دعواتكم لزميلنا المفكر د.الباقر العفيف بالشفاء العاجل
|
|
 براحة... وطولوا لينا بالكم (المناضلين السودانيين بجنسيات غير سودانية )
|
ما قادر افهم شخص بدَّل جنسيته.. أو اقلها جاب ليها ضرة جنسية ثانية.. يدعي انه سودانيي أكثر من الجميع !!!!
ما قادر افهم شخص شرد من حاكم ظالم وقام بنمرة أربعة خلى البلد .. وشتت مع أول كف أو علبة بنبان لبلاد طيرها عجم .. اختار الهروب .. ثم يدعي انه مناضل اكتر من القاعدين ومتحكرين في البلد .. رقم الضيق والضنك وظلم الحكام !!!!
استغرب زول مستمد شجاعته من جواز بلد تانية او من بعده المكاني عن المناطق الملتهبة ويقول انو مناضل و سوداني أكتر من كل الناس .. يكورك ويجعجع .. ووكت مفروض يدفع ضريبة النضال من ضرب او سجن او استنشاق بنبان .. يمرق الجواز الاخدر ولا الأحمر .. ويقول انا مواطن البلد الفلانية .. نادوا لي سفيري !!!!
(زي الامنجي الشخصيته كلها في بطاقة الامنجية .. لو سحبوها منو بسحبوا معاها شخصيته)
النضال هنا ..
في البلد دي
البائع المتجول.. الشايل مناديل ورق وحائم بيها في السوق العربي عز الهجير .. ويتجارى من الكشة ويزوزي عشان يمرق قوت يومه .. ده ياه المناضل ... موش زول مبرم شعره .. وضارب السقط .. مستني المنحة او المعونة حقت اللجوء .. ويومه كله قدام الكمبيوتر لأنه ما عنده شغله.. يجعجع ويتهم الناس بالعمالة
ست الشاي البتولع نار كانونها الساعة خمسة صباحا .. وتطفيها الساعة 11 مسا .. دي هي المناضلة ... موش متحزقة .. وعاملة كيرلي .. حافظة ليها قصيدتين وبتتكلم لغات .. ويومها كله بين المكاتب والمنظمات تسترزق بقضية ست الشاي ديك
المشكلة ما في النضال زاته
النضال ما خشم بيوت .. وكل زول بيدخل من خشم الباب البقدر يدخل بيه وبعرف ليه
لكن المشكلة في انه... صاحبنا المبرم شعره وصاحبتنا المسرحة كيرلي .. بتهموا ست الشاي وبائع مناديل الورق بالعمالة والكوزنه ؟؟!!
تتصوروا !!!
ليه ؟
عشان ست الشاي قدمت شاي مظبوط لي اتنين امنجية .. قعدوا في بنابرها وطلبوا شاي .. شربوه ودفعوا زيهم زي خلق الله
عشان بائع المناديل باع مناديل لي عسكري بوليس بالكاش .. والعسكري مسح وشه وعرقه بالمناديل الباعها ليه زولنا داك
بتهموهم بالعمالة عشان مشوا خطوتين في مسيرة جات مارة قدامهم .. وهتفوا مع الهاتفين
تسقط .. تسقط .. Usa
ما عارف المزعلاهم المسيرة
ولا سقوط Usa
ولا مشيهم في المسيرة
وهم ما عارفين انو هتاف ست الشاي وبائع المناديل.. ودخولهم في نص مسيرة السائرين .. ترفيه ليس إلا
أي والله ترفيه
نسبة كبيرة من الحايمين في المسيرات ديل .. حايمين ترفيه ليس إلا
دي بلد لا فيها هايد بارك .. ولا شانزليزية .. وبتقفل من الساعة سبعة مساء.. وأفضل وسيلة ترفيه فيها خيمة عزاء او زواج .. قطيعة وونسة كوره
مشيهم في المسيره فرصة عشان يفرقوا عن أنفسهم ويكسروا روتينهم اليومي .. ست الشاي تقوم تاخد ليها خطوتين مع المسيرة .. اهو تحرك عضلات صلبها الخدرت من القعدة الطويلة في البمبر
وسيد المناديل .. يغير نغمته البكورك بيها اليوم كله من .. منااااااديل .. منااااااديل .. لي تسقط تسقط Usa
المناضلين هنا في البلد دي .. بجنسياتهم السودانية الما غيروها .. ويمكن يكون حتى الآن ما تحصلوا على أوراقها الرسمية البتثبت سودانيتهم .. لضيق ذات اليد
