منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 08-22-2017, 09:31 AM الصفحة الرئيسية

مدخل أرشيف النصف الثاني للعام 2006م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

قالوا وادي الهـــــوّاد شِــــرِب .. شـراباً غرّق معالِيهو ..

09-12-2006, 04:51 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


قالوا وادي الهـــــوّاد شِــــرِب .. شـراباً غرّق معالِيهو ..

    "قالوا الهـــــوّاد شِــــرِب .. شـراباً غرّق معالِيهو .."

    * وصلتني هذه العبارة عبر رسالة موبايل ..قبل فترة..رغم قصرها وعدم تشكيلها..الا انني إستقبلتها وفهمتها ..كما منحتني اليوم فرصة للكتابة ..
    ------
    وادي الهـــوّاد ..من أكبر الوديان التي تشق سهل البطانة ..
    فهو يأتي منحدراً من اقاصي جنوب شرق السهل ..ويصب في النيل تحديداً عند محطة كبوشية ..شمال شندي ..ومعروف عند المصب بإسم وادي العوْليب ..ولحظة إلتقائه بالنيل ونسبة لقوة إندفاعه فإنه يؤثر حتى في الضفة الاخرى .. وقليلاً ما تصمد معه سكك حديد السودان رغم "حديد الإنقليز ونصاحتو"..
    وادي الهوّاد يلتقي عنده معظم القاطنين سهل البُطانة واطرافها..وهو وادي عُُرف بخصوبة تربته..وينعكس ذلك في إنتاجه المطري من عيش الذرة ..رغم ان الطريقة التي تتبع في زراعته تقليدية جدا..حيث تستخدم "السلوكة" في عملية الزراعة و"المَلود" في عملية النظافة و"المُنجل" في عملية الحصاد..كما يمثل حصاده مرتعاً خصباً للذين يهتمون بتربية البهائم بانواعها..وهو ليس الوادي الوحيد في سهل البطانة وإنما هناك وديان اخرى مثل "الباساي" و"القيقي" والرويان "الذي يصب في النيل عند محطة الرويان شمال الجيلي" بالإضافة الى وادي المكابراب ومنطقة الحُفرة وغيرها من السهول الصغيرة والوديان داخل البطانة..
    قالوا الهــوّاد شربان ..
    للهـّواد ..عند اهلي في منطقة المحمية ..رغم إستقرارهم على شاطيء النيل ..معزة خاصة كما للآخرين من حولهم..وللآخرين من حول الوادي نفسه..غير انه ومنذ فترة طويلة اصبح القاطنين على شاطيء النيل اقل إهتماماً من الذين يسكنون سهل البطانة بزراعة ذلك الوادي .. وهذا يعود لإنشغالهم بالزراعة المروية على شريط النيل ..وكذلك مع تغيّر الزمن وهجرة وإتجاه الكثيرين منهم الى المدن..
    "الهواد جا" أو "الهواد قالوا شِرب" ..
    هذه المقولة تعني لهم الكثير..وعادة ما كان ياتي خبر شراب الوادي عبر الإشارة لمدينة شندي وكبوشية والمحمية والعالياب وبقية مناطق الجعليين الذين لهم علاقة بهذا الوادي ..والإشارة كانت في الماضي تاتي عبر "زول راكب فوق جمل" وهو مُرسال رسمي من عُمد ومشايخ منطقة البطانة ..الذين يمر من عندهم الوادي ..

    "الهواد قالو شِرِب"..
    يعني أن تزرع أرضك - كما الحال في الزراعة المطرية-
    بماء رباني إندلق على بطن الوادي ..وما عليك عند سماع الخبر وتأكيده إلا أن تبدأ تستعد للزراعة..وتشوف وين "ســلوُقتك" و "مـلودك" وباقي العِدة من عنقريباً خفيف ..وغطاء وما شابه ..و"الراحَلة" الماهلة ..وسيلة التنقُل ..إن كان جملاً أو ناقة فأنت الأكثر جاهزية من الذي يملك حماراً ..وعليك ان تعِّد زادك الخاص ..من دقيق وويكة ناشفة وغيرها..كما عليك بتجهيز "قِربة" الماء.. وإن لم تتمكن فعليك "بالجركانات"..وكل ما سمحت به ظروف مباصرة الحياة ..
    "الهــواد قالوا شِرِب"..
    ويصحبك امل بالحصاد الوفير "وان ربنا سهّل ..ربحان أجُر..الزراعة يا زول في اجُر أكتر منها؟؟ بس ربك يكفّي شر الآفات .."
    نعم في الزراعة أجر .. وفي الزراعة امر ..وفي الزراعة فطور وعشا ..للزارع ولأهله ولجيرانه "إن ربنا كفّاك شر "تِلتْ الزبير" ..

    "الهـوّاد قالو شربااااان": ذاكرة حُبلى بكثير من التفاصيل الخاصة ..
    ألف رحمة تغشى عمي فضل المولى ود سليمان ..عندما جاء خبر أن وادي الهواد شِـرب في بداية التسعينيات.. فقال في إشارة مبطنة منه لمنعي من السفر للقِراية :"الهواد نامن يجي القِراية والسفر طايرات..دا الهواد رُكّازتنا مهديّة من الله ..واللهِ كان ضُوقتو حِمِيسِيهو ..تجوهو من السفر راجعين ..ها ناس ها قِراية شنو المعا شراب الهوّاد؟؟؟"..

    نعم حِميسي الهوّاد معروف ..والحِميسي هو احد انواع الذرة أصفر يميل للحُمرة ..غليد الحبة ..
    ومعروف أن عجينه يعطي "كِسرة أكثر بياضاً".. بينما "الفيتريتة" الحبة البيضاء يمنح عجينها كِسرة أكثر حُمرة..
    فوادي الهوّاد وبطبيعة زراعته المطرية ينتج كثير من انواع الذرة..

