|
دعواتكم لزميلنا المفكر د.الباقر العفيف بالشفاء العاجل
|
|
 Re: شايننق استارز .. و استدعني يا طيف فربما عادت (Re: khider)
|
آآجي ي ي ي.... هي يا خدر ما بالغته... وحات سيدي اب فيونكه اتخلعته لمن شفته اسمي .. قلته خلاس الليله في نضم انا ماني قدرو..
قلته كدي.. استعدلته و جريت اتشطفته و قدر ما كسته ما لقيت فردة سفنجتي... فاعذروني...
المهم جيت داخله...
ولقيتكم انتو الحلوين و حنان... خدر, ملاسي , ابو احمد, ايهاب, الجندريه وليد....
الليله اديتوني احساس اداني ليهو عزيزا لي .. انتشيت بيهو و كتبته ليهوبرضو بي سعاده مماثله لي دي ... هاكم كلامي
سلامات حوافل تتبعها تحيات نواضر ثم أستفهامات حواضر.. فالسلام لكم ولكل من آخانى في البورد ثم في الله أولا وآخرا ...والتحيات مزجاه لشخصكم الكريم حقيقة و سيبرة (من سايبر) ... الأستفهامات, فهن كثر و يصورن دهشة أقل ما يمكن ان اصفها به هو "مهولة" وبعض من تعجب وهو فقط من باب لزوم ما يلزم... فوالله الكتبتو عني أنا و كتاباتى لهو ضرب من ضروب البلاغة في الوصف لا قبل لي بها وما انا بمجارياها وان حاولت فتبا ليراعى وعتبا لكم.. اهااا .. قرأت ورأيت ما كتبتم لي ثم أعدت البصر كرتين فأرتد ألي البصر بحديث مدح بما لا قبل لي به و اصدقكم القول بأننى خلته حديث قدح ( قدح؟؟؟ حسي النبي القدح دخلو شنو هنا ...لكن المخ اتجازي)انا قصدي مدح و زم مغلف ببلاغة أبو الطيب في أيراد القريب وقصد البعيد ..و ما اظنكم قاصدين كدا و هنا مكمن التعجب... و اجابة لي سؤالك يا خدرانا قااااااعده متل العمل الرضي... و مقلة في كتاباتي ولا أرسلها-أن فعلت- ألا من بعض ترهات قلمي مغلفة في بعض من ردود مختصرة حينا و ساخرة أحايين أخر أو بعض خاطرات أكتبها والخجل يكتنفنى من سوء صنعتها أو سواد فكرتها وفيما بينهم أتنقل منتعلة تلك السفنجة الما شبه السفنجات لا خلقه لا اخلاق... فقد آل أخضرارها ألي لون لا هو بلون "زينب" ولا بلغت منى ذاك "العرش" وأستعضت عن "نخرتها" بمسمار يلزقها ويحفظها ولكنه يؤرقنى ويقض مضجع غربتى "عفارم عليهو" بألتهابات بين أصابعى لا تعالج الا بالقرض أو بضع مسحات من زيت سمسم دافئ في عرف جداتى والعمات لا بكبسولات "أنتىبيوتك" أو كما قالت طبيبتى.
و بعد دا تقلو كتابات متميزه؟؟
رحم الله نيرون "وبشبش الطوبة اللي تحت راسو" فقد قال زات مزاج "نمو ت بلا ا حتضار عند ما نمو ت من ا لا سى والحزن" أوما دري بابلو هذا بأنا نحتضر الف مرة و مرة حتى صرنا لآلامه صنوان؟
ياجماعه البتقرو دا. بعض أحزان ضلت طريقها اليكم متدثرة بسخرية وتعتمر سفنجة كانت يوما ما خضراء ..و ذي ما شايفين فأنا و تلك "الفكرة النكهة" كأقطاب مغنطيس زادتهم الأحزان تنافرا..فأنا ليس لي في الأبداع "يد ولا ساق" وقيل أيضا "و لا شامة" (بتصرف شديد من قائلها).. فلا "دكينا" ناطحت وكاتبت ولا "شتاتا" قرأت فأشعرت....
والله و ما طالبني حليفه فقدانكم لي دا كان بمثابة هواء بارد في جلد انفي ... انتشيت بيهو فرحانه فرح البدايات الاولي... لكم الشكرالفا فألف و كيلة أمتنان بظاهر يديا منها والكف عليكم و علي احساساتكم...
تسلم يا خدر... و شكرا شديد علي الفرقه دي.. الانا ما صدقته الا و جيت نافشه الكلوش و مليته كلام لا سما لا واطه...
ورووورووووك انا لي حسي ما مصدقه البوست دا لي... النبي احجزو لي بكاني دا انا ماشه اكلم ناس سعديه.... 
| |
 
|
|
|
|
|
|
|
|
Re: شايننق استارز .. و استدعني يا طيف فربما عادت (Re: اساسي)
|
اساسي ... طبيبتي دي عرفتها هنا في بلد الفرنجه الكفار اهلا... قالو كشف سنوي.. و انا عليم الله من فارقته بطن امي سماعه ما هبشتني...... زيت البركة دا مالوووو..
قال انتي ييوتك قال...
قادر الله..
اسمع كلامي دا سمح يا اساسي.. وجع راسك دا الا الاتي..
تجيب تلاته هبهانات ختين بي جنبه... و تجيب سبعه و تلتين دلقون... و لفيهن واحده واحده فوق بعض.. و ختين بي جنبه... الهبهان اغلي في مويه و سوي كباية شاي ساده.. اقعد بي مزاج و شوت شوت اشربه... كان ما راح راجع الطبيبه...
اما ربطة الدلاقين فنا بيها اول زول تفتكر انو سبب وجع الراس....
ااي ااي جايه...وووب علينا الليله برفدوني..الله لا كسبم
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
الليله الزول مالو ما ورانا اسبابو.....
ااااح... تعرف يا خدر... زمن الجاهلية و الجهله سوا... و زمن التسلق و البرج عاجيه... وزمن الشي كن شي و الزمن بطشي.... و زمن حسن الجقر كان مجكس الرضيه انا كنت بفتكر غنه الدلوكه دا غنه هابط و استهزئته بي ابكر صاحب
الا-فكرة بطئ الكلام... عاشق مذيعات الراديو.. اب عيون نايمه مش نعسانه.. لمن قال لي... تأرفي انا بهب هنان...
يا ابكر حنان منو؟
هنان بلو بلو ... بتصرف من ابكر مصحوب بي آآآح
واصل قائلا... والله انا امباره جيت ماشي بي هفله... و وقفته بي الهيته و الله والله و انت ما تالبني حليفه انا هرقت صندوق السجاير كلو ...