غفير المستشفى .. رغم عنجهيته وصلفة وتخيله انه ماسك باب الجنة .. ياهو المناضل
الدكتور البايت ورديته .. رغم قندفته و تشخيصه الغلط في مراة كثيرة ورشتاته البتصرف دواء فاسد من صيدليات فاسدة تابع لإدارة دواء فاسدة .. دي ياها قدرته وعرفته والمتاح ليه .. وهو ياه المناضل
الموظف البركب الترحيل سبعة صباحا وبرجع أربعة عصر .. رغم كسيره للوكت وفطوره الساعة ونص... وبرقراطيته .. ياهو المناضل
بت الجامعة القاعده داخلية .. وحايمة حوالينها شبهة أخلاق .. بتحاول تقراء وترفع من مستواها وتحسن وضعها الاجتماعي .. ياها المناضلة
المدرسة البايره ست التوب الابيض والتبشير .. رغما عن عدم كفاءتها.. وعقدها النفسية السببها ليها المجتمع ده .. دي ياها قدرتها وإمكانياتها .. وهي المناضلة
الحاجة والوالدة وست البيت القاعدة في البيت بتجهز في الغداء للبفتشوا في البستر الناس من العوز ... رغم القطيعة والنميمة مع الجارة .. هي المناضلة
المهندسة الواقفة وسط دشليون عامل .. مركزين في وشها ونهديها اكتر من تركيزهم على ملاحظاتها المهنية المفيده.. واقفة عز الهجير ولفح الشمس رغم المجهود الوافر العملته هي والكريمات عشان ما ينضر وشها ويفتح ..... جابرها واجبها الاجتماعي والبيت الفاتحاه وبتصرف عليه .. وطموحها المهني المتمنياه لي روحها .. هي حقيقي المناضلة
كل من اتحكر في البلد دي .. بقدم مثقال ذرة من جهد .. في ضل وضع اجتماعي متردي وحكومة ظالمة .. وما شرد وشتت زي كتيرين .. هو المناضل
المناضل ماهو البطالب بتغير حكومة من على البعد .. وعبر صفحات النت .. عشان تجي حكومة غيرها .. فقط
المناضل الحقيقي هو البغير في واقع بلد .. بجهده وعرقه وتواجده ..
واهما شي انو يسوي ده وهو حامل جنسية بلده ومعتز بيها .. لا بغيرها ولا بجيب ليها ضرة
يا مناضلي الجنسيات الأخرى
ما تتهموا الناس في وطنيتهم
وأخر من يفعل ذلك .. أخر من يدعي الوطنية ..
من يحمل جنسية غير جنسية وطنه .. وكل انتمائه لهذه البلد عبر اسلاك التلفونات وغرف الدردشة ومنتديات الحوار
|
|
 
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: Bakhaf)
|
اشكرك بشدة والله كلامك ده قدم لي افادات عن حاجات كنت محتار فيها لما اقرأ واحد من الجماعة ديل كاتب عن حاجة في الخرطوم او الفاشر او مدني لانه علي الاقل كلام زول ماعنده المام بالمشاكل المتلتلة في السودان او بالواقع المعاش او حتي قلبه علي بلده
والغريبة اكتر ناس بشاركو في المنتدي
قلت لي راجين المعونة
وراقدين علي جنسية تانية
يعني لو حرقت ماعندهم مشكلة !!!
لو غرقت خير وبركة
والمصيبة جنس فصاحة ينازعوك في الجنسية الواحدة العندك
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: امير عبد الماجد)
|
الأخوة بخاف وأمير
تحيات زاكيات
مالى أراكما تشككان فى إنتماء ووطنية من تركوا مختارين أو أجبروا علي ترك الجواز الأخضر، تلك الوثيقة التى يخرجها من لا يُوثق به لمن لا هوية له ولا عهد... هذا الجواز فاقد القيمة(فى هذا الزمان الكالح) يحمله كثيرٌ من
الإرهابيين، الأحباش، والتشاديين.. وأخيراً يعطى للعيبة الكورة (على عينك يا تاجر) بدون تطبيق شروط التجنس
المعروفة دوليا والمكتوبة فى دفاتر وزارة الداخلية والهجرة والجنسية.