    "الهوّاد شربان"..
    إذن هذا العام قالوا الهوّاد شربان ..شراباً مِغرِق حتى المعالي ..اي أن ماءه قد غطى حتى الاماكن العليا في داخله ..وانه قد سال ماءه أكثر من مرة ..مما يعني ان تربته قد اصبحت اكثر خصوبة ..وحسب تقارير العارفين بالامر أن وادي الهواد عندما يسيل ماءه اكثر من مرة ..فإن ذلك يأخِر الزراعة قليلاً ..حتى تصل درجة جفافه الى درجة معينة..وفي ذلك التأخير إقتراب فصل الشتاء ..وعندما يهب الشتاء على زرع مطري ..فهي بشرى بحصاد وفير ..
    الهـــــوّاد ..
    جدير بي أن اذكر ان مراحل نمو نبتة الذُرة .. بمسمياتها الخاصة عند مزارعي وادي الهواد -ارجو ان أكون قد تذكرتها صحيحاً- تبدأ من رمي "التيراب" بعد وخز"السلوكة" في الارض ورمي التيراب لا يتعدى اربعة الى خمس حبات كمتوسط ثم دفنه دفناً خفيفاً باصابع الرِجِل..وتبعد كل حفرة من الأخرى مقدار أكثر من متر تقريباً..وكلما تباعدت الحُفرة من الاخرى كلما كان نموها اكثر إرتواءاً ..ثم يخرج الزرع من الحُفرة فيسمونه " أضان فار" ثم ينمو قليلاً فهو "صقّار" وهنا يلزم الإجتهاد في نظافته من الحشائش ..ثم ينمو ليصل "مِتيق" اي تبدا اوراقه في الإخضرار والزيادة ..ثم مرحلة "الشَلِيخ" وهي إزالة النبتات الزائدة .. ثم بداية ولادة القندول ثم "شَرايَة" لتهيئة ولادة الحبة داخل القندول ثم "لبَنَة" وهي بداية ولادة الحبة ثم "فريك" حيث تكون الحبة لا زالت ممسكة بغطاها الصغير "البُتابة" (وفي الفريك بلِيلة ذات طعم خاص).. ثم يصبح "قاوة" اي انه اصبح قوياً ناضجاً وهنا تبدأ الأوراق في الذبول والنشاف ويُترك حتى تصل اوراقه مرحلة "الكاويق"..وبذلك يكون جاهزاً للحصاد .. والمراحل الثلاث الأخيرة تعرف بمرحلة "الحرِس او الحِراسة اي حِراسته من الطير" ..وكل هذه المراحل تتم في فترة ثلاثة الى أربعة أشهر من زراعته ..وعملية الحصاد تتم عبر قطع القندول بالمنجل ..وجمع المحصود في مكان مهيا لذلك يسمونه بالتقاة..ثم تتم عملية "الدق" يدوياً عبر "المٌدقاق" (هذا قبل دخول ماكينة "الدقاقة")..فسابقاً كانت العملية يدوياً ..والمُدقاق عود في شكل حرف T الإنجليزي ..وهذه من أجمل مراحل عمليات الزراعة في وادي الهواد ..حيث يتم العمل أكثر جماعية عبر فكرة "النفير" كما أن عملية "الدق" تتم بإنتظام جميل يصحبه غناء خاص عرف بألحان تناسب العملية نفسها ..
    وبالطبع يتم فرز "العيش" من "البُتاب" بعملية "التضرية" بواسطة "المُضراية" وهي أداة تشبه اليد باصابعها ..

    وادي الهـــوّاد ..
    عندما ياتي ذكر إسمه تقودني ذاكرتي الى كثير من التفاصيل.. اصاب الوهن أكثرها .. والى ذكريات ومشاهد يغمرني كثير من الحنين إليها ..
    ..........
    جانا اب زبد جاري من سبتُو لا دورو
    جانا اب سروب غرّق عاليهو وخورو
    ياهو الهوّاد اسقى الخــلا وعتمورو
    جِيد للزرع بدري ..وضاق غَرِف مطمورو..



    مع خالص التحايا
                   |Articles |News |مقالات |بيانات

09-12-2006, 05:18 AM

خالد العبيد

تاريخ التسجيل: 05-07-2003
مجموع المشاركات: 21247

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    العزيز قيسان
    تحياتي
    ياجعلي هوي اعمل حسابك
    هسه يجيك الدنقلاوي المهووس بشاشاويتشبك معاك:
    يا جعلي .. يا جلابي .. يا عنصري ..
    عشان كده بالله خليك من حركات الجعليين دي
    مش الهودا ده خليه يشرب ذي ما قال حميد للزيق
    وانشاء الله يسكر سكرة يني
    بتعرف يني يا جنى ؟
    سلامي للمعاك سافل وصعيد
    Quote: جانا اب زبد جاري من سبتُو لا دورو
    جانا اب سروب غرّق عاليهو وخورو
    ياهو الهوّاد اسقى الخــلا وعتمورو
    جِيد للزرع بدري ..وضاق غَرِف مطمورو..[/
    QUOTE]

    والى لقاء
                       |Articles |News |مقالات |بيانات

09-12-2006, 05:34 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)



    موقع وادي الهواد..من خلال التعديل على صورة ماخوذة من GoogleEarth..
                   |Articles |News |مقالات |بيانات

09-12-2006, 06:31 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    أخونا خالد العبيد..

    سلام ليك وللاسرة والمعاك ..


    وخلينا بالله نتلاقى هناك ..في الوادي ..


    نكمّل خبرك وتكمّل خبرنا ..



    تحايا
                   |Articles |News |مقالات |بيانات

09-12-2006, 07:19 AM

nazar hussien
<anazar hussien
تاريخ التسجيل: 09-04-2002
مجموع المشاركات: 10107

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    يا قيسان اخوي حبابك...أمانة ما جب خبر...

    الهواد...أهلنا بسمو علي كوعو خليه هو ...ما سمعت بي ود كوع الهواد...


    الهواد دا خاتي الزراعة فيه أدب دوبيت الدنيا والعالمين...

    والغريبة هناك والزراعة مطرية...وموسمية...كل زول عارف حدودو
    ما سمعنا لينا بي مشكلة ....الناس كانت تزرع وتغني وتنبسط

    بالاضافة للزراعة كان كذلك مرتع خصب للرعي الموسمي...وكل ناس
    عندهم وسم لي بهائمهم...يفكوها كلها ترعي شهرين تلاتة...
    وأخر المطاف كل زول يلم سعيتو حسب وسمها...لا بتتلخبط
    ولا بتسلبطوا في سخل زول...

    امانة ما جبت سيرة عطرة بلحيل...
                   |Articles |News |مقالات |بيانات

09-12-2006, 07:09 AM

Ibrahim Algrefwi
<aIbrahim Algrefwi
تاريخ التسجيل: 11-16-2003
مجموع المشاركات: 3102

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    جهد مقدر ياقيسان وممتع ...
                   |Articles |News |مقالات |بيانات

09-12-2006, 07:54 AM

عبد الله عقيد
<aعبد الله عقيد
تاريخ التسجيل: 09-20-2005
مجموع المشاركات: 3728

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    الجمع الجموع
    جيد لي
    بالهواد اب كوع
    جيد لي
    خريف بيتك رتوع


    كدي اسمع (الكسرة) يا نزار حسين
    وبرضها من (فيوضات قيسان)..