استغربته و عاينته و قلته عليك النبي شوف الطرطشه و الغبه... ان رأيته و سمعته خلته كان في الصالة الحلم مستمعا لي احدي معزوفات ياني او مراكب الشوق...
قلته ليهو لييه دا كلو يعني؟
لحظتها اظنه حس بشئ من الاستهزاء و السخريه... انت أومرك ما هتفهم.. الا تسمع كلام هنان..آآآآح... كلم امك النهاردا ابكر ما راح يكوي... سمعت كلماته طشاش طشاش و هو ماشي مديني ضهرو جادع يدو اعلانا عن الزهج... و من اليوم داك لا ابكر جا لا الهدوم اتكون... غايتو ياابكر العفو و العافيه..
سبعه سنين عدو... و انا في البلد المرض دي... امارس دوري في المشهد الثابت من نفس المسرحيه... مافي شي بيونسني في مشاويري و انا في الوانيت غير حنان بلوبلو,سميره دنيا, هاجر كباشي, زهر مان, قسمه,نصرة و خلافه... لقيت فيهم شي من الاريحيه المفقوده القدر ما فتشته ما لقيته عند الجماعة..اصحاب الاغاني الانهزاميه...
حبيبنا بنريدو.. بنريدو... بنريدو... سمحه الوجنه في خديدو
ما ورانا اسبابو...
حبيبنا يوم سفرو.. حبيبنا يوم سفرو..ودعنا قام قطرو
آآآآآح شكرا يا خدر... تمشي و تجي بلسلامه..
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: معتصم دفع الله)
|
| Quote: دا والله ورشة بي حالها ما تصلحو |
workshop 1
آآآآآآآح... يا نعمات
تعرفي ابكر ده راجل عظيم جدا لانو انتبه لفروقات الحراك الاجتماعي و النفاق
العام و ازمه المثقف .. انا ماعارف الانهزاميه في غنانا دي مباربانا لي متين
!! good point shining
اها الحراك ده هو اللعب كلو
وانت ذاتك كــ.. بت حريفه و بتكتب حلو جدا .. حقو ماتقيفي مننا و ابتعدي قدر الامكان
من مناطحه الوغد دكين .. فلدكين راس عظيمه و قطع شك حاينطحك و يلحق اضرارا
جسيمه برأسك الجميل
و نحن منتظريين زياده منك في موضوع الحراك الاجتماعي ده
workshop 2
قرأت لك في المستظرف ان لنخره السفنجه حكايه
فقد كانت قبل صقيع العام الذي سبق وفاه اليماني سارق قصعه السمن لا تملك لا نخره
و لا سيور جميله متعدده الالوان
كانت سفنجه فقط .. تافهه لا تصلح الا للحوامه بين بيوت الحي و احيانا قليله جدا
لحضور حنه العريس و لكن في الصف الوراني و بعد قدوم ذلكم الشتاء اعترتها نوبه
برد خلقت فيها تلك التشققات اثر البرد و انعدام الكركار الذي عاده مايغطي اسفل
قدم الحرائر فتيبست اثر انفلونزا لم ترحم و نما لها قدوم صغير عند التقاء
السيران ( السيدان  )اها ومن ديك و عيك ... قعدت تتطور
فتطورت و تطورت و تطورت و تكورت و تكورت و تطورت ..حتي اعتلتها حسناوات اوربا الغربيه في موسم الصيف و تبعتهن
حرائر الوطن العربي خاصه الشوام ذوات الاقدام الجميله عاريه كانت ام متسفجنه ( متنعلته )
workshop 3
صنقور اساسي
ده لا يمكن الحديث عنه دون ان نزكر و بكل احترام الساده الاتيه اسمائهم ادناه
1/طوله اللسان
2/الفوضي المنظمه
3/الاحتجاج الدائم
واضعين في الاعتبار ان لاساسي نكهه و طعم و مذاق خااااااااااااااااص
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
شذرات من كتابات المحتفي بها
Quote: اها يا جماعه ما اطول عليكم .. انا ماشه اكووس لي طريقه كشافه و
فستان جورجيت مشغول بي ترتر ورا و قدام...
بسسس امووووت و اعرف البشيل سفنجتي منو ؟؟؟ تعرفو بعد دا حاعمل
ليها لستك عشان البسه زي الشبط ... |
Re: كيف تكون نجمآ فى البورد
Re: كيف شعورك لمه ترجع لوكيرك تلقه طيرك حاضنو غيرك؟؟؟
دي طبعا انا مت فيها من الضحك
كما و تتميز المحتفي بها بتوقيع ثابت اسفل مداخلاتها
حتي اني احيانا لا اقراء مداخلتها بل اذهب مباشره الي
التوقيع
امـــــثـله
| Quote: يخواني انا عندي رانديفو بجي بعدين ...... ودعتكم الله... |
| Quote: يخواني عوضيه مشت وووين ؟؟ حسي مش كانت واقفه هني ؟ |
Quote: هي دي ماعوضيه.. عوضيييييه اقيفي... اها يخواني انا ماشه.. يا
بت ما تقفي عامله راسك الذي الجيلون دا ... |
Quote: اها يخواني انا ماشه اكووس ماعوني ... يخواني وووب
الشال سفنجتي منو؟؟؟
|
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: وليد محمد المبارك)
|
[Quote: B]30-07-2002, 04:24 م
ShiningStar
تاريخ التسجيل: 26-04-2002
مجموع المشاركات: 198
Re: كيف تكون نجمآ في البورد......الجزءالثانى (Re: PLAYER)
يا جماعه كدا بي المهدوانيه...
يا بلير انا بشوف توقف زول في الباب عشان يفرز ليك ناس درجه اولي و تانيه و تالته و ناس نحنا... و بعد يدخلو كلو زول يقيف في صف و البناطلين قدام و الجلاليب ورا و فساتين قدام تياب ورا و كدا
.. و بعد داك تشوف الناس البلمعو تعمل ليهم صف براو تسميهو ابو لمعه و خلي بالك معاي لانو الحته دي حرجه شويه لانو في ناس ما لمعانين خلقة الله ,, ايي قصدي لي بتلومعو و دي طبعا بتم بي عدة طرق و منها انو الواحد/ واحده يلبسو رقوشي و يقعدو تحت الكشافه و لكن للاسف اللمعه بتزول بزوال المؤثر و طبعا في الحاله دي المؤثر الكشافه... آآهآآ ديل اعمل ليهم صف براو سمي تحرمني منك ... لكن نصحيتي لي ناس الصف دا انو التلمع ما مشكله لكن كل زول يجيب كشافتو براو يعني ما تملحو في كشافات الناس العندها كشافات ...