هذا الجواز (المشبوه) فى كل مطارات العالم، والذى يجعل صاحبه عرضة للإتهام بزعزعة الأمن العالمى، ويزيد على حامله غير عناء ومشقة السفر، عناء؛ أقله عناء التأخير الذى يجر خلفه الكثير من المصائب.. وحتى فى مطار الخرطوم يلاقى حامله أصناف شتى من العزاب، النهب، وعدم التوقير..أخوتى لا تعيرونا بمثل هذه الوثيقة التى يمكن لأى مخلوق على ظهر الأرض أن يحملها.
هذه الوثائق الأجنبية وفرت لنا ما لم توفره لنا وثائق الوطن الأم.. وجعلتنا كـ(الطيور المابتعرف ليها خرطة ولا فى إيدها جواز سفر).. وكانت فى يوم مضى وثيقة السودان كذلك، نتمى عودة ذلك اليوم، حتى يحق لكم المفاخرة بها.
وهنا فى وطنى الثانى (كندا) حينما يسألني الأصدقاء : where have you been?
or where are you going?
أقول لهم بكل فخر: I've been to Sudan(native home/land) or
I'm going back home
نعم (back home) مصطلح مفعم بالوطنية والإنتماء؛ ولا نزايد غيرنا بالحب والإنتماء لهذا الوطن المسلوب غير الذين أرادوا له أن لا يكون.
ونحن فى وطننا الأصل نعانى من تلك السلطات الجاثمة عليكم، ولكن لا نسكت، سمها ما شئت؛ شجاعة جوازات أجنبية أو كما يحلوا لك.. ولكنها شجاعة أكتسبناها من تلك المجتمعات التى تحترم الإنسان وحقوقه الموؤودة فى وطننا الأم.. مع ذلك حنينا دوما إليه..
ذات مرة يا بخاف وأنا عائد إلى وطنى الثانى(كندا)، سألتنى مسؤولة الجوازات بمطار تورونتو where did you go وهى أسئلة روتينية.. أجبتها: i went back home.. تخيل: أنا أحمل وثائق كندية وأقول لمسؤول الهجرة الكندية انا مشيت وطنى الأصل!!
دار نقاش طويل بينى وبينها حول back home هذا البوست ليس مكانه، ولكى لا أطيل (على حد تعبير د. حسن موسى)هذه المنافى بكل ما أعطتنا له من أشياء جميلة معدومة فى وطننا الأم، إلا أنها(المنافى) لم تستطع زحزحة السودان من قلوبنا قيد أنملة..
فيا صديقنا الخواف، عشق الوطن (عندى) خليط من الحب الفطرى للأبوين وعشق الحبيبة؛ كلاهما لا يحتاج الى وثيقة..
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: mohamed osman bakry)
|
الأخوة أعداء الجوازات الأجنبية
سلام
حتى تعود لهذه الوثيقة هيبتها المستقاة من هيبة الدولة،
ويكون حامل هذه الوثيقة مقام إحترام وتقدير أين ما ذهب
نعلن تنازلنا عنها وعن فروض الولاء والطاعة لهذه الدولة الخرقاء التى تمثلها
لن نقاتلكم فى (جنازة البحر) هذى، هنيئاً لكم بها
ولكن يبقى الفيصل هو الإنتماء الحقيقى لهذا الوطن
الذى لا نزايد به على أحد لأن مكانه القلوب،
ومن يعلم بمافى القلوب غير الله!
ولا تنسو أيها الأفاضل
هذه الوثيقة (المبتذلة)
يحملها كثيرون لا علاقة لهم بالسودان
أرضه وإنسانه،
عاداته وتقاليده،
وموروثه وتاريخه
وحاضره
منهم من ساهم بعون الدولة على جعل حامل هذه الوثيقة كمن يحمل شيكاً بلا رصيد، على أقل تقدير..
قبل أن تثوروا على تاركيها، ثوروا على إعادة هيبتها
وثوروا على المرتزقة الذين يستخرجونها لمن لا يستحقونها
ثوروا على الدولة راعية هذه(المرمطة) التى تلاحق حملة هذه الوثيقة
As I said earlier, I don't carry this identity any more; however, I'm Sudanese
as much as you are, or even more
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: ود الباوقة)
|
Quote: كل من اتحكر في البلد دي .. بقدم مثقال ذرة من جهد .. في ضل وضع اجتماعي متردي وحكومة ظالمة .. وما شرد وشتت زي كتيرين .. هو المناضل
المناضل ماهو البطالب بتغير حكومة من على البعد .. وعبر صفحات النت .. عشان تجي حكومة غيرها .. فقط
المناضل الحقيقي هو البغير في واقع بلد .. بجهده وعرقه وتواجده .. |
والتحية لكل مناضلي الداخل
وهذا لا يقلل من احترامنا لمناضلي الخارج
واقدر رؤيتك اخي صاحب البوست فهناك فعلا بعض مِن من هم بالخارج يتوافق فيهم وصفك لهم .
