|
|
 حتة حتة ...وبرااااااااحة ...........فضوها سيرة !
|
اها .... خلاص عملنا مسح سريع كدا وعرفنا ( أللبطة) دى كلها في شنو ومن خلال يومية التحرى الخاصة العملتها – اها يجينا زول يقول الزول دا عميد شرطة – وشوية كدا من العند حبيبنا ود الشيخ ... رودا مردا وبعض الأسماء الأخرى ومره يقولو خالد كودي ومرة ندى ومره أغالط نفسي في إصرار وأقول يمكن أنا ألما جيت ! ... يا جماعة عاوزين النصيحة والنصيحة حاره ....جوطتكم دى كلها مسالة مافى داعي ليها .. عشان شنو .. أقول ليكم .. أول شي رودا دى تطلع ولد ولا بنت دكتور ولا رسام ولا كابتن فريق الدافورى ولا مكانيكى عندو دكان جنب دكان حسن كيروسين في المنطقة الصناعية دا كلو ما مهم ... على كيفها ولا على كيفهم ... قول طلعت بلقيس ملكة سبا نفسها يعنى شنو ... ولا حاجة ! المهم والحكم بيكون على منطقها وحجتها وموضوعاتها التي تدفع بها للمنبر فان أحسنت لنفسها وان إساءات فعليها وزيادة .. وصحي رودا زودتها شوية وشويات وغمزت صراحة وإيحاء في معتقدات الناس ودينهم وعندها لفظ عاجز وساقط وقول منكر وقبيح وبيصدم القراء لكن تعالو كدا بالحساب الولد هل تضرر الإسلام والعرب في السودان من كتاباتها الإجابة شنو لا كبيرة ومظللة كمان لأنو كل من يقرا أول شي يلقى نفسو طوالى وقف في الصف المضاد ليها لأنها – حتى إذا كانت عندها قضية – بتستدعى محفزات المواجهة عند خصومها ولو كانوا أولى قربى وحيث انو الناس حاكمت منطقها وهاجمته وغلطوها في بوستات كثيرة وكثيرة جدا يبقى خلاص تانى مافى داع الناس تفرش وتبكى وتتقالد عشان قال رودا طلعت فلان ولا علان !!! ، طيب نمشى قدام شوية ... ونقول كمان للجماعة الشابكننا بعد ما الناس نبشت ورا رودا دى في انو في ناس قاصدنها وعاوزين شنو قال يهدرو دمها من الإسلاميين ... بالله ... سنة يا تنقا ! ... دم منو ... انتو ناس ما عندكم شغله هو أنا شخصيا لو عندي مال وطريقة كان أديت رودا دى وسام وحافز عشان تكتب طوالى كدا عشان تنفضح ومعاها الناس الزيها لأنو مافى طريقة لفضح خصومك إلا انك تخليهم يتحدثوا عشان تعرف قدراتهم فبالله ما تشبكونا كل شوية انو الإسلاميين الظلاميين ديل ساكنين العوين في أقطار العالم ومواقع ألنت عشان يهدروا دمهم .. دا كلام ما جايب تمنو وما تمسحو عجزكم وسوء قولكم وكلامكم في الناس التانين وفى واحد كدا ما متذكر منو قال دا مخطط استخباري عشان الناس تدق عنق رودا ...لووووووووول ... شفتو العبقرية دى ... استخباراتي شنو يا عم .. بالله دا منطق يعنى بلد زى السودان دا الناس الشغالة سياسة ولا اى وظيفة تانية تخلى مليون حدث وقضية وتقعد تصاقر دا كتب شنو هنا .. وانتو براكم شايفين اى بوستات الثوار بتاعين دارفور البتنزل هنا مافى زول لا من الزوار ولا العضوية بيشتغل بيها لمن الزول الكتبها بنفسو تانى يقوم يديها دفره ويرفعها فوق .. عشان تشم الهواء ودا سببو بسيط انها فى الغالب بتكون كلام كدا عايم لا لامى فى السما لا في الواطة – لو غلبتك الواطة اقرأها الأرض عشان ما تحسبوها علينا بلنتى – والمهم يا جماعة الحصل حصل وانا شايف نعمل مجلس صلح اهلى منبرى كدا ونقفل الملف دا ويا دار ما دخلك شر واول الكلام دا انو الناس تتصافى وخسارة يا جماعة انو المنبر يفقد قلم زى عادل عبد العاطى وتروتسكى – هذا القلم الشفيف – واشهد الله اننى احب هذا الفتى رغم اننى لم التقيه قط .
فيا يا جماعه فضوها سيرة وورونا حاجة مفيدة فتح الله علينا وعليكم ولا تريقوا الاحبار والدماء فى الاشهر الحرم ... ولا شنو ...
|
|
 
|
|
|
|
محمد حامد جمعه
المكاشفي الخضر الطاهر
فيس بوك
تويتر
انستقرام
يوتيوب
بنتيريست