واخد بالك معاي النقطه الجايه دي مهمه... لانو لازم تفرز الناس الكانو لمعانين.. ركز معاي في كانو دي لانها من كان و اخواتا و كدا.. يعني ناس دق لي و اغني ليك.. وديل اخطر ناس لانو بجو تووووش يقعدو ليك في صف ال VIP
يسو في نحنا كنا .... و نحنا سوينا... و فعلنا و تركنا... لكن السؤال بكون هل لازلتم؟؟؟ هم بس بنسو ولا يا ربي ما بلاحظو انو لمبه 60 واط ما زي ال 100 واط ولا كيف؟
اها ديل سوي ليهم صف و سمي كان ليك يا المطير عينيك ...
اها يا جماعه ما اطول عليكم .. انا ماشه اكووس لي طريقه كشافه و فستان جورجيت مشغول بي ترتر ورا و قدام...
بسسس امووووت و اعرف البشيل سفنجتي منو ؟؟؟ تعرفو بعد دا حاعمل ليها لستك عشان البسه زي الشبط ...
|
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: خدر)
|
Quote: غير انه لايزال في بعض سفاهاتِه القديمة يا خوي ..ومرة مرة بتذكر
حواجب علوية وريحة الدخان الكانت طاقة منها..
ايضا حدثني صراحة بانه ليس معصوما من المنكرِ بيد انه لايجاهرُ
بالفسق على ظهر الارض ...
بسف مرات مرات التمباك ..
ويدخن عليها احيانا لتنجلي ..
يشربُ في الملمات وحين يحتاجه صديقه قريبا من مزاجه ..
وهكذا ترى انه يحب الاصدقاء ايضا يا خدر .. |
نعمات
الزول الامرو ما مهم ده انا عرفتو ليك منو
ده ماالشعب السوداني الكريم زاااااااااااتو
يا صديقه
نحن اُناس نعتمد علي ( تربيتنا) بشكل اساسي في تكوين ارواحنا
و امزاجتناو سلوكنا الحياتي .. لا نستطيع ان نخرج من برنامج التربيه ذو الوصفه
المضمونه لنغامر بأشكال حياتيه اخري جديده ..فنحن قوم نخاف ..
نأخذ الجديد لكن بحذر شديد و نخاف من الملاماتيه
عشان كده تلقي الواحد مننا عامل فيها ليبرالي لحدي ما يصل
منطقه الانثي و يقيف
تصدقي انو اشرس المعارك تاريخيا كانت معارك دفاع الانثي عن زكرها
او الزكر عن انثاه .. حتي الحيوان يلعب وفق نفس الشروط
و الضوابط
هذا عالم من ورق يا عزيزتي
اها
عملتي شنو مع بت المدير اللفحت النعلات
طمنينا
| |
|
|
|
|
|
|
|
|
 Re: شايننق استارز .. و استدعني يا طيف فربما عادت (Re: خدر)
|
دخلت المنتدى لقيت الموضوعين ديل ورا بعض
شايننق استارز .. و استدعني يا طيف فربما عادت
NO WAAAAY الرجل الذي تشد اليه الرحال بناديها اون لاين
والريدة في قلوبكم الله علامها
شكرا خدر 
وشايننق ( حاسة ) بالريدة !! تلقي مرادك يارب
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: خدر)
|
خدر.... كلام اللبراليه و توقفو عند الانثي دا خلو..
لمن انتهي من قش الحوش و مضايرة العده....
اما عن النعلات... النعلات ما ال لااتتي انا هن ال لات سوسن... و المشكله ما مشكلتن... النعلات بمشن و بجن ... المشكلة في السفنجة الخدرا و الجهنميه الفي بيت ناس علويه...
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: ShiningStar)
|
يا خدر
ماقلت ليك عيركما لما تفصل بتجيب ريح دكين
انا لقيت النعلت قدام بابكم
والسفنجة الخدرا ذاته حكمة سفنجة دكين
والجهنمة تهبهب بريح دكين
بس قول لي المناسبة اشنفرها
سماية ولا طهارة
باقي الصواني داخلة مارقة
والفتة ام توم احمتنا النوم
شايننج صن
مش عارف الختى في بالي سيرة النول والمغزل
وحفرة النساجة
والتوب البنغالي
بالمناسبة البنغالي دي من بنجلاديش ولا شنو
والمركوب جلد النمر
وكذلك أشرس النمور المعروفة بالنمور البنغالية
والبنغاليين مرة مرة يقولو سديق سوداني سوا سوا بنغالي
ما علينا
مواضيعك تسل الإندهاش من جوة التلافيف
حتى يتنتف مسرى المساوقة وتطول المتوقة
البنية السرتية الحكواتية جات ولا ما ماجات وشنو قالت
بس حالة الإكتئاب العند البنية دي طبيعية ولا قايمة بروس مش ممكن من حكاية غرف البلاعات وقش الكاويقا وصفق النيم في صيف الدمار والحمار
هوي انا ماشي وبلبس اية نعال من النعلت الشتتة جنب الباب كان سفنجة كان شقيانة كان تموت تخلي ، بس الشقيانة زوق حقة الناس الفوق..
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: اساسي)
|
اساسي
تشكر
بتكون قلت كلام كثير ونحن ما جايبين خبر
بيني بينك ذكرنا كل مرة عشان مرة مرة نتذكر
تعرف يا أساسي مرات نقرا الموضوع زي كأننا واقفين في موقف بصات السجانة سنة 85 ، تتشابه البصات وما تشعر بيها ماشة إلا لما تطلع كوبري الحرية وتشعر بألمكنة سخنت وناوية تطير
ولكن ما يهمك نحن نذر يسير مصاب بمتلازمة التشابة والتواتر ( تحت تحت بشيروا ليها بالزهايمر المبكر) لكن المخضرمين ما بضيعوا حقك بفهمو قولك وهو طاير، بفهموها طايرة, يعني قبل ما تضعها في السطر هو بكونوا فهمو المغزى..
تسلم
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: خدر)
|
Quote: اعاني فقدان الشهيه للكتابه
احس بنفسي فارغ و مجوف |
باسم جميع الاوغاد؛ فانني اود ان
اقول لك ؛ بان احساسنا عن نفسك؛ غير احساسك بها؛
فان كنت تكتب لنفسك؛ فعد بعد غدٍ؛
و ان كنت تكتب لنا - و لغير الاوغاد - فواصل و لا تتوقف.
