|
|
 برلمانات بيوت البكا ... ابقى مارق !
|
يا جماعة صباح الخير ... وصباحات الله بيض ... كيف تمام ... اول تبادى اسمحو لينا كدا نحل ربطات العنق ونتفكفك شوية من (اللغة الرسمية ) لانها بصراحة كدا بتخلينى معسم وممكن طبعا نرجع ليها فى بوستات تانية ذات موضوعات اخرى ... اها ... موافقين ... جميل ... ولو فى زول الكلام العامى دا بيجب ليهو قرحة وشايف نفسو (عبد الحميد الكاتب ) اليقرا بس ويكرمنا بشتيمة (سرية ) وخافتة والدنيا راس سنة وسلام وديمقراطية وقبايل عيد وما عاوزين .... عيك ... عيك .. اتفقنا .
طيب ... جرائد الخرطوم (النهار دا ) ...الصلاة على النبى .... ياخ بس تقول اجواء فترة بعد الانتفاضة ديك ... وكنا فى (ود عجيب المتوسطة ) حظنا سمح قدر ما تكون فى حصة عندنا فيها (جلدة ) يقع اضراب للمعلمين يشيلو الوزير وكنا نسمع مرات كدا هتافات غريبة زى (اجازة اسبوع ننسى الموضوع ) (اجازة شهر ننسى الحصل ) وكف نف تلقى الوزير شتت مره قلنا عديل (عاوزين بديل لبكرى عديل ) شتتو بيهو ! وبتذكر كمان كليات الهتاف الوطنى الخرجت ليها فجاة كدا يمكن عشرين دفعة ... اليقول ليك ... الخرطوم ليست موسكو طبعا دا كوز بيهتف فى وش شيوعى .. والبيقول ليك الخرطوم ليست مكة ودا اكيد شيوعى بيهتف فى وش كوز .. وفى كمان (غير الصادق ما بنصادق ) و(شريعة شريعة ولا نموت الاسلام قبال القوت ) ومتذكرين كمان (عاش ابو هاشم ) ... اها جرايد الخرطوم الليلة حاجة كدا تفتح النفس(الديمقراطية ) قال ليك الاستاذ (نقد ) خلاص لمى عفشو و(بقى مارق ) وعمك السيد محمد عثمان الميرغنى برضو جاى وقالو جون قرنق بعد (90 ) يوم خاشى القصر الجمهورى (لزم ) نائب للبشير وفى كلام كدا شبه مؤكد انو (الشيخ الترابى ) برضو حيمرق من السجن وامس هيئة الدفاع بتاعة الشعبى قدمت طلب للمحكمة عشان اطلاق سراحو لكن المحكمة رفضت وتحت تحت انو فى ناس نصحو الترابى انو يزفتها تانى عشان يقعد فى السجن الى (حين ميسرة ) عشان يكون نجم المرحلة الجاية ويكون هو (الوحيد ) القيادى المارق من (زنزانة ) وباقى الشباب الحلوة جاية وضاربة الترطيبة من هنا وهناك وكمان فى راى تانى بقول انو الناس قالت لناس الشعبى ... الصبر (اليبل الابرى ) .. لانو الزول مارق مارق بعد يوم تسعة ...
طبعا فى مجالس الونسة السياسيين ديل الواحد من ناس الحزب (كوك ) يلاقيك فى (بيت بكا ) تلقاهو بحلل تحاليل سياسية اخير منها (فحص الملاريا ) فى معمل سيدو مزور شهادتو ... امس كنا فى (بكا ) فى بحرى لقيت واحد من هسة – بتكلم عديل كدا – اشترى طقم جلاليب وبدل افرنجية وسفارى للوزارة الجديدة لانهم رفعوا (مقترحات ) الوزرات العاوزينها ورشحو (ناسهم ) فسالت براحة كدا زول شمارة جنبى ... اسمع (عباس) دا من ياتو حزب .. فذكر لى اسم من الله خلقنى ما سمعت بيهو لكن قالو دا (جناح شمال ) من فصيل كان معارض بره وهسة رجعو ليهم كم شهر كدا الى (الداخل ) ! ... وطبعا يا جماعة كلامى دا ونسة ودردشة عشان كدا خلو روحكم رياضية و(البساط احمدى ) ولو فى زول الكلام مس بؤرة الشعور الحزبى عندو ما ياخد فيها حاجة ... وزى ما بيقول اخونا الحلبى (القرموطى ) معليش نحن بنتكلم .