    التعديل.. بغرض التحكم في تشغيل الملف الصوتي

    (عدل بواسطة عبد الله عقيد on 12-20-2006, 05:49 PM)

                   |Articles |News |مقالات |بيانات

09-12-2006, 08:36 AM

nazar hussien
<anazar hussien
تاريخ التسجيل: 09-04-2002
مجموع المشاركات: 10107

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: عبد الله عقيد)

    هلا هلا...يا ود عقيد...دي عمتنا حميرا زاااااااتا...

    الله يرحمها ويغفر ليها بقدر ما ابدعت...

    دا الغنا البخلي شعرة الجلد تكلب...وتقوم شوك شوك يا ود عقيد
                   |Articles |News |مقالات |بيانات

09-12-2006, 10:45 AM

شهاب الفاتح عثمان
<aشهاب الفاتح عثمان
تاريخ التسجيل: 08-27-2006
مجموع المشاركات: 11918

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: nazar hussien)

    ما أعذب ماء هذا الوادي...!.

    واصل الجريان السلس طيبة و خصوبة.
                   |Articles |News |مقالات |بيانات

09-12-2006, 10:57 AM

ود شندي
<aود شندي
تاريخ التسجيل: 11-17-2002
مجموع المشاركات: 6

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: شهاب الفاتح عثمان)

    كل ما قول شكر القاهو فيهو قليل
    كفو بيخل العينه ام سحاباً منيل


    هيييييييييييييييييع

    عفيت منك ياقيسان
    عشا الضيفان


    نخريمه:-
    اقيف واضرع

    برسليك مخلايه بلح مع جدي مصطفي فضل المولي الشوكابي (ابسبح)
                   |Articles |News |مقالات |بيانات

11-02-2006, 02:29 AM

doma
<adoma
تاريخ التسجيل: 02-04-2002
مجموع المشاركات: 15889

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: nazar hussien)

    ها ناس ها ما قرضتونا قرض الدلوكه تدق في القلب
                   |Articles |News |مقالات |بيانات

09-12-2006, 10:49 AM

Ibrahim Adlan
<aIbrahim Adlan
تاريخ التسجيل: 08-22-2004
مجموع المشاركات: 1200

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    Quote: دا الغنا البخلي شعرة الجلد تكلب...وتقوم شوك شوك يا ود عقيد


    علي الأيمان يا ود عقيد قربت اقلع القميص في المكتب و اركز ياخي شغلكم دا يحير

    قيسان يا عبق الزمان و المكان شكرا

    في مناطق الجموعية جنوب امدرمان واد يحمل نفس الاسم مع الاختلاف البسيط( الهويدة) يقال انه عند النزوح الاول للاهل من الشمال حملوا معهم بعض من وادي الهواد

    شكرا مرة اخري لانتشال مفردات تلاشت في عصر الفضائيات ( الملود- السلوكة- المحيسي و الصفيرا و الفريك و فريك دي في بلد أبن عيونا خدر عندها معني تاني شيتا كتر

    ود عقيد ما تنسانا من كود الحفظ
                   |Articles |News |مقالات |بيانات

09-12-2006, 12:13 PM

معتصم دفع الله
<aمعتصم دفع الله
تاريخ التسجيل: 12-18-2003
مجموع المشاركات: 12722

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    كويس انو الهـــــوّاد جابك يا قيسان ..

    خليتنا نحس بي ريحة الطين والجروف وعرق أهلنا القبش ..
    ورحلة الزراعة من القبلي شيّل ..
    إلى وقت الحصاد والناس مبسوطة وفرحانين ..

    بجيك صاد ..
                   |Articles |News |مقالات |بيانات

09-13-2006, 02:52 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    اخونا نزار ..ود حسين ..
    مرحبتين حبابك ..

    Quote: بالاضافة للزراعة كان كذلك مرتع خصب للرعي الموسمي...وكل ناس
    عندهم وسم لي بهائمهم...يفكوها كلها ترعي شهرين تلاتة...
    وأخر المطاف كل زول يلم سعيتو حسب وسمها...لا بتتلخبط
    ولا بتسلبطوا في سخل زول...


    نعم ..
    بالله إتامل كيف يتابع الراعي مُراح كبير جدا من السعيّة ..
    وبتصنيف دقيق كمان ..يصل حتى دراسة نفسية ومزاج كل بهيمة ..


    حكاية عجيبة خلاص ..
                   |Articles |News |مقالات |بيانات

09-13-2006, 03:06 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    ابراهيم الجريفاوي ..

    تحايا يا صاحب..

    ودي الذاكرة ..ومحاولة إسترجاع او هروب الى عوالم اشتاقها ..


    ** تعرف يا ابراهيم ..آخر مرة مشيت وادي الهواد دا زمن زراعة ..كانت قبلي إمتحان القُدرات بكلية الفنون 91..ومن ديك وعيك ..


    كثير تحياتي ..
                   |Articles |News |مقالات |بيانات

09-13-2006, 03:36 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    * اخونا عبد الله عقيد ..
    شكراً لحِميرا ..وإضافة شتم ودلوكة لموضوع الهوّاد..
    سلامي ..
    -----------

    ** الأخ د.شهاب الفاتح ..

    ألف تحية مرورك بالوادي ..فالهــّواد يسع للكثير غير الزراعة ..خاصة وانه يشق ارض البُطانة..
    يعني اقلاّها بكون فيهو دوبيت ..شفتا كيف؟؟



    -------------
    *** الأخ ود شندي ..
    سلام يا زول..
    وانا في إنتظار مخلاية البلح ..حتى ما تقول رمضان جا؟؟ ..
    تحياتي ..


    ------------

    **** الاخ ابراهيم عدلان ..
    مرحباً بك ..
    وشكرا للمعلومة :

    Quote: في مناطق الجموعية جنوب امدرمان واد يحمل نفس الاسم مع الاختلاف البسيط( الهويدة) يقال انه عند النزوح الاول للاهل من الشمال حملوا معهم بعض من وادي الهواد

    وكن معنا ..
    تحياتي



    -----------------
    **** عزيزي معتصم دفع الله ..
    جميل أن نلتقي في هذا الوادي ..يا زول يا جميل ..
    كتير تحياتي ..