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: Hussein Mallasi)
|
خدوري
مشكلتك بسيطة
الفول
ما تكتر ليه البصل
قالو البصل بجيب الكوفير
يخليك مكوفر ذي حالاتك دي
ممكن تستعمل الفول المكشن بلا بصل
وإن كان لابد من البصل
عاد بصلك قطعو دقاقة وسوي ليه كاكاوية
فول حاجات بالعربي اللديح
وممكن تستعمل الشطة المصرية
أو الهريسة الليبية
أو السمبهار التشادي
أو مانغو بيكل الهندية
وأوعك من شطة العزبات
وبعدين ظفورك ما تقصهن بالمقص
استعمل الظفارة الصينية
أو المبرد الفرنسي
غير القصة من كاري كوري إلى كوكاب مجري أو مارينز
وأحذر الحلاق ما يكون من النازيين يقوم يصبغ ليك وانت ما داري
وأكتح الموية كتح
وجر وراها واحة طويلة واااااااااااااح
وكان جنبك ناس ظراف اديهم لفتة
شوفهم بفضلو الكتح ولا الجغيم
بعد كده العوارض بتخف شوية
لكن طالما شبكت فيك
إياها بتزورك مرة مرة في الظلام
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
خدر ازيك ليه ماعملت لى بوست ناديتى فيهو ياوغد00
بعدين سبب شنو ليك البريوهو ليك
ماسعته (من غير ذنب واسباب جافونى الاحباب)
لكن بالجد ماقيايلك بتريدنى كده 
تموتون كمدا ولحن الموسيقى يسمعه تروتسكى
وايضا..........
شايننق استارز .. و استدعني يا طيف فربما عادت
نفتقد قلمها........
وكمان
اين انت..
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: معتز تروتسكى)
|
تيروتوسكي
منعني عنك الشديد القوي
Quote: شايننق استارز و بقيه الاوغاد
لا ادري ماذا يحدث لي
اعاني فقدان الشهيه للكتابه
احس بنفسي فارغ و مجوف
|
كما ولا تستهويني قراءه كُتب مثل كتاب:
رودا عادل عبدالعاطي انور وثائق وبكري ابوبكر...يالها من قصه مُمله بايخه
فأنا اكره الكتب المنقوله و المتوقعه نهاياتها
عموما
عودا حميدا مجيدا مليئا بكتابات نتوقعها و نحبها
ادخل بي رجلك اليمين يا وغد
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: خدر)
|
خدوري
لكن ما بختك كان كنت كارو زي ده
أكيد تكون جاري نفسك في مكناس
شفت الأريحية دي كيف
الأرض مبللة تحت حوافرك
وصوت فرقة جيل جيلانة يصدح حول ما أستطال من أذنيك
وخريرين من الأبيض المتوسط والمحيط
تروتسكي الحبيب
شملتنا البسمة
يا عائدا بين الإمتشاقات
مرحبتين
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
صباح الخير
- يسعد صباحك علي وين؟
- مشاوير قريبه...
- هي كدي تعالي شوفي الملوخية دي
- بجيك راجعه
- الرسول كن تجي
لا مفر منها كلو كلو غيرت اتجاهها اليها
- الملوخية دي سمحة وحاتك.. بتخاطفوهااخلي ليك منها ربطه ولا ربطتين
- كويس خلي لي تلاته ربط
- اها دحين انت ماشه وين؟
- مشاوير قريبه بجيك راجعه
- الرسول كن تقعدي, خشم خشمين
- بجي بعدين اتونس معاك, انا مستعجله يا حجه
- العجله من الشيطان ,هي الدنيا طايرة؟
- نهضت من جلستها و اقتربت منها متحمسة و ملأت نخرتها بعبق دخان الطلح الذي يعبق منها..
- كدي كدي دخان السرور,الدخان دا شيلتي الصباح ده ولا شنو
- أي يا حاجه بتول, اها خليتك بي عافيه
تحركت منهاالا انها لاحقتها بخطواتها و امسكت بيدها و جرجرتها نحوها
- هي تعالي , ما سمعتي بت نفرين قالت شنو؟
- بت نفرين منو؟
- بت نفرين اخت عبد المولي
- اها مالا؟
- وحاتك قالت انتي ما بتخلي عبد المولي الا امشو لي فكي
- فكي؟؟
- أي و هسة قالو الليله ماشين فريق القلاته الوراني عشان يطفشو عبد المولي منك,هو العرس متين يا دي؟
- بعد اسبوع
وهربت من الحاح الحجة و صوتها يلاحقها
- يا بتي كن في قسمة خلاس, الا عاد كن مافي قسمه دخانك ده يبقي بندق في بحر سسسسساااااهي....
كانت سعديه شباشب تحب ذلك الوهمان... ووجدت انو النفق الوحيد لطريق احلامه.... المهم لملمت بقايا نفسهاالملانهةحد الغيظ و اتجهت لي ود النصيح كان هو البلاعة التي تتخلص فيهامن احقادها القليله واحباطاتها الدنيويه المختلفه... ود النصيح راجل ارجرجه و اكثر خلق الله لؤما,طماع,بخيل حاسي بي اهمية عالية... قايل روحو متعلم و ضم نفسه للجماعه المثقفاتيه لانه درج علي مشاهدة اخبار الساعة تسعه و برامج حياتك في التلفزيون عندعوض الله جارو...
كان مواظب علي شراء الجرايد اليوميه و مجلات سمر ( كان عندو حب الخواجات المدبلج دا اسما شي في وجه الفانية)
كان ينتظر محمدية ولد سعاد كوارع يجي من المدرسة اقرا ليهو.. يجد متعه كبيره في قراية صفحة الوفيات مستهترا بموت الخلايق.. راجل كرووور...
زولتنا اتوجهت عليو متأبطه شرا كعادتها كلما همت بشرا شمامه... فهو دوما يجيد تفوير و تبويظ بقايا اعصاب الخلايق بتعامله الاستعلائي الذي لا يناسبه مطلقا... تعرفو سعديه اكن اشترت شمامه او ما اشترت لازم تطيره معاو شكلة للدين و تطاعنه بلكلام و تبذل قصاري
جهدها لتمسح بلؤمة كل شماماته..
ثم تحشو ما تبقى في فمه .....
نهاية الكلام انها كانت بتكرهو لوجه الشيطان كده ..فما ان تحس برغبتها في الافراغ حتى تنفتح نفسها للشمام ..
وما زال صوته في الصدى : يلا يا ......تلاتة بي مية والكيس هدية ..الشمام اللمام يا...يلا ...يلا ..يلا
(عدل بواسطة ShiningStar on 02-21-2005, 02:43 PM)
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
خدر ووين انت ياخي... شايفه نانسي عقرم جابتك متكشم...
نانسي بلخراب اكن خربت علينا الجكس و لخبتت موازين الجمال عندو...
حسي عليك النبي دي سماحته شن هي ؟؟ بسسسس
والله حبوبتي التنيه تشوفها تقول ليك دي شنو المتل نملة السكر دي... يخربة.. كملانه من لحم الدنيا...