والمهم رجعت بعد العزاء الكان فيهو لمة معتبرة من الناس لا خلت كورة ولا (الخرطوم عاصمة الثقافة ) ولا البنات البتخش مركز عفراء لا الزواج العرفى ولا زيارة ايهاب توفيق ولا الحادث بتاع بوكس الخضار الكان فى شارع مدنى ولا النشال البيخش حفلات الناس المرطبة ويلطش ليهو كم موبايل وما تيسر من الختم والمحافظ التخينة .. عارفين انا مرات بفتكر التجمعات بتاعة المناسبات دى احسن (برلمان ) جا فى البلد دى يعنى لا بيكون فيها (نقطة نظام ) ولا الحركات البيقدونا بيها فى الجلسات الطويلة بتاعة ناس البرلمانات وبتذكر زمان عندنا صاحب لينا اسمو (طارق عبد الله ) مره زهج من جلسة طويلة متلفزة قام قال لينا وهو عند (لجنة ) فى كلامو .... يا الللللللللللللللللللللللللله ... ياخ الاشاعة – يعنى الاذاعة - دى بتشتغل شنو ما تشيع الكلام دا كلو وتخلى التلفشيون دا لباقى الحاجات
اها فى اللمة بتاعة بيت البكا ديك سمعت لى (تحليل ) سياسى من واحد عمك باين عليهو شمولى ومكجن الاحزاب ........ نفشها ليك نفش ... ما خلى ليها جنبة ترقد عليها وعرج على الحكومة (جلدها بكرتين اتو ) ورم ضهرها طلع قدام (ختاها ليك لجون قرنق ) ... حت سنونو .... الراجل سوى البدع غايتو اى زول سمعوا بعدين بيصوت (لنفسو ) وما بيدى حزب ... التكتح .
المهم – نرجع لجرايد الليلة – عارفين انا شخصيا افتقدت من الاحزاب والرموز السيد الصادق المهدى ... قالو فى الامارات ... عارفين يا جماعة لو فى حزب ولا زول من الاحزاب يمكن (يقلب هوبا ) فى توقعات المرحلة الجاية منو ... الصادق المهدى دا ... اول شى مشهود ليهو بنزاهة (خيالية ) ... يعنى قدر ما تقول ما ممكن تتهمو انو (زول ماكلة ) ولا عندو سجون ... ولا كاتل رقبة ... والشر النازل منو للشعب يمكن مافى .. يعنى لا زرع لغم ولا قال لخواجة تعال نساوينا ديل (افحصوهن ) فى ناس فعلو وتركو فيهن يعنى بالجملة الزول ( نضيف ) ومكواه الاخلاقى ... سيف ... عارفين المكوى السيف ... دا قالو تكوى هدومك مثلا تخلى النطلون واقف براهو ما يقع ... من متانة المكوه .. ويمكن الراجل عندو اشكالات فى حزبو وفقد ناس (تقيلة ) زى المرحوم عمر نور الدائم والامير نقد الله (ربنا يواليهو بالعافية ) لكنو فى النهاية يمكن بشوية ترتيب كدا يجهز حزب (ياكل ناس كتار نيم ) ... بالمناسبة الناس الالكلت نيم كتااااااااار غايتو زول زى مبارك الفاضل دا بقى (صامولة عويرة ) زى ما بتقول ناس المنطقة ودى صامولة كدا مفوتة ومحلوجة ويمكن تربط اى مقاس فى حتة ويمكن تجلى وحزب مبارك يعنى هسة لا بربط فى حزب الامة وانحل فى الحكومة وجون قرنق (مفتح ) وما ممكن يقبل يدخل عليهو فى جنبة عربيتو صامولة مهوية وما تربط فى حتة طبعا فى فى ناس يمكن (تاكل عيش ) قبال الصادق الزعيم و(الامام ) ممكن نرشح ناس الحكومة والحركة الشعبية لانو على الاقل (الماسك القلم ما بيكتب نفسو شقى ) بعدين الشعب السودانى دا ليهو يمكن قريب (ستاشر سنة ) مصاقر البشير وناسو ديل واخد (وولف ) عليهم وبامانة صحى فى ناس كدا انتهازية (ضربت ) وكدا لكن برضو فى غالبية اشتغلت وانجزت ويمكن عشان كدا الناس صبرت وبتحمل للبشير دا احترام كبير ، طبعا الكلام دا هسة (يسخن ) مع بعض حابيبنا تقوم علينا القيامة ... لكن النصيحة ( مى حاااااااااااااااره ) البلد فيها شغل حصل ولو فى زول مغالط (على كيفو ) لكن دا بيكون زول عاوز يقنع نفسو بهجرتو فى المنافى وعاوز ليهو مبرر عشان (يناضل ) فى الفارغة والمقدودة ...
المهم يا جماعة هسة قدامنا مرحلة جديدة ... واى زول يورينا فلاحتو ... والما بيقدر ولا عندو حاجة فى راسو اليقعد محلو بس يتفرج .... لكن دى فرصة احسن اى حزب واى جماعة يتعاملو معاها بواقعية وفكونا من قصة (ما عاوزين ) و(باااااااااااع ) كل ما قال زول حاجة كويسة (زى الناس ) فى السودان ولا الحكومة ولا جون قرنق
|
|
 
|
|
|
|
محمد حامد جمعه
المكاشفي الخضر الطاهر
لكن برضو طلعت شديدة.. وما براك الما عندك موضوع يا زول .. الناس بتكتب هنا كلها وبيتفشو في البورد وفي أول زول يرد عليهم.. 
فيس بوك
تويتر
انستقرام
يوتيوب
بنتيريست