
1) الدعوة للإحباط:
* كان غلبك سدها وسع قدها - لا تحاول مرة آخري
* البتبلبل يعوم - ما يحاول التجفيف
2) عدم الإهتمام بحقوق الاخرين:
جلدً ما جلدك جُر فيه الشوك - لا تحافظ عليه
وغيرها كثير كثير يأتي لاحقاً
إسماعيل
| |
|
|
|
|
|
|
| |
سجيمان
saif massad ali
حبيب نورة
alfatih
osly2
A.Razek Althalib
خال فاطمة
مريم بنت الحسين
زول ساكت
الزنجي
ابو جهينة
ahmed haneen
aosman
Elmosley
Ismaeil H. Mohamed
zola123
شريف درار شريف
Marouf Sanad
Bakhaf
Khaalaleyaal
فيس بوك
تويتر
انستقرام
يوتيوب
بنتيريست