ياخيي وووين غنية يا فريع ياسمين
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: ShiningStar)
|
ShiningStar
انتى من الصباح حايمه هنا 00
والاسمو حدر مجننا بيك شنو الحكاية00
صحى وغد00
المسافر حبيبى شايف شملو فى نملف الاوغاد شيل شيلتك 00
وبى طلتك هلات الانورا00
ياسيادتو00
اما يا
ShiningStar
الشغله جاطتت شديد انا من يومين بفتش لى شعر فى راس حدر عشان ازعمطها ليهو ما لاقى من المغسه00
الولد انا وديناهو البلد ديك شعرو خنفس الحصل شنو لى شعر شنبك
بعدين ياسمين شنو وفريعو انا بمسع فى ضحكه
مدخل حزين ومخيف00
صوت اوبرالى
و
نازل من الهواجس والمغبه
دخول صوت المغنى
ايضا
نازل من الهواجس والمغبه
لا لباكر ولذكرى
ياوغد مابتقدر تعرف لى الوصف ده لمنو؟
اظنو نانسى عجرم
وليه نانسى عجرم ماتكون لينا احسن
هى ضحكه00
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: معتز تروتسكى)
|
انا ما عارف لكن الزولة دى كلامها بكسرنى عديل كده وبالنسبة لى زى الفاكهة بعد الاكل بلوس فى البورد بجى اخد لى كضمه من هنا وبرجع وكل ما احصل لى كلام ما بيعجبنى بجى ادخل هنا اخد لى كوز واطلع اصلا الايام دى عندى طمام اجتماعى وكان ما كلام الشنق استار دى ما عارف كنت بسوى شنو وجميل جدا الاخ خضر قدر يصطاد لينا تلك الدرر يا حليل ايام زمان كانت بتلهمنا المسرة قولى يا اختى ونحن هنا مستمعين ومستمتعين
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: خدر)
|
شايننق صن
تلافيفي مشتاقة
والفتة حراقة
انتي عارفة انا كعاباتي نبقن من البلاط البارد ده، المرة حالفة تخلي النعلات بره الشقة، كمان مسويالن دولاب، الواحد يقوم من الصباح قولة فتاح يا عليم الناس تقول يا دولار يا شيك أخدر يا كريدت كارد يامصارف يا حسابات وسحب بدون حدود نحن نقوم نفتش للشقيانة ، يا بنية النعلات دي الصباح ختيتة تحت السرير ده..المرة عاملة زي ناس البلدية ، تنظف الشقة باليل.. ومن الصباح تمنعك دخول المطبخ عشان ما تقلب ليها الأمور، لو ما بقدمو شاي حليب في المكتب كنا نسينا الشاهي باللبن الحليب زي ما نسينا النوم ، ونسينا ظلام المغارب ونبيح الكلاب..
بس سعدية دي دخان الصباح الماسكة فيه ده ما ارهاب للجزارين وبتاعين الشمام والبصل المكوم كيمان كيمان.. وناس سمعتو ولا جابو ليك.. قال ليه شفتو بعيني ديل!!!
خدر حالف يكسر كراسي البوست ده عشان كده قام جاب نانسي عجرم، بس فاتت عليه .. نحن قاعدين فوق براطيشنا.. وكان العركة دورت كترت براطيش بتجي متطايرة ..
معتز، انا شفت الكرولا بتاعتك مركونة في طرف الشارع قلت سيادتو ده رجع الشغل ولا جاي يشيل اوراقو من درجو القافلوا، بس كانو عايزين يشيلو التربيزة انا قلت ليهم سيادتو ده بيجي يشيل حاجاتو، خلوها في مكانها.. تراك جيت باسبليطاتك، انشاء الله يكونو دوك شريط .. أوعك ترجع لو ما رقوك.. الجماعة كلهم اترقو بي وراك.. شفت خدر بقى يوزباشي وملاسي نجمة داوود مع وسام الإسترقاق من الدرجة الأولى.. وعبد التام نقلوه لي سفارتنا في دولة البورقيق هو قال ودوهو سفير لكن قالو تحت تحت ودوه جاسوس عشان يتجسس على صناعة النبق في ديك البلد..
يا ناس الحفى كسر كريعاتي
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
معتز ... نشكرك لمرورك الكريم...
_________________
وليد سفر سفر خمسة.... شاكرين حضوركم و الامتنان حتي الابنص لزيارتكم و شرابكم من سبيلنا العامر... ولكن (نبشركم) ما تحتسونه ما مويه و انما مريسة من صنع (جفالةسبب موتي)....
__________________
المسافر ...
لكن و الله عرستا تب... مدامكم دي.. موقعه من مواقع مسميات حبوبتي زو زو.. (مره مقدر و مابتدور الجوباك) عافيه منها...
لكن صراحه اعتب عليها في قصة شاهي الصباح دا... يعني
اولم تدري مدامكم انو عدم تقديمها وتظبيطها للشاي باللبن المقنن في الصباح يؤدي الى زواغان عين البعل؟؟
آيوة نعم...
هذا اثبت علمياً وعملياً عندما تزوج نورالهدى الجيلاني راجل زينب بأخرى...
و لمن سألوهو عرستا ليه؟
قال: والله زينب دي ماقاعدة تفكُر (بضم الكاف) لي بالصباح مابتسوي الشاي...(بتصرف)
تخيلوا لم يسأله أحد مايقصد بعدم فّكرة (بفتح الفاء) زينب ولكن عززوا موقفه بقصة عدم الشاي..
بغض النظر عن ركاكة التشبيه وتهافت العلاقة
او كما قال التنين...
إلا انها كانت كافية انو نور الهدى الجيلاني يبرر عرسو لي سلوى ام كرعين بت عبدالحميد جارم....
ولي يوم الليلة دي لم يبح نورالهدى لأحد من المقربين ان السبب الأساسي للزواج كان كرعين سلوى وإنما كان لعدم تعاون زينب في تدعيم العلاقة الزوجية بعمل شاي الصباح...........
فيا سيدي ...
... عندك خيارين ياتخت سفنجاتك تحت راسك قبال تنوم... ولا تجي يوم تدوره شكله وتخبر مدامك انها لوشالت شقيانتك حتلحقه زينب مرة نورالهدي الجيلاني... ان سكتت كان بها وكان غير كدا....
اثبت للبجيبها الريح...اقيف انت ويشيلها الريح......
اما اذا كانت املاككم تحت إمضتها... امشي في البلاط الساقط واكله لباد....
....
ولا كمان في حل اخير... اشتري ليها قويشتين موديل
(لا عيرة لا سعد قشرة)... علي اساس ان يكون لنعلاتك حق الفيتو.....