    --------------
    والتحايا لكم جميعاً مرة أخرى ..
    للمرور عبر هذا الوادي ..وعذرا إن كنت قد رديت عليكم جُملة ..
                   |Articles |News |مقالات |بيانات

09-13-2006, 06:57 AM

JAD
<aJAD
تاريخ التسجيل: 02-05-2002
مجموع المشاركات: 4768

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    جدير بي أن اذكر ان مراحل نمو نبتة الذُرة .. بمسمياتها الخاصة عند مزارعي وادي الهواد -ارجو ان أكون قد تذكرتها صحيحاً- تبدأ من رمي "التيراب" بعد وخز"السلوكة" في الارض ورمي التيراب لا يتعدى اربعة الى خمس حبات كمتوسط ثم دفنه دفناً خفيفاً باصابع الرِجِل..وتبعد كل حفرة من الأخرى مقدار أكثر من متر تقريباً..وكلما تباعدت الحُفرة من الاخرى كلما كان نموها اكثر إرتواءاً ..ثم يخرج الزرع من الحُفرة فيسمونه " أضان فار" ثم ينمو قليلاً فهو "صقّار" وهنا يلزم الإجتهاد في نظافته من الحشائش ..ثم ينمو ليصل "مِتيق" اي تبدا اوراقه في الإخضرار والزيادة ..ثم مرحلة "الشَلِيخ" وهي إزالة النبتات الزائدة .. ثم بداية ولادة القندول ثم "شَرايَة" لتهيئة ولادة الحبة داخل القندول ثم "لبَنَة" وهي بداية ولادة الحبة ثم "فريك" حيث تكون الحبة لا زالت ممسكة بغطاها الصغير "البُتابة" (وفي الفريك بلِيلة ذات طعم خاص).. ثم يصبح "قاوة" اي انه اصبح قوياً ناضجاً وهنا تبدأ الأوراق في الذبول والنشاف ويُترك حتى تصل اوراقه مرحلة "الكاويق"..وبذلك يكون جاهزاً للحصاد .. والمراحل الثلاث الأخيرة تعرف بمرحلة "الحرِس او الحِراسة اي حِراسته من الطير" ..وكل هذه المراحل تتم في فترة ثلاثة الى أربعة أشهر من زراعته ..وعملية الحصاد تتم عبر قطع القندول بالمنجل ..وجمع المحصود في مكان مهيا لذلك يسمونه بالتقاة..ثم تتم عملية "الدق" يدوياً عبر "المٌدقاق" (هذا قبل دخول ماكينة "الدقاقة")..فسابقاً كانت العملية يدوياً ..والمُدقاق عود في شكل حرف T الإنجليزي ..وهذه من أجمل مراحل عمليات الزراعة في وادي الهواد ..حيث يتم العمل أكثر جماعية عبر فكرة "النفير" كما أن عملية "الدق" تتم بإنتظام جميل يصحبه غناء خاص عرف بألحان تناسب العملية نفسها ..



    الأخ الفاضل قيسان ..

    لك التحيات المعطرة بعبير المحريب والنال ..

    قرأت هذا الموضوع الجميل حتى آخر قطرة ..

    وأزيد بأن هناك وادي شبيه بهذا الوادي يسمى "أب سعنة" ..


    سردك لمراحل نمو العيش جميل مع بعض الاختلافات عن تسمياتنا ..

    نسمي مراحل نمو العيش على النحو التالي:

    شوكة "طاعن"، أضان فار، سواسيو، فراريج، جداد، صقور، لتيبة، حملة (بكسر الحاء والميم المهملة)، شراية، لبنة، فريك، نجّم، قاوى ، ثم مرحلة الجفاف للقطع والجمع والدق ..

    أما الكاويق فهي عندنا تطلق على ثمار البامية عندما تتجاوز المرحلة الرخوة، وهي بذلك لا تصلح للطبخ وإنما تجفف لعمل بوردة الويكة، أو يترك ليصبح تيراب ..

    التهنئة لأهلي العزاز في أدنى سهل البطانة بمناسبة شراب واد الهوّاد .. وعساه يعود عليكم بالخير الوفير ..

    جاد
                   |Articles |News |مقالات |بيانات

09-13-2006, 07:12 AM

Adil Osman
<aAdil Osman
تاريخ التسجيل: 07-27-2002
مجموع المشاركات: 10193

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: JAD)

    شكرآ يا قيسان على هذا البوست الممتع. والشكر لباقى الاخوة. دعونا نكتب بالتفصيل عن السودان وعن الحياة السودانية. دعونا نستنطق هذه الروح السودانية فى الشمال او فى الشرق او فى الغرب او فى الجنوب، رغم الحروب والماسى. ولك مخلاية بلح يا قيسان اصنع بها ما تشاء. كله رطبآ او اعصره سائلآ. فالشربوت ود عم الدكاى ود خالة البكرى وهلم جرآ!

                   |Articles |News |مقالات |بيانات

09-13-2006, 08:26 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    الأخ العزيز جاد..
    Quote: شوكة "طاعن"، أضان فار، سواسيو، فراريج، جداد، صقور، لتيبة، حملة (بكسر الحاء والميم المهملة)، شراية، لبنة، فريك، نجّم، قاوى ، ثم مرحلة الجفاف للقطع والجمع والدق ..

    شكراً على المُداخلة الضافية ..
    وجميل جدا أن تذكر مراحل نمو العيش ..بمسمياته التي ذكرتها أنت ..تراني قد ذكرت عبارة "ارجو ان أكون قد تذكرتها صحيحاً"..
    وعلى اي حال أنا بتفق مع مسمياتك ..لانني أري هي الاصح ..وبالفعل هناك السوسيو ..واللتيبة .."معقول تروح علي اللتيبة؟؟؟
    واللتيبة تحديداً؟؟ وهي قد تم ورودها في الغناء والدوبيت ..فالمرأة التي يوصفونها بأنها "لتيبة" فذلك يعني جمالها العالي ..

    و في الدوبيت وردت كلمة اللتيبة كثيراً:
    لتيبة الوادي الزرق شاتيها
    أو
    لتيبة مُدلق الوادي ..

    اللمين عبد الفغار في واحدة من أغانيه قال:
    إنتي لتيبة ..إنتي شراية ..

    ..شوف الناس ديل عليك الله ..


    شاكراً لك تعقيبك مرة..على موضوع الوادي وزراعة العيش ..

    تحــايا
                   |Articles |News |مقالات |بيانات

09-14-2006, 05:04 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    عزيزي عادل عثمان..
    سلام ..
    Quote: دعونا نكتب بالتفصيل عن السودان وعن الحياة السودانية. دعونا نستنطق هذه الروح السودانية فى الشمال او فى الشرق او فى الغرب او فى الجنوب، رغم الحروب والماسى


    نعم ..هي محاولة في هذا الإتجاه ..

    ومشكور على الهدية..وعلي "الخيارات" في إستخدامات "البلح" برضو..وما تنسى الموضوع هنا موضوع "عيش الذرة" ..
    وعيش الذرة إستخداماته متعددة كما تعلم غير إستخدامه الاساسي في الأكل ..
    المرأة السودانية البسيطة أعادت تزريعه فأنتجت الحِلو مُر "الآبري" بأنواعها..
    وخمَّرته فأنتجت شراباً يذهب بالعقل..
    كما عجنته مع أشياء أخرى فأنتجت "الدِلكة" للزينة ..!!!
    - "رحم الله استاذنا أحمد الطيب زين العابدين" ومنظوره السودانوي في هذا الإتجاه..



