|
|
 باعـــــــــوضة رحيــــــل
|
الباعوض والحرامية من فصيلة واحدة اسمها ( القلق ) ...
بشتغلو فى شركة لديها اكبر طاقة من الامكانيات الممكنة وغير ممكنة ... وممكونة بالطاقة الشايلاها فى عيونا ونخرتها ... الباعوضاية عندها حاسة شم تشمك من نوع دمك .. اذا كان بتاع اناناس بالفراولة او اناناس بالقدوقدو او ملاح المرس او حتى ملاح الزبادى كما يقول اخوتنا الحناكيش ( للروب ) . اول ملاح لونه ابيض .. متحالف مع الدايات ... وشغال فى مجموعة الازمات الدولية .
قدوما طويل طول زى الاباتشى – عفوا – زى ابو حليمة كما يسميه الاجانب بالثعلب المكار .. تخترق كل اجهزة الرادار فى لحظة صدق وتجيب كثافتك وترديك كما تردى السيول حيشان البيوت .. والناس فى البيوت ما تقيسا بى بيبانا .. وما تغرك دشوشهم والزمم خربانة حييييي .. جابو الدش عديل ربطوه اعلى مكانة .. خلوا الناس تحت برواديهم الخسرانة زننننننن ...
زنننن دى تزن ليك جوة اضانك حتى لو خاتى فيها سماعة هيدفون او ام بى3 ومغمض عيونك وعامل فيها مطنش .. باعوضة عاملة تحالف مع الليل ... لدينا جماعة كدا بدققو الناموسية نص النهار خوفا من قوات التحالف وهجمات الجنجويد الباعوضية .. وحات الطاحونة هذه القوات لا تعترف بمجلس امن ولا مدرعات ناتو ولا جنيفر لوبيز كلهم تعضيهم فى لحظة هنية ولا ابو مازن وتديهم مضاد الكلوركين المشحتف للجسم .. الجميل جدا انو المضاد بخليك ترتخى وتنطط عيونك زى البصل فى ملاح الروب وتكب عصارة الفلين اللونو اصفر ..
ذات لحظة وكنا جلوسا .. اذ سمعنا صوتا يزن من بعيد .. فسألنا : ما هذا يا ابا الحسن ؟ .. اجابنا بكل قوة و رباطة جأش ان الاصدقاء الجدد قادمون لمهاجمتنا ويجب علينا اخذ الحذر الشديد تحوطا لما سيبدر عن الفعلة .. ودخلنا الناموسية جميعا .. عنقريب كبير زى القاعد فى متحف خليفة المهدى بأمدرمان وتحكرنا وتمينا الجلسة .
باعوضة رحيل من اكبر البواعيض التى رأيناها فى حياتنا قصيرة الامد زى الكاتيوشا ... باعوضة تحمل فى رقبتها كل الاوسمة والنياشين والميداليات التى نالتها فى المهرجان الباعوضى بخور ابى عنجة .. كانت رحيل تجلس خارج الشبكة العنكبوتية تحاور بعض الافراد عن طريق المسنجر اللايف ولفيف من الناس كانوا بداخله ما عارف شالهم كيفن .. قادر الله على التكنولوجيا الخلتنا نشوف الزول زى ما هو ... لا تشوبه اى شائبة ولا حتى جلكينة ...
فجاة ... لو سمحت يا المخرج .. اكشن ... زننننننن من بعيد جانى طيفك زار خيالى وقطع حبالى وخلانى طاشى شبكة السمك وشبكة الكهرباء وشبكة العرس والشابكنا غير الله يجى يفرتقنا ... ان شاء الله حيفرتكم ...
دخلت تلكم الباعوضة الاراضى الرحيلية وقامت رحيل جارية تقول الروب وتنده كل الراقدين فى ا
بأن يلحقوها ويفزعوها ويفكو اسرها من تلك الجيوش القادمة بلا هوادة ... رحيل تصرخ والباعوضة تحذر عبر مكبرات الصوت بأن تستسلم واى مقاومة سوف تكون وخيمة العواقب .. هنا قفزت رحيل لداخل الناموسية حتى ان رجل السرير إلتوت من شدة القفز بالزانة وقوة الاندفاع والخوف من المجهول .. وما سوف يحدث .. طبعا الباعوض وانفلونزا الجداد وجهان لعملة واحدة زى العملة اللسة ما عملوها دى ... كدا بقو الباعوض والحرامية والانفلونزا ونحن لينا الله وعيشة السوق ... كل دفاعاتنا الارضية ما نفعت .. تقول بعطلوها بى سر الليل ويا حى يا قيوم ... وصلت الباعوضة لحدود دولة رحيل وبقت تعاين بخرم يبدو انه رحيل خرمتو وهى ناطة من فوق للداخل .. الباعوضة هنا لديها كل ادوات الاختراق .. احضرت مستلزمات الشغل .. اول حاجة لبست بنطلون جينز من ماركة كونز وبدلة رياضية وخوذة زى قوات الطوارئ الدولية وفى يدها الشمال مع الاسف كانت تحمل بطارية تعمل بالليزر لزوم الشم ... يعنى باعوضة مدججة دججة بطالة .. رحيل كانت تفتكر ان الباعوضة مفروض تلبس بلوزة وردية مطرزة من الاطراف وخاتا روج حسب لون البلوزة .. لكن الباعوضاية كانت حريفة فى التزييف ... ودخلت جوة الناموسية ... وبدات المطاردة من زاوية لاخرى ورحيل تصرخ الحقونيييييييييييييي ووووووب عليا يا بنات امى ... باعوضاية شنو السجم دى .. يا ابو مروّة ...
اخيرا وصلت الباعوضة الى اطراف قميص رحيل الذى حاولت بشتى السبل الدفاع عنه بقوة يحسدها عليها دفاع برشلونة ... وعضت رحيل ... وخرجت بنفس الخرم الاول من الناموسية وصفقت جيوش الباعوض فى الخارج وكرمّوا تلكم المناضلة واهدوها شهادة جديدة من الاختراق للبشر الذين رقدو سلطة ... وطلعت الباعوضة لسانها وشتتت .
|
|
 
|
|
|
|
alfatih
Shams eldin Alsanosi
فيس بوك
تويتر
انستقرام
يوتيوب
بنتيريست