وشكرا...
| |
|
|
|
|
|
|
|
|
|
بدون تعليق (Re: ShiningStar)
|
| Quote: اولم تدري مدامكم انو عدم تقديمها وتظبيطها للشاي باللبن المقنن في الصباح يؤدي الى زواغان عين البعل؟؟ |
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
خدر.... معليش لتأخير الرد, لكن حبوبتي التنيه كانت مشغولة في اشياء لا يهمكم امرها..... لكن اول من جات سألتهانعمات...
- حبوبه...موازين الجمال شن هي؟؟؟
- يا بت عثمان دقيقه النشيل نفسي ..
و واصلت مطنطنة... سماحة جبل الطين طايرة...
جلست في عنقريبه المعتاد و عدلت من مسيرته و تأفأفت .. غايتو جنس دا ما شفته... قالت هذه الكلمات وواصلت... بالله العظيم تكاسي الطرحة يا الله يا الله حتين تلم فين...
سرحت نعمات بخيالها ...
اتخيلت التكاسي الصفراء مرصوصه ومعظمها من ماركة هيلمان وموسكوفيتش في طابور طويل أمام زنك الخضار ... السواقين قاعدين يشربو في قهوة (ست النفر)... يتناقشون في همومهم اليوميه و السياسه .. انتخبوا حامد شاكر الرمز الفيل، لا لا انتخبوا عبد الجليل المحامي الرمز القطية، انتخبوا…
يقطع عليهم النقاش حسن الكمسيون.. - نفر بحري ، نفر واحد.. نفر والسفر.. يللا يا مبارك عربيتك تمت...
وتقطع حبوبتي حبل خيال نعمات بصوتها المبحوح من الكواريك... يا بت عسمان... يا بت هوووي... غايتو يا بتي الرايحه الله المك فيها..
- ياخي اها ورينا السماحه شن هي خلينا النفرتق...
-السماحة سماحة اللفظ يا ممسوخة...
احتجاجا منها علي جملة خلينا نفرتق
-الاخلاق و الليهيج السكر... اهما شي...
- ياخي ما تشبكينا اخلاق و تهذيب و الحاجات البتقولها لمن البت تكون شينه و يغلبكم تشكروها كيف...
- شكيتك علي الله ...
اخذت تدندن بشعر سيد عبد العزيز...
-لا قصر لا طول ربعة قامته و حسنه وصفه شرحه يطول
من دلال مسطول كم يواعد يمطل و المطل ممطول
القوام معدول و الوريد كالدمي و الاسيس مسدول
الكتيف مهدول بعضه نام فوق بعضو تقول حرير مجدول
- لكن النكلمك ... البت ان مابقت هديه و رضيه و كلامه طيب ان بقت تاجوج بتبقه شينة شنات ام شاشمبه....
_________________
حسن نجيله قال...
تسرق عيونها بشيش
و النار تقوم في قشيش
خدر.. الغنيه سمحة ...
يا لطيف يا لطيف
__________________________________
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: ShiningStar)
|
شايننغ صن
أما بعد
وقد وصلنا مكتوبكم وعرفنا ما فيه ..أما أن سألتم عننا فنحن بخير وعافية لا ينقصنا شئ إلا رؤياكم الغالية علينا وعدم مشاهدتكم وعن أخبارنا نحن في أول الموسم وبعد الحصاد سوف نبدا في إجراءت الزوجة الثانية ..
ونفيدكم بأن هذه الإجراءات تبدأ بالفكرة وقديما قالوا السايقة واصلة
وفي ختام جوابنا هذا نغريكم السلام كما ارجو أن تحملي تحياتي لراجل زينب وعريس عواطف ام ركبين وسعدية حواجب وكل الجيران لحدي الكدرو
وافيدك بأننا سوف نغير عنواننا من خدر المحولجي ، فهو من يوم رقوه لملاحظ خط لم يذهب لصندوق البريد عشان يجيب لينا الخطابات إلا حسين ملاسي بتعرفيه بتاع كشك المحطة جزاه الله خير جاب لينا رسالتك..
الوصية بالمهلة .. إذا كان في اي واحد جاي من طرفكم ترسلي لينا شدة نوع نادر برباط ابازين من نحاس ومخرمة مع شرابات بيضاء طويلة .. عشان الشتاء جاء والشقوق قشرت كعاباتي ولو في فازلين نوع ابو أسد برضو ورسليهم بدكان عمك راجل مغيزيلة التنتونة بيديهن ليها وهي بتوصلهن ..
جدكم المسافر
ملحوظة:
تقبلي تحيات كاتب هذا الجواب حميد ود العبيد وانا السنة دي داخل صف تامن رسلي لي شنطة كتب.. وقلم تروبن ريشة دهب
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
اليلللله و اليلله.. باصات ابورجيله...
اما بعد...
تحيات من عبر البحار... الي محمدية ود عبيد و منه الي مغزوليه بت المحولجي منه الي سيد الكشك و منه ال مسافر...
ياخي انعل ابو دي رساله زاتو...
اما بعدين...
سيدي المسافر.. نصيحة منا.. الغو الاجرأت المذكوره اعلاه... جنن تعرفو خير من جنن ماك خابرو.. قالهاموسي العجلاتي و هوعلي عجل.. و من دييك و عيييك
لقد بلغنا مؤخرا انو بعد زواج نور الهدي الجيلاني من سلوي كرعين.. لم يجد منها لا شاي لا ما بعد الشاي..
يعني كانت كأسمها تماما لا شئ فيها سوي كرعين (تحت تحت قالو كمان عندها رومتزم) الا بغدن لا بعشن.. حسي زولك قالو برمم في الكباري المحروقه مع ست الريد..في مقولة اخري مصدر الضوء..
لذلك نرجو الابتعاد عن مناطق الظل...
و كن اصريت شديدبرسل ليك التلكس حق حاج عسمان...
ملحوظه... انا ان عندي البجيب ليك بيهو شدة كان جبته لي روحي سفنجة اعوض بيها الانسحقت بقت بروه دي...يادوب مكفيه اصبعي الكبير...
قال ابازين قال
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: khider)
|
السيد ابو لمعه... ملاسي
شكيتن لي اللانام لا اكل الطعام... ناس بتريشا و نانسي و اليسا الخلونا منضره ما نعاين فوقا...
قال موية الوضو بتنور قال.... عليم الله كان بقينه شبه ذينتامان الهندية...
________________________________
خدر ... سعاد قالت ليك ما تنسه تجي و تجيب قروش الجكوكه و جرديلين ام سي سي الشلتهن يومتا...
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: ShiningStar)
|
اضبط..