    خالص تحياتي
                   |Articles |News |مقالات |بيانات

09-16-2006, 00:24 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)



    --------------


    -------------
                   |Articles |News |مقالات |بيانات

09-16-2006, 03:58 AM

تولوس
<aتولوس
تاريخ التسجيل: 06-06-2004
مجموع المشاركات: 4128

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    قيسان حبابك ود العم ..



    وحباب الهواد عقاب الخير ومطمورة الزاد

    وكمان طريت الهودي شمال البطانة وشرق عطبرة
                   |Articles |News |مقالات |بيانات

09-16-2006, 04:46 AM

أبوبكر عبد القادر العاقب
<aأبوبكر عبد القادر العاقب
تاريخ التسجيل: 08-02-2006
مجموع المشاركات: 348

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    الأخ الكريم قيسان (أو غسان)
    تحية عابقة بريحة الدعاش وخالية من الشرا، وحات معزّة وادي الهواد عندك واصل في هذا السرد ، أنا أحب هذه التفاصيل جداً



    Quote: واللتيبة تحديداً؟؟ وهي قد تم ورودها في الغناء والدوبيت ..فالمرأة التي يوصفونها بأنها "لتيبة" فذلك يعني جمالها العالي ..

    وقد وردت هذه الكلمة في المثل المعروف الذي يقال للشخص الذي يقوم بأمر مخالف تماما لما هو معروف فيقولون "جِنْ أم صباحي العيش لتيبة وهي تحاحي"، والمحاحاة بالطبع هي أن يصعد صاحب الزراعة على راكوبة مرتجلة ويحرك قطعة قماش في الهواء وأحيانا يصيح طاردا الطير عن العيش الذي يكون لبنة. أما عندما يحاحي الشخص الطير والعيش ما زال لتيبة فذلك يعني أن الشخص جنّ إذ ليس هنالك ما يأكله الطير حتى تحاحيه عنه.
    أما السلوكة والملود والحكاكة التي يزال بها الطين عن الملود وماعون التيراب والموص أو الغُباشة والدبليبة وتلك المسميات فهي بحاجة إلى توثيق دقيق وصادق ولك صادق المودة.
    دمت يا حبيب وأنا معاك

                   |Articles |News |مقالات |بيانات

09-16-2006, 08:20 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)



    * السلوكة كما عند مزارعي وادي الهوّاد..وسلوكة الزراعة المطرية تختلف قليلاً من سلوكة الزراعة على أطراف النيل "الجروف" ..
    ---------------

    مرحبيتين حباب تولوس .."زول المحمية الضارِب كسلا"..
    كيف الحال ..
    نعم الهودي ..ايضاً من أماكن الزراعة المطرية في البطانة ..سمعت به كثيراً..
    ولست متأكداً إن قلت ان الهودي له علاقة بوادي المكابراب المعروف ..والذي يصب عند محطة الزيداب..

    على اي حال مرحباً بك ..والوادي يسع للجميع وللكثير..

    تحايا
                   |Articles |News |مقالات |بيانات

09-17-2006, 02:41 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    الأخ ابوبكر عبد القادر العاقب..
    مرحبتين حبابك في وادي الهواد ..
    ولا عليك فالاسم المقصود قيسان ..مدينة من أجمل المدن السودانية ..
    خاصة في فصل الخريف ..
    -------------

    وشكراً على المثل العجيب ..

    "جِنْ أم صباحي العيش لتيبة وهي تحاحي"..

    والمحاحاة علي اللتيبة ضرب من الجنون ..او فلنقل "شفقة منها ساكت" ..
    وذلك رفقاً بام صباحي ورفقاً باللتيبة
    والسيرة التي نحبها ..

    ويا زول تعال واحكي لينا ..
    ما دام "كُراعنا مكتّفة من المشي للهواد" خلينا نمشي ليهو بالكتابة هنا ..



    خالص تحياتي ..
                   |Articles |News |مقالات |بيانات

09-17-2006, 07:59 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)



    لو لا ...
    ولو لا ...
    ولو لا ...
    لكنت الآن كما ابدو في الصورة ..
    نعم حينها سيعلق عليّ اهلي ..قائلين:
    "هوي يا زول هدومك دي ما هدوم زولاً ماشي يزرع ..
    دحين اول شي غيّر هدومك ديل..
    وشيل باقي عِدتك اللازمة..
    وبعداك تعال "إتشبّر" في المشي للزراعة"..
    فالملابس الناصعة لا تدل على الزراعة وانما "شغل أفندية ساكت"..
    إنتا قايل الزراعة دي لعب؟؟
    اعرفهم جيداً ..فهم اهل صَدَف وتوجيه..
    ولكني سالتحق بهم عبر هذه "الصورة" ..
    حتى أعيد حفظ الكثير من الدوبيت..والحكاوي ..
    والنم ..وتفاصيل اشتاقها ..
    واحتاج "رؤيتها" من جديد ..
    "إعادة إكتشاف؟؟"..
    ربما ..
    ولكن المؤكد انه هروب من البندر القبيح دا ..
    !!!!!!!
    --------------

    -كما ورد في مداخلة أخونا نزار حسين - أن الكل يعرف حدود داره في وادي الهواد رغم أن الزراعة موسمية وربما بعد عدد من السنين..
    فهم يحفظون الحدود المرسّمة تقليدياً داخل الوادي ..وحدة قياس مساحة الارض هي "العُود" وهي مسافة خطوتين مكتملتين "شبحتين"..كما للإدارة الاهلية من عٌمد ومشايخ دورهم في حفظ الحدود وفض نزاعات التداخل..
    "نذكر منهم على سبيل المثال العمدة ود حاج الطاهر الذي سُميت عليه "منطقة التِميد -الواقعة شمال شرق شندي تقريباً" كما انها على طرف وادي الهواد ايضاً..
    فمن له ارض إستطاع الذهاب لزراعتها فبها ..وإن لم يستطع أوكل عليها آخر بنظام "التزرِعة" ..
    اي ان يمنحه الارض مقابل نسبة محددة من المحصول "بنسبة العُشُر تقريباً"..يسمونه "الكرِج"..

    وادي الهواد ..راودت أهله..كثير من الأفكار لتطوير ارضه الى مشروع مروي..منذ زمن طويل..وصلت حد تكوين اللجان ..
    وبعض المشاورات بين ملاّكه من هم على شريط النيل ومنهم في منطقة البطانة ..هذا في السابق ..
    اما الآن فلا أظنهم في حاجة الى تجديد تلك الأفكار -حسب رأيي- فالحال الذي وصلت له الزراعة في السودان بفضل "تِلت للطير وتلت للإسبير وتِلت للزبير ومطالَبين حق الخيش"..وإنهيار المشاريع المروية الكبرى منها والصغرى..لا يبشر بنجاح فكرة كهذه..