فالعمالة والارتزاق كما هما بالخارج لا يمكن ان تنكر وجودهما ايضا بالداخل.
ودي واحترامي
ناصر موسى
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: شمهروش)
|
اخونا شمهروش
وكذلك ليس كل من يحمل الجنسية السودانية وفضل التواجد في الوطن
هو موالي للحكومة
وكمان لو مشينا لي قدام
ما كل موالي للحكومة هو غير وطني
القصد من البوست هو عدم احتكار الوطنية فقط لمن يتجرءون على النظام خطابيا تحت حماية وثائق دول اخرى
الا تتفق معي من يريد النضال يتحمل تبعاته واهم هذه التبعات انتمائه الى هذا الوطن الذي يدعي انه يناضل من اجله
يعني ما ممكن زول يقول ليك مناضل سوداني ووكت يجي تسديد حساب فاتورة النضال ينكر جنسته ويقول نادوا لي سفيري ؟؟؟!!!
النضال ما بكون بالوكالة يا شمهوروش
وانا ما بتحدث عن كل من يحمل جواز اخر
انا بتحدث عن المتشدقين بالكلام ويحتمون خلف وثائق الدول الاخري ويجردون ابناء هذا الوطن ذوي الجنسيات الاحادية من وطنيتهم
انشاء الله يكون كلامي وقع ليك
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: Yassir Tayfour)
|
ياسر طيفور
ربنا يرد غربتكم سالمين غانمين
الكثير جدا من اهل الداخل لا يحملون وثائق تثبت سودانيتهم اصلا ، فالمحك ما وثيقة فقط
القصد من البوست ده انو مافي زول يدعى انو الوطنيه حقتو براه ويجرد منها الاخرين
فان كان اهل الخارج مناضلين
اهل الداخل مناضلين دبل
ويكفي انهم قاعدين في ظل نظام جائر يعانون الامرين وقابضين على الجمر
اتفق معاك في كثير مما اثرت لكن انت شاف البورد والاتهامات تطلف قيه جزافا وبدون فرز
الجواز يا ياسر جواز السودان والجنسية كذلك
همايعبران عن السودان وليس عن الكيزان
الكيزان حالة متغيرة ان طال الزمن او قصر
وستظل الجنسية والجواز حالة ثابته باذن الله تعالى
الكعب ما جوازنا ولا جنسيتنا
الكعبة حكومتنا
وبالتالي ما كعبين من يحملون هذه الجنسية او ذلك الجواز
نحن طالبين حاجة بسيطة
اهلا الخارج ما يطلقوا شتائمهم ساكت كده
ويفرزوا الكيمان وما معناتا زول اختلف معاهم وهو داخل البلد انه موالي للحكومة
وكفاية التعامل بي مقولة استالين ( لو متذكر صاح) الكرهتنا البلي
( من ليس معنا فهو ضدنا )
| Quote: فيا صديقنا الخواف، عشق الوطن (عندى) خليط من الحب الفطرى للأبوين وعشق الحبيبة؛ كلاهما لا يحتاج الى وثيقة.. |
صدقت وانا اضيف ليهم
وموده صادقة للاخ والاخت والجار والجارة والصديق والصديقة
مع كل الود
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: Bakhaf)
|
الاخ Bakhaf
لو سلمنا بتصنيفاتك للمناضلين السودانيين اصحاب الجنسيات الاخرى
وهم من ساويتهم مع المقيمين في الخارج لسبب او اخر
فكيف نصنف امثال شوقي ملاسي وقد مكث في انجلترا منذ السبعينات يناضل
لعتق الشعب السوداني.. ومازال يحمل الجواز السوداني "الازرق" القديم
ولم تفلح اي اسباب اوضغوط لتقبله حمل اي جنسية او جواز اخر رغم فقدان
جوازه صلاحيته لاثنائه عن جوازه.. وللعلم اعرف مالايقل عن 20 شخص بنفس الصفات
وكيف نصنف الدكتورة خديجة صفوت ورفضها للجواز البريطاني لمدة 20 عام ولم تحصل
عليه الا عندما قررت زيارة السودان لتلقي العزاء ومواساة اسرتها لفقيدهم...