المتواجدون الان بالمنبر الحر 138 شخص » (2 )عضو و (136) زائرا
»ShiningStar
»معتز تروتسكى
هذه الصفحة يعاد تحديثها كل 120 ثانية.
وكمان فضايح00
خدر ... سعاد قالت ليك ما تنسه تجي و تجيب قروش الجكوكه و جرديلين ام سي سي الشلتهن يومتا...
بالاضافه الى كمية اصحاب اوغاد لووووول
المسافر ..
ازيك يادفعه
الله على جيش
ميرى بس
ميرى اشوه
ده نومك بس
وملاسى بتاع الرجال كبار ولابسين فنايل كت
تعرف ياكوبى بيست حسين00
بنتلاقى قالوا فى الهدؤء
لقيتنى كيف ؟؟؟
يلا اخليكم مع مسلسل خدر شايننق استارز الحلقه (..)
ونعود بعد المسلسل
كل عام وانتم الحب00
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: المسافر)
|
معتز
كيفك انت
تعرف في سنة 1978 كنت جاي من الحاج يوسف ركبت مع عمنا من البلد في بوكسيه، قلت ليه لو ماشي بحري نزلني قصاد بيت ناس شبيكة، قال لي تسوي شنو هناك؟ قلت ليه ماشي لعمنا ابو دقن، بيتو جنب الكوبري، وبدينا الونسة قال لي بعرفو، كان عميد الكلية الحربية، وكان قائد المشاة في شندي، وكان ..وكان..وقالوا النميري ما بخاف من راجل إلا من أبودقن، وفي يوم 24 مايو واحد من الضباط مشى ليه في شندي قال ليه الخرطوم فيها شفع عايزين يعملوا انقلاب أديني المدفعية عطبرة والمشاة شندي وخليني اوقفها لهم في بحري.. وأناديهم ليك واحد واحد، ابودقن قال ليه أصبر للصباح، لكن في الصباح النميري خرب الحكاية كلها وعزلهم... وهسي ابودقن عينوه مدير المخازن والمهمات ، أول ما وصلنا قريب من موقف باصات شندي ، قال لي داير منو شنو ابودقن؟ قلت ليه دايرو يتوسط لي وأدخل الكلية الحربية ، قراية الجامعة دي ما منها فايدة..! والقى اليك الزول لف على باصات شندي وقال لي أنزل!! نزلت!! تعال بي جاي!! جيتو بالناحية التانية ؟ قال لي شفت الناس الشغالة في التذاكر دي ؟ أحسن ليك من حسي تمشي تشتغل معاهم وتبقى كومسنجي تذاكر وشحن لواري من تبقى ضابط في الجيش!! أسألني أنا.. مافي مظلة اتبنت في معسكر من معسكرات الجيش وإلا كنت أنا المقاول البناها.. وبعرفهم واحد واحد وعارف حياتهم كيف.. ما تغرك الأسبليطات والنجوم دي المركبنها.. وأولادي كان بسوهم كلهم ضباط ما بسمح لي واحد فيهم يدخل الجيش.. انسى موضوع أبودقن..ودور بوكسيه وفات.. ومن دربي داك قطعت كوبري النيل الأزرق كداري وعلى البركس..
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: المسافر)
|
اللخو
حبيينا المسافر..
تعرف قصتك دى قريبه من حكاية زول بعد بدا المعيانات بعدين رجع البركس..
خليك من ده كلو...
قول من تسكن جوه الكليه الحربيه زاتها .. مافضل لى الا بس تمام الصباح مع الطلبه ..
ياخى الخدمه مرات فى العيد بنسدها ليهم ...
وجنس حكاوى ...
ومن اشلاق لى اشلاق ..
ومن حامية الى حاميه ومن معسكر لى معسكر...
كدى لمن نجيك يى مهله....
*قالوا قالو على شقى ومجنون
صحيح مجنون وانتو جنونى يا الحلوين..
الوالد زاتو بعد خلاص فضل ليهو سنه من الجامعه..
قلبها درش..
ود الفار حفار...
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: معتز تروتسكى)
|
معتز
ايوه ... تعال بي مهلة
وصديق الكحلاوي.. يتجنن في شقي ومجنون
إلا ما عرفتو بقصد شنو لما يقول ترى ترى ترى ترى دقر يا عين
محمد عبد الرحمن
وينك يابروف
أكيد عجبتك تلميحات البنية الذكية شايننغ صن
بقيت تختار وتضع في الكوت
لكن انت عارف جنس محن
مدامنا عندها أشياء مش تثير اندهاش شايننغ صن
دي تثير الغبار زاتو
مش إهمال الشاي المقنن
دي عندها رأي في العشاء
وانو الناس تبيت على القوى وبطنها فاضية
تخيل ديمة في حجة العشاء في شكلة
بس صاحبك عارفو بتاع تصليحات فول
بقوم على المطبخ يقلبو لي ورشة عمل
البصل والدكوة والتونة البيضاء العائمة في زيت الزيتون
الجرجير المفروم
الليمون
وبعد ده لو الصحن قال خلو لي شوية بنكسرو
يلا نملاها البطن انشاء الله نوم الفيل
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: mulhim)
|
الجميله شاييننق بين قوسين نعمات
اقدم اعتذاري العميق للغياب القسري .. شويه مشاغل
و مراسيل و اشاعات حول قفل منظمه التجاره العاليمه
و ارتفاع اسعار الايجارات و قانون المصنفات الفنيه
الاخير الذي يُبيح لاي عواليق انو يغني غناء الفنانيين
الجد جد بعد مايلقاهو جاهز و بعد انتهاء شهور عده
الاغنيه المنكوبه ومغلوبه علي امرها.
الاحباب زوار البوست بقياده الارباب اب عمه المسافر
نشكر لكم جزيل اهتمامكم بأمر المغفور لها
بأذن الله .. البت الجميله ام عيون كُبار و حواجب قُلاد
نعمات شُرابات و ليجعله الله في ميزان حسناتكم انشاء
الله
اعدكم بالمرور حال انتهاء المشاكل اعلاه
الصوره دي عاجباني
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: خدر)
|
خدوري
عارف أخرك الشديد القوي
بالله ما دام في حزمتك الشغلانيات دول ما تكسر تزيدها
أضيف ليها الإرهاصات
أصله شاغلانا حكاية الإرهاصات
وكل يوم بنعاين للسماء وندنقر في واطات الله دي نقول ممكن الإرهاصات تظهر
وخافين بتاعين الحركة يعملوا جام ويعطلوها علينا
البنت نعمات شرابات جابت الصورة العاجباك دي
كل ما اعاين في عيونها اقول عيونها دي حية ولا شنو
كل ما أدور اتلفت منها القاها تفرفر
وجاتني شعور الموناليزا ولا الجوكندا
كل ما يشوفها واحد يقول بتبتسم
صابحني دايما مبتسم تجد الأزاهر حفتك مالت طرب حين شافتك
أيواتلك
في الشوف ده
كما قال الشاعر
عينيك ديل يعاينن لي يعانن لي
العيون النوم فارقها
والقلوب الشوق حارقها
سمحة.. فوقها الله الخالقة..