    عليه ..
    يظل الهواد وادي عادي كأرض زراعة مطرية تقليدية..ولكنه عالم حافل بكثير من التفاصيل الخاصة..




    تحايا
                   |Articles |News |مقالات |بيانات

09-30-2006, 02:42 PM

معتصم الطاهر
<aمعتصم الطاهر
تاريخ التسجيل: 11-26-2004
مجموع المشاركات: 4209

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    أردت أن اطيل اقامتى هنا قليلا ..
                   |Articles |News |مقالات |بيانات

10-17-2006, 04:39 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    ترى هل رجع اهلي من وادي الهواد للعيد؟؟!!!
    نعم اعلم انهم سيعودون لبيوتهم للعيد ..
    سيتركون بعض الافراد لمراقبة زراعتهم..
    فالزراعة المطرية سهلة لا تحتاج بعد زراعتها إلا للنظافة..
    والباقي يحسب كمراقبة وإهتمام ..


    وكيف حال الوادي؟؟
    اتمنى الا تكون هناك حركة لآفة ما ..
    ببركة هذا الشهر وأنتو مع زراعتكم وصايمين ..
    ربنا يقوّى الرزق منها وفيها ..
    ويعشيكم منها ..



    وكل سنة وانتو بي خير ..


    تحايا للجميع
                   |Articles |News |مقالات |بيانات

10-17-2006, 05:18 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    -------------------


    ----------------

    كل عام وانتم بخير ..
                   |Articles |News |مقالات |بيانات

10-17-2006, 06:51 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)



    --------------------
    بيوت حِـلتنا ..
    وبيتنا ..
                   |Articles |News |مقالات |بيانات

10-17-2006, 07:11 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    يا عز ..

    راجيك في الحوش البراني .

    كمّل ملاواة البنادر ..
    سافلها و الصعيد ..
    برجاك غفيان و مشحتف للحكاوي الطاعمة .
    كمِّل ملاواة البنادر الشينة يا وليد ..
    و تعال ..
    راجيك في الحوش البراني .


    يا همبريب تقّل حمولة الشوق ..
    للبلد السمومها أمان .
                   |Articles |News |مقالات |بيانات

11-02-2006, 02:59 AM

doma
<adoma
تاريخ التسجيل: 02-04-2002
مجموع المشاركات: 15889

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    قيسان حلتكم جت عليها ضاربه بيبانا وشبابيكا لو ن " زينب"
                   |Articles |News |مقالات |بيانات

10-30-2006, 04:40 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)


    ------------------------
    نعم هذه الايام هي ايام الكَـديب ..
    مرحلة هامة جداً من مراحل الزراعة ..والكديب او "الحَـش" هو نظافة الزراعة من الحشائش وهو مرحلتان الأولى عند بداية الزراعة وتكون خفيفة وسريعة والثانية تكون متأنية خاصة إذا هطلت امطار بعد الزراعة..وفي وادي الهواد ولتقليدية الزراعة فيه ..فإن الآلة المستخدمة في الكديب هي المَلود..بالإضافة الى النظافة اليدوية ايضاً في حالة بعض الحشائش..
    (ولا أدري ان كانت "الحزم التقنيّة الحديثة للزراعة" قد جادت بآلة بديلة للملود في مسالة نظافة الزراعة المطرية أم لا..و بالأمس قرأت خبراً يقول:"..أن حكومة القضارف تتجه لاستجلاب عمالة للموسم الزراعي من إثيوبيا لمقابلة أعمال الكديب والحصاد نسبة لقلة الايدي العاملة واتساع رقعة الارض المزروعة هذا العام..)..!!!!

    الغَباش و الغِريراء ..والضِريساء..والخُدرة ..وغيرها..هي من حشائش وادي الهواد..

    والعمل بالملود معروف بانه صعب..ولعل ما ورد على لسان احد "مغني البطانة" -على ما اذكر- معللا سفره كـ "همباتي" بدل من الزراعة قوله:
    ......
    شِـن جابِر علي الحَش والملود الحار..


    فالتحية لمن يكابد شُغل الملود الحار ..في هذه الايام في وادي الهواد او في اي ساحة خضراء من ساحات بلادي..

    ---------------------------------

    -------------

    اخونا عماد عبد الله ..
    صديقي في دائرة اللون ..
    سلام عليك ..وعلى من معك ..
    البنادر ..لا أدري يا صديقي هل هي التي تتمسك
    بنا ام نحن الذين نتمسك بها؟؟
    على اي حال خليك مستني ..وراجي..في نفس الحوش ..
    فهذه بعض من حالات الهروب ..

    أكان ينفع ..!!

    سلام يا صاحبي ..
                   |Articles |News |مقالات |بيانات

11-01-2006, 06:17 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    ما دام أم قُجة واردة وسادرة بالمسدار
    شِن جابِر علي الحَش والملود الحار
    إبل البعشي مِريّتُو قبل الجار
    نوديهو دورين غرِب سـنار
    ------------------------------------
    نعم ..
    هذا قول لشاعر همباتي ..يقول ما دام توجد ناقة ترد الماء وترعى بوديانها ..فما الداعي للعمل بالزراعة والملود المتعب عمله في نظافة الزراعة..سوف استهدف إبل الذي يهتم بعشاء زوجته وعياله قبل جاره وهذه إشارة لبخله حسب وجهة نظر الهمباتة .. ولذلك سينهبون منه إبله ويسافرون بها لمدة إسبوعين غرب سنار ..حتى لا يلحق بهم ..

    عليه هذ إشارة الى ان العمل بالزراعة شاق وخاصة فترة النظافة بالملود ..ومعروف في وادي الهواد وجود العمال الذين يعرفون بـ"بالكِريان" ومفردها "كَري"..اي الأجير الذي يعمل بمقابل زهيد..ولعل الكلمة وردت في اغنية الهدهدة(النوم النوم تعال .."بكريك" بالدوم ..تعال ..).. اي أمنحك الدوم مقابل..
    ففي ايام النظافة والحصاد يستنجد الزارعون بـ"الكِريان"..وقد يكون المقابل مالاً او عيشاً من الحصاد حسب الإتفاق ..