فلولاها ماتخرج الكثير من العاملين بالداخل من مدرسين "مفلسين رغم تاهيلهم"
ومدرسات "بايرات لكن غير معقدات"
كيف نصنف الكتاب والناشرين وغيرهم من المقيميين بالخارج ويحملون الجنسيات المتعدده
فلولاهم لما سمع العالم عن ماسي المواطنين ومعاناتهم والحملات لدعم مناضلي الداخل..
تساؤلاتك دي اسطوانة قدييييييييييييمة وهي كمن بداء قراءة الاية 43 من سورة النساء
وتوقف عند"لا تقربوا الصلاة" ففسر الاية بانها ترفع الصلاة عن السكران
فقرر ان يكون علي سكر لبقية عمره
______________________________
كحتة:
باليل ده ماشي وين ؟؟؟
ياكا الفاصل الحراري
وتعال تاني عشان تلقانا
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: Walid Safwat)
|
الاخ وليد صفوت
سلامات واحترمات
Quote: ما قادر افهم شخص بدَّل جنسيته.. أو اقلها جاب ليها ضرة جنسية ثانية.. يدعي انه سودانيي أكثر من الجميع !!!!
ما قادر افهم شخص شرد من حاكم ظالم وقام بنمرة أربعة خلى البلد .. وشتت مع أول كف أو علبة بنبان لبلاد طيرها عجم .. اختار الهروب .. ثم يدعي انه مناضل اكتر من القاعدين ومتحكرين في البلد .. رقم الضيق والضنك وظلم الحكام !!!! |
عالية ما ابتدر به البوست
لا اقصد كل المهاجرين والطافشين بل من يحتكرون الوطنية والنضال ويجردون الاخرين منها
فركز معانا يا حبه
واصحى للون
وما تشرب متاخر شديد .. عشان ما تصحى بايته معاك 
مع كل الود
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: Bakhaf)
|
سلام يا شباب
ياسر و وليد ازيكم
رغم النفس الحار في كلام الأخ بخاف الا ان كلامه لا يخلو من منطق
و يمكن اختصاره في : اذا (بعض) السادة و السيدات المناضلين بيزعموا
انهم وطنيين اكتر من غيرهم..لدرجة انهم بيتهموا من خالفهم في الرأي
بشبهة العمالة و الكوزنة..... الخلاهم (يفتحوا) من البلد شنو و يتركوها
للأوغاد ( هل هذا من النضال) مع تقديم العذر للمضطهدين و ضحايا
التعذيب السياسي ( الحقيقيين) ..
و أضيف أنا هل إذا تغير الوضع سيعود هؤلا لينضموا لعمال المدن
و كلات المواني أم هو حديث (اليدو في الموية) وكلام الليل يمحوه النهار?
?valid question isn't it
تحياتي
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: Bakhaf)
|
الضيق في شنومادام البلد وجوازه مانافعين بتناضلوا علي شنو طيب
بعدين كونوا الجنسية السودانية متوافرة للاحباش والتشاديين كماذكرت وهذا يجعلها بلا قيمة عندك شيء غريب لانوعلي الاقل الجنسية الشيايلنها انتو من العالم الاول وحامياكم في المطارات دي من حق اسياده اصحاب العيون الزرقاء والشعر الاشقر يشوفوها مانافعة لانو ادوها لبشر جايين من افريقياسود وقبيحين وجعانين
بعدين المشكلة مافي الجواز التاني وطريقة الحصول عليه والكذب في اوراق الهجرة واستغلال قضايا حية مثل الصومال والجنوب زمان ودارفور ورواندا وغيره المشكلة المنتظرين المعونة وعاملين فيها مناضلين ديل
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: نجوان)
|
| Quote: البائع المتجول.. الشايل مناديل ورق وحائم بيها في السوق العربي عز الهجير .. ويتجارى من الكشة ويزوزي عشان يمرق قوت يومه .. ده ياه المناضل ... موش زول مبرم شعره .. وضارب السقط .. مستني المنحة او المعونة حقت اللجوء .. ويومه كله قدام الكمبيوتر لأنه ما عنده شغله.. يجعجع ويتهم الناس بالعمالة |
يسلم لي كيبوردك يابخاف ياأخوي .........
والجواز الأخضر هذا أعتز به حتى لو إتمرمطت وإتبهدلت بسببه في أي مطار في العالم ولو وقفوني بسببه اخر الصف بررررررررضو مابخليه لأنو دليل إنتمائي لهذه الأمه العظيمه .......