العيون التي في طرفها حور
قتلنا ثم لم يحيين قتلانا
يقتلن ذا للب حتى لا حراك به
وهن أضعف خلق الله إنسانا
عيون المها بين الرصافة والجسر
حملن الهوى من حيث تدري ولا أدري
في عيونك قسمة الشوق والملاقاة
أزاك يا عيوني
جبتي السهر لي روحك براك ياعيون
سمعتك تقول عيون كبار وحواجب غلاد
يلا أحكي لينا باقي القصة
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: mulhim)
|
mulhim
احبك جدا .. وعليك الله ورينا اللوحه دي الرسمها منو
وكيف و متين و نوع المتيريال ..
ياخي دي لوحه خطيييييييره
فيها توزيع خطير للضو و اللون
مريح انت ياخي
اعتقد انها زيت علي قماش
اعترافا بفضلك
/سأعطيك الباسوورد خاصتي
/و عدد 2 صندوق سجاير مارلبورو
/و يسمح لك بالتدخين علنا بالمحكمه
/و يمكنك استخدام مكنه الحلاقه خاصتي
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: المسافر)
|
يا المسافر
اوع لا تنسي
الحبيب ويين الليله كيف امسي
و قالو لي سافر
طيب ابدا من ويين انا هسه
ايوااااااااااااااااااه
الإرهاصات دي يا سيد اللمنتي ليك اصبحت لازمه .. من غيرها مابنقدر
نعيش .. و لاننا نحن ناس طيبين .. قبلناها و تعايشنا معاها
نجي لي غناينك المستهبلين ديل
Quote: كما قال الشاعر
عينيك ديل يعاينن لي يعانن لي |
ده شاعر مستهبل
او
شاعر بالصدفه .. المسأله دي لا فيها بحر لا شكل بلاغي ولا حرجل
عليك الله ده منو .. لانو اخر رصاصه في طبنجتي الخاتيها لليوم
الاسود وكتا جا .. هو في اسود من كده !!
لانو تعرف
احتمالات المُلهمه كتيره جدا
يمكن بتعاين لي الزول الوراهو
يمكن بتفكر بي تركيز
بمكن بتتصنط علي قطيعه البنات الجنبها
و
يمكن بتعاين في تلاليشو و ريالتو السايله
اذن احتمال انها بتعاين ليهو احتمال واحد يتيم
و احقاقا للحق يجب ان اعترف له بالذكاء
لانه صنع من كلمتين اسم و لقب شاعر
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: خدر)
|
Quote: و احقاقا للحق يجب ان اعترف له بالذكاء
لانه صنع من كلمتين اسم و لقب شاعر
|
خدوري
معك حق
شايف كيف موضوع شعره اللامنتمي للبحور والدهور جاب موضوع النظارات الأوفر شوت
وقصة النظارات الأوفر شوت دي حيرتي
مرة في مالطا لقيت جماعة جالسين وكلهم لابسين نظارات أوفر شوت
واحد قال لي أعمل حسابك في المنطقة دي مسموح لبس النظارات الأوفر شوت
والبجي هنا على مسئوليته
على نفسها جنت براقع
مع انه الناس أغلبها لابسة براقع ومن غير هدوم
قال لي النظارات دي عابرة الهدوم
يعني تطفشها وتقشرك كما تلد اليرقة النحلة
وان طارت تبقى نحلة
وان ركت تبقى هدومك يرقة
وأعاين في الناس مستمخة تعاين لي للناس البتعاين لولاد الناس وبنات الناس
والنوع ده من النظارات ما عندو مشكلة مع موضوع ملاسي
يعني مشاكلها محلولة بالليل والنهار
فهي تشتغل بالجس المباشر
خدوري
تخريمة
اغنياتك ديل بقن ما بشتغلن ويأخرن البوست ما بيفتح معانا
غيرهن ياخي
جيب أغنية
الزي فريع البان في الرقصة تتنى
الزي سواد الليل في إيديها دي الحنة
والنهود تهتز هو ده المجننا
والموضوع مطروح على مشروع النظارات الأوفر شوت
| |
|
|
|
|
|
|
|
|
|
Re: شايننق استارز .. و استدعني يا طيف فربما عادت (Re: خدر)
|
mulhim
احبك جدا .. وعليك الله ورينا اللوحه دي الرسمها منو
وكيف و متين و نوع المتيريال ..
ياخي دي لوحه خطيييييييره
فيها توزيع خطير للضو و اللون
مريح انت ياخي
اعتقد انها زيت علي قماش
اعترافا بفضلك
/سأعطيك الباسوورد خاصتي
/و عدد 2 صندوق سجاير مارلبورو
/و يسمح لك بالتدخين علنا بالمحكمه
/و يمكنك استخدام مكنه الحلاقه خاصتي
يا مُلهم
| |
|
|
|
|
|
|
|
|
 Re: شايننق استارز .. و استدعني يا طيف فربما عادت (Re: خدر)
|
مولانا خدر .. سلام ..اسف على الرد المتاخر نسبة لظروف نهاية الاسبوع .. وسعيد كل السعاده ان اتيارى نال اعجاب مولانا خدر .. وتم تعليق اللوحة اختيارى على جدار المحكمة الموقره.. وسعيد اكتر بانى احمل والبس شارة حب مولانا خدر لى.. وانو عندى كل الخصوصيات القتها دى..بس عندى طلب انى اتعين حاجب ومنادى وعضو هيئة محكمه ..ولكم الشكر..
اللوحه هى رسم Leslie Clark وهى كم زكرتم زيت على قماش وهى من نتاج رحلات لسلى فى افريقيا وصحراء النيجر بالتحديد..ولسلى تستخدم ماتريالس متنوعه oil,watercolor,graphite,pastel and goldleaf ..انا طبعا ما رسام ولا خبير لكن اللوحه دى وكتير من اعمال الرسامه عاجبانى جدا..ولك منى كل الود.. ملهم
| |
|
|
|
|
|
|
| |
khider
Hussein Mallasi
ايهاب
الجندرية
وليد محمد المبارك
اساسي
معتصم دفع الله
PLAYER
المسافر
شتات
خدر
معتز تروتسكى
waleed500
mulhim
فيس بوك
تويتر
انستقرام
يوتيوب
بنتيريست