    -------------------------
    ** ساحاول لاحقاً إنزال مقطع مسموع من اغنية "حميرا" التي ذكرت فيها كوع الهواد..كما اشاروا إليها الاصدقاء نزار وعبد الله عقيد ..
                   |Articles |News |مقالات |بيانات

11-02-2006, 00:37 AM

doma
<adoma
تاريخ التسجيل: 02-04-2002
مجموع المشاركات: 15889

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    وي سلوووووووووووووووووووووووم يا قيسان !!
    خوه الحميلات مالك قطع الخبر علك طيبه والعروس كيفنها؟؟؟ اها زارعين مقد ولا حميسي؟؟؟
    اعصر علي الويكه من غيرها العصائد دي ما بتتبلع.
    باكر السوق باخدلك رطلين سكر وووقيه شاي حب من علي الرباطابي كمان قالك عندهم عجوه سمحه بالحيل . وبغشي ود ابو نخيله اشوف العراقي خيتوا ولا لسع وان الله ادا العافيه يوم السبت بنجي سادرين تب
                   |Articles |News |مقالات |بيانات

11-02-2006, 01:01 AM

abuguta
<aabuguta
تاريخ التسجيل: 04-20-2003
مجموع المشاركات: 8269

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: doma)



    جميل هذا البوست..
    وجميل صاحبه كعادته دائما

    تعبنامن عالم التقنية والتكييف والشراب البارد واكل المحاشى والدونات..
    وشكرا لهذا الدفق والشجرة المخضرة الظليلية الرويانة من وادى الهواد
    ..دنيا الزراعة والحش والملود والسلوكةوشراب الغربة...تعكير العكارة
    وحسكلها الذى يسبب لى لذة العشراقة..نقلتنا الى ماضى البداوة..والعيشة السمحة
    ..اضف الى ما ذكرت من تفاعلات الحرفة ..الرقاعة..وهى الفجج التى لم يحالفها النمو..
    عندنا فى غرب الجزيرة وادى مثل واديك يسمى ابوحبيل..اهل قبيلتنا التى يشك فى نسبتها
    الى الجعلين او الكواهلة..لهم اراضى تروى مطرى تزرع خريفيا تمسى البلدات..او التروس
    فبعضها جنت عليه ساياسات خاطئة..فقطعت طنضبه واراكه..وسمته سندسا..ففارقت السندسية ارضه
    فوادى ابو حبيل حين يفيض..يتغنى الرعاة باراجيزهم
    داك ابوحبيل كاكن وزازنو...
    بشرب لبن خايدة
    وبخلى العيش لمساكينو..
    شكرا لهذه الاستراحة..
    ولصورك التى تركتنا نشارك اهلنا الجميلين
    موسم المسور...
    اتمنى ان يراه رجل البطانة الجميل
    شنتييييير
                   |Articles |News |مقالات |بيانات

11-02-2006, 01:07 AM

osama elkhawad
<aosama elkhawad
تاريخ التسجيل: 12-31-2002
مجموع المشاركات: 11013

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: abuguta)

    عزيزي قيسان
    شكرا على هذا الامتاع.
    المشاء
                   |Articles |News |مقالات |بيانات

11-02-2006, 06:15 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    اشارت العزيزة doma في مداخلتها وسؤالها عني الى "خُـوة الحِميلات"..
    وهي إشارة جميلة و"ممسوخة" بدليل الرمز القرافيكي "للغمزة"..
    "خُـوة الحِميلات"..
    فرعاة الضان عندما يسرحون يفرزون الصغار لحالها ..ويتركونها عند "التاية" او البيت ..
    فتلعب مع بعضها طول النهار..وعندما تعود امهاتها من "السَرحة"..كل واحدة تشوف أمها وين وتمشي ترضع وتنسى صاحبتها..
    بل و"تدفِرها" بعيد إذا حاولت ان تشاركها رضاعة امها ..
    وهي مقولة ماخوذة من بيئة ..هي نفس بيئة وادي الهواد..
    معنى "خُُوة الحميلات" أظنه اقرب لمعنى "اللِقى احبابو نسى اصحابو"..

    أليس كذلك ؟؟

    ----------
    عموما يا زولة مرحبتين حبابك في الهـوّاد..


    وبجيك راجع

    (عدل بواسطة gessan on 11-02-2006, 06:19 AM)

                   |Articles |News |مقالات |بيانات

11-04-2006, 08:33 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    شكراً عزيزي abuguta ..
    على زيارة الهواد ..
    وشكراً لتعريفنا بواديكم "ابو حبيل" و"وِزينُو البِكاكي".. والبلدات والتروس ..
    و"التروس" ذكرتني بنمة "ضاعت مني بدايتها" تقول :
    .......
    الوادي شربان وتِروسو إتسّقن
    إن دايرني أتوب من البنات وأتيقن
    أمنعوا الطالبات من البيوت لا يمرقن

    كذلك "طُنضُب"ابو حبيل الذي تم قطعه ..فإن وادي الهواد لا يخلو ايضاً من أشجار الطُندُب ولعل تسميته بـ"أب سروب "دلالة على وجوده ..


    وليت صديقنا "شـنتير" يمر ليتحفنا بالمزيد عن هذه السِـيرة ..
    فالرجل يعرف الكثير .."بس كيفن يتلقي "..
    له ولك وللجميع التحية ..
                   |Articles |News |مقالات |بيانات

12-05-2006, 07:30 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    تحايا صديقي اسامة الخواض ..
    ومرحباً بك في الوادي ..

    ************
    هوو لي ..هوو لي ..
    دق العيش بالقمرا
    هوولي ..
    وام راسين ناراً حمرا
    هوولي ..هوولي ..
    دق العيش بالعِصي ..
    هوولي ..
    والحديث قِسي ..
    هوولي ..هوولي ..
    قول لأم سوار ..
    هوولي ..
    عيّشنا وحصدنا مال ..
    مقطع من أغاني الحصاد في وادي الهواد ..يترنمون بها داخل "التقاة" أثناء "دق العيش" يدوياً ..
    وهم في جماعة كما هو معروف بحسب فكرة النفير ..

    ******



    مرفق هنا ..
    نموذج آخر من أغنيات فرقة "حـِميرا"..- ألف رحمة ونور على من رحل منهن وألف تحية لمن بقي- وهو يخص اغنية توصيف الشخص الممدوح بأنه "الهواد أب كوع" وأن بيته المفتوح دائماً مليء بالخير كأنه خريف مُرتع .. كيف لا تذكر حميرا الهواد في غنائها وهي كانت من المغنيات المشهورات في المنطقة وبيتها في كبوشية لا يبعد سوى خطوات من مصب وادي الهواد في النيل ..
    الليلة جيد لي ..
    حويتو الحي ..
    يا يمة عيني ..انا ..
    الليلة جيد لي ..
    بالخلف الكي ..
    الليلة جيد لي برايا
    جيد لي تسلم يا عشايا..

    وكوع الهـواد هي منطقة ينحني و"يكوِّع" فيها الوادي أثناء مسيره وقبل مصبه بقليل ..وهي منطقة معروفة بخصوبتها وإنتاجها العالي..