وتصور كيف يكون الحال لو ماكنت سوداني وأهل الحاره ماأهلي تصور
| |
|
|
|
|
|
|
|
|
 Re: براحة... وطولوا لينا بالكم (المناضلين السودانيين بجنسيات غير سودانية ) (Re: ABUHUSSEIN)
|
الحبيب بخاف تحياتي وسلامي وأحببت أن أشكرك على هذا السرد الرائع وهذه الخواطر الحقيقية المفعمة بالوطنية الصادقة والخوف على وطن يتناوشه الأبناء لك التحية وأن تنسب الفضل لأهله بدء من ست الشاي إنتهاء بالمهندسة ومروراً ببائع المناديل يا لك من قاص بارع وقلم يجب أن لا يقف هنا بل انطلق بكل ثقة واقتدار فأنت قد شخصت قضية شائكة يتحاور فيها أبناء البلد وكأنهم يتحاورن في وطن افتراضي وليس وطن انجب وعلم وخرج الجميع الآن الوطن صار ملطشة والانتماء إليه مسبة وعيب في نظر الكثير ...ولكن لابد أن يأتي ذلك اليوم ويعود الفضل والسمو والرقي لهذا الوطن الشامخ وللمواطنيين المقيمين فيه كل الخير
تخريمة شترة
أرجو الانتباه في الصحف المحلية لانو هذا الموضوع جاهز لللطش سوى بعض التحسينات الصغيرة والتعديلات الطفيفة راقب عن كثب ما يكتب في الصحف المحلية
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: ABUHUSSEIN)
|
لقد نجحت الإنقاذ فعلاً في تفرقة السودانيين
ووضع ألف فتيل قابل للإشتعال والفتنة والتصنيف
للمناضلين والقابضين على الجمر داخل الوطن مني ألف تحية..
وكذلك للسودانيين خارج الوطن، حتى ولو ضاق بهم الزمن لحمل جنسيات أو جوازات أخرى
فهذا لن ينقص من سودانيتهم ولا إنسانيتهم شيئلً، إن لم يزد فيها بعداً يقصر عن إدراكه من لم يتجرع تجربة الإغتراب والهجرة حاملاً الوطن على عاتقه متنقلاً من رصيف إلى آخر بحمل تنوء به الجبال.
مادام هم السودان في القلوب فلن يضل الوطن طريقه نحو الخلاص.
فإذا كانت إيد مع إيد تجدع بعيد... فلماذا نرغم الوطن على أن يجدف بيد واحدة.
ويربنا يهدي الكان السبب.
مع التحية للجميع (بدون فرز)،
العوض أحمد الطيب
| |
|
|
|
|
|
|
|
|
|
Re: براحة... وطولوا لينا بالكم (المناضلين السودانيين بجنسيات غير سودانية ) (Re: Bakhaf)
|
لالالا والف لا ،، جزيت أخى بخاف، والله كل أصحاب المعارضة الغير بناءة والاساءات الغير سودانية ديل عشان لديهم جواز أخر وزى ما قال وأحد أخونا لو حرقت مافارقة معاهم.نحن أغتربنا من قبل الانقاذ عشان نحسن أوضاعناونساعد أهلنا نعم ولكن بشرف؟ ووالله لو يجينى بوش بطيارة خاصة فى بيتى فى السودان ويجيب لى معاهو الجواز لأرميهو فى وجهه حتى لو كنت مظلوم من حاكم أو غيره أظل سودانى وأحب هذا الجواز واحتفظ بهذه الجنسيةلأنها ليست منحة من أحد حتى لو الحاكم لحظتها علقنى فى المشنقةأو زج بى بالسجن، لأنو مصيره يتبدل ومافى شىء يدوم ظالماً كان أوعادل!!! بلاش ادعاء ونضال كاذب وأساليب للنضال بذئية وقلت حياء غير معهودة فينا؟ واساءات دينا الحنيف كان الدين هو دين فئة معينة،، ونحى المعارضين المهذبين فى الداخل وبالخارج ومازالوا بجوازهم الأخضر.ولا يغير الله مابقوم حتى يغيروا ما بأنفسهم
خالد البدرى
| |
|
|
|
|
|
|
| |
Bakhaf
امير عبد الماجد
Yassir Tayfour
محمد مختار جعفر
شمهروش
هجو الأقرع
Walid Safwat
saadeldin abdelrahman
ناذر محمد الخليفة
نجوان
محمد فرح
ABUHUSSEIN
ebrahim_ali
Elawad Eltayeb
فيس بوك
تويتر
انستقرام
يوتيوب
بنتيريست