    والف تحية لمن يحرس زرعه ويعتني به هذه الايام.. وكله امل وعشم
    في حصاد وفير وعشاء مشبع من عيش الهواد..
                   |Articles |News |مقالات |بيانات

12-05-2006, 08:12 PM

SAIF MUstafa
<aSAIF MUstafa
تاريخ التسجيل: 11-27-2006
مجموع المشاركات: 1314

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    Checking in
    Will be back in Arabic
                   |Articles |News |مقالات |بيانات

12-20-2006, 09:02 AM

gessan
<agessan
تاريخ التسجيل: 02-05-2002
مجموع المشاركات: 746

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    ترى ماذا يفعل مزارعي وادي الهواد هذه الايام؟؟
    يا ربي ..العيش بِقَى للحِراسة خلاص؟؟

    فايام "الحرِِس" تكون اكثر الايام راحة ..حيث تتحول المهام الى مراقبة فقط ..
    و"محاحاة" للطير بالذات في الصباح الباكر ..وما بعد المقيل ..
    وفي هذه الايام تحلو الامسيات هناك كثيراً ..حيث تعلو اصوات النم دوبيت وجابودي..

    -----------------






    مرفق نموذج مسموع لدوبيت مُغنى من منطقة البطانة ..بصوت الشاعر الغناي الصِدِّيق ود عباس ..احد اجمل المغنين الذين سمعتهم في أداء هذا النوع ..
    وهنا تسمعه يتغنى بدوبيت لشعراء مختلفين منهم أحمد ود عوض الكريم وود ضحوية الشاعر الهمباتي ..وهو نموذج ماخوذ من تسجيل شعبي متداول ..
    كما أخذت في النموذج هذا لونين من "الأداء اللحني"للدوبيت عند ود عباس ..
    ارجو ان يكون فرصة للوقوف على هذا النوع من التراث الشعبي ..ومن افواه مغنيه
    او رواته الشعبيين مباشرة ..لضمان سلامة جماله ..

    كما ان السمع بِقطَع الشك في مسألة الكتابة والتنوين لتوصيل النطق الصحيح للكلمات ..
    لاحظ مثلاً في النمة الاولى في النموذج فهي كتابةً تقول:

    ناس جبر الله قاعدين في البِيوت ما بخترو
    من كُبي ..وكشف حال الحريم ما بفترو
    أخير اختِر براي أسد الرضيمة بنُترو
    صاحبي إن ذلى ما بَفشاهو دِيمة بسُترو

    فما أجملها سمعاً..

    -----------------------



    مرحباً بك..
    عزيزي سيف مصطفى ..
    وفي الإنتظار ..
                   |Articles |News |مقالات |بيانات

12-20-2006, 09:33 AM

سمية الحسن طلحة

تاريخ التسجيل: 11-18-2006
مجموع المشاركات: 4712

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: gessan)

    وأخر المطاف كل زول يلم سعيتو حسب وسمها...لا بتتلخبط


    قشِّـك قلـّع الدُرّاب وطاتـــو إنحلـّت
    وفي الزكك البشُق مُريَاح سعيتك تلـّت
    فيك نزل أب لساناً بى قبيح مااتفلـّت
    مجدّعيـن بعيـد خايفيـن الرّزق إتخلـّت
    ودالشلهمة

    ياخوى القوقل إيرث دى مااالا ماظهرت لنا أبودليق... والله شعراها قالوا
    فوق الهواد سماحة كلام... بجيبو ليك المرة الجاية بإذن واحد أحد.
    ودمتم.
                   |Articles |News |مقالات |بيانات

12-20-2006, 04:20 PM

معتصم ود الجمام
<aمعتصم ود الجمام
تاريخ التسجيل: 04-22-2003
مجموع المشاركات: 3261

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: سمية الحسن طلحة)

    العزيز عزيز
    نصيحة من حبيب
    اجعل القلم صديقا لتلك الريشة
    عزيز
    جد انت كتاب
    وليك كتابات في البورد من اجمل ما يكون
    ومازلت ادون هزا جالسة في ذاكرتي وذاكرة كمبيوتري
    وكتابتك عن زكاة بورسودان
    اكتب وارسم ما اظن صعب عليك
    معتصم
                   |Articles |News |مقالات |بيانات

12-20-2006, 05:14 PM

munswor almophtah
<amunswor almophtah
تاريخ التسجيل: 12-02-2004
مجموع المشاركات: 18891

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: معتصم ود الجمام)

    "الهواد قالو شِرِب"..
                   |Articles |News |مقالات |بيانات

12-20-2006, 05:57 PM

عبد الله عقيد
<aعبد الله عقيد
تاريخ التسجيل: 09-20-2005
مجموع المشاركات: 3728

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: munswor almophtah)

    Quote: "الهواد قالو شِرِب"..


    "شرابا غرّق معاليهو"..




    مشتاقين يا منصور
                   |Articles |News |مقالات |بيانات

12-20-2006, 06:00 PM

Ahmed Yousif Abu Harira
<aAhmed Yousif Abu Harira
تاريخ التسجيل: 10-19-2005
مجموع المشاركات: 2030

للتواصل معنا

FaceBook
تويتر Twitter
YouTube


Re: قالوا وادي الهـــــوّاد شِــــرِب .. شـراباً غرّق معالِيهو .. (Re: munswor almophtah)

    الهواد شرب ...واتباشرو العربان..والناس انبسطت وقال عمكم رانفي ود اللافض:

    السيل سال والمال جضً....والسما صاب
    وفوق ضهر البكار .....بتقنت السكلاب
    دخلوها الدغش بالعٌمره ..في الجبجاب
    حلبوها الحنون للديسو .....مو شناب

    وعشان عمكم رانفي وداللافض من عتاولة شعراء البطانة وشعره ممعن في المحلية مع الحسن والسلاسة وسلامة التصوير، أسمحوا لي بتفسير ما يلي عشان تكتمل الصورة مع علمي طبعا بأن التفسير قد يفسد المعنى ..لكن الرجل ذي ذخيرة لغوية عصية شوية:

    المال = مقصود به البهائم أو النعم
    جض = ضج أو تصايح من السيل وصبيب المطر
    الجبجاب = زخيخ المطر (هي في الواقع من الكلمات التي تقال ولا تكتب) وحرفها يقع في مكان ما بين (الجيم) و(الشين) وفي ذلك نعتمد على فطنةالقارئ !!!
    السكلاب= الجمل الفحل ..الدنيا خريف والفحل هائج دلاعتو زي كورة السلة... حممممممرا !!
    ديسو مو شناب= يعني ذات شعر طويل وغزير (وأسود)الأخيرة من عندي !!!
    العمره = إناء يحلب فيه اللبن


    ها جعليون أقيفو... دلوكة حميرا وغوغل ايرث؟؟؟.. ختيت لكم البيضاء...والله مي دلوكة زولها برقد!